ᐊᑕᓃᑦ ᐂᑉᐸᖏᑦ 8
8
ᐊᕐᓇᐅᑉ ᓲᓇᒤᑎᒥᐅᑕᐅᑉ ᓄᓇᒥᓄᑦ ᐅᑎᕐᓂᖓ
1 #
ᐊᑕᓃᑦ ᐂᑉᐸᖏᑦ 4:8-37. ᐃᓔᓴ ᐅᖃᐅᑦᔨᓚᐅᕐᐳᖅ, ᐊᕐᓇᒥᒃ ᐃᕐᓂᖓᓂᒃ ᐆᒻᒪᕐᑎᑦᓯᕕᒋᓚᐅᕐᑕᒥᓂᒃ, “ᐃᓚᑎᑦ ᐃᓚᒋᓗᒋᑦ ᐊᐅᓪᓚᓕᕆᑦᓯ ᑕᐅᕙᓃᑬᓐᓇᕐᓗᓯᓗ ᓄᓇᒋᔪᓐᓇᕐᑕᑦᓯᓐᓂ, ᐊᑕᓂᖅ ᑳᖕᓇᕐᑐᕐᔪᐊᖃᕐᑎᑦᓯᓂᐊᕐᓂᕋᕐᓗᓂ ᐅᖃᕐᓯᒪᖕᒪᑦ ᐊᕐᕌᒍᓂᒃ 7ᓂᒃ ᓄᓇᒥ ᑕᒫᓂ.” 2ᐊᕐᓇᕐᓗ ᓈᓚᒡᓗᓂ ᒎᑎᐅᑉ ᐃᓄᖁᑎᖓᑕ ᐅᖃᐅᓯᖏᓐᓂᒃ ᐊᐅᓪᓛᓯᕗᖅ, ᐃᓚᓕᒫᓂ ᐱᖃᑎᒋᓪᓗᒋᑦ ᓄᓇᑖᕆᐊᕐᑐᕐᐳᖅ ᐱᓕᔅᑍᓂᒥᐅᑦ ᓄᓇᖓᓂ ᐊᕐᕌᒍᓂᒃ 7ᓂᒃ ᓇᔪᕐᓂᐊᓕᕐᓗᒍ. 3ᐊᕐᕌᒍᐃᑦ 7 ᓈᖕᒪᑕ ᓄᓇᒥᓄᑦ ᐅᑎᓕᓚᐅᕆᕗᖅ ᐱᓕᔅᑍᓂᒥᐅᑦ ᓄᓇᖓᓐᓂᑦ ᐱᓪᓗᓂ ᐊᖓᔪᖅᑳᕐᔪᐊᕐᒧᓪᓗ ᐂᕗᖅ ᓄᓇᖁᑎᒋᓚᐅᕐᑕᒥᓂᒃ ᐃᒡᓗᒥᓂᒡᓗ ᐅᑎᕐᑎᑦᓯᕕᐅᔪᒪᓪᓗᓂ. 4ᐊᖓᔪᖅᑳᕐᔪᐊᖅ ᐅᖃᖃᑎᖃᓚᐅᕐᐳᖅ ᒋᕼᐊᔨᒥᒃ ᒎᑎᐅᑉ ᐃᓄᖁᑎᖓᑕ ᐱᔨᖓᓂᒃ ᐊᐱᕐᓱᕐᐹᓗ, “ᐅᖃᐅᑎᓚᐅᓐᖓ ᐃᓔᓴᐅᑉ ᑲᒪᓇᕐᑐᓂᒃ ᐱᓇᓱᐊᖃᑦᑕᕐᓯᒪᔭᓕᒫᖏᓐᓂᒃ.” 5ᒋᕼᐊᔨᐅᑉ ᐊᖓᔪᖅᑳᕐᔪᐊᖅ ᐅᓂᒃᑲᐅᑎᕚ, ᐃᓔᓴᐅᑉ ᑐᖁᖓᔪᓂᒃ ᐅᒻᒫᕐᑎᑦᓯᖃᑦᑕᕐᓯᒪᓂᖓᓂᒃ ᑖᑦᓱᒪᓗ ᐊᕐᓇᐅᑉ ᓄᓇᖁᑎᒥᓂᒃ ᐃᒡᓗᒥᓂᒡᓗ ᐅᑎᕐᑎᑦᓯᕕᐅᔪᒪᓪᓗᓂ ᐊᖓᔪᖅᑳᕐᔪᐊᕐᒧᐊᕐᑑᑉ ᐃᕐᓂᖓᓂᒃ ᐆᒻᒪᕐᑎᑦᓯᓚᐅᕐᓯᒪᓂᖓᓂᒃ. ᒋᕼᐊᔨᐅᑉ ᐅᖃᐅᑎᕚ, “ᑖᓐᓇ ᑕᕝᕙ ᐊᕐᓇᖅ ᐊᑕᓃᖅ ᐊᖓᔪᖅᑳᕐᔪᐊᖅ, ᐅᓇ ᑕᕝᕙ ᐃᕐᓂᖓ ᐃᓔᓴᐅᑉ ᐆᒻᒪᕐᑎᓚᐅᕐᓯᒪᔭᖓ.” 6ᐊᖓᔪᖅᑳᕐᔪᐊᓪᓗ ᐊᕐᓇᖅ ᑕᒪᑐᒥᖓ ᐊᐱᕐᓱᒃᑲᓐᓂᕐᐹ, ᐊᕐᓇᐅᓪᓗᑦᑕᐅᖅ ᐅᓂᒃᑲᐅᑎᑦᓯᐊᕐᐹ ᑕᒪᑐᒥᖓ. ᑕᕝᕙ ᐊᖓᔪᖅᑳᕐᔪᐊᖅ ᐊᖓᔪᖅᑳᖁᑎᒥᓂᒃ ᑎᓕᓯᕗᖅ ᐊᕐᓇᐅᑉ ᐱᔪᒪᔭᖏᓐᓂᒃ ᑲᒪᓂᐊᕐᑐᒥᒃ, ᐅᖃᕐᓗᓂᓗ, “ᐊᕐᓇᐅᑉ ᐱᒋᓚᐅᕐᑕᓕᒫᖏᑦ ᐅᑎᕐᑎᑕᐅᓕᑦ ᑮᓇᐅᔭᓕᐊᕆᓚᐅᕐᑕᖏᓪᓗ ᓄᓇᖁᑎᒥᓄᑦ ᐅᓪᓗᒥᑦ ᑍᑦᓱᒪᓐᖓᑦ ᐊᐅᓪᓚᕐᕕᒋᓚᐅᕐᑕᖓᓂᑦ ᐱᒋᐊᕐᓗᒋᑦ ᐅᓪᓗᒥᒧᑦ ᑎᑭᑦᑐᓂᒃ ᑐᓂᔭᐅᓗᓂ.”
ᐃᓔᓴᓗ ᐊᖓᔪᖅᑳᕐᔪᐊᕐᓗ ᐱᓐᕼᐊᑖᑦ ᓯᕆᐊᒥᐅᖅ
7ᐃᓔᓴ ᑕᒫᓯᑰᓯᒧᑦ ᐂᕗᖅ ᐊᖓᔪᖅᑳᕐᔪᐊᖅ ᐱᓐᕼᐊᑖᑦ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᑲᓂᒪᑎᓪᓗᒍ, ᐊᖓᔪᖅᑳᕐᔪᐊᖅ ᑐᓴᕐᑎᑕᐅᕗᖅ ᐃᓔᓴᐅᑉ ᓄᓇᒥᖕᓃᓐᓂᖓᓂᒃ, 8ᐃᑲᔪᕐᑎᒥ ᐃᓚᖓᑦ ᕼᐊᔧᐅᓪ ᐅᖃᐅᑎᕚ, “ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ ᑐᓂᕐᕈᑎᒃᓴᒡᒋᕐᓗᑎᑦ ᐂᓚᐅᕆᑦ ᖃᐅᔨᓇᓱᐊᕐᕕᒋᓂᐊᕋᕕᐅᒃ ᐋᖅᑭᓛᕐᒪᖔᕐᒪ ᐋᖅᑭᓛᖏᒻᒪᖔᕐᒪᓘᓐᓃᑦ.” 9ᑕᕝᕙ ᕼᐊᔧᐅᓪ ᑳᒥᓕᖕᓂᒃ 40ᓂᒃ ᓇᖕᒥᕐᓱᐃᓚᐅᕐᐳᖅ ᐱᒃᑯᒥᓇᕐᓂᕐᐹᓂᒃ ᑕᒫᓯᑰᓯᒥᐅᓂᑦ ᐱᓯᒪᔪᓂᒃ ᐃᓔᓴᒧᐊᕐᓗᓂᓗ. ᕼᐊᓯᐊᓕᐅᑉ ᐃᓔᓴ ᑲᑎᒐᒥᐅᒃ, ᐅᖃᐅᑎᕚ, “ᐃᓄᖁᑏᑦ ᓯᕆᐊᒧᑦ ᐊᖓᔪᖅᑳᕐᔪᐊᖅ ᐱᓐᕼᐊᑖᑎᐅᑉ ᑎᓕᕚᖓ ᐊᐱᕆᖁᓪᓗᓂᖓ ᖃᓂᒻᒪᓯᕐᒥᓂᑦ ᐋᖅᑭᖕᓂᐊᕐᒪᖔᕐᒥ ᐋᖅᑭᑦᔮᔪᓐᓃᕐᒪᖔᕐᒥᓗ ᑐᑭᓯᔪᒪᓪᓗᓂ.” 10ᐃᓔᓴᐅᑉ ᑭᐅᕚ, “ᐂᓕᕆᑦ, ᐅᖃᐅᑎᓗᒍᓗ ᐋᖅᑭᖕᓂᐊᕐᐳᑎᑦ; ᐊᑕᓂᐅᓪᓕ ᑕᑯᑎᓚᐅᕐᐹᖓ ᐃᓅᑦᔮᖏᓐᓂᖓᓂᒃ.” 11ᐃᓔᓴᐅᑉ ᕼᐊᓯᐊᓪ ᑕᑯᓐᓇᑐᐃᓐᓇᓕᕐᒪᒍ ᑮᓇᕐᓕᕐᓯᒪᔪᕐᔪᐊᖑᓪᓗᓂ ᕼᐊᓯᐊᓪ ᑲᓐᖑᓱᓕᕐᐳᖅ, ᑕᕝᕙ ᒎᑎᐅᑉ ᐃᓄᖁᑎᖓ ᓮᒪᔪᓐᓇᕈᓐᓃᕋᒥ ᖁᕝᕕᐅᓕᕐᐳᖅ. 12ᕼᐊᔧᐅᓪᓗ ᐊᐱᕆᓕᕐᐹ, “ᓱᖕᒪᑦ ᐊᑕᓂᕋ ᖁᕝᕕᐅᕐᐹ?” ᐃᓔᓴᐅᑉ ᑭᐅᕚ, “ᖃᐅᔨᒪᒐᒪ ᐃᓴᕆᐊᓕᒥᐅᓂᒃ ᐱᑦᓯᐊᖏᑦᓱᒫᕋᕕᑦ, ᐃᑯᐊᓪᓔᔪᒫᕐᐳᑎᑦ ᐃᒡᓗᒐᓴᖁᑎᖏᓐᓂᒃ ᐱᔭᐅᑦᔧᕐᓯᒪᔪᓂᒃ, ᐅᕕᒐᕐᑐᖁᑎᖏᓪᓗ ᑐᖁᕋᕈᒫᕐᐸᑎᑦ ᓴᕕᒡᔪᐊᕐᒧᑦ, ᓄᑕᕋᖏᓪᓗ ᐃᖅᑲᑦᑖᕆᓗᒋᑦ ᑐᖁᑦᓱᒫᕐᐸᑎᑦ, ᐊᕐᓇᖏᓪᓗ ᓄᑕᕋᒃᓴᓖᑦ ᓈᖏᑦ ᓰᒡᓗᒋᑦ ᐊᕐᒪᕐᑎᕈᒫᕐᐸᑎᑦ.” 13#ᐊᑕᓃᑦ ᓯᕗᓪᓖᑦ 19:15.ᕼᐊᔧᐅᓪᓗ ᐅᖃᐅᑎᕚ, “ᖃᓄᕐᓕ ᑭᒡᒐᕆᔧᑦ, ᕿᒻᒥᐅᖏᓪᓗᓂ ᑍᒫᓗᐊᕌᓗᒃ ᐱᔪᓐᓇᕈᒫᕐᐹ?” ᐃᓔᓴᐅᑉ ᑭᐅᕚ, “ᐊᑕᓂᐅᑉ ᑕᑯᑎᑦᓴᕇᓚᐅᕐᒪᖓ, ᓯᕆᐊᒥᐅᓄᑦ ᐊᖓᔪᖅᑳᕐᔪᐊᓐᖑᕈᒫᕐᓂᕐᓂᒃ.” 14ᑕᕝᕙ ᕼᐊᓯᐊᓕ ᐃᓔᓴ ᕿᒪᒡᓗᒍ ᐊᖓᔪᖅᑳᒥᓄᑦ ᐅᑎᕐᐳᖅ ᐱᓐ-ᕼᐊᑖᑦ ᐊᐱᕆᖕᒪᒍ, “ᖃᓄᖅ ᐃᓔᓴᒧᑦ ᐅᖃᐅᑎᔭᐅᕕᑦ?” ᕼᐊᓯᐊᓪ ᑭᐅᕗᖅ, “ᖃᓄᐃᑦᑐᓐᓃᕐᓂᐊᕐᑐᑎᒡᒎᖅ.” 15ᖃᐅᑎᓪᓗᒍᓕ ᕼᐊᔧᐅᓪ ᖃᓪᓗᓈᕐᑕᒥᒃ ᖃᐅᓯᓕᕐᑎᑦᓯᓚᐅᕐᓗᓂ ᐊᖓᔪᖅᑳᕐᔪᐊᑉ ᑮᓇᖓ ᑖᑦᓱᒧᖓ ᒪᑐᓪᓗᒍ ᐃᐱᑎᒻᒪᒍ ᑐᖁᕗᖅ. ᕼᐊᓯᐊᓕᐅᓪᓗ ᐃᓇᖏᕐᓗᒍ ᐊᖓᔪᖅᑳᕐᔪᐊᓐᖑᕐᐳᖅ.
ᐊᖓᔪᖅᑳᕐᔪᐊᖅ ᔨᕼᐅᕌᒻ ᔫᑕᒥᐅᖅ
16ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᔪᕌᒥᐅᑉ ᐂᕼᐊᑉ ᐃᕐᓂᖓᑕ ᐊᐅᓚᑦᓯᓂᖓᑦᑕ ᐊᕐᕌᒍᑦ ᑕᓪᓕᒪᖓᓐᓂ ᔨᕼᐆᓴᐸᑦ ᐊᖓᔪᖅᑳᕐᔪᐊᕆᔭᐅᑎᓪᓗᒍ ᔫᑕᒥᐅᓄᑦ. ᔨᕼᐅᕌᒥ ᔨᕼᐆᓴᐸᐅᑉ ᐃᕐᓂᖓ ᐊᐅᓚᑦᓯᓕᕐᐳᖅ ᔫᑕᒥ. 17ᔨᕼᐅᕌᒻ ᐊᕐᕌᒍᖃᕐᓗᓂ 32ᓂᒃ ᐊᖓᔪᖅᑳᕐᔪᐊᓐᖑᕐᐳᖅ, ᔨᕉᓴᓕᒥᓗ ᐊᐅᓚᑦᓯᓚᐅᑦᐳᖅ ᐊᕐᕌᒍᓂᒃ 8ᓂᒃ. 18ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᕆᖃᑦᑕᕐᓯᒪᔭᖏᑕ ᐃᓕᖅᑯᓯᖏᓐᓂᒃ ᒪᓕᑐᐃᓐᓇᓚᐅᕐᐳᖅ ᐊᖓᔪᖅᑳᕐᔪᐊᑉ ᐂᕼᐊᐱᐅᑉ ᐱᐅᓯᕆᕙᓚᐅᕐᑕᖏᓐᓂᒃ, ᓄᓕᐊᓂᓚᐅᕐᒪ ᐂᕼᐊᐱᐅᑉ ᐸᓂᖓᓂᒃ. ᐱᓇᓱᐊᕐᓂᖃᕐᓗᓂᓗ ᐊᑕᓂᐅᑉ ᓵᖓᓂ ᓈᒻᒪᒋᓐᖏᑕᖏᓐᓂᒃ. 19#ᐊᑕᓃᑦ ᓯᕗᓪᓖᑦ 11:36.ᑍᒤᒃᑲᓗᐊᕐᑎᓪᓗᒍ ᐊᑕᓂᐅᑉ ᔫᑕᒥᐅᑦ ᐊᓯᕈᕈᒪᓚᐅᓐᖏᓔᑦ, ᑍᕕᑎ ᐱᔨᓂ ᐱᓪᓗᒍ, ᐊᖏᕐᓯᒪᓚᐅᕋᒥ ᑍᕕᑎ ᖃᐅᒻᒪᖁᑎᐅᖁᓪᓗᒍ ᑭᖑᕚᖏᓐᓄᑦ ᑎᑭᑦᑐᒥᒃ ᐃᓱᖃᖏᑦᑐᒧᑦ. 20#ᒨᓯᓯ ᓯᕗᓪᓖᑦ 27:40.ᔨᕼᐅᕌᒻ ᐊᖓᔪᖅᑳᕐᔪᐊᖑᑎᓪᓗᒍ, ᐄᑐᒥᒥᐅᑦ ᐊᑭᕋᕐᑐᓕᕐᐳᑦ ᔫᑕᐅᑉ ᐊᖓᔪᖅᑲᐅᕕᖓᓂᒃ, ᐃᒻᒥᖕᓂᒡᓗ ᐊᖓᔪᖅᑳᕐᔪᐊᕐᑖᕐᐳᑦ. 21ᑕᕝᕙ ᔨᕼᐅᕌᒥ ᔨᐊᒧᑦ ᐅᐸᒃᑐᓕᓚᐅᕐᐳᖅ ᐅᓐᓄᐊᒃᑯᑦ ᑎᕐᓕᐊᕈᑎᓪᓗᑎᒃ ᕿᒧᒃᓯᐅᑎᓕᒫᓂ ᐊᒃᓴᓗᐊᓖᑦ ᐊᑐᕐᓗᓂᒋᑦ, ᐄᑐᒥᒥᐅᓪᓗ ᐅᓇᑕᕐᑐᒃᓴᖁᑎᖏᓐᓄᑦ ᐊᕙᓗᔭᐅᕗᑦ, ᐄᑐᒥᒥᐅᓂᒃ ᐊᕙᓗᓯᓯᒪᔪᓂᒃ ᐅᓇᑕᕆᐊᕐᐳᑦ ᐊᓂᒎᑎᒐᓗᐊᕐᑎᓪᓗᒋᑦ, ᐅᓇᑕᕐᑎᖁᑎᖏᑦ ᕿᒧᒃᓯᐅᑎᓖᓪᓗ ᐊᒃᓴᓗᐊᓕᖕᓂᒃ ᓄᓇᒥᖕᓄᑦ ᕿᒫᑐᐃᓐᓇᕐᐳᑦ. 22ᑍᒤᒻᒪᑦ ᐅᓪᓗᒥᒧᑦ ᑎᑭᓪᓗᒍ ᐄᑐᒥᐅᑦ ᔫᑕᒥᐅᓄᑦ ᐊᑭᕋᕆᓕᐅᑎᓯᒪᕗᑦ, ᓕᑉᓇᒥᐅᓪᓗᑕᐅᖅ ᐊᑭᕋᕆᓕᐅᑎᓚᐅᕆᕗᑦ ᑍᑦᓱᒪᓂᑦᓮᓐᓇᖅ. 23ᔨᕼᐅᕌᒥᐅᑦ ᐱᓂᐊᕐᓂᕆᓯᒪᔭᖏᑦ ᑎᑎᕋᕐᑕᐅᓯᒪᕗᑦ ᔫᑕᒥᐅᑦ ᐊᖓᔪᖅᑳᕐᔪᐊᕆᕙᒃᑕᕕᓂᖏᑕ ᑎᑎᕋᖁᑎᖏᓐᓂ. 24ᔨᕼᐅᕌᒥ ᑐᖁᖕᒪᑦ ᐃᓗᕕᕐᑕᐅᕗᖅ ᓯᕗᓕᕕᓂᖏᑦᑕ ᐊᖓᔪᖅᑳᕐᔪᐊᑦ ᐃᓗᕕᕐᑕᐅᓯᒪᕕᖏᓐᓂ ᑍᕕᑎᐅᑉ ᐃᒡᓗᒐᓴᖏᓐᓂ. ᐃᕐᓂᖓᓗ ᐊᕼᐊᔧᐊ ᐊᖓᔪᖅᑳᕐᔪᐊᖑᓂᖓᓄᑦ ᐃᓇᖏᐅᑎᕗᖅ.
ᐊᖓᔪᖅᑳᕐᔪᐊᑉ ᐊᕼᐊᔧᐊᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒥᐅᓄᑦ
25ᔪᕌᒥᐅᑉ ᐂᕼᐊᐱᐅᑉ ᐃᕐᓂᖓᑕ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᑦ 12ᖓᓐᓂ, ᐊᕼᐊᔧᐊ ᔨᕼᐅᕌᒥᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᐳᖅ ᔫᑕᒥ. 26ᐊᕼᐊᔧᐊ 22ᓂᒃ ᐊᕐᕌᒍᖃᕐᓗᓂ ᐊᖓᔪᖅᑳᕐᔪᐊᓐᖑᕐᐳᖅ. ᐊᖓᔪᖅᑳᕐᔪᐊᖑᕗᕐᓗ ᔨᕉᓴᓕᒥ ᐊᕐᕌᒍᒥᒃ ᐊᑕᐅᓯᕐᒥᒃ. ᐊᓈᓇᖓ ᐊᑎᖃᕐᐳᖅ ᐊᑕᓔᐊᒥᒃ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᒻᕆᐅᑉ ᐃᕐᖑᑕᖓᓂᒃ. 27ᐂᕼᐊᐱᐅᓪᓗ ᐃᓚᒌᑦ ᐃᓕᖅᑯᓯᖓᓐᓂᒃ ᐊᑐᑐᐃᓐᓇᕐᐳᖅ ᐊᑕᓂᐅᑉ ᓈᒻᒪᒋᓐᖏᑕᖏᓐᓂᒃ ᐃᓕᖅᑯᓯᖃᕐᓗᓂ ᑍᒫᒃᑕᐅᖅ ᐂᕼᐊᑉ ᐃᓚᖏᑕᓗ ᐱᐅᓯᕆᓯᒪᔭᖏᑎᑐᑦ, ᓄᓕᐊᒥᓄᑦ ᐂᕼᐊᑉᑯᓐᓄᑦ ᓂᖓᐅᒋᔭᐅᓚᐅᕋᒥ. 28ᐊᖓᔪᖅᑳᕐᔪᐊᖅ ᐊᕼᐊᔧᐊ ᐊᖓᔪᖅᑳᕐᔪᐊᕐᒥᒃ ᔪᕌᒻᒥᒃ ᐂᕼᐊᐱᐅᑉ ᐃᕐᓂᖓᓂᒃ ᑕᐱᖃᕐᓗᓂ ᐅᓇᑕᕆᐊᖃᑎᖃᕐᐳᖅ, ᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᕼᐊᔧᐅᓪᒥᒃ ᕌᒪᑦ-ᒋᓖᑎᒃᑯᑦ ᓄᓇᖓᓄᑦ. ᓯᕆᐊᒥᐅᓪᓗ ᔪᕌᒻ ᐃᑭᓕᕐᐹᑦ. 29ᐊᖓᔪᖅᑳᕐᔪᐊᖅ ᔪᕌᒥ ᓄᓇᒥᓄᑦ ᔨᔭᕆᐅᓪᒧᑦ#8:29 ᔨᕉᓴᓕᒧᑦ ᐅᑎᕐᐳᖅ ᐋᖅᑭᒃᓯᕆᐊᕐᑐᕐᓗᓂ ᐃᑭᓕᕐᑕᐅᓯᒪᓂᕐᒥᓂᑦ ᓯᕆᐊᒥᐅᑦ ᐅᓇᑕᕐᑎᖏᓐᓄᑦ, ᐃᑭᓕᕐᑕᐅᓂᕕᓂᕐᒥᓂᒃ ᐅᓇᑕᕐᓗᑎᒃ ᕌᒪᒥ.
ᑕᕝᕙ ᕼᐊᔧᐆᑉ ᔨᕼᐅᕌᒥᐅᑉ ᐃᕐᓂᖓᑕ ᔫᑕᒥᐅᑦ ᐊᖓᔪᖅᑳᕐᔪᐊᖓᑦᑕ ᑕᑯᔭᕐᑐᕐᐹ ᔨᕉᓴᓕᒧᑦ, ᐃᑭᓕᕐᑕᐅᓯᒪᓂᖓ ᐱᑦᔪᑎᒋᓪᓗᒍ, ᖃᓂᒪᓚᐅᕐᒪᑦ.
Currently Selected:
ᐊᑕᓃᑦ ᐂᑉᐸᖏᑦ 8: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
