ᐊᑕᓃᑦ ᐂᑉᐸᖏᑦ 25
25
ᔨᕉᓴᓕᐅᑉ ᐊᖓᔪᖅᑳᕐᔪᐊᖃᕈᓐᓃᕐᓂᖓ
ᑯᕉᓂᑲ ᐂᑉᐸᖏᑦ 36:13-21; ᔨᕆᒤᐊ 52:3b-11
1 #
ᔨᕆᒤᐊ 21:1-10; 34:1-5; ᐃᓯᑭᐊᓕ 24:2. ᑕᖅᑮᑦ 10ᖓᑦᑕ ᐅᓪᓗᖏᑕ 10ᖓᓐᓂ ᐊᕐᕌᒍᐃᑦ 9ᒋᓕᕐᑕᖓᓂ ᔨᑎᑬᐊᐅᑉ ᐊᖓᔪᖅᑳᕐᔪᐊᖑᕕᒋᔭᖏᓐᓂ, ᓂᐱᑯᓁᓴ ᐅᓇᑕᕐᑎᖁᑎᓕᒫᒥᓂᒃ ᐃᓚᖃᕐᓗᓂ ᐅᓇᑕᕆᐊᕐᐳᖅ ᔨᕉᓴᓕᒧᑦ, ᐃᒡᓗᒐᓴᒡᔪᐊᑦ ᐃᓗᒪᓪᓗᒋᑦ ᑕᖕᒫᕐᑎᕐᐳᑦ ᓴᐴᓗᑕᓕᐅᕐᓗᑎᒡᓗ ᐃᒡᓗᒐᓴᒡᔪᐊᑦ ᑬᕙᓪᓚᓯᒪᓪᓗᒋᑦ ᔨᑎᑬᐊ ᐊᑭᕋᕐᑐᓕᓚᐅᕐᒪᑦ ᓂᐱᑯᓁᓴᒥᒃ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓂᒃ. 2ᐃᒡᓗᒐᓴᒡᔪᐊᒥᐅᓪᓗ ᑍᒤᓕᖓᓪᓗᒋᑦ ᓱᕖᕈᑎᓯᒪᕔᑦ ᔨᑎᑬᐊᐅᑉ ᐊᖓᔪᖅᑳᕐᔪᐊᖑᓂᖏᑦᑕ ᐊᕐᕌᒍᐃᑦ 11ᖓᓄᑦ ᑎᑭᓪᓗᒍ. 3ᑕᖅᑮᑦ ᓯᑕᒪᖓᑦᑕ ᐅᓪᓗᖏᑕ 9ᒋᓕᕐᑕᖓᓂ ᐊᕐᕌᒍᒥ ᑕᕝᕙᓂᑦᓮᓐᓇᖅ, ᑳᖕᓇᕐᑐᕐᔪᐊᖃᓕᕐᐳᖅ ᐃᓄᐃᑦ ᓂᕆᔭᒃᓴᖃᕈᓐᓁᕐᓗᑎᒃ. 4#ᐃᓯᑭᐊᓕ 33:21.ᐃᒡᓗᒐᓴᒡᔪᐊᑦ ᐊᕙᓗᕐᔪᐊᖓ ᓯᖁᑦᑎᕐᓗᒍ ᐊᖕᒪᕐᐹᑦ, ᑲᐅᓪᑎᐊᒥᐅᓄᑦ ᐃᒡᓗᒐᓴᒡᔪᐊᑦ ᐃᓗᒪᔭᐅᒐᓗᐊᕐᑎᓪᓗᒋᑦ, ᐅᓇᑕᕐᑎᓕᒫᑦ ᐅᓐᓄᐊᒃᑯᑦ ᐊᓂᐅᖅᑲᕐᐳᑦ ᐊᖓᔪᖅᑳᕐᔪᐊᒧᑦ ᐱᕈᕐᓰᕕᖁᑕᐅᓂᕋᕐᑕᐅᔪᖅ ᐊᖅᑯᑎᒋᓪᓗᒍ. ᐊᕙᓗᕐᔪᐊᑉ ᒪᕐᕉᓕᖅᑲᖓᓂᖓᑕ ᐊᑯᓐᓂᖓᒎᕐᓗᑎᒃ, ᔪᐊᕐᑕᓂᐅᑦ ᓇᕐᓴᖓ ᑐᕌᕐᓗᒍ ᕿᒫᕗᑦ. 5ᑲᐅᓪᑎᐊᒥᐅᓪᓕ ᐅᓇᑕᕐᑎᖁᑎᖏᓐᓄᑦ ᐊᖓᔪᖅᑳᕐᔪᐊᖅ ᔨᑎᑬᐊ ᐅᓇᑕᕐᑎᖁᑎᖏᓪᓗ ᒪᓕᒃᑕᐅᒐᒥᒃ ᐊᖑᔭᐅᓪᓗᑎᒃ ᑎᒍᔭᐅᕗᑦ ᔨᕆᑰᑉ ᓴᓂᐊᓂ; ᐅᓇᑕᕐᑎᖁᑎᖏᓪᓗ ᓇᒧᑐᐃᓐᓇᖅ ᐊᑦᑎᕐᐳᑦ. 6ᔨᑎᑬᐊ ᐋᑕᐅᕗᖅ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓄᑦ ᓂᐱᑯᓁᓴᒧᑦ, ᑖᓐᓇ ᐃᒡᓗᒐᓴᖕᓃᑉᐳᖅ ᕆᑉᓚᒥᒃ ᐊᑎᖃᕐᑐᓂ, ᑕᕝᕙᓂ ᓂᐱᑯᓁᓴᐅᑉ ᐃᖅᑲᕐᑐᕐᐹ ᓱᒋᐊᕋᒃᓴᕈᕐᑎᓪᓗᒍ. 7#ᐃᓯᑭᐊᓕ 12:13.ᔨᑎᑬᐊ ᑕᑯᓐᓇᕐᑎᓪᓗᒍ ᐃᕐᓂᖏᑦ ᑐᖁᕋᕐᑕᐅᕗᑦ, ᓂᐱᑯᓁᓴᐅᓪᓗ ᔨᑎᑬᐊᐅᑉ ᐃᔨᖏᒃ ᖄᕐᑕᐅᑎᑉᐰᒃ, ᐊᕐᓵᕐᑑᔭᓄᓪᓗ ᐊᑦᑐᖏᕐᓱᕐᓗᒍ, ᐹᐱᓘᓂᒧᑦ ᐊᐅᓪᓚᕈᑎᕚ.
ᑐᒃᓯᐊᕐᕕᒡᔪᐊᑉ ᓯᖁᑦᑎᕐᑕᐅᓂᖓ
ᔨᕆᒤᐊ 52:12-33
8ᑕᖅᑮᑦ ᑕᓪᓕᒪᖓᑦᑕ ᐅᓪᓗᖏᑕ 7ᖓᓐᓂ ᐊᕐᕌᒍᐃᑦ 19ᒋᓕᕐᑕᖓᓐᓂ ᓂᐱᑯᓁᓴᐅᑉ ᐊᖓᔪᖅᑳᕐᔪᐊᖑᕕᒋᔭᖏᓐᓂ ᐹᐱᓘᓂᒥᐅᓄᑦ, ᓂᐳᔭᕋᑕᓐ ᐅᓇᑕᕐᑎᖁᑎᖏᑕ ᐊᖓᔪᖅᑳᖓᑦ ᔨᕉᓴᓕᒧᐊᕐᐳᖅ. 9#ᐊᑕᓃᑦ ᓯᕗᓪᓖᑦ 9:8.ᐊᑕᓂᐅᑉ ᐃᒡᓗᖓ ᐃᑯᐊᓪᓚᒃᐹ, ᐊᖓᔪᖅᑳᕐᔪᐊᓪᓗ ᐃᒡᓗᖓ, ᐃᒡᓗᓕᒫᓪᓗ ᔨᕉᓴᓕᒦᑦᑐᑦ; ᐱᒻᒪᕆᓕᒫᓪᓗ ᐃᒡᓗᖏᑦ ᐃᑯᐊᓪᓚᒃᑕᐅᕗᑦ. 10ᑲᐅᓪᑎᐊᒥᐅᑦ ᐅᓇᑕᕐᑎᖁᑎᓕᒫᖏᓪᓗ, ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓂᒃ ᓴᐳᓐᓂᐊᕐᑏᑦ, ᔨᕉᓴᓕᐅᑉ ᐊᕙᓗᕐᔪᐊᖓᓂᒃ ᓯᖁᑦᑎᕆᕗᑦ. 11ᑕᕝᕙ ᓂᐳᔭᕋᑕᓐ ᓴᐳᓐᓂᐊᕐᑎᓄᑦ ᐊᖓᔪᖅᑳᖑᔫᑉ ᐃᓄᐃᑦ ᐃᒡᓗᒐᓴᖕᓂ ᐊᒥᐊᒃᑰᓯᒪᔪᑦ ᑎᒍᓪᓗᒋᑦ ᐹᐱᓘᓂᒧᑦ ᐊᐅᓚᕈᑎᕔᑦ, ᓴᓇᔪᓐᓇᕐᑐᑦ ᐊᒥᐊᒃᑯᕕᓂᖏᑦ ᐹᐱᓘᓂᒥᐅᓄᓪᓗ ᐃᓚᒋᓕᐅᑎᓂᑰᓕᕐᑐᑦ. 12ᐃᓄᐃᓪᓕ ᐊᔪᕐᓴᕐᓂᕐᐹᖑᔪᑦ ᐃᓚᖏᓐᓂᒃ ᓄᓇᖁᑎᖃᖏᓐᓂᖏᓪᓗ ᕿᒪᒃᑕᐅᑎᑉᐰᑦ ᔫᑕᒥ, ᐸᐅᕐᖓᓂᒃ ᐱᕈᕐᓰᕕᖕᓂᓗ ᐱᕈᕐᓯᕐᕕᓕᕆᔨᓐᖑᕐᑎᓪᓗᒋᑦ.
13 #
ᐊᑕᓃᑦ ᓯᕗᓪᓖᑦ 7:15-26; ᑯᕉᓂᑲ ᐂᑉᐸᖏᑦ 3:15-17;
ᐊᑕᓃᑦ ᓯᕗᓪᓖᑦ 7:23-26; ᑯᕉᓂᑲ ᐂᑉᐸᖏᑦ 4:2-5. ᑲᐅᓪᑎᐊᒥᐅᑦ ᓱᑳᓗᖕᓂᒃ ᑲᓐᓄᔭᓂᒃ ᐊᑕᓂᐅᑉ ᐃᒡᓗᖓᓃᑦᑐᓂᒃ, ᑬᓪᓗᐊᒐᓂᒡᓗ ᓯᖁᑦᑎᕆᕗᑦ, ᐃᒪᖃᐅᑎᕐᔪᐊᖅ ᑲᓐᓄᔭᖅ ᐱᖃᓯᐅᑎᓪᓗᒍ ᐊᑕᓂᐅᑉ ᐃᒡᓗᖓᓃᑦᑐᖅ, ᐊᓯᖏᓪᓗ ᑲᓐᓄᔧᑦ ᐹᐱᓘᓂᒧᑦ ᐊᐅᓪᓚᕈᑎᕔᑦ. 14#ᐊᑕᓃᑦ ᓯᕗᓪᓖᑦ 7:45; ᑯᕉᓂᑲ ᐂᑉᐸᖏᑦ 4:16.ᑎᒍᓯᓚᐅᕆᕗᑦ ᐳᐊᕐᕆᑎᐅᔭᓂᒃ, ᐊᕐᔭᒃᑯᕕᖕᓂᒃ ᑐᓂᕐᕈᓯᕐᕕᐅᑉ ᐊᕐᔭᓕᓃᔭᕐᕕᖏᓐᓂᒃ ᖃᐅᒻᒪᖁᑏᓪᓗ ᓇᐸᕕᖏᓐᓂᒃ, ᐴᒍᑕᕐᓂᒡᓗ ᐊᐅᒥᒃ ᑲᑎᕐᓱᐃᑦᔪᑎᐅᕙᒃᑐᓂᒃ, ᑎᐱᑦᓯᐊᕆᒃᑐᒥᒡᓗ ᐳᔫᕐᑎᑦᓯᕕᐅᖃᑦᑕᕐᑐᑦ, ᐅᓄᕐᑐᓪᓗ ᑲᓐᓄᔭᒥᑦ ᓴᓇᓯᒪᔪᓕᒫᑦ ᑐᒃᓯᐊᕐᕕᒡᔪᐊᕐᒦᑦᑐᑦ ᐊᐅᓪᓚᕈᑎᕔᑦ. 15ᓱᓇᑐᐃᓐᓁᑦ ᒎᓘᐃᑦ ᓯᐅᓪᕕᕇᓪᓗ, ᐴᒍᑍᑦ#25:15 ᐸᓕᐊᑦ ᓵᑦᑐᔮᓪᓗ ᐊᐅᒫᓗᖕᓂᒃ ᐆᓇᕐᑐᓂᒃ ᐊᒡᔭᕐᓯᑦᔪᑕᐅᕙᒃᑐᑦ. 16ᒪᕐᕉᒡᓗ ᓱᑳᒃ, ᑬᓪᓗᐊᒊᓪᓗ, ᐃᒪᖃᐅᑎᕐᔪᐊᕐᓗ ᑲᓐᓄᔭᓕᒫᑦ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᓴᓇᔭᐅᑎᓯᒪᔭᕕᓂᖏᑦ ᑐᒃᓯᐊᕐᕕᒡᔪᐊᕐᒥ ᐊᑐᕐᑕᐅᔪᒃᓴᐅᖁᓪᓗᒋᑦ, ᐅᖁᒤᓐᓂᓂᐊᕐᑕᐅᒋᐊᒥᒃ ᐅᖁᒤᓗᐊᕐᑐᓪᓘᓐᓃᑦ. 17ᑖᒃᑯᐊᒃ ᓱᑲᐅᔮᒃ ᒪᕐᕉᒃ ᐊᑦᔨᒌᑦᓯᐊᓚᐅᕐᐴᒃ ᐊᖏᓂᖏᒃ, ᑕᒪᕐᒥᒃ ᐳᕐᑐᓂᖃᕐᐴᒃ 27ᓂᒃ ᐃᑎᒐᖕᓂᒃ; ᖄᖓᒍᑦ ᓴᓇᓐᖑᐊᕐᕕᒋᓯᒪᓪᓗᑎᒃ ᑲᓐᓄᔧᓐᓇᕐᒥᒃ ᐳᕐᑐᓂᖃᕐᒥᔫᖕᓂᒃ ᐃᑎᒊᑦ ᓯᑕᒪᑦ ᕿᑎᖅᑲᒥᒡᓗ, ᑲᓐᓄᔭᐅᓂᖏᒃ ᓴᓇᓐᖑᐊᕐᕕᒋᓯᒪᓪᓗᑎᒃ ᑕᕐᓯᕐᓱᕐᓯᒪᔪᑦ ᑕᑯᒥᓇᕐᓯᓕᕐᓯᒪᔪᓂᒃ.
ᔫᑕᒥᐅᑦ ᐊᐅᓪᓚᕈᑦᔭᐅᓂᖏᑦ ᐹᐱᓘᓂᒧᑦ
ᔨᕆᒤᐊ 52:24-27
18ᓂᐳᓴᕌᑖᓐᓗ ᐅᓇᑕᕐᑎᓄᑦ ᐊᖓᔪᖅᑳᖅ, ᑎᒍᓯᓚᐅᕆᕗᖅ ᓯᕅᐊᒥᒃ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᒥᒃ, ᑐᖓᓕᖓᓂᒡᓗ ᔨᐸᓁᐊᒥᒃ, ᐊᓯᖏᓐᓂᒡᓗ ᑐᒃᓯᐊᕐᕕᒡᔪᐊᕐᒥ ᐊᖓᔪᖅᑳᖑᖃᑕᐅᔪᓂᒃ ᐱᖓᓱᓂᒃ. 19ᐃᒡᓗᒐᓴᒡᔪᐊᓂᑦ ᑎᒍᓯᒋᓪᓗᓂ ᐅᓇᑕᕐᑎᓄᑦ ᐊᖓᔪᖅᑳᖑᖃᑦᑕᕐᓯᒪᔪᒥᒃ, ᑕᓪᓕᒪᓂᒡᓗ ᐊᖓᔪᖅᑳᕐᔪᐊᑉ ᐃᓱᒪᓯᐅᒐᖏᓐᓂᒃ ᐃᒡᓗᒐᓴᒡᔪᐊᓂᑦ ᓅᓚᐅᕐᓂᖏᑦᑐᓂᒃ; ᐅᓇᑕᕐᑏᓪᓗ ᐊᖓᔪᖅᑳᒻᒪᕆᖓᑕ ᑐᖓᓕᖓᓂᒃ, ᐅᓇᑕᕐᑏᑦ ᐊᒡᓚᖁᑎᖏᓐᓂᒃ ᑲᒪᔨᒥᒃ; 60ᒋᐊᓪᓚᓂᒡᓗ ᐊᖑᑎᓂᒃ ᐱᒻᒪᕆᐅᖕᒥᔪᓂᒃ. 20ᓂᐳᔭᕋᑕᐅᑉ ᑖᒃᑯᐊᓕᒫᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐋᓚᐅᕐᐰᑦ ᐃᒡᓗᒐᓴᖕᓂ ᕆᑉᓚᒦᑦᑐᒧᑦ. 21ᓄᓇᒥ ᕆᑉᓚᒥ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑕ ᐋᓐᓂᕐᓯᕐᑕᐅᑎᓚᐅᕐᓗᓂᒋᑦ ᑐᖁᕋᕐᑕᐅᑎᑉᐰᑦ ᕼᐊᒫᑎᒥ ᓄᓇᒥ.
ᑕᕝᕙ ᔫᑕᒥᐅᑦ ᐊᐅᓪᓚᕈᑦᔭᐅᓚᐅᕐᐳᑦ ᓄᓇᒋᓚᐅᕐᓯᒪᓐᖏᑕᒥᖕᓂᒃ ᓄᓇᑖᕐᑎᑕᐅᓪᓗᑎᒃ.
ᒐᑕᓔᐊᐅᑉ ᐊᖓᔪᖅᑳᕐᔪᐊᒥᒃ ᑭᒡᒐᕐᑐᕐᑎᐅᓂᖓ ᔫᑕᒥ
ᔨᕆᒤᐊ 40:7-9; 41:1-3
22 #
ᔨᕆᒤᐊ 40:7-9. ᓂᐱᑯᓁᓴᐅᑉ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᒋᑕᓔᐊ, ᐊᕼᐂᑲᒥᐅᑉ ᐃᕐᓂᖓ ᓴᕙᓂᐅᑉ ᐃᕐᖑᑕᖓ ᐊᐅᓚᑦᓯᔨᓐᖑᕐᑎᑉᐹ ᔫᑕᒥᐅᓄᑦ, ᐊᐅᓪᓚᕈᑦᔭᐅᓚᐅᖏᑦᑐᓄᑦ. 23ᔫᑕᒥᐅᑦ ᐅᓇᑕᕐᑎᖁᑎᖏᑕ ᐊᖓᔪᖅᑳᖏᑦ ᑐᓴᕋᒥᒃ ᒋᑕᓔᐊᐅᑉ ᐹᐱᓘᓂᐅᑉ ᐊᖓᔪᖅᑳᕐᔪᐊᖓᑕ ᐊᐅᓚᑦᓯᔨᓐᖑᕐᑎᒻᒪᒍ ᐂᕕᒋᕚᑦ, ᒥᔅᐸᒦᑦᑐᖅ, ᐅᑯᐊᖑᓪᓗᑎᒃ, ᐃᓯᒥᐅᓕ ᓂᑕᓁᐊᐅᑉ ᐃᕐᓂᖓ, ᔪᕼᐋᓇᓐ ᑲᕆᐊᑉ ᐃᕐᓂᖓ, ᓯᕅᐊᓗ ᑖᓐᕼᐅᒥᑎᐅᑉ ᐃᕐᓂᖓ ᓂᑐᐸᕼᐊᒥᐅᖅ, ᔭ-ᐊᔭᓁᐊᓗ ᒫᑲᑍᑎᒥᐅᑕᐅᑉ ᐃᕐᓂᖓ. 24ᒋᑕᓔᐊᐅᑉ ᐅᖃᐅᑎᕔᑦ, “ᐅᖃᐅᓯᒃᑲ ᓱᓕᔪᕆᓯᐅᒃ, ᓯᕘᕋᔭᕆᐊᖃᓐᖏᓚᓯ ᑲᐅᓪᑎᐊᒥᐅᑦ ᐊᖓᔪᖅᑳᖏᓐᓂᒃ; ᑕᒫᓂ ᓄᓇᑖᕈᓐᓇᕐᐳᓯ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ ᑭᒡᒐᕐᑐᑦᓯᐊᕐᓗᒍ ᐱᒍᑦᓯ, ᑕᕝᕙ ᖃᓄᐃᖏᑦᓯᐊᕐᓂᐊᕐᐳᓯ.” 25#ᔨᕆᒤᐊ 41:1-3.ᑕᖅᑮᑦ 7ᖓᓐᓂ ᐊᕐᕌᒍᒥ ᑕᕝᕙᓂ, ᐃᓯᒥᐅᓕ ᓂᑕᓁᐊᐅᑉ ᐃᕐᓂᖓ, ᐃᓔᓴᒪᐅᑉ ᐃᕐᖑᑕᖓ, ᐊᖓᔪᖅᑳᕐᔪᐊᓂᒃ ᓇᖕᒥᓂᖅ ᐃᓚᖃᕐᑐᖅ, ᒥᔅᐸᒧᐊᕐᐳᖅ ᐊᖑᑎᓂᒃ ᖁᓕᓂᒃ ᐃᓚᖃᕐᓗᓂ ᒋᑕᓔᐊ ᑲᑐᑎᓪᓗᒍ ᑐᖁᑉᐹᑦ, ᐃᓴᕆᐊᓕᒥᐅᑦ ᑲᐅᓪᑎᐊᒥᐅᓪᓗ ᑕᕝᕙᓃᖃᑎᒋᔭᖏᑦ ᑐᖁᕋᕐᑕᐅᑎᒃᑭᕔᑦ. 26#ᔨᕆᒤᐊ 43:5-7.ᐃᓴᕆᐊᓕᒥᐅᓕᒫᑦ ᐊᒃᓗᔪᑦ ᐊᒃᓗᐃᑦᑐᓪᓗ, ᐅᓇᑕᕐᑏᓪᓗ ᐊᖓᔪᖅᑳᖏᑦ ᓄᓇᒥᖕᓂᑦ ᐊᐅᓪᓚᕐᐳᑦ ᐄᑦᔨᑉᑎᒧᑦ ᐊᐅᓪᓛᕐᓗᑎᒃ, ᑲᐅᓪᑎᐊᒥᐅᓂᒃ ᓯᕘᕋᓕᕋᒥᒃ.
ᔨᕼᐅᐃᐊᑭᐅᑉ ᑎᒍᔭᐅᓯᒪᕕᖕᒥᓂᑦ ᐊᓂᑎᑕᐅᓂᖓ
ᔨᕆᒤᐊ 52:31-34
27ᐊᕐᕌᒍᒥ ᐊᐅᓪᓚᕈᑦᔭᐅᓯᒪᓂᖏᑕ 37ᒋᓕᕐᑕᖓᓐᓂ ᔨᕼᐅᐃᐊᑭᓐ ᔫᑕᐅᑉ ᐊᖓᔪᖅᑳᕐᔪᐊᖓ, ᑕᖅᑮᑦ 12ᖓᑦᑕ ᐅᓪᓗᖏᑕ 27ᖓᓐᓂ, ᐃᕗᓪᒥᕈᑖᒃ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ, ᐊᖓᔪᖅᑳᕐᔪᐊᓐᖑᕋᒥ ᔨᕼᐅᐃᐊᑭᓐ ᔫᑕᒥᐅᑦ ᐊᖓᔪᖅᑳᕐᔪᐊᖓᑦ ᐱᑦᓯᐊᕐᕕᒋᓚᐅᕐᐹ ᑎᒍᔭᐅᓯᒪᕕᖕᒥᓪᓗ ᐊᓂᑎᓪᓗᓂᐅᒃ. 28ᐃᕗᓪᒧᕈᑖᒃ ᔨᕼᐅᐃᐊᑭᓐ ᐱᑦᓯᐊᕐᕕᒋᒐᒥᐅᒃ ᐃᓂᑖᕐᑎᑉᐹ ᐹᐱᓘᓂᒥ ᐊᖓᔪᖅᑳᕐᔪᖄᖁᑎᖏᑕ ᐃᓂᖏᓐᓂᑦ ᐱᓪᓚᕆᐅᓂᕐᓴᒥ. 29ᔨᕼᐅᐃᐊᑭᓐ ᐊᓐᓄᕌᓂ ᑎᒍᔭᐅᓯᒪᔪᕐᓯᐅᑏᑦ ᐲᕈᓐᓇᕐᓯᓚᐅᕐᐰᑦ. ᖃᐅᑕᒫᓪᓗ ᐊᖓᔪᖅᑳᕐᔪᐊᑉ ᓂᕆᕕᒋᕙᒃᑕᖓᓂ ᓂᕆᖃᑕᐅᖏᓐᓇᕐᐸᓕᓚᐅᕐᐳᖅ ᐃᓅᓂᓕᒫᒥᓂ; 30ᐱᓇᓱᐊᕐᓂᕐᒥᓄᓪᓗ ᐊᑭᓕᕐᑕᐅᖃᑦᑕᓕᓚᐅᕐᐳᖅ, ᑲᔪᓯᑦᓯᐊᖏᓐᓇᕐᑐᒥᒃ ᑐᓂᔭᐅᖃᑦᑕᓕᓚᐅᕐᐳᖅ ᐊᖓᔪᖅᑳᕐᔪᐊᕐᒧᑦ, ᖃᐅᑕᒫᑦ ᐊᑭᓕᕐᑕᐅᒍᑎᒋᔭᒥᓂᒃ, ᐃᓅᓂᓕᒫᒥᓂ.
Currently Selected:
ᐊᑕᓃᑦ ᐂᑉᐸᖏᑦ 25: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
