ᓴᒧᐃᓕ ᐂᑉᐸᖏᑦ 10
10
ᑍᕕᑎᐅᑉ ᓵᓚᖃᕐᓂᖓ ᐊᒧᓁᑎᓂᒃ ᓯᕆᐊᒥᐅᓂᒡᓗ
ᑯᕉᓂᑲ ᓯᕗᓪᓖᑦ 19:1-19
1ᑕᒪᑐᒪ ᑭᖑᓂᖓᒍᑦ ᐊᖓᔪᖅᑳᕐᔪᐊᖅ ᓇᕼᐊᓴ ᐊᒧᓁᑎᒥᐅᑕᖅ ᑐᖁᕗᖅ, ᐃᕐᓂᖓᓗ ᕼᐊᓄᓂ ᐃᓇᖐᓪᓗᓂ ᐊᖓᔪᖅᑳᕐᔪᐊᓐᖑᓚᐅᕐᐳᖅ. 2ᐊᖓᔪᖅᑳᕐᔪᐊᕐᓗ ᑍᕕᑎ ᐅᖃᕐᐳᖅ, “ᐅᐱᒍᓱᖕᓂᕋ ᓇᓗᓁᕋᒃᓴᕆᕙᕋ ᕼᐊᓄᓂᒧᑦ ᓇᕼᐊᓯᐅᑉ ᐃᕐᓂᖓᓄᑦ, ᐊᑖᑕᖓ ᑍᒤᓚᐅᕐᒪᑦ ᐅᕙᓐᓄᑦ.” ᑕᕝᕙ ᑍᕕᑎ ᑎᓕᓯᓚᐅᕐᐳᖅ ᐅᖃᕆᐊᕐᑐᕐᑐᓂᒃ ᐃᓚᑦᓱᒍᓱᖕᓂᓂ ᓇᓗᓁᕈᒪᓪᓗᒍ ᐊᑖᑕᖓᓄᑦ.
ᑎᑭᒻᒪᑕᓕ ᐊᒧᓁᑎᒧᑦ, 3ᐊᒧᓁᑎᒥᐅᑦ ᐊᖓᔪᖅᑳᖁᑎᖏᑦ ᕼᐊᓄᓂᒧᑦ ᐅᖃᕐᐳᑦ ᐊᖓᔪᖅᑳᕐᔪᐊᒧᑦ, “ᑍᕕᑎᐅᑉ ᐅᖃᕆᐊᕐᑐᕐᑎᑕᖏᑦ ᐃᓚᑦᓱᒍᓲᑕᐅᕚᑦ ᐃᓕᖕᓄᑦ, ᐊᑖᑕᖕᓂᒃ ᐅᐱᒍᓱᒋᐊᕐᑐᕐᑐᕆᕕᐅᒃ? ᑎᓕᓯᓚᐅᕐᐳᕐᓕ ᐃᔨᕋᕐᑐᕐᓗᑎᒃ ᖃᐅᔨᓴᕆᐊᖁᓪᓗᒋᑦ ᐃᒡᓗᒐᓴᑦᑎᓐᓂᒃ, ᓵᓚᒋᔪᒪᓪᓗᑕ!”
4ᑕᕝᕙ ᕼᐊᓄᓂᐅᑉ ᑎᒍᔭᐅᑎᓚᐅᕐᐰᑦ ᑍᕕᑎᐅᑉ ᐅᖃᕆᐊᕐᑐᕐᑎᑕᖏᑦ, ᐅᓐᖏᔭᕐᑕᐅᑎᑉᐰᑦ ᐊᑐᓂᑦ ᐃᒡᓗᐃᓐᓇᖏᓐᓂᒃ, ᐊᓐᓄᕌᖏᓪᓗ ᓇᑲᑕᐅᑎᓪᓗᒋᑦ ᕿᑎᐊᓂᑦ ᑕᐅᓄᖓ, ᐊᐅᓪᓚᕐᑎᓪᓗᒋᓪᓗ. 5ᑍᕕᑎᓕ ᑕᒪᑐᒥᖓ ᑐᓴᕋᒥ ᐱᓂᐊᕐᓂᐅᓚᐅᕐᑐᒥᒃ, ᐅᖃᐅᑦᔭᐅᖁᕔᑦ ᑲᑎᔪᒪᓪᓗᒋᑦ, ᑲᓐᖑᓱᓗᐊᓕᓚᐅᕐᒪᑕ ᐊᖏᕐᕋᕆᐊᒃᓴᖅ. ᐊᖓᔪᖅᑳᕐᔪᐊᓪᓗ ᐅᖃᐅᑎᕔᑦ, “ᔨᕆᑯᒦᖏᓐᓇᓕᕆᑦᓯ ᐅᒥᓯ ᐱᕈᕐᓯᐊᕆᓗᒋᑦ, ᑭᖑᓂᖓᒍᓪᓗ ᑕᕝᕙ ᐊᖏᕐᕋᓛᕐᐳᓯ.”
6ᐊᒧᓁᑎᒥᐅᑦ ᖃᐅᔨᓕᕋᒥᒃ ᑍᕕᑎᒧᑦ ᖁᕕᐊᒋᔭᐅᔪᓐᓃᕐᓂᕐᒥᖕᓂᒃ, ᑍᒤᒻᒪᑦ ᐊᑭᓖᓪᓗᑎᒃ ᑎᑭᖁᔨᓚᐅᕐᐳᑦ ᓯᕆᐊᒥᐅᑦ ᐅᓇᑕᕐᑐᒃᓴᖏᓐᓂᒃ ᐱᑦ-ᕆᕼᐊᐱᒥᑦ, ᔫᐸᒥᓪᓗ, 20,000ᓂᒃ ᐅᓇᑕᕐᑎᓂᒃ, ᒫᑲᐅᓪᓗ ᐊᖓᔪᖅᑳᕐᔪᐊᖓᓂᑦ 1,000ᓂᒃ, ᑑᑉᒥᓪᓗ 12,000ᓂᒃ ᐅᓇᑕᕐᑎᓂᒃ. 7ᑍᕕᑎᓕ ᑕᒪᑐᒥᖓ ᑐᓴᕋᒥ, ᔪᐊᐱ ᑎᓕᕚ ᐅᓇᑕᕐᑐᒃᓴᖁᑎᓕᒫᖏᓪᓗ ᐊᔪᖏᑦᑐᕐᔪᐊᑦ ᐃᓚᒋᓪᓗᒋᑦ. 8ᐊᒧᓁᑎᒥᐅᑦ ᐊᐅᓪᓚᕋᒥᒃ ᐊᑐᐃᓐᓇᕈᓚᐅᕐᐳᑦ ᐅᓇᑕᕐᓂᕐᒧᑦ ᕌᐸᐅᑉ ᐃᑎᕆᐊᕐᕕᖓᓂ; ᐊᓯᖏᓪᓕ ᓯᕆᐊᒥᐅᑦ ᕅᕼᐊᐱᒥᐅᓪᓗ, ᒫᑲᒥᐅᓪᓗ, ᐃᒻᒥᒍᑦ ᐃᓂᑖᓚᐅᕐᐳᑦ ᖃᖅᑲᖃᖏᑦᑐᒥ ᓄᓇᑐᐃᓐᓇᕐᒥ.
9ᔪᐊᐱᓕ ᑕᑯᒐᒥ ᐊᑭᕋᒥᓂᒃ ᐅᓇᑕᕆᐊᕋᔭᕐᑐᓂᒃ ᓯᕗᓂᖓᓂᑦ ᑐᓄᐊᓂᓪᓗ, ᓂᕈᐊᓚᐅᕐᐳᖅ ᐱᓯᑎᐅᓂᕐᐹᓂᒃ ᐃᓴᕆᐊᓕᒥᐅᑦ ᐅᓇᑕᕐᑐᒃᓴᖁᑎᖏᓐᓂᒃ ᓵᓐᖓᓯᖁᓪᓗᒋᑦ ᓯᕆᐊᒥᐅᓂᒃ; 10ᐊᓯᖏᓪᓕ ᐊᖓᔪᖅᑳᖃᕐᓗᑎᒃ ᓄᑲᖓᓂᒃ ᐊᐱᓮᒥᒃ, ᓵᓐᖓᓯᖁᓚᐅᕐᐰᑦ ᐊᒧᓁᑎᓂᒃ. 11ᔪᐊᐱᓗ ᐅᖃᕐᐳᖅ, “ᖃᐅᔨᒍᕕᑦ ᓵᓚᐅᓕᕐᑎᓪᓗᖓ ᓯᕆᐊᒥᐅᓄᑦ, ᕾᓗᑎᑦ ᐃᑲᔪᕆᐊᕋᔭᕐᐳᑎᑦ; ᐊᒧᓁᑎᒥᐅᓄᓪᓗ ᓵᓚᒋᔭᐅᓕᕈᕕᑦ, ᑕᕝᕙ ᕾᓗᖓ ᐃᑲᔪᕆᐊᕐᓂᐊᕐᐸᒋᑦ. 12ᓲᖑᓂᖃᑦᓯᐊᕆᑦ ᓯᕘᕋᖏᓪᓗᑎᑦ, ᐅᓇᑕᓚᐅᕐᑕ ᐊᒃᓱᕈᕐᓗᑕ ᐃᓄᖁᑎᕗᑦ ᐱᓪᓗᒋᑦ, ᒎᑎᐅᓪᓗ ᐃᒡᓗᒐᓴᖁᑎᖏᑦ; ᐊᑕᓂᕐᓗ ᐱᔪᒪᔭᓂ ᒪᓕᒡᓗᒍ ᐱᓂᐊᓚᐅᕐᓕ.”
13ᔪᐊᐱᒃᑯᑦ ᐃᓚᖏᓪᓗ ᐅᓇᑕᕆᐊᓕᕐᒪᑕ; ᓯᕆᐊᒥᐅᑦ ᕿᒪᒃᓯᓚᐅᕐᐳᑦ. 14ᐊᒧᓁᑎᒥᐅᓪᓗ ᑕᑯᒐᒥᒃ ᓯᕆᐊᒥᐅᑦ ᕿᒫᓂᖏᓐᓂᒃ, ᑖᒃᑯᐊᑦᑕᐅᖅ ᕿᒪᒃᓯᓚᐅᕆᕗᑦ ᐊᐱᓮᒥᑦ ᐃᒡᓗᒐᓴᖕᒥᓄᐊᕐᓗᑎᒃ. ᑕᕝᕙ ᔪᐊᐱᒃᑯᑦ ᐅᓇᑕᕇᕋᒥᒃ ᐊᒧᓁᑎᒥᐅᓂᒃ, ᐅᑎᓚᐅᕐᐳᑦ ᔨᕉᓴᓕᒧᑦ.
15ᓯᕆᐊᒥᐅᓪᓕ ᖃᐅᔨᒐᒥᒃ ᓵᓚᐅᓂᕐᒥᖕᓂᒃ ᐃᓴᕆᐊᓕᒥᐅᓄᑦ, ᐅᓇᑕᕐᑐᒃᓴᖁᑎᓕᒫᒥᖕᓂᒃ ᕾᖁᔨᓚᐅᕐᐳᑦ ᑲᑎᑎᓪᓗᒋᓪᓗ. 16ᐊᖓᔪᖅᑳᕐᔪᐊᖅ ᕼᐊᑕᑎᔨᕆ ᕾᖁᔨᓚᐅᕐᐳᖅ ᓯᕆᐊᒥᐅᓂᒃ ᐃᐅᕙᕅᑎᐅᑉ ᑰᖓᑕ ᓯᕿᓂᖓᑕ ᓄᐃᕕᐊᑕ ᓇᓛᓃᑦᑐᓂᒃ; ᕼᐃᓚᒧᐊᓚᐅᕐᐳᓪᓗ ᐊᖓᔪᖅᑳᖃᕐᓗᑎᒃ ᓲᐹᒃᒥᒃ, ᑖᓐᓇ ᐊᖓᔪᖅᑳᖑᔪᖅ ᐊᖓᔪᖅᑳᕐᔪᐊᑉ ᕼᐊᑕᑎᔨᕆᐅᑉ ᔪᐸᒥᐅᑕᐅᑉ ᐅᓇᑕᕐᑐᒃᓴᖁᑎᖏᓐᓄᑦ. 17ᑍᕕᑎᓕ ᑕᒪᑐᒥᖓ ᑐᓴᕋᒥ, ᐃᓴᕆᐊᓕᒥᐅᑦ ᐅᓇᑕᕐᑐᒃᓴᓕᒫᖏᑦ ᑲᑎᖁᕔᑦ, ᔪᐊᕐᑕᓂᐅᓪᓗ ᑰᖓᓂᒃ ᐃᑳᕐᐳᑦ, ᕼᐃᓚᒧᓪᓗ ᑎᑭᓪᓗᑎᒃ. ᓯᕆᐊᒥᐅᑦ ᐋᖅᑭᒃᓱᓚᐅᕐᐳᑦ ᓵᓐᖓᓯᔪᒪᓪᓗᑎᒃ ᑖᑦᓱᒥᖓ, ᐅᓇᑕᕐᓂᕐᓗ ᐱᒋᐊᓚᐅᕐᐳᖅ. 18ᓯᕆᐊᒥᐅᓪᓗ ᕿᒪᒃᓯᓚᐅᕐᐳᑦ ᐃᓴᕆᐊᓕᒥᐅᑦ ᐅᓇᑕᕐᑐᒃᓴᖏᓐᓂᒃ; ᑍᕕᑎᒃᑯᓪᓗ ᑐᖁᑦᓯᓚᐅᕐᐳᑦ 700ᓂᒃ ᓯᕆᐊᒥᐅᑕᓂᒃ ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓃᑦᑐᓂᒃ, 40,000ᓂᒡᓗ ᕿᒻᒥᕐᔪᐊᒦᑦᑐᓂᒃ, ᐃᑭᓕᓚᐅᕐᐹᓗ ᓲᐹᒃ ᐅᓇᑕᕐᑐᒃᓴᖏᑕ ᐊᖓᔪᖅᑳᖓ, ᑖᓐᓇᓗ ᑐᖁᓚᕐᐳᖅ ᐅᓇᑕᕐᕕᒋᔭᖓᓂ. 19ᐊᖓᔪᖅᑳᕐᔪᐊᓪᓗ ᕼᐊᑕᑎᔨᕆᐅᑉ ᐃᓄᖁᑎᓕᒫᖏᑦ ᖃᐅᔨᓕᕋᒥᒃ ᓵᓚᐅᓂᕐᒥᖕᓂᒃ ᐃᓴᕆᐊᓕᒥᐅᓄᑦ, ᐅᓇᑕᕈᒪᔪᓐᓃᓚᐅᕐᐳᑦ ᐃᓴᕆᐊᓕᒥᐅᓂᒃ, ᐃᒻᒥᖕᓂᒡᓗ ᑐᓂᓪᓗᑎᒃ ᐃᓴᕆᐊᓕᓄᑦ ᑖᒃᑯᓄᖓᓗ ᐃᓄᖁᑎᑖᕆᔭᐅᓚᐅᕐᐳᑦ. ᓯᕆᐊᒥᐅᓪᓗ ᑲᑉᐱᐊᓱᓕᓚᐅᕐᐳᑦ ᐃᑲᔪᕆᐊᒃᓴᖅ ᐊᒧᓁᑎᒥᐅᓂᒃ.
Currently Selected:
ᓴᒧᐃᓕ ᐂᑉᐸᖏᑦ 10: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
