ᓴᒧᐃᓕ ᐂᑉᐸᖏᑦ 12
12
ᓁᑕᓂᐅᑉ ᐅᖃᐅᓯᖏᑦ ᑍᕕᑎᐅᓪᓗ ᖃᕿᐊᓕᕐᓂᖓ
1 #
ᐃᓐᖏᕈᑦ 51. ᐊᑕᓂᐅᓪᓗ ᐅᖃᕐᑎᓂ ᓁᑕᓂ ᑎᓕᕚ ᑍᕕᑎᒧᑦ. ᓁᑕᓂᐅᑉ ᐅᐸᒃᑲᒥᐅᒃ ᐅᖃᐅᑎᕚ, “ᐊᖑᑎᑕᖃᓚᐅᕐᐳᖅ ᒪᕐᕉᖕᓂᒃ ᓄᓇᓖᖕᓂᒃ ᑕᕝᕙᓂᑦᓮᓐᓇᖅ; ᐂᑉᐸᖓ ᐊᒃᓱᐃᑦᑐᖅ ᐂᑉᐸᖓᓗ ᐊᒃᓱᔪᖅ. 2ᐊᒃᓱᐃᑦᑐᖅ ᐆᒪᔪᖁᑎᖃᓚᐅᕐᐳᖅ ᓰᐱᖁᑎᖃᕐᓗᓂᓗ ᐅᓄᕐᑐᓂᒃ, 3ᐊᒃᓱᔪᕐᓕ ᐊᑕᐅᓯᕐᒥᒃ ᓄᕐᕋᐅᔭᖁᑎᖃᓚᐅᕐᐳᖅ, ᓂᐅᕕᐊᕆᓚᐅᕐᑕᒥᓂᒃ. ᑲᒪᒋᑦᓯᐊᓚᐅᕐᐹ ᐱᕈᓚᐅᕐᐳᕐᓗ ᐊᖏᕐᕋᖓᓂ ᕿᑐᕐᖓᖏᓐᓂᓗ; ᓂᕆᑎᖃᑦᑕᓚᐅᕐᐹᓗ ᓂᕿᒥᓂᑦ, ᐃᒥᕐᑎᑉᐸᒡᓗᓂᐅᓪᓗ ᐃᒥᐅᑎᒥᓂᑦ, ᓴᕐᓕᐊᕐᐸᒡᓗᓂᐅᒡᓗ, ᓄᕐᕋᐅᔮᕐᑐᕐᓗ ᑖᑦᓱᒪ ᐸᓂᒋᔫᔮᓚᐅᕐᐹ. 4ᐅᓪᓗᐃᓪᓕ ᐃᓚᖓᓂ ᐊᒃᓱᐃᑐᖅ ᐳᓛᕆᐊᕐᑕᐅᓚᐅᕐᐳᖅ ᐊᖏᕐᕋᖓᓄᑦ, ᐊᒃᓱᐃᑦᑐᕐᓗ ᑐᖁᑦᓯᔪᒪᓚᐅᓐᖏᓚᖅ ᐆᒪᔪᖁᑎᒥᓂᑦ ᑖᑦᓱᒪ ᓂᕆᓂᐊᕐᑕᖓᓂᒃ; ᐃᒫᒡᓕ ᐱᓂᐊᓚᐅᕐᐳᖅ, ᐊᒃᓗᔫᑉ ᓄᕐᕋᐅᔭᖁᑎᖓᓂᒃ ᑎᒍᓯᓚᐅᕐᐳᖅ ᓂᕿᓕᐊᕆᓪᓗᒍᓗ ᑐᔪᕐᒥᐊᒥᓄᑦ.”
5ᑕᕝᕙ ᑍᕕᑎ ᓂᓐᖓᒻᒪᕆᒃᐳᖅ ᑖᑦᓱᒧᖓ ᐊᒃᓱᐃᑦᑐᒧᑦ ᐅᖃᕐᓗᓂᓗ, “ᐊᖏᒻᒪᕆᒃᐳᖓ ᐊᑕᓂᕐᒧᑦ ᐃᓅᔪᒧᑦ, ᑖᓐᓇ ᐊᖑᑦ ᑍᒤᓕᐅᓚᐅᕐᑐᖅ ᑐᖁᔪᒃᓴᐅᕗᖅ! 6ᐱᓂᐊᕐᓂᕆᓚᐅᕐᑕᖓ ᐱᐅᖏᑦᑐᖅ ᐱᑦᔪᑎᒋᓪᓗᒍ, ᐊᑭᓖᔪᒃᓴᐅᕗᖅ ᓯᑕᒤᕐᑐᕐᓗᒍ ᑎᒍᓚᐅᕐᑕᒥᓂᒃ, ᓂᑲᒍᓱᖃᖏᑦᓯᐊᕐᒪᑦ.”
7ᓁᑕᓂ ᐅᖃᕐᐳᖅ ᑍᕕᑎᒧᑦ, “ᐊᖑᑦ ᑖᓐᓇ ᐃᕝᕕᐅᕗᖅ. ᐃᒫᒃ ᐊᑕᓂᖅ ᐅᖃᕐᐳᖅ, ᐃᓴᕆᐊᓕᒥᐅᑦ ᒎᑎᖓ, ‘ᐊᖓᔪᖅᑳᕐᔪᐊᕈᕐᑎᓚᐅᕐᐸᒋᑦ ᐃᓴᕆᐊᓕᒥᐅᓄᑦ, ᓴᐳᑎᓚᐅᕐᐸᒋᓪᓗ ᓴᐅᓕᒥᑦ; 8ᐊᑕᓂᐅᕕᖓᓂᒡᓗ ᑐᓂᓚᐅᕐᐸᒋᑦ, ᓄᓕᐊᖏᓐᓂᒡᓗ ᐊᑐᐃᓐᓇᖃᕐᑎᓚᐅᕐᐸᒋᑦ, ᐊᖓᔪᖅᑳᕐᔪᐊᕈᕐᑎᓚᐅᕐᐸᒋᑦ ᐃᓴᕆᐊᓕᒥᐅᓄᑦ ᔫᑕᒥᐅᓄᓪᓗ; ᑕᒪᓐᓇ ᓈᒻᒪᓚᐅᖏᑉᐸᑦ, ᑐᓂᒃᑲᓐᓂᕈᓐᓇᓚᐅᕐᐸᒋᑦ ᒪᕐᕈᐊᕐᑎᓪᓗᐊᕐᑐᓂᒃ. 9ᓱᖕᒪᓪᓕ ᓈᓚᓚᐅᓐᖏᓚᑎᑦ ᐊᑕᓂᐅᑉ ᐅᖃᐅᓯᖓᓂᒃ? ᓱᖕᒪᑦ ᐱᐅᖏᑦᑐᐊᓗᖕᒥᒃ ᐱᓂᐊᓚᐅᕐᐲᑦ? ᔪᕅᐊ ᕼᐃᑍᑎᒥᐅᑕᖅ ᐅᓇᑕᕐᑐᓂ ᑐᖁᑕᐅᑎᓚᐅᕐᐸᑦ; ᐊᒧᓁᑎᒥᐅᓄᑦ ᑐᖁᑕᐅᑎᓚᐅᕐᐸᑦ, ᓄᓕᐊᖓᓗ ᓄᓕᐊᕐᑖᕆᓪᓗᒍ! 10ᒫᓐᓇᓕ ᑍᒤᒻᒪᑦ ᑭᖑᕚᕐᓂᑦ ᑐᖁᔪᖃᖃᑦᑕᓛᓕᕐᐳᖅ ᖁᕕᐊᓇᖏᑦᑐᒃᑯᑦ ᑐᖁᔪᓂᒃ, ᓈᓚᓚᐅᖏᓐᓇᕕᓐᖓ, ᔪᕅᐊᐅᓪᓗ ᕼᐃᑍᑎᒥᐅᑕᐅᑉ ᓄᓕᐊᖓ ᓄᓕᐊᕐᑖᕆᓚᐅᕋᕕᐅᒃ. 11#ᓴᒧᐃᓕ ᐂᑉᐸᖏᑦ 16:22.ᐊᑕᓂᖅ ᐅᖃᕐᐳᖅ, ᑕᑯᒋᑦ, ᐃᓚᕕᑦ ᐃᓚᖓᓐᓂᑦ ᖁᕕᐊᓇᖏᑦᑐᒃᑰᕐᑎᑕᐅᔪᒫᕐᐳᑎᑦ; ᑕᑯᓛᕐᐳᑎᑦ ᓄᓕᐊᑎᑦ ᑎᒍᔭᐅᑎᓪᓗᒋᑦ ᐊᖑᒻᒧᑦ ᐊᓯᖕᓄᑦ; ᐱᓕᕆᐊᕆᔭᐅᔪᒫᕐᐳᓪᓗ ᐅᓪᓗᒃᑯᑦ ᖃᐅᒪᑎᓪᓗᒍ. 12ᐃᔨᕋᕐᑐᕐᓗᑎᑦ ᐊᔪᕐᑐᓕᓚᐅᕋᕕᑦ; ᑕᒪᓐᓇᓕ ᑍᒤᑎᑦᓱᒫᕐᐸᕋ ᐅᓪᓗᓪᓗᐊᖑᑎᓪᓗᒍ ᐃᓴᕆᐊᓕᒥᐅᓕᒫᓄᑦ ᖃᐅᔨᔭᐅᓗᓂ.’”
13ᑍᕕᑎ ᐅᖃᕐᐳᖅ ᓁᑕᓂᒧᑦ, “ᐊᔪᕐᑐᓕᓚᐅᕐᐳᖓ ᐊᑕᓂᕐᒧᑦ.”
ᓁᑕᓂᓗ ᑭᐅᕗᖅ, “ᐊᑕᓂᐅᑉ ᐃᓱᒪᒋᔪᓐᓁᕐᕕᒋᓯᒪᕚᑎᑦ; ᑐᖁᓂᐊᓐᖏᓚᑎᑦ. 14ᑭᓯᐊᓂᓕ, ᑍᒤᓕᐅᕐᑎᓪᓗᑎᑦ ᐊᑕᓂᕐᒧᑦ ᐱᐅᖏᑦᑐᒥᒃ ᐱᓂᐊᕐᓂᕆᓚᐅᕐᑍᑦ ᐱᓪᓗᒍ, ᕿᑐᕐᖓᕐᑖᕆᓚᐅᕐᑍᑦ ᑐᖁᓂᐊᕐᐳᖅ.” 15ᑕᕝᕙ ᓁᑕᓂ ᐊᖏᕐᕋᕐᐳᖅ.
ᑍᕕᑎᐅᑉ ᐃᕐᓂᖓᑕ ᑐᖁᓂᖓ
ᐊᑕᓂᐅᑉ ᔪᕅᐊᐅᑉ ᓄᓕᐊᖓᑕ ᐃᕐᓂᕐᑖᕆᓚᐅᕐᑕᖓ ᑍᕕᑎᒥᑦ ᖃᓂᒻᒪᒃᑎᓚᐅᕐᐹ, ᖃᓂᒪᔪᐊᓘᓕᓚᐅᕐᐳᕐᓗ. 16ᑍᕕᑎᓕ ᑐᒃᓯᐊᓚᐅᕐᐳᖅ ᐊᑕᓂᕐᒧᑦ ᓄᑕᕋᖅ ᐋᖅᑭᒃᑕᐅᖁᓪᓗᒍ; ᓂᕆᑦᑍᓕᓚᐅᕐᐳᕐᓗ, ᐅᓐᓄᑕᒫᑦ ᐃᒡᓗᕈᓯᕐᒥᓄᐊᖃᑦᑕᓚᐅᕐᐳᖅ ᐅᓐᓄᐊᓕᒫᕐᓗ ᓇᑎᕐᒥ ᓇᓚᖃᑦᑕᕐᓗᓂ. 17ᐊᖓᔪᖅᑳᖁᑎᖏᑕᓗ ᐅᐸᒡᓗᒍ ᒪᑭᑎᓐᓇᓱᐊᖃᑦᑕᓚᐅᕐᐹᑦ ᓇᑎᕐᒥᑦ; ᒪᑭᑦᑐᒪᓚᐅᓐᖏᓚᕐᓕ, ᓂᕆᖃᑕᐅᔪᒪᓇᓂᓗ ᑖᒃᑯᓄᖓ. 18ᐱᓇᓱᐊᕈᓯᖅ ᐊᓂᒍᕐᑎᓪᓗᒍ ᓄᑕᕋᖅ ᑐᖁᕗᖅ. ᑍᕕᑎᐅᓪᓗ ᐱᔨᖏᑦ ᐅᖃᐅᑦᔨᔭᕆᐊᒃᓴᖅ ᑲᑉᐱᐊᓱᓚᐅᕐᐳᑦ; ᐅᖃᕐᓗᑎᒃ, “ᑕᑯᒋᑦ ᓄᑕᕋᑯᓗᒃ ᐃᓅᑎᓪᓗᒍ, ᑍᕕᑎᐅᑉ ᑭᐅᔪᓐᓇᓚᐅᓐᖏᓛᑎᒍᑦ ᐅᖃᐅᑎᒐᓗᐊᕋᑦᑎᒍ; ᖃᓄᕐᓕ ᐅᖃᐅᑎᓂᐊᓕᕐᐸᕗᑦ ᐃᕐᓂᖓ ᑐᖁᓂᕋᕐᓗᒍ? ᐃᒻᒥᓂᒃ ᑲᑉᐱᐊᓇᕐᑐᒧᑦ ᐱᑎᑐᐃᓐᓇᕆᐊᖃᕐᒪᑦ!”
19ᑍᕕᑎᐅᓪᓕ ᖃᐅᔨᒐᒥᒋᑦ ᐃᒻᒥᖕᓄᑦ ᐅᖃᓗᒃᑖᕐᓂᖏᓐᓂᒃ, ᖃᐅᔨᕗᖅ ᓱᕈᓯᐅᑉ ᑐᖁᓂᖓᓂᒃ; ᑍᒤᒻᒪᑦ ᐱᔨᓂ ᐊᐱᕆᕔᑦ, “ᓄᑕᕋᑯᓘᒃ ᑐᖁᕚ?”
ᑖᒃᑯᐊ ᑭᐅᕗᑦ, “ᐄ, ᑐᖁᕗᖅ.”
20ᑕᕝᕙ ᑍᕕᑎ ᒪᑭᑉᐳᖅ ᓇᑎᕐᒥᑦ, ᐅᕕᓂᖕᓂᐊᕐᓗᓂᓗ, ᓄᔭᓂᓗ ᐃᓪᓔᕐᓗᓂᒋᑦ, ᐊᓐᓄᕌᓂᓗ ᐊᓯᑦᔨᕐᐰᑦ; ᐂᓪᓗᓂᓗ ᐊᑕᓂᐅᑉ ᐃᒡᓗᖓᓄᑦ ᑐᒃᓯᐊᕐᕕᒋᕚ; ᐅᑎᕋᒥᓗ ᐊᖏᕐᕋᒥᓄᐊᓚᐅᕐᐳᖅ; ᓂᕆᔪᒪᓕᕐᒪᑦ, ᓂᕆᓂᐊᕐᑕᖏᓪᓗ ᑐᓂᔭᐅᑐᐊᕐᒪᑕ, ᓂᕆᓚᐅᕐᐰᑦ. 21ᐱᔨᖏᓪᓗ ᐅᖃᕐᐳᑦ ᑖᑦᓱᒧᖓ, “ᖃᓄᐃᓕᐅᕐᒪᖔᕐᐱᑦ ᑐᑭᓯᓐᖏᓚᒍᑦ ᑕᒪᑐᒥᖓ, ᓄᑕᕋᑯᓗᒃ ᐃᓅᑎᓪᓗᒍ ᕿᐊᓚᐅᕐᐳᑎᑦ ᓂᕆᑦᑍᓕᓪᓗᑎᓪᓗ; ᑐᖁᑐᐊᕐᒪᓪᓕ ᒪᑭᑉᐳᑎᑦ ᓂᕆᓪᓗᑎᓪᓗ!”
22ᑍᕕᑎ ᑭᐅᕗᖅ, “ᐄᓛᒃ, ᓂᕆᑦᑍᓕᓚᐅᕐᐳᖓ ᕿᐊᕙᒡᓗᖓᓗ ᓄᑕᕋᑯᓗᒃ ᐃᓅᑎᓪᓗᒍ; ᐃᓱᒪᓚᐅᕋᒪ, ‘ᐊᑕᓂᕐᒧᑦ ᓂᑲᒋᔭᐅᓂᐊᕋᓱᒋᓪᓗᖓ ᓄᑕᕋᑯᓗᒡᓗ ᐆᒪᑎᑕᐅᖁᓪᓗᒍ.’ 23ᒫᓐᓇᓕ ᑐᖁᖕᒪᑦ; ᓱᖕᒪᓕ ᓂᕆᑦᑍᓕᔪᒃᓴᐅᕗᖔ? ᓄᑕᕋᑯᓗᒃ ᐃᓅᓕᕐᑎᒃᑲᓐᓂᕈᓐᓇᕐᐸᕌ? ᐅᓪᓗᐃᑦ ᐃᓚᖓᓂ ᓇᔪᕐᑕᖓᓄᐊᓛᕐᐳᖓ, ᑭᓯᐊᓂᓕ ᐅᕙᓐᓄᑦ ᐅᑎᕐᓂᐊᕈᓐᓃᕐᐳᖅ.”
ᓲᓗᒨᓂᐅᑉ ᐃᓅᓂᖓ
24ᑍᕕᑎᐅᑉ ᓄᓕᐊᓂ ᐹᓯᐸ ᓮᒻᒪᕐᓴᓚᐅᕐᐹ, ᐅᐸᒡᓗᒍᓗ ᐃᓐᓇᖓᖃᑎᒋᕚ; ᐃᕐᓂᕐᑖᕐᐳᒡᓗ, ᑍᕕᑎᐅᑉ ᐊᑦᓯᕐᐹ ᓲᓗᒨᓂᒥᒃ. ᐊᑕᓂᐅᓪᓗ ᓇᓪᓕᒋᓚᐅᕐᐹ ᓱᕈᓯᖅ, 25ᐅᖃᕐᑎᓂᓗ ᓁᑕᓂ ᑎᓕᕚ; ᑖᓐᓇ ᓱᕈᓯᖅ ᐊᑎᕐᑖᖁᓪᓗᒍ ᔨᑎᑍᐊᒥᒃ, ᐊᑕᓂᐅᑉ ᓇᓪᓕᒋᓚᐅᕐᒪᒍ.
ᑍᕕᑎᐅᑉ ᓵᓚᖃᕐᓂᖓ ᕌᐸᒥᒃ
ᑯᕉᓂᑲ ᓯᕗᓪᓖᑦ 20:1-3
26ᔪᐊᐱᓕ ᑲᔪᓯᓚᐅᕐᐳᖅ ᐅᓇᑕᕐᓂᕐᒥᓂᒃ ᕌᐸᒥᒃ ᐊᒧᓁᑎᒃᑯᓐᓂᒃ, ᐃᒡᓗᒐᓴᖏᑕᓗ ᐊᖓᔪᖅᑳᒃᑯᕕᖓ ᓵᓚᒋᓕᕐᓗᒍ. 27ᔪᐊᐱᓗ ᐅᖃᕆᐊᕐᑐᕐᑎᑦᓯᓚᐅᕐᐳᖅ ᑍᕕᑎᒧᑦ ᐅᖃᕐᓗᓂ, “ᐅᓇᑕᕋᒃᑯ ᕌᐸ; ᐃᒥᕐᑕᕐᕕᖓ ᑎᒍᕙᕋ. 28ᒫᓐᓇ ᐅᓇᑕᕐᑎᖁᑎᕕᑦ ᐃᓚᖏᑦ ᑲᑎᑎᓪᓗᒋᑦ, ᐅᓇᑕᕆᐊᓚᐅᕆᑦ ᐃᒡᓗᒐᓴᖕᓄᑦ ᓇᖕᒥᓂᖅ ᓵᓚᒋᓗᒍ; ᐅᕙᓐᓄᑦ ᓵᓚᒋᔭᐅᓂᕋᕐᑕᐅᖁᖏᓐᓇᒃᑯ.” 29ᑍᒤᒻᒪᑦ ᑍᕕᑎᐅᑉ ᐅᓇᑕᕐᑎᖁᑎᓕᒫᓂ ᑲᑎᑎᓚᐅᕐᐰᑦ, ᕌᐸᒧᐊᕐᓗᓂᓗ ᓵᓚᒋᓚᐅᕐᐹ, ᑎᒍᓪᓗᒍᓗ. 30ᐊᒧᓁᑎᓪᓗ ᐊᖓᔪᖅᑳᕐᔪᐊᖓᑕ ᓂᐊᖁᐊᓂᑦ ᓂᐊᖂᑎᒥᒃ ᒎᓗᒥᒃ ᑎᒍᓯᕗᖅ ᐅᖁᒤᓐᓂᓕᖕᒥᒃ 75ᐸᐅᒥᒃ ᑕᑯᒥᓇᕐᑐᓂᒃ ᓴᐸᖓᖃᐅᕐᑐᒥᒃ, ᑍᕕᑎᐅᓪᓗ ᓂᐊᖁᐊᓄᑦ ᐃᓕᔭᐅᕗᖅ. ᐱᖁᑎᑖᕐᓗᓂᓗ ᐃᒡᓗᒐᓮᑦ ᐱᖁᑎᖏᓐᓂᒃ, ᐊᖏᔪᕐᔪᐊᓂᒃ ᓵᓚᖃᐅᓯᐊᕆᓪᓗᒋᑦ. 31ᐃᓄᖏᓪᓗ ᑕᕝᕙᓃᑦᑐᑦ ᓴᓇᑎᓕᓚᐅᕐᐰᑦ ᑭᓪᓘᑎᓄᑦ, ᓴᕕᕋᔭᖕᓄᓪᓗ ᐃᑎᕐᓴᓕᐅᕈᑎᓄᑦ, ᓴᕕᕋᔭᖕᓄᓪᓗ ᐅᓕᒪᐅᑎᓄᑦ, ᐃᖅᑲᓁᔭᓕᕐᑎᓪᓗᒋᑦ ᐅᔭᕋᖕᓂᒃ ᑭᒃᐹᕆᒃᑐᓕᐅᕐᑎᓪᓗᒋᑦ ᐊᕙᓗᕐᔪᐊᒃᓴᒧᑦ; ᑍᒫᑦᓮᓐᓇᖅ ᐱᓂᐊᕐᑎᓚᐅᕐᐰᑦ ᐊᒧᓁᑎᒥᐅᓕᒫᑦ ᓄᓇᓖᑦ ᖃᓂᒋᔭᖓᓃᑦᑐᑦ. ᑭᖑᓂᖓᒍᑦ ᑍᕕᑎ ᐃᓄᖁᑎᓕᒫᓂ ᐃᓚᒋᓪᓗᒋᑦ ᐅᑎᕐᐳᑦ ᔨᕉᓴᓕᒧᑦ.
Currently Selected:
ᓴᒧᐃᓕ ᐂᑉᐸᖏᑦ 12: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
