ᐊᑕᓃᑦ ᐂᑉᐸᖏᑦ 14
14
ᐊᒪᓮᔭᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒥᐅᓄᑦ
1ᔪᐊᓯ ᐊᖓᔪᖅᑳᕐᔪᐊᖑᓯᒪᓕᕐᑎᓪᓗᒍ ᐊᕐᕌᒎᖕᓂ ᒪᕐᕉᖕᓂᒃ ᔪᐊᕼᐊᔨᐅᑉ ᐃᕐᓂᖓ ᐊᒪᔧᐊ ᔪᐊᓯᐅᑉ ᐃᕐᓂᖓ ᐊᖓᔪᖅᑳᕐᔪᐊᖑᓕᓚᐅᕐᐳᖅ ᔫᑕᒥ. 2ᐊᕐᕌᒍᖃᕐᓗᓂ 25ᓂᒃ, ᔨᕉᓴᓕᒥ ᐊᖓᔪᖅᑳᕐᔪᐊᕆᔭᐅᓕᓚᐅᕐᐳᖅ ᐊᕐᕌᒍᓂᒃ 29ᓂᒃ. ᐊᓈᓇᖓ ᐊᑎᖃᓚᐅᕐᐳᖅ ᔨᕼᐅᐊᑎᓐᒥᒃ ᔨᕉᓴᓕᒥᐅᑕᐅᓪᓗᓂ. 3ᐊᑕᓂᐅᑉ ᓈᒻᒪᒋᔭᖓᓂᒃ ᐱᓂᐊᕐᓂᖃᓚᐅᕋᓗᐊᕐᐳᖅ ᓯᕗᓕᕕᓂᕐᒥᑐᑦ ᑍᕕᑎᑐᑦ ᑍᒤᓚᐅᓐᖏᓚᖅ. ᐊᑖᑕᒥᓕ ᔪᐊᓯᐅᑉ ᐱᐅᓯᕆᓚᐅᕐᑕᖏᓐᓂᒃ ᒪᓕᑐᐃᓐᓇᓚᐅᕆᕗᖅ. 4ᒎᑎᓐᖑᐊᓄᑦ ᑐᒃᓯᐊᕐᕕᐅᕙᒃᑐᑦ ᐲᔭᓚᐅᖏᒻᒪᒋᑦ, ᐃᓄᐃᑦ ᒎᑎᓐᖑᐊᓄᑦ ᑐᒃᓯᐊᕐᕕᖃᕐᐸᒃᑐᑦ ᑲᔪᓯᑐᐃᓐᓇᓚᐅᕐᒪᑕ ᐆᒪᔪᓂᒃ ᑐᓂᕐᕈᓯᖃᑦᑕᕐᓂᖓᑦ ᐳᔫᕐᑎᑦᓯᖃᑦᑕᕐᓂᖏᓪᓗ. 5ᐊᒪᓮᔭᐅᑉ ᐊᖓᔪᖅᑳᕐᔪᐊᖑᓪᓚᕆᓕᕐᓂᖓ ᖁᓚᕐᓁᕐᒪᑦ ᐊᖓᔪᖅᑳᑦ ᑐᖁᕋᕐᑕᐅᑎᑉᐰᑦ, ᐊᑖᑕᖓᓂᒃ ᑐᖁᑕᐅᑎᑦᓯᓚᐅᕐᑐᑦ, ᐊᑖᑕᖓ ᐊᖓᔪᖅᑳᕐᔪᐊᖕᒍᑎᓪᓗᒍ. 6#ᒨᓯᓯ ᑕᓪᓕᒪᖏᑦ 24:16.ᑭᓯᐊᓂ ᕿᑐᕐᖓᖏᓐᓂᒃ ᑐᖁᑕᐅᑎᑦᓯᓚᐅᓐᖏᓚᖅ, ᐊᑕᓂᐅᑉ ᐱᖁᔭᓕᐊᕆᓯᒪᔭᖏᑦ ᒪᓕᒡᓗᒋᑦ ᒨᓯᓯᐅᑉ ᐊᒡᓚᖏᓐᓂ ᐅᖃᕐᓯᒪᔪᑦ, “ᐊᖓᔪᖅᑳᑦ ᑐᖁᑕᐅᔪᒃᓴᐅᓐᖏᓚᑦ ᕿᑐᕐᖓᖏᑕ ᐊᔪᕐᑐᓕᓂᖏᓐᓄᑦ, ᕿᑐᕐᖓᕆᔭᐅᔪᓪᓗ ᑐᖁᑕᐅᔪᒃᓴᐅᓐᖏᓚᑦ ᐊᖓᔪᖅᑳᖏᑕ ᐊᔪᕐᑐᓕᓯᒪᓂᖏᓐᓄᑦ, ᐃᓄᒃ ᑐᖁᑕᐅᔪᒃᓴᐅᕗᖅ ᓇᖕᒥᓂᖅ ᐊᔪᕐᑐᓕᓯᒪᓂᖓ ᐱᓪᓗᒍ ᑭᓯᐊᓂ.” 7ᐊᒪᓮᔭ ᑐᖁᑦᑎᓚᐅᕐᐳᖅ 10,000ᓂᒃ ᐄᑐᒥᐅᑍᑦ ᐅᓇᑕᕐᑎᖁᑎᖏᓐᓂᒃ ᐅᓇᑕᖃᑎᒌᒃᓗᑎᒃ ᑕᕆᐅᕐᑕᓕᐅᑉ ᓇᕐᓴᖓᓂᒃ ᐊᑎᖃᕐᑐᒥ. ᐅᓇᑕᕐᓂᒃᑯᑦ ᓵᓚᖃᕐᓗᑎᒃ ᓄᓇᓕᖕᓂᒃ ᓰᓚᒥᒃ ᐊᑎᖃᕐᑐᓂᒃ ᑎᒍᓯᓚᐅᕐᐳᑦ, ᐊᑎᕐᑖᕐᑎᓪᓗᒋᓪᓗ ᔫᒃᓯᐅᓪᒥᒃ. ᐅᓪᓗᒥᒧᑦ ᑎᑭᓪᓗᒍ ᓱᓕ ᑍᒫᒃ ᓄᓇᓖᑦ ᑖᒃᑯᐊ ᑍᔭᐅᕗᑦ. 8ᐊᒪᔧᐊ ᐅᖃᐅᑦᔭᐅᔭᕐᑐᕐᑎᑦᓯᕗᖅ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᓐᓂᒃ ᔨᕼᐅᐊᕼᐊᔨᒥᒃ ᔨᕼᐆᑉ ᐃᕐᓂᖓᓂᒃ ᐅᓇᑕᖃᑎᒋᔪᒪᓪᓗᒍ. 9ᔨᕼᐅᐊᓯ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᒪᔧᐊᒧᑦ ᔫᑕᐅᑉ ᐊᖓᔪᖅᑳᕐᔪᐊᖓᓄᑦ ᑭᐅᑦᔪᑎᒥᓂᒃ ᑎᑭᑎᑦᓯᕗᖅ ᐅᖃᕐᓯᒪᔪᓂᒃ, “ᐅᕐᐱᒊᑦ ᑲᑭᓐᓇᕐᑐᓖᑦ ᓕᐸᓇᓂᐅᑉ ᖃᖅᑲᖏᓐᓂ ᐅᖃᐅᓯᒃᓴᒥᓂᒃ ᑎᑭᑎᑦᓯᓚᐅᕐᐳᖅ ᓕᐸᓈᓂᐅᑉ ᓇᐹᕐᑐᖓᓄᑦ ᓰᑕᕆᒧᑦ ᐅᖃᕐᓗᓂ, ‘ᐸᓃᑦ ᓄᓕᐊᕐᑖᕆᔭᐅᑎᓚᐅᕈᖅ ᐃᕐᓂᓐᓄᑦ.’ ᐆᒪᔪᓪᓕ ᓄᔪᐊᕐᑐᑦ ᐊᖅᑯᓵᕋᒥ ᐅᕐᐱᒐᖅ ᑲᑭᓐᓇᕐᑐᓕᒃ ᑐᓪᓕᕋᕐᓗᒍ ᓂᓚᒥᑎᑉᐹ. 10ᐊᒪᔧᐊ ᐄᑐᒥᒥᐅᓂᒃ ᓵᓚᖃᕐᓯᒪᓂᕐᓄᑦ ᐱᔪᓐᓇᕋᓱᒋᓂᕐᑖᕐᓯᒪᕗᑎᑦ, ᐱᔪᓐᓇᕐᓂᕆᔧᑦ ᓈᒻᒪᒋᓗᒍ ᐊᖏᕐᕋᕐᓯᒪᑐᐃᓐᓇᕆᑦ. ᓱᖕᒪᑦ ᓈᒻᒪᖏᑦᔪᑎᒃᓴᒥᒃ ᐃᓕᖕᓄᑦ ᐃᓄᖁᑎᖕᓄᓪᓗ ᐅᒡᒍᐊᕐᓇᕐᑑᒐᔭᕐᑐᒥᒃ ᓴᖅᑭᑎᑦᓯᓇᓱᐊᕐᐲᑦ ᔫᑕᓗ ᐱᖃᓯᐅᑎᓗᒍ?” 11ᐊᒪᔧᐊ ᓈᓚᒍᒪᓚᐅᖏᒻᒪᑦ ᐅᖃᐅᑦᔭᐅᑦᔪᑎᒥᓂᒃ, ᐊᖓᔪᖅᑳᕐᔪᐊᖅ ᔨᕼᐅᐊᓯ ᐅᓇᑕᕐᑎᖁᑎᓂ ᐃᓚᒋᓪᓗᒋᑦ ᐅᓇᑕᕆᐊᕐᓕᕐᐳᑦ ᐊᒪᓮᔭᒥᒃ ᓄᓇᒥ ᐱᑦ-ᓯᒥᔅᓯᒥᒃ ᐊᑎᖃᕐᑐᒥ ᔫᑕᐅᑉ ᓄᓇᖓᑕ ᐃᓚᖓᓃᑦᑐᒥ. 12ᔫᑕᒃᑯᑦ ᐅᓇᑕᕐᑎᖁᑎᖏᑦ ᓵᓚᐅᓕᕋᒥᒃ, ᕿᒪᒃᓯᐅᖅᑲᓚᐅᕐᐳᑦ ᐊᑐᓂᑦ ᐊᖏᕐᕋᕆᔭᒥᖕᓄᑦ ᐅᑎᕐᓗᑎᒃ. 13ᔨᕼᐅᐊᓯᐅᓪᓗ ᐊᒪᔧᐊ ᑎᒍᕚ ᔫᑕᐅᑉ ᐊᖓᔪᖅᑳᕐᔪᐊᖓ, ᐊᕼᐊᔧᐊᐅᑉ ᐃᕐᓂᖓ, ᐱᑦ-ᓯᒥᔅᒦᑎᓪᓗᒍ, ᔨᕉᓴᓕᒧᓪᓗ ᑲᔪᓯᓪᓗᑎᒃ ᐊᕙᓗᕐᔪᐊᖓ ᓯᖁᑦᑎᕐᐹᑦ ᐃᕗᕅᑎᒥᒃ ᐊᑎᖃᕐᑐᖅ ᐃᑎᕐᑕᕐᕕᒃ ᐱᒋᐊᕐᕕᒋᓪᓗᒍ ᑎᕆᖁᕐᒥᒃ ᐊᑎᖃᕐᑐᖅ ᐃᑎᕐᑕᕐᕕᒃ ᑎᑭᓪᓗᒍ, 600ᓂᒃ ᐃᑎᒐᖕᓂᒃ ᑕᑭᓂᖃᕐᑐᖅ. 14ᓯᐅᓪᕕᕆᓕᒫᑦ ᒎᓗᓕᒫᓪᓗ ᑕᑯᔭᓂ ᑎᒎᖅᑲᕐᐰᑦ ᐊᑕᓂᐅᑉ ᐃᒡᓗᖓᑕ ᐱᖁᑎᖏᑦ ᐊᖓᔪᖅᑳᕐᔪᐊᓪᓗ ᐃᒡᓗᖓᑕ ᐱᖁᑎᖏᑦ ᐱᔪᒥᓇᕐᑐᓕᒫᑦ ᐱᐅᕋᕐᓗᓂᒋᑦ ᓴᒥᐊᕆᐊᒧᑦ ᐊᖏᕐᕋᐅᑎᕔᑦ. ᐃᓄᖏᑕᓗ ᐃᓚᖏᓐᓂᒃ ᐱᔪᒪᖏᑦᑑᒐᓗᐊᓂᒃ ᑎᒍᓯᓪᓗᓂ. 15ᔨᕼᐅᐊᓯᐅᑉ ᐱᓂᐊᕐᓂᕆᓚᐅᕐᑕᖏᑦ ᓯᕘᕋᒋᔭᖃᖏᓐᓂᖏᓪᓗ ᐅᓇᑕᖃᑎᖃᕐᓗᓂ ᐊᒪᔧᐊᒥᒃ ᔫᑕᒥᐅᑉ ᐊᖓᔪᖅᑳᕐᔪᐊᖓᓂᒃ ᑎᑎᕋᕐᑕᐅᓯᒪᔪᐃᓐᓇᐅᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᕕᓂᖏᑕ ᐅᓂᒃᑳᕐᑕᐅᓯᒪᓂᖏᓐᓂ. 16ᔨᕼᐅᐊᓯ ᑐᖁᖕᒪᑦ ᐃᓗᕕᕐᑕᐅᓚᐅᕐᐳᖅ ᓯᕗᓕᖏᑕ ᐊᖓᔪᖅᑳᕐᔪᐊᖑᔪᑦ ᐃᓗᕕᕐᑕᐅᓯᒪᕕᖏᓐᓂ ᓴᒥᐊᕆᐊᒦᑦᑐᓂ ᐃᕐᓂᖓᑕ ᔨᕈᐳᐊᒻ ᐊᖓᔪᖅᑳᕐᔪᐊᖑᓂᒐ ᐃᓇᖏᓕᓚᐅᕆᕚ.
ᔫᑕᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᒪᓮᔭᐅᑉ ᐃᓅᔪᓐᓂᕐᓂᖓ
ᑯᕉᓂᑲ ᐂᑉᐸᖏᑦ 25:25-28
17ᔫᑕᐅᑉ ᐊᖓᔪᖅᑳᕐᔪᐊᖓᑦ ᐊᒪᔧᐊ ᔪᐊᓯᐅᑉ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᐃᕐᓂᖓ ᑭᖑᓂᖓᓂ ᐊᕐᕌᒍᓂᒃ 15ᓂᒃ ᐃᓅᒃᑲᓐᓂᓚᐅᕐᐳᖅ. 18ᐊᒪᔧᐊᐅᑉ ᐱᓂᐊᕐᓂᕆᓯᒪᔭᓕᒫᖏᑦ ᑎᑎᕋᕐᑕᐅᓯᒪᕗᑦ ᔫᑕᐅᑉ ᐊᖓᔪᖅᑳᕐᔪᐊᕆᓯᒪᔭᖏᑕ ᐅᓂᒃᑳᕐᑕᐅᓯᒪᓂᕆᔭᖏᓐᓂ. 19ᔨᕉᓴᓕᒥ ᑎᓪᓕᓐᖏᓈᕆᓗᑎᒃ ᑐᖁᑦᑎᔪᒪᓚᐅᕐᐳᖅ ᐊᒪᔧᐊᒥᒃ, ᐊᒪᔧᐊ ᕿᒫᔭᕆᐊᖃᓕᓚᐅᕐᐳᖅ ᐃᒡᓗᒐᓴᒡᔪᐊᓄᑦ ᓚᑮᓯᒥᒃ ᐊᑎᖃᕐᑐᓄᑦ. ᐊᑭᕋᕐᑐᕐᑎᖏᑕ ᑍᑯᖓ ᒪᓕᒡᓗᒍ ᑐᖁᓚᐅᕐᐹᑦ. 20ᑎᒥᖓ ᐅᑎᕈᑦᔭᐅᓚᐅᕐᐳᖅ ᔨᕉᓴᓕᒧᑦ ᕿᒧᒃᓯᐅᑎᑯᑦ; ᐃᓗᕕᕐᑕᐅᕗᕐᓗ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᕆᕙᓚᐅᕐᑕᖏᑕ ᐃᓗᕕᕐᑕᐅᓯᒪᕕᖏᓐᓂ ᑍᕕᑎᐅᑉ ᐃᒡᓗᒐᓴᖏᓐᓂ. 21ᔫᑕᒥᐅᑦ ᐊᖓᔪᖅᑳᕐᔪᐊᓐᖑᕐᑎᑦᓯᓕᓚᐅᕆᕗᑦ ᐊᒪᔧᐊᐅᑉ ᐃᕐᓂᖓᓂᒃ ᐊᔭᕅᐊᒥᒃ, 16ᓂᒃ ᐊᕐᕌᒍᖃᕐᑎᓪᓗᒍ. 22ᐊᓴᕅᔭᐅᑉ ᐃᓚᑎᒥᐅᑦ ᓵᓚᒋᒐᒥᒋᑦ ᔫᑕᒧᑦ ᐅᑎᕐᑎᓚᐅᕐᐰᑦ ᐊᑖᑕᖓᑕ ᐃᓅᔪᓐᓃᕐᓯᒪᓂᖓᑕ ᑭᖑᓂᖓᓂ.
ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᕐᑖᕐᓂᖓᑦ ᔨᕈᐳᐊᒻᒥᒃ
23ᐊᒪᔧᐊᐅᑉ ᔪᐊᓯᐅᑉ ᐃᕐᓂᖓᑕ ᐊᖓᔪᖅᑳᕐᔪᐊᓐᖑᕐᓂᖓᑕ ᐊᕐᕌᒍᐃᑦ 15ᖓᓐᓂ ᔫᑕᒥ. ᔨᕈᐳᐊᒻ ᔨᕼᐅᐊᓯᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᓕᓚᐅᕆᕗᖅ ᐃᓴᕆᐊᓕᒥᐅᓄᑦ, ᐊᐅᓚᑦᓯᓪᓗᓂᓗ ᐊᕐᕌᒍᓂᒃ 41ᓂᒃ ᓴᒥᐊᕆᐊᒥ. 24ᐊᑕᓂᐅᑉ ᓵᖓᓂ ᑖᓐᓇ ᐊᔪᕐᑐᓕᓚᐅᕐᐳᖅ; ᓯᕗᓕᖓᑕ ᐊᖓᔪᖅᑳᕐᔪᐊᑉ ᔨᕈᐳᐊᒻ ᓈᒻᒪᖏᑦᑐᓕᐅᕐᓂᕆᓚᐅᕐᑕᖏᓐᓂᒃ ᐊᑐᖃᑕᐅᑐᐃᓐᓇᓚᐅᕋᒥ ᓂᐹᑎᐅᑉ ᐃᕐᓂᖓᑕ, ᑖᑦᓱᒪ ᐃᓴᕆᐊᓕᒥᐅᑦ ᐊᔪᕐᑐᓕᑎᓚᐅᕐᒪᒋᑦ. 25#ᔫᓇ 1:1.ᐃᓴᕆᐊᓕᒥᐅᑦ ᓄᓇᖁᑎᒋᓚᐅᕐᑕᓕᒫᖓ ᐅᑎᕐᑎᓚᐅᕐᐹ, ᕼᐊᒫᑎᒥᑦ ᑕᓯᖅ ᑐᖁᖓᔪᖅ ᑎᑭᓪᓗᒍ. ᑕᒪᓐᓇᓗ ᑍᒤᑦᓱᒫᕐᓂᖓ ᐊᑕᓂᕐᒧᑦ ᐅᖃᐅᓯᐅᓯᒪᓚᐅᕐᒪᑦ ᐅᖃᕐᑎᒥᒍᑦ ᔫᓇᒃᑯᑦ ᐅᖃᐅᓯᐅᑎᓯᒪᖕᒪᒍ ᐊᒥᑍᑉ ᐃᕐᓂᖓᒍᑦ, ᒑᑎ-ᕼᐃᐱᕆᒥᐅᑕᒃᑯᑦ. 26ᐃᓴᕆᐊᓕᒥᐅᑦ ᐊᖏᔪᒥᒃ ᐅᖁᒤᒃᓴᕐᑎᑕᐅᓂᖏᑦ ᐊᑕᓂᐅᑉ ᑕᑯᓐᓇᓚᐅᕐᐰᑦ. ᐊᑕᐅᓯᕐᒥᒡᓘᓐᓃᑦ ᐃᑲᔪᕐᑎᒃᓴᖓᓂᒃ ᐱᑕᖃᓚᐅᓐᖏᓚᖅ ᐃᓴᕆᐊᓕᓂ. 27ᐊᑕᓂᐅᑉ ᐃᓴᕆᐊᓕᒥᐅᑦ ᕿᓚᐅᑉ ᐊᑖᓂ ᓄᖑᑦᓱᒪᓪᓗᒋᑦ ᐅᖃᕐᓯᒪᓚᐅᖏᒻᒪᑦ, ᐱᐅᓕᓚᐅᕐᐰᓪᓕ ᔨᕈᐳᐊᒻᑯᑦ ᔪᐊᓯᐅᑉ ᐃᕐᓂᖓᒍᑦ.
28ᔨᕈᐳᐊᒻ ᐱᓂᐊᕐᓂᕆᔭᕕᓂᖏᑦ ᐊᑕᖏᕐᓗᒋᑦ, ᐅᓇᑕᖃᑦᑕᕐᓂᕕᓂᖏᓪᓗ ᑕᒫᓯᑰᓯᒥᓗ ᑎᒍᓯᒃᑲᓐᓂᕐᓂᕕᓂᖓ ᕼᐊᒫᑎᒥᒡᓗ ᔫᑕᐅᑉ ᓄᓇᖁᑎᒋᓚᐅᕐᑕᖏᓐᓂᒃ ᑎᑎᕋᕐᑕᐅᓯᒪᔪᐃᓐᓇᐅᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᕕᓂᖏᑕ ᐅᓂᒃᑳᕐᑕᐅᓯᒪᕕᖏᓐᓂ. 29ᔨᕈᐳᐊᒻ ᑐᖁᖕᒪᑦ ᐃᓗᕕᕐᑕᐅᓚᐅᕐᐳᖅ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᕕᓂᖏᑕ ᐃᓗᕕᕐᑕᐅᓯᒪᕕᖏᓐᓂ. ᐃᕐᓂᖓᓗ ᓴᑲᕅᐊ ᐊᖓᔪᖅᑳᕐᔪᐊᖑᓕᓚᐅᕆᕗᖅ ᐊᑖᑕᓂ ᐃᓇᖏᕐᓗᒍ.
Currently Selected:
ᐊᑕᓃᑦ ᐂᑉᐸᖏᑦ 14: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
