ᐊᑕᓃᑦ ᐂᑉᐸᖏᑦ 19
19
ᐊᖓᔪᖅᑳᕐᔪᐊᑉ ᕼᐃᓯᑬᐊᐅᑉ ᐂᓮᐊᓯᒥᒃ ᐃᓱᒪᓯᐅᕆᓂᖓ
ᐂᓮᐊᓯ 37:1-7
1ᐊᖓᔪᖅᑳᕐᔪᐊᖅ ᕼᐃᓯᑬᐊ ᐅᓂᑳᕐᑕᖏᓐᓂᒃ ᑐᓴᕇᕋᒥ ᐊᓐᓄᕌᓂ ᐊᓕᒃᐰᑦ, ᕿᒃᓵᒃᑐᕐᓯᐅᑎᓂᒡᓗ ᐊᑎᓪᓗᓂ, ᑐᒃᓯᐊᕐᕕᒡᔪᐊᕐᒧᑦ ᑐᒃᓯᐊᕆᐊᕐᐳᖅ. 2ᐃᓔᐊᑭᒻ ᐊᖓᔪᖅᑳᖁᑎᓂ ᐊᖓᔪᖅᑳᕐᔪᐊᑉ ᐃᒡᓗᖓᓄᑦ ᓯᑉᓇᓗ ᐊᒡᓚᒃᑎᒻᒪᕆᒃ, ᑐᓂᕐᕈᓯᕐᑎᑦᓯᔩᓪᓗ ᐃᓄᑐᖃᐅᓂᖏᑦ, ᑎᓕᕔᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ ᐂᓮᐊᓯᒧᑦ ᐂᒨᓯᐅᑉ ᐃᕐᓂᖓᓄᐊᖁᓪᓗᒋᑦ ᑖᒃᑯᐊ ᐊᑐᕆᓪᓗᑎᒃ ᐊᓐᓄᕌᓂᒃ ᕿᒃᓵᒃᑐᕐᓯᐅᑎᓂᒃ. 3ᐃᒫᒃ ᐅᖃᐅᑎᕚ, “ᕼᐃᓯᑬᐊ ᐅᖃᕐᐳᖅ, ᐅᓪᓗᒥ ᐅᖁᒤᑦᑐᒦᕝᕕᒃ ᓇᓪᓕᐅᓯᒪᕗᖅ ᓱᒋᐊᕐᑕᐅᒐᑦᑕ ᑲᓐᖑᓇᕐᑐᒦᑎᑕᐅᓕᕐᐳᒍᑦ, ᐊᕐᓇᒥᒃ ᐊᑦᔨᖃᓕᕐᐳᒍᑦ ᐃᕐᓂᓱᒃᑲᓗᐊᕐᓗᓂ ᐃᕐᓂᔪᓐᓇᓐᖏᐅᒪᔪᑎᑐᑦ ᓵᓐᖐᓗᐊᕐᓂᕐᒧᑦ. 4ᐃᒻᒪᖄ ᐊᑕᓂᐅᑉ ᒎᑎᑦᓯ ᑐᓵᓚᐅᕐᐹ ᕌᑉᓴᑭᐅᑉ ᐅᖃᐅᓯᖏᑦ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᖃᐅᓯᐅᖁᓚᐅᕐᑕᖏᑦ ᒎᑎᒥᒃ ᐆᒪᔪᒥᒃ ᒥᑕᐅᑎᖃᕐᑐᓂᒃ, ᐊᑕᓂᐅᑉ ᒎᑎᕕᑦ ᑕᒪᒃᑯᐊ ᐅᖃᐅᓯᐅᔪᑦ ᐅᕙᑦᑎᓐᓄᑦ ᒥᑕᐅᑎᖃᕐᓗᑎᒃ ᓱᒋᐊᕐᓕᒋᑦ ᑍᒤᑦᑐᓂᒃ ᐅᖃᓪᓚᒃᑐᕕᓃᒃ, ᑍᒤᒻᒪᑦ ᐃᓄᖁᑎᑦᑕ ᐊᒥᐊᒃᑯᖏᑦ ᒎᑎᒧᑦ ᑐᒃᓯᐅᑎᒃᑭᑦ.” 5ᐊᖓᔪᖅᑳᕐᔪᐊᕐᒥᑦ ᕼᐃᓯᑬᐊᒥᑦ ᐱᓯᒪᔪᑦ ᐂᓮᐊᓯᒧᑦ ᕾᖕᒪᑕ, 6ᐂᓮᐊᓯᐅᑉ ᐃᒫᒃ ᑭᐅᕔᑦ, “ᐊᖓᔪᖅᑳᕐᔪᐊᖅ ᐅᖃᐅᑎᓯᐅᒃ, ᐊᑕᓂᐅᑉ ᐃᒫᒃ ᐅᖃᐅᑎᖁᕚᑎᑦ: ‘ᓯᕘᕋᓇᒃ ᐅᖃᐅᓰᑦ ᑐᓴᕐᑕᓯ ᐱᓪᓗᒋᑦ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑕ ᐱᔨᒥᒍᑦ ᐅᖃᕐᓂᕐᓘᑎᒋᒐᓗᐊᕐᐸᖓ. 7ᑕᑯᒋᑦ, ᐊᓂᕐᓂᕐᒥᒃ ᑐᓂᓯᕕᒋᔪᒪᕙᕋ, ᑐᓴᒐᒃᓴᒥᒃ ᑐᓴᕐᑎᑦᓱᒪᒐᒃᑯ ᓄᓇᒥᓄᑦ ᐅᑎᕈᑎᒃᓴᖓᓂᒃ; ᓄᓇᒥᓂ ᓇᖕᒥᓂᕐᒥᓂ ᑐᖁᑕᐅᔪᒫᕐᒪᑦ ᓴᕕᒡᔪᐊᒧᑦ.’”
ᐊᓯᕆᐊᒥᐅᑦ ᓯᕘᕋᓮᒃᑲᓐᓂᕐᓂᖓᑦ
ᐂᓮᐊᓯ 37:8-20
8ᕌᑉᓴᑭ ᐅᑎᓚᐅᕐᐳᖅ, ᖃᐅᔨᓪᓗᓂᓗ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐅᓇᑕᖃᑎᖃᕐᑐᖅ ᓛᑉᓇᒥᐅᓂᒃ; ᑐᓴᓚᐅᕋᒥ ᐊᖓᔪᖅᑳᕐᔪᐊᑉ ᓚᑮᓯᒥᑦ ᐊᐅᓪᓚᕐᓯᒪᓕᕐᓂᖓᓂᒃ. 9ᐊᖓᔪᖅᑳᕐᔪᐊᖅ ᑐᓴᕋᒥ ᐃᑎᐅᐱᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᑎᕼᐊᑲᐅᑉ ᐱᓪᓗᒍ, “ᑕᑯᒋᑦ, ᑖᓐᓇ ᐃᓕᑦᓯᓐᓂᒃ ᐅᓇᑕᕆᐊᓕᕐᐳᖅ,” ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᕼᐃᓯᑬᐊ ᔫᑕᐅᑉ ᐊᖓᔪᖅᑳᕐᔪᐊᖓᑦ ᑎᑎᕋᕐᑕᒥᓂᒃ ᐊᐅᓪᓚᕐᑎᑦᓯᕕᒋᕚ. 10ᐃᒫᒃ ᐅᖃᕐᑐᒃᓴᐅᕗᓯ ᕼᐃᓯᑬᐊᒧᑦ, “ᒎᑎ ᑕᑎᒋᔭᓯ ᐅᒃᐱᕆᑦᑍᓕᓯᐅᒃ ᐅᖃᕋᓗᐊᕐᐸᑦ, ᔨᕉᓴᓕᒥᐅᑦ ᐱᔭᐅᑦᔮᖏᑦᑐᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ. 11ᑕᑯᒋᑦ, ᑐᓴᐅᒪᒐᑦᓯ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᓇᖕᒥᓇᖏᓐᓂᖓᓂᒃ ᓄᓇᓕᖕᓂᒃ ᐊᓯᕈᐃᒋᐊᑐᐊᕌᖓᒥ. ᐊᓐᓇᒍᓐᓇᕐᓂᐊᕋᓱᒋᕕᓰ ᐅᕙᓐᓂᑦ? 12ᓯᕗᓕᒃᑲ ᐊᓯᕈᐃᖃᑦᑕᕐᓯᒪᕗᑦ ᒎᔭᓂᒥᐅᓂᒃ, ᕼᐊᕋᓐᒥᐅᓂᒃ, ᕇᔨᑉᒥᐅᓂᒃ, ᑐᖁᕅᓯᒪᓪᓗᑎᒡᓗ ᐱᐊᔅᓰᑕᒥᐅᓂᒃ ᑎᓚᓵᒥ ᓄᓇᖃᕐᑐᓂᒃ ᐃᓅᖃᑎᒌᒡᔪᐊᑦ ᓇᓪᓕᐊᑦ ᒎᑎᒋᔭᒥᖕᓄᑦ ᓴᐳᑎᔭᐅᔪᓐᓇᓚᐅᓐᖏᓚᑦ. 13ᓇᐅᒃᑍᒪ ᕼᐊᒫᑎᒥᐅᑦ ᐊᖓᔪᖅᑳᕐᔪᐊᖓᑦ, ᐋᕐᐹᑦᒥᐅᓪᓗ ᐊᖓᔪᖅᑳᕐᔪᐊᖓᑦ, ᓯᑉᕼᐊᕋᕔᒥᐅᓪᓗ ᐊᖓᔪᖅᑳᕐᔪᐊᖓᑦ, ᕼᐄᓇᒥᐅᓪᓗ ᐊᖓᔪᖅᑳᕐᔪᐊᖓᑦ, ᐂᐅᐊᒥᐅᓪᓗ ᐊᖓᔪᖅᑳᕐᔪᐊᖓᑦ?”
14ᐊᖓᔪᖅᑳᕐᔪᐊᑉ ᕼᐃᓯᑬᐊᐅᑉ ᑎᑎᖅᑲᐅᓯᐊᓂ ᐱᒐᒥᒋᑦ ᐅᖃᓕᒫᕐᐰᑦ; ᐅᖃᓕᒫᕇᕋᒥᒋᑦ ᐊᑕᓂᐅᑉ ᐃᒡᓗᖓᓄᐊᕐᓗᓂ ᑎᑎᖅᑲᐅᓯᐊᓂ ᐊᑕᓂᐅᑉ ᓵᖓᓄᑦ ᐃᓯᕕᑉᐰᑦ. 15#ᒨᓯᓯ ᐂᑉᐸᖏᑦ 25:22.ᕼᐃᓯᑬᐊᓗ ᑐᒃᓯᐊᕐᓗᓂ ᐊᑕᓂᕐᒧᑦ ᐅᖃᕐᐳᖅ, “ᐊᑕᓃᖅ, ᐃᓴᕆᐊᓕᒥᐅᑦ ᒎᑎᖓᑦ, ᓯᕈᐲᒻ ᖁᓛᓂ ᐃᒃᓯᕙᐅᑕᕐᔪᐊᖃᕐᑐᑎᑦ, ᒎᑎᐅᕗᑎᑦ ᐊᓯᖃᕐᓇᒃ, ᓄᓇᒥᐅᑦ ᐊᖓᔪᖅᑳᕐᔪᐊᖃᕐᕕᓕᒫᖏᓐᓄᑦ; ᕿᓚᒡᓗ ᓄᓇᓗ ᓴᓇᓯᒪᒐᕕᒋᒃ. 16ᓯᐅᑏᒃᑭᒃ ᒪᓂᓗᒋᒃ, ᐊᑕᓃᖅ ᑐᓴᕆᑦ; ᐅᐃᓪᓗᑎᑦ, ᐊᑕᓃᖅ ᑕᑯᓴᒃᑭᑦ ᓯᓇᑯᕆᑉ ᐅᖃᐅᓯᖏᑦ, ᓈᓚᓛᐅᒃᑭᑦ ᒎᑎᒥᒃ ᐆᒪᔪᒥᒃ ᒥᑕᐅᑎᖃᕐᓗᓂ ᐅᖃᐅᓯᖃᕐᒪᑦ. 17ᓱᓕᔫᒐᓗᐊᖅ ᐊᑕᓃᖅ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖏᑦ ᐃᓅᖃᑎᒌᒡᔪᐊᑦ ᓄᓇᖁᑎᖏᓐᓂᒃ ᓱᓇᐅᔪᓐᓃᕐᑎᑦᓯᓯᒪᔪᑦ ᐊᓯᕈᐃᓪᓗᑎᒃ. 18ᒎᑎᒋᔭᖏᓐᓂᒡᓗ ᐃᑯᐊᓪᓔᓪᓗᑎᒃ ᓄᖑᕅᓯᒪᕗᑦ, ᒎᑎᓪᓚᕆᐅᖏᒻᒪᑕ, ᕿᔪᑐᐃᓐᓇᐅᕗᑦ ᐅᔭᕋᐅᓪᓗᑎᒡᓗ ᐃᓄᑐᐃᓐᓇᕐᓄᑦ ᓴᓇᔭᐅᓯᒪᒐᒥᒃ; ᑍᒤᒻᒪᑦ ᑕᒪᒃᑯᐊ ᐊᓯᕈᕐᑕᐅᓯᒪᕗᑦ. 19ᐊᑏ ᒫᓐᓇ, ᐊᑕᓃᖅ ᒎᑎᒋᔭᕗᑦ, ᓴᐳᑎᓚᐅᕐᑎᒍᑦ ᕿᓄᕕᒋᕙᒋᑦ, ᐊᖓᔪᖅᑳᕐᔪᐊᑉ ᐱᔪᓐᓇᕐᓂᖓᓂᑦ, ᓄᓇᒥ ᐊᖓᔪᖅᑳᕐᔪᐊᖃᕐᕕᐅᔪᓕᒫᑦ ᖃᐅᔨᓕᖁᓪᓗᒋᑦ ᐃᕝᕕᑐᐊᖅ, ᐊᑕᓃᖅ ᒎᑎᑐᐊᖑᒐᕕᑦ.”
ᐂᓮᐊᓯᐅᑦ ᑐᓴᕐᑎᑦᓯᓂᖓ ᐊᖓᔪᖅᑳᕐᔪᐊᕐᒥᒃ
ᐂᓮᐊᓯ 37:21-38
20ᑕᕝᕙ ᐂᓮᐊᓯ ᐂᒨᓯᐅᑉ ᐃᕐᓂᖓ ᐊᖓᔪᖅᑳᕐᔪᐊᑉ ᕼᐃᓯᑬᐊᐅᑉ ᑐᓴᕆᐊᖃᕐᑕᖏᓐᓂᒃ ᐅᖃᕆᐊᕐᑐᕐᑎᑦᓯᕗᖅ, “ᐃᒫᒃ ᑕᕝᕙ ᐊᑕᓂᖅ, ᐃᓴᕆᐊᓕᐅᑉ ᒎᑎᖓᑦ ᐅᖃᕐᐳᖅ: ᑐᒃᓯᐊᕐᓂᕆᔭᑎᑦ ᑐᓴᕐᐸᒃᑲ ᓯᓇᑯᕆᑉᒥᒃ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᐱᑦᔪᑎᖃᕐᑎᓪᓗᑎᑦ. 21ᐃᒫᒃ ᐊᑕᓂᐅᑉ ᐅᖃᐅᓯᒃᓴᖃᕐᕕᒋᕚ: ᑖᑦᓱᒪ ᓇᕐᕈᒋᕚᑎᑦ, ᒥᑕᐅᑎᒋᓪᓗᑎᓪᓗ ᐅᐃᒡᒐᓲᔪᑎᑦ ᓮᐅᓂᐅᑉ ᐸᓂᖓ; ᐅᖃᐅᑎᒋᕚᑎᑦ ᖃᐅᔨᓐᖏᑎᓪᓗᑎᑦ ᔨᕉᓴᓕᐅᑉ ᐸᓂᖓ. 22ᑭᓇᒥᒃ ᒥᑕᐅᑎᒃᓴᕋᓱᒋᒐᕕᑦ ᐊᑭᕋᕐᑐᕋᓱᒋᓪᓗᑎᓪᓘ? ᑭᓇᒧᑦ ᓂᐱᖅᑯᕐᑐᓪᓗᑎᑦ ᓂᓪᓕᐊᓇᓱᒋᕕᑦ ᓂᐊᖁᐃᓪᓗ ᖁᒻᒧᖓᑎᓪᓗᒍ? ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᓄᑦ! 23ᐅᖃᕆᐊᕐᑐᕐᑎᑕᑎᑦ ᐊᑕᓂᕐᒥᒃ ᒥᑕᐅᑎᖃᕐᓯᒪᕗᑦ, ᐅᖃᕐᓯᒪᖕᒥᒐᕕᑦ, ‘ᐊᒃᓴᓗᐊᓕᖁᑎᓐᓄᑦ ᐅᓄᕐᑐᓄᑦ ᖃᖅᑲᖏᑕ ᐳᕐᑐᓂᕐᐹᖏᑕ ᖄᖏᓐᓄᐊᕐᓯᒪᕗᖓ, ᓕᐸᓇᓂᐅᑉ ᐅᖓᓯᖕᓂᕐᐹᖏᓐᓄᑦ; ᓇᐹᕐᑐᓂᒃ ᓰᑕᕆᓂᒃ ᑕᑭᓂᕐᐹᓂᒃ ᓇᑲᑎᕆᓯᒪᕗᖓ, ᓇᐹᕐᑐᐃᓪᓗ ᕿᔪᑦᑎᐊᕙᐅᓂᕐᐹᑦ ᐱᓯᒪᓪᓗᒋᑦ; ᐅᖓᓯᒃᑐᓕᐊᕐᓯᒪᕗᖓ ᓇᐹᕐᑐᒐᓴᒡᔪᐊᓗ ᐊᑯᓐᓂᖃᑦᓯᐊᖏᓐᓂᕐᐹᑦ ᐃᓗᐊᓄᐊᕐᓯᒪᓪᓗᖓ. 24ᐃᒥᕐᑕᕐᕕᓕᐅᕐᓯᒪᕗᖓ ᐃᑎᕐᓴᓕᐅᕆᓪᓗᖓ ᐃᒥᖃᑦᑕᕐᓯᒪᓪᓗᖓᓗ ᐅᖓᓯᒃᑐᒥᐅᑦ ᐃᒥᖏᓐᓂᑦ, ᓴᓗᐊᕐᑎᑦᓯᓯᒪᓪᓗᖓᓗ ᐃᑎᒐᓐᓄᑦ ᑐᖕᒪᑐᐃᓐᓇᕐᓗᒋᑦ ᐄᑦᔨᑉᑎᒥᐅᑦ ᑰᓕᒫᖏᑦ ᐱᓱᒡᕕᒋᑐᐃᓐᓇᕐᓗᒋᑦ.’
25“ᑐᓴᓚᐅᕐᓯᒪᖏᓐᓇᕖᑦ ᑕᒪᒃᑯᐊᓕᒫᑦ ᐅᕙᓐᓄᑦ ᐊᖅᑭᒃᓱᕐᑕᐅᓯᒪᓂᖏᓐᓂᒃ ᑍᑦᓱᒪᓂᐊᓗᒃ? ᑕᒪᓐᓇ ᐃᓱᒪᒃᓴᕐᓯᐅᕈᑎᒋᓯᒪᒐᒃᑯ ᑍᑦᓱᒪᓂᐊᓗᖕᓂᑦ ᒫᓐᓇ ᓴᖅᑭᑎᓯᒪᕙᕋ, ᓄᓇᓖᑦ ᐱᔭᐅᑦᔧᕐᓯᒪᔫᒐᓗᐊᑦ ᓯᖁᑦᑎᕐᑕᐅᓪᓗᑎᒃ ᓄᓇᓕᕕᓂᑐᐃᓐᓇᓐᖑᕐᑎᑕᐅᖁᓪᓗᒋᑦ ᐃᓕᖕᓄᑦ. 26ᐃᓄᖏᑦ ᓄᑭᖏᕈᑎᓚᐅᕐᐳᑦ ᓴᐱᓕᕐᓗᑎᒃ ᓇᓗᓕᕐᓗᑎᒡᓗ, ᐱᕈᕐᑐᑎᑐᑦ ᓇᑎᕐᓇᒥ ᐃᕕᒃᑎᑐᑦ ᐱᕈᓕᓵᕐᑐᑎᑐᑦ, ᐃᕕᒃᑎᑐᓪᓗ ᐃᒡᓗᐃᑦ ᖄᖏᓐᓂ ᐱᕈᕐᑐᑎᑐᑦ, ᑐᖁᓕᔪᑎᑐᑦ ᐱᕈᕇᓚᐅᕋᑎᒃ.
27“ᖃᐅᔨᒪᕙᒋᑦ ᐃᒃᓯᕚᕐᑎᓪᓗᑎᑦ ᐊᓂᑎᓪᓗᑎᑦ ᐃᑎᕐᑎᓪᓗᑎᓪᓗ, ᓂᓐᖓᐅᒪᓂᕆᔧᓪᓗ ᐅᕙᓐᓄᑦ. 28ᓂᓐᖓᐅᒪᓯᒐᕕᑦ ᐅᕙᓐᓄᑦ ᐃᓕᕋᓇᕐᓂᕆᔧᓪᓗ ᑐᓴᕐᓯᒪᕙᕋ, ᕿᖓᒃᑯᓪᓕ ᓂᒃᓯᒍᒫᕐᐸᒋᑦ ᖃᓃᓪᓗ ᓴᕕᕋᔭᓕᕐᓗᒍ ᕿᒻᒥᕐᔪᐊᒥᒃ ᐊᐅᓚᑦᓯᑦᔪᑎᐅᕙᒃᑐᒧᑦ ᐅᑎᕐᑎᓪᓗᑎᓪᓗ ᐊᖅᑯᑎᒃᑯᑦ ᑎᑭᕝᕕᒋᓚᐅᕐᑕᒃᑯᑦ.
29“ᐃᒫᒃ ᓇᓗᓁᒃᑯᑕᒃᓴᐅᕗᖅ ᐃᓕᖕᓄᑦ: ᐊᕐᕌᒍᒥ ᑕᕝᕙᓂ, ᐊᕐᕌᒎᔪᒫᕐᑐᒥᓗ ᐱᕈᕐᓰᕕᖕᒥᐅᖏᑦᑐᖅ ᑕᒫᓂᑐᐃᓐᓇᖅ ᐱᕈᕐᑐᕕᓂᕐᓂᒃ ᑭᓯᐊᓂ ᓂᕿᒃᓴᖃᕐᓂᐊᕐᐳᓯ, ᑭᓯᐊᓂ ᑕᒪᒃᑯᐊ ᑭᖑᓂᖓᓂ ᓇᖕᒥᓂᖅ ᑲᓐᖓᕐᓱᕐᑕᕕᓂᑦᓯᓐᓂᒃ ᑲᑎᕐᓱᐃᔪᓐᓇᕐᓯᔪᒫᕐᐳᓯ, ᐸᐅᕐᖓᓄᓪᓗ ᐱᕈᕐᓰᕕᓕᐊᕕᓂᑦᓯᓐᓄᑦ ᐸᐅᕐᖓᕐᑐᒐᒃᓴᖃᓕᕈᒫᕐᐳᓯ. 30ᔫᑕᒥ ᐊᒥᐊᒃᑰᔪᕕᓃᑦ ᐱᕈᕐᓯᐊᑎᑐᑦ ᐱᕈᓕᕈᒫᕐᐳᑦ ᑕᑭᔪᓂᒃ ᐊᒫᖃᕐᑐᑎᑐᑦ ᓄᓇᐅᑉ ᐃᓗᐊᓄᑦ ᐳᓚᒪᑦᓯᐊᕐᑐᓂᒃ, ᐸᐅᕐᖓᓄᓪᓗ ᐱᕈᕐᕕᐅᑦᓯᐊᕐᓗᑎᒃ. 31ᔨᕉᓴᓕᒻᒥᑦ ᐱᔪᓂᒃ ᐊᒥᐊᒃᑯᑦ ᐊᓂᔪᒫᕐᐳᑦ, ᓮᐅᓂᓗ ᐊᓐᓇᒃᓯᒪᔪᓂᒃ ᐃᓄᖃᓕᕈᒫᕐᐳᖅ. ᐊᑕᓂᖅ ᑍᒤᓕᐅᕈᒫᕐᒪᑦ. 32ᑍᒤᒻᒪᑦ ᑕᕝᕙ ᐊᑕᓂᐅᑉ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐅᖃᐅᓯᕆᓚᐅᕐᐹ, ᐃᒡᓗᒐᓴᒡᔪᐊᓄᑦ ᐃᑎᕐᓂᐊᓐᖏᓚᖅ ᖃᕐᔪᒥᒡᓘᓐᓃᑦ ᐊᑕᐅᓯᕐᒥᒃ ᐱᓯᒋᐊᕈᑎᖃᕐᓂᐊᓐᖏᓚᖅ, ᐅᓇᑕᕐᑎᒥᒃ ᐊᒡᕖᕋᐅᓯᔭᕐᑐᒥᒃ ᐊᑕᐅᓯᕐᒥᒡᓘᓐᓃᑦ ᐃᒡᓗᒐᓴᒡᔪᐊᑦ ᖃᓂᒋᔭᖓᓄᐊᕐᑐᖃᕐᓂᐊᓐᖏᓚᖅ, ᐊᕙᑕᖏᕐᓯᓯᒪᑦᔪᑎᓂᒃ ᐃᓂᓕᐅᕆᓯᒪᓂᐊᓐᖏᓚᑦ ᐊᔪᓕᕐᑎᑦᓯᓯᒪᑦᔪᑎᒋᓇᓱᐊᕐᑕᒥᓂᒃ. 33ᐊᖅᑯᑎᒃᑯᑦ ᑎᑭᕝᕕᒋᓚᐅᕐᑕᒥᒍᑦ, ᑕᒪᐅᓇᑦᓮᓐᓇᖅ ᐅᑎᕈᒫᕐᐳᖅ, ᐃᒡᓗᒐᓴᒡᔪᐊᓄᑦ ᐃᑎᖏᓪᓗᓂ, ᐊᑕᓂᖅ ᐅᖃᕐᐳᖅ. 34ᑖᒃᑯᐊ ᐃᒡᓗᒐᓴᒡᔪᐊᑦ ᓴᐳᑎᓯᒪᓂᐊᕋᒃᑭᑦ, ᐅᕙᖓ ᓇᖕᒥᓂᖅ ᐱᑦᔪᑎᒋᓗᖓ ᑍᕕᑎᓗ ᐱᑦᔪᑎᒋᓗᒍ.”
35ᐅᓐᓄᐊᒥ ᑍᑦᓱᒪᓂᑦᓮᓐᓇᖅ ᐊᑕᓂᐅᑉ ᐂᖏᓕᖓ ᐊᓯᕆᐊᒥᐅᑦ ᑕᖕᒫᕐᓯᒪᕕᖓᓄᐊᕐᓗᓂ ᐅᓇᑕᕐᑎᖁᑎᖏᓐᓂᒃ 185,000ᓂᒃ ᑐᖁᕅᓚᐅᕐᐳᖅ; ᖃᐅᑎᓪᓗᒍ ᐅᓪᓛᒃᑯᑦ ᑕᑯᔭᐅᕗᑦ, ᑎᒦᑦ ᑐᖁᖓᔪᐃᓐᓇᓕᒫᑦ. 36ᑕᕝᕙ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᓯᓇᑯᕆᑉ ᐅᑎᕆᐊᓕᓚᐅᕐᐳᖅ, ᐊᖏᕐᕋᓕᕐᓗᓂ ᓄᓇᒥᓄᑦ ᓂᓂᕕᒧᑦ. 37ᒎᑎᒥᓄᑦ ᓂᓱᕌᒃᒧᑦ ᑐᒃᓯᐊᕐᑎᓪᓗᒍ, ᐃᕐᓂᖏᒃᑕ ᒪᕐᕉᒃ ᐋᑕᕋᒥᓕᐅᑉ ᓴᕆᔨᕆᐅᓪᓗ ᓴᕕᒡᔪᐊᒥᖕᓄᑦ ᐊᑖᑕᑎᒃ ᑐᖁᑉᐹᒃ, ᓄᓇᒧᓪᓗ ᐊᕋᕌᑦᒧᑦ ᕿᒫᓪᓗᑎᒃ. ᐃᕐᓂᕆᖕᒥᔭᖓᑦᑕ ᐃᓴᕼᐊᑕᓂᐅᑉ ᐊᖓᔪᖅᑳᕐᐅᓂᖓ ᐃᓇᒋᕐᐹ.
Currently Selected:
ᐊᑕᓃᑦ ᐂᑉᐸᖏᑦ 19: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
