ᐊᑕᓃᑦ ᐂᑉᐸᖏᑦ 10
10
ᐂᕼᐊᐱᐅᑉ ᑭᖑᕚᖏᑕ ᑐᖁᕋᕐᑕᐅᓂᖏᑦ
1ᓴᒥᐊᕆᐊᒥ ᐂᕼᐊᑉ ᑭᖑᕚᖃᓚᐅᕐᐳᖅ 70ᓂᒃ ᔨᕼᐆ ᑎᑎᕋᕐᐳᖅ ᔨᔭᕆᐅᓪᓕᐅᑉ ᐊᖓᔪᖅᑳᖏᓐᓄᑦ ᓯᕗᓪᓕᕐᑎᒋᔭᐅᔪᓄᓪᓗ ᐂᕼᐊᐱᐅᓪᓗ ᕿᑐᕐᖓᖏᑕ ᑲᒪᔨᖏᓐᓄᑦ ᑎᑎᕋᕐᑕᓂᓗ ᐊᐅᓪᓚᕐᑎᓪᓗᓂᒋᑦ ᓴᒥᐊᕆᐊᒧᑦ. ᑎᑎᕋᕐᑕᖏᑦ ᐃᒫᒃ ᐅᖃᐅᓯᖃᕐᐳᑦ, 2“ᑎᑎᖅᑲᑦ ᑖᒃᑯᐊ ᐃᓕᑦᓯᓐᓄᑦ ᑎᑭᑐᐊᕐᐸᑕ ᐊᖓᔪᖅᑳᑦᓯ ᐃᕐᓂᖏᓐᓂᒃ ᐱᓯᒪᒐᑦᓯ, ᕿᒧᒃᓯᐅᑎᖃᕋᑦᓯ ᕿᒻᒥᕐᔪᐊᖃᕐᓗᓯᓗ, ᐃᒡᓗᒐᓴᒡᔪᐊᖁᑎᓯᓗ ᐱᔭᐅᑦᔧᕐᓯᒪᖕᒪᑕ ᐅᓇᑕᐅᑎᖃᑦᓯᐊᕐᓗᓯᓗ. 3ᐊᖓᔪᖅᑳᑦᓯ ᐃᕐᓂᖏᑕ ᐃᓚᖓᓐᓂᒃ ᐱᔪᓐᓇᑦᓯᐊᕐᑐᒥᒃ ᐊᖓᔪᖅᑳᑦᓯᓐᓄᑦ ᐱᔪᒥᓇᕆᔭᐅᒐᔭᕐᑐᒥᒃ ᓂᕈᐊᕐᓗᓯ ᐊᑖᑕᖓᑦᑕ ᐃᒃᓯᕙᐅᑕᕐᔪᐊᖓᓂᒃ ᐃᓂᑖᕐᑎᓕᕐᓯᐅᒃ ᐊᖓᔪᖅᑳᕆᓕᕐᑕᑦᓯ ᐃᒡᓗᖓ ᓴᐳᑎᓯᒪᓇᓱᐊᕐᓯᐅᒃ.” 4ᑖᒃᑯᐊᓕ ᓯᕗᕌᓂᖃᓕᕐᐳᑦ ᐅᖃᕐᓗᑎᒡᓗ, “ᐊᖓᔪᖅᑳᕐᔪᐊᒃ ᒪᕐᕉᒃ ᓵᓚᖃᕈᓐᓇᓚᐅᖏᑉᐸᑎᑦ ᐅᕙᒍᓪᓕᑭᐊᕐᖎ ᐱᔪᓐᓇᕐᓂᐊᓐᖏᓚᒍᑦ?” 5ᑕᕝᕙ ᐊᖓᔪᖅᑳᕐᔪᐊᑉ ᐃᒡᓗᖓᓂ ᐊᖓᔪᖅᑳᑦ, ᐊᐅᓚᑦᓯᔩᓪᓗ ᓯᕗᓕᕐᑏᓪᓗ ᑲᒪᔨᐅᔪᓪᓗ ᑭᐅᑦᔪᑎᒥᖕᓂᒃ ᔨᕼᐆᒧᑦ ᐋᑕᐅᑎᑦᓯᕗᑦ, “ᐃᓕᖕᓄᑦ ᐱᔨᐅᒐᑦᑕ ᐊᑐᖁᔭᕐᓂᒃ ᐱᓇᓱᐊᕈᒪᕗᒍᑦ, ᐊᖓᔪᖅᑳᕐᔪᐊᓐᖑᕐᑎᑦᓯᔪᒪᓐᖏᓚᒍᓪᓕ, ᐃᕝᕕᑦ ᐊᑲᐅᓂᕐᐹᖑᓇᓱᒋᔭᕐᓂᒃ ᐱᓇᓱᐊᓕᕆᑦ.” 6ᑕᕝᕙ ᔨᕼᐆᑉ ᑎᑎᕋᕐᕕᒋᒃᑲᓐᓂᕐᐰᑦ ᐅᖃᐅᓯᖃᕐᑐᓂᒃ ᐃᒫᒃ: “ᐅᕙᓐᓂᒃ ᑕᐱᖃᕈᑦᓯ ᓈᓚᒍᒪᒍᑦᓯᓐᖓᓗ, ᐊᖓᔪᖅᑳᕆᓚᐅᕐᑕᑦᓯ ᐃᕐᓂᖏᑦ ᓂᐊᖁᐃᕐᑕᒃᓴᕆᕙᓯ ᔨᔭᕆᐅᓪᒧᑦ ᑲᑎᔭᕐᑐᕐᓂᐊᕐᐸᑦᓯᓐᖓ ᖃᐅᒃᐸᑦ ᑍᒤᓪᓗᐊᓕᕐᐸᑦ.”
ᐊᖓᔪᖅᑳᕐᔪᐊᑉ ᐃᕐᓂᖏᑦ 70 ᐃᒡᓗᒐᓮᑦ ᐊᖓᔪᖅᑳᖏᓐᓄᑦ ᓇᔪᕐᑎᒋᔭᐅᓪᓗᑎᒃ ᐱᕈᕐᓴᔭᐅᓚᐅᕐᒪᑕ. 7ᔨᕼᐆᑉ ᑎᑎᕋᖏᓐᓄᑦ ᑎᑭᑕᐅᒐᒥᒃ ᑖᒃᑯᐊ ᐊᖓᔪᖅᑳᕐᔪᐊᑉ ᐃᕐᓂᖏᑦ 70 ᐃᓘᓐᓇᑎᒃ ᑐᖁᑕᐅᑎᑉᐰᑦ ᓂᐊᖁᖏᓪᓗ ᐴᖅᑲᕐᓗᒋᑦ ᐃᕕᒐᕐᓄᑦ, ᔨᕼᐆᒧᑦ ᑐᔫᑎᒋᕔᑦ ᔨᔭᕆᐅᓪᒦᑦᑐᒧᑦ. 8ᔨᕼᐆᒧᑦ ᐅᖃᕆᐊᕐᑐᕐᑐᒧᑦ ᐅᐸᒃᑕᐅᓪᓗᓂ ᐅᖃᐅᑦᔭᐅᕗᖅ, “ᐊᖓᔪᖅᑳᕐᔪᐊᑉ ᐃᕐᓂᖏᑦᑕ ᓂᐊᖁᖏᑦ ᑎᑭᐅᑦᔭᐅᕗᑦ!” ᑕᕝᕙ ᔨᕼᐆ ᐅᖃᐅᑦᔨᕗᖅ, ᒪᕐᕈᐃᓕᓗᒋᑦ ᖃᓕᕇᒡᓗᑎᒃ ᑲᑎᑕᐅᓕᑦ ᐃᒡᓗᒐᓴᒡᔪᐊᑦ ᐃᑎᕐᑕᕐᕕᖓᓄᑦ ᑍᒤᓕᖓᔪᒃᓴᐅᕗᑦ ᖃᐅᒃᐸᒧᑦ ᐅᓪᓛᒧᑦ ᑎᑭᓪᓗᒍ. 9ᑍᒤᒻᒪᑦ ᐅᓪᓛᖑᓕᕐᑎᓪᓗᒍ, ᐊᓂᒐᒥ ᓇᖏᓕᕐᐳᖅ, ᐅᖃᕐᓗᓂᓗ ᐃᓄᓕᒫᓄᑦ, “ᐸᓯᔭᒃᓴᐅᓐᖏᓚᓯ. ᐅᕙᖎᓐᓇ ᐊᖓᔪᖅᑳᕋ ᐊᑭᕋᕐᑐᓚᐅᕋᒃᑯ ᑐᖁᑦᓱᒪᓪᓗᒍ; ᐅᑯᐊᓕ ᑭᓇᒃᑯᓐᓄᑦ ᑐᖁᑕᐅᓐᓂᕐᐹᑦ? 10ᖃᐅᔨᒪᓕᕆᑦᓯ, ᐊᑕᓂᐅᑉ ᐅᖃᐅᓯᕆᓯᒪᔭᓕᒫᖏᑦ ᐂᕼᐊᑉ ᐃᓚᓕᒫᖏᑦ ᐱᓪᓗᒋᑦ ᐊᑕᐅᓯᕐᒥᒡᓘᓐᓃᑦ ᓱᓕᖏᑦᑐᖃᕐᓂᐊᓐᖏᓚᑦ, ᐊᑕᓂᖅ ᐱᓇᓱᐊᕐᓯᒪᕗᖅ ᐅᖃᐅᓯᕆᓚᐅᕐᑕᓕᒫᓂ ᒪᓕᒡᓗᒋᑦ ᐱᔨᒥᒍᑦ ᐃᓔᑦᔭᒃᑯᑦ.” 11#ᕼᐆᓯᐊ 1:4.ᑍᒤᒻᒪᑦ ᔨᕼᐆ ᑐᖁᑕᐅᑎᑦᓯᓚᐅᕐᐳᖅ ᐂᕼᐊᑉ ᐃᓚᓕᒫᖏᓐᓂᒃ ᐊᒥᐊᒃᑯᑕᖃᕐᓇᒋᑦ ᔨᔭᕆᐅᓪᒥ, ᐊᖓᔪᖅᑳᖁᑎᕕᓂᖏᓪᓗ ᐃᓚᓐᓇᕆᔭᖏᓪᓗ ᑐᓂᕐᕈᓯᕐᑎᑦᓯᔨᖁᑎᖏᓪᓗ ᑕᒪᕐᒥᒃ ᐊᒥᐊᒃᑯᖃᕐᑎᓚᐅᓐᖏᓔᑦ. 12ᔨᕼᐆ ᐊᐅᓪᓚᓕᕆᕗᖅ ᓴᒥᐊᕆᐊᒧᐊᕐᓗᓂ. ᐱᑦ-ᐃᑭᑦᒧᑦ ᑎᑭᑉᐳᖅ ᓰᐱᓕᕆᕕᖕᒧᑦ, 13ᔨᕼᐆᓗ ᐊᕼᐊᔧᐊᐅᑉ ᐃᓚᒋᔭᖏᓐᓂᒃ ᑲᑎᑦᓯᕗᖅ ᔫᑕᒥᐅᓄᑦ ᐊᖓᔪᖅᑳᕐᔪᐊᖑᓚᐅᕐᑑᑉ, ᐊᐱᕆᕔᓪᓗ, “ᑭᓇᒃᑰᕕᓰ?” ᑖᒃᑯᐊ ᑭᐅᕚᑦ, “ᐊᕼᐊᔧᐊᒥᒃ ᐃᓚᖃᕐᐳᒍᑦ ᑕᒪᐅᓐᖓᕐᓯᒪᕗᒍᑦ ᑲᑎᓯᔪᒪᓪᓗᑕ ᐊᖓᔪᖅᑳᕐᔪᐊᑉ ᕿᑐᕐᖓᖏᓐᓂᒃ ᓄᓕᐊᕆᓚᐅᕐᑕᖓᑕᓗ ᐊᓈᓇᖓᓂᒃ.” 14ᔨᕼᐆᑉ ᑎᒍᔭᐅᖁᕔᑦ ᐆᒪᑎᓪᓗᒋᑦ, ᑕᕝᕙ ᑎᒍᔭᐅᕗᑦ ᑐᖁᕋᕐᑕᐅᓪᓗᑎᒡᓗ ᐃᑎᕐᓴᒥ ᐱᑦ-ᐃᑭᑦᒦᑦᑑᑉ ᖃᓂᒋᔭᖓᓂ. ᑲᑎᓪᓗᒋᑦ ᐊᖑᑏᑦ ᑐᖁᕋᕐᑕᐅᔪᑦ ᐅᓄᕐᓂᖃᕐᐳᑦ 42ᓂᒃ ᑖᒃᑯᐊᓗ ᐊᒥᐊᒃᑯᖃᕐᑎᓐᖏᓔᑦ. 15ᑕᕝᕙᓐᖓᑦ ᐱᓪᓗᓂ ᔨᕼᐅᓇᑕᑉᒥᒃ ᕆᑳᐱᐅᑉ ᐃᕐᓂᖓᓂᒃ ᑲᑎᓯᕗᖅ, ᐸᕆᐊᕐᓯᒪᔪᒥᒃ ᑖᑦᓱᒥᖓ, ᔨᕼᐆᑉ ᑲᑎᒐᒥᐅᒃ ᐊᐱᕆᕚ, “ᐅᕙᓐᓂᒃ ᑕᐱᖃᕐᐲᑦ, ᐅᕙᖓᑦᑕᐅᖅ ᐃᓕᖕᓂᒃ ᑕᐱᖃᕈᒪᒐᒪ?” ᔨᕼᐅᓇᑖᐅᑉ ᑭᐅᕚ, “ᐋ ᑕᐱᖃᕐᐳᖓ ᐃᓕᖕᓂᒃ.” ᔨᕼᐆ ᐅᖃᐅᑎᕚ, “ᑍᒤᓕᖓᒍᓐᓄᑦ ᐊᒡᒐᑎᑦ ᐃᓴᓚᐅᒃᑭᑦ.” ᐃᓴᖕᒪᒍ ᐊᒡᒐᖏᑎᒍᑦ ᑎᒍᓪᓗᒍ ᕿᒧᒃᓯᐅᑎᒥᓄᑦ ᐊᒃᓴᓗᐊᓕᖕᒧᑦ ᐃᑭᑎᑉᐹ. 16ᔨᕼᐆᑉ ᐅᖃᐅᑎᕚ, “ᒪᓕᒡᓗᖓ ᐊᑕᓂᕐᒧᑦ ᐱᓇᓱᐊᕐᕕᖃᒻᒪᕆᒍᒪᓂᕋ ᑕᑯᓂᐊᕋᕕᐅᒃ.” ᑕᕝᕙ ᕿᒧᒃᓯᐅᑎᒥᓂ ᐊᒃᓴᓗᐊᓕᖕᒥ ᐃᑭᒪᖃᑎᒋᓕᕐᐹ. 17ᔨᕼᐆ ᓴᒥᐊᕆᐊᒧᑦ ᑎᑭᓐᓇᒥ ᐂᕼᐊᑉ ᕿᑐᕐᖓᖏᑦ ᐊᒥᐊᒃᑰᔪᓕᒫᑦ ᑐᖁᕋᕐᐰᑦ ᐃᓘᓐᓇᑎᒃ ᓄᖑᓪᓗᒋᑦ ᐊᑕᓂᐅᑉ ᐅᖃᐅᓯᕆᓯᒪᔭᖓ ᐃᓔᑦᔭᒃᑯᑦ ᒪᓕᒡᓗᒍ.
ᒎᑎᓐᖑᐊᒧᑦ ᐰᓕᒧᑦ ᑐᒃᓯᐊᕐᐸᒃᑐᑦ ᑐᖁᑕᐅᓂᖓᑦ
18ᔨᕼᐆᓪᓗ ᐃᓄᓕᒫᑦ ᑲᑎᖁᕔᑦ, ᐅᖃᐅᑎᓪᓗᒋᓪᓗ: “ᐂᕼᐊᑉ ᐰᓕᒥᒃ ᐱᔨᑦᓯᓚᐅᕐᐳᖅ ᒥᑭᔪᒥᒃ, ᔨᕼᐆᓕ ᐰᓕᒥᑦ ᐊᖏᓂᕐᓴᒥᒃ ᐱᔨᑦᓯᕐᓂᐊᕐᐳᖅ. 19ᒫᓐᓇ ᐰᓕᐅᑉ ᓇᓚᐅᑦᑍᔪᖁᑎᓕᒫᖏᑦ, ᐅᕙᓐᓄᑦ ᕾᖁᔭᐅᓚᐅᕐᓕᑦ, ᑭᒡᒐᕐᑐᕐᑎᓕᒫᖏᑦ, ᐊᔪᕆᕐᑐᐃᔨᖁᑎᓕᒫᖏᓪᓗ, ᓇᓪᓕᐊᓐᓂᒡᓘᓐᓃᑦ ᕾᑦᑍᓕᔪᖃᕐᓂᐊᕋᓂ: ᑐᓂᕐᕈᓯᕆᐊᖃᕋᒪ ᐊᖏᔪᒥᒃ ᐰᓕᒧᑦ; ᓇᓪᓕᐊᑦ ᐅᐸᒃᑍᓕᓂᐊᕐᑐᖅ ᑖᓐᓇ ᑐᖁᑕᐅᓂᐊᕐᐳᖅ.” ᔨᕼᐆᓕ ᑍᒤᓕᐅᕐᐳᖅ ᐱᓐᖏᓯᕐᑐᕐᓗᓂ, ᐰᓕᒧᑦ ᑐᒃᓯᐊᕐᐸᒃᑐᓕᒫᑦ ᑐᖁᑦᓱᒪᓪᓗᒋᑦ. 20ᔨᕼᐆᓗ ᐅᖃᕐᐳᖅ, “ᐅᓪᓗᒥ ᓇᓗᓁᕐᓯᓕᕆᑦᓯ ᐰᓕᒧᑦ ᐅᓪᓗᕐᓯᐅᕐᕕᒃᓴᒥᒃ ᐃᑦᔪᕐᓁᑎᓪᓗᒍᓗ!” ᑕᒪᓐᓇᓗ ᑲᔪᓯᑎᑕᐅᕗᖅ. 21ᔨᕼᐆᓗ ᑎᓕᓯᕗᖅ ᐃᓴᕆᐊᓕᒥᐅᓕᒫᓂᒃ: ᐰᓕᒧᑦ ᑐᒃᓯᐊᕐᐸᒃᑐᓕᒫᑦ ᑕᕝᕗᖓ ᕾᖁᓪᓗᒋᑦ, ᑍᒤᒻᒪᑦ ᓇᓪᓕᐊᓐᓂᒡᓘᓐᓃᑦ ᕾᖏᑦᑐᖃᓚᐅᓐᖏᓚᖅ, ᑕᕝᕙ ᐰᓕᐅᑉ ᐃᒡᓗᖁᑎᖓᓄᑦ ᐃᑎᕐᐳᑦ; ᐃᒡᓗᓗ ᑕᑕᑕᐅᓪᓗᓂ ᐃᓱᐊᓂᑦ ᐃᓱᐊᓄᑦ. 22ᐃᒡᓗᒥᓗ ᑕᕝᕙᓂ ᐊᓐᓄᕌᓕᕆᔨᐅᔪᖅ, ᐰᓕᒧᑦ ᑐᒃᓯᐊᕐᐸᒃᑐᑦ ᐊᓐᓄᕌᒃᓴᖏᓐᓂᒃ ᕾᑦᓯᖁᕚ, ᐊᓐᓄᕌᒃᓴᖏᓪᓗ ᕾᑕᐅᕗᑦ. 23ᑕᕝᕙ ᔨᕼᐆ ᐃᒡᓗᒧᑦ ᑕᕝᕗᖓ ᐃᑎᕐᐳᖅ, ᔨᕼᐅᓇᑕᑉ ᕆᑳᑉ ᐃᕐᓂᖓ ᐃᑎᖃᑎᒋᓪᓗᒍ, ᐰᓕᒧᓪᓗ ᑐᒃᓯᐊᕐᐸᒃᑐᑦ ᐅᖃᐅᑎᕔᑦ, ᕿᓂᖁᓪᓗᒋᑦ ᐊᑕᓂᕐᒧᑦ ᑐᒃᓯᐊᕐᐸᒃᑐᓂᒃ ᑕᕝᕙᓃᑦᑐᖃᖁᓇᒍ, ᐰᓕᒧᑦ ᑐᒃᓯᐊᕐᐸᒃᑐᑦ ᑭᓯᐊᓂ ᑕᕝᕙᓃᖁᓪᓗᒋᑦ. 24ᑕᕝᕗᖓᓕ ᐃᑎᕋᒥᒃ ᑐᓂᕐᕈᓯᕆᐊᕐᑐᓕᕐᓗᑎᒃ ᑐᓂᕐᕈᑎᒃᓴᓂᒡᓗ ᐆᑕᒃᓴᓂᒃ ᓇᒃᓴᕐᓗᑎᒃ, ᐊᖑᑎᓂᒃ 80ᓂᒃ ᐃᒡᓘᑉ ᓯᓚᑖᓃᓐᓂᐊᕐᑐᓂᒃ. ᔨᕼᐆᓗ ᑎᓕᓯᓯᒪᓚᐅᕐᐳᖅ ᐅᖃᐅᑎᓯᒪᓪᓗᒋᓪᓗ: “ᓇᓪᓕᐊᑦ ᑕᕝᕗᖓ ᐃᑎᕐᑎᓚᐅᕐᑕᒪ ᐃᓚᖓᓐᓂᒃ ᕿᒪᒃᓯᓗᓂ ᐊᓐᓁᔭᐅᔪᖃᕐᐸᑦ ᑖᓐᓇ ᐊᓐᓁᔪᖅ ᐃᓅᓯᕐᒥᓂᒃ ᐊᑭᓖᓂᐊᕐᐳᖅ!”
25ᔨᕼᐆᓕ ᑐᓂᕐᕈᑎᒃᓴᓂᒃ ᐆᑕᒃᓴᓂᒃ ᑐᓂᓯᔭᕇᕋᒥ, ᐅᓇᑕᕐᑐᒃᓴᓄᑦ ᐊᖓᔪᖅᑳᖏᓐᓄᓪᓗ ᐅᖃᕐᐳᖅ, “ᐃᑎᕐᓗᓯ ᑐᖁᕋᕐᑍᓐᓇᕆᓕᕐᓯᒋᒃ; ᓇᓪᓕᐊᓐᓂᒡᓘᓐᓃᑦ ᐊᓂᔪᖃᕐᑍᓕᓕ!” ᑖᒃᑯᐊ ᐃᑎᕋᒥᒃ ᓴᕕᒡᔪᐊᒧᑦ ᑐᖁᕋᕐᐰᑦ; ᑎᒥᖏᓪᓗ ᓯᓚᒧᑦ ᐊᓂᑕᐅᕗᑦ. ᑕᕝᕙ ᐃᒡᓗᒐᓴᖕᓄᑦ ᐰᓕᒧᑦ ᑐᒃᓯᐊᕐᕕᐅᕙᒃᑐᓄᐊᕐᐳᑦ, 26ᒎᑎᓐᖑᐊᕆᔭᐅᔪᓪᓗ ᓇᐸᔪᑦ ᓴᓇᓯᒪᔪᑦ ᑕᕝᕙᓃᑦᑐᑦ ᐰᓕᐅᑉ ᐃᒡᓗᖁᑎᖏᓐᓂᑦ ᐊᓂᑎᑉᐰᑦ, ᐃᑯᐊᓪᓚᒡᓗᒋᓪᓗ. 27ᐰᓕᓐᖑᐊᓪᓗ ᓇᐸᔪᑦ ᓯᖁᑦᑎᕐᐰᑦ, ᑐᒃᓯᐊᕐᕕᖏᓪᓗ ᓯᖁᑦᑎᕐᓗᒋᑦ, ᐃᓂᒋᔭᖏᓪᓗ ᐊᓇᕆᐊᕐᑐᕐᕕᓐᖑᕐᑎᑕᐅᓚᐅᕐᐳᑦ ᐅᓪᓗᒥᒧᑦ ᑎᑭᓪᓗᒍ.
28ᑍᒫᒃ ᑕᕝᕙ ᔨᕼᐆᑉ ᐰᓕᒧᑦ ᑐᒃᓯᐊᕐᐸᒃᑐᑦ ᓄᖑᑕᐅᑎᓚᐅᕐᐰᑦ ᐃᓴᕆᐊᓕᒥ. 29#ᐊᑕᓃᑦ ᓯᕗᓪᓖᑦ 12:28-30.ᔨᕼᐆᓕ ᔨᕈᐳᐊᒻ ᓂᐹᑦ ᐃᕐᓂᖓᑕ ᐊᔪᕐᑐᓕᑦᔪᑎᒋᕙᓚᐅᕐᑕᖏᓐᓂᒃ ᕿᒤᓚᐅᓐᖏᓚᖅ, ᐃᓴᕆᐊᓕᒥᐅᓪᓗ ᐊᔪᕐᑐᓕᑎᓚᐅᕐᐰᑦ ᑐᒃᓯᐊᕐᓂᖃᕐᑎᓚᐅᕐᒪᒋᑦ ᐃᒻᒧᒃᓯᐅᒐᓐᖑᐊᕐᒧᑦ ᒎᓗᒧᑦ. ᑕᒪᓐᓇ ᓄᖅᑲᕐᑎᓚᐅᖏᒻᒪᒍ ᐱᑎᓕᒥ ᑖᓐᒥᓗ. 30ᔨᕼᐆ ᐊᑕᓂᐅᑉ ᐅᖃᐅᑎᓚᐅᕐᐹ, “ᐱᓇᓱᐊᑦᓯᐊᓚᐅᕋᕕᑦ ᐊᑲᐅᒋᔭᕋ ᒪᓕᒡᓗᒍ ᓵᓐᓂ ᐂᕼᐊᑉ ᐃᓚᒋᔭᖏᑦ ᐱᓪᓗᒋᑦ ᐱᓂᐊᕈᒪᔭᒃᑲᓗ ᐱᓇᓱᐊᓚᐅᕋᕕᒋᑦ, ᑭᖑᕚᑎᑦ ᐃᓴᕆᐊᓕᒥ ᐊᐅᓚᑦᓯᔪᒫᕐᐳᑦ ᑭᖑᕚᕕᑦ ᓯᑕᒤᖏᑦ ᑎᑭᓪᓗᒋᑦ.” 31ᑭᓯᐊᓂᓕ ᔨᕼᐆ ᐆᒻᒪᑎᓕᒫᒥᓄᑦ ᐊᑕᓂᕐᒧᑦ ᐊᖏᕐᓯᒪᓂᖃᓚᐅᓐᖏᓚᖅ ᖃᕿᐊᓕᕈᑎᖃᓚᐅᖏᓐᓇᒥ ᔨᕈᐳᐊᒻ ᐊᔪᕐᑐᓕᑦᔪᑎᒋᓚᐅᕐᑕᖏᓐᓂᑦ, ᐃᓴᕆᐊᓕᒥᐅᓪᓗ ᐊᑦᔨᖏᓐᓂᒃ ᐊᔪᕐᑐᓕᑎᓕᓚᐅᕆᕔᑦ.
ᔨᕼᐆᑉ ᑐᖁᓂᖓ
32ᑍᑦᓱᒪᓂ ᐊᑕᓂᐅᑉ ᐃᓴᕆᐊᓕᒥᐅᑦ ᓄᖑᐸᓪᓕᐊᑎᓚᐅᕐᐰᑦ, ᕼᐊᔧᐅᓕ ᐃᓴᕆᐊᓕᒥᐅᓂᒃ ᓵᓚᖃᓚᐅᕐᒪᑦ ᓄᓇᓕᖁᑎᖏᓐᓂᒃ ᐊᕕᒃᑐᕐᓯᒪᐅᕐᑐᓂᒃ. 33ᔪᐊᕐᑕᓂᐅᑉ ᓯᕿᓐᓂᓕᕐᕕᐊᑕ ᓇᓛᓃᑦᑐᑦ ᒋᓕᐊᒥᐅᓕᒫᑦ ᒑᑎᐅᓪᓗ ᑭᖑᕚᖏᑕ ᓄᓇᖏᑕ ᐃᓗᐊᓃᑦᑐᑦ ᕉᐱᓂᒥᐅᑦ ᒫᓇᓯᒥᐅᓪᓗ ᐊᕈᐃᕆᒥᑦ ᐋᕐᓄᓂᒥᐅᓄᑦ ᒋᓕᐊᑎᒥᑦ ᐹᓴᓂᒧᑦ. 34ᔨᕼᐆᓕ ᐊᐅᓚᑦᓯᓪᓗᓂ ᐱᓂᐊᕐᓂᕆᖃᑦᑕᕐᓯᒪᔭᖏᑦ ᐊᓯᖏᓪᓗ ᐱᔭᕇᕐᓯᒪᔭᖏᓪᓗ ᑎᑎᕋᕐᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑦᑕ ᑎᑎᕋᕐᑕᐅᓯᒪᕕᖏᓐᓂ. 35ᔨᕼᐆ ᑐᖁᓚᐅᕐᐳᖅ ᐃᓗᕕᕐᑕᐅᓪᓗᓂᓗ ᓴᒥᐊᕆᐊᒥ. ᐊᖓᔪᖅᑳᕐᔪᐊᖑᓂᖓᓗ ᑭᖑᕝᕕᕐᑕᐅᓚᐅᕐᐳᖅ ᐃᕐᓂᖓᓄᑦ ᔨᕼᐅᐊᕼᐊᔨᒧᑦ. 36ᔨᕼᐆ ᓴᒥᐊᕆᐊᕐᒥᐅᓄᑦ ᐊᖓᔪᖅᑳᕐᔪᐊᕆᔭᐅᓚᐅᕐᐳᖅ ᐊᕐᕌᒍᓂᒃ 28ᓂᒃ.
Currently Selected:
ᐊᑕᓃᑦ ᐂᑉᐸᖏᑦ 10: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
