ᓴᒧᐃᓕ ᐂᑉᐸᖏᑦ 13
13
ᐋᒻᓇᓐᑯᒃ ᑕᒫᕆᒃᑯᒃ
1ᑍᕕᑎᐅᑉ ᐃᕐᓂᖓ ᐋᑉᓴᓚᒻ ᓇᔭᖃᓚᐅᕐᐳᖅ ᐃᓂᖁᓇᕐᑐᐊᓗᖕᒥᒃ ᐊᑎᖃᕐᑐᒥᒃ ᑕᒫᕆᒥᒃ; ᐋᒻᓇᓐ, ᑍᕕᑎᐅᑉ ᐃᕐᓂᕆᖕᒥᔭᖓ, ᑭᖑᓂᖓᒍᑦ ᐱᐅᒃᓴᓕᓚᐅᕐᐳᖅ ᑖᑦᓱᒥᖓ. 2ᐋᒻᓇᓕ ᐱᐅᒃᓴᓗᐊᕐᓂᑯᒧᑦ ᑕᒫᕆᒥᒃ ᖃᓂᒻᒪᓚᐅᕐᐳᖅ, ᐊᔪᕐᓇᑦᓯᐊᕐᑑᔭᓚᐅᕐᒪᑦ ᐱᓇᓱᒐᔭᕆᐊᖅ ᑖᑦᓱᒥᖓ, ᐊᖑᒻᒥᒃ ᐊᒃᑐᕐᓯᓚᐅᕐᓯᒪᖏᓐᓂᖓᓄᑦ ᑲᓱᐃᑎᑕᐅᔪᓐᓇᓚᐅᓐᖏᓚᖅ ᐊᖑᑎᓂᒃ. 3ᐋᒻᓇᓕ ᐃᓚᓐᓇᕆᔭᖃᓚᐅᕐᐳᖅ ᐊᑎᓕᖕᒥᒃ ᔫᓇᑖᑉᒥᒃ, ᑍᕕᑎᐅᑉ ᖃᑕᓐᖑᑎᖓᑕ ᓯᒥᐊᑉ ᐃᕐᓂᖓᓂᒃ; ᑖᓐᓇ ᔫᓇᑖᑉ ᓯᓔᕐᕆᒃᓯᒃᑲᒻᒪᕆᐊᓘᓚᐅᕐᐳᖅ. 4ᔫᓇᑖᑉ ᐅᖃᕐᐳᖅ ᐋᒻᓇᓐᒧᑦ, “ᐊᖓᔪᖅᑳᕐᔪᐊᕐᒧᑦ ᐃᕐᓂᕆᔭᐅᓪᓗᑎᑦ, ᓱᖕᒪᑦ ᖃᐅᑕᒫᑦ ᖁᕕᐊᓱᖃᑦᑕᓐᖏᓚᑎᑦ; ᖃᓄᐃᒃᑲᕖᑦ?”
ᐋᒻᓇᓐ ᑭᐅᕗᖅ, “ᐱᐅᒃᓴᕐᑐᐊᓘᒐᒪ ᑕᒫᕆᒥᒃ ᐊᑖᑕᖃᑎᒪ ᐊᖓᔪᒪ ᐋᑉᓴᓚᒻ ᓇᔭᖓᓂᒃ.”
5ᔨᕼᐅᓇᑕᐅᑉ ᐅᖃᐅᑎᕚ, “ᖃᓂᒪᓐᖑᐊᕐᓗᑎᑦ ᓯᓂᒡᕕᖕᓂ ᐃᓐᓇᖓᓚᐅᕆᑦ; ᐊᑖᑕᕕᑦ ᑕᑯᔭᕐᑐᕐᐹᑎᑦ ᐅᖃᐅᑎᓂᐊᕐᐸᑦ, ‘ᓇᔭᒐ ᑕᒫᕆ ᓂᕿᓕᐅᕆᐊᕐᑐᖁᓚᐅᕈᒃ ᑕᑯᓐᓇᕐᑎᓪᓗᖓ, ᓇᖕᒥᓂᕐᓗ ᑖᑦᓱᒪᓐᖓᑦ ᓂᕆᑎᑕᐅᖁᓪᓗᖓ.’” 6ᑕᕝᕙ ᐋᒻᓇᓐ ᖃᓂᒪᓐᖑᐊᓚᐅᕐᐳᖅ ᓯᓂᒡᕕᖕᒥ ᓇᓪᓚᖓᓪᓗᓂ.
ᐊᖓᔪᖅᑳᕐᔪᐊᓪᓗ ᑍᕕᑎᐅᑉ ᑕᑯᔭᕐᑐᕐᒪᒍ, ᐋᒻᓇᐅᑉ ᐅᖃᐅᑎᕚ, “ᓇᔭᒐ ᑕᒫᕆ ᓂᕿᓕᐅᕆᐊᕐᑐᖁᓚᐅᕈᒃ ᓂᕿᓕᐅᕐᓗᓂ ᑕᒫᓂ ᑕᑯᓐᓇᕐᑎᓪᓗᖓ, ᑖᑦᓱᒪᓐᖓᑦ ᓇᖕᒥᓂᖅ ᓂᕆᑎᑕᐅᔪᓐᓇᖁᓪᓗᖓ.”
7ᑕᕝᕙ ᑍᕕᑎ ᐅᖃᕆᐊᕐᑐᕐᑎᑦᓯᓚᐅᕐᐳᖅ ᑕᒫᕆᒧᑦ ᐊᖏᕐᕋᕐᓯᒪᔪᒧᑦ, ᐅᖃᕐᓗᓂ, “ᐋᒻᓇᐅᑉ ᐃᒡᓗᖓᓄᐊᓚᐅᕆᑦ ᓂᕿᓕᐅᕆᐊᕐᑐᕐᓗᑎᑦ ᑖᑦᓱᒧᖓ.” 8ᑕᒫᕆᓗ ᑍᑯᓐᖓᕋᒥ ᐋᒻᓇ ᑕᑯᕚ ᓯᓂᒡᕕᖕᒥ ᐃᓐᓇᖓᔪᖅ. ᑕᕝᕙ ᓂᐊᖂᔭᒃᓴᒥᒃ ᓴᓇᓚᐅᕐᐳᖅ, ᓂᕿᓕᐅᕐᓗᓂᓗ ᑕᑯᓐᓇᕐᑎᓪᓗᒍ. 9ᓂᕿᓕᐅᕇᕋᒥ ᓂᕿᓕᐅᕐᑕᓂ ᓵᒧᐊᕐᐰᑦ ᑐᓂᓪᓗᒋᓪᓗ ᓂᕆᓂᐊᕐᒪᒋᑦ, ᑖᓐᓇᓕ ᓂᕆᔪᒪᓚᐅᓐᖏᓚᖅ. ᐋᒻᓇᓕ ᐅᖃᕐᐳᖅ, “ᑕᕝᕙᓃᑦᑐᓕᒫᑦ ᐊᓂᑎᓚᐅᒃᑭᑦ,” ᑕᕝᕙᓃᑦᑐᓕᒫᓪᓗ ᐊᓂᕗᑦ. 10ᐋᒻᓇᐅᓪᓗ ᑕᒫᕆ ᐅᖃᐅᑎᕚ, “ᓂᕿᓕᐅᕐᑕᑎᑦ ᕾᓚᐅᒃᑭᑦ ᒪᐅᖓ ᐃᒡᓕᓐᓄᑦ ᐃᒻᒥᓂᒃ ᕾᓪᓗᒋᑦ.” ᓂᖀᑦ ᑎᒍᒐᒥᒋᑦ ᑐᓂᓚᐅᕐᐰᑦ ᑖᑦᓱᒧᖓ. 11ᑐᓂᓯᓇᓱᐊᕐᑎᓪᓗᒍᓕ ᑎᒍᕚ ᐅᖃᐅᑎᓪᓗᒍᓗ, “ᐱᖃᑎᒋᓚᐅᓐᖓ!”
12ᐅᖃᕐᐳᕐᓕ, “ᐋᒃᑲ ᐊᓂᒋᒐᒃᑭᑦ, ᐱᔪᒪᑎᓐᓇᖓ ᐱᐅᖏᑦᑐᐊᓗᖕᒥᒃ ᐱᑎᓐᓇᓱᓐᖏᓚᐅᓐᖓ! ᐃᓴᕆᐊᓕᒥ ᑍᒤᓕᐅᕐᑐᖃᖃᑦᑕᖏᒻᒪᑦ; ᑕᒪᓐᓇ ᐱᓇᓱᐊᕈᒪᓃᑦ ᐱᐅᖏᑦᑐᐊᓘᖕᒪᑦ! 13ᖃᓄᕐᓕ ᒪᑭᑕᑦᓯᐊᕈᓐᓇᕋᔭᕋᒪ ᐃᓄᒋᐊᓂ? ᐃᕝᕕᓪᓗ ᐱᐅᔪᓐᓃᕐᑎᑕᐅᒻᒪᕆᒃᑲᔭᕐᐳᑎᑦ ᐃᓴᕆᐊᓕᒥᐅᓂ. ᑍᒤᒻᒪᑦ ᐊᖓᔪᖅᑳᕐᔪᐊᒧᑦ ᐅᖃᓚᐅᕆᑦ; ᐅᒃᐱᕈᓱᑦᓯᐊᕐᐳᖓ ᐃᓕᖕᓄᑦ ᑐᓂᒐᔭᕌᖓ.” 14ᓈᓚᒍᒪᓚᐅᓐᖏᓚᕐᓕ ᑖᑦᓱᒥᖓ; ᓴᓐᖏᓂᕐᓴᐅᓂᕐᒥᓄᓪᓗ ᖁᓄᒐᓗᐊᕐᑎᓪᓗᒍ ᐱᖃᑎᒋᓚᐅᕐᐹ.
15ᑭᖑᓂᐊᒍᑦ ᐋᒻᓇᐅᑉ ᖀᒥᒋᒻᒪᕆᓕᓚᐅᕐᐹ; ᖀᒥᒋᓂᕐᓴᕆᓕᓚᐅᕐᐹ ᓇᓪᓕᒋᓚᐅᕐᓂᕐᒥᓂᑦ. ᐅᖃᐅᑎᓚᐅᕐᐹᓗ, “ᒪᑭᓪᓗᑎᑦ ᐊᓂᓚᐅᕆᑦ!”
16ᑭᐅᕗᕐᓕ, “ᐋᒃᑲ, ᐊᓂᑎᒐᔭᕈᕕᖓ ᐱᐅᖏᓐᓂᕐᓴᐅᓂᐊᕐᐳᖅ ᐱᓂᐊᕐᓂᕆᓚᐅᕐᑕᕐᓂᑦ!”
ᐋᒻᓇᐅᓪᓕ ᓈᓚᒍᒪᓚᐅᓐᖏᓛ; 17ᑕᕝᕙ ᐱᔨᓂ ᐊᖑᑦ ᕾᖁᕚ, ᐅᖃᐅᑎᓪᓗᒍᓗ, “ᐅᓇ ᐊᕐᓇᖅ ᑕᑯᓐᓇᕐᑕᓐᓃᑦᑐᓐᓃᕐᑎᓚᐅᕈᒃ! ᐊᓂᑎᓚᐅᕈᒃ ᐅᒃᑯᐊᕐᓗ ᐊᑦᓱᖏᕐᓗᒍ!” 18ᑕᕝᕙ ᐱᔨᖓᑕ ᐊᓂᑎᓚᐅᕐᐹ ᐅᒃᑯᐊᕐᓗ ᐊᑦᓱᖏᕐᓗᒍ.
ᑕᒫᕆᓕ ᐅᓕᑯᑖᒥᒃ ᐊᑐᓚᐅᕐᐳᖅ ᐂᓕᖕᒥᒃ; ᑍᑦᓱᒪᓂ ᐊᓐᓄᕌᑦ ᐊᑐᕐᑕᐅᒐᔪᓚᐅᕐᒪᑕ ᐊᖓᔪᖅᑳᕐᔪᐊᑉ ᐸᓂᖏᓐᓄᑦ ᐅᐃᖃᓚᐅᕐᓯᒪᖏᑦᑐᓄᑦ. 19ᑕᒫᕆᓕ ᐃᒻᒥᓂᒃ ᐊᕐᔭᓕᓂᕐᓂᒃ ᑲᑕᒑᑎᕝᕕᒋᓚᐅᕐᐳᖅ ᓂᐊᖁᕐᒥᓄᑦ, ᐅᓕᑯᑖᓂᓗ ᐊᓕᒃᑐᕐᓗᒍ; ᐊᒡᒐᒥᓄᑦ ᑮᓇᓂ ᒪᑐᓯᒪᓚᐅᕐᐹ, ᐊᓂᓚᐅᕐᐳᕐᓗ, ᕿᐊᓪᓗᓂ ᓂᐱᖅᑯᕐᑐᓪᓗᓂ. 20ᐊᓂᖓᑕᓕ ᐋᑉᓴᓚᐅᑉ ᑕᑯᒐᒥᐅᒃ ᐊᐱᕆᕚ, “ᐋᒻᓇᒧᑦ ᑲᒪᒋᔭᐅᓇᓱᐊᕐᐲᑦ? ᐊᑏ ᓇᔮᒃ ᐃᓱᒪᓗᐊᕈᑎᒋᑦᑍᓕᒍᒃ; ᐊᑖᑕᖃᑎᒋᒐᕕᐅᒃ ᐊᓂᒋᓪᓗᒍ ᐅᖃᐅᓯᕆᑦᑍᓕᒍᒃ.” ᑍᒤᒻᒪᑦ ᑕᒫᕆ ᐋᑉᓴᓚᐅᑉ ᐃᒡᓗᖓᓃᓕᓚᐅᕐᐳᖅ, ᖁᕕᐊᓱᒐᓂ ᐃᓄᑑᑎᕐᓗᓂᓗ.
21ᐊᖓᔪᖅᑳᕐᔪᐊᕐᓕ ᑍᕕᑎ ᑕᒪᑐᒥᖓ ᑐᓴᕋᒥ ᐱᓂᐊᕐᓂᐅᓚᐅᕐᑐᒥᒃ, ᓂᓐᖓᒃᑐᐊᓘᓚᐅᕐᐳᖅ. 22ᐋᑉᓴᓚᐅᓪᓕ ᐋᒻᓇᓐ ᐆᒥᒋᒻᒪᕆᓕᓚᐅᕐᐹ ᓇᔭᖓᓂᒃ ᑕᒫᕆᒥᒃ ᖁᓄᔪᕐᓂᐊᓚᐅᕐᑎᓪᓗᒍ, ᐅᖃᖃᑎᒋᔪᓐᓁᓪᓕᓚᐅᕐᐹᓗ ᐱᐅᔪᒥᒃ ᐱᐅᖏᑦᑐᒥᒡᓘᓐᓃᑦ.
ᐋᑉᓴᓚᐅᑉ ᐊᑭᒋᐊᕐᓂᖓ
23ᐊᕐᕌᒎᒃ ᒪᕐᕉᒃ ᐊᓂᒍᕐᑎᓪᓗᒋᒃ ᐋᑉᓴᓚᒻ ᓰᐱᖁᑎᒥᓂᒃ ᕿᐅᕐᑍᑎᑦᓯᓚᐅᕐᐳᖅ ᐰᓕ-ᕼᐊᔭᕆᒥᒃ ᓄᓇᓖᑦ ᐃᕗᕅᑎᐅᑉ ᖃᓂᒋᔮᓂ, ᐊᖓᔪᖅᑳᕐᔪᐊᓪᓗ ᐃᕐᓂᓕᒫᖏᑦ ᕾᖁᓚᐅᕐᐰᑦ ᑕᕝᕗᖓ. 24ᐋᑉᓴᓚᒻᓗ ᐊᖓᔪᖅᑳᕐᔪᐊᒧᐊᓚᐅᕐᐳᖅ ᐅᖃᐅᑎᓪᓗᒍᓗ, “ᐊᖓᔪᖅᑳᒃ, ᓰᐱᖁᑎᒃᑲ ᕿᐅᕐᑕᕐᑕᐅᑎᒐᒃᑭᑦ; ᐃᕝᕕᓪᓗ ᐊᖓᔪᖅᑳᐅᔪᖁᑎᑎᓪᓗ ᕾᔪᓐᓇᕐᐱᓰ ᓂᕆᕕᒡᔪᐊᕐᑎᓪᓗᑖ?”
25ᐊᖓᔪᖅᑳᕐᔪᐊᖅ ᑭᐅᕗᖅ, “ᐋᒃᑲ, ᐃᕐᓃᒃ, ᐅᖁᒤᒃᓴᓗᐊᕋᔭᕋᕕᑦ ᕾᔪᐃᓐᓇᐅᒍᑦᑕ.” ᐋᑉᓴᓚᒻᓕ ᐊᔪᐃᓐᓇᕋᓗᐊᕐᑎᓪᓗᒍ, ᐊᖓᔪᖅᑳᕐᔪᐊᖅ ᐱᔪᒪᓚᐅᓐᖏᓚᖅ ᓮᒻᒪᕐᑎᑐᐃᓐᓇᓚᐅᕐᐹᓕ.
26ᑕᕝᕙ ᐋᑉᓴᓚᒻ ᐅᖃᓕᕐᐳᖅ, “ᕾᓂᐊᖏᒃᑯᕕᑦ, ᓄᑲᕋ ᐋᒻᓇᓐ ᐃᓚᐅᑎᑦᓱᓐᓇᕐᐱᐅᒃ?” ᐊᖓᔪᖅᑳᕐᔪᐊᖅ ᐅᖃᐅᑎᕚ, “ᓱᖕᒪᑦ ᕾᔭᕆᐊᖃᕐᐹ?” 27ᐋᑉᓴᓚᒻᓕ ᐊᔪᐃᓐᓇᕐᒪᑦ ᑍᕕᑎ ᐊᖏᓚᐅᖅᑳᕐᑎᓐᓇᒍ ᐋᒻᓇᒥᒃ ᐃᕐᓂᓕᒫᖏᓐᓂᒡᓗ ᐋᑉᓴᓚᒻᒧᑦ ᐱᖃᑕᐅᖁᓪᓗᒋᑦ ᐱᖁᔨᓕᓚᐅᕐᐳᖅ. 28ᑕᕝᕙ ᐋᑉᓴᓚᐅᑉ ᐱᔨᓂ ᐅᖃᐅᑎᕔᑦ, “ᖃᐅᔨᓴᕐᓂᐊᕐᐳᓯ ᐋᒻᓇᒥᒃ ᐋᖓᔮᓕᑐᐊᕐᐸᑦ, ᐱᖁᔨᓕᑐᐊᕈᒪ ᑐᖁᓐᓂᐊᕐᐸᓯ. ᑲᑉᐱᐊᓱᒃᑍᓕᒋᑦᓯ; ᐅᕙᖓ ᑎᓕᓯᒐᒪ ᐸᓯᔭᒃᓴᐅᓂᐊᕐᐳᖓ ᓯᕘᕋᑦᑍᓕᒋᑦᓯ ᑲᑦᓱᖓᑦᑍᓕᓗᓯᓗ!” 29ᑕᕝᕙ ᐱᔩᑦ ᒪᓕᓚᐅᕐᐳᑦ ᐱᖁᔭᐅᑦᔪᑎᒥᖕᓂᒃ ᐋᑉᓴᓚᒻᒧᑦ ᑐᖁᓚᐅᕐᐹᓪᓗ ᐋᒻᓇᓐ. ᑕᕝᕙ ᑍᕕᑎᐅᑉ ᐃᕐᓂᓕᒫᖏᑦ ᒪᑭᓪᓗᑎᒃ, ᓯᐅᑎᖁᕐᑐᔪᒥᓄᐊᕐᓗᑎᒃ ᕿᒪᒃᓯᕗᑦ.
30ᐊᖏᕐᕋᕐᐸᓪᓕᐊᑎᓪᓗᒋᓪᓕ ᑍᕕᑎ ᐅᖃᐅᑦᔭᐅᕗᖅ, “ᐋᑉᓴᓚᐅᑉ ᐃᕐᓂᓕᒫᑎᑦ ᑐᖁᒻᒪᒋᑦ ᐊᑕᐅᓯᕐᒥᒡᓘᓐᓃᑦ ᐊᒥᐊᒃᑯᔪᖃᓐᖏᓚᖅ!” 31ᑕᕝᕙ ᐊᖓᔪᖅᑳᕐᔪᐊᖅ ᓇᖏᕐᓯᕗᖅ, ᐊᓐᓄᕌᓂᓗ ᐊᓕᒃᐰᑦ ᕿᒃᓵᖕᓂᕐᒧᑦ, ᒪᓂᖃᒧᓪᓗ ᐹᒻᒪᒃᐳᖅ; ᐱᔨᖏᓪᓗ ᐱᖃᑎᒋᔭᖏᑦ ᐊᓐᓄᕌᒥᖕᓂᒃ ᐊᓕᒃᓯᒋᕗᑦ. 32ᔫᓇᑖᑉᓕ ᑍᕕᑎᐅᑉ ᖃᑕᓐᖑᑎᖓᑕ ᓯᒥᐊᑉ ᐃᕐᓂᖓ, ᐅᖃᕐᐳᖅ, “ᐊᖓᔪᖅᑳᒃ, ᐃᒃᑯᐊ ᐃᕐᓂᓕᒫᑎᑦ ᑐᖁᑕᐅᖏᑦᑐᑦ, ᐋᒻᓇᑐᐊᕐᓕ ᑐᖁᕗᖅ, ᖃᐅᔨᒪᔪᒃᓴᐅᕗᑎᑦ ᐋᑉᓴᓚᒻᒥᒃ ᑐᑭᑖᕇᓚᐅᕐᓯᒪᖕᒪᑦ ᑐᖁᑦᓯᓛᕈᒪᓪᓗᓂ ᑍᑦᓱᒪᓂ ᐋᒻᓇᓐ ᖁᓄᔪᕐᓂᐊᓚᐅᕐᑎᓪᓗᒍ ᓇᔭᖓᓂᒃ ᑕᒫᕆᒥᒃ. 33ᑍᒤᒻᒪᑦ ᐅᒃᐱᕆᓇᒍ ᐃᕐᓂᓕᒫᑎᑦ ᑐᖁᓂᕋᕐᑕᐅᑎᓪᓗᒋᑦ; ᐋᒻᓇᓐᑐᐊᖅ ᑐᖁᔪᑑᖕᒪᑦ.”
34ᐋᑉᓴᓚᒻᓕ ᕿᒪᒃᓯᓚᐅᕐᐳᖅ.
ᐅᓇᑕᕐᑐᒃᓮᓪᓗ ᖃᐅᔨᓴᕐᑎᖓ ᐃᓅᓱᒃᑐᖅ ᑕᑯᕗᖅ ᐃᓄᒋᐊᒃᑐᕐᔪᐊᓂᒃ ᐱᖑᐊᕐᔪᖕᒥᑦ ᐊᖅᑲᕐᑎᕐᑐᓂᒃ ᐊᖅᑯᑎᒃᑯᑦ ᕼᐅᕈᓁᒻᑯᑦ ᖃᖅᑲᐅᑉ ᑭᒡᓕᖓᒎᖓᔪᒃᑯᑦ. 35ᔫᓇᑖᑉᓗ ᐅᖃᕐᐳᖅ ᑍᕕᑎᒧᑦ, “ᑕᑯᒋᑦ ᐃᕐᓂᑎᑦ ᑎᑭᑉᐳᑦ; ᐃᓕᖕᓄᑦ ᐅᖃᐅᓯᕆᖅᑲᐅᒐᒃᑭᑦ ᑍᒤᓐᓂᕋᕐᓗᒋᑦ, ᐊᓱᐃᓛᒃ ᑍᒤᑉᐳᑦ.” 36ᐅᖃᕇᕋᑖᑦᓯᐊᕐᑎᓪᓗᒍᓕ, ᑕᑯᒋᑦ, ᑍᕕᑎᐅᑉ ᐃᕐᓂᖏᑦ ᐃᑎᕐᐳᑦ; ᓂᓪᓕᐊᓪᓗᑎᒃ ᕿᐊᓯᕗᑦ; ᑍᕕᑎᓗ ᐱᔨᓕᒫᖏᓪᓗ ᕿᐊᖃᑕᐅᓕᕐᐳᑦ ᓂᐱᖅᑯᕐᑐᓪᓗᑎᒃ.
37 #
ᓴᒧᐃᓕ ᐂᑉᐸᖏᑦ 3:3. ᐋᑉᓴᓚᒻᓕ ᕿᒪᒃᓯᓚᐅᕐᐳᖅ, ᒋᓱᕅᐊᒃᑯᑦ ᐊᖓᔪᖅᑳᕐᔪᐊᖓᓄᐊᕐᓗᓂ, ᑕᓪᒤᒧᑦ ᐊᒥᕼᐆᑎᐅᑉ ᐃᕐᓂᖓᓄᑦ, ᑍᕕᑎᓗ ᕿᒃᓵᓚᐅᕐᐳᖅ ᐊᑯᓂᐊᓗᒃ ᐃᕐᓂᓂ ᐋᒻᓇᓐ ᐱᓪᓗᒍ. 38ᐋᑉᓴᓚᒻ ᕿᒫᓯᒪᓚᐅᕐᐳᖅ ᒋᓱᕅᒧᑦ, ᑕᕝᕙᓃᓚᐅᕐᐳᕐᓗ ᐊᕐᕌᒍᓂᒃ ᐱᖓᓱᓂᒃ. 39ᐊᖓᔪᖅᑳᕐᔪᐊᕐᓕ ᑍᕕᑎ ᒪᓂᒍᕋᒥ ᐋᒻᓇᐅᑉ ᑐᖁᓂᕆᓚᐅᕐᑕᖓᓂᒃ, ᖃᐅᔨᒪᓕᕐᓗᓂᓗ ᑐᖁᖓᓕᕐᒪᑦ, ᐃᕐᓂᕐᒥᓄᑦ ᐋᑉᓴᓚᒻᒧᑦ ᑭᐱᓂᐊᖔᓕᓚᐅᕆᕗᖅ.
Currently Selected:
ᓴᒧᐃᓕ ᐂᑉᐸᖏᑦ 13: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
