ᓴᒧᐃᓕ ᐂᑉᐸᖏᑦ 14
14
ᔪᐊᐱᐅᑉ ᐋᖅᑭᒃᓱᐃᓂᖓ ᐋᑉᓴᓚᐅᑉ ᐅᑎᕐᓂᒃᓴᖓᓄᑦ
1ᔪᐊᐱ ᔨᕈᐃᐊᐅᑉ ᐃᕐᓂᖓ ᖃᐅᔨᒪᒐᒥ ᐊᖓᔪᖅᑳᕐᔪᐊᑉ ᑍᕕᑎᐅᑉ ᑭᐱᓂᐊᕐᓂᖓᓂᒃ ᐋᑉᓴᓚᒻᒧᑦ. 2ᑍᒤᒻᒪᑦ ᔪᐊᐱ ᐊᕐᓇᒥᒃ ᓯᓚᑐᔪᒻᒪᕆᖕᒥᒃ ᕾᖁᔨᓚᐅᕐᐳᖅ ᓄᓇᖃᕐᑐᒥᒃ ᑎᑯᐊᒥ. ᑎᑭᒻᒪᓪᓗ, ᐅᖃᐅᑎᕚ, “ᕿᒃᓵᓐᖑᐊᕐᓗᑎᑦ; ᐊᓐᓄᕌᓪᓗ ᕿᒃᓵᒍᑎᑎᑦ ᐊᑎᓗᒋᑦ, ᓄᔭᑎᓪᓗ ᐃᓪᓔᕐᑍᓕᓗᒋᑦ, ᐊᕐᓇᑎᑐᑦ ᐊᑯᓂᐊᓗᒃ ᑐᖁᓯᒪᔪᓄᑦ ᕿᒃᓵᒃᑐᑎᑐᑦ ᐱᓂᐊᕐᐳᑎᑦ; 3ᐊᖓᔪᖅᑳᕐᔪᐊᕐᒧᐊᕈᕕᑦ ᐅᖃᐅᑎᓂᐊᕐᐸᑦ ᐅᖃᐅᓯᕆᖁᔭᓐᓂᒃ.” ᔪᐊᐱᐅᓪᓗ ᐅᖃᐅᑎᓚᐅᕐᐹ ᐅᖃᐅᓯᕆᖁᔭᒥᓂᒃ.
4ᑕᕝᕙ ᐊᕐᓇᖅ ᑎᑯᐊᒥᐅᑕᖅ ᐊᖓᔪᖅᑳᕐᔪᐊᕐᒧᐊᕐᐳᖅ, ᒪᓂᖅᑲᒧᓪᓗ ᐅᑯᕗᖅ ᐃᒃᐱᒍᓱᑦᓯᐊᕐᓂᕐᒧᑦ, ᐅᖃᕐᓗᓂᓗ, “ᐊᖓᔪᖅᑳᕐᔪᐊᖅ, ᐃᑲᔪᓚᐅᓐᖓ.”
5ᐊᖓᔪᖅᑳᕐᔪᐊᑉ ᐊᐱᕆᕚ, “ᓱᓇᒦᒃ ᐱᔪᒪᕖᑦ?”
ᑭᐅᕗᖅ, “ᐅᐃᒡᒐᕐᓂᐅᕗᖓ, ᐅᐃᒐ ᑐᖁᓯᒪᖕᒪᑦ. 6ᐃᕐᓂᖃᓚᐅᕋᒪ ᒪᕐᕉᖕᓂᒃ, ᐅᓪᓗᐃᑦ ᐃᓚᖓᓂ ᐂᕙᖃᑎᒌᓕᓚᐅᕐᐴᒃ ᐱᕈᕐᓰᕕᖕᒥ, ᓇᐅᒥᒡᓘᓐᓃᑦ ᓄᖅᑲᕐᑎᑦᓯᔨᒃᓴᖃᕋᑎᒃ, ᐂᑉᐸᖓᑕ ᐱᒋᐊᕋᒥᐅᒃ ᑐᖁᓚᐅᕐᐹ. 7ᒫᓐᓇᓕ ᐃᓚᓕᒫᒃᑲ ᐅᕙᓐᓂᒃ ᐊᑭᕋᕐᑐᓕᕐᐳᑦ, ᐃᕐᓂᓐᓂᒡᓗ ᑐᖁᑦᓯᔪᒪᓪᓗᑎᒃ ᑐᖁᑦᓯᓂᕆᓚᐅᕐᑕᖓ ᖃᑕᓐᖑᑎᒥᓂᒃ ᐱᓪᓗᒍ; ᑍᒤᑐᐊᕐᐸᑕᓗ, ᐃᕐᓂᖃᕈᓐᓁᕐᓂᐊᕐᐳᖓ. ᐱᔪᓐᓇᐅᑎᑐᐊᕋᓗ ᓱᒃᑯᑕᐅᓂᐊᕐᐳᖅ ᐅᐃᒐᓗ ᐃᕐᓂᖃᕈᓐᓃᕐᓂᐊᕐᐳᖅ ᐊᑎᖓᓗ ᑲᔪᓯᑎᑦᓯᔨᒃᓴᖃᕈᓐᓃᕐᓗᓂ ᓄᓇᕐᔪᐊᒥ.”
8ᑕᕝᕙ ᐊᖓᔪᖅᑳᕐᔪᐊᖅ ᑭᐅᕗᖅ, “ᐊᖏᕐᕋᓕᕆᑦ, ᑕᒪᓐᓇ ᑲᒪᒋᔭᐅᑎᓐᓂᐊᕐᐸᕋ ᐱᑦᔪᑎᒋᓗᑎᑦ.”
9ᐊᕐᓇᖅ ᑎᑯᐊᒥᐅᑕᖅ ᐅᖃᕐᐳᖅ, “ᓱᓇᑐᐃᓐᓇᒥᒃ ᐱᓇᓱᐊᕐᓂᐊᕈᕕᑦ ᐃᓚᒃᑲ ᐸᓯᔭᒃᓴᐅᓂᐊᕐᐳᑦ, ᐊᑕᓂᕋ ᐊᖓᔪᖅᑳᕐᔪᐊᕋ; ᐃᕝᕕᑦ ᐃᓚᑎᓪᓗ ᐊᖓᔪᖅᑳᑉ ᐃᓚᖏᑦ ᐸᓯᔭᒃᓴᐅᓂᐊᓐᖏᓚᑦ ᑕᒪᑐᒧᖓ.”
10ᐊᖓᔪᖅᑳᕐᔪᐊᖅ ᑭᐅᕗᖅ, “ᑭᓇᑐᐃᓐᓇᒧᑦ ᑲᑉᐱᐊᓵᕐᑕᐅᓐᓂᕈᕕᑦ, ᐅᕙᓐᓄᐊᕐᑎᓐᓂᐊᕐᐸᑦ, ᐸᒡᕕᓴᒃᑕᐅᑎᒃᑲᓐᓂᕐᓂᐊᓐᖏᓚᒋᑦ ᑖᑦᓱᒧᖓ.”
11ᐊᕐᓇᖅ ᐅᖃᕐᐳᖅ, “ᑐᒃᓯᐊᓚᐅᕆᑦ ᐊᑕᓂᕐᒧᑦ ᒎᑎᖕᓄᑦ, ᑍᓐᓇ ᐃᓚᒐ ᐊᑭᒋᐊᕐᑐᒃᓴᖅ ᐃᕐᓂᕐᒪ ᑐᖁᑕᐅᓚᐅᕐᓂᖓᓄᑦ ᐊᖏᓂᕐᓴᒥᒃ ᐱᓂᕐᓗᖁᓇᒍ ᐃᕐᓂᕐᒪ ᐂᑉᐸᖓᓂᒃ ᑐᖁᑦᓯᒃᐸᑦ.”
ᑍᕕᑎ ᑭᐅᕗᖅ, “ᐊᑕᓂᖅ ᐃᓅᖕᒪᑦ, ᐃᕐᓂᕕᑦ ᓄᔭᖓᓂᒃ ᐊᑕᐅᓯᕐᒥᒡᓘᓐᓃᑦ ᓄᓇᒧᑦ ᑲᑕᒃᑐᖃᕐᓂᐊᓐᖏᓚᖅ.”
12ᐊᕐᓇᖅ ᐅᖃᕐᐳᖅ, “ᐊᑕᐅᓯᕐᒥᒃ ᓱᓕ ᐅᖃᕆᐊᓪᓚᑬᓐᓇᕐᓚᖓ ᐊᑕᓂᓐᓄᑦ ᐊᖓᔪᖅᑳᕐᔪᐊᓐᓄᑦ.”
ᑖᓐᓇ ᑭᐅᕗᖅ, “ᐊᑏ ᐅᖃᓕᕆᑦ.”
13ᐊᕐᓇᐅᑉ ᐅᖃᐅᑎᕚ, “ᓱᖕᒪᓪᓕ ᐃᓱᒪᖃᕐᓯᒪᕖᑦ ᓈᒻᒪᖏᑦᑐᒥᒃ ᒎᑎᐅᑉ ᐃᓄᖁᑎᖏᓐᓅᑦ? ᐃᕐᓃᑦ ᐊᖏᕐᕋᕈᓐᓁᓪᓕᑎᓯᒪᒐᕕᐅᒃ ᐊᐅᓪᓚᕐᓯᒪᕕᖓᓂᑦ, ᐃᓕᖕᓂᒃ ᐸᓯᔭᒃᓴᓐᖑᕐᑎᓯᒪᕗᑎᑦ ᐅᖃᐅᓯᕆᕋᑖᕐᑕᕐᓄᑦ. 14ᑕᒪᑦᑕ ᑐᖁᔪᒃᓴᐅᕗᒍᑦ; ᐃᒥᕐᑐᑦ ᑍᒤᑉᐳᒍᑦ ᓄᓇᒧᑦ ᑯᕕᔭᐅᔪᑎᑐᑦ, ᑲᑎᑕᐅᓗᑎᒃ ᐅᑎᕐᑎᑕᐅᒃᑲᓐᓂᕈᓐᓁᓪᓕᔪᑎᑐᑦ; ᐊᒡᓛᑦ ᒎᑎᐅᑉ ᑐᖁᖓᔪᑦ ᐅᑎᕐᑎᖃᑦᑕᖏᒻᒪᒋᑦ, ᐊᖓᔪᖅᑳᕐᔪᐊᕐᓕ ᐃᓄᖕᒥᒃ ᐅᑎᕐᑎᑦᓯᔪᓐᓇᕐᐳᖅ ᓇᕐᕈᒋᔭᐅᓕᕐᓯᒪᔪᒥᒃ. 15ᒫᓐᓇᓕ ᐅᖃᕆᐊᕐᑐᕐᓯᒪᕗᖓ ᑕᒪᑐᒥᖓ ᐊᑕᓂᓐᓄᑦ ᐊᖓᔪᖅᑳᕐᔪᐊᓐᓄᓪᓗ ᐃᓄᖕᓄᑦ ᓯᕘᕋᓵᕐᑕᐅᓯᒪᓂᕋ ᐱᓪᓗᒍ; ᐃᓱᒪᓚᐅᕋᒪ ᐃᓕᖕᓄᑦ ᐅᖃᕆᐊᕐᑐᕈᒪᓪᓗᖓ ᓂᕆᐅᖕᓂᖃᕐᓗᖓ ᑐᒃᓯᕋᐅᑎᓐᓂᒃ ᐱᓇᓱᐊᕈᓐᓇᕋᔭᕐᑐᕆᓪᓗᑎᑦ. 16ᐃᓱᒪᓚᐅᕋᒪ ᓈᓚᒍᓐᓇᕋᓱᒋᓪᓗᑎᑦ ᐱᐅᓕᓯᔪᓐᓇᕋᓱᒋᓪᓗᑎᓪᓗ ᐅᕙᓐᓂᒃ ᐃᕐᓂᓐᓂᒡᓗ ᑐᖁᑦᓯᓇᓱᐊᕐᑐᒥᒃ ᓄᓇᒥᑦ ᐲᕐᓯᓇᓱᐊᕐᑐᒥᑦ ᐅᕙᑦᑎᓐᓂᒃ ᒎᑎᐅᑉ ᑐᓂᓚᐅᕐᑕᖓᓂᒃ ᐃᓄᖁᑎᒥᓄᑦ. 17#ᓴᒧᐃᓕ ᐂᑉᐸᖏᑦ 19:27.ᐃᓱᒪᓚᐅᕋᒪ, ᐊᖏᕈᑎᒋᔭᖓ ᐊᑕᓂᕐᒪ ᐊᖓᔪᖅᑳᕐᔪᐊᒪ ᐅᕙᓐᓂᒃ ᓴᐳᑦᔨᔪᓐᓇᕐᒪᑦ, ᐊᑕᓂᕋ ᐊᖓᔪᖅᑳᕐᔪᐊᕋ ᒎᑎᐅᑉ ᐂᖏᓕᖁᑎᒋᔮᕐᒪᒍ ᖃᐅᔨᔪᓐᓇᕐᑐᖅ ᐱᐅᔪᒥᒃ ᐱᐅᖏᑦᑐᒥᒡᓗ. ᐊᑕᓂᐅᑉ ᒎᑎᕕᑦ ᐃᓚᒋᓕᑎᑦ!”
18ᑕᕝᕙ ᐊᖓᔪᖅᑳᕐᔪᐊᑉ ᐊᕐᓇᖅ ᑭᐅᕚ, “ᐊᐱᕆᓂᐊᕋᒃᑭᑦ, ᓱᓕᑦᓯᐊᕐᑐᒥᒃ ᐅᖃᕐᑐᒃᓴᐅᕗᑎᑦ.”
ᐊᕐᓇᖅ ᑭᐅᕗᖅ, “ᓱᓇᑐᐃᓐᓇᕐᒥᒃ ᐊᐱᕆᓚᐅᓐᖓ, ᐊᑕᓂᕋ ᐊᖓᔪᖅᑳᕐᔪᐊᕋ.”
19ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᔪᐊᐱᐅᑉ ᑕᒪᑐᒥᖓ ᑍᒤᓕᐅᕐᑎᑉᐹᑏᑦ?”
ᐊᕐᓇᖅ ᑭᐅᕗᖅ ᐅᖃᕐᓗᓂᓗ, “ᐃᓅᒐᕕᑦ, ᐊᑕᓂᕋ ᐊᖓᔪᖅᑳᕐᔪᐊᕋᓗ, ᓱᓕᑦᓯᐊᕐᐳᖓ ᐊᐱᖅᑯᑎᒋᔧᑦ ᓴᓂᖅᑯᒐᒃᓴᐅᖏᒻᒪᑦ ᑕᓕᕐᐱᒧᑦ ᓴᐅᒥᒧᓪᓘᓐᓃᑦ, ᐃᓛᒃ ᐱᔨᕕᑦ ᔪᐊᐱᐅᑉ ᑍᒤᓕᐅᕐᑎᑉᐹᖓ; ᐅᖃᐅᓯᒃᓴᓕᐅᓚᐅᕐᐹᖓᓗ. 20ᑍᒫᒃ ᔪᐊᐱ ᐱᓇᓱᐊᓚᐅᕐᐳᖅ ᑕᒪᓐᓇ ᐱᓂᐊᕐᓂᐅᔪᖅ ᐋᖅᑭᑦᓯᐊᕈᒪᓪᓗᒍ. ᐃᕝᕕᓪᓕ ᐊᖓᔪᖅᑳᕋ ᓯᓚᑐᓂᖃᕐᐳᑎᑦ ᒎᑎᐅᑉ ᐂᖏᓕᖓᑐᑦ ᖃᐅᔨᒪᓪᓗᑎᓪᓗ ᖃᓄᐃᓐᓂᓕᒫᓂᒃ.”
21ᑭᖑᓂᖓᒍᑦ ᐊᖓᔪᖅᑳᕐᔪᐊᖅ ᔪᐊᐱᒧᑦ ᐅᖃᕐᐳᖅ, “ᑕᑯᒋᑦ, ᑐᑭᑖᕐᓯᒪᓕᕐᐳᖓ ᐊᑐᕈᒪᔧᑦ ᐊᑐᕈᒪᓪᓗᒍ; ᐂᓕᕆᑦ ᐅᕕᒃᑲᕐᓗ ᑍᓇ ᐋᑉᓴᓚᒻ ᑕᒪᐅᖓ ᐅᑎᕐᑎᓪᓗᒍ.”
22ᔪᐊᐱᓗ ᓄᓇᒧᑦ ᐹᒻᒪᒃᐳᖅ ᑍᕕᑎᐅᑉ ᓵᖓᓄᑦ ᐅᐱᒍᓱᖕᓂᕐᒧᑦ, ᐊᖓᔪᖅᑳᕐᔪᐊᕐᓗ ᓂᕐᑐᕐᓗᒍ; ᐅᖃᕐᐳᖅ, “ᒫᓐᓇ ᖃᐅᔨᕗᖓ ᐅᕙᓐᓂᒃ ᖁᕕᐊᒋᔭᖃᕋᕕᑦ, ᒎᑎᐅᑉ ᓮᒻᒪᕐᑎᓪᓕᑎᑦ ᐊᖓᔪᖅᑳᒃ! ᐱᔪᒪᔭᓐᓂᒃ ᐱᔪᓐᓇᕐᑎᑦᓯᒐᕕᑦ.” 23ᔪᐊᐱᓗ ᒪᑭᓪᓗᓂ ᒋᓱᕅᒧᑦ ᐂᕗᖅ, ᐋᑉᓴᓚᒻᓗ ᐅᑎᐅᑎᓚᐅᕐᐹ ᔨᕉᓴᓕᒧᑦ. 24ᐊᖓᔪᖅᑳᕐᔪᐊᕐᓕ, ᐅᖃᓚᐅᕐᐳᖅ, “ᓇᖕᒥᓂᖅ ᐃᓪᓗᖃᕐᑐᒃᓴᐅᕗᖅ; ᓇᔪᕐᑕᓐᓄᐊᖃᑦᑕᕆᐊᖃᓐᖏᓚᖅ.” ᑍᒤᒻᒪᑦ ᐋᑉᓴᓚᒻ ᐊᖏᕐᕋᖃᓚᐅᕐᐳᖅ ᓇᖕᒥᓂᕐᒥᓂᒃ, ᐊᖓᔪᖅᑳᕐᔪᐊᓪᓗ ᓇᔪᕐᑕᖓᓄᐊᖃᑦᑕᕋᓂ.
ᐋᑉᓴᓚᐅᑉ ᓮᒻᒪᖃᑎᖃᕐᓂᖓ ᑍᕕᑎᒥᒃ
25ᖃᐅᔨᒪᔭᐅᔪᖃᓚᐅᓐᖏᓚᖅ ᐃᓴᕆᐊᓕᒥᐅᓂ ᐋᑉᓴᓚᐅᑉ ᐃᓂᖁᓇᕐᓂᖓᑐᑦ; ᐱᐅᖏᓐᓂᖃᓚᐅᓐᖏᓚᖅ ᓂᐊᖁᐊᓂᑦ ᐱᒋᐊᕐᓗᒍ ᐃᑎᒐᖏᓐᓄᑦ ᑎᑭᓪᓗᒍ. 26ᓄᔭᖏᑦ ᐃᑦᔪᔪᐊᓘᓚᐅᕐᐳᑦ, ᐊᕐᕌᒍᑕᒫᓪᓗ ᑭᐱᔭᕆᐊᖃᖃᑦᑕᓚᐅᕐᐰᑦ, ᑕᑭᒡᓕᓗᐊᕅᖕᒪᑕ ᐅᖁᒤᓗᐊᓕᕌᖓᑕᓗ. ᐅᖁᒤᓐᓂᖃᕐᐸᓚᐅᕐᐳᑦ 5ᐸᐅᒥᒃ ᐊᖓᔪᖅᑳᕐᔪᐊᑉ ᐅᖁᒤᓐᓂᕐᓯᐅᑎᖏᑦ ᑍᑦᓱᒪᓂ ᒪᓕᒡᓗᒋᑦ. 27ᐋᑉᓴᓚᒻ ᐃᕐᓂᖃᓚᐅᕐᐳᖅ ᐱᖓᓱᓂᒃ, ᐊᑕᐅᓯᕐᒥᒡᓗ ᐸᓂᖃᕐᓗᓂ ᑕᒫᕆᒥᒃ ᐊᑎᓕᖕᒥᒃ, ᑖᓐᓇᓗ ᐃᓂᖁᓇᕐᑐᒻᒪᕆᐊᓘᓚᐅᕐᐳᖅ.
28ᐋᑉᓴᓚᒻ ᔨᕉᓴᓕᒦᓚᐅᕐᐳᖅ ᐊᕐᕌᒍᖕᓂᒃ ᒪᕐᕉᖕᓂᒃ, ᐊᖓᔪᖅᑳᕐᔪᐊᕐᒥᒃ ᑕᑯᓚᐅᕐᓯᒪᓇᓂ. 29ᑕᕝᕙ ᔪᐊᐱᒥᒃ ᕾᖁᔨᓚᐅᕐᐳᖅ, ᐊᐱᕆᔪᒪᓪᓗᒍ ᐊᖓᔪᖅᑳᕐᔪᐊᒧᐊᕈᓐᓇᕐᒪᖔᑦ; ᔪᐊᐱᓕ ᕾᔪᒪᓚᐅᓐᖏᓚᖅ. ᐋᑉᓴᓚᐅᑉ ᐂᑉᐸᖓᓂᒃ ᕾᖁᒋᐊᓪᓚᓚᐅᕐᐹ, ᔪᐊᐱᓕ ᓱᓕ ᕾᔪᒪᓚᐅᓐᖏᓚᖅ. 30ᑍᒤᒻᒪᑦ ᐋᑉᓴᓚᒻ ᐱᔨᒥᓄᑦ ᐅᖃᕐᐳᖅ, “ᑕᑯᒋᑦ, ᔪᐊᐱᐅᑉ ᐱᕈᕐᓯᕕᖁᑎᖓ ᐱᕈᕐᓰᕕᖁᑎᒪ ᓴᓂᐊᓃᑉᐳᖅ, ᓂᐊᖂᔭᒃᓴᖏᑦ ᐱᕈᓕᕐᒪᑕ; ᐂᓚᐅᕆᑦᓯ ᐃᑯᐊᓪᓚᒋᐊᕐᑐᕐᓗᒍ.” ᑍᒤᒻᒪᑦ ᐱᔨᖏᑦ ᐂᓚᐅᕐᐳᑦ ᐱᕈᕐᓰᕕᖁᑎᖓᓗ ᐃᑯᐊᓪᓚᒡᓗᒍ.
31ᑕᕝᕙ ᔪᐊᐱ ᐂᕗᖅ ᐋᑉᓴᓚᐅᑉ ᐃᒡᓗᖓᓄᑦ ᐊᐱᕆᓪᓗᓂᓗ, “ᓱᖕᒪᑦ ᐱᔨᑎᑦ ᐃᑯᐊᓪᓔᒋᐊᕐᑐᓚᐅᕐᐹᑦ ᐱᕈᕐᓰᕕᖁᑎᓐᓂᒃ?”
32ᐋᑉᓴᓚᒻ ᔪᐊᐱᒧᑦ ᑭᐅᕗᖅ, “ᕾᖁᔨᑎᓪᓗᖓ ᕾᔪᒪᓚᐅᖏᓐᓇᕕᑦ, ᐊᖓᔪᖅᑳᕐᔪᐊᒧᐊᖁᓚᐅᕋᒃᑭᑦ ᐊᐱᕆᖁᓪᓗᑎᑦ, ‘ᓱᖕᒪᑦ ᒋᓱᕅᒥᒃ ᕿᒤᓚᐅᕐᐳᖔ ᐅᕙᓐᓄᑦ ᐱᐅᓂᕐᓴᐅᒐᔭᓚᐅᕐᐳᖅ ᑍᑲᓃᖏᓐᓇᓚᐅᕈᒪ.’” ᐋᑉᓴᓚᒻ ᐅᖃᕆᐊᓪᓚᒃᐳᖅ, “ᑍᒤᒻᒪᑦ ᐋᖅᑭᒃᓱᐃᖁᕙᒋᑦ ᐊᖓᔪᖅᑳᕐᔪᐊᕐᒥᒃ ᑕᑯᔪᓐᓇᕐᓯᖁᓗᖓ, ᐸᓯᔭᒃᓴᐅᒍᒪᓗ ᐊᑏ ᑖᑦᓱᒪ ᑐᖁᓚᐅᕐᓛᖓ.”
33ᑕᕝᕙ ᔪᐊᐱ ᐊᖓᔪᖅᑳᕐᔪᐊᕐᒧᐊᕐᐳᖅ ᐅᖃᐅᑎᓪᓗᒍᓗ; ᐋᑉᓴᓚᐅᑉ ᐅᖃᐅᓯᕆᖁᔭᖓᓂᒃ. ᑕᕝᕙ ᐊᖓᔪᖅᑳᕐᔪᐊᖅ ᕾᖁᔨᓕᕐᐳᖅ ᐋᑉᓴᓚᒻᒥᒃ, ᑖᓐᓇ ᐊᖓᔪᖅᑳᕐᔪᐊᕐᒧᐊᕋᒥ ᓄᓇᒧᑦ ᐹᒻᒪᒃᐳᖅ ᐊᖓᔪᖅᑳᕐᔪᐊᑉ ᓯᕗᕌᓄᑦ; ᐊᖓᔪᖅᑳᕐᔪᐊᓪᓗ ᑐᓐᖓᓱᒃᑎᓪᓗᒍ ᐋᑉᓴᓚᒻ ᑯᓂᒃᐹ.
Currently Selected:
ᓴᒧᐃᓕ ᐂᑉᐸᖏᑦ 14: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
