ᐊᑕᓃᑦ ᐂᑉᐸᖏᑦ 5
5
ᓁᒪᐅᑉ ᐸᕐᑎᕐᓂᖓᑕ ᐋᖅᑭᒃᑕᐅᓂᖓ
1 #
ᓘᑲᓯ 4:27. ᓁᒪᓐ ᐊᖓᔪᖅᑳᖑᓚᐅᕐᐳᖅ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᓇᑕᕐᑐᒃᓴᖁᑎᖏᓐᓄᑦ, ᐊᔪᖏᑦᑐᐊᓘᓂᖓ ᐊᖓᔪᖅᑳᕐᔪᐊᖓᑕ ᖃᐅᔨᒪᖕᒪᒍ ᐅᐱᒋᔭᐅᑦᓯᐊᓚᐅᕐᐳᖅ, ᑖᑦᓱᒪ ᐊᐅᓚᓯᑦᓯᐊᕐᓂᖓᓄᑦ ᓯᕆᐊᒥᐅᑦ ᐅᓇᑕᕐᓗᑎᒃ ᐊᑕᓂᕐᒧᑦ ᓵᓚᖃᕐᑎᑕᐅᓯᒪᖕᒪᑕ, ᑲᑉᐱᐊᑍᑦᑑᓪᓗᓂ ᐅᓇᑕᕐᑎᐅᓚᐅᕐᒪᑦ, ᑭᓯᐊᓂ ᐋᓐᓂᐊᖃᓚᐅᕐᐳᖅ ᐅᕕᓂᖓ ᑲᐱᐊᒋᔭᐅᔪᒥᒃ ᐸᕐᑎᓕᓚᐅᕐᒪᑦ. 2ᓯᕆᐊᒥᐅᑦ ᐅᓇᑕᕐᑏᑦ ᐅᓇᑕᕆᐊᕐᓯᒪᓪᓗᑎᒃ ᐃᓴᕆᐊᓕᒥᐅᓂᒃ ᐊᖏᕐᕋᐅᑦᔨᓚᐅᕐᓂᕐᐳᑦ ᓂᕕᐊᕐᓵᒥᒃ, ᓁᒪᓐᓗ ᓄᓕᐊᖓᑕ ᐱᔨᑲᑖᒃᑕᕆᓚᐅᕐᐹ. 3ᓂᕕᐊᕐᓵᖅ ᐱᓯᒪᔨᒋᓕᕐᑕᒥᓄᑦ ᐅᖃᕐᐳᖅ, “ᐊᖓᔪᖅᑳᕋ ᑕᑯᔭᕐᑐᕈᓐᓇᕈᓂ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓂᒃ ᓴᒥᐊᕆᐊᒦᑦᑐᒥᒃ ᐅᕕᓂᕐᓗᒍᑎᐊᓗᐊ ᐋᖅᑭᒃᑕᐅᔪᓐᓇᕐᑑᒐᓗᐊᖅ.” 4ᓁᒪᓐ ᐊᑕᓂᕐᒥᓂᒃ ᑕᑯᔭᕐᑐᕐᐳᖅ ᐅᖃᐅᑎᓪᓗᓂᐅᒡᓗ ᓂᕕᐊᕐᓵᑉ ᐃᓴᕆᐊᓕᒥᐅᑕᐅᑉ ᐅᖃᕐᑕᕕᓂᖓᓂᒃ. 5ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᖃᐅᑎᕚ, “ᐃᓱᒪᕐᓱᕋᕕᑦ ᑕᐅᕗᓐᖓᐅᓂᐊᓕᕐᐳᑎᑦ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᑎᑎᕋᕐᕕᒋᓂᐊᕐᐸᕋ.” ᑕᕝᕙ ᓁᒪᓐ ᐊᐅᓪᓚᕐᐳᖅ ᓇᒃᓴᕐᓗᓂᓗ, 30,000ᓂᒃ ᓯᐅᓪᕕᕆᓂᒃ, 6,000ᓂᒃ ᑮᓇᐅᔭᓂᒃ ᒎᓗᓂᒃ, ᐊᓐᓄᕌᓂᒡᓗ 10ᐃᕐᑐᕐᓗᓂ ᐊᓯᑦᔨᖃᑦᑕᐅᑎᐅᓪᓗᐊᕐᑐᓂᒃ. 6ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᑎᑎᖅᑲᑦ ᓇᒃᓴᕐᑕᖏᑦ ᐃᒫᒃ ᐅᖃᕐᓯᒪᕗᑦ, “ᑎᑎᕋᕐᑕᓐᓄᑦ ᐃᓚᐅᑎᑦᓯᕗᖓ ᑭᒡᒐᓐᓂᒃ ᓁᒪᓐᒥᒃ ᐃᓕᑦᓯᓐᓄᑦ ᐋᖅᑭᒃᑕᐅᖁᓪᓗᒍ ᐅᕕᓂᕐᓘᑎᒋᔭᖓᓂᒃ ᐸᕐᑎᕐᓂᕐᒥᑦ.” 7ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᑎᑎᖅᑲᑦ ᐅᖃᓕᒫᕇᕋᒥᒋᑦ ᐊᓐᓄᕌᓂ ᐊᓕᒃᐰᑦ, ᐅᖃᕐᓗᓂᓗ, “ᒎᑎᐅᒐᒫ? ᑐᖁᑎᑦᓯᓚᐅᕐᓗᖓ ᐆᒻᒪᕐᑎᑦᓯᒃᑲᓐᓂᕈᓐᓇᕐᐳᖔ? ᖃᓄᐃᒻᒪᓂᓐᓇ ᐅᕕᓂᕐᓗᒃᑐᒥᒃ ᐸᕐᑎᕐᑐᒥᒃ ᐋᖅᑭᒃᑕᐅᖁᔨᓪᓗᓂ ᐅᕙᓐᓄᑦ ᑎᓕᓯᕙ? ᑕᑯᒋᑦ ᐅᕙᓐᓄᓂᓐᓇ ᐂᕙᑦᔪᑎᒃᓴᕐᓯᐅᑐᐃᓇᕐᑐᖅ!” 8ᐃᓔᓴ ᒎᑎᐅᑉ ᐃᓄᖁᑎᖓ ᑐᓴᕋᒥ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᐊᓐᓄᕌᒥᓂᒃ ᐊᓕᒃᓯᖕᒪᑦ, ᐅᖃᐅᑦᔭᐅᒃᑲᕐᐹ ᐃᒫᒃ, “ᖃᓄᐃᒻᒪᑦ ᐊᓐᓄᕌᑎᑦ ᐊᓕᒃᐱᒌᑦ? ᑍᓐᓇ ᐊᖑᑦ ᐅᕙᓐᓄᑦ ᕾᑎᑕᐅᓚᐅᕐᓕ ᖃᐅᔨᓂᐊᕐᒪᑦ ᒎᑎᒧᑦ ᐅᖃᕐᑎᑕᖃᕐᓂᖓᓂᒃ ᐃᓴᕆᐊᓕᒥᐅᓂ.” 9ᐊᓱᐃᓛᒃ ᓁᒪᓐ ᕿᒧᒃᓯᐅᑎᒥᒍᑦ ᕿᒻᒥᕐᔪᐊᒃᑰᕐᑐᖁᑎᓂ ᐃᓚᒋᓪᓗᒋᑦ ᐂᕗᖅ, ᑎᑭᓐᓇᒥᒡᓗ ᐃᓔᓴᐅᑉ ᐹᖓᑕ ᓵᖓᓄᑦ ᓄᖅᑲᕐᐳᑦ. 10ᐃᓔᓴ ᑕᕝᕙ ᑎᓕᓯᕗᖅ ᑭᒡᒐᒥᓂᒃ ᐅᖃᐅᑦᔨᖁᓪᓗᒍᓗ ᐃᒫᒃ, “ᐅᕕᓃᑦ ᐅᐊᓴᕆᐊᕐᑐᕈᒃ 7ᐃᓱᕐᓗᑎᑦ ᑰᖕᒥ ᔪᐊᕐᑕᓂᒥ, ᑕᕝᕙ ᐅᕕᓃᑦ ᐋᖅᑭᖕᓂᐊᕐᐳᖅ ᓴᓗᒻᒪᑦᓯᐊᓕᕐᓗᓂ.” 11ᓁᒪᓐᓕ ᓂᓐᖓᒡᓗᓂ, ᐃᖏᕐᕋᓯᑐᐃᓐᓇᕐᐳᖅ ᐅᖃᕐᓗᓂᓗ, “ᑕᑯᒋᑦ, ᑕᑯᔭᕐᑐᕐᓂᐊᕋᓱᒋᖅᑲᐅᔭᕋ ᓵᓐᓂ ᓇᖏᕐᓗᓂ ᑐᒃᓯᐊᕐᓂᐊᕋᓱᒋᖅᑲᐅᒐᓗᐊᕋᒃᑯ ᐊᑕᓂᐅᑉ ᐊᑎᖓᓄᑦ ᕿᓄᓗᓂ ᒎᑎᒥᓄᑦ, ᐃᓴᒡᓗᓂ ᐋᓐᓂᐊᒪ ᓇᓛᒍᑦ ᐊᒃᑐᐊᓗᓂᖓ ᑍᒪᓐᓇ ᐋᖅᑭᒃᑕᐅᓂᐊᕋᓱᒋᓪᓗᖓ ᐅᕕᓂᕐᓘᑎᓐᓂᑦ ᐸᕐᑎᕐᓂᕐᒥᑦ. 12ᐊᐹᓇ ᕙᕌᐸᕆᓗ ᑕᒫᓯᑰᓯᐅᑉ ᑰᖏᑦ, ᐃᒪᑦᓯᐊᕆᖕᓂᕐᓴᐅᓐᖏᓛᑦ ᐃᓴᕆᐊᓕᐅᑉ ᑰᖏᓐᓂᑦ? ᑍᒃᑯᓇᓂ ᐅᐊᓴᕈᒪ ᓴᓗᒻᒪᕐᑕᐅᓂᕐᓴᐅᒐᔭᖏᓐᓇᒫ?” ᐅᖓᒻᒧᐊᓕᓚᐅᕐᐳᖅ ᓂᓐᖓᐅᒻᒪᓪᓗᓂ. 13ᓁᒪᓐ ᑭᒡᒐᖏᑕ ᐅᐸᒡᓗᒍ ᐅᖃᐅᑎᕚᑦ, “ᐊᑖᑖᒃ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐱᔭᕆᐊᑐᔪᒥᒃ ᐱᓇᓱᐊᖁᓗᓂᑎᑦ ᐅᖃᐅᑎᖅᑲᐅᒃᐸᑎᑦ, ᐊᑐᕋᓱᒃᑲᔭᖅᑲᐅᓐᖏᓔᑦ? ᐱᔭᕆᐊᑭᑦᑐᒥᒡᓕ ᐅᖃᐅᑎᕚᑎᑦ, ᐅᐊᓴᕆᐊᕐᑐᖁᓪᓗᓂᑎᑦ ᓴᓗᒻᒪᕐᓂᐊᕋᕕᑦ!” 14ᑕᕝᕙ ᑰᓕᐊᕐᐳᖅ ᔪᐊᕐᑕᓂᒧᑦ 7ᐃᕐᑐᕐᓗᓂᓗ ᐊᖅᑲᕐᐳᖅ, ᒎᑎᐅᑉ ᐃᓄᖁᑎᖓᑕ ᐅᖃᐅᓯᖏᑦ ᒪᓕᒡᓗᒋᑦ; ᐅᕕᓂᖓᓗ ᐋᖅᑭᒃᐳᖅ ᓴᓗᒪᑦᓯᐊᕐᓗᓂ ᐃᓅᓱᒃᑐᑯᓗᒃᑎᑐᑦ ᐅᕕᓂᖓ ᑍᒤᓕᕐᓗᓂ. 15ᑕᕝᕙ ᓁᒪᓐ ᐃᓚᒋᔭᓕᒫᑦᓯᐊᓂ ᐃᓚᒋᓪᓗᒋᑦ ᒎᑎᐅᑉ ᐃᓄᖁᑎᖓᓄᑦ ᐅᑎᕆᕗᑦ, ᓵᖓᓄᐊᕐᓗᓂ ᐅᖃᐅᑎᕚ, “ᑕᑯᒋᑦ, ᖃᐅᔨᕗᖓ ᓯᓚᕐᔪᐊᓕᒫᒥ ᒎᑎᑕᖃᓐᖏᓚᖅ ᐃᓴᕆᐊᓕᒥᐅᓂ ᑭᓯᐊᓂ, ᑭᒡᒐᕕᑦ ᑐᓂᕐᕈᑎᖏᑦ ᐃᓕᖕᓄᑦ, ᐱᔭᐅᖁᔭᕋᓗᐊᑲ.” 16ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᑭᐅᕚ ᐅᖃᕐᓗᓂ, “ᐊᑕᓂᖅ ᐃᓅᖕᒪᑦ ᐱᔨᑦᓯᕐᑕᕋ, ᐱᑖᕐᑎᑕᐅᓇᓱᐊᕈᒪᖏᑦᑐᖓ.” ᓁᒪᓐ ᐊᔪᐃᓐᓈᕆᒐᓗᐊᕐᒪᒍ ᐱᔪᒪᓚᐅᓐᖏᓚᖅ. 17ᓁᒪᓐ ᐅᖃᓕᕐᐳᖅ, “ᐱᑎᑕᐅᔪᒪᖏᒃᑯᕕᑦ, ᐃᓕᖕᓄᑦ ᑭᒡᒐᖁᑎᒋᔭᐅᓂᓐᓄᑦᑕᐅᖅ ᓄᓇᑐᐃᓐᓇᕐᒥᒃ ᑕᒫᖓᑦ ᓇᒃᓴᕐᑎᑕᔪᒪᒐᓗᐊᕐᑐᖓ ᓯᐅᑎᖅᑯᕐᑐᔫᖕᓄᑦ ᒪᕐᕉᖕᓄᑦ ᓇᖕᒪᒃᑕᐅᔪᓐᓇᕐᑐᒥᒃ; ᑐᓂᕐᕈᓯᕐᓗᖓ ᒎᑎᓄᑦ ᑐᒃᓯᐊᖃᑦᑕᕈᒪᔪᓐᓃᕋᒪ, ᐊᑕᓂᕐᒧᑦ ᑭᓯᐊᓂ. 18ᐊᑕᓂᕐᒧᑦ ᐃᓱᒪᒋᔪᓐᓁᕐᑕᐅᔪᓐᓇᕈᒪᕗᖓ, ᐊᖓᔪᖅᑳᕐᔪᐊᕋ ᐱᖃᑎᒋᓗᒍ ᒎᑎᓐᖑᐊᑉ ᕆᒪᓇᐅᑉ ᐃᒡᓗᖓᓄᑦ ᐂᒍᓐᓄᒃ ᑐᒃᓯᐊᕆᐊᕐᑐᕐᓗᓄᑦ, ᐊᒡᒐᒃᑲ ᑎᒍᒃᐸᒋᑦ ᓰᖅᑯᕆᐊᖃᕋᒪ ᕆᒪᓇᐅᑉ ᒎᑎᓐᖑᐊᑉ ᐃᒡᓗᖓᓂ, ᑐᒃᓯᐊᕐᐳᖓ ᐊᑕᓂᕐᒧᑦ ᐃᓱᒪᒋᔪᓐᓁᕐᕕᐅᔪᒪᓪᓗᖓ.” 19ᐃᓔᓴᐅᑉ ᐅᖃᐅᑎᕚ, “ᓮᒪᓂᖃᑦᓯᐊᕐᓗᑎᑦ ᐃᖏᕐᕋᓕᕆᑦ.” ᓁᒪᓐᑯᑦ ᐅᖓᓯᓗᐊᖏᑦᑐᒧᑦ ᐃᖏᕐᕋᓕᕐᑎᓪᓗᒋᑦ. 20ᒋᕼᐋᓯ, ᐃᓔᓴᐅᑉ ᐃᑲᔪᕐᑎᖓ ᒎᑎᐅᑉ ᐃᓄᖁᑎᖓᑕ ᐃᓱᒪᓕᕋᒥ, “ᐊᖓᔪᖅᑳᕅᓐᓇ ᐱᔭᕐᓂᓈᕐᓯᑎᑦᓯᓗᐊᕐᑐᖅ ᓁᒪᓐᒥᒃ ᓯᕆᐊᒥᐅᒥᒃ, ᑐᓂᑦᔪᑎᒋᓇᓱᒃᑕᖏᓐᓂᒃ ᐃᓚᓐᖎᖏᑦᓯᐊᕐᑐᖅ, ᐊᑕᓂᖅ ᐆᒪᔪᖅ ᐱᑦᔪᑎᒋᓪᓗᒍ ᒪᓕᐊᓪᓚᒡᓗᒍ ᐃᓚᖏᓐᓂᒃ ᐱᑖᕆᐊᕐᑐᓚᐅᕐᓚᖓ.” 21ᒋᕼᐋᓯ ᑕᕝᕙ ᑐᐊᕕᕐᓗᓂ ᓁᒪᓐᑯᓐᓂᒃ ᐊᓐᖑᑎᓵᕋᓱᐊᓕᕐᐳᖅ. ᓁᒪᐅᑉ ᑕᑯᒐᒥᐅᒃ ᒥᒃᓯᒧᑦ ᐅᓪᓚᒃᑐᖅ ᕿᒧᒃᓯᐅᑎᒥᓂᑦ ᐊᒃᓴᓗᐊᓕᖕᒥᑦ ᓂᐅᓪᓗᓂ ᐸᕆᐊᕐᑐᕐᐹ, ᐊᐱᕆᓪᓗᒍᓗ, “ᖃᓄᐃᑦᑐᖃᖏᒃᑲᓗᐊᕐᐹ?” 22ᒋᕼᐋᓯᐅᑉ ᑭᐅᕚ, “ᖃᓄᐃᑦᑐᖃᖏᑦᑐᖅ, ᐊᖓᔪᖅᑳᒪ ᐅᖃᕆᐊᕐᑐᖁᖕᒪᖓ, ‘ᐃᓅᓱᒃᑑᒃ ᒪᕐᕉᒃ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑕ ᐃᓚᖏᒃ ᑎᑭᖅᑲᐅᖕᒪᑎᒃ ᑕᑉᐹᓐᖓᑦ ᐃᕗᕅᒻ ᖃᖅᑲᖓᓂᕐᒥᐅᓂᑦ ᐱᑎᑕᐅᔪᓐᓇᕐᒪᖔᑕ 3,000ᓂᒃ ᑮᓇᐅᔭᓂᒃ ᒎᓗᓂᒃ ᐊᓐᓄᕌᓂᒡᓗ ᖃᐅᔨᒋᐊᕐᑐᕐᑎᑕᐅᕗᖓ.’” 23ᓁᒪᐅᑉ ᐅᖃᐅᑎᕚ, “ᐱᔪᓐᓇᓗᐊᕐᐳᑎᑦ, 6,000ᓂᒃ ᐱᓕᕆᑦ.” ᒋᕼᐋᓯᒧᓪᓗ ᐱᔭᐅᑦᓯᐊᖁᕔᑦ, ᑖᒃᑯᐊᓗ 6,000ᑦ ᑮᓇᐅᔭᑦ ᐃᒃᐱᐊᕐᔫᖕᓄᑦ ᐴᕐᐰᑦ ᐊᓐᓄᕌᓪᓗ ᒪᕐᕈᐃᕐᓱᓪᓗᐊᕐᓗᓂ ᐊᑎᔭᒃᓮᑦ ᑭᒡᒐᕆᔭᒥᓄᓪᓗ ᐊᒃᔭᕐᓯᒍᑦᔭᐅᖁᕚ, ᑖᒃᑯᐊᓗ ᒋᕼᐋᓯᒥᑦ ᓯᕗᓪᓕᐅᓪᓗᑎᒃ ᐋᑦᓯᕘᒃ ᐱᔭᒃᓴᖏᓐᓂᒃ. 24ᐱᖑᐊᕐᔫᑉ ᖄᖓᓄᐊᕋᒥᒃ ᒋᕼᐋᓯᐅᑉ ᑖᒃᑯᐊᒃ ᐋᓪᓗᓂᒋᒃ ᐃᒡᓗᒧᐊᕈᑎᕔᑦ ᑖᒃᑯᐊᒡᓗ ᐃᑲᔪᕐᑎᒋᔮᖕᓂ ᐅᑎᖁᖕᒪᒋᒃ ᐅᑎᕐᐴᒃ ᐃᓚᒋᖅᑲᐅᔭᒥᖕᓄᑦ. 25ᒋᕼᐋᓯ ᐃᒡᓗᒧᑦ ᐃᑎᕐᒪᑦ, ᐊᖓᔪᖅᑳᖓᑕ ᓇᔪᕐᑕᖓᓄᑦ, ᐃᓔᓴᐅᑉ ᐊᐱᕆᓕᕐᐹ, “ᒋᕼᐊᔩ ᓇᓃᖅᑲᐅᒐᕕᑦ?” ᒋᕼᐋᓯ ᑭᐅᕗᖅ, “ᓇᒧᓐᖓᓚᐅᖏᑦᑐᖓ.” 26ᐃᓔᓴᐅᑉ ᐅᖃᐅᑎᓕᕆᕚ, “ᐊᓂᕐᓂᕐᒪ ᐃᓚᒋᖅᑲᐅᓐᖏᓛᑏᑦ ᓁᒪᓐ ᐊᒃᓴᓗᐊᓕᖕᒥᑦ ᓂᐅᓪᓗᓂ ᐸᕆᐊᓯᖕᒪᑎᑦ? ᐱᐅᕚ ᐅᓪᓗᒥ ᑕᕝᕙᓂ ᑮᓇᐅᔭᕐᑖᕋᓱᑐᐃᓐᓇᕈᑦᑕ, ᐊᓐᓄᕋᕐᑖᕐᑐᕐᓗᑕᓗ ᐅᕐᓱᒃᓴᕐᑖᕐᓗᑕ ᐸᐅᕐᖓᖃᕐᕕᒃᓴᓂᒃ ᐱᕈᕐᓰᕕᒃᑖᕐᑐᕐᓗᑕ, ᓰᐱᖁᑎᑖᕐᑐᕐᓗᑕ, ᐆᒪᔪᖁᑎᑖᕐᑐᕐᓗᑕᓗ, ᐱᔨᒐᓴᒃᑖᕐᑐᕐᓗᑕ ᐊᖑᑎᓂᒃ ᐊᕐᓇᓂᒡᓗ? 27ᓁᒪᓐ ᑲᑉᐱᐊᒋᔭᐅᔪᒥ ᐸᕐᑎᕐᓂᕆᓚᐅᕐᑕᖓ ᐱᑖᕆᓂᐊᓕᕐᐸᑦ, ᑭᖑᕚᑎᑦ ᑎᑭᓪᓗᒋᑦ ᑕᐅᕗᖓᓕᒫᖅ.” ᒋᕼᐋᓯ ᑕᕝᕙ ᐃᓔᓴᐅᑉ ᐃᒡᓗᖓᓂᑦ ᐊᓂᕗᖅ ᐅᕕᓂᕐᓘᑎᓗ ᐱᒋᐊᕐᐳᖅ ᐅᕕᓂᖓ ᐊᐳᑎᑐᑦ ᖃᑯᕐᓯᑎᒋᓪᓗᓂ.
Currently Selected:
ᐊᑕᓃᑦ ᐂᑉᐸᖏᑦ 5: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
