ᐊᑕᓃᑦ ᐂᑉᐸᖏᑦ 13
13
ᐊᖓᔪᖅᑳᕐᔪᐊᖅ ᔨᕼᐅᕼᐊᔾ ᐃᓴᕆᐊᓕᒥ
1ᔪᐊᓯᐅᑉ ᐊᖓᔪᖅᑳᕐᔪᐊᖑᓂᖓᑕ 23ᒋᓕᕐᑕᖓᓂ ᐊᕼᐊᔧᐊᐅᑉ ᐃᕐᓂᖓᑕ ᔫᑕᒥ ᐊᖓᔪᖅᑳᕐᔪᐊᖑᔫᑉ, ᔨᕼᐅᐊᕼᐊᔾ ᔨᕼᐆᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᐃᓴᕆᐊᓕᒥ ᓴᒥᐊᕆᐊᒦᑦᑐᒥ, ᐊᖓᔪᖅᑳᖑᓚᐅᕐᐳᕐᓗ ᐊᕐᕌᒍᓂᒃ 17ᓂᒃ. 2ᐊᑕᓂᐅᑉ ᓵᖓᓂ ᐱᓂᐊᕐᓂᖃᓚᐅᕐᐳᖅ ᐱᐅᖏᑦᑐᒥᒃ, ᔨᕈᐳᐊᒻ ᐊᔪᕐᑐᓕᓂᖓ ᒪᓕᒡᓗᒍ ᓂᐹᑎᐅᑉ ᐃᕐᓂᖓᑕ, ᑖᑦᓱᒪ ᐃᓴᕆᐊᓕᒥᐅᑦ ᐊᔪᕐᑐᓕᑎᓚᐅᕐᒪᒋᑦ; ᐊᔪᕐᑐᓕᓂᕐᒥᒡᓗ ᕿᒤᓚᐅᕋᓂ. 3ᐊᑕᓂᐅᓪᓗ ᐃᓴᕆᐊᓕᒥᐅᑦ ᓂᓐᖓᐅᒪᕝᕕᒋᓕᓚᐅᕐᐰᑦ, ᐊᑯᓂᓗ ᕼᐊᔧᐅᓪᒧᑦ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐃᕐᓂᖓᓄᓪᓗ ᐱᓐ-ᕼᐊᑖᑦᒧᑦ ᓵᓚᒋᔭᐅᓯᒪᑎᓚᐅᕐᐰᑦ. 4ᑕᕝᕙ ᔨᕼᐅᐊᕼᐊᔨᐅᑉ ᐊᑕᓂᖅ ᑐᒃᓯᐊᕐᕕᒋᖕᒪᒍ, ᐊᑕᓂᐅᑉ ᑐᓴᕐᐹ ᑐᒃᓯᐊᕐᓂᖓᓂᒃ; ᖃᐅᔨᒪᒐᒥ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐃᓴᕆᐊᓕᒥᐅᑦ ᐊᖏᔪᒥᒃ ᐅᖁᒤᒃᓴᕐᑎᓚᐅᕐᒪᒋᑦ. 5ᑍᒤᒻᒪᑦ ᐊᑕᓂᐅᑉ ᐃᓴᕆᐊᓕᒥᐅᑦ ᓴᐳᑦᔨᔨᒃᓴᖓᓂᒃ ᑎᓕᓯᕕᒋᓚᐅᕐᐰᑦ, ᓯᕆᐊᒥᐅᓄᑦ ᑎᒍᒥᐊᕐᑕᐅᔪᓐᓃᖁᓪᓗᒋᑦ; ᑕᕝᕙ ᐃᓴᕆᐊᓕᒥᐅᑦ ᐅᑎᕈᓐᓇᕐᓯᓚᐅᕐᐳᑦ ᓄᓇᒋᕙᓚᐅᕐᑕᒥᖕᓄᑦ ᐊᖏᕐᕋᕐᓯᒪᔪᓐᓇᓕᕆᓪᓗᑎᒃ. 6ᔨᕈᐳᐊᒻᓕ ᐃᓚᖏᑕᓗ ᐊᔪᕐᑐᓕᑦᔪᑎᒋᓚᐅᕐᑕᖏᓐᓂᒃ ᓴᑯᑦᓯᓚᐅᓐᖏᓚᑦ, ᐃᓴᕆᐊᓕᒥᐅᓂᒃ ᐊᔪᕐᑐᓕᓂᕐᒥ ᐃᓅᑎᑦᓯᑦᔪᑎᒋᓚᐅᕐᑕᖏᓐᓂᒃ, ᐃᓴᕆᐊᓕᒥᐅᑦ ᑲᔪᓯᑐᐃᓐᓇᓚᐅᕐᐳᑦ ᑕᒪᑐᒧᖓ, ᓇᐸᔪᐊᓗᒡᓗ ᒎᑎᓐᖑᐊᑉ ᓇᓗᓁᒃᑯᑕᖓ ᐊᓯᕋᒥᒃ ᑍᔭᐅᔪᖅ ᓴᒥᐊᕆᐊᒥ ᓇᐸᑎᑕᐅᖏᓐᓇᓚᐅᕐᐳᖅ. 7ᔨᕼᐅᐊᕼᐊᔨᐅᑉ ᐅᓇᑕᕐᑎᖁᑎᖏᑦ ᐊᒥᐊᒃᑯᑐᐊᖃᓚᐅᕐᐳᑦ 50ᓂᒃ ᕿᒥᕐᔪᐊᓕᖕᓂᒃ, 10ᓂᒃ ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓃᑦᑐᓂᒃ 10,000ᓂᒡᓗ ᐅᓇᑕᕐᑎᓂᒃ ᐱᓱᒃᑎᓂᒃ; ᓯᕆᐊᒥᐅᑦ ᓄᖑᕋᓚᐅᕐᒪᒋᑦ ᓯᖃᓕᓯᔨᓄᑦ ᓯᖃᓪᓕᔭᐅᔪᑎᑐᑦ ᓱᓇᐅᒋᔭᐅᒐᑎᒃ. 8ᔨᕼᐅᐊᕼᐊᔨᐅᑉ ᐱᓂᐊᕐᓂᕆᓯᒪᔭᖏᑦ ᑎᑎᕋᕐᑕᐅᓯᒪᕗᑦ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖏᑕ ᐱᓂᐊᕐᓂᕆᖃᑦᑕᕐᓯᒪᔭᖏᑕ ᑎᑎᕋᕐᑕᐅᓯᒪᕕᖏᓐᓂ. 9ᔨᕼᐅᕼᐊᔨᐅᑉ ᓯᕗᓕᕕᓂᓂ ᐃᓚᒋᓪᓗᒋᑦ ᒥᕐᖑᐃᕐᓯᖃᑎᒋᕔᑦ, ᐃᓗᕕᕐᑕᐅᓯᒪᕗᕐᓗ ᓴᒥᐊᕆᐊᒥ; ᐃᕐᓂᖓᑕᓗ ᔪᐊᓯᐅᑉ ᐃᓇᖏᓚᐅᕐᐹ ᐊᖓᔪᖅᑳᕐᔪᐊᖑᓂᖓ.
ᔨᕼᐅᐊᕼᐊᔨᐅᑉ ᐊᖓᔪᖅᑳᕐᔪᐊᖑᓕᕐᓂᖓ ᐃᓴᕆᐊᓕᒥᐅᓄᑦ
10ᔪᐊᓯᐅᑉ ᔫᑕᒥᐅᓄᑦ ᐊᖓᔪᖅᑳᕐᔪᐊᖑᓂᖓᑕ 37ᖓᓐᓂ. ᔨᕼᐅᐊᓯ ᔨᕼᐅᐊᕼᐊᔨᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᐃᓴᕆᐊᓕᓄᑦ ᓴᒥᐊᕆᐊᒥ ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒍᓂᒃ 16ᓂᒃ. 11ᐊᑕᓂᐅᑉ ᓵᖓᓂ ᓈᒻᒪᖏᑦᑐᓕᓚᐅᕐᐳᖅ ᔨᕈᐳᐊᒻᓗ ᓂᐹᑎᐅᑉ ᐃᕐᓂᖓᑕ ᐊᔪᕐᑐᓕᓂᕆᓚᐅᕐᑕᖏᑕ ᐱᐅᓯᕆᔭᖏᓐᓂᒃ ᒪᓕᑐᐃᓐᓇᓚᐅᕆᕗᖅ ᐃᓴᕆᐊᓕᒥᐅᓂᒃ ᐊᔪᕐᑐᓕᓂᕐᒥ ᐃᓅᑎᑦᓯᓂᕆᓚᐅᕐᑕᖓᑐᑦ, ᕿᒤᓯᒪᓚᐅᖏᓐᓇᒥ. 12ᔪᐊᓯᐅᑉ ᐊᖓᔪᖅᑳᕐᔪᐊᖑᓪᓗᓂ ᐱᓂᐊᕐᓂᕆᖃᑦᑕᕐᓯᒪᔭᖏᑦ ᐊᑑᑎᖃᑦᑕᕐᓯᒪᔭᖏᓪᓗ ᐅᓇᑕᖃᑎᖃᖃᑦᑕᕐᓯᒪᓂᖏᓪᓗ ᐊᒪᔧᐊᒥᒃ ᔫᑕᒥᐅᑦ ᐊᖓᔪᖅᑳᕐᔪᐊᖓᓐᓂᒃ, ᑕᒪᕐᒥᒃ ᑎᑎᕋᕐᑕᐅᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑦᑕ ᐱᓂᐊᕐᓂᕆᓯᒪᔭᖏᑕ ᑎᑎᕋᕐᑕᐅᓯᒪᕕᖏᓐᓂ. 13ᔪᐊᓯᐅᑉ ᓯᕗᓕᕕᓂᖏᑕ ᐃᓗᕕᕐᑕᐅᕕᒋᓯᒪᔭᖓᓂ ᐃᓂᖃᖃᑕᐅᕗᖅ ᔨᕈᐳᐊᒧᓪᓗ ᐊᖓᔪᖅᑳᕐᔪᐊᖑᓂᖓ ᐃᓇᖏᕐᑕᐅᓯᒪᕗᖅ ᔪᐊᓯ ᐃᓗᕕᕐᑕᐅᓯᒪᕗᖅ ᓴᒥᐊᕆᐊᕐᒥ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖏᑕ ᐃᓗᕕᕐᑕᐅᓯᒪᕕᒋᔭᖏᓐᓂ.
ᐃᓔᓴᐅᑉ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᑐᖁᓂᖓ
14 #
ᐊᑕᓃᑦ ᐂᑉᐸᖏᑦ 2:12. ᐃᓔᓴ ᖃᓂᒪᓕᓚᐅᕐᐳᖅ ᑐᖁᑦᔪᑎᒋᓂᐊᓕᕐᑕᒥᓂᒃ. ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᔪᐊᓯᐅᑉ ᑕᑯᔭᕐᑐᓚᐅᕐᐹ ᑕᑯᒐᒥᐅᒡᓗ ᕿᐊᑦᔪᑎᒋᕚ, ᐅᖃᐅᑎᓪᓗᒍᓗ, “ᐊᑖᑖᒃ, ᐊᑖᑖᒃ! ᐃᓴᕆᐊᓕᒥᐅᑉ ᕿᒧᒃᓯᐅᑎᖁᑎᖓᑦ ᕿᒥᕐᔪᐊᖁᑎᖓᓪᓗ!” 15ᐃᓔᓴᐅᑉ ᐅᖃᐅᑎᕚ, “ᐱᑎᒃᓯᒥᒃ ᖃᕐᔪᓂᒡᓗ ᑎᒍᓯᓗᑎᑦ”; ᔨᕼᐅᕼᐊᔨᓗ ᐱᑎᒃᓯᒥᒃ ᖃᕐᔪᓂᒡᓗ ᑎᒍᓯᕗᖅ. 16ᐃᓔᓴᐅᑉ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᐅᖃᐅᑎᓕᕐᐹ ᐱᑎᒃᓯ ᕿᓗᓕᕈᒃ, ᐃᓔᓴᐅᑉ ᐊᖓᔪᖅᑳᕐᔪᐊᖅ ᐊᒡᒐᖏᑎᒍᑦ ᐊᒃᑐᕐᐹ. 17ᐅᖃᐅᑎᓪᓗᒍᓗ, “ᐃᒐᓛᖅ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ ᒪᑐᐃᕈᒃ,” ᒪᑐᐃᕐᒪᒍᓗ ᐃᓔᓴᐅᑉ ᐅᖃᐅᑎᕚ, “ᐱᑎᒋᐊᓕᕆᑦ.” ᐱᑎᒋᐊᕐᐳᖅ ᑕᕝᕙ. ᐱᑎᒋᐊᕐᒪᑦ ᐃᓔᓴ ᐅᖃᕐᐳᖅ, “ᐊᑕᓂᐅᑉ ᓴᐳᑦᔨᓂᖓᑕ ᖃᕐᔪᖓ, ᖃᕐᔫᕗᖅ ᓯᕆᐊᒥᐅᓂᒃ ᓵᓚᖃᕐᓂᐊᕐᑐᖅ! ᐱᓇᓱᐊᕐᓂᖓᓐᓂᑦ ᑖᑦᓱᒧᖓ ᓯᕆᐊᒥᐅᑉ ᐱᒋᐊᕐᑕᒃᓴᕆᕙᑎᑦ ᐊᐱᒃᒦᑦᑐᓕᒫᑦ ᓄᖑᓪᓗᒋᑦ.” 18ᐃᓔᓴᐅᑉ ᐅᖃᐅᑎᕚ, “ᖃᕐᔪᓂᒃ ᑎᒍᓯᓚᐅᕆᑦ!” ᖃᕐᔪᓂᒃ ᑎᒍᓯᖕᒪᑦ ᐅᖃᑎᓕᕆᕚ, “ᐊᑏ ᓄᓇ ᑖᒃᑯᓄᖓ ᐱᑎᒃᓵᓚᐅᕈᒃ”; ᐱᖓᓱᐊᕐᑎᕐᓗᓂ ᐱᑎᒋᐊᕋᒥ ᓄᖅᑲᕐᐳᖅ. 19ᒎᑎᐅᑉ ᐃᓄᖁᑎᖓᑕ ᐃᓔᓴᐅᑉ ᐊᑲᕆᔪᓐᓃᕐᐹ ᐅᖃᐅᑎᓪᓗᓂᐅᒡᓗ, “ᓄᓇ ᐱᑎᖃᑦᑕᕆᐊᖃᕐᑕᕋᓗᐊᑦ ᑕᓪᓕᒤᕐᓱᕐᓗᑎᓪᓘᓐᓃᑦ ᐱᖓᓲᔪᕐᑐᕕᒡᓗᑎᓪᓘᓐᓃᑦ; ᑕᕝᕙ ᓯᕆᐊᒥᐅᑦ ᓵᓚᒋᒐᔭᓚᐅᕐᐸᑎᑦ ᓄᖑᓪᓗᒋᓪᓗ. ᑭᓯᐊᓂᓕ ᐱᖓᓱᕕᑐᐃᓐᓇᕐᓗᑎᑦ ᓵᓚᒋᓛᓕᕐᐸᑎᑦ.” 20ᐃᓔᓴ ᑐᖁᖕᒪᑦ ᐃᓗᕕᕐᑕᐅᕗᖅ. ᓄᓇᖓᑦ ᐃᓄᐊᕐᑎᓄᑦ ᒧᐊᐱᒥᐅᓄᑦ ᑎᑭᑕᐅᕙᓚᐅᕐᐳᖅ ᐅᐱᕐᖔᑕᒫᑦ. 21ᐅᓪᓗᐃᑦ ᐃᓚᖓᓐᓂ ᐃᓴᕆᐊᓕᒥᐅᑍᑦ ᐃᓅᔪᓐᓃᕐᑐᕕᓂᕐᒥᒃ ᐃᓗᕕᕐᓯᓇᓱᒃᑎᓪᓗᒋᑦ, ᑎᑭᑕᐅᕗᑦ ᐃᓄᐊᕐᑎᓄᑦ: ᑎᑭᑕᐅᓕᕋᒥᒃ ᐃᓗᕕᕐᓂᐊᕐᑕᒥ ᑎᒥᕕᓂᖓ ᐃᓕᔭᐅᕗᖅ ᐃᓗᕕᖓᓄᑦ ᑲᑍᑐᐃᓐᓇᕐᓗᒍ ᕿᒪᒃᓯᕗᑦ ᑎᒥᕕᓂᖅ ᐃᓔᓴᐅᑉ ᑎᒥᕕᓂᖓᑕ ᓴᐅᓂᕕᓂᖏᓐᓄᑦ ᐊᒃᑑᑎᒐᒥ ᐆᒻᒪᕐᐳᖅ, ᐆᒻᒪᕋᒥᓗ ᓂᑯᕕᑉᐳᖅ. 22ᕼᐊᔧᐅᓕ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐃᓴᕆᐊᓕᒥᐅᑉ ᓵᓚᒋᓯᒤᓐᓇᓚᐅᕐᐰᑦ ᔨᕼᐅᐊᕼᐊᔨ ᐊᖓᔪᖅᑳᕐᔪᐊᖑᓂᓕᒫᖓᓂ ᐃᓴᕆᐊᓕᒥᐅᓄᑦ. 23ᐊᑕᓂᐅᑉ ᐱᑦᓯᐊᕐᕕᒋᓚᐅᕐᐰᑦ ᐃᓚᑦᓱᒋᓪᓗᒋᑦ ᐃᓱᒪᒋᑦᓯᐊᓚᐅᕐᐰ ᐊᖏᖃᑎᒌᒍᑎᓕᐅᕐᓯᒪᓂᓂ ᐱᑦᔪᑎᒋᓪᓗᒍ ᐂᑉᕋᕼᐋᒧᑦ, ᐂᓴᑭᒧᑦ, ᔧᑯᒧᓪᓗ. ᐅᓪᓗᒥ ᑎᑭᓪᓗᒍ ᓱᓕ ᐊᓯᕈᕐᑕᐅᖁᓐᖏᓔᑦ ᕿᒪᒍᒪᓇᒋᓪᓗ ᓇᔪᐃᓐᓇᕈᒪᓚᐅᕐᐰᑦ. 24ᕼᐊᔧᐅᓕ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᑐᖁᓚᐅᕐᐳᖅ, ᐃᕐᓂᖓᑕ ᐱᓐ-ᕼᐊᑖᑎᐅᑉ ᐊᖓᔪᖅᑳᕐᔪᐊᖑᓂᖓ ᐃᓇᖏᓚᐅᕐᐹ. 25ᔨᕼᐅᐊᓯ#13:25 ᔪᐊᓯᐅᑉ ᔨᕼᐅᕼᐊᔨᐅᑉ ᐃᕐᓂᖓᑕ ᐱᓐ-ᕼᐊᑖᑎᐅᑉ ᕼᐊᔧᐆᑉ ᐃᕐᓂᖓᑕ ᓄᓁᑦ ᑎᒍᓯᒪᔭᕕᓂᖏᑦ ᓵᓚᒋᓪᓗᒍ ᐅᑎᕐᑎᓕᓚᐅᕆᕔᑦ ᐊᑖᑕᖓ ᔨᕼᐅᐊᕼᐊᔨ ᐊᖓᔪᖅᑳᕐᔪᐊᖑᑎᓪᓗᒍ ᐋᑕᐅᑦᔪᑎᒋᓚᐅᕐᑕᕕᓂᖏᑦ ᐅᓇᑕᕐᓗᑎᒃ ᓵᓚᐅᒐᒥ. ᔪᐊᓯᐅᑉ ᐱᖓᓱᐊᕐᑎᕐᓗᓂ ᓵᓚᒋᖃᑦᑕᓚᐅᕐᒪᒍ ᓄᓇᖁᑎᒃᒋᔭᓂ ᑎᒍᔭᐅᓯᒪᓚᐅᕐᑐᑦ ᐅᑎᕐᑎᐅᖅᑲᓚᐅᕐᐰᑦ.
Currently Selected:
ᐊᑕᓃᑦ ᐂᑉᐸᖏᑦ 13: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
