ᐲᑦᑐᕉᓯ ᐂᑉᐸᖏᑦ 2
2
ᐊᔪᕆᕐᑐᐃᓂᕐᓗᒃᑐᑦ
1ᖄᖏᕐᓯᒪᓕᕐᑐᒥ ᓇᓚᐅᑦᑍᓂᕐᓗᒃᑐᑦ ᓴᕿᓛᐅᕐᒪᑕ ᐃᓄᖕᓄᑦ, ᑍᒫᒃᑕᐅᖅ ᐊᔪᕆᕐᓱᐃᓂᕐᓗᒃᑐᑦ ᐃᓕᑦᓯᓐᓄᑦ ᓴᖅᑭᑦᓱᒫᕆᕗᑦ, ᑖᒃᑯᐊ ᐊᓯᕈᕐᓇᕐᑐᒥᒃ ᓇᓛᒎᖏᑦᑐᒥᒃ ᐊᔪᕆᕐᓱᐃᔪᓯᖃᕈᒫᕐᐳᑦ, ᐊᒡᓛᑦ ᓱᓕᖏᒃᓂᕅᔪᒫᕐᐳᑦ ᐊᑕᓂᕐᒥᒃ ᐱᐅᓕᔨᒋᓚᐅᕐᑕᒥᖕᓂᑦ, ᐃᒻᒥᖕᓄᓪᓗ ᐊᓯᕈᕐᑕᐅᓇᕐᑐᒥᒃ ᑎᑭᑎᑦᓯᔪᒫᕐᐳᑦ. 2ᐅᓄᕐᑐᓄᑦ ᒪᓕᒃᑕᐅᓕᕈᒫᕐᐳᑦ ᐱᔪᒥᓇᖏᑦᑐᓂᒃ ᐱᓂᐊᕐᓂᕆᔭᖏᑦ ᑕᒪᓐᓇ ᒥᒃᓯᖃᕐᓂᑰᕐᓂᖅ ᐃᓄᖕᓄᑦ ᐱᐅᖏᓐᓂᕋᕐᑕᐅᓗᓂ ᐅᖃᐅᓯᐅᖃᑦᑕᓕᕈᒫᕐᐳᖅ. 3ᐱᔪᒪᓗᐊᕐᓂᕐᒥᖕᓄᑦ ᑖᒃᑯᐊ ᐊᔪᕆᕐᓱᐃᓂᕐᓗᒃᑐᑦ ᑮᓇᐅᔭᓕᐅᕋᓱᑐᐃᓐᓇᕐᓗᑎᒃ ᓇᖕᒥᓂᖅ ᐅᖃᐅᓯᒃᓴᓕᐊᕆᓯᒪᔭᒥᖕᓂᒃ ᓱᓕᖏᑦᑐᓂᒃ ᐅᖃᐅᓯᖃᖃᑦᑕᕈᒫᕐᐳᑦ ᐋᖅᑭᒌᕐᓯᒪᕗᖅ ᐃᖅᑲᕐᑐᐃᔨᒋᔪᒫᕐᑕᖓᑦᑕ ᐅᑕᖅᑭᔪᑎᓕᕐᐰᑦ, ᑖᒃᑯᓂᖓ ᓄᖒᑦᓯᔪᒃᓴᖅ ᓯᓂᖕᓂᐊᓐᖏᓚᖅ ᐅᑕᖅᑭᓗᓂ.
4ᒎᑎ ᐂᖏᓕᓂᒃ ᐊᔪᕐᑐᓕᔪᓂᒃ ᐊᒥᐊᒃᑯᓯᓚᐅᓐᖏᓚᖅ, ᐃᒋᓚᐅᕐᐰᑦ ᑲᑉᐱᐊᓇᕐᑐᕕᖕᒧᑦ ᑕᕝᕙᓂᓗ ᕿᓚᒃᓱᕐᓗᒋᑦ ᐊᕐᓵᕐᑑᔭᓄᑦ ᑖᕐᓂᕐᐹᒥ ᑕᕝᕙᓃᓐᓂᐊᓕᕐᓗᑎᒃ ᐅᑕᖅᑭᓪᓗᑎᒃ ᐃᖅᑲᕐᑐᕐᑕᐅᕕᒃᓴᒥᖕᓂᒃ; 5#ᒨᓯᓯ ᓯᕗᓪᓖᑦ 6:1—7:24.ᓯᓚᕐᔪᐊᑐᖃᕐᒥᓗ ᓂᑲᒍᓱᓚᐅᓐᖏᓚᖅ, ᐱᐅᓕᓯᓚᐅᕐᐳᕐᓕ ᓄᐊᒥᒃ, ᐊᔪᕆᕐᑑᓯᖃᓚᐅᕐᒪᑦ ᓇᓛᒎᕐᑐᒥᒃ, ᐃᓚᖃᕐᑎᓪᓗᒍ 7ᓂᒃ, ᐅᓕᕕᒡᔪᐊᖃᕐᑎᑦᓯᓚᐅᕐᐳᖅ ᒎᑎᖃᖏᑦᑐᓄᑦ ᓯᓚᕐᔪᐊᕐᒥ. 6#ᒨᓯᓯ ᓯᕗᓪᓖᑦ 19:24.ᒎᑎᐅᓪᓗ ᐃᒡᓗᒐᓴᒡᔪᐊᑦ ᓱᑑᒪ ᒍᒨᕋᓗ ᐃᑯᒪᒧᑦ ᓱᒋᐊᕐᓗᒋᑦ ᓄᖑᑕᐅᑎᓚᐅᕐᐰᑦ, ᖃᐅᔨᒪᑦᔪᑕᐅᖁᓪᓗᒋᑦ ᒎᑎᖃᖏᑦᑐᑦ ᑍᒤᑕᐅᔪᒫᕐᓂᖏᓐᓂᒃ; 7#ᒨᓯᓯ ᓯᕗᓪᓖᑦ 19:1-16.ᓘᑎ ᓴᐳᑎᓚᐅᕐᐹ, ᐃᓅᓯᖓ ᐃᓗᐊᕐᑐᓚᐅᕐᒪᑦ ᐃᓱᒫᓗᖕᓇᕐᑐᕐᔪᐊᕐᒦᑎᓪᓗᒍ ᓈᒻᒪᖏᑦᑐᕐᔪᐊᒥᒃ ᐃᓕᖅᑯᓯᖃᕐᓗᑎᒃ ᐱᖁᔭᖃᖏᑦᑐᓄᑦ. 8ᑖᓐᓇ ᓈᒻᒪᑦᓯᐊᕐᑐᒥᒃ ᐃᓅᓯᖃᕋᒥ ᐅᖁᒤᑦᑐᒦᓚᐅᕐᐳᖅ, ᑕᑯᔭᒥᒍᑦ ᑐᓴᕐᑕᒥᒍᓪᓗ ᖃᐅᑕᒫᑦ ᐃᓅᖃᑎᒋᒐᒥᑦᔪᒃ, ᐅᖁᒤᑦᑐᐊᓗᖕᒦᑦᔪᑎᒋᓚᐅᕐᐰᑦ ᐱᖁᔭᖃᖏᓐᓂᖏᓐᓄᑦ. 9ᑕᕝᕙ ᐊᑕᓂᐅᑉ ᓴᐳᑎᔪᓐᓇᕐᐰᑦ ᒎᑎᒧᑦ ᐅᒃᐱᕐᑐᑦ ᐆᒃᑐᕐᑕᐅᓂᖏᓐᓂᑦ, ᐱᐅᖏᑦᑐᒥᒃ ᐃᓕᖅᑯᓯᖃᕋᓱᐊᕐᑐᑦ ᓱᒋᐊᕐᑕᐅᓂᕐᒦᑎᓐᓂᐊᕐᐰᑦ ᐃᖅᑲᕐᑐᕐᑕᐅᕕᐅᑉ ᐅᓪᓗᖓ ᓈᒻᒪᒃᓯᑦᓯᐊᕆᓗᒍ; 10ᐱᓗᐊᕐᑐᒥᒃ ᑖᒃᑯᐊ ᑎᒥᐅᑉ ᐃᒃᓯᒎᕐᓂᖏᓐᓂᒃ ᐊᑐᓗᐊᕐᑐᑦ, ᐊᖓᔪᖅᑳᖃᕐᓂᕐᒥᒡᓗ ᓇᕐᕈᔪᑦ.
ᑖᒃᑯᐊ ᓯᕘᕋᓇᑎᒃ ᓴᖑᑎᑕᐅᔪᓐᓇᓐᖏᓚᑦ, ᑲᑉᐱᐊᓱᒐᑎᒡᓗ ᐅᖃᕐᓂᕐᓘᑎᖃᕐᐳᑦ ᕿᓚᖕᒥᐅᑦ ᐱᓐᓇᕐᓇᕐᓂᖏᓐᓂᒃ. 11ᐊᒡᓛᓪᓕ ᐂᖏᓖᑦ ᓴᓐᖏᓂᕐᓴᐅᔪᑦ ᐱᔪᓐᓇᕐᓂᖃᕐᓂᕐᓴᐅᔪᓪᓗ ᑖᒃᑯᓇᓐᖓᑦ, ᐊᑭᕋᕐᑐᕐᓗᑎᒃ ᐅᖃᕐᓂᕐᓘᑎᖃᓚᐅᓐᖏᓚᑦ ᕿᓚᖕᒦᑦᑐᑦ ᐱᓐᓇᕐᓇᕐᓂᖏᓐᓂᒃ ᐊᑕᓂᐅᑉ ᓵᖓᓂ. 12ᑖᒃᑯᐊᓕ ᐃᓄᐃᑦ ᐅᖃᕐᓂᕐᓘᑎᖃᕐᐸᒃᐳᑦ ᑐᑭᓯᓐᖏᑕᕋᓗᐊᒥᖕᓂᒃ, ᐆᒪᔪᑎᑐᑦ ᓄᔪᐊᕐᑐᑎᑐᑦ ᑍᒤᑉᐳᑦ, ᐃᕐᓂᐊᖑᓯᒪᔪᑎᑐᑦ ᑕᑯᔭᐅᓗᑎᒃ ᑐᖁᑕᐅᔪᒃᓴᑎᑐᑦ, ᐆᒪᔪᑎᑐᓪᓗ ᓄᔪᐊᕐᑐᑎᑐᑦ ᐊᓯᕈᕐᑕᐅᔪᒫᕐᐳᑦ. 13ᐊᑭᓕᕐᑕᐅᔪᒪᕐᐳᑦ ᓯᕐᓕᕿᑎᑕᐅᓂᕐᒥᒃ ᓯᕐᓕᕿᑎᑦᓯᓂᕆᓚᐅᕐᑕᖏᑦ ᒪᓕᒡᓗᒋᑦ, ᖁᕕᐊᒋᔭᖃᕐᐳᑦ ᐱᓂᐊᕐᓂᖃᕐᓗᑎᒃ ᐅᓪᓘᑎᓪᓗᒍ ᓈᒻᒪᒃᓯᑎᑦᓯᓇᓱᐊᕐᓗᑎᒃ ᑎᒥᒥ ᐱᔪᒪᔭᖓᓂᒃ. ᑲᓐᖑᓲᑎᓇᕐᐳᑦ ᓱᕈᕐᑎᕆᓪᓗᑎᒡᓗ, ᓂᕆᖃᑎᒋᓕᕌᖓᒥᓯ ᑍᒪᓐᖓᑦ ᖁᕕᐊᓲᑎᖃᕐᐸᒃᐳᑦ ᓴᒡᓗᑎᖃᕐᓂᕐᒥᒃ. 14ᐊᓯᓐᓂᐊᕈᒪᓂᕐᒥᒃ ᑕᑯᓐᓇᒐᑐᐊᖃᕐᐳᑦ, ᐊᔪᕐᑐᓕᔪᒪᓂᖏᓪᓗ ᓈᒻᒪᒃᓯᔪᓐᓇᓐᖏᓚᑦ. ᓴᓐᖐᑦᑐᓂᒃ ᑕᓯᐅᕐᓯᕙᒃᐳᑦ ᐊᔪᓕᕐᕕᒋᓂᐊᕐᑕᖏᓐᓄᑦ. ᐆᒻᒪᑎᖏᑦ ᐱᔪᒪᕕᒡᔪᐊᕐᓂᕐᒥᒃ ᐃᓕᓐᓂᐊᕐᓯᒪᕗᑦ. ᑖᒃᑯᐊ ᒎᑎᐅᑉ ᓂᓐᖓᐅᓯᖓᓃᓕᕇᕐᐳᑦ! 15#ᒨᓯᓯ ᓯᑕᒪᖏᑦ 22:4-35.ᐊᖅᑯᒻᒥᒃ ᓇᓛᒎᕐᑐᒥᒃ ᕿᒤᓪᓗᑎᒃ ᑕᒻᒪᕐᓇᕐᑐᒧᑦ ᑐᕌᓕᕐᐳᑦ; ᒪᓕᒃᐳᑦ ᐊᖅᑯᒻᒥᒃ ᐸᓛᒥᐅᑉ ᐱᐅᕆᐅᑉ ᐃᕐᓂᖓᑕ ᐊᑐᓚᐅᕐᑕᖓᓂᒃ, ᑮᓇᐅᔭᓂᒃ ᐱᔪᒪᓗᐊᕐᓂᕐᒧᑦ ᓈᒻᒪᖏᑦᑐᒃᑯᑦ ᐱᑖᕆᓯᒪᕔᑦ, 16ᓱᐊᒃᑕᐅᓚᐅᕐᐳᕐᓕ ᐊᔪᕐᑐᓕᓂᖓ; ᓯᐅᑎᖅᑯᕐᑐᔪᖅ ᐊᑐᕐᑕᖓ ᐅᖃᓚᐅᕐᒪᑦ ᐃᓅᑉ ᐅᖃᐅᓯᖓᓂᒃ ᐊᑐᕐᓗᓂ ᓄᖅᑲᕐᑎᓚᐅᕐᐹᓗ ᓇᓚᐅᑦᑍᔫᑉ ᐱᓂᐊᕐᓂᕐᓗᖕᓂᕆᓇᓱᐊᕐᑕᖓ.
17ᓄᓇᐅᑉ ᐃᓗᐊᓂᑦ ᑰᓚᐅᕐᑐᕕᓂᕐᑐᑦ ᐃᒤᕈᑎᓯᒪᓕᕐᐳᖅ ᒥᓂᔪᑎᑐᓪᓗ ᑍᒤᑉᐳᖅ ᐊᓄᕆᒧᑦ ᑎᒃᑕᐅᔪᑐᑦ; ᐃᓂᒃᓴᖃᕐᑎᑕᐅᔭᕇᕐᐳᓪᓕ ᑖᕐᔪᐊᖑᓂᕐᐹᒥ. 18ᐅᖃᐅᓯᕐᒥᒃᑎᒍᑦ ᐊᔪᖏᑦᑐᕐᔪᐊᖑᔮᕐᐳᑦ ᐅᖃᐅᓯᖃᕐᐳᓪᓕ ᓱᓕᓂᖃᖏᑦᑐᓂᒃ, ᑎᒥᐅᓪᓗ ᐱᔪᒪᓂᕐᔪᐊᖓᓂᒃ ᐊᑐᕐᓗᑎᒃ ᑕᒪᑐᒧᖓ ᑕᒻᒪᕐᑎᑦᓯᕙᒃᐳᑦ ᐃᓄᖕᓂᒃ ᑕᒻᒪᕐᓯᒪᓂᕐᒥᒃ ᕿᒤᓕᕋᑖᕐᑐᓂᒃ. 19ᐅᖃᐅᑦᔪᕐᓗᒋᓪᓗ ᕿᓚᕈᑦᔮᕐᑕᐅᓂᐊᕐᓂᕋᓗᒋᑦ, ᓇᖕᒥᓂᕐᓗ ᐊᔪᓕᕐᕕᖃᕐᓯᒪᒋᕗᑦ ᐃᓅᓯᑎᐊᕙᐅᓐᖏᑐᒧᑦ ᐃᓕᖅᑯᓯᕾᓐᓇᕐᓇᕐᑐᒥᒃ; ᑖᑦᓱᒧᖓ ᓵᓚᒋᔨᒋᔭᒥᓄᑦ ᐱᔨᒋᔭᐅᓕᕐᒪᑦ. 20ᐃᓄᒃ ᕿᒤᓯᒪᓕᕐᑐᖅ ᓯᓚᕐᔫᑉ ᓴᓗᒤᓕᓇᕐᓂᖓᓂᒃ ᖃᐅᔨᑎᑕᐅᓂᕐᒥᒍᑦ ᐊᑕᓂᑦᑎᒍᑦ ᐱᐅᓕᔨᑦᑎᒍᓪᓗ ᔩᓱᓯ ᙭ᔅᑑᓯᒃᑯᑦ, ᓵᓚᒋᔭᐅᒍᓂᓕ ᕿᓚᒃᑕᐅᒃᑲᓐᓂᕐᓗᓂᓗ ᑕᒪᒃᑯᓄᖓ, ᐱᐅᖏᑦᑐᒦᓐᓂᕐᓴᐅᓕᕐᓂᐊᕐᐳᖅ ᓯᕗᓪᓕᕐᒥᑦ. 21ᐱᐅᓂᕐᓴᐅᒐᔭᓚᐅᕐᐳᖅ ᖃᐅᔨᓚᐅᖏᒃᑯᑎᒃ ᐃᓗᐊᕐᓯᑎᑕᐅᓂᕐᒥᒃ ᑕᒪᑐᒥᖓ ᖃᐅᔨᓯᒪᓕᕐᓗᒍ ᕿᒪᒃᑯᓂᑦᔪᒃ ᐱᖁᔭᖅ ᐃᑦᔪᕐᓁᑦᑐᖅ ᑖᒃᑯᓄᖓ ᑐᓂᔭᐅᓯᒪᔪᖅ. 22#ᓲᓗᒨᓂ 26:11.ᑖᒃᑯᓄᖓ ᐅᖃᐅᓯᑐᖃᖅ ᓱᓕᕗᖅ ᐅᖃᐅᓯᐅᕙᓚᐅᕐᑐᖅ, “ᕿᒻᒥᖅ ᒥᕆᐊᕐᒥᓂᒃ ᓂᕆᓲᖑᕗᖅ,” ᐊᒻᒪᓗ “ᑰᒃᑰᓯ ᐅᐊᓴᕐᑕᐅᓯᒪᔪᖅ ᒪᕐᕋᕐᒧᑦ ᐅᑎᕐᐳᖅ ᒪᕋᓐᖑᕐᑎᒃᑲᓐᓂᓕᕐᓗᓂ.”
Currently Selected:
ᐲᑦᑐᕉᓯ ᐂᑉᐸᖏᑦ 2: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
