ᐊᑕᓃᑦ ᐂᑉᐸᖏᑦ 20
20
ᐊᖓᔪᖅᑳᕐᔪᐊᑉ ᕼᐃᓯᑬᐊᐅᑉ ᖃᓂᒻᒪᖕᓂᖓ ᐋᖅᑭᒃᑕᐅᓂᖓᓗ
ᐂᓮᐊᓯ 38:1-8,21-22; ᑯᕉᓂᑲ ᐂᑉᐸᖏᑦ 32:24-26
1ᐅᓪᓗᓂ ᑍᒃᑯᓇᓂ ᐊᖓᔪᖅᑳᕐᔪᐊᖅ ᕼᐃᓯᑬᐊ ᖃᓂᒻᒪᒃᐳᖅ ᑐᖁᓂᐅᓴᓕᕐᓗᓂ. ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐂᓮᐊᓯᐅᑉ ᐂᒨᓯᐅᑉ ᐃᕐᓂᖓᑕ ᑕᑯᔭᕐᑐᕋᒥᐅᒃ ᐅᖃᐅᑎᕚ, “ᐃᒫᒃ ᐊᑕᓂᐅᑉ ᐅᖃᐅᑎᔭᐅᖁᕚᑎᑦ ᐅᐸᓗᖎᔭᕐᓯᒪᑦᓯᐊᕐᑐᒃᓴᐅᕗᑎᑦ; ᑐᖁᓂᐊᓕᕋᕕᑦ ᐋᖅᑭᑦᔮᔪᓐᓃᕐᓗᑎᑦ.”
2ᕼᐃᓯᑬᐊ ᑐᓄᓪᓗᓂ ᐃᒡᓘᑉ ᐊᑭᓐᓇᖓᓄᑦ ᓵᓪᓗᓂ, ᐊᑕᓂᕐᒧᑦ ᑐᒃᓯᐊᓕᕐᐳᖅ, ᐅᖃᕐᓗᓂ, 3“ᐊᑕᓃᖅ ᐃᖅᑲᐅᒪᒋᑦ, ᓱᕐᕋᔪᐃᑦᑑᓪᓗᖓ ᐱᔨᑦᓯᓚᐅᕋᒃᑭᑦ ᐅᐱᒋᑦᓯᐊᕐᓗᑎᑦ, ᑍᒪᓐᖓᓕᒫᕐᓗ ᐱᔪᒪᔧᑦ ᒪᓕᑦᓯᐊᕋᓱᖏᓐᓇᓚᐅᕋᑯ.” ᑕᕝᕙ ᕼᐃᓯᑬᐊ ᐊᖏᔪᒥᒃ ᕿᐊᓕᕐᐳᖅ.
4ᐂᓮᐊᓯ ᐊᖓᔪᖅᑳᕐᔪᐊᑉ ᐃᒡᓗᖓᓂᑦ ᐊᓂᕙᓪᓕᐊᓯᒐᓗᐊᕐᑎᓪᓗᒍ ᐊᑕᓂᐅᑉ ᐅᖃᐅᑎᕚ: 5“ᐅᑎᕆᑦ ᕼᐃᓯᑬᐊ ᐅᖃᐅᑎᓗᒍ ᐊᐅᓚᑦᓯᔨᐅᔪᖅ ᐃᓄᖁᑎᓐᓂᒃ ᐅᖃᐅᑎᓗᒍ ᐊᑕᓂᖅ ᓯᕗᓕᕕᓂᕐᐱᑦ ᑍᕕᑎᐅᑉ ᒎᑎᖓ, ᐅᖃᕐᐳᖅ: ᑐᒃᓯᐊᕐᓃᑦ ᑐᓴᕐᐸᕋ, ᖁᕕᐅᕐᓂᑎᓪᓗ ᑕᑯᕙᒃᑲ; ᑕᑯᒋᑦ, ᐋᖅᑭᖕᓂᐊᕐᐸᒋᑦ; ᐅᓪᓗᐃᑦ ᐱᖓᓱᑦ ᐊᓂᒍᕐᐸᑕ ᐊᑕᓂᐅᑉ ᐃᒡᓗᖓᓄᐊᕐᓂᐊᕐᐳᑎᑦ. 6ᐃᓅᓰᑦ ᐃᓚᒃᑲᓐᓇᕐᓂᐊᕐᐸᕋ ᐊᕐᕌᒍᓂᒃ 15ᓂᒃ. ᓴᐳᑎᓂᐊᕐᐸᒋᑦ ᔨᕉᓴᓕᒥᐅᓪᓗ ᐃᒡᓗᒐᓴᒡᔪᐊᖏᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓂᑦ, ᐃᒡᓗᒐᓴᒡᔪᐊᑦ ᑖᒃᑯᐊ ᓴᐳᑎᓂᐊᕐᐸᒃᑲ ᐅᕙᖓ ᓇᖕᒥᓂᖅ ᐱᑦᔪᑎᒋᓗᖓ ᑍᕕᑎᓗ ᐱᑦᔪᑎᒋᓗᒍ.”
7ᐂᓮᐊᓯᐅᑉ ᐊᖓᔪᖅᑳᕐᔪᐊᑉ ᐱᔨᖏᑦ ᐅᖃᐅᑎᕔᑦ, “ᕾᑦᓯᓚᐅᕆᑦᓯ ᐱᒋᓕᖕᓂᑦ ᐸᐅᕐᖓᓂᒃ ᑲᑎᓯᒪᔪᓂᒃ. ᐊᔪᐊᖏᓐᓄᑦ ᐃᓕᓗᒋᑦ, ᐋᖅᑭᒃᑕᐅᖁᓪᓗᒍ.” 8ᐊᖓᔪᖅᑳᕐᔪᐊᖅ ᕼᐃᓯᑬᐊ ᐊᐱᕆᕗᖅ ᐂᓮᐊᓯᒧᑦ, “ᓱᓇᒥᒃ ᓇᓗᓁᒃᑯᑕᖃᕐᓂᐊᕐᐳᖓ ᐊᑕᓂᕐᒧᑦ ᐋᖅᑭᒃᑕᐅᓂᐊᕐᓂᓐᓂᒃ ᐅᓪᓗᐃᓪᓗ ᐱᖓᓱᑦ ᓈᒃᐸᑕ ᐊᑕᓂᐅᑉ ᐃᒡᓗᖓᓄᑦ ᐃᑎᕐᓂᐊᕐᓂᓐᓂᒃ?”
9ᐂᓮᐊᓯᐅᑉ ᑭᐅᕚ, “ᐃᒫᒃ ᐃᓕᖕᓄᑦ ᓇᓗᓁᒃᑯᑕᖃᕐᐳᖅ ᐊᑕᓂᕐᒥᑦ, ᐊᑕᓂᐅᑉ ᐱᓂᐊᕐᓂᕆᓂᐊᕐᑕᖓ ᐊᖏᕐᓯᒪᓂᕐᒥᓄᑦ: ᐊᓪᓗᕐᓂᕐᓂᒃ ᖁᓕᓂᒃ ᑕᕐᕋᖅ ᓯᕗᒻᒧᑦ ᐃᖏᕐᕋᖁᕕᐅᒃ, ᐅᕝᕙᓗ ᑭᖑᒧᑦ ᖁᓕᓂᒃ ᐃᖏᕐᕋᖁᕕᐅᒃ?”
10ᕼᐃᓯᑬᐊᐅᑉ ᑭᐅᕚ, “ᑕᕐᕋᖅ ᐃᖏᕐᕋᒃᐹᑦ ᓯᕗᒧᑦ ᐊᓪᓗᕐᓂᕐᓂᒃ ᖁᓕᓂᒃ ᐱᔭᕐᓂᓗᐊᕐᒪᑦ; ᖃᓄᐃᒻᒪᓪᓕ ᐊᓪᓗᕐᓂᕐᓂᒃ ᖁᓕᓂᒃ ᐅᑎᒧᖔᖅ ᐃᖏᕐᕋᓗᓂ.”
11ᐂᓮᐊᓯ ᐊᑕᓂᕐᒧᑦ ᑐᒃᓯᐊᕐᐳᖅ; ᑕᕝᕙ ᐊᑕᓂᐅᑉ ᑕᕋᖅ ᐅᑎᒧᑦ ᖁᓕᓂᒃ ᐊᓪᓗᕐᓂᕐᓂᒃ ᐃᖏᕐᕋᑎᑉᐹ, ᐂᕼᐊᓯᐅᑉ ᓯᕿᓂᐅᑉ ᑕᕐᕋᖓᓄᑦ ᖃᐅᔨᓴᐅᑎᓕᐊᕆᓯᒪᔭᖓᓄᑦ ᐃᑲᕐᕋᕐᓯᐅᑎᒧᑦ.
ᐹᐱᓘᓂᒥᐅᓂᑦ ᑎᓕᔭᐅᓯᒪᔪᑦ ᑎᑭᓐᓂᖓᑦ
ᐂᓮᐊᓯ 39:1-8
12ᑍᑦᓱᒪᓂ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ ᒥᕈᑖᒃ-ᐸᓚᑖᓐ ᐸᓚᑖᓂᐅᑉ ᐃᕐᓂᖓ ᑐᓴᐅᒪᓕᕋᒥ ᐊᖓᔪᖅᑳᕐᔪᐊᑉ ᕼᐃᓯᑬᐊᐅᑉ ᖃᓂᒪᓚᐅᕐᓂᖓᓂᒃ ᑎᑎᕋᕐᕕᒋᕚ ᑐᔪᕐᓗᒍᓗ. 13ᕼᐃᓯᑬᐊᐅᑉ ᑎᓕᔭᐅᔪᑦ ᑐᓐᖓᓱᒃᑎᑉᐰᑦ ᐊᔪᕐᓴᖏᑦᑑᓂᕐᒥᓂᒡᓗ ᕿᒥᕐᕈᑎᓪᓗᒋᑦ ᐱᒃᑯᕕᖃᐅᑎᒥᓃᑦᑐᓂᒃ, ᓯᐅᓪᕕᕆᓂᒃ, ᒎᓗᓂᒡᓗ, ᓂᕿᓄᑦ ᐃᓚᐅᕈᑎᒃᓴᓂᒃ, ᐅᕐᓱᓂᒡᓗ ᒪᒪᕐᓴᐅᑎᓂᒃ, ᐅᓇᑕᐅᑎᓕᒫᓂᓗ ᑕᑯᔭᐅᑎᑉᐰᑦ, ᐱᒃᑯᕕᓕᒫᓃᑦᑐᓂᒃ ᓱᓇᑐᐃᓐᓇᕐᓄᑦ; ᑕᑯᔭᐅᖏᑦᑐᕐᑕᖃᓚᐅᓐᖏᓚᑦ ᑖᒃᑯᓄᖓ ᑎᑭᓯᒪᔪᓄᑦ. 14ᑕᕝᕙ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᐂᓮᐊᓯ ᐊᖓᔪᖅᑳᕐᔪᐊᕐᒧᑦ ᐃᓯᑬᐊᒧᐊᕐᓗᓂ ᐊᐱᕆᕚ, “ᓇᑭᓄᑯᐊ ᐊᖑᑏᑦ ᐱᓯᒪᔪᑦ, ᖃᓄᖅ ᐅᖃᐅᓯᖃᕐᐸᑦ ᐃᓕᖕᓄᑦ?” ᕼᐃᓯᑬᐊᐅᑉ ᑭᐅᕚ, “ᐅᖓᓯᒃᑐᕐᔪᐊᕐᒥᑦ ᓄᓇᒥᑦ ᐹᐱᓘᓂᒥᑦ ᑕᒪᐅᖓ ᑎᑭᓯᒪᕗᑦ.”
15ᐂᓮᐊᓯᐅᑉ ᐊᐱᕆᒃᑲᓐᓂᕐᐹ, “ᓱᓇᓂᒃ ᑕᑯᕙᑦ ᐊᖓᔪᖅᑳᕐᔪᐊᑉ ᐃᒡᓗᖓᓃ?”
ᕼᐃᓯᑬᐊ ᑭᐅᕗᖅ, “ᑍᒤᓐᓂᑦᓯᐊᖅ ᐃᓪᓗᑦᑎᓐᓃᑦᑐᓂᒃ ᑕᑯᓯᒪᓐᖏᑕᖃᕈᓐᓃᕐᐳᑦ; ᐱᒃᑯᕕᖃᐅᑎᑦᑎᓐᓃᑦᑐᓂᒃ ᐃᓘᓐᓇᖏᓐᓂᒃ ᕿᒥᕐᕈᑎᓐᓇᒃᑭᑦ.”
16ᑕᕝᕙ ᐂᓮᐊᓯᐅ ᐊᖓᔪᖅᑳᕐᔪᐊᖅ ᕼᐃᓯᑬᐊ ᐅᖃᐅᑎᕚ, “ᑐᓴᕆᑦ ᐊᑕᓂᐅᑉ ᐅᖃᐅᓯᖓᓂᒃ; 17#ᐊᑕᓃᑦ ᐂᑉᐸᖏᑦ 24:13; ᑯᕉᓂᑲ ᐂᑉᐸᖏᑦ 36:10.ᑕᑯᒋᑦ ᐅᓪᓗᐃᑦ ᓇᓪᓕᐅᑎᔪᒫᕐᐳᑦ, ᐊᖓᔪᖅᑳᕐᔪᐊᑉ ᐃᒡᓗᖓᓃᑦᑐᓕᒫᑦ, ᓯᕗᓕᕕᓂᕐᐱᓪᓗ ᑲᑎᕐᓱᐊᕆᓯᒪᔭᖏᑦ ᐅᓪᓗᒥ ᑎᑭᓪᓗᒍ ᐹᐱᓘᓂᒧᑦ ᐊᐅᓪᓚᕈᑦᔭᐅᔪᒫᕐᐳᑦ, ᐊᑕᐅᓯᕐᒥᒡᓘᓐᓃᑦ ᐊᒥᐊᒃᑯᔭᐅᖏᓪᓗᑎᒃ, ᐊᑕᓂᖅ ᑍᒫᒃ ᐅᖃᕐᐳᖅ. 18#ᐊᑕᓃᑦ ᐂᑉᐸᖏᑦ 24:14,15; ᑖᓂᐊᓕ 1:1-7.ᐃᕝᕕᓪᓗ ᓇᖕᒥᓂᖅ ᐃᕐᓂᑎᑦ, ᕿᑐᕐᖓᕐᑖᕆᓯᒪᔭᑎᑦ, ᐊᐅᓪᓚᕈᑦᔭᐅᖃᑕᐅᔪᒫᕐᐳᑦ ᐹᐱᓘᓂᒥᐅᓪᓗ ᐊᖓᔪᖅᑳᕐᔪᐊᖓᑦᑕ ᐃᒡᓗᖓᓂ ᕿᑐᕐᖏᔪᓐᓁᓪᓕᑎᑕᐅᓯᒪᓗᑎᒃ ᐱᔨᑦᓯᕋᕐᑎᑐᐃᓐᓇᐅᓕᕈᒫᕐᐳᑦ.”
19ᐊᖓᔪᖅᑳᕐᔪᐊᖅ ᕼᐃᓯᑬᐊ ᐅᖃᕐᐳᖅ ᐂᓮᐊᓯᒧᑦ, “ᐊᑕᓂᐅᑉ ᐅᖃᐅᓯᕆᔭᖓ ᐅᖃᐅᓯᕆᔧᑦ ᓈᒻᒪᒃᐳᖅ.” ᐃᓱᒪᓚᐅᕋᒥ, “ᑕᒪᓐᓇ ᖃᓄᐃᓐᖏᓚᖅ ᐃᓱᒫᓗᓇᖏᑦᑐᒥ ᓴᐳᑦᔭᐅᓯᒪᓇᕐᑐᒥᓗ ᐃᓅᓂᓐᓂ ᐃᓅᓚᐅᕈᒪ.”
ᕼᐃᓯᑬᐊᐅᑉ ᐊᖓᔪᖅᑳᕐᔪᐊᖑᓂᖓᑕ ᐃᓱᓕᓐᓂᖓ
ᑯᕉᓂᑲ ᐂᑉᐸᖏᑦ 32:32-33
20ᐊᖓᔪᖅᑳᕐᔪᐊᑉ ᕼᐃᓯᑬᐊᐅᑉ ᐱᓂᐊᕐᓂᕆᓯᒪᔭᖏᑦ ᐊᔪᖏᑦᑐᐊᓘᓚᐅᕐᓂᖓᓗ, ᑕᓯᓕᐅᕐᓂᕕᓂᖓᓗ ᓄᓇᐅᑉ ᐃᓗᐊᒍᑦ ᑰᒡᕕᓕᐅᕐᓗᒍ ᑕᒪᒃᑯᐊᓕᒫᑦ ᑎᑎᕋᕐᑕᐅᓯᒪᕗᑦ ᔫᑕᐅᑉ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᑕᐅᕕᖏᓐᓂ. 21ᕼᐃᓯᑬᐊ ᑐᖁᓚᐅᕐᐳᖅ, ᐃᕐᓂᖓ ᒫᓇᓯ ᐊᖓᔪᖅᑳᕐᔪᐊᖑᓕᓚᐅᕆᕗᖅ ᐃᓂᖓᓂ.
Currently Selected:
ᐊᑕᓃᑦ ᐂᑉᐸᖏᑦ 20: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
