ᐊᑕᓃᑦ ᐂᑉᐸᖏᑦ 9
9
ᔨᕼᐅᑉ ᐊᖓᔪᖅᑳᕐᔪᐊᓐᖑᕐᑎᑕᐅᓂᖓ ᐃᓴᕆᐊᓕᒥᐅᓄᑦ
1ᐃᓔᓴ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᕾᖁᔨᕗᖅ ᐊᖑᒻᒥᒃ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑕ ᐃᓚᖓᓐᓂᒃ ᐅᖃᐅᑎᓪᓗᓂᐅᒡᓗ, “ᐸᕐᓁᓕᕆᑦ ᐂᓗᑎᓪᓗ ᕌᒪᑦ-ᒋᓖᑦᒧᑦ ᐅᓇ ᐅᕐᓱᖅ ᓇᒃᓴᕐᓗᒍ. 2ᑍᒃᑯᖓ ᑎᑭᒃᑯᕕᑦ, ᐊᖑᒻᒥᒃ ᔨᕼᐆᒥᒃ ᐊᑎᖃᕐᑐᒥᒃ ᕿᓂᕐᓂᐊᕐᐳᑎᑦ ᔨᕼᐆᓴᐸᐅᑉ ᓂᒻᓮᓪᓗ ᐃᕐᓂᖓᓂᒃ. ᐅᐸᒃᑯᕕᐅᒃ ᐃᓚᒋᔭᖏᓐᓂᑦ ᕿᒪᕉᑎᑎᓪᓗᒍ ᐃᒡᓗᕈᓯᕐᒧᐊᕈᑎᓪᓗᒍ, 3ᑖᓐᓇ ᐅᕐᓱᖅ ᐊᓕᒎᕐᒦᑦᑐᖅ ᐱᓗᒍ ᓂᐊᖁᐊᓄᑦ ᑯᕕᓗᒍ ᐅᖃᕐᓂᐊᕐᐳᑎᑦ, ‘ᐃᒫᒃ ᐊᑕᓂᖅ ᐅᖃᕐᐳᖅ: ᐅᕐᓱᒧᑦ ᒥᖑᐊᕐᐸᒋᑦ ᐊᖓᔪᖅᑳᕐᔪᐊᖑᓕᖁᓪᓗᑎᑦ ᐃᓴᕆᐊᓕᒥᐅᓄᑦ.’ ᐱᔭᕇᑐᐊᕈᕕᑦ ᐊᓂᓗᑎᑦ ᐅᓪᓚᒃᓯᓂᐊᕐᐳᑎᑦ, ᓄᖅᑲᕐᑍᓕᓗᑎᑦ.” 4ᑕᕝᕙ ᑖᓐᓇ ᐅᕕᒃᑲᖅ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ, ᕌᒪᑦ-ᒋᓖᑦᒧᐊᕐᑕᐅᕗᖅ. 5ᑎᑭᓐᓇᒥ, ᑕᑯᕗᖅ ᐅᓇᑕᕐᑐᒃᓮᑦ ᐊᖓᔪᖅᑳᖏᑦ ᑲᑎᒪᓪᓗᑎᒃ ᐃᒃᓯᕙᖃᑎᒌᒃᑐᑦ ᐅᖃᕐᓗᓂᓗ, “ᐊᖓᔪᖅᑳᒃ ᐃᓕᖕᓄᑦ ᐅᖃᐅᓯᒃᓴᖃᕐᑎᑕᐅᒐᒪ.” ᔨᕼᐆᑉ ᐊᐱᕆᕚ, “ᓇᓪᓕᑦᑎᓐᓅᑦ?” ᑖᑦᓱᒪ ᐅᖃᐅᑎᒃᑲᓐᓂᕐᐹ, “ᐃᓕᖕᓄᑦ ᐊᖓᔪᖅᑳᒃ.” 6#ᐊᑕᓃᑦ ᓯᕗᓪᓖᑦ 19:16.ᔨᕼᐆ ᓂᑯᕕᓪᓗᓂ ᐃᒡᓗᒧᑦ ᐃᑎᕐᐳᖅ ᑕᕝᕙ ᑖᑦᓱᒪ ᐊᖑᑎᐅᑉ ᒎᑎᒧᑦ ᐅᖃᕐᑎᒋᔭᐅᔫᑉ ᐅᕐᓱ ᔨᕼᐅᑉ ᓂᐊᖁᖓᓄᑦ ᑯᕕᓪᓗᒍ ᐅᖃᐅᑎᕚ, “ᐃᒫᒃ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐅᕐᓱᒧᑦ ᒥᖑᐊᕐᐸᒋᑦ ᐊᖓᔪᖅᑳᕐᔪᐊᓐᖑᖁᓪᓗᑎᑦ ᐊᑕᓂᐅᑉ ᐃᓄᖁᑎᖏᓐᓄᑦ ᐃᓴᕆᐊᓕᒥᐅᓄᑦ. 7ᑐᖁᕅᔪᒃᓴᐅᕗᑎᑦ ᐊᖓᔪᖅᑳᕕᑦ ᐂᕼᐊᐱᐅᑉ ᐃᓚᓕᒫᖏᓐᓂᒃ, ᐊᑭᓂᐊᕈᒪᒐᒪ ᐅᖃᕐᑎᒪ ᑐᖁᕋᕐᑕᐅᓂᕆᖃᑦᑕᓚᐅᕐᑕᖏᓐᓄᑦ, ᐊᑕᓂᐅᓪᓗ ᐃᓄᖁᑎᖏᑕ ᑐᖁᑕᐅᓯᒪᔪᑦ ᔨᔨᐱᐅᓪᒧᑦ. 8ᐂᕼᐊᐱᐅᑉ ᐃᒡᓗᒥᐅᖃᑎᓕᒫᖏᑦ ᓄᖑᑕᐅᔪᒃᓴᐅᕗᑦ, ᐂᕼᐊᑉᒥᑦ ᐱᓯᒪᔪᓕᒫᑦ ᐊᖑᑏᑦ ᐃᓴᕆᐊᓕᒥᐅᓂ ᓄᖑᑎᑦᓱᒪᕙᒃᑲ ᐱᔨᑲᑖᖑᒐᓗᐊᕐᐸᑕ ᐱᔨᐅᖏᒃᑲᓗᐊᕐᐸᑕᓗ. 9ᐂᕼᐊᐱᐅᑉ ᐃᒡᓗᒥᐅᖃᑎᖏᑦ ᔨᕈᐳᐊᒻ ᓂᐹᑎᐅᑉ ᐃᕐᓂᖓᑕ ᐃᒡᓗᒥᐅᖃᑎᖏᑎᑐᑦ ᐱᓂᐊᕐᕕᒋᔪᒪᕙᒃᑲ, ᐹᓴᐅᓪᓗ ᐊᕼᐂᔭᐅᑉ ᐃᕐᓂᖓᑕ ᐃᒡᓗᒥᐅᖃᑎᖏᑦ. 10#ᐊᑕᓃᑦ ᓯᕗᓪᓖᑦ 21:23.ᔨᔨᐱᐅᓪ ᐱᓪᓗᒍ, ᑖᓐᓇ ᕿᒻᒥᓄᑦ ᓂᕆᔭᐅᔪᒫᕐᐳᖅ ᓄᓇᒥ ᐃᓂᒋᔭᖓᓂ ᔨᔭᕆᐅᓪᒥ, ᑭᓇᒧᓪᓘᓐᓃᑦ ᐃᓗᕕᕐᑕᐅᔪᒫᓐᖏᓚᖅ.” ᑕᕝᕙ ᐊᖑᑦ ᑖᓐᓇ ᐅᖃᓪᓚᒌᑐᐊᕋᒥ ᐊᓂᓪᓗᓂ ᐅᓪᓚᒃᓯᕗᖅ. 11ᔨᕼᐆ ᐊᖓᔪᖅᑳᖑᖃᑎᒥᓄᑦ ᐅᑎᕐᒪᑦ ᐃᓚᖓᑦᑕ ᐊᐱᕆᕚ, “ᖃᓄᐃᑦᑐᖃᖏᒃᑲᓗᐊᕐᐹ ᓱᖕᒪᓂᓐᓇ ᑐᑮᕈᓯᒪᔪᕐᔫᔮᕐᑐᖅ ᐃᓕᖕᓂᒃ ᑕᑯᔭᕐᑐᐃᕚ?” ᔨᕼᐆᓪᓕ ᑭᐅᕚ, “ᐊᖑ ᑍᓐᓇ ᖃᐅᔨᒪᕙᓯ ᖃᓄᐃᑦᑐᓂᒡᓗ ᐅᖃᐅᓯᖃᓲᖑᖕᒪᖔᑦ ᖃᐅᔨᒪᒋᕙᓯ.” 12ᑖᒃᑯᐊ ᑭᐅᕗᑦ, “ᓱᓕᓐᖏᓚᑎᑦ, ᖃᐅᔨᒪᓐᖏᓚᒍᑦ ᐊᑏ ᐅᖃᐅᑎᑦᓯᐊᓚᐅᕐᑎᒍᑦ.” ᔨᕼᐆᑉ ᐅᖃᐅᑎᕔᑦ, “ᐃᒫᒃ ᑕᕝᕙ ᐅᖃᐅᑎᕙᖓ, ᐃᒫᒃ ᐊᑕᓂᖅ ᐅᖃᕐᐳᖅ, ᐅᕐᓱᒧᑦ ᒥᖑᐊᕐᐸᒋᑦ ᐊᖓᔪᖅᑳᕐᔪᐊᓐᖑᖁᓪᓗᑎᑦ ᐃᓴᕆᐊᓕᒥᐅᓄᑦ.” 13ᑕᕝᕙ ᑐᐊᕖᓐᓇᖅ ᐅᓕᒡᔪᐊᒥᖕᓂᒃ ᐃᓯᕕᑦᓯᕗᑦ ᑐᖕᒥᕌᓄᑦ ᖁᖁᐊᕈᒻᒥᒡᓗ ᓂᓪᓕᕐᑎᑦᓯᓪᓗᑎᒃ ᓂᐱᖅᑯᕐᑐᓪᓗᑎᒃ ᐅᖃᕐᐳᑦ, “ᔨᕼᐆ ᐊᖓᔪᖅᑳᕐᔪᐊᖑᓕᕐᐳᖅ!”
ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᔪᕌᒥᐅᑉ ᑐᖁᑕᐅᓂᖓ
14ᑕᕝᕙ ᔨᕼᐆ ᔨᕼᐆᓴᐸᐅᑉ ᓂᒻᓮᓪᓗ ᐃᕐᓂᖓ ᑐᖁᑦᓯᔪᒪᓕᕐᐳᖅ ᔪᕌᒥᒥᒃ, ᔪᕌᒥ ᐃᓴᕆᐊᓕᒥᐅᓪᓗ ᓴᐳᔨᑦᓯᒪᓇᓱᐊᓚᐅᕐᐳᑦ ᕌᒪᑦ-ᒋᓖᑎᒥᒃ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᕼᐊᔧᐅᓪᒧᑦ ᐱᔭᐅᓇᓱᐊᕐᑎᓪᓗᒍ. 15ᐊᖓᔪᖅᑳᕐᔪᐊᖅ ᔪᕌᒥ ᐅᑎᓚᐅᕐᒪᑦ ᔨᔭᕆᐅᓪᒧᑦ#9:15 ᔨᕉᓴᓕᒧᑦ ᐃᑭᓕᕐᑕᐅᓂᕕᓂᕐᒥᓂᒃ ᒪᒥᑦᓯᕆᐊᕐᑐᕐᓗᓂ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑕ ᕼᐊᔧᐅᓕᐅᑉ ᐅᓇᑕᕐᑎᖏᓐᓄᑦ ᐃᑭᓕᕐᑕᐅᓚᐅᕋᒥ ᐅᓇᑕᕐᓗᑎᒃ; ᔨᕼᐆ ᐅᖃᕐᐳᖅ, ᑍᒫᒃᑕᐅᖅ ᐃᓱᒪᖃᕈᑦᓯ ᐃᒡᓗᒐᓴᒡᔪᐊᓂ ᐊᓂᔪᖃᕐᑍᓕᓂᐊᕐᐳᖅ ᔨᓴᕆᐅᓪᒧᑦ ᐅᖃᕆᐊᕐᑐᖁᓇᒋᑦ ᑐᓴᕐᑎᑦᓯᔭᕐᑐᕐᓗᑎᒃ. 16ᔨᕼᐆ ᕿᒧᒃᓯᐅᑎᒥᓄᑦ ᐊᒃᓴᓗᐊᓕᖕᒧᑦ ᐃᑭᓪᓗᓂ ᔨᔭᕆᐅᓪᒧᑦ ᐃᖏᕐᕋᓯᕗᑦ, ᔪᕌᒥ ᑍᑲᓃᒻᒪᑦ ᐋᖅᑭᒃᓯᕆᐊᕐᑐᕐᓯᒪᓪᓗᓂ ᔫᑕᒥᐅᑦ ᐊᖓᔪᖅᑳᕐᔪᐊᖓᑦ ᐊᕼᐊᔧᐊ ᑍᑲᓃᒃᑭᕗᖅ ᑕᑯᔭᕐᑐᕐᓯᒪᓪᓗᓂ ᔪᕌᒥᒥᒃ. 17ᖃᐅᔨᓴᕐᑎ ᐊᕙᓗᕐᔪᐊᑉ ᔨᔭᕆᐅᓕᐅᑉ ᓇᓯᕝᕕᖓᓃᑦᑐᖅ ᑕᑯᒐᒥ ᔨᕼᐆᑯᓐᓂᒃ ᑎᑭᓴᕐᑐᕐᐸᓪᓕᐊᔪᓂᒃ ᕾᒐᓛᕐᐳᖅ ᐅᖃᕐᓗᓂ, “ᐅᓇᑕᕐᑎᓂᒃ ᕾᔪᖃᓕᕐᐳᖅ.” ᔪᕌᒻ ᑎᓕᓯᓪᓗᓂ ᐅᖃᕐᐳᖅ, “ᕿᒻᒥᕐᔪᐊᒃᑰᕐᑐᒧᑦ ᐅᐸᒃᑕᐅᓕᑦ ᐊᐱᕆᓗᒋᓪᓗ, ‘ᐅᓇᑕᕆᐊᕐᑐᖏᒃᑲᓗᐊᕐᐲᑦ?’” 18ᑕᕝᕙ ᕿᒥᕐᔪᐊᒃᑯᑦ ᐃᑭᒪᔪᑦ ᔨᕼᐆᒥᒃ ᐹᕐᓯᒋᐊᕐᑐᓕᕐᐳᖅ, ᑲᑎᒐᒥᐅᒡᓗ ᐅᖃᐅᑎᕚ, “ᐊᖓᔪᖅᑳᕐᔪᐊᑉ ᐃᒫᒃ ᐊᐱᕆᔭᐅᖁᖕᒪᑎᑦ, ‘ᐅᓇᑕᕆᐊᕐᑐᖏᒃᑲᓗᐊᕐᐲᑦ?’” ᔨᕼᐆᑉ ᑭᐅᕚ, “ᐅᓇᑕᕐᑐᖃᕐᐸᑦ ᖃᓄᐃᓕᒐᔭᕋᕕᑦ? ᐅᑎᒧᑦ ᓵᓪᓗᑎᑦ ᑭᖑᓂᑦᑎᓐᓂ ᒪᓕᓕᕆᑦ!” ᖃᐅᔨᓴᕐᑎ ᐊᕙᓗᕐᔪᐊᑉ ᓇᓯᕝᕕᖓᓃᑦᑐᖅ ᐅᖃᕐᐳᖅ, “ᐸᕐᕆᐊᕐᑎᑕᕗᑦ ᑎᑭᐅᑎᔫᒐᓗᐊᖅ ᑭᓯᐊᓂ ᐅᑎᕐᐸᓪᓕᐊᖏᑦᑐᖅ.” 19ᑕᕝᕙ ᐊᖓᔪᖅᑳᕐᔪᐊᖅ ᑎᓕᓯᒃᑲᓐᓂᕆᕗᖅ ᕿᒻᒥᕐᔪᐊᒃᑰᕐᑐᒥᒃ, ᑍᒃᑯᓄᖓᓗ ᑎᑭᐅᑎᒐᒥ ᐅᖃᕐᐳᖅ, “ᐊᖓᔪᖅᑳᕐᔪᐊᖅ ᐃᒫᒃ ᐊᐱᕆᖁᔨᖕᒪᑦ, ‘ᐅᓇᑕᕆᐊᕐᑐᖏᒃᑲᓗᐊᕐᐲᑦ?’” ᔨᕼᐆᑉ ᑭᐅᕚ, “ᐅᓇᑕᕐᑐᖃᕐᐸᑦ ᖃᓄᐃᓕᒐᔭᕋᕕᑦ? ᐅᑎᒧᑦ ᓵᓪᓗᑎᑦ ᑭᖑᓂᑦᑎᓐᓂ ᒪᓕᓕᕆᑦ!” 20ᖃᐅᔨᓴᕐᑎ ᐊᕙᓗᕐᔪᐊᑉ ᓇᓯᕝᕕᖓᓃᑦᑐᖅ ᐅᖃᓕᕆᕗᖅ, “ᐸᕐᕆᐊᕐᑎᑕᕗᑦ ᑍᒃᑯᓄᖓ ᑎᑭᐅᑎᔫᒐᓗᐊᖅ ᑭᓯᐊᓂ ᐅᑎᕐᐸᓪᓕᐊᔪᓐᓃᕐᒥᔪᖅ, ᓯᕗᓕᕐᑎᖓᑦ ᔨᕼᐆᖑᖅᑰᔨᔪᖅ ᓂᒻᓮᑉ ᐃᕐᓂᖓ, ᓱᑲᑦᑐᐊᓘᓪᓗᓂ ᐃᖏᕐᕋᑎᑦᓯᔪᖅ.” 21ᑕᕝᕙ ᔪᕌᒻ ᐅᖃᕐᐳᖅ, “ᕿᒧᒃᓯᐅᑎᒃᑲ ᐊᒃᓴᓗᐊᓖᑦ ᐊᑐᐃᓐᓇᕈᕐᑕᐅᓕᑦ.” ᐊᑐᐃᓐᓇᕈᕐᑕᐅᖕᒪᑕ, ᔪᕌᒻ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᐊᕼᐊᔧᐊᓗ ᔫᑕᒥᐅᑦ ᐊᖓᔪᖅᑳᕐᔪᐊᖓᑦ ᐊᑕᐅᑦᓯᒃᑯᑦ ᐃᖏᕐᕋᓯᕘᒃ ᐊᑐᓂᑦ ᕿᒧᒃᓯᐅᑎᒥᖕᓃᓪᓗᑎᒃ ᐊᒃᓴᓗᐊᓕᖕᒥ ᔨᕼᐆᒥᒃ ᑲᑎᓯᒋᐊᕐᑐᓕᕐᓗᑎᒃ, ᑲᑎᕚᒡᓗ ᓄᓇᒥ ᓁᐹᑎᐅᑉ ᔨᔭᕆᐅᓪᒥᐅᑦ ᓄᓇᖁᑎᕕᓂᖓᓂ. 22ᔪᕌᒻᒥᐅᓪᓗ ᔨᕼᐆ ᑕᑯᓕᕋᒥᐅᒃ ᐊᐱᕆᕚ, “ᐅᓇᑕᕆᐊᕐᑐᖏᒃᑲᓗᐊᕐᐲᑦ?” ᔨᕼᐆᑉ ᑭᐅᕚ, “ᖃᓄᖅ ᐅᓇᑕᖏᓐᓂᖃᕈᓐᓇᕐᐹ ᐊᓯᓐᓂᐊᕐᓂᖅ ᐊᖓᒃᑰᓂᕐᓗ ᐊᓈᓇᕕᑦ ᔨᔨᐱᐊᓕᐅᑉ ᐃᓕᖅᑯᓯᕆᓚᐅᕐᑕᖓ ᐱᕙᓪᓕᐊᑐᐃᓐᓇᕐᑎᓪᓗᒍ.” 23ᑕᕝᕙ ᔪᕌᒻ ᐅᑎᕆᐊᕐᐳᖅ ᕿᒪᒃᓯᓪᓗᓂᓗ, ᐊᕼᐊᔧᐊᓗ ᑭᖑᓕᕆᕋᑖᕐᑕᓂ ᕾᒐᓛᕐᕕᒋᕚ ᐅᖃᐅᑎᓪᓗᒍ, “ᓯᓔᕐᕆᔭᐅᕗᒍᑦ!” 24ᔨᕼᐆᑉ ᐱᓯᒃᓯᓂ ᖃᕐᔪᓕᕋᒥᐅᒃ ᔪᕌᒻ ᐱᓯᒃᐹ ᑐᐃᖏᒃᑕ ᐊᑯᓐᓂᓪᓗᐊᖏᒃᑎᒃᑯᑦ ᐆᒻᒪᑎᖅᑯᓪᓗᐊᕐᒪᒍ ᕿᒧᒃᓯᐅᑎᒥ ᐊᒃᓴᓗᐊᓕᐅᑉ ᐃᓗᐊᓄᑦ ᐅᕐᕈᕗᖅ. 25ᔨᕼᐆᑉ ᐱᑦᑳᕐ ᐃᑲᔪᕐᑎᓂ ᐅᖃᐅᑎᕚ ᕿᒧᒃᓯᐅᑎᒥᓂᒃ ᐊᐅᓚᒃᓯᔨᖁᑎᓂ, “ᑎᒥᖓ ᑎᒍᓗᒍ ᐃᒋᓚᐅᕈᒃ ᓄᓇᒧᑦ ᓁᐹᑎᐅᑉ ᔨᔭᕆᐅᓪᒥᐅᑉ ᓄᓇᖁᑎᖓᓄᑦ, ᐃᖅᑲᐅᒪᕖᑦ ᕿᒧᒃᓯᐅᑎᒥ ᐃᖏᕐᕋᑎᓪᓗᓄᒃ ᐂᕼᐊᑉᒥᒃ ᒪᓕᒡᓗᓄᑦ ᑖᑦᓱᒪ ᐊᑖᑕᖓᓂᒃ, ᐊᑕᓂᐅᑉ ᐊᑐᕈᒫᕐᑐᓂᒃ ᑖᑦᓱᒧᖓ ᐅᖃᕐᕕᒋᓚᐅᕐᓯᒪᖕᒪᑎᒃᑯᒃ; 26#ᐊᑕᓃᑦ ᓯᕗᓪᓖᑦ 21:19.ᐅᖃᕐᓗᓂ, ‘ᐃᑉᐸᒃᓴᖅ ᑕᑯᓚᐅᕐᐳᖓ ᓁᐹᑎᐅᑉ ᐊᐅᖓᓂᒃ ᐃᕐᓂᖏᑕᓗ ᐊᐅᖏᓐᓂᒃ, ᐊᑕᓂᖅ ᐅᖃᕐᐳᖅ, ᑕᕝᕙᓂ ᓄᓇᒥ ᐊᑭᓖᑎᑦᓱᒫᕐᐸᒋᑦ.’ ᐊᑏ ᑎᒍᓗᒍ ᑎᒥᖓ ᑕᒪᐅᖓ ᐃᒋᓚᐅᕐᓕ ᐊᑕᓂᐅᑉ ᐅᖃᐅᓯᕆᓚᐅᕐᑕᖏᑦ ᒪᓕᒡᓗᒋᑦ.”
ᔫᑕᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᕼᐊᔧᐊᐅᑉ ᑐᖁᑕᐅᓂᖓ
27ᐊᕼᐊᔧᐊ ᔫᑕᒥᐅᑦ ᐊᖓᔪᖅᑳᕐᔪᐊᖓᑦ ᑕᑯᒐᒥ ᔪᕌᒥᐅᑉ ᖃᓄᐃᓕᐅᕐᑕᐅᓂᖓᓂᒃ ᕿᒪᒃᓯᕗᖅ ᐊᖅᑯᑎᒃᑯᑦ ᐱᐊᔅ ᕼᐃᒐᓐ-ᒧᐊᕐᑐᒃᑯᑦ. ᔨᕼᐆᑉ ᒪᓕᒃᐹ, ᕾᒐᓛᕐᓗᓂᓗ, “ᑐᖁᑕᐅᓕ ᕿᒧᒃᓯᐅᑎᒥᓂ ᐊᒃᓴᓗᐊᓕᖕᒥ ᐃᑭᒪᑎᓪᓗᒍ!” ᐃᑭᓕᕐᑕᐅᕗᖅ ᒎᕐᒧᑦ ᑎᑭᐅᑎᓕᕋᓗᐊᕐᑎᓪᓗᒍ ᐃᑉᓖᒻ ᖃᓂᒋᔭᖓᓂ, ᐱᔭᐅᓐᖏᓚᕐᓕ ᓄᓇᒧᑦ ᒥᒌᑐᒧᐊᕐᓗᓂ, ᑕᕝᕙᓂ ᑐᖁᕗᖅ. 28ᑭᒡᒐᖏᓐᓄᑦ ᑎᒥᖓ ᐱᔭᐅᓪᓗᓂ ᕿᒧᒃᓯᐅᑎᒃᑯᑦ ᐊᒃᓴᓗᐊᓕᒃᑯᑦ ᔨᕉᓴᓕᓕᐊᕈᑦᔭᐅᕗᖅ. ᑍᑲᓂᓗ ᐃᓗᕕᕐᑕᐅᕗᖅ ᓯᕗᓕᕕᓂᖏᑕ ᐃᓗᕕᖃᕐᕕᖓᓂ ᑍᕕᑎᐅᑉ ᐃᒡᓗᒐᓴᖏᓐᓂ. 29ᔪᕌᒻ ᐂᕼᐊᑉ ᐃᕐᓂᖓ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᕐᕌᒍᓂᒃ 11ᓂ, ᐊᕼᐊᔧᐊ ᐊᖓᔪᖅᑳᕐᔪᐊᓐᖑᕐᑎᑕᐅᓚᐅᕐᐳᖅ ᔫᑕᒥᐅᓄᑦ. 30ᔨᕼᐆᓕ ᔨᔭᕆᐅᓪᒧᐊᕋᒥ ᔨᔨᐱᐊᓕᒧᐊᕐᐳᖅ, ᔨᔨᐱᐊᓕ ᑐᓴᕐᑎᑕᐅᒐᒥ ᑎᑭᑦᑐᒥᒃ, ᐃᔩᖕᓂ ᐱᐅᓴᓚᐅᕐᐹᒃ ᓄᔭᓂᓗ ᐋᖅᑭᒃᓱᕆᐊᕇᕋᒥᒋᑦ ᐃᒐᓛᒃᑯᑦ ᐃᑦᓱᐊᕐᐳᖅ. 31ᔨᕼᐆ ᐃᑎᕐᑕᕐᕕᒃᑯᑦ ᐃᑎᓕᕐᑎᓪᓗᒍ ᐊᐱᕆᕚ, “ᔨᒻᕇ ᐅᓇᑕᕆᐊᕐᑐᓐᖏᓚᑏᑦ? ᑐᖁᑦᓯᔨᐅᕗᑎᑦ ᐊᖓᔪᖅᑳᕐᓂᒃ.” 32ᔩᕼᐆ ᖁᒻᒧᑦ ᐃᒐᓛᒧᑦ ᑕᑯᓴᕐᓗᓂᓗ ᐊᐱᕆᕗᖅ, “ᑭᓇᒃᑯᑦ ᐅᕙᓐᓂᒃ ᑕᐱᖃᕐᐹᑦ?” ᑕᕝᕙ ᒪᕐᕈᑐᐃᓐᓇᐅᖏᑦᑑᒃ ᐊᖓᔪᖅᑳᕐᔪᐊᑉ ᐃᓄᖁᑎᖏᑦ ᐃᒐᓛᑯᑦ ᐃᑦᑐᐊᕐᐳᑦ. 33ᔨᕼᐆᑉ ᕾᒐᓛᕐᕕᒋᕔᑦ, “ᐃᒐᓛᒃᑯᑦ ᐃᒋᓪᓗᒍ ᑲᑕᒃᑎᓚᐅᕐᓯᐅᒃ!” ᑕᕝᕙ ᔨᓴᐱᐅᓪ ᐱᖑᕚᑦ, ᒪᓂᖅᑲᒧᑦ ᑐᓐᓇᒥ ᐊᐅᖓᑕ ᓯᕐᐹᕿᓂᑯᖓᓄᑦ ᐃᒡᓘᑉ ᐊᑭᓐᓇᖓ ᐊᐅᒥᑦᑕᕐᐳᖅ ᕿᒥᕐᔪᐊᓄᓪᓗ ᑐᓪᓕᕋᕐᑕᐅᑦᓴᐅᑎᒋᓪᓗᓂ. 34ᔨᕼᐆ ᐃᑎᕐᓗᓂ ᓂᕆᓕᕐᐳᖅ, ᐅᖃᕐᓗᓂᓗ, “ᒫᓐᓇ ᑍᓐᓇ ᐊᕐᓇᕈᓗᒃ ᐃᓱᒪᓂᕐᓗᒃᑕᐅᓯᒪᔪᖅ ᑲᒪᒋᒋᐊᕐᓯᐅᒃ ᐃᓗᕕᕐᓂᐊᕐᐸᓯ, ᐊᖓᔪᖅᑳᕐᔪᐊᕐᒧᑦ ᐸᓂᒋᔭᐅᖕᒪᑦ.” 35ᐃᓗᕕᕐᓯᔭᕐᑐᕐᑐᑦ ᐊᓂᒐᒥᒃ ᑎᒥᖓᓂᒃ ᑕᑯᓚᐅᓐᖏᓚᑦ, ᓂᐊᖁᕕᓂᖓ ᐊᒡᒐᕕᓂᖏᓪᓗ ᐃᑎᒐᕕᓂᖏᓪᓗ ᑖᒃᑯᑐᐊᑦ ᐊᒥᐊᒃᑰᔪᑦ ᑕᑯᕔᑦ. 36#ᐊᑕᓃᑦ ᓯᕗᓪᓖᑦ 21:23.ᐃᒡᓗᒧᑦ ᐃᑎᕇᕋᒥᒃ ᔨᕼᐆ ᑕᒪᑐᒥᖓ ᐅᖃᐅᑎᕚᑦ, ᔨᕼᐆ ᐅᖃᕐᐳᖅ, “ᑕᒪᑦᔭ ᐊᑕᓂᐅᑉ ᐅᖃᐅᓯᕆᓚᐅᕐᑕᖓ ᐅᖃᕐᑎᒥᒍᑦ ᐃᓔᑦᔭᒃᑯᑦ ᑎᓯᐰᑎᒥᐅᑕᒃᑯᑦ, ‘ᔨᔭᕆᐅᓪᒥ ᕿᒻᒥᓄᑦ ᔨᔨᐱᐊᓕᐅᑉ ᑎᒥᖓ ᓂᕆᔭᐅᔪᒫᕐᐳᖅ; 37ᔨᓴᐱᐅᓕᐅᑉ ᑎᒥᖓ ᒪᓂᖅᑲᒥ ᑕᒫᓃᕐᕆᔪᒫᕐᐳᖅ ᔨᔭᕆᐅᓪᒥ, ᓇᓪᓕᐊᑦ ᐅᖃᕈᓐᓇᕈᒫᓐᖏᓚᖅ ᐅᓇ ᑕᕝᕙ ᔨᔨᐱᐊᓕᐅᑉ ᑎᒥᖓ.’”
Currently Selected:
ᐊᑕᓃᑦ ᐂᑉᐸᖏᑦ 9: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
