ᐊᑕᓃᑦ ᐂᑉᐸᖏᑦ 21
21
ᒫᓇᓯᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒧᑦ
ᑯᕉᓂᑲ ᐂᑉᐸᖏᑦ 33:1-20
1ᒫᓇᓯ 12ᓂᒃ ᐊᕐᕌᒍᖃᕐᓗᓂ ᔫᑕᒧᑦ ᐊᖓᔪᖅᑳᕐᔪᐊᓐᖑᓚᐅᕐᐳᖅ, ᔨᕉᓴᓕᒥᓗ ᐊᐅᓚᑦᓯᓚᐅᕐᐳᖅ ᐊᕐᕌᒍᓂᒃ 55ᓂᒃ. ᐊᓈᓇᖄᓚᐅᕐᐳᖅ ᕼᐃᐱᓯᐸᒥᒃ ᐊᑎᓕᖕᒥᒃ. 2#ᔨᕆᒤᐊ 15:4.ᐊᑕᓂᐅᑉ ᓵᖓᓂ ᓈᒻᒪᖏᑦᑐᓂᒃ ᐱᓂᐊᓚᐅᕐᐳᖅ, ᐃᓅᖃᑎᒌᒡᔪᐊᑦ ᐊᑕᓂᐅᑉ ᐊᐅᓪᓚᕐᑎᓚᐅᕐᑕᖏᑕ ᐃᓕᖅᑯᓯᕆᓚᐅᕐᑕᖏᓐᓂᒃ ᓇᕐᕈᓇᕐᑐᓂᒃ ᐱᓂᐊᓚᐅᕐᒪᑕ ᐃᓴᕆᐊᓕᒥᐅᓂᑦ ᓄᓁᑕᐅᓚᕐᑐᓂᒃ. 3ᒎᑎᓐᖑᐊᓄᑦ ᑐᒃᓯᐊᕐᕕᐅᕙᒃᑐᑦ ᓴᓇᔭᐅᑎᒋᐊᓪᓚᓚᐅᕐᐰᑦ ᐊᑖᑕᖓᑕ ᕼᐃᓯᑬᐊᐅᑉ ᓯᖁᑦᑎᓚᐅᕐᑕᖏᑦ; ᑐᓂᕐᕈᓯᕐᕕᒡᓂᒡᓗ ᓴᓇᔭᐅᑎᑦᓯᕗᖅ ᒎᑎᓐᖑᐊᒧᑦ ᐰᓕᒧᑦ ᑐᒃᓯᐊᕐᕕᐅᕙᒃᑐᓂᒃ, ᒎᑎᓐᖑᐊᓪᓗ ᐊᓯᕋᐅᑉ ᐊᑦᔨᖓᓂᒃ ᓴᓇᔭᐅᑎᑦᓯᒋᓪᓗᓂ, ᐊᖓᔪᖅᑳᕐᔪᐊᑉ ᐂᕼᐊᐱᐅᑉ ᓴᓇᔭᐅᑎᓯᒪᔭᖓᑕ ᐊᑦᔨᖓᓂᒃ, ᒫᓇᓯ ᑐᒃᓯᐊᕐᕕᖃᖃᑦᑕᓕᓚᐅᕆᕗᖅ ᐅᓪᓗᕆᐊᓕᒫᓂᒃ, ᐱᓇᓱᐊᕐᕕᒋᓪᓗᒋᓪᓗ. 4#ᓴᒧᐃᓕ ᐂᑉᐸᖏᑦ 7:13.ᒎᑎᓐᖑᐊᓖᑦ ᑐᓂᕐᕈᓯᕐᕕᖏᓐᓂᒃ ᓴᓇᔭᐅᑎᑦᓯᒋᕗᖅ ᐊᑕᓂᐅᑉ ᐃᒡᓗᖓᓂ, ᐊᑕᓂᐅᑉ ᐅᖃᕐᓯᕆᓚᐅᕐᑕᖓᓂ, “ᔨᕉᓴᓕᒥ ᐊᑎᕋ ᐃᓕᓯᒪᓂᐊᕐᐸᕋ.” 5ᐊᑕᓂᐅᑉ ᐃᒡᓗᖓᓂ ᐃᒡᓗᕈᓯᖏᖕᓂ ᒪᕐᕉᖕᓂᒃ ᑐᓂᕐᕈᓯᕐᕕᓕᐅᕐᐳᖅ ᐅᓪᓗᕆᐊᓕᒫᓄᑦ ᑐᒃᓯᐊᕐᕕᒋᕙᒃᑕᒥᓂᒃ. 6ᐃᕐᓂᕐᒥᓂᒃ ᐃᑯᐊᓚᑦᓯᓪᓗᓂ ᑐᓂᕐᕈᓯᓚᐅᕐᐳᖅ, ᓇᓗᓇᕐᑐᓂᒡᓗ ᖃᐅᔨᒪᑦᔪᑎᖃᕋᓱᒃᐸᒃᓗᓂ, ᐊᖓᒃᑯᓂᒡᓗ ᑕᑎᖃᕐᐸᒃᓗᓂ, ᑐᖁᖓᔪᓂᒡᓗ ᖃᐅᔨᒪᓂᕋᕐᑎᓂᒃ ᐃᑲᔪᕐᑎᖃᕋᓱᒃᐸᒃᓗᓂ. ᐊᖏᔪᒥᒃ ᐊᑕᓂᐅᑉ ᓵᖓᓂ ᐊᔪᕐᑐᓕᓚᐅᕐᐳᖅ, ᓂᓐᖓᒃᓮᒍᑎᓂᒡᓗ ᐊᑕᓂᕐᒥᒃ ᐱᓇᓱᐊᕐᓗᓂ. 7#ᐊᑕᓃᑦ ᓯᕗᓪᓖᑦ 9:3-5; ᑯᕉᓂᑲ ᐂᑉᐸᖏᑦ 7:12-18.ᒎᑎᓐᖑᐊᑉ ᐊᓯᕋᐅᑉ ᐊᑦᔨᖓᓂᒃ ᓴᓇᓯᒪᔪᒥᒃ ᐋᖅᑭᒃᑕᐅᑎᑦᓯᓯᒪᓚᐅᕐᐳᖅ ᐊᑕᓂᐅᑉ ᐃᒡᓗᖓᓂ, ᐊᑕᓂᐅᑉ ᑍᕕᑎᒥᒃ ᐃᕐᓂᖓᓂᒡᓗ ᓲᓗᒨᓂᒥᒃ ᐅᖃᐅᑦᔨᑦᔪᑎᒋᓚᐅᕐᑕᖓᓂᒃ ᐅᖃᕐᓗᓂ, “ᐅᕙᓂ ᐃᒡᓗᒥ ᔨᕉᓴᓕᒻᒥᓗ ᓂᕈᐊᕐᓯᒪᔭᓐᓂ ᐃᓴᕆᐊᓕᒥᐅᑦ ᑭᖑᕚᕇᖏᑕ ᓄᓇᒋᔭᓕᒫᖏᓐᓂᑦ, ᐊᑎᕋ ᐃᓂᖃᕐᑎᓐᓂᐊᕐᐸᕋ ᐃᓱᖃᖏᑦᑐᒧᑦ; 8ᐃᓴᕆᐊᓕᒥᐅᑦ ᐃᑎᒐᖏᑦ ᐊᐅᓪᓚᖃᑦᑕᖁᔪᓐᓃᕐᓂᐊᕐᐸᒃᑲ ᓄᓇᒋᓕᕐᑕᖓᓂᑦ ᓯᕗᓕᕕᓂᖏᓐᓄᑦ ᑐᓂᑦᔪᑎᒋᓚᐅᕐᑕᓐᓂᒃ ᓄᓇᒋᔭᐅᖁᓪᓗᒍ, ᐱᖁᔭᓕᒫᓐᓂᒃ ᒪᓕᑦᓯᐊᕐᓂᐊᕐᐸᑕ ᐊᑐᕐᑕᐅᖁᓚᐅᕐᑕᓐᓂᒃ ᑖᒃᑯᓄᖓ, ᐱᖁᔭᓕᒫᓂᒡᓗ ᐱᔨᒪ ᒨᓯᓯᐅᑉ ᐱᖁᔨᑦᔪᑎᒋᓚᐅᕐᑕᖏᓐᓂᒃ ᑖᒃᑯᓄᖓ.” 9ᑖᒃᑯᐊᓕ ᓈᓚᓚᐅᓐᖏᓚᑦ, ᒫᓇᓯᐅᑉ ᐊᔪᕐᑐᓕᓐᓇᕐᑐᓄᑦ ᑕᓯᐅᓚᐅᕐᒪᒋᑦ ᐱᐅᖏᓐᓂᕐᓴᒧᑦ ᓄᓇᑖᕆᓯᒪᔭᖏᑕ ᐃᓄᒋᓚᐅᕐᑕᖏᑕ ᐱᓂᐊᕐᓂᕆᓚᐅᕐᑕᖏᓐᓂᑦ ᐊᑕᓂᐅᑉ ᓯᖏᑕᐅᑎᓚᐅᕐᑕᖏᓐᓂᑦ ᐃᓴᕆᐊᓕᒥᐅᓄᑦ ᓄᓇᑖᕆᔭᐅᕙᓪᓕᐊᓕᕐᑎᓪᓗᒍ.
10ᐊᑕᓂᖅ ᐅᖃᕐᑎᒥᒍᑦ ᐅᖃᓚᐅᕐᐳᖅ, 11“ᔫᑕᐅᑉ ᐊᖓᔪᖅᑳᕐᔪᐊᖓ ᒫᓇᓯ ᓇᕐᕈᓇᕐᑐᕐᔪᐊᓂᒃ ᐱᓇᓱᐊᕐᓯᒪᖕᒪᑦ, ᐊᒧᕅᑎᒥᐅᑦ ᐃᓕᖅᑯᓯᕆᓯᒪᔭᖏᓐᓂᑦ ᐱᐅᖏᓐᓂᕐᓴᓂᒃ ᐱᓂᐊᕐᓯᒪᕗᖅ, ᒎᑎᓐᖑᐊᖃᖃᑦᑕᕐᓂᕐᒥᖕᓄᑦ ᔫᑕᒥᐅᓂᒃ ᐊᔪᕐᑐᓕᑎᑦᓯᓯᒪᖕᒪᑦ. 12ᑍᒤᒻᒪᑦ ᐊᑕᓂᖅ ᐃᒫᒃ ᐅᖃᕐᐳᖅ, ᐃᓴᕆᐊᓕᒥᐅᑦ ᒎᑎᖓᑦ, ᑕᑯᒋᑦ, ᑲᑉᐱᐊᓇᕐᑐᒥᒃ ᐱᓇᓱᐊᕈᒫᕐᐳᖓ ᔨᕉᓴᓕᒥᐅᓄᑦ ᔫᑕᒥᐅᓄᓪᓗ ᐱᐅᓐᖏᓗᐊᕐᓂᖓᓄᑦ ᑐᓴᕐᑐᑦ ᑕᑕᒥᓯᒪᔪᒫᕐᐳᑦ. 13ᔨᕉᓴᓕᒥᐅᑦ ᓱᒋᐊᕈᒫᕐᐸᒃᑲ ᓴᒥᐊᕆᐊᒥᐅᓂᒃ ᓱᒋᐊᕐᓯᓚᐅᕐᓂᑦᑐᑦ, ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖓᑦ ᐂᕼᐊᑉ ᑭᖑᕚᖏᓪᓗ ᐊᑕᕆᓇᒋᑦ ᓱᒋᐊᕐᓯᓚᐅᕐᓂᑦᑐᑦ. ᔨᕉᓴᓕᒻ ᐊᓪᓚᕐᑎᕈᒪᕙᕋ, ᓂᕐᕆᑏᑦ ᐊᓪᓚᕐᑎᕐᑕᐅᓪᓗᓂ ᓴᓗᒻᒪᕐᑕᐅᕙᖕᓂᖓᑐᑦ ᓴᓗᒻᒪᕐᑕᐅᔭᕇᕋᒥ ᐳᓯᑎᑕᐅᔪᑎᑐᑦ. 14ᐊᒥᐊᒃᑰᔫᒐᓗᐊᑦ ᕿᒤᓐᓇᕐᓗᒋᑦ ᖁᔭᓈᕈᒫᕐᐸᒃᑲ, ᐊᑭᕋᖏᓐᓄᑦ ᑐᓂᑦᔪᑎᒋᓗᒋᑦ ᐃᓱᒤᓐᓇᕐᕆᑎᐅᓗᑎᒃ ᓵᓚᒋᔭᐅᔪᒫᕐᒪᑕ ᓄᓇᖓᑦ ᓱᓁᕈᑦᔭᐅᑦᓯᐊᕐᓗᓂ ᑎᒎᖅᑬᕕᐅᑎᑦᓱᒫᕐᐸᕋ. 15ᑍᒤᓕᐅᕐᕕᒋᔪᒪᕙᒃᑲ ᐃᓄᖁᑎᒃᑲ ᐊᔪᕐᑐᓕᓯᒪᖕᒪᑕ ᐅᕙᓐᓄᑦ ᓂᓐᖓᒍᑎᒃᓴᓂᒡᓗ ᐱᓇᓱᐊᖏᓐᓇᕐᒪᑕ ᑍᒪᓐᖓᑦ ᓯᕗᓕᕕᓂᖏᓐᓂᒃ ᐊᐅᓪᓚᕐᑎᑦᓯᓂᕆᓚᐅᕐᑕᒪ ᐄᑦᔨᑉᑎᒥᑦ, ᐅᓪᓗᒥᒧᑦ ᑎᑭᓪᓗᒍ.”
16ᒫᓇᓯᐅᓪᓗ ᐸᓯᔭᒃᓴᐅᓂᖃᖏᑦᑐᓂᒃ ᐃᓄᐊᕐᓯᒪᔭᖏᑕ ᐅᓄᕐᓂᑯᖏᓐᓄᑦ, ᔨᕉᓴᓕᐅᑉ ᐃᓱᐊᓂᑦ ᐃᓱᐊᓄᑦ ᓈᔨᓯᒪᓚᐅᕐᐳᑦ, ᐊᔪᕐᑐᓕᑎᑦᓯᓯᒪᓂᖓ ᔫᑕᒥᐅᓂᒃ ᐱᒐᓗᐊᕐᒥᑎᓪᓗᒍ, ᐊᑕᓂᐅᑉ ᓵᖓᓂ ᓈᒻᒪᖏᑦᑐᓂᒃ ᐱᓂᐊᓚᐅᕐᒪᑕ.
17ᒫᓇᓯᐅᑉ ᐱᓂᐊᕐᓂᕆᓚᐅᕐᑕᓕᒫᖏᑦ ᑎᑎᕋᕐᑕᐅᓯᒪᕗᑦ, ᐊᔪᕐᑐᓕᓂᕆᓚᐅᕐᑕᖏᓪᓗ, ᔫᑕᒥᐅᑦ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᕕᖏᓐᓂᒃ. 18ᒫᓇᓯ ᑐᖁᖕᒪᑦ ᐃᓗᕕᕐᑕᐅᕗᖅ ᐊᖓᔪᖅᑳᕐᔪᐊᑉ ᐃᒡᓗᖓᑕ ᐱᕈᕐᓰᕕᖓᓂ ᑍᔭᐅᔪᒥ ᐆᔭᐅᑉ ᐱᕈᕐᓰᕕᖓᓂᒃ; ᐃᕐᓂᖓᑕ ᐋᒪᓐ ᑭᖑᕝᕕᕐᓗᓂᐅᒃ ᐊᖓᔪᖅᑳᕐᔪᐊᓐᖑᕆᕗᖅ ᑭᖑᓂᖓᓂ.
ᐋᒪᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒧᑦ
ᑯᕉᓂᑲ ᐂᑉᐸᖏᑦ 33:21-25
19ᐋᒪᓐ 22ᓂᒃ ᐊᕐᕌᒍᖃᓚᐅᕐᐳᖅ ᔫᑕᒧᑦ ᐊᖓᔪᖅᑳᕐᔪᐊᓐᖑᕐᓗᓂ, ᐊᐅᓚᑦᓯᓚᐅᕐᐳᕐᓗ ᔨᕉᓴᓕᒥ ᐊᕐᕌᒍᖕᓂᒃ ᒪᕐᕉᖕᓂᒃ. ᐊᓈᓇᖃᓚᐅᕐᐳᖅ ᒥᓱᓕᒦᑎᒥᒃ ᐊᑎᖃᕐᑐᒥᒃ ᕼᐊᕉᓯᐅᑉ ᐸᓂᖓᓂᒃ, ᓄᓇᓕᖕᓂᑦ ᔮᑦᐸᒥᑦ ᐱᓯᒪᔪᖅ. 20ᐊᑖᑕᕕᓂᕐᒥᑐᑦ ᒫᓇᓯᑐᑦ ᐊᔪᕐᑐᓕᓂᕐᒥ ᐃᓅᓯᖃᓚᐅᕆᕗᖅ ᐊᑕᓂᐅᑉ ᓵᖓᓂ. 21ᐊᑖᑕᒥ ᐃᓕᖅᑯᓯᕆᓚᐅᕐᑕᓕᒫᖏᓐᓂᒃ ᒪᓕᑐᐃᓐᓇᓚᐅᕋᒥ, ᑐᒃᓯᐊᕐᕕᖃᖃᑦᑕᕐᓗᓂᓗ ᒎᑎᓐᖑᐊᓄᑦ ᐊᑖᑕᖓᑕ ᑐᒃᓯᐊᕐᕕᒋᖃᑦᑕᕐᑕᕕᓂᖏᓐᓄᑦ, 22ᐊᑕᓂᖅ ᐃᓱᒪᒋᓚᐅᓐᖏᓛ ᓯᕗᓕᕕᓂᖏᑕ ᒎᑎᖓᑦ, ᐊᑕᓂᐅᓪᓗ ᐱᓂᐊᕐᑕᐅᖁᔭᖏᓐᓂᒃ ᐱᓇᓱᐊᓚᐅᓐᖏᓚᖅ. 23ᐋᒪᓐ ᐊᖓᔪᖅᑳᑯᑎᖏᑕ ᐃᓄᐊᕈᒪᓪᓗᒍ ᐃᓱᒪᒌᓐᓇᓕᕋᒥᑦᔪᒃ, ᑐᖁᑕᐅᑎᑉᐹᑦ ᐊᖓᔪᖅᑳᕐᔪᐊᑉ ᐃᒡᓗᖓᓂ. 24ᔫᑕᒥᐅᓪᓕ ᐊᖓᔪᖅᑳᕐᔪᐊᕐᒥᒃ ᐋᒪᓐᒥᒃ ᑐᖁᑦᓯᔪᕕᓂᓕᒫᑦ ᑐᖁᑕᐅᑎᓪᓗᒋᑦ, ᐃᕐᓂᖓᓂᒃ ᔫᓮᐊᒥᒃ ᐊᖓᔪᖅᑳᕐᔪᐊᓐᖑᕐᑎᑦᓯᓚᐅᕐᐳᑦ. 25ᐋᒪᐅᓪᓕ ᐱᓂᐊᕐᓂᕆᓯᒪᔭᓕᒫᖏᑦ ᑎᑎᕋᕐᑕᐅᓯᒪᕗᑦ ᔫᑕᒥᐅᑦ ᐊᖓᔪᖅᑳᕐᔪᐊᕆᓯᒪᔭᖏᑕ ᐅᓂᒃᑲᐅᑕᐅᕕᖏᓐᓂ. 26ᐋᒪᓐ ᑐᖁᖕᒪᑦ ᐃᓗᕕᕐᑕᐅᓚᐅᕐᐳᖅ ᐃᓗᕕᒃᓴᓕᐊᕆᓯᒪᔪᒥ ᐆᔭᐅᑉ ᐱᕈᕐᓰᕕᖁᑎᖓᓃᑦᑐᒥ; ᐃᕐᓂᖓᓗ ᔫᓮᐊ ᑭᖑᕝᕕᐅᑎᓪᓗᓂ ᐊᖓᔪᖅᑳᕐᔪᐊᓐᖑᕐᑎᑕᐅᕗᖅ.
Currently Selected:
ᐊᑕᓃᑦ ᐂᑉᐸᖏᑦ 21: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
