ᐊᑕᓃᑦ ᐂᑉᐸᖏᑦ 6
6
ᐅᓕᒪᐅᑎᐅᑉ ᑭᕕᔨᔭᐅᔫᑉ ᐅᑎᕐᑎᑕᐅᓂᖓ
1ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑦ ᐱᓇᓱᐊᕐᑎᒌᖃᑦᑕᕐᑐᑦ ᐃᓔᓴᒧᑦ ᐅᖃᓕᕐᐳᑦ, “ᑕᑯᒋᓪᓕ, ᐅᓇ ᑲᑎᒪᕕᒋᕙᒃᑕᕗᑦ ᒥᑭᓗᐊᖃᑦᑕᓕᕐᒪᑦ ᐅᕙᑦᑎᓐᓄᑦ. 2ᔪᐊᕐᑕᓂᒧᓐᖓᐅᔪᒪᒐᓗᐊᕋᑦᑕ ᐃᓘᓐᓇᑕ ᐊᑐᓂᑦ ᓇᐹᕐᑐᓂᒃ ᓇᑲᑎᕆᓗᑕ ᐃᓂᒋᖃᑦᑕᕐᓂᐊᕐᑕᑦᑎᓐᓂᒃ ᐃᒡᓗᓕᐅᕈᒪᓕᕋᑦᑕ.” ᐃᓔᓴᐅᑉ ᑭᐅᕔᑦ, “ᐊᑏ.” 3ᐃᓚᖓᑦᑕ ᐃᓔᓴ ᐊᐱᕆᕚ, “ᐱᖃᑕᐅᔪᓐᓇᕐᐲᑦ? ᐅᕙᑦᑎᓐᓄᑦ.” ᐃᓔᓴᐅᑉ ᑭᐅᕚ, “ᒪᓕᒍᓐᓇᕐᑐᖓ.” 4ᑕᕝᕙ ᐱᖃᑕᐅᓪᓗᓂ ᑰᖕᒧᑦ ᔪᐊᕐᑕᓂᒧᐊᕋᒥᒃ ᓇᐹᕐᑐᓂᒃ ᓇᑲᑎᕆᓕᕐᐳᑦ. 5ᓇᑲᑎᕆᓕᕐᓗᑎᒃ ᓇᐹᕐᑐᓂᒃ ᐃᓚᖓᑦᑕ ᐅᓕᒪᐅᑎᖓᑕ ᓂᐊᖁᖓ ᐲᕐᒪᑦ ᐃᒫᓄᑦ ᑭᕕᔨᐊᕆᕙ, ᕾᒐᓛᕐᓗᓂ ᐅᖃᕐᐳᖅ, “ᐊᖓᔪᖅᑳᒃ, ᐊᑐᕐᑐᐊᑐᐃᓐᓇᕐᑕᕅᓐᓇ.” 6ᒎᑎᐅᑉ ᐃᓄᖁᑎᖓᑕ ᐊᐱᕆᕚ, “ᓇᒧᑦ ᑭᕕᔨᐊᕆᒐᕕᐅᒃ?” ᑕᑯᑎᑉᐹᓗ ᐅᓕᒪᐅᑎᐅᑉ ᑭᕕᕕᒋᔭᖓᓂᒃ, ᐃᓔᓴ ᕿᔪᑯᓗᖕᒥᒃ ᓇᑲᑦᓯᓪᓗᓂ ᑭᕕᕕᐅᕋᑖᕐᑑᑉ ᓇᓛᓄᑦ ᐃᒋᑉᐹ, ᐊᑯᓂᐅᖏᑦᑐᖅ ᐅᓕᒪᐅᑦ ᐳᒃᑕᓪᓚᕐᐳᖅ. 7ᐃᓔᓴᐅᑉ ᐅᖃᐅᑎᕚ, “ᑎᒍᓕᕈᒃ.” ᑎᑭᐅᑦᔪᕐᓗᓂ ᑕᕝᕙ ᑎᒍᕚ.
ᓯᕆᐊᒥᐅᑦ ᐅᓇᑕᕐᑎᖁᑎᖏᑕ ᐱᕕᒃᓮᕈᑦᔭᐅᓂᖓᑦ
8ᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᐅᓇᑕᕐᓂᕐᔪᐊᖃᕐᑎᓪᓗᒍ ᐃᓴᕆᐊᓕᒥᐅᓂᒃ, ᐅᓇᑕᕐᑎᖁᑎᒥᓄᑦ ᐊᖓᔪᖅᑳᑦ ᐃᓱᒪᓯᐅᖃᑎᒋᓚᐅᕐᓗᓂᒋᑦ ᐃᓂᒋᔪᒪᔭᒥᖕᓄᑦ ᑕᖕᒫᕐᑎᕐᐳᑦ. 9ᐃᓔᓴ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᐅᖃᐅᑦᔭᐅᒃᑲᕐᐹ, “ᖃᐅᔨᒪᑦᓯᐊᕆᑦᓯ ᒪᐅᓈᕐᑍᓕᓗᓯ ᓯᕆᐊᒥᐅᑦ ᑕᐅᓄᓐᖓᕐᓂᐊᕐᒪᑕ.” 10ᑍᒤᒻᒪᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᑐᓴᕐᑎᑦᓯᔨᒥᓂᒃ ᑎᓕᓯᕗᖅ ᑍᒃᑯᐊ ᐅᓇᑕᕐᑎᖁᑎᖏᑦ ᓯᕆᐊᒥᐅᑦ ᑕᖕᒫᕐᓯᒪᕕᖓᑕ ᖃᓂᒋᔭᖓᓃᑦᑐᑦ ᐅᑦᔨᕐᓱᑦᓯᐊᖁᓪᓗᒋᑦ ᑎᕐᓕᓈᕐᑕᐅᖁᓇᒋᑦ, ᑕᒪᓐᓇᓗ ᓯᕆᐊᒥᐅᑦ ᖃᐅᔨᔭᐅᑦᑍᓕᓂᕆᖃᑦᑕᕐᑕᖓᑦ ᖃᐅᔨᔭᐅᖃᑦᑕᓚᐅᕐᐳᖅ ᐊᑕᐅᓯᐊᑐᐃᓐᓇᕋᓂ ᒪᕐᕈᐃᕐᓱᑐᐃᓐᓇᕋᓂᓗ. 11ᑕᕝᕙ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᓂᓐᖓᒃᐳᖅ ᑎᕐᓕᓈᕐᓯᓇᓱᒃᑲᓗᐊᕐᓗᑎᒃ ᖃᐅᔨᔭᐅᑐᐃᓐᓇᖃᑦᑕᓕᕋᒥᒃ; ᐊᖓᔪᖅᑳᖁᑎᓂ ᑲᑎᑎᓪᓗᓂᒋᑦ ᐊᐱᕐᓱᕐᐰᑦ, “ᓇᓕᕐᓰᓐᓇ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᐃᑲᔪᖃᑦᑕᕐᐸ?” 12ᐊᖓᔪᖅᑳᖁᑎᖓᑦᑕ ᐃᓚᖓᑦ ᑭᐅᕗᖅ, “ᓇᓪᓕᑦᑎᓐᓂᐅᖏᑦᑐᖅ, ᐊᑕᓂᕋ ᐊᖓᔪᖅᑳᕐᔪᐊᖅ! ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᐃᓔᓴ ᐅᓂᒃᑲᐅᑦᔨᖃᑦᑕᕐᐳᖅ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓐᓂᒃ, ᓯᓂᒃᕕᖃᕐᕕᖕᓂ ᐅᖃᕐᑕᑎᑦ ᐊᒡᓛᑦ ᖃᐅᔨᒪᖃᑦᑕᕐᐰᑦ.” 13ᐊᖓᔪᖅᑳᕐᔪᐊᖓᑦ ᐅᖃᕐᐳᖅ, “ᓇᓃᒻᒪᖔᑦ ᕿᓂᕆᐊᓚᐅᕐᓯᐅᒃ ᑎᒍᔭᐅᑎᓚᐅᕐᓂᐊᕋᒃᑯ.” ᐅᖃᐅᑎᔭᐅᕗᖅ, ᓄᓇᓕᖕᓂ ᑑᑖᓂᒦᓐᓂᖓᓂᒃ. 14ᐅᓇᑕᕐᑎᖁᑎᒥᓂᒃ ᐅᓄᕐᑐᓂᒃ ᕿᓂᕆᐊᕐᑎᑦᓯᕗᖅ ᕿᒧᒃᓯᐅᑎᒃᑰᕐᑐᓂᒃ ᕿᒥᕐᔪᐊᑎᒎᕐᑐᓂᒡᓗ ᐅᓐᓄᐊᓐᖑᕐᑎᓪᓗᒍ ᓄᓇᓕᖕᓄᑦ ᑎᑭᓐᓇᒥᒃ ᓄᓇᓕᒃ ᐊᕙᑕᖏᕐᐹᑦ. 15ᒎᑎᐅᑉ ᐃᓄᖁᑎᖓᑕ ᐃᑲᔪᕐᑎᖓ ᐅᓪᓛᒻᒪᕆᒃᑯᑦ ᐊᓂᒐᒥ, ᑕᑯᓕᕐᐳᖅ, ᐅᓇᑕᕐᑐᒃᓴᓄᑦ ᕿᒥᕐᔪᐊᒦᑦᑐᓄᑦ ᕿᒧᒃᓯᐅᑎᒥᑦᑐᓄᓪᓗ ᓄᓇᖓᑦ ᐅᖓᓗᔭᐅᓯᒪᑦᓯᐊᕐᓂᖓᓂᒃ. ᐱᔨ ᐅᖃᕐᐳᖅ, “ᐊᖓᔪᖅᑳᒃ ᖃᓄᕐᓕ ᐱᓂᐊᓕᕐᐱᑖ?” 16ᒎᑎᐅᑉ ᐃᓄᖁᑎᖓ ᐅᖃᕐᐳᖅ, “ᑲᑉᐱᐊᓱᖏᓪᓗᑎᑦ, ᑍᒃᑯᓇᖓᑦ ᐅᓄᕐᓂᕐᓴᓂᒃ ᐃᓚᖃᕐᐳᒍᑦ.” 17ᐃᓔᓴ ᑐᒃᓯᐊᕐᐳᖅ, “ᐊᑕᓃᖅ ᐃᔨᖏᒃ ᐅᐃᑎᓚᐅᒃᑭᒃ ᑕᑯᓂᐊᕐᒪᑦ.” ᑕᑉᕙ ᐊᑕᓂᐅᑉ ᐃᓅᓱᒃᑑᑉ ᐃᔨᖏᒃ ᐅᐃᑎᑉᐹᒃ, ᑕᑯᓪᓗᓂᓗ, ᐱᖑᐃᑦ ᓯᕕᖓᓂᖏᑦ ᓈᓯᒪᔪᑦ ᕿᒻᒥᕐᔪᐊᓕᔭᕐᑐᓂᒃ ᕿᒧᒃᓯᐅᓯᔭᕐᑐᓂᒡᓗ ᐃᑯᐊᓚᔪᓂᒃ ᐊᕙᓗᓯᓯᒪᑦᓯᐊᕐᒥᔪᓂᒃ ᐃᓔᓴᐅᑉ ᓇᔪᕐᑕᖓᓂᒃ. 18ᓯᕆᐊᒥᐅᑦ ᐅᓇᑕᕐᑎᖁᑎᖏᑦ ᕾᒋᐊᓯᖕᒪᑕ, ᐃᓔᓴ ᑐᒃᓯᐊᕐᐳᖅ, “ᐊᑕᓃᖅ ᐅᑯᐊ ᐃᓄᐃᑦ ᐱᒋᐊᓚᐅᒃᑭᑦ, ᑐᒃᓯᐊᕐᕕᒋᕙᒋᑦ, ᑕᐅᑐᒍᓐᓃᕐᑎᓪᓗᒋᑦ.” ᐊᑕᓂᐅᑉ ᐱᒋᐊᕐᐰᑦ ᑕᐅᑐᒍᓐᓃᕐᑎᑕᐅᕗᓪᓗ ᐃᓔᓴᐅᑉ ᑐᒃᓯᐊᕐᓂᖓ ᒪᓕᒃᓗᒍ. 19ᐃᓔᓴᐅᑉ ᐅᐸᒡᓗᓂᒋᑦ ᐅᖃᐅᑎᕔᑦ, “ᐊᖅᑯᑎᒃᑯᑦ ᐊᑐᕐᓂᐊᓐᖏᑕᑦᓯᒎᕐᓂᕋᑦᓯ ᓄᓇᓖᑦ ᐅᑯᐊ ᐅᐸᒐᓱᐊᕐᑕᓯ ᑖᒃᑯᐊᖑᖏᒻᒪᑕ, ᒪᓕᓕᕐᓯᓐᖓ ᐊᖑᒻᒧᑦ ᕿᓂᕐᑕᑦᓯᓐᓄᑦ ᐂᑎᓐᓂᐊᕋᑦᓯ.” ᑕᕝᕙ ᓴᒥᐊᕆᐊᒧᑦ ᐂᑎᑉᐰᑦ. 20ᓴᒥᐊᕆᐊ ᐃᒡᓗᒐᓴᒡᔪᐊᖏᓐᓄᑦ ᐃᑎᕋᒥᒃ, ᐃᓔᓴ ᑐᒃᓯᐊᕆᕗᖅ, “ᐊᑕᓃᖅ ᐃᔨᖏᑦ ᐅᐃᑎᓚᐅᕐᒥᒃᑭᑦ ᑕᑯᓂᐊᕐᒪᑕ.” ᑕᑉᕙ ᐊᑕᓂᐅᑉ ᐃᔨᖏᑦ ᐅᐃᑎᑉᐰᑦ ᑕᑯᓪᓗᑎᒃᓗ, ᑖᒃᑯᐊᓗ ᖃᐅᔨᓕᕐᐳᑦ ᓴᒥᐊᕆᐊᒥᐅᑦ ᐃᒡᓗᒐᓴᖏᑦᑕ ᐃᓗᐊᓃᓕᕐᓂᕐᒥᖕᓂᒃ. 21ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᓯᕆᐊᒥᐅᑦ ᐅᓇᑕᕐᑎᖏᑦ ᑕᑯᓕᕋᒥᒋᑦ ᐃᓔᓴ ᐊᐱᕆᖃᑦᑕᓕᕐᐹᑦ, “ᐊᑖᑕᒃ ᑐᖁᕋᓕᕐᓚᒃᑳ? ᑐᖁᕋᓕᕐᓚᒃᑳ?” 22ᐃᓔᓴᐅᑉ ᑭᐅᕚ, “ᑖᒃᑯᓂᖓ ᑐᖁᑦᓯᓂᐊᖏᑦᑐᑎᑦ. ᑐᖁᕅᒐᔭᕐᐱᓯ ᐅᓇᑕᕐᓂᕐᒥ ᑎᒍᔭᑦᓯᓐᓂᒃ ᔭᕕᒃᔪᐊᒧᑦ ᐱᑎᒃᓯᒧᓪᓘᓐᓃᑦ? ᓂᕆᑎᒃᑭᑦ ᐃᒥᕐᑎᓪᓗᒋᓪᓗ, ᐱᔭᕇᕐᐸᑕ ᐊᖓᔪᖅᑳᖏᓐᓄᑦ ᐅᑎᕐᑎᓐᓂᐊᕐᐸᑎᑦ.” 23ᑕᕝᕙ ᑖᒃᑯᓂᖓ ᓂᕆᕕᒡᔪᐊᕐᑎᑦᓯᕗᖅ; ᓂᕆᔭᕇᕐᒪᑕ ᐊᖓᔪᖅᑳᖏᓐᓄᑦ ᐅᑎᖁᕔᑦ, ᑕᒪᑐᒪᓗ ᑭᖑᓂᖓᒍᑦ ᓯᕆᐊᒥᐅᑦ ᑲᒪᓇᓱᑦᓵᕈᓐᓃᓚᐅᕐᐳᑦ ᐃᓴᕆᐊᓕᒥᐅᑦ ᓄᓇᓕᖁᑎᖏᓐᓂᒃ.
ᓴᒥᐊᕆᐊᒥᐅᑦ ᐃᓗᒪᔭᐅᓂᖓᑦ ᐊᑭᕋᒥᖕᓄᑦ
24ᐊᑯᓂᐅᓕᕐᒥᑎᓪᓗᒍ ᐱᓐ-ᕼᐊᑖᑦ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐅᓇᑕᕐᑎᖁᑎᓕᒫᒥᓂᒃ ᐅᓇᑕᕆᐊᕐᑎᑦᓯᓕᓚᐅᕆᕗᖅ ᓴᒥᐊᕆᐊᒥᐅᓂᒃ; ᓄᓇᖓᓐᓄᑦ ᑎᑭᐅᑎᒐᒥᒃ ᓄᓇᓖᑦ ᐊᕙᑖᓂᑦ ᐊᓂᔪᓐᓁᓪᓕᑎᑉᐰᑦ ᐃᒡᓗᒐᓴᖕᓂᑦ. 25ᓴᒥᐊᕆᐊᕐᒥᐅᑦ ᓂᕾᕈᑎᒐᒥᒃ ᑳᒃᑐᐊᓘᓕᕐᐳᑦ ᐃᒡᓗᒐᓴᒡᔪᐊᓂᑦ ᐊᓂᑦᔧᕐᑎᑕᐅᓯᒪᓂᖓ ᐊᑯᓂᐊᓘᓕᕐᒪᑦ ᑳᖕᓂᑯᒧᑦ ᓯᐅᑎᖅᑯᕐᑐᔫᑉ ᓂᐊᖁᐊ ᐊᑭᖃᓕᓚᐅᕐᐳᖅ 80ᓂᒃ ᓯᐅᓪᕕᕆᓂᒃ; ᑎᖕᒥᐊᓪᓗ ᑑᕖᑦ ᐊᓇᖓ ᐊᑕᐅᓯᕐᒥᒃ ᐅᖁᒤᓐᓂᓕᒃ ᑕᓪᓕᒪᓂᒃ ᓯᐅᓪᕕᕆᓂᒃ ᐊᑭᖃᓕᕐᓗᓂ. 26ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᐊᖅᑯᓵᕐᑎᓪᓗᒍ ᐊᕙᓗᕐᔪᐊᑉ ᑭᒡᓕᖓᒍᑦ, ᐊᕐᓇᒧᑦ ᓂᓪᓕᐊᕕᐅᓕᕐᐳᖅ, “ᐊᑕᓃᖅ ᐊᖓᔪᖅᑳᕐᔪᐊᖅ, ᐃᑲᔪᓚᐅᓐᖓ.” 27ᐊᖓᔪᖅᑳᕐᔪᐊᑉ ᑭᐅᕚ, “ᐊᑕᓂᕐᒧᑦ ᐃᑲᔪᕐᑕᐅᓂᐊᖏᒃᑯᕕᑦ, ᓇᑭᓪᓕ ᐃᑲᔪᕐᑎᒃᓴᕐᓯᒐᔭᕋᒃᑭᑦ? ᐃᕖᔧᕕᐅᑉ ᓇᑎᖓᓂ ᐊᒥᐊᒃᑯᑕᖃᕐᑐᕆᒃᓯᕖᑦ, ᐸᐅᕐᖓᓂᒡᓗ ᐃᑦᑏᔧᕕᖕᒥ ᐱᑕᖃᕋᓱᒋᒃᓯᕖᑦ?” 28ᐊᖓᔪᖅᑳᕐᔪᐊᑉ ᐊᐱᕚ, “ᖃᓄᐃᓐᓇᕕᑦ?” ᐊᕐᓇᐅᑉ ᑭᐅᕚ, “ᐆᒪ ᐊᕐᓇᐅᖃᑎᒪ ᐅᖃᐅᑎᓚᐅᕐᒪᖓ, ‘ᐃᕐᓃᑦ ᕾᓚᐅᕈᒃ ᐅᓪᓗᒥ ᓂᕆᓂᐊᕋᑦᑎᒃᑯᒃ, ᖃᐅᒃᐸᑦ ᐃᕐᓂᕋ ᓂᕆᓛᕆᕙᕗᒃ.’ 29#ᒨᓯᓯ ᑕᓪᓕᒪᖏᑦ 28:57; ᐅᒡᒍᐊᕐᓃᑦ 4:10.ᐊᓱᐃᓛᒃ ᐃᕐᓂᕋ ᐆᔪᓕᐊᕆᓪᓗᒍ ᓂᕆᓚᐅᕐᐸᕗᒃ, ᖃᐅᖕᒪᑦ ᐅᖃᐅᑎᓕᓚᐅᐸᕋ, ᐅᓪᓗᒥ ᐃᕐᓂᕐᓂᒃ ᓂᕆᔭᕆᐊᖃᕐᓂᐊᓕᕐᐳᒍᒃ, ᑭᓯᐊᓂᓕ ᐃᔨᕐᓯᔪᕕᓂᐅᖕᒪᑦ ᐃᕐᓂᕐᒥᓂᒃ.” 30ᐊᖓᔪᖅᑳᕐᔪᐊᖅ ᐊᕐᓇᐅᑉ ᐅᖃᐅᓯᖏᓐᓂᒃ ᑐᓴᕋᒥ, ᐊᓐᓄᕌᓂ ᐊᓕᒃᐰᑦ. ᐊᕙᓗᕐᔪᐊᑉ ᑭᒡᓕᖓᒍᑦ ᐱᓱᒃᑎᓪᓗᒍ ᐃᓄᖕᓄᑦ ᑕᐅᑐᒃᑕᐅᒐᒥ ᐅᑦᔨᕆᔭᐅᓕᕐᐳᖅ ᐊᓐᓄᕌᒥ ᐃᓗᐊᒍᑦ ᐊᓐᓄᕌᕐᓯᒪᓂᖓᓂᒃ ᕿᒃᓵᒃᑐᕐᓯᐅᑎᓂᒃ. 31ᐅᖃᕐᓗᓂᓗ, “ᒎᑎᐅᑉ ᓱᒋᐊᕐᓕᖓ, ᐊᑦᑕᕆᖏᓪᓗᓂᖓ ᐃᓔᓴᐅᑉ ᓴᕚᑎᐅᑉ ᐃᕐᓂᖓᑕ ᓂᐊᖁᐊ ᓱᓕ ᐅᓪᓗᒥ ᑎᒥᖓᓄᑦ ᐊᑕᓂᐊᕐᐸᑦ!” 32ᐃᓔᓴᓕ ᐊᖏᕐᕋᕐᓯᒪᕗᖅ ᐃᒡᓗᒥᓂ, ᐃᓄᐃᑦ ᐊᖓᔪᖅᑳᖏᓐᓂᒃ ᐃᓚᖃᕐᓗᓂ, ᐊᖓᔪᖅᑳᕐᔪᐊᖅ ᐃᒡᓗᖓᓄᑦ ᑎᑭᖏᓐᓂᕐᒥᓂ ᑎᓕᓯᕗᖅ ᐅᖃᐅᑦᔨᔭᕐᑐᕐᑐᒥᒃ ᐃᓔᓴᒥᒃ, ᓱᓕ ᑎᑭᓚᐅᕐᑎᓐᓇᒋᑦ ᐃᓔᓴᐅᑉ ᐊᖓᔪᖅᑳᑦ ᐃᒃᓯᕙᖃᑎᓂ ᐅᖃᕐᕕᒋᕔᑦ, “ᑕᑯᓐᖏᓚᓰ ᑍᓐᓇ ᐃᓄᐊᕐᑎ ᑎᓕᓯᒻᒪᕆᓕᕐᒥᔪᖅ ᓂᐊᖁᐃᕐᑕᐅᖁᓪᓗᓂᖓ? ᑍᒃᑯᐊ ᑎᓕᔭᖏᑦ ᑎᑭᐅᑎᒃᐸᑕ ᐅᒃᑯᐊᖅ ᐅᒃᑯᐊᕐᓗᒍ ᓇᔪᒻᒥᓂᐊᕐᐸᓯ ᐅᒃᑯᐃᕐᑕᐅᑦᑍᓕᑎᓪᓗᒍ, ᐊᖓᔪᖅᑳᖓᑦ ᑭᖑᓂᖓᓐᓂ ᒪᓕᒡᕙᓗᖓ ᑐᓴᕐᓴᐅᖕᒪᑦ.” 33ᓱᓕ ᐃᓔᓴ ᐅᖃᓪᓚᒃᑎᓪᓗᒍ, ᐅᖃᕆᐊᕐᑐᕐᑐᖅ ᐃᒡᓗᖓᓄᑦ ᑎᑭᐅᑎᕗᖅ, ᐊᖓᔪᖅᑳᕐᔪᐊᑉ ᐅᖃᖁᓯᒪᔭᖓ ᐃᒫᒃ, “ᑕᒪᓐᓇ ᐃᓱᒪᔮᕐᓂᐊᓗᒃ! ᐊᑕᓂᕐᒥᑦ ᐱᖕᒪᑦ ᐊᑕᓂᕐᒥᒃ ᓱᓕ ᐅᑕᖅᑭᔪᒃᓴᐅᕕᑖ?”
Currently Selected:
ᐊᑕᓃᑦ ᐂᑉᐸᖏᑦ 6: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
