ᐲᑦᑐᕉᓯ ᐂᑉᐸᖏᑦ 1
1
1ᓮᒨᓂ ᐲᑦᑐᕉᓯᒥᑦ, ᐱᔨᒋᔭᐅᓪᓗᓂ ᐋᐴᓯᑕᓕᐅᔪᒥᑦ ᔩᓱᓯ ᙭ᔅᑑᓯᒧᑦ,
ᐱᑖᕐᓯᒪᔪᓄᑦ ᐅᒃᐱᕐᓂᕐᒥᒃ ᐱᕕᐊᕐᓇᕐᑐᒥᒃ ᐅᕙᑦᑎᑐᑦ ᒎᑎᑦᑕ ᐃᓗᐊᕐᑐᓐᖑᕐᑎᑦᓯᓂᖓᓄᑦ ᐱᐅᓕᔨᑦᑎᒍᓪᓗ ᔩᓱᓯ ᙭ᔅᑑᓯᒃᑯᑦ:
2ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᓮᒻᒪᕐᑎᑕᐅᓂᕐᓗ ᐱᕙᓪᓕᐊᓕᕐᓯᐅᒃ ᑕᒪᑦᓯᓐᓄᑦ ᖃᐅᔨᒪᓕᕐᓂᑦᓯᓐᓄᑦ ᒎᑎᒥᒃ ᔩᓱᓯ ᙭ᔅᑑᓯᒥᒡᓗ ᐊᑕᓂᑦᑎᓐᓂᒃ.
ᒎᑎᐅᑉ ᕾᖁᔨᓂᖓ ᓂᕈᐊᕐᓯᓂᖓᓗ
3ᒎᑎᐅᓂᖓᑕ ᐱᔪᓐᓇᓂᖓᓄᑦ ᑐᓂᓯᕕᒋᖕᒪᑎᒍᑦ ᑕᒤᓐᓂᒃ ᐃᓅᓯᕐᒥ ᐊᑐᕆᐊᖃᕐᑕᑦᑎᓐᓂᒃ ᐱᐅᔪᓂᒃ, ᑖᑦᓱᒥᖓ ᖃᐅᔨᑎᑕᐅᓂᑦᑎᒍᑦ ᕾᖁᓚᐅᕐᒪᑎᒍᑦ ᓇᖕᒥᓂᖅ ᐱᓐᓇᕐᓇᕐᓂᕐᒥᒍᑦ ᐱᑦᓯᐊᕐᓂᕐᒥᒍᓪᓗ. 4ᑕᒪᒃᑯᑎᒎᓇᖅ ᑐᓂᓯᕕᒋᓯᒪᖕᒪᑎᒍᑦ ᐱᕕᐊᕐᓇᕐᓂᕐᒥᓂᒃ ᐊᖏᕈᑎᒋᓯᒪᔭᖓᑕᓗ ᐊᖏᔫᓂᖓᓂᒃ, ᑕᒪᒃᑯᐊ ᐊᖅᑯᑎᒋᓗᒋᑦ ᕿᒤᑎᑕᐅᒐᑦᓯ ᐱᐅᖏᑦᑐᐊᓗᖕᓂᒃ ᓯᓚᕐᔪᐊᕐᒦᑦᑐᓂᒃ ᐃᒃᓯᒎᕐᓂᒃᑯᑦ ᓴᖅᑭᑎᑕᐅᔪᓂᑦ, ᐃᓚᖏᐅᑎᑎᑕᐅᖁᓪᓗᓯᓗ ᒎᑎᐅᓂᖓᓂᒃ. 5ᑕᒪᓐᓇ ᐱᑦᔪᑎᒋᓗᒍ ᐅᒃᐱᕐᓂᑦᓯ ᐱᔪᓐᓇᕐᓂᓕᒫᑦᓯᓐᓄᑦ ᐃᓚᓇᓱᐊᕐᓯᐅᒃ ᐱᑦᓯᐊᕐᓂᕐᒥᒃ, ᐱᑦᓯᐊᕐᓂᕐᓗ ᐃᓚᓗᒍ ᖃᐅᔨᒪᓂᕐᒥᒃ, 6ᖃᐅᔨᒪᓂᕐᓗ ᐃᓚᓗᒍ, ᓇᖕᒥᓂᖅ ᐱᓯᒪᑦᓯᐊᕈᓐᓇᕐᓂᕐᒥᒃ, ᐱᓯᒪᑦᓯᐊᕈᓐᓇᕐᓂᖅ ᐃᓚᓗᒍ ᕿᓄᐃᓵᕐᓂᕐᒥᒃ, ᕿᓄᐃᓵᕐᓂᕐᓗ ᐃᓚᓗᒍ ᒎᑎᖃᑦᓯᐊᕐᓂᕐᒥᒃ; 7ᒎᑎᖃᑦᓯᐊᕐᓂᖅ ᐃᓚᓗᒍ ᐃᓅᖃᑎᖃᑦᓯᐊᕈᓐᓇᕐᓂᕐᒥᒃ, ᐃᓅᖃᑎᖃᑦᓯᐊᕈᓐᓇᕐᓂᖅ ᐃᓚᓗᒍ ᓇᒡᓕᖕᓂᕐᒥᒃ. 8ᑕᒪᒃᑯᐊ ᐱᓪᓚᕇᑦ ᐱᓯᒪᒍᑦᓯᐅᒃ ᐊᖏᒡᓕᕙᓪᓕᐊᒃᐸᑕᓗ ᐃᓕᑦᓯᓐᓂ, ᑕᕝᕙ ᐱᓇᓱᐊᕐᓂᖃᑦᓯᐊᕐᓂᐊᕐᐳᓯ ᐱᕙᓪᓕᐊᑎᑦᓯᑦᓯᐊᕐᓗᓯᓗ ᖃᐅᔨᒪᓕᕐᓂᑦᓯᓐᓄᑦ ᐊᑕᓂᑦᑎᓐᓂᒃ ᔩᓱᓯ ᙭ᔅᑑᓯᒥᒃ. 9ᑕᒪᒃᑯᓂᖓᓕ ᐱᖃᖏᑦᑐᖅ ᖃᓂᑦᑐᒧᑦ ᑭᓯᐊᓂ ᑕᐅᑐᒃᐳᖅ ᑕᐅᑐᖏᑑᓪᓗᓂᓗ ᐳᐃᒍᕐᓯᒪᓪᓗᓂ ᐊᔪᕐᑐᓕᓂᑐᖃᖏᑕ ᐲᕐᑕᐅᓯᒪᓂᖏᓐᓂᒃ.
10ᑍᒤᒻᒪᑦ ᐅᒃᐱᖃᑎᒃᑲ, ᐊᒃᓱᕈᒃᑲᓐᓂᕆᐊᖃᕐᐳᓯ ᕾᖁᔭᐅᓯᒪᓂᓯ ᓂᕈᐊᕐᑕᐅᓯᒪᓂᓯᓗ ᑲᔪᓯᑎᓐᓇᓱᐊᕐᓗᒋᑦ, ᑍᒤᒃᑯᑦᓯ ᐅᒃᐱᕐᓂᕐᒥᑦ ᑲᑕᖕᓂᐊᓐᖏᒻᒪᕆᒃᐳᓯ; 11ᐱᕕᒃᓴᖃᕐᑎᑕᐅᑦᓯᐊᕐᓂᐊᕐᐳᓯᓗ ᐃᑎᕐᕕᒃᓴᕐᑖᖁᓪᓗᓯ ᐊᑕᓂᑦᑕ ᔩᓱᓯᐅᑉ ᙭ᔅᑑᓯᐅᑉ ᐱᐅᓕᔨᑦᑕ ᐊᑕᓂᐅᕕᖓᓄᑦ ᐃᓱᖃᖏᑦᑐᒧᑦ.
12ᑍᒤᒻᒪᑦ ᐃᖅᑬᑏᓐᓇᕈᒪᕙᑦᓯ ᑕᒪᒃᑯᓂᖓ, ᐅᓃᑦ ᖃᐅᔨᒪᒐᓗᐊᕐᑎᓪᓗᓯ ᐊᑦᑕᕐᓇᖏᑦᑐᒦᓕᕋᑦᓯ ᓱᓕᓂᕐᒥᒃ ᑐᓐᖓᕕᖃᓕᕐᓂᑦᓯᓐᓄᑦ. 13ᐃᓱᒪᒐᒪ ᓈᒻᒪᒐᓱᒋᓪᓗᒍ ᐃᖅᑬᑎᖃᑦᑕᕐᓗᓯ, ᑕᒫᓂ ᓄᓇᒥ ᐃᓅᓂᓐᓂ, 14ᖃᐅᔨᒪᓕᕋᒪ ᑎᒥᓐᓂ ᐃᓅᑯᑖᖕᓂᐊᕈᓐᓃᕋᒪ, ᑍᒫᒃ ᐊᑕᓂᑦᑕ ᔩᓱᓯᐅᑉ ᙭ᔅᑑᓯᐅᑉ ᑕᑯᑎᓯᒪᖕᒪᖓ. 15ᐊᒃᓱᕈᓪᓚᕆᒃᐳᖓᓗ ᑭᖑᓂᓐᓂ ᑕᒪᒃᑯᓂᖓ ᖃᖓᓕᒫᒃᑯᑦ ᐃᖅᑬᔪᓐᓇᖁᓪᓗᓯ.
᙭ᔅᑑᓯᐅᑉ ᐱᓐᓇᕐᓇᕐᓂᕐᔪᐊᖓᓂᒃ ᑕᑯᓯᒪᔪᑦ
16ᐅᓂᒃᑲᐅᓯᑐᐃᓐᓇᕐᓂᒃ ᒪᓕᓚᐅᓐᖏᓚᒍᑦ ᐃᓕᑦᓯᓐᓄᑦ ᐅᖃᐅᓯᖃᕐᑎᓪᓗᑕ ᐊᑕᓂᑦᑕ ᔩᓱᓯᐅᑉ ᙭ᔅᑑᓯᐅᑉ ᐱᔪᓐᓇᕐᓂᖃᕐᓗᓂ ᑎᑭᑦᓱᒫᕐᓂᖓᓂᒃ, ᓇᖕᒥᓂᖅ ᑕᑯᓯᒪᒐᑦᑎᒍ ᑕᑯᒥᓇᕐᓂᕐᔪᐊᖓ. 17#ᒫᑎᐅᓯ 17:1-5; ᒫᑯᓯ 9:2-7; ᓘᑲᓯ 9:28-35.ᓇᔫᑎᓚᐅᕋᑦᑕ ᐅᐱᒋᔭᐅᑎᓪᓗᒍ ᓂᕐᑐᕐᓇᕐᑎᑕᐅᑎᓪᓗᒍᓗ ᒎᑎ ᐊᑖᑕᒧᑦ ᓂᐱ ᑐᓴᓚᐅᕐᐸᕗᑦ ᐱᓐᓇᕐᓇᕐᑐᔪᐊᒥᑦ ᐱᔪᖅ, “ᑖᓐᓇ ᑕᕝᕙ ᐃᕐᓂᕋ ᓇᒡᓕᒋᓪᓗᒍ ᖁᕕᐊᒋᑦᓯᐊᕐᑕᕋ,” 18ᐅᕙᒍᑦ ᓇᖕᒥᓂᖅ ᓂᐱ ᑐᓴᓚᐅᕐᐸᕗᑦ ᕿᓚᖕᒥᑦ ᐱᔪᖅ, ᐃᓚᒋᓚᐅᕋᑦᑎᒍ ᖃᖅᑲᒥ ᐃᑦᔪᕐᓁᑦᑐᒥ.
19ᓇᓚᐅᑦᑍᑦᔪᑕᐅᓯᒪᔪᑦ ᓇᓚᐅᑦᓯᑎᑕᐅᓂᖏᑦ ᓇᓗᓇᕈᓐᓃᑲᓐᓂᓚᐅᕐᐳᑦ. ᓈᓚᑦᓯᐊᕈᑦᓯᐅᒃ ᑕᒪᓐᓇ ᐊᑲᐅᔪᒥᒃ ᐱᓂᐊᕐᐳᓯ ᓲᕐᓗ ᖃᐅᒻᒪᖅᑯᑎᑐᑦ ᑖᕐᑐᒥ ᐃᑯᒪᔪᑎᑐᑦ, ᖃᐅᓕᓵᕐᑐᕐᓯᐅᑦ ᐅᓪᓗᕆᐊᖅ ᓴᖅᑭᓂᐊᕐᐳᖅ ᐆᒻᒪᑎᑦᓯᓐᓂ. 20ᓯᕗᓪᓕᕐᐹᒥᒡᓕ ᑐᑭᓯᔭᕆᐊᖃᕐᐸᓯ ᐅᓇ, ᓇᓚᐅᑦᑍᔪᑦ ᐅᖃᐅᓯᕆᓯᒪᔭᖏᑦ ᒎᑎᐅᑉ ᐅᖃᐅᓯᖏᓐᓃᑦᑐᑦ ᐃᓅᑉ ᓇᖕᒥᓂᖅ ᑐᑭᓕᐅᕆᓂᖏᓐᓄᑦ ᐱᓯᒪᖏᒻᒪᑕ. 21ᓇᓚᐅᑦᑍᑦᔪᑕᐅᓯᒪᔪᑦ ᐃᓅᑉ ᐃᓱᒪᖓᓂᑦ ᐱᔪᖃᓚᐅᕐᓯᒪᖏᒻᒪᑕ, ᐃᓄᐃᓪᓕ ᐅᖃᕈᓐᓇᕐᑎᑕᐅᓯᒪᕗᑦ ᒎᑎᒥᑦ ᐱᔪᓂᒃ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᑕᓯᐅᕐᑕᐅᓪᓗᑎᒃ ᑭᓯᐊᓂ.
Currently Selected:
ᐲᑦᑐᕉᓯ ᐂᑉᐸᖏᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
