ᐊᑕᓃᑦ ᐂᑉᐸᖏᑦ 24
24
1 #
ᔨᕆᒤᐊ 25:1-38; ᑖᓂᐊᓕ 1:1,2. ᔨᕼᐅᐃᐊᑭᒻ ᐊᖓᔪᖅᑳᕐᔪᐊᖑᑎᓪᓗᒍ ᓂᐱᑯᓁᓴ ᐹᐱᓘᓂᒥᐅᑉ ᐊᖓᔪᖅᑳᕐᔪᐊᖓᑦ ᑎᑭᓚᐅᕐᐳᖅ, ᔨᕼᐅᐃᐊᑭᒻᓗ ᐱᔨᒋᓕᓚᐅᕐᐹ ᐊᕐᕌᒍᓂᒃ ᐱᖓᓱᓂᒃ; ᑭᖑᓂᖓᒍᑦ ᐊᐅᓚᑕᐅᔪᒪᔪᓐᓃᕐᓗᓂ ᐊᑭᕋᕐᑐᓕᓚᐅᕐᐳᖅ. 2ᐊᑕᓂᕐᓗ ᑲᐅᓪᑎᐊᒥᐅᑦ ᐅᓇᑕᕐᑎᒐᓴᒡᔪᐊᖏᓐᓂᒃ ᐅᓇᑕᕆᐊᕐᑎᑦᓯᕗᖅ ᔨᕼᐅᐃᐊᑭᒻᒧᑦ, ᓯᕆᐊᒥᐅᓂᑦ, ᒧᐊᐱᒥᐅᓂᑦ ᐊᒧᓁᑎᓂᑦ, ᑲᑐᑦᔭᐅᓪᓗᓂ ᑖᒃᑯᓇᓐᖓ ᔫᑕ ᐊᓯᕈᕐᑕᐅᖁᓪᓗᒍ, ᐊᑕᓂᐅᑉ ᐅᖃᐅᓯᕆᓯᒪᔭᖓ ᐅᖃᕐᑎᒥᒍᑦ ᒪᓕᒡᓗᒍ ᑍᒤᑦᓱᒫᕐᓂᕋᕐᓗᒍ ᐅᖃᕐᓯᒪᓚᐅᕋᒥ. 3ᑕᒪᓐᓇ ᑍᒤᓚᐅᕐᐳᖅ ᔫᑕᒥᐅᓄᑦ ᐊᑕᓂᐅᑉ ᐱᖁᔨᓂᖓᒍᑦ, ᔫᑕᒥᐅᑦ ᑕᑯᓐᓇᕐᑕᒥᓂᑦ ᐲᕈᒪᓚᐅᕐᒪᒋᑦ, ᒫᓇᓯᐅᑉ ᐊᔪᕐᑐᓕᓯᒪᓂᖓᓄᑦ, ᐱᓇᓱᐊᕐᓂᕆᓯᒪᔭᓕᒫᖏᓪᓗ ᐱᑦᔪᑎᒋᓪᓗᒋᑦ, 4ᐸᓯᔭᒃᓴᐅᖏᑦᑐᓂᒡᓗ ᑐᖁᕅᖃᑦᑕᕐᓯᒪᓂᖓᓄᑦ; ᔨᕉᓴᓕᒥᒃ ᐸᓯᔭᒃᓴᐅᖏᑦᑐᑦ ᐊᐅᖏᓐᓂᒃ ᑕᕐᓴᕐᑖᕐᑎᑦᓯᓯᒪᓕᓚᐅᕐᒪᑦ, ᑕᒪᓐᓇᓗ ᐊᑕᓂᐅᑉ ᐃᓱᒪᒋᔪᓐᓁᓚᐅᓐᖏᓛ.
5ᔨᕼᐅᐃᐊᑭᐅᑉ ᐱᓂᐊᕐᓂᕆᓯᒪᔭᓕᒫᖏᑦ ᐊᒡᓚᒃᑕᐅᓯᒪᕗᑦ ᔫᑕᐅᑉ ᐊᖓᔪᖅᑳᕐᔪᐊᖏᑕ ᐊᒡᓚᒃᑕᐅᓯᒪᕕᖏᓐᓂ. 6ᔨᕼᐅᐃᐊᑭᒻ ᐃᓅᔪᓐᓃᕐᒪᑦ, ᐃᕐᓂᖓᑕ ᔨᕼᐅᐃᐊᑭᓐ ᑭᖑᕝᕕᓕᓚᐅᕆᕚ ᐊᖓᔪᖅᑳᕐᔪᐊᓐᖑᕐᓗᓂ ᐃᓂᖓᓂ.
7ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦ ᐅᓇᑕᕆᐊᕐᑎᑦᓯᓚᐅᕐᓯᒪᔪᓐᓃᓚᐅᕐᐳᖅ ᐅᓇᑕᕐᑎᖁᑎᒥᓂᒃ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᓄᓇᖁᑎᕕᓂᕋᓗᐊᖏᓐᓂᒃ ᐊᕐᓵᕐᑕᐅᓯᒪᓕᓚᐅᕋᒥ, ᑰᖕᒥᒃ ᐃᕗᕅᑎᒥᑦ ᐱᒋᐊᕐᓗᒍ ᐄᑦᔨᑉᑎᐅᑉ ᑕᕐᕌᓄᑦ ᑎᑭᓪᓗᒍ ᓄᓁᕐᑕᐅᓯᒪᓕᓚᐅᕐᒪᑦ.
ᔨᕼᐅᐃᐊᑭᓐ ᐊᖓᔪᖅᑳᕐᔪᐊᖑᓂᖓ ᔫᑕᒧᑦ
ᑯᕉᓂᑲ ᐂᑉᐸᖏᑦ 36:9-10
8ᔨᕼᐅᐃᐊᑭᓐ ᐊᕐᕌᒍᖃᕐᓗᓂ 18ᓂᒃ ᐊᖓᔪᖅᑳᕐᔪᐊᖑᓕᓚᐅᕐᐳᖅ ᔫᑕᒧᑦ, ᔨᕉᓴᓕᒥᓗ ᐊᐅᓚᑦᓯᓚᐅᕐᐳᖅ ᑕᖅᑭᓂᒃ ᐱᖓᓱᓂᒃ. ᐊᓈᓇᖃᓚᐅᕐᐳᖅ ᓂᕼᐅᓯᑕᒥᒃ ᐃᐅᓪᓇᓴᓐ ᐸᓂᖓᓂᒃ ᔨᕉᓴᓕᒥᐅᑕᕐᒥᒃ. 9ᐊᑖᑕᒥ ᐊᔪᕐᑐᓕᓂᕆᓚᐅᕐᑕᓕᒫᖏᑦ ᒪᓕᒡᓗᓂᒋᑦ, ᔨᕼᐅᐃᐊᑭᓐ ᐊᑕᓂᐅᑉ ᓵᖓᓂ ᐊᔪᕐᑐᓕᓚᐅᕐᐳᖅ.
10ᔨᕼᐅᐃᐊᑭᓐ ᐊᖓᔪᖅᑳᕐᔪᐊᖑᑎᓪᓗᒍ ᐹᐱᓘᓂᒥᐅᑦ ᐅᓇᑕᕐᑎᖁᑎᖏᑦ ᓂᐱᑯᓁᓴᐅᑉ ᐅᓇᑕᕐᑎᖁᑎᖏᑕ ᐊᖓᔪᖅᑳᖏᓐᓄᑦ ᐊᐅᓚᑕᐅᓪᓗᑎᒃ ᐅᓇᑕᕆᐊᕐᐳᑦ ᔨᕉᓴᓕᒥᒃ, ᓱᕖᕈᑦᔨᓯᒪᓪᓗᑎᒃ ᐃᓗᒪᒃᓯᓕᓚᐅᕐᐳᑦ. 11ᐅᓇᑕᕐᑎᖏᑦ ᐃᓗᒪᒃᓯᑎᓪᓗᒋᑦ, ᓂᐱᑯᓁᓴ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓ ᔨᕉᓴᓕᒧᐊᓚᐅᕐᐳᖅ, ᐱᔨᖏᑦ ᐊᕙᓗᓯᓯᒪᑎᓪᓗᒋᑦ; 12#ᔨᕆᒤᐊ 22:24-30; 24:1-10; 29:1,2.ᐊᖓᔪᖅᑳᕐᔪᐊᖅ ᔨᕼᐅᐃᐊᑭᓐ ᐃᒻᒥᖕᓂᒃ ᑐᓂᑦᔪᑎᒋᓚᐅᕐᐳᖅ ᓴᐱᓕᕋᒥᒃ ᐹᐱᓘᓂᒥᐅᓄᑦ, ᐊᓈᓇᖓᓗ ᐃᕐᓂᖏᓪᓗ ᐅᓇᑕᕐᑎᖁᑎᖏᑕᓗ ᐊᖓᔪᖅᑳᖏᑦ ᐃᒡᓗᖓᓂᓗ ᐊᖓᔪᖅᑳᑦ. ᓂᐱᑯᓁᓴᐅᓪᓗ ᐊᖓᔪᖅᑳᕐᔪᐊᖑᓂᖓᑕ 8ᖓᓐᓂ ᔨᕼᐅᐃᐊᑭᓐ ᑎᒍᓚᐅᕐᐹ ᑎᒍᔭᐅᓯᒪᕕᖕᒥᓃᑎᓕᕐᓗᓂᐅᒡᓗ. 13ᐊᑕᓂᐅᑉ ᐃᒡᓗᖓᑕ ᐊᑭᑐᔪᒃᓴᔭᖁᑎᓕᒫᖏᑦ, ᐊᖓᔪᖅᑳᕐᔪᐊᓪᓗ ᐃᒡᓗᖓᓂ ᐊᑭᑐᔪᒃᓴᓕᒫᑦ ᐊᐅᓪᓚᕈᑎᓚᐅᕐᐰᑦ ᐹᐱᓘᓂᒧᑦ, ᐊᑕᓂᐅᑉ ᑍᒤᑕᐅᔪᒫᕐᓂᕅᓯᒪᓂᖓ ᓇᓚᐅᓪᓗᒍ. ᓂᐱᑯᓁᓴᐅᑉ ᐊᑕᓂᐅᑉ ᐃᒡᓗᖓᑕ ᐃᓗᓕᖁᑎᖏᑦ ᒎᓗᐃᑦ ᓯᖁᑦᑎᕐᐰᑦ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᓴᓇᔭᐅᑎᓚᐅᕐᓯᒪᔭᖏᑦ ᑐᒃᓯᐊᕐᕕᒡᔪᐊᒥ ᐊᑐᒐᒃᓴᐅᓂᐊᕐᑎᓪᓗᒋᑦ. 14ᓂᐱᑯᓁᓴᐅᑉ ᔨᕉᓴᓕᒥᐅᑦ ᐃᓄᓕᒫᖏᑦ ᑎᒍᓪᓗᒋᑦ ᐊᐅᓪᓚᕈᑎᕔᑦ, ᐊᖓᔪᖅᑳᕐᔪᐊᑉ ᕿᑐᕐᖓᓕᒫᖏᑦ, ᓯᕗᓕᕐᑎᖁᑎᖏᓪᓗ ᑲᑎᓪᓗᒋᑦ 10,000ᓚᐅᕐᐳᑦ ᑎᒍᔭᓕᒫᖏᑦ, ᓴᓇᔨᖁᑎᓕᒫᖏᓪᓗ ᓱᓇᑐᐃᓐᓇᕐᓂᒃ ᓴᕕᕋᔭᓕᕆᔩᓪᓗ ᐱᖃᑕᐅᑎᓪᓗᒋᑦ; ᑕᒪᒃᑯᐊ ᐊᔪᕐᓴᕐᑐᑦ ᑭᓯᐊᓂ ᐱᓐᖏᑕᑐᐊᕆᓪᓗᒋᑦ ᕿᒪᒃᑕᐅᑎᑉᐰᑦ.
15 #
ᐃᓯᑭᐊᓕ 17:12. ᓂᐱᑯᓁᓴᐅᑉ ᔨᕼᐅᐃᐊᑭᓐ ᑎᒍᓯᒪᓪᓗᒍ ᐊᐅᓪᓚᕈᑎᕚ ᐹᐱᓘᓂᒧᑦ; ᐊᓈᓇᖓᓗ, ᔨᕼᐅᐃᐊᑭᐅᓪᓗ ᓄᓕᐊᖏᑦ, ᐊᖓᔪᖅᑳᖁᑎᖏᓪᓗ, ᔫᑕᒥᓗ ᓯᕗᓕᕐᑎᓕᒫᑦ ᐱᖃᓯᐅᑎᓪᓗᒋᑦ, ᔨᕉᓴᓕᒥᑦ ᐊᐅᓪᓚᕈᑎᓚᐅᕐᐰᑦ ᐹᐱᓘᓂᒧᑦ. 16ᓂᐱᑯᓁᓴᐅᑉ ᐊᖑᑎᓪᓚᕆᐅᔪᓕᒫᑦ ᐹᐱᓘᓂᒧᑦ ᐊᐅᓪᓚᕈᑎᓚᐅᕐᐰᑦ ᑲᑎᓪᓗᒋᑦ 7,000, ᓴᓇᔩᓪᓗᑦ ᐱᔪᓐᓇᑦᓯᐊᕐᑐᑦ, ᓴᕕᕋᔭᓕᕆᔩᓪᓗ ᐱᔪᓐᓇᑦᓯᐊᕐᑐᑦ 1000 ᓴᓐᖏᔪᑦ ᐅᓇᑕᕈᓐᓇᕐᑐᓕᒫᑦ ᐊᐅᓪᓚᕈᑎᓚᐅᕐᐰᑦ.
17 #
ᔨᕆᒤᐊ 37:1; ᐃᓯᑭᐊᓕ 17:13. ᓂᐱᑯᓁᓴᐅᑉ ᐹᐱᓘᓂᐅᑉ ᐊᖓᔪᖅᑳᕐᔪᐊᖓᑕ ᔨᕼᐅᐃᐊᑭᐅᑉ ᐊᒃᑲᖓ ᒪᑕᓁᐊ ᐊᖓᔪᖅᑳᕐᔪᐊᓐᖑᕐᑎᑉᐹ ᔫᑕᒧᑦ ᐊᑎᖓᓗ ᐊᓯᑦᔨᕐᓗᓂᐅᒃ ᔨᑎᑬᐊᒥᒃ.
ᔨᑎᑬᐊᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒧᑦ
ᑯᕉᓂᑲ ᐂᑉᐸᖏᑦ 36:11-12; ᔨᕆᒤᐊ 52:1-3a
18 #
ᔨᕆᒤᐊ 27:1-22; 28:1-17. ᔨᑎᑬᐊ ᐊᕐᕌᒍᖃᓚᐅᕐᐳᖅ 21ᓂᒃ ᐊᖓᔪᖅᑳᕐᔪᐊᓐᖑᕐᓗᓂ ᔫᑕᒧᑦ, ᔨᕉᓴᓕᒥᓪᓗ ᐊᐅᓚᑦᓯᓚᐅᕐᐳᖅ 11ᓂᒃ ᐊᕐᕌᒍᓂᒃ. ᐊᓈᓇᖃᕐᐳᖅ ᕼᐊᒧᑕᓕᒥᒃ ᔨᕆᒤᐊᐅᑉ ᐸᓂᖓᓂᒃ ᓕᑉᓇᐅᑉ ᐃᒡᓗᒐᓴᒡᔪᐊᖏᓐᓂᑦ ᐱᓯᒪᔪᒥᒃ. 19ᐊᖓᔪᖅᑳᕐᔪᐊᖅ ᔨᑎᑬᐊ ᐊᔪᕐᑐᓕᓂᕐᒥ ᐃᓅᓚᐅᕐᐳᖅ ᐊᑕᓂᐅᑉ ᓵᖓᓂ, ᐊᖓᔪᖅᑳᕐᔪᐊᑉ ᔨᕼᐅᐃᐊᑭᐅᑉ ᐱᐅᓯᕆᓚᐅᕐᑕᖓᑐᑦ. 20#ᐃᓯᑭᐊᓕ 17:15.ᐊᑕᓂᐅᓪᓗ ᓂᓐᖓᒡᕕᒋᓚᐅᕋᒥᒋᑦ ᔨᕉᓴᓕᒥᐅᑦ ᔫᑕᒥᐅᓪᓗ ᓇᔪᕈᒪᔪᓐᓃᓚᐅᕐᐰᑦ.
ᔨᑎᑬᐊᓗ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓂᒃ ᐊᑭᕋᕐᑐᓕᓚᐅᕐᐳᖅ.
Currently Selected:
ᐊᑕᓃᑦ ᐂᑉᐸᖏᑦ 24: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
