ᐊᑕᓃᑦ ᐂᑉᐸᖏᑦ 3
3
ᐃᓴᕆᐊᓕᒥᐅᑦ ᒧᐊᐱᒥᐅᓪᓗ ᐅᓇᑕᕐᓂᖓᑦ
1ᔨᕼᐆᓴᐸᑎᐅᑉ ᐊᖓᔪᖅᑳᕐᔪᐊᖑᓂᖓᑕ ᔫᑕᒥ ᐊᕐᕌᒍᐃᑦ 18ᒋᓕᕐᑕᖓᓂ ᔨᕼᐅᕋᒻ ᐂᕼᐋᐱᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᐳᖅ ᐃᓴᕆᐊᓕᒥᐅᓄᑦ ᓴᒥᐊᕆᐊᑉ ᓄᓇᖓᓂ, ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒍᓂᒃ 12ᓂᒃ. 2ᐊᑕᓂᐅᓪᓗ ᓵᖓᓂ ᐊᔪᕐᑐᓕᕗᖅ, ᑭᓯᐊᓂ ᐊᑖᑕᒋᓚᐅᕐᑕᖓᑕ ᐊᓈᓇᒋᓚᐅᕐᑕᖓᑕᓗ ᐊᔪᕐᑐᓕᑦᔪᑎᒋᓚᐅᕐᑕᖏᑎᑑᖏᑦᑐᖅ ᒎᑎᓐᖑᐊᓕᐊᕆᓯᒪᔪᖅ ᐰᓕ ᐃᒋᑕᐅᑎᓚᐅᕐᒪᒍ ᐊᑖᑕᒋᓚᐅᕐᑕᖓᑕ ᓴᓇᔭᐅᑎᑕᕕᓂᖓ. 3ᑭᓯᐊᓂᓕ ᔨᕈᐳᐊᒻ ᓂᐹᑎᐅᑉ ᐃᕐᓂᖓᑕ ᐊᔪᕐᑐᓕᑦᔪᑎᒋᓚᐅᕐᒥᔭᖏᑕ ᐊᑦᔨᖏᓐᓂᒃ ᐊᑐᓕᓚᐅᕆᕗᖅ ᐃᓴᕆᐊᓕᒥᐅᓄᑦ ᑕᒻᒪᕐᓯᒪᑦᔪᑕᐅᓚᐅᕐᑐᓂᒃ; ᑕᒪᑐᒥᖓ ᕿᒤᓚᐅᖏᓐᓇᒥ. 4ᒧᐊᐱᒥᐅᑦ ᐊᖓᔪᖅᑳᕐᔪᐊᖓᑦ ᒦᓴ ᓰᐱᓂᒃ ᕿᑐᕐᖏᐅᕐᑎᑦᓯᔨᐅᒐᒥ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᑐᓂᓯᔭᕆᐊᖃᖃᑦᑕᓚᐅᕐᐳᖅ ᓰᐱᐅᑉ ᓄᕐᕋᖏᓐᓂᒃ 100,000ᓂᒃ ᐊᒻᒪᓗ ᓰᐲᑦ ᐊᖑᓴᓪᓗᖏᑕ 100,000ᐃᑦ ᒥᖅᑯᖏᓐᓂᒃ. 5ᐂᕼᐋᐱᐅᑉ ᐃᓅᔪᓐᓃᕐᓂᖓᑕ ᑭᖑᓂᖓᓂ ᒧᐊᐱᒥᐅᑦ ᐊᖓᔪᖅᑳᕐᔪᐊᖓᑦ ᐊᑭᕋᕐᑐᓕᓚᐅᕐᐳᖅ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᓐᓂᒃ. 6ᑕᒪᓐᓇ ᐱᑦᔪᑎᒋᓪᓗᒍ ᐊᖓᔪᖅᑳᕐᔪᐊᖅ ᔨᕼᐅᕌᒻ ᐃᓴᕆᐊᓕᒥᐅᑦ ᐅᓇᑕᕐᑐᒃᓴᓕᒫᖏᓐᓂᒃ ᐅᓇᑕᕕᒃᔪᐊᕆᐊᕐᑐᕐᑎᑦᓯᓕᓚᐅᕐᐳᖅ ᓴᒥᐊᕆᐊᑉ ᓄᓇᖓᓂᑦ. 7ᔨᕼᐆᓴᐹᑎᒧᓪᓗ ᔫᑕᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐅᖃᐅᑦᔨᔭᕐᑐᕐᑎᑦᓯᕗᖅ ᐃᒫᒃ, “ᒧᐊᐱᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᑭᕋᕐᑖᕆᖕᒪᖓ, ᐅᓇᑕᕆᐊᖃᑎᒋᔪᓐᓇᕐᐱᖔ ᒧᐊᐱᒥᐅᓂᒃ?” ᑭᐅᕗᕐᓗ, “ᐱᖃᑎᒋᓂᐊᕐᐸᒋᑦ ᐃᓕᒃᑐᑦ ᑍᒤᓐᓇᒪ ᐃᓄᖁᑎᒃᑲ ᐃᓄᖁᑎᑐᐃᓐᓇᕆᔮᕋᕕᒋᑦ ᕿᒻᒥᕐᔪᐊᖁᑎᒃᑲᓗ ᕿᒻᒥᕐᔪᐊᖁᑎᑐᐃᓐᓇᕆᔮᕐᐸᑎᑦ.” 8ᐊᐱᕆᓪᓗᓂᓗ, “ᓇᐅᒃᑰᕐᓗᑕ ᐅᓇᑕᓪᓚᕆᓯᒋᐊᕐᓂᐊᕐᐱᑖ?” ᔨᕼᐅᕌᒻ ᑭᐅᕚ, “ᐄᑐᒥᐅᑉ ᐃᓄᖃᖏᑦᑑᓂᖓ ᐊᖅᑯᑎᒋᓗᒍ.” 9ᑕᕝᕙ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᑦ ᓅᒋᐊᓯᓚᐅᕐᐳᖅ ᐅᓇᑕᕆᐊᓕᕐᓗᓂ ᔫᑕᒥᐅᑦ ᐊᖓᔪᖅᑳᕐᔪᐊᖓᑦ ᐱᖃᑎᒋᓪᓗᒍ ᐄᑕᒥᐅᓪᓗᑕᐅᖅ ᐊᖓᔪᖅᑳᕐᔪᐊᖓᑦ ᐃᓚᒋᔭᐅᓪᓗᓂ, ᓴᖑᔪᒥᒃ ᐊᖅᑯᑎᖃᕐᓗᑎᒃ ᐅᓇᑕᕆᐊᕋᒥᒃ ᐅᓪᓗᓂᒃ 7ᓂᒃ ᐊᐅᓪᓚᕐᓯᒪᓕᕋᓗᐊᕐᓗᑎ ᐃᒤᕈᑎᓚᐅᕐᐳᑦ ᑕᖁᐊᒥᖕᓂᒃ, ᐃᓄᐃᓪᓗ ᐆᒪᔪᖁᑎᖏᑕᓗ ᐃᒥᒃᓴᖏᓐᓂᒃ. 10ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᐅᖃᕐᐳᖅ, “ᓱᕕᑖ, ᐱᖓᓲᓪᓗᑕ ᐊᖓᔪᖅᑳᕐᔪᐊᑦ ᐊᑕᓂᕐᒧᑦ ᑲᑎᖁᔭᐅᓐᓂᕐᐱᑕ ᒧᐊᐱᒥᐅᓄᑦ ᑎᒍᔭᐅᑐᐃᓐᓇᖁᔭᐅᓪᓗᑖ?” 11ᔨᕼᐅᓴᐸᑎᐅᑉ ᐊᐱᕆᓕᕐᐰᑦ, “ᐊᑕᓂᐅᑉ ᐅᖃᕐᑎᖓᓂᒃ ᑕᒪᓃᑦᑐᖃᓐᖏᓛᖅ, ᐊᑕᓂᖅ ᖃᐅᔨᒋᐊᕐᕕᒋᓂᐊᕋᑦᑎᒍ ᑖᓐᓇ ᐊᖅᑯᑎᒋᓗᒍ?” ᐃᓴᕆᐊᓕᒥᐅᑦ ᐅᓇᑕᕐᑐᒃᓴᖏᑕ ᐊᖓᔪᖅᑳᖓᓐᓂᒃ ᓂᓪᓕᕐᑐᖃᕐᐳᖅ, “ᐃᓔᓴ ᓴᕚᑎᐅᑉ ᐃᕐᓂᖓ ᑕᒫᓃᑦᑐᒐᓗᐊᖅ, ᐃᓔᑦᔭᐅᑉ ᐊᒡᒐᖏᓐᓄᑦ ᐃᒥᕐᒥᒃ ᑯᕕᓯᕙᓚᐅᕐᑐᖅ.” 12ᔨᕼᐆᓴᐸᑎ ᐅᖃᕐᐳᖅ, “ᐊᑕᓂᐅᑉ ᐅᖃᐅᓯᖓ ᑖᑦᓱᒪᓃᑉᐳᖅ.” ᑕᕝᕙ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ, ᔨᕼᐆᓴᐹᑎᓗ, ᐄᑐᒥᒥᐅᓪᓗ ᐊᖓᔪᖅᑳᕐᔪᐊᖓᑦ ᐃᓔᓴᒧᑦ ᐅᐸᒍᑎᕗᑦ. 13ᐃᓔᓴᐅᑉ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᐅᖃᐅᑎᕚ, “ᖃᓄᖅ ᐱᓇᓱᐊᖃᑎᒌᒍᓐᓇᓕᕋᓐᓅᒃ? ᐊᑖᑕᒋᓚᐅᕐᑕᕕᑦ ᐅᖃᕐᑎᖏᓐᓄᑦ ᐊᓈᓇᒋᓚᐅᕐᑕᕕᓪᓗ ᐂᖓᓕᕆᑦ.” ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑕ ᑭᐅᕚ, “ᐋᒃᑲᓕ; ᑭᓯᐊᓂ ᐱᖓᓲᓪᓗᑕ ᐊᖓᔪᖅᑳᕐᔪᐊᖑᔪᒍᑦ ᐊᑕᓂᕐᒧᑦ ᑲᑎᖁᔭᐅᓯᒪᔫᔮᓕᕋᑦᑕ ᒧᐊᐱᒥᐅᓄᑦ ᐱᔭᐅᑐᐃᓐᓇᕐᓂᐊᕐᓗᑕ.” 14ᐃᓔᓴᐅᑉ ᑭᐅᕚ, “ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓐᓂᒃ ᐆᒪᔪᒥᒃ ᑭᒡᒐᕐᑐᕋᒪ, ᐅᐱᒋᔭᕋ ᔨᕼᐆᓴᐹᑎᑦ ᔫᑕᐅᑉ ᐊᖓᔪᖅᑳᕐᔪᐊᖓᑦ ᑕᒫᓃᖏᑉᐸᑦ, ᕿᕕᐊᕋᔭᖅᑲᐅᓐᖏᓚᒋᑦ ᑕᑯᖏᓪᓗᑎᓪᓗ. 15ᒫᓐᓇᓕ ᑯᑭᑦᑕᐸᐅᑎᐅᔭᕐᒥᒃ ᐱᓐᖑᐊᕈᓐᓇᕐᑐᒥᒃ ᕾᔪᖃᓚᐅᕐᓕ.” ᑯᑭᑦᑕᐸᐅᑎᐅᔭᕐᒥᒃ ᐱᓐᖑᐊᕐᑐᖃᓕᕐᑎᓪᓗᒍ ᐊᑕᓂᐅᑉ ᓇᔫᑎᓂᖓ ᐃᓔᓴᒧᐊᕐᐳᖅ, 16ᐅᖃᓕᕐᓗᓂᓗ, “ᐃᒫᒃ ᑕᕝᕙ ᐊᑕᓂᖅ ᐅᖃᕐᐳᖅ, ‘ᓇᕐᓴᖅ ᑕᒪᓐᓇ ᐸᓂᕐᑐᖅ ᑰᒐᓛᕕᓂᖅ ᐃᒪᕐᒥᒃ ᑕᑕᑎᓐᓂᐊᕐᐸᕋ.’ 17ᐃᒫᒃ ᐊᑕᓂᖅ ᐅᖃᕐᒪᑦ, ‘ᑕᑯᓂᐊᓐᖏᓚᓯ ᐊᓄᕆᒥᒃ ᓯᓚᓗᖕᒥᒡᓘᓐᓃᑦ, ᑭᓯᐊᓂᓕ ᑕᒪᓐᓇ ᓇᕐᓴᖅ ᓇᔪᕐᑕᓯ ᐃᒪᖃᓕᕐᓂᐊᕐᐳᖅ ᐊᒥᒐᖏᑦᑐᒥᒃ, ᐃᓕᑦᓯᓗ ᐆᒪᔪᖁᑎᓕᒫᓯᓗ ᐃᒥᒃᓴᖃᖁᓪᓗᓯ.’ 18ᑕᒪᓐᓇᓕ ᑍᒤᑎᑕᐅᓂᖓ ᐊᑕᓂᐅᑉ ᓱᓇᐅᒋᓐᖏᑕᖓ ᒧᐊᐱᒥᐅᓪᓗ ᐃᓕᑦᓯᓐᓄᑦ ᑐᓂᑦᔪᑎᒋᓂᐊᕆᕔᑦ. 19ᓄᓇᓕᒡᔪᐊᖁᑎᓕᒫᖏᑦ ᐊᕙᓗᕐᔪᐊᖃᕐᑑᒐᓗᐊᑦ ᓵᓚᒋᓂᐊᕐᐸᓯ, ᓄᓇᓕᒡᔪᐊᖁᑎᖏᓪᓗ ᐱᓪᓚᕆᐅᔪᑦ, ᓇᐹᕐᑐᖏᑕᓗ ᐱᐅᓂᓕᒫᖏᑦ ᓇᑲᑎᕐᓂᐊᕐᐸᓯ, ᓄᓇᐅᓪᓗ ᐃᓗᐊᓂᑦ ᑰᒐᓛᖁᑎᖏᑦ ᓯᒥᒃᑐᕐᓗᒋᑦ, ᐱᕈᕐᓰᕕᖁᑎᓕᒫᖏᓪᓗ ᐱᐅᔪᓐᓃᕐᑎᓐᓂᐊᕐᐸᓯ ᐅᔭᕋᓕᕐᑐᕐᓗᒋᑦ.” 20ᖃᐅᑎᓪᓗᒍ ᐅᓪᓛᒃᑯᑦ ᐆᒪᔪᕕᓂᕐᒥᒃ ᑐᓂᕐᕈᓯᕐᓂᖅ ᓇᓪᓕᐅᑎᓯᒪᓕᕋᓗᐊᕐᑎᓪᓗᒍ, ᑕᑯᓕᕐᐳᑦ ᐃᒪᕐᒥᒃ ᑰᒃᑐᒥᒃ ᐄᑐᒥᐅᑉ ᓇᓛᓂᑦ, ᓇᕐᓴᓕᒫᑦᓯᐊᖅ ᐃᒻᒪᒃᑎᓯᒪᓕᕐᐳᖅ. 21ᒧᐊᐱᒥᐅᓕᒫᑦ ᑐᓴᐅᒪᓕᕐᐳᑦ ᐊᖓᔪᖅᑳᕐᔪᐊᓄᑦ ᐅᓇᑕᕆᐊᕐᑕᐅᓕᕐᓂᕐᒥᖕᓂᒃ. ᑕᒪᓐᓇ ᐱᑦᔪᑎᒋᓪᓗᒍ ᐊᖑᑎᓕᒫᑦ, ᐃᓅᓱᒃᑐᐃᑦ ᐃᓄᑐᕾᓪᓗ ᐅᓇᑕᕐᑐᕐᓯᐅᑎᓂᒃ ᐊᑐᕈᓐᓇᕐᑐᑦ ᐅᑕᖅᑭᑎᑕᐅᓕᕐᐳᑦ ᓄᓇᖁᑎᖓᑦᑕ ᐊᕕᒃᓯᒪᓂᖓᑕ ᑭᒡᓕᖏᓐᓂ. 22ᐅᓪᓛᒻᒪᕆᒃᑯᑦ ᐃᖁᒻᒫᓕᕐᑎᓪᓗᒋᑦ, ᓯᕿᓐᓂᔮᓚᐅᕐᐳᖅ ᐃᒪᐅᑉ ᓇᓛᒍᑦ, ᒧᐊᐱᒥᐅᑦ ᑕᑯᓪᓗᓂᑦᔪᒃ ᓯᕿᓂᐅᑉ ᓵᓐᖓᔭᖓ ᐃᒪᖅ ᐊᐅᐸᕐᑐᖅ ᓲᕐᓗ ᐊᐅᒃᑎᑐᑦ. 23ᐅᖃᕐᐳᓪᓗ, “ᐊᐅᒑᓗᖕᒪᓐᓇ, ᐊᖓᔪᖅᑳᕐᔪᐊᓂᒃᑯᐊ ᐃᒻᒥᖕᓄᑦ ᑐᖁᕋᐅᑎᔪᕕᓈᓘᖅᑰᕐᑐᑦ. ᒫᓐᓇᓕ ᒧᐊᐱᒥᐅᖑᓗᑕ ᐱᖁᑎᖏᓐᓂᒃ ᐱᐅᕋᕆᐊᕐᑐᓕᕐᑕ!” 24ᒧᐊᐱᒥᐅᓪᓕ ᐃᓴᕆᐊᓕᒥᐅᑦ ᑕᖕᒫᕐᓯᒪᕕᖓᓐᓄᑦ ᑎᑭᐅᑎᖕᒪᑕ ᐃᓴᕆᐊᓕᒥᐅᑦ ᒪᑭᓪᓗᑎᒃ ᐅᓇᑕᕐᕕᒋᓕᕐᒪᒋᑦ ᕿᒫᔭᕆᐊᖃᓕᕐᐳᑦ. ᐃᓴᕆᐊᓕᒥᐅᓪᓗ ᒧᐊᐱᒥᐅᑦ ᓄᓇᖁᑎᓕᒫᖓᓐᓂᒃ ᑎᒍᓯᕗᑦ ᐃᓄᖏᑦ ᑐᖁᕋᕐᓗᒋᑦ. 25ᓄᓇᓕᓕᒫᖏᑦ ᓱᒃᑯᓪᓗᒋᑦ, ᐅᓇᑕᕐᑐᒃᓴᖁᑎᓕᒫᖏᑦ ᒥᓘᑎᕕᓂᕐᓄᑦ ᐱᕈᕐᓰᕕᖁᑎᖏᑦ ᐅᔭᖅᑭᕐᓱᕐᓯᒪᓚᐅᕐᐳᑦ, ᑰᒐᓚᓕᒫᖏᓪᓗ ᑰᒍᓐᓃᕐᓗᑎᒃ, ᓇᐹᕐᑐᑦᓯᐊᕙᓕᒫᓪᓗ ᓇᑲᑎᕐᑕᐅᓪᓗᑎᒃ. ᑭᕆ-ᕼᐃᕆᑎ ᖃᓄᐃᓕᓯᒪᖏᑦᑐᑑᓚᐅᕋᓗᐊᕐᓗᓂ ᐅᓇᑕᕐᑐᒃᓴᓄᑦ ᑎᑭᑕᐅᖕᒥᒐᒥ ᐃᓪᓘᓕᔭᕐᑐᓄᑦ ᐅᖓᓗᔭᐅᓪᓗᓂ ᐅᓇᑕᕐᕕᐅᓕᕐᒥᒐᒥ ᐱᔭᐅᒋᕗᖅ. 26ᒧᐊᐱᒥᐅᑦ ᐊᖓᔪᖅᑳᕐᔪᐊᖓᑦ ᖃᐅᔨᓕᕋᒥ ᓵᓚᐅᓕᕐᓂᕐᒥᓂᒃ, ᐅᓇᑕᕐᑐᒃᓴᖁᑎᒥᓂᒃ 700ᓂᒃ ᐃᓚᖃᕐᓗᓂ ᐄᑐᒥᐅᑉ ᓄᓇᖓᓄᑦ ᐊᓂᒎᑎᒋᐊᕋᓗᐊᕐᓗᓂ ᐱᔪᓐᓇᓚᐅᓐᖏᓚᖅ. 27ᑕᕝᕙ ᐃᕐᓂᓂ ᐊᖓᔪᒃᓕᕐᐹᖅ, ᐊᖓᔪᖅᑳᕐᔪᐊᖑᓂᖓᓂᒃ ᑭᖑᕝᕕᐅᑎᔪᒃᓴᖅ ᑎᒍᓪᓗᓂᐅᒃ ᑐᖁᓪᓗᒍ ᑐᓂᕐᕈᓯᕈᑎᒋᕚ ᐃᒡᓗᒐᓴᒡᔪᐊᑦ ᐊᕙᓗᕐᔪᐊᖏᓐᓂ; ᑕᕝᕙ ᐃᓴᕆᐊᓕᒥᐅᑦ ᑲᑉᐱᐊᓇᕐᑐᕐᔪᐊᕐᒧᑦ ᑎᑭᑕᐅᕗᑦ. ᐅᓇᑕᕋᓱᒍᓐᓃᕐᓗᑎᒃ ᓄᓇᒥᖕᓄᑦ ᐅᑎᑐᐃᓇᓕᕐᐳᑦ.
Currently Selected:
ᐊᑕᓃᑦ ᐂᑉᐸᖏᑦ 3: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
