ᐊᑕᓃᑦ ᐂᑉᐸᖏᑦ 23
23
ᔫᓮᐊᐅᑉ ᒎᑎᓐᖑᐊᓄᑦ ᑐᒃᓯᐊᖃᑦᑕᕐᓂᕐᒥᒃ ᓄᖅᑲᕐᑎᑦᓯᓂᖓ
ᑯᕉᓂᑲ ᐂᑉᐸᖏᑦ 34:3-7,29-33
1ᐊᖓᔪᖅᑳᕐᔪᐊᑉ ᔫᓮᐊᐅᑉ ᔫᑕᒥᐅᑉ ᐊᖓᔪᖅᑳᓕᒫᖏᑦ ᔨᕉᓴᓕᒥᐅᓪᓗ ᑲᑎᖃᑎᒋᔪᒪᕔᑦ, 2ᐊᖓᔪᖅᑳᕐᔪᐊᕐᓗ ᐊᑕᓂᐅᑉ ᐃᒡᓗᖓᓄᐊᕐᐳᖅ, ᐊᖑᑎᓕᒫᑦ ᔫᑕᒥᐅᑦ ᐃᓚᒋᓪᓗᒋᑦ ᔨᕉᓴᓕᒥᓗ ᓄᓇᖃᕐᑐᓕᒫᑦ, ᑐᓂᕐᕈᓯᕐᑎᑦᓯᔩᓪᓗ, ᒎᑎᐅᓪᓗ ᐅᖃᕐᑎᖏᑦ, ᐃᓄᓕᒫᑦ ᐊᒃᓗᔪᑦ ᐊᒃᓗᐃᑦᑐᓪᓗ ᐃᓚᒋᓪᓗᒋᑦ; ᑖᒃᑯᐊᓗ ᓵᖏᓐᓂ ᐊᖓᔪᖅᑳᕐᔪᐊᑉ ᓂᐱᖅᑯᕐᑐᓪᓗᓂ ᐊᒡᓔᑦ ᐊᖏᖃᑎᒌᖕᓂᕐᒥᒃ ᐅᖃᐅᓯᖃᕐᑐᑦ ᐅᖃᓕᒫᕐᐰᑦ ᐊᑕᓂᐅᑉ ᐃᒡᓗᖓᓂᑦ ᓇᓂᔭᐅᓚᐅᕐᑐᑦ. 3ᐊᖓᔪᖅᑳᕐᔪᐊᕐᓗ ᓱᑲᕐᔪᐊᑉ ᓴᓂᐊᓂ ᓇᖏᕐᓗᓂ ᐊᑕᓂᐅᑉ ᓵᖓᓂ, ᐊᖏᖃᑎᒌᖕᓂᖅ ᓄᑕᐅᓯᓕᕐᐹ ᐊᑕᓂᖅ ᒪᓕᒡᑕᐅᖁᓪᓗᒍ ᐱᓂᐊᕐᑕᐅᖁᔭᖏᑦ ᐱᖁᔭᖏᓐᓂᒡᓗ ᓈᓚᑦᓯᐊᕐᑕᐅᖁᓪᓗᒋᑦ ᐆᒻᒪᑎᒥᓄᑦ ᑕᕐᓂᕐᒥᓄᓪᓗ ᑕᒤᓐᓄᑦ, ᐊᖏᖃᑎᒌᒃᓯᒪᓂᐅᓪᓗ ᐱᐅᓯᐅᖁᔭᖏᑦ, ᐱᓂᐊᕈᑎᒋᓗᒋᑦ ᐃᓅᓯᖃᕈᒪᓪᓗᓂ ᐊᒡᓚᖕᓂ ᑎᑎᕋᕐᑕᐅᓯᒪᔪᑦ, ᒪᓕᒡᓗᒋᑦ; ᐃᓄᓕᒫᑦᑕᐅᒃ ᐊᖏᖃᑕᐅᕗᑦ ᑍᒪᒃ ᐱᓂᐊᖃᑕᐅᔪᒪᓪᓗᑎᒃ. 4#ᐊᑕᓃᑦ ᐂᑉᐸᖏᑦ 21:3; ᑯᕉᓂᑲ ᐂᑉᐸᖏᑦ 33:3.ᑕᕝᕙ ᐊᖓᔪᖅᑳᕐᔪᐊᖅ ᑎᓕᓯᕗᖅ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᓐᓂᒃ ᕼᐃᓪᑬᐊᒥᒃ ᐃᑲᔪᕐᑎᖏᓐᓂᒡᓗ, ᑐᒃᓯᐊᕐᕕᒡᔪᐊᓪᓗ ᐃᑎᕐᑕᕐᕕᖓᓂ ᖃᐅᔨᓴᕐᑎᐅᔪᓕᒫᑦ ᒎᑎᓐᖑᐊᒧᑦ ᐰᓕᒧᑦ ᑐᒃᓯᐊᕐᓗᑎᒃ ᐊᑐᕐᑕᐅᖃᑦᑕᕐᑐᓕᒫᑦ, ᒎᑎᓐᖑᐊᒧᓪᓗ ᐊᓯᕋᒧᑦ, ᐅᓪᓗᕆᐊᓄᓪᓗ, ᑕᒪᒃᑯᐊᓕᒫᑦ ᐊᖓᔪᖅᑳᕐᔪᐊᑉ ᐃᑯᐊᓪᓚᒃᑕᐅᑎᑉᐰᑦ ᐃᒡᓗᒐᓮᑦ ᔨᕉᓴᓕᐅᑉ ᓯᓚᑖᓂ ᓇᕐᓴᒥ ᑭᑐᕌᓂᒥᒃ ᑍᔭᐅᔪᒥ ᐊᕐᔭᓕᓂᖏᓪᓗ ᐱᑎᓕᒧᑦ ᐋᑕᐅᑎᓪᓗᓂᒋᑦ. 5ᑐᓂᕐᕈᓯᕐᑎᑦᓯᔩᑦ ᔫᑕᒥᐅᓄᑦ ᐊᖓᔪᖅᑳᕐᔪᐊᖑᖃᑦᑕᕐᓯᒪᔪᑦ ᑐᓂᕐᕈᓯᕐᑎᑦᓯᔨᓐᖑᕐᑎᖃᑦᑕᕐᑕᕕᓂᖏᑦ ᒎᑎᑐᐊᒥᒃ ᒎᑎᖃᖏᑦᑐᑦ ᑐᓂᕐᕈᓯᕐᕕᖏᓐᓂ ᔫᑕᒦᑦᑐᓂ ᔨᕉᓴᓕᐅᓪᓗ ᖃᓂᒋᔮᖓᓃᑦᑐᓕᒫᑦ ᓄᖅᑲᕐᑎᓪᓗᒋᑦ ᑐᓂᕐᕈᓯᕐᑎᑦᓯᔨᐅᔪᓐᓃᕐᑎᑉᐰᑦ, ᑐᓂᕐᕈᓯᕐᑎᑦᓯᔨᐅᓪᓗᑎᒃ ᐰᓕᒧᑦ, ᓯᕿᓂᕐᒧᓪᓗ, ᑕᖅᑭᕐᒧᑦ ᓯᓚᕐᔪᐊᓄᓪᓗ, ᐅᓪᓗᕆᐊᓄᓪᓗ ᐃᑯᐊᓚᑎᑦᓯᓪᓗᑎᒃ ᑐᓂᕐᕈᓯᕐᓂᕐᒥᒃ ᐱᓇᓱᐊᖃᑦᑕᕐᓯᒪᔪᓕᒫᑦ. 6ᐊᑕᓂᐅᑉ ᐃᒡᓗᖓᓂᑦ ᐲᕐᑕᐅᑎᑉᐹ ᒎᑎᓐᖑᐊᖅ ᐊᓯᕋ ᐊᑕᓂᐅᑉ ᐃᒡᓗᖓᓃᑦᑐᖅ ᓴᓇᓐᖑᐊᕐᓯᒪᔪᖅ ᐃᒡᓗᒐᓴᒡᔪᐊᑉ ᔨᕉᓴᓕᐅᑉ ᓯᓚᑖᓄᑦ ᐊᐅᓪᓚᕈᑎᓪᓗᒍ ᑭᑐᕌᓂᐅᑉ ᓇᕐᓴᖓᓂ ᐃᑯᐊᓪᓚᒃᐹ, ᐃᑯᐊᓚᔭᕇᕐᒪᑦ ᑲᓱᐊᕐᓗᒍ ᓯᖃᓪᓕᕚ ᐊᕐᔭᓕᓂᓐᖑᕐᑎᓪᓗᒍ, ᓯᐊᒻᒪᕐᑎᑉᐹᓗ ᐃᓗᕕᕐᓯᕕᐅᖃᑦᑕᕐᑐᒧᑦ. 7ᐊᑕᓂᐅᓪᓗ ᐃᒡᓗᖓᓂᑦ ᐃᓚᖓᓂ ᐃᒡᓗᕈᓰᑦ ᐲᔭᕐᑕᐅᑎᑉᐰᑦ ᑮᓇᐅᔭᓕᐅᕈᑎᒋᓪᓗᒍ ᐊᖑᓐᓂᐊᕐᑎᓄᑦ ᐃᓂᒋᔭᐅᖃᑦᑕᕐᑐᕕᓃᑦ, ᑕᕝᕙᓂᓗ ᒎᑎᓐᖑᐊᒧᑦ ᐊᓯᕋᒧᑦ ᑐᒃᓯᐊᕐᑐᕐᓯᐅᑎᓂᒃ ᐊᑐᕐᑕᐅᖃᑦᑕᕐᑐᓂᒃ ᐊᕐᓁᑦ ᐊᓐᓄᕌᓕᐅᕐᕕᖏᑦ ᐲᔭᕆᕔᑦ. 8ᔫᓮᐊᐅᑉ ᑐᓂᕐᕈᓯᕐᑎᑦᓯᔨᒋᔭᐅᔪᓕᒫᑦ ᔫᑕᐅᑉ ᓄᓇᓕᖏᓐᓂᑦ ᑲᑎᕐᓱᕐᐰᑦ, ᑐᒃᓯᐊᕐᕕᒋᔭᐅᖃᑦᑕᕐᑐᓪᓗ ᒋᐸᒥᐅᓂᑦ ᐱᐊᕐᓯᐸᒥᐅᑦ ᑎᑭᓪᓗᒋᑦ ᐊᑐᕐᑕᐅᔪᓐᓁᓪᓕᑎᐰᑦ; ᑐᓂᕐᕈᓯᕐᑎᑦᓯᔨᓄᑦ ᑐᓂᕐᕈᓯᕈᑎᓂᒃ ᐃᑯᐊᓚᑦᓯᕕᐅᖃᑦᑕᕐᒪᑕ, ᑐᒃᓯᐊᕕᐅᖃᑦᑕᕐᑐᓕᒫᑦ ᓯᖁᑦᑎᕐᑕᐅᑎᑉᐰᑦ ᔮᓱᐊᑉ ᐃᑎᕐᑕᕐᕕᖁᑎᖓᑕ ᓴᓂᐊᓃᑦᑐᑦ ᐃᒡᓗᒐᓴᒡᔪᐊᑉ ᐊᐅᓚᑦᓯᔨᖓᑦᑕ ᐃᒡᓗᒐᓴᒡᔪᐊᓄᑦ ᐃᑎᕆᐊᕐᕕᐅᑉ ᓴᐅᒥᐊᓃᑦᑐᑦ. 9ᑐᓂᕐᕈᓯᕐᑎᑦᓯᔩᓪᓕ ᒎᑎᓐᖑᐊᓄᑦ ᑐᓂᕐᕈᓯᕆᐊᕐᑐᖃᑦᑕᓚᐅᓐᖏᓚᑦ ᐊᑕᓂᐅᑉ ᑐᓂᕐᕈᓯᕐᕕᖁᑎᖓᓂ ᔨᕉᓴᓕᒥ, ᑭᓯᐊᓂᓕ ᑐᓂᕐᕈᓯᕐᑎᑦᓯᔨᓄᑦ ᓂᕆᖃᑕᐅᖃᑦᑕᓚᐅᕐᐳᑦ ᓂᐊᖁᔭᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ.
10 #
ᔨᕆᒤᐊ 7:31; 19:1-6; 32:35;
ᒨᓯᓯ ᐱᖓᔪᖏᑦ 18:21. ᑐᐱᑎᐅᑉ ᑐᒃᓯᐊᕐᕕᒋᔭᐅᔪᓐᓁᓪᓕᑎᑉᐹ ᓇᕐᓴᒦᑦᑐᖅ ᕼᐃᓇᓂᒥᒃ ᑍᔭᐅᔪᒥ, ᑭᓇᓕᒫᖅ ᐃᕐᓂᕐᒥᓂᒃ ᐸᓂᖕᒥᓂᒡᓘᓐᓃᑦ ᑐᓂᕐᕈᓯᖃᑦᑕᕈᓐᓁᖁᓪᓗᒋᑦ ᐃᑯᐊᓚᔪᒥ ᒧᓕᑭᒧᑦ. 11ᔫᓮᐊᐅᑉ ᕿᒻᒥᕐᔪᐊᑦ ᐲᔭᕐᑕᐅᑎᒃᑭᕔᑦ ᔫᑕᐅᑉ ᐊᖓᔪᖅᑳᕐᔪᐊᖏᑕ ᓴᓂᕐᕙᒃᓯᒪᔭᕕᓂᖏᑦ ᓯᕿᓂᕐᒧᑦ ᑐᕌᖓᓪᓗᑎᒃ ᑐᓂᔭᐅᓯᒪᔪᑦ, ᐊᑕᓂᐅᑉ ᐃᒡᓗᖓᑕ ᐃᑎᕆᐊᕐᕕᖓᓂ ᐃᓂᖃᕐᑐᑦ, ᓁᑕᓂ-ᒥᓕᑭᐅᑉ ᐃᒡᓗᕈᓯᖓᑕ ᓴᓂᐊᓂ, ᐊᖓᔪᖅᑳᖑᔫᑉ, ᕿᒧᒃᓯᐅᑏᓪᓗᑕᐅᖅ ᐊᒃᓴᓗᐊᓖᑦ ᓯᕿᓂᕐᒧᑦ ᑐᕌᖓᓪᓗᑎᒃ ᑐᓂᔭᐅᓯᒪᔪᑦ ᐃᑯᐊᓪᓚᒃᑕᐅᑎᒃᑭᕔᑦ. 12#ᐊᑕᓃᑦ ᐂᑉᐸᖏᑦ 21:5; ᑯᕉᓂᑲ ᐂᑉᐸᖏᑦ 33:5.ᑐᓂᕐᕈᓯᕐᕖᓪᓗ ᓯᖁᑦᑎᕐᑕᐅᑎᑉᐰᑦ ᔫᑕᐅᑉ ᐊᖓᔪᖅᑳᕐᔪᐊᖏᑕ ᓇᑉᐸᕐᑕᐅᑎᑕᕕᓂᖏᑦ ᐂᕼᐊᓯᐅᑉ ᐃᒡᓗᖃᕐᕕᖓᑕ ᖁᓛᖓᓃᑦᑑᑉ ᓴᓂᐊᓂ ᐃᓂᖃᕐᑐᑦ, ᒫᓇᓯᐅᓪᓗ ᑐᓂᕐᕈᓯᕐᕕᓕᐊᕕᓂᖏᒃ ᐊᑕᓂᐅᑉ ᐃᒡᓗᖓᑕ ᓯᓚᓪᓕᖏᖕᓂ, ᓯᖁᑦᑎᕐᓗᒋᒃ ᐃᒋᑕᐅᑎᑉᐰᑦ ᓇᕐᓴᒧᑦ ᑍᔭᐅᔪᒧᑦ ᑭᑐᕌᓂᒥᒃ. 13#ᐊᑕᓃᑦ ᓯᕗᓪᓖᑦ 11:7.ᐊᖓᔪᖅᑳᕐᔪᐊᑉ ᔫᓮᐊᐅᑉ ᐱᓪᓚᕆᒋᔭᐅᓪᓗᑎᒃ ᑐᒃᓯᐊᕐᕕᐅᖃᑦᑕᕐᑐᕕᓃᑦ ᐊᑐᕐᑕᐅᔪᓐᓁᓪᓕᑎᑉᐰᑦ ᔨᕉᓴᓕᐅᑉ ᓯᕿᓂᐊᑕ ᓇᓛᓃᑦᑐᑦ ᐱᖒᑉ ᐱᐅᖏᑦᑐᓕᕝᕕᖕᒥᒃ ᑍᔭᐅᔫᑉ ᓯᕿᓂᖓᓃᑦᑐᑦ, ᓲᓗᒨᓂᐅᑉ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᓴᓇᔭᐅᑎᑕᕕᓂᖏᑦ ᒎᑎᓐᖑᐊᒧᑦ ᐋᔅᑕᕉᑎᒥᒃ ᑍᔭᐅᔪᒧᑦ ᓮᑐᓂᐊᒥᐅᑦ ᒎᑎᓐᖑᐊᖓᓐᓄᑦ ᓇᕐᕈᓇᕐᑐᒧᑦ, ᑭᒨᓯᓗ ᒧᐊᐱᒥᐅᑦ ᒎᑎᓐᖑᐊᖓᓄᑦ ᓇᕐᕈᓇᕐᑐᒧᑦ, ᒥᐅᓪᑲᒻᒧᓪᓗ ᐊᒧᓁᑎᒥᐅᑦ ᒎᑎᓐᖑᐊᖓᓐᓄᑦ ᓇᕐᕈᓇᕐᑐᒧᑦ. 14ᓇᐸᔪᓪᓗ ᓱᑬᑦ ᓯᖁᑦᑎᕐᐰᑦ ᑐᒃᓯᐊᕐᕕᐅᕙᒃᑐᑦ, ᐅᕐᕈᑎᓪᓗᒍᓗ ᐊᓯᕆᒻ, ᐃᓄᐃᓪᓗ ᓴᐅᓂᕕᓂᖏᓐᓂᒃ ᐃᓗᓪᓕᕐᑕᐅᖔᕐᓗᑎᒃ.
15 #
ᐊᑕᓃᑦ ᓯᕗᓪᓖᑦ 12:33. ᐱᑎᓕᒥᑦᑕᐅᖅ ᑐᓂᕐᕈᓯᕐᕕᒃ ᔨᕈᐳᐊᒻ ᓂᐹᑎᐅᑉ ᐃᕐᓂᖓᑕ, ᓴᓇᔭᐅᑎᓚᐅᕐᑕᕕᓂᖓ ᐃᓴᕆᐊᓕᒥᐅᓂᒃ ᐊᔪᕐᑐᓕᑎᑦᓯᓚᐅᕐᑐᖅ, ᐱᓪᓚᕆᒋᔭᐅᓪᓗᓂ ᒎᑎᓐᖑᐊᒧᑦ ᑐᒃᓯᐊᕐᕕᒃ ᓯᖁᑦᑎᕐᑕᐅᑎᑉᐹ, ᐃᑯᐊᓪᓚᒃᑎᓚᐅᕐᓗᒋᑦ ᓯᖃᓕᔭᐅᑎᓪᓗᒋᑦ ᓄᖑᑕᐅᑎᑉᐰᑦ; ᓇᐸᔪᖁᑎᖏᓪᓗᑦᑕᐅᖅ ᐊᓯᕅᑦ ᐃᑯᐊᓚᒃᑕᐅᑎᒃᑭᕔᑦ. 16#ᐊᑕᓃᑦ ᓯᕗᓪᓖᑦ 13:2.ᔫᓮᐊ ᕿᒥᕐᕈᓕᕋᒥ ᐃᓗᕕᕕᓂᕐᓂᒃ ᐱᖑᕐᓃᑦᑐᓂᒃ ᓴᐅᓂᕕᓂᖏᑦ ᐲᔭᕐᑕᐅᑎᓪᓗᓂᒋᑦ ᐃᑯᐊᓪᓚᒃᑕᐅᑎᑉᐰᑦ ᑐᓂᕐᕈᓯᕐᕕᖕᒥ ᐃᑦᔪᕐᓇᕐᓯᑎᓪᓗᒋᑦ, ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ ᒎᑎᐅᑉ ᐃᓄᖁᑎᒥᒍᑦ ᐅᖃᐅᓯᕆᔭᐅᑎᓚᐅᕐᑕᖏᑦ, ᓯᕗᓂᖓᓂ ᑕᒪᑐᒪ ᑍᒤᓐᓂᐊᕐᓂᕋᓚᐅᕐᒪᒋᑦ. 17#ᐊᑕᓃᑦ ᓯᕗᓪᓖᑦ 13:30-32.ᑕᕝᕙ ᐊᖓᔪᖅᑳᕐᔪᐊᖅ ᐊᐱᕆᕗᖅ, “ᑮᓇᐅᓪᓕᐅᓈ ᓇᓗᓁᒃᑯᑕᖓ ᒫᓃᑦᑐᖅ?”
ᐃᒡᓗᒐᓴᒡᔪᐊᕐᒥᐅᓄᑦ ᐃᓄᖕᓄᑦ ᑭᐅᔭᐅᕗᖅ, “ᐅᓇ ᓇᓗᓁᕐᑕᐅᓯᒪᔪᖅ ᒎᑎᐅᑉ ᐃᓄᖁᑎᖓᓄᑦ ᔫᑕᒥᐅᕕᓂᕐᒧᑦ ᐃᓗᕕᕆᔭᐅᓂᕋᕐᑕᐅᓪᓗᓂ, ᐅᖃᐅᓯᖃᓚᐅᕐᑐᖅ ᑕᒪᓐᓇ ᐱᓂᐊᕐᓂᕆᔧᑦ; ᐱᓇᓱᐊᕐᑕᐅᓛᕐᓂᐊᕐᓂᕋᕐᓗᓂᐅᒃ ᒎᑎᓐᖑᐊᓄᑦ ᑐᓂᕐᕈᓯᕐᕖᑦ ᓄᖅᑲᕐᑎᑕᐅᓛᕐᓂᖓᓄᑦ ᐱᑎᓕᒥ.”
18ᑕᕝᕙ ᔫᓮᐊ ᐅᖃᕐᐳᖅ, “ᑖᓐᓇ ᑍᒤᓕᖓᑐᐃᓐᓇᕐᓕ; ᑖᑦᓱᒪ ᓴᐅᓂᖏᑦ ᓇᓪᓕᐊᓐᓄᑐᐃᓐᓇᖅ ᓅᑕᐅᑦᑍᓕᓕᑦ.”
ᑕᕝᕙ ᐊᒃᑐᕐᑕᐅᓚᐅᓐᖏᓚᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᕕᓂᖓᑕ ᓴᒥᐊᕆᐊᒥᑕᐅᑉ ᐃᓗᕕᖓ.
19ᔫᓮᐊᐅᑉ ᒎᑎᓐᖑᐊᓄᑦ ᑐᒃᓯᐊᕐᕕᐅᕙᒃᑐᓕᒫᑦ ᐱᓪᓚᕆᒋᔭᐅᔪᑦ ᓴᒥᐊᕆᐊᑉ ᐃᒡᓗᒐᓴᖏᓐᓂ ᐲᔭᕐᐰᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᓐᓄᑦ ᓴᓇᔭᐅᖃᑦᑕᕐᓯᒪᔪᑦ ᐊᑕᓂᕐᒥᒃ ᓂᓐᖓᒃᓮᑦᔪᑕᐅᓯᒪᔪᑦ; ᐱᑎᓕᒥ ᐱᓂᐊᕈᑎᒋᓚᐅᕐᑕᒥᑐᑦ ᐱᓂᐊᕐᕕᒋᓚᐅᕐᐰᑦ. 20ᔫᓮᐊᐅᑉ ᑐᖁᕋᕐᑕᐅᑎᑉᐰᑦ ᒎᑎᓐᖑᐊᓄᑦ ᑐᒃᓯᐊᕐᕕᐅᕙᒃᑐᓂ ᑐᓂᕐᕈᓯᕐᑎᑦᓯᔨᒋᔭᐅᔪᓕᒫᑦ, ᑐᓂᕐᕈᓯᕐᕕᖏᓐᓂᓗ ᓴᐅᓂᖏᑦ ᐃᑯᐊᓚᒃᑕᐅᑎᑉᐰᑦ. ᑕᕝᕙ ᑭᖑᓂᖓᒍᑦ ᔨᕉᓴᓕᒧᑦ ᐅᑎᕆᕗᖅ.
ᔫᓮᐊᐅᑉ ᖃᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᓂᖓ
ᑯᕉᓂᑲ ᐂᑉᐸᖏᑦ 35:1-19
21ᐊᖓᔪᖅᑳᕐᔪᐊᖅ ᔫᓮᐊ ᐃᓄᓕᒫᓂᒃ ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᖁᔨᕗᖅ, “ᐊᑕᓂᖅ ᒎᑎᒋᔭᓯ ᐱᓪᓗᒍ ᖄᖏᕐᑕᐅᕕᒃ ᓇᓪᓕᐅᓐᓂᕐᓯᐅᕐᓯᐅᒃ, ᐊᒡᓚᖕᓂ ᐅᑯᓇᓂ ᐊᖏᖃᑎᒌᒍᑎᓂ ᑎᑎᕋᕐᓯᒪᓂᖓ ᒪᓕᒡᓗᒍ.” 22ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᕕᒃ ᓇᓪᓕᐅᓐᓂᕐᓯᐅᕐᑕᐅᖃᑦᑕᕈᓐᓃᕐᓯᒪᖕᒪᑦ ᐃᓗᐊᕐᓮᔩᑦ ᐃᓴᕆᐊᓕᒥᐅᓂᒃ ᐊᐅᓚᑦᓯᓂᕆᓚᐅᕐᑕᖏᑕ ᑭᖑᓂᖓᓂ, ᐃᓴᕆᐊᓕᒥᐅᓄᑦ ᐊᖓᔪᖅᑳᕐᔪᐊᓕᒫᑦ ᓇᓪᓕᐅᓐᓂᕐᓯᐅᕐᑕᐅᓂᖓᓂᒃ ᑲᒪᔪᓐᓃᕐᓯᒪᖕᒪᑕ, ᔫᑕᐅᓪᓗ ᐊᖓᔪᖅᑳᕐᔪᐊᖏᑦ. 23ᐊᕐᕌᒍᐃᑦ 18ᖑᓕᕐᑎᓪᓗᒋᑦ ᔫᓮᐊᐅᑉ ᐊᖓᔪᖅᑳᕐᔪᐊᖑᓂᖓᓂ ᖃᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᓂᖅ ᐊᑐᕐᑕᐅᓕᑍᓐᓇᓚᐅᕐᐳᖅ ᐊᑕᓂᕐᒧᑦ ᔨᕉᓴᓕᒥ.
ᔫᓮᐊᐅᑉ ᐋᖅᑭᒋᐊᒃᑲᓐᓂᕐᑕᖏᑕ ᐃᓚᖏᑦ
24ᓱᓕᓗ ᔫᓮᐊᐅᑉ ᑐᖁᖓᔪᑦ ᐊᓂᕐᓂᖏᓐᓂᒃ ᐅᖃᖃᑎᖃᕋᓱᒃᐸᒃᑐᑦ, ᓯᕗᓂᒃᓴᒥᒡᓗ ᓇᓚᐅᑦᑍᔨᐅᓇᓱᒃᐸᒃᑐᑦ ᐊᓯᖏᓪᓗ ᓇᕐᕈᓇᕐᑑᓂᕋᕐᑕᐅᔪᓕᒫᑦ ᔨᕉᓴᓕᒥᐅᓂ ᔫᑕᒥᐅᓂᓗ ᓄᖅᑲᕐᑎᑉᐰᑦ, ᐃᒡᓗᒋᔭᐅᔪᓂᓗ ᒎᑎᓐᖑᐊᑦ, ᓴᓇᓯᒪᔪᓪᓗ ᐱᑦᑍᓕᓂᕐᒨᖓᔪᒃ ᐋᕐᖑᐊᑦ ᐲᔭᕐᑕᐅᑎᑉᐰᑦ ᑐᓂᕐᕈᓯᕐᑎᑦᓯᔩᑦ ᐳᕐᑐᓂᕐᐹᖓᑦᑕ ᕼᐃᓪᑬᐊᐅᑉ ᐊᒡᓔᑦ ᐱᖁᔭᕐᑕᓖᑦ ᑐᒃᓯᐊᕐᕕᒡᔪᐊᒥ ᓇᓂᓚᐅᕐᑕᖏᑦ ᒪᓕᒃᑕᐅᓯᐊᓕᖁᓪᓗᒋᑦ. 25ᔫᓮᐊᐅᑉ ᐊᖓᔪᖅᑳᕐᔪᐊᖑᓂᖓ ᐊᑦᔨᖃᓚᐅᕐᓯᒪᓐᖏᓚᖅ ᓯᕗᓪᓕᖏᓐᓂ ᑭᖑᓂᖓᒍᓪᓗ ᐊᑕᓂᕐᒧᑦ ᑐᓂᓯᒪᑎᒋᔪᒥᒃ ᐆᒻᒪᑎᒥᓄᑦ ᑕᕐᓂᕐᒥᒍᓪᓗ ᐱᔪᓐᓇᕐᓂᓕᒫᒥᓄᓪᓗ ᐊᑕᖏᕐᑐᒥᒃ, ᒨᓯᓯᒃᑯᓪᓗ ᐱᖁᔧᑦ ᑐᓂᔭᐅᓚᐅᕐᑐᑦ ᒪᓕᒃᑕᐅᖁᔭᐅᓂᖏᓐᓂᒃ ᒪᓕᑦᓯᐊᕐᑎᒋᔪᒥᒃ.
26ᑭᓯᐊᓂ ᐊᑕᓂᐅᑉ ᓂᓐᖓᒡᕕᖃᕐᓯᒪᓂᖓ ᔫᑕᒧᑦ ᑲᔪᓯᒪᓚᐅᕐᐳᖅ, ᐊᖓᔪᖅᑳᕐᔪᐊᑉ ᒫᓇᓯᐅᑉ ᐱᓂᐊᕐᓂᕐᒥᓄᑦ ᓂᓐᖓᒃᓮᓂᕆᓚᐅᕐᑕᖓᓄᑦ ᓂᓐᖓᒍᑎᖃᕐᓯᒪᓂᖓ. 27ᐊᑕᓂᖅ ᐅᖃᓚᐅᕐᒪᑦ, “ᔫᑕ ᑕᑯᓐᓇᕐᑕᓐᓂᑦ ᓅᑎᑦᓱᒫᕐᐸᕋ, ᐃᓴᕆᐊᓕᒥᐅᑎᑐᑦ ᓅᑦᓯᓂᕆᓚᐅᕐᑕᑦᑐᖅ, ᔨᕉᓴᓕᒻᓗ ᓂᕈᐊᕐᓗᒍ ᐃᒡᓗᒐᓴᒡᔪᐊᓐᖑᕐᑎᓚᐅᕐᑕᕋ ᓇᕐᕈᒋᓕᕈᒫᕐᐸᕋ, ᑖᓐᓇ ᐅᖃᐅᓯᖃᕐᕕᒋᓚᐅᕐᑕᕋ, ‘ᐊᑎᕋ ᑕᕝᕙᓂ ᐅᐱᒋᔭᐅᖏᓐᓇᖁᓪᓗᒍ.’”
ᔫᓮᐊᐅᑉ ᐊᖓᔪᖅᑳᕐᔪᐊᖑᓂᖓᑕ ᐃᓱᓕᓐᓂᖓ
ᑯᕉᓂᑲ ᐂᑉᐸᖏᑦ 35:20—36:1
28ᔫᓮᐊᐅᑉ ᐊᖓᔪᖅᑳᕐᔪᐊᖑᓪᓗᓂ ᐱᓂᐊᕐᓂᕆᓚᐅᕐᑕᓕᒫᖏᑦ ᐊᒡᓚᒃᑕᐅᓯᒪᕗᑦ ᔫᑕᒥᐅᑦ ᐊᖓᔪᖅᑳᕐᔪᐊᕆᓯᒪᔭᖏᑕ ᐊᒡᓚᒃᑕᐅᓯᒪᕕᖏᓐᓂ. 29ᔫᓮᐊ ᐊᖓᔪᖅᑳᕐᔪᐊᖑᑎᓪᓗᒍ, ᐰᕉ ᓂᑯ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦ ᑰᖕᒧᑦ ᐃᕗᕅᑎᒧᑦ ᐅᐸᒍᑎᓚᐅᕐᐳᖅ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᐃᑲᔪᕆᐊᕐᓗᓂ. ᔫᓮᐊᐅᑉ ᐅᓇᑕᕐᑎᖁᑎᖏᑕᓗ ᐅᓇᑕᕆᐊᕐᕕᒋᓪᓗᒍ ᐹᕆᐊᕐᑐᕐᐹᑦ, ᐄᑦᔨᑉᑎᒥᐅᓪᓕ ᐊᖓᔪᖅᑳᕐᔪᐊᖓᑦᑕ ᓂᑰᑉ ᐅᓇᑕᕐᓗᑎᒃ ᓵᓚᒋᓪᓗᒍ ᔫᓮᐊ ᑐᖁᑉᐹ ᓄᓇᒥ ᒥᒌᑐᒥ. 30ᔫᓮᐊᐅᑉ ᑎᒥᖓ ᐱᔨᖏᓐᓄᑦ ᒥᒌᑐᒥᑦ ᐅᑎᕈᑎᕚᑦ ᔨᕉᓴᓕᒧᑦ ᕿᒧᒃᓯᐅᑎᑯᑦ ᐊᒃᓴᓗᐊᓕᒃᑯᑦ ᐅᓯᔭᐅᑎᓪᓗᒍ, ᐃᓗᕕᕐᑕᐅᕕᒃᓴᓕᐊᕆᓯᒪᔭᖓᓄᓪᓗ ᐃᓗᕕᕐᓗᒍ.
ᔫᑕᐅᓪᓕ ᐃᓄᖏᑕ ᔨᕼᐅᐊᕼᐊᔨ ᔫᓮᐊᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᑎᑉᐹᑦ; ᐅᕐᓱᒧᓪᓗ ᒥᐊᖑᐊᕐᓗᒍ, ᐊᑖᑕᖓᑕ ᐃᓂᖓᓄᑦ ᐊᖓᔪᖅᑳᕐᔪᐊᓐᖑᕐᑎᑉᐹᑦ.
ᔪᕼᐊᓯᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒧᑦ
ᑯᕉᓂᑲ ᐂᑉᐸᖏᑦ 36:2-4
31ᔨᕼᐅᐊᕼᐊᔨ 23ᓂᒃ ᐊᕐᕌᒍᖃᓚᐅᕐᐳᖅ ᐊᖓᔪᖅᑳᕐᔪᐊᓐᖑᕐᑎᑕᐅᓪᓗᓂ, ᐊᖓᔪᖅᑳᕐᔪᐊᕆᔭᐅᓚᐅᕐᐳᕐᓗ ᔨᕉᓴᓕᒥ ᑕᖅᑭᓂᒃ ᐱᖓᓱᓂᒃ. ᐊᓈᓇᖓ ᐊᑎᖃᕐᐳᖅ ᕼᐊᒧᑕᓕᒥᒃ ᔨᕆᒤᐊᐅᑉ ᐸᓂᖓ ᓕᑉᓇᒥᐅᑕᖅ. 32ᐊᑕᓂᐅᑉ ᓵᖓᓂ ᐱᐅᖏᑦᑐᓂᒃ ᐱᓇᓱᐊᕐᓂᖃᓚᐅᕐᐳᖅ, ᓯᕗᓕᕕᓂᕐᒥ ᐱᐅᓯᕆᔭᕕᓂᖏᑦ ᒪᓕᒡᓗᒋᑦ. 33ᐰᕉᑉ ᓂᑰᑉ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᕐᓵᕐᑑᔭᓄᑦ ᐊᑦᑐᖏᕐᓱᐊᕆᓚᐅᕐᐹ ᓄᓇᓕᖕᓂ ᕆᑉᓚᒥ ᕼᐊᒫᑎᐅᑉ ᓄᓇᓕᒃᑕᖏᑕ ᐃᓚᖓᓂ. ᔨᕉᓴᓕᒥ ᐊᐅᓚᑦᓯᖁᓇᒍ, ᔫᑕᒥᐅᓪᓗ ᐊᑭᓕᕐᑐᒐᒃᓴᓕᐅᕐᐰᑦ 7,500ᓂᒃ ᓯᐅᓪᕕᕆᓂᒃ, 75ᓂᒃ ᐅᖁᒤᓐᓂᖃᕐᑐᓂᒃ ᒎᓗᓂᒃ. 34#ᔨᕆᒤᐊ 22:11,12.ᐰᕉᑉ ᓂᑰᑉ ᐃᓔᐊᑭᒻ ᔫᓮᐊᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᑎᑉᐹ, ᐊᑕᑕᖓᑕ ᐃᓂᖓᓄᑦ ᑭᖑᕝᕕᐅᑎᑎᓪᓗᒍ. ᐊᑎᕐᑖᕐᑎᓪᓗᓂᐅᒡᓗ ᐊᑎᑐᖃᖓᑕ ᐊᓯᐊᓂᒃ ᔨᕼᐅᐃᐊᑭᒻᒥᒃ ᑍᓕᕐᓗᓂᐅᒃ. ᔨᕼᐅᐊᕼᐊᔨᓕ ᐊᐅᓪᓚᕈᑎᕚ ᐄᑦᔨᑉᑎᒧᑦ ᑍᑲᓂᓗ ᐃᓅᔪᓐᓃᕐᓗᓂ.
ᔨᕼᐅᐃᐊᑭᒻ ᔫᑕᐅᑉ ᐊᖓᔪᖅᑳᕐᔪᐊᖓ
ᑯᕉᓂᑲ ᐂᑉᐸᖏᑦ 36:5-8
35ᔨᕼᐅᐃᐊᑭᒻ ᐰᕉ ᓂᑯᒧᑦ ᐊᑭᓕᕐᑐᕐᑕᐅᖁᔭᐅᔪᓂᒃ ᐊᑭᓕᕐᓱᐃᕗᖅ ᓯᐅᓪᕕᕆᓂᒃ, ᐊᑭᓕᕐᓱᐃᔪᓐᓇᕈᒪᓪᓗᓂ ᓄᓇᖁᑎᓕᒫᓂ ᑖᒃᓰᔭᕐᑎᓕᕐᐰᑦ, ᐃᓄᖁᑎᖏᑕ ᑮᓇᐅᔭᓕᐅᕐᓂᖏᑦ ᒪᓕᒡᓗᒋᑦ ᐃᓕᐅᖅᑬᑎᑉᐰᑦ.
36 #
ᔨᕆᒤᐊ 22:18,19; 26:1-6; 35:1-19. ᔨᕼᐅᐃᐊᑭᒻ 25ᓂᒃ ᐊᕐᕌᒍᖃᓚᐅᕐᐳᖅ ᐊᖓᔪᖅᑳᕐᔪᐊᓐᖑᕋᒥ ᔫᑕᒥᐅᓄᑦ, ᔨᕉᓴᓕᒥ ᐊᐅᓚᑦᓯᔨᐅᓚᐅᕐᐳᖅ ᐊᕐᕌᒍᓂᒃ 11ᓂᒃ, ᐊᓈᓇᖓ ᐊᑎᖃᕐᐳᖅ ᔨᐳᑕ ᐱᑍᐊᐅᑉ ᐸᓂᖓ, ᓄᓇᒥᑦ ᕉᒪᒥᑦ ᐱᓯᒪᓪᓗᓂ. 37ᓯᕗᓕᕕᓂᕐᒥ ᐃᓕᖅᑯᓯᖏᓐᓂᒃ ᒪᓕᒃᑲᒥ ᐊᑕᓂᐅᑉ ᓵᖓᓂ ᐊᔪᕐᑐᓕᓚᐅᕐᐳᖅ.
Currently Selected:
ᐊᑕᓃᑦ ᐂᑉᐸᖏᑦ 23: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
