ᐊᑕᓃᑦ ᐂᑉᐸᖏᑦ 11
11
ᐊᑕᓔᔭᐅᑉ ᐊᖓᔪᖅᑳᖑᓂᖓ ᔫᑕᒥ
1ᐊᑕᓔᐊ ᐊᕼᐊᔧᐊᐅᑉ ᐊᓈᓇᖓ ᖃᐅᔨᓕᕋᒥ ᐃᕐᓂᖓᑕ ᐃᓅᔪᓐᓃᕐᓂᖓᓂᒃ, ᐊᖓᔪᖅᑳᕐᔪᐊᑉ ᕿᑐᕐᖔᓕᒫᖏᑦ ᑐᖁᕋᕐᑕᐅᑎᓕᕐᐰᑦ. 2ᔨᕼᐅᓰᐸ ᐊᖓᔪᖅᑳᕐᔪᐊᑉ ᔪᕌᒻ ᐸᓂᖓ ᐊᕼᐊᔧᐊᐅᑉ ᓇᔭᖓ, ᐃᔨᕋᕐᑐᕐᓗᓂ ᔪᐊᓯ ᐊᕼᐊᔧᐊᐅᑉ ᐃᕐᓂᖓ ᐊᖓᔪᖅᑳᕐᔪᐊᑉ ᕿᑐᕐᖓᖏᓐᓂᑦ ᑎᒍᕚ ᑐᖁᕋᕐᑕᐅᖏᓐᓂᖏᓐᓂ ᐊᕝᕗᑎᑎᓪᓗᒍ ᐊᑕᓔᐊᒥᑦ ᐃᔨᕐᐹ. ᑖᓐᓇ ᑐᖁᑕᐅᓚᐅᓐᖏᓚᖅ. 3ᔪᐊᓯ ᐰᕆᔨᖓᓗ ᐃᔨᕐᑕᐅᓯᒤᓐᓇᓚᐅᕐᐴᒃ ᐊᕐᕌᒍᓂᒃ 6ᓂᒃ ᐊᑕᓂᐅᑉ ᐃᒡᓗᖓᓂᑦ ᐊᑕᓔᐊᐅᑉ ᐊᐅᓚᑦᓯᔨᐅᓂᖓᓂ. 4ᐊᕐᕌᒍᐃᑦ 7ᖓᓐᓂ ᔨᕼᐅᐃᐊᑕ ᑐᓂᕐᕈᓯᕐᑎᑦᓯᔨ ᐊᖓᔪᖅᑳᕐᔪᐊᑉ ᐅᓇᑕᕐᑎᖁᑎᖏᑕ ᐊᖓᔪᖅᑳᖏᑦ 100ᓄᑦ ᑳᕆᑎᔅᓂᒃ ᑍᔭᐅᔪᑦ ᖃᐅᔨᓴᕐᑎᖁᑎᖏᓪᓗ ᕾᖁᕔᑦ ᐊᑕᓂᐅᑉ ᐃᒡᓗᖓᓄᑦ; ᐅᖃᕕᒡᓗᑎᒡᓗ ᐊᖏᖃᑎᒋᕔᑦ ᐊᑕᓂᐅᑉ ᐃᒡᓗᖓᓂ, ᑕᑯᑎᓕᕐᓗᒋᓪᓗ ᐊᖓᔪᖅᑳᕐᔪᐊᑉ ᐃᕐᓂᖓᓂᒃ ᔪᐊᓯᒥᒃ. 5ᐅᖃᐅᑎᕔᓪᓗ, “ᐃᒫᒃ ᐱᓇᓱᐊᕐᓂᐊᕐᐳᓯ, ᐱᖓᓲᓕᖅᑲᖓᓗᓯ ᐊᕕᒃᑐᕐᓯᒪᓗᓯ ᓴᐸᑎᐅᓕᕐᐸᑦ, ᐃᓚᖏᑦ ᖃᐅᔨᓵᖃᕐᑐᒃᓴᐅᕗᑦ ᐊᖓᔪᖅᑳᕐᔪᐊᑉ ᐃᒡᓗᖃᕐᕕᖓᓂᒃ, 6ᐃᓚᖏᓪᓗ ᖃᐅᔨᓵᖃᕐᓗᑎᒃ ᓲᕆ ᐃᑎᕐᑕᕐᕕᒡᒥᒃ, ᑖᒃᑯᐊ ᐱᖓᔪᐃᖏᑦ ᑐᒃᓯᐊᕐᕕᒡᔪᐊᕐᒥᒃ ᖃᐅᔨᓵᖃᕐᓂᐊᕐᐳᑦ ᐃᓇᖏᕐᑕᐅᑎᓗᑎᒃ. 7ᑖᒃᑯᐊ ᒪᕐᕈᐃᑦ ᖃᐅᔨᓴᕐᑏᑦ ᓴᐸᑎᐅᓕᕌᖓᑦ ᓄᖅᑲᖓᑬᓐᓇᕐᐸᒃᑑᒐᓗᐊᑦ, ᓄᖅᑲᖓᖏᓪᓗᑎᒃ ᖃᐅᔨᓴᑐᐃᓐᓇᓛᕐᐳᑦ ᐊᖓᔪᖅᑳᕐᔪᐊᑉ ᓇᔪᕐᑕᖓᓂᒃ ᐊᑕᓂᐅᑉ ᐃᒡᓗᖓᓂ. 8ᐊᖓᔪᖅᑳᕐᔪᐊᑉ ᐊᕙᑖᓃᖏᓐᓇᕐᑐᒃᓴᐅᕗᑦ ᐅᓇᑕᐅᑎᓂᒃ ᑎᒍᒥᐊᕐᓗᑎᒃ. ᖃᒡᓕᓗᐊᕐᑐᖃᕐᐸᑦ ᑖᑦᓱᒧᖓ ᑐᖁᑕᐅᔪᒃᓴᐅᕗᖅ. ᐊᖓᔪᖅᑳᕐᔪᐊᖅ ᓇᒧᑐᐃᓐᓇᖅ ᐂᔭᕌᖓᑦ ᒪᓕᒃᑕᐅᖏᓐᓇᕐᑐᒃᓴᐅᕗᖅ.” 9ᑕᕝᕙ ᐅᓇᑕᕐᑎᓄᑦ ᐊᖓᔪᖅᑳᑦ ᑐᓂᕐᕈᓯᕐᑎᑦᓯᔨᐅᑉ ᔨᕼᐅᐃᐊᑕᐅᑉ ᐊᑐᕐᑕᐅᖁᔭᖏᑦ ᒪᓕᑦᓯᐊᕐᓗᒋᑦ ᐱᓇᓱᐊᓚᐅᕐᐳᑦ. ᐅᓇᑕᕐᑎᖁᑎᑎᒃ ᐊᑐᓂᑦ ᐱᔭᒃᓴᖏᓐᓂᒃ ᓇᓗᓁᕐᓯᕕᒋᕔᑦ ᓴᐸᑎᐅᓕᕐᐸᑦ ᐱᓇᓱᐊᕐᓂᐊᕐᑐᑦ ᓄᖅᑲᖓᓂᐊᕐᑐᓪᓗ ᓇᓗᓁᕆᐊᕐᑐᖃᑦᑕᕐᐳᑦ ᔨᕼᐅᐃᐊᑕᒧᑦ. 10ᔨᕼᐅᐃᐊᑕᐅᑉ ᐅᓇᑕᕐᑎᓄᑦ ᐊᖓᔪᖅᑳᖑᔪᑦ ᖃᓗᒋᐊᓂᒃ ᐊᒡᕖᕋᐅᑎᓂᒡᓗ ᐱᑖᕐᑎᑉᐰᑦ ᐊᖓᔪᖅᑳᕐᔪᐊᑉ ᑍᕕᑎᐅᑉ ᐱᕕᓂᖏᓐᓂᒃ ᐊᑕᓂᐅᑉ ᐃᒡᓗᖓᓃᑦᑐᓂᒃ. 11ᐅᓇᑕᕐᑏᑦ ᖃᐅᔨᓴᕐᑎᐅᑎᑕᐅᔪᑦ ᐅᓇᑕᐅᑎᓕᔭᕐᓗᑎᒃ ᐃᓂᒋᔭᕆᐊᖃᓚᐅᕐᑕᒥᖕᓃᑉᐳᑦ ᐊᖓᔪᖅᑳᕐᔪᐊᑉ ᐊᕙᑖᓂ ᑐᓂᕐᕈᓯᕐᕕᐅᑉ ᓴᓂᐊᓂ ᐊᑕᓂᐅᑉ ᐃᒡᓗᓕᒫᖓᓂ. ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐅᓐᓄᐊᓪᓗᐊᑉ ᓇᓛᓄᑦ ᑎᑭᐅᓯᒪᓪᓗᑎᒃ. 12ᔨᕼᐅᐃᐊᑕᐅᑉ ᐊᖓᔪᖅᑳᕐᔪᐊᑉ ᐃᕐᓂᖓ ᓴᖅᑭᑎᓪᓗᓂᐅᒃ ᐊᖓᔪᖅᑳᕐᔪᐊᕐᓯᐅᑎᒥᒃ ᓇᓴᕐᐹ; ᑐᓂᓪᓗᓂᐅᒡᓗ ᐊᖏᖃᑎᒌᒃᓯᒪᓂᖏᑕ ᓇᓗᓁᕐᑕᐅᑦᔪᑎᖏᓐᓂᒃ ᐊᖓᔪᖅᑳᕐᔪᐊᖑᓕᕐᓂᖓᓗ ᓇᓗᓁᕐᓗᒍ ᐅᕐᓱᒧᑦ ᓂᐊᖁᐊᒍᑦ ᑯᕝᕕᕆᕚᑦ; ᐃᓄᐃᑦ ᐸᑦᑕᒃᑐᕐᓗᑎᒃ ᓂᐱᒋᒃᑑᓪᓗᑎᒃ ᓂᓪᓕᐊᕗᑦ, “ᐊᖓᔪᖅᑳᕐᔪᐊᖅ ᐊᑯᓂ ᐃᓅᓕ!” 13ᐊᑕᓔᐊ ᑐᓵᓕᕋᒥ ᐃᓄᐃᑦ ᐅᓇᑕᕐᑏᓪᓗ ᓂᐱᖏᓐᓂᒃ ᑕᑯᔭᕐᑐᕐᐳᖅ ᐃᓄᖕᓂᒃ ᐊᑕᓂᐅᑉ ᐃᒡᓗᖓᓃᑦᑐᓂᒃ. 14#ᐊᑕᓃᑦ ᐂᑉᐸᖏᑦ 23:3.ᑕᑯᒐᒥᓗ ᐊᖓᔪᖅᑳᕐᔪᐊᕐᒥᒃ, ᓇᖏᕐᑐᒥᒃ ᓇᐸᔪᐊᓗᐃᑦ ᓴᓂᐊᓂ ᐱᐅᓯᕆᔭᐅᓲᖅ ᒪᓕᒡᓗᒍ. ᐅᓇᑕᕐᑏᑦ ᐊᖓᔪᖅᑳᖏᑦ ᓱᐴᒐᕐᑏᓪᓗ ᓴᓂᐊᓂ ᓇᖏᕐᓗᑎᒃ, ᐃᓅᓕᒫᓗ ᓇᑭᑐᐃᓐᓇᖅ ᐱᓯᒪᔪᑦ ᑕᕝᕙᓃᑉᐳᑦ ᖁᕕᐊᓱᒃᑐᐊᓘᓪᓗᑎᒃ ᓱᐴᒐᕐᓂᒡᓗ ᓂᓪᓕᐊᑎᑦᓯᓪᓗᑎᒃ. ᐊᑕᓔᐊᐅᓪᓗ ᐊᓐᓄᕌᓂ ᐊᓕᒃᐰᑦ ᓂᐱᑭᑦᑑᓪᓗᓂᓗ ᐅᖃᕐᐳᖅ, “ᐊᑭᕋᕐᑐᕐᑎᐅᕗᓯ! ᐊᑭᕋᕐᑐᕐᑎᐅᕗᓯ!” 15ᔨᕼᐅᐃᐊᑕ ᑐᓂᕐᕈᓯᕐᑎᑦᓯᔨᐅᑉ ᐊᖓᔪᖅᑳᑦ ᐅᓇᑕᕐᑎᓄᑦ 100ᐅᓈᕐᑎᕐᑐᓄᑦ ᐅᖃᐅᑎᕔᑦ ᑎᒍᔭᐅᖁᓪᓗᒍ ᐅᓇᑕᕐᑎᖁᑎᖏᓐᓄᑦ ᑖᑦᓱᒥᖓᓗ ᐃᑲᔪᕐᑐᕋᓱᐊᕐᑐᑦ ᑐᖁᑕᐅᖃᑦᑕᖁᕔᑦ. ᐅᖃᐅᑎᓯᒪᓚᐅᕋᒥᒋᑦ ᐊᑕᓔᐊ ᑐᖁᑕᐅᖁᓇᒍ ᐊᑕᓂᐅᑉ ᐃᒡᓗᖓᑕ ᐃᓗᐊᓂ. 16ᑕᕝᕙ ᐅᓇᑕᕐᑏᑦ ᑎᒍᕚᑦ ᕿᒧᒃᓯᐅᑎᓄᑦ ᐃᑎᕐᕕᐅᓲᒧᑦ ᐊᖓᔪᖅᑳᕐᔪᐊᑉ ᐃᒡᓗᖓᓄᐊᖓᔪᒧᑦ ᑎᑭᓐᓇᒥᒃ ᑕᕝᕙᓂ ᑐᖁᑕᐅᕗᖅ. 17ᔨᕼᐅᐃᐊᑕ ᐊᖏᖃᑎᓕᐅᕈᑎᒥᒃ ᐋᖅᑮᕗᖅ ᐊᑕᓂᕐᒧᑦ ᐊᖓᔪᖅᑳᕐᔪᐊᕐᒧᓪᓗ ᐃᓄᖕᓄᓪᓗ ᐊᑕᓂᖕᒧᑦ ᐃᓄᖁᑕᐅᖏᓐᓇᖁᓪᓗᒋᑦ. ᐊᖏᖃᑎᓕᐅᕈᑎᓕᐅᕆᓪᓗᓂᓗ ᐊᖓᔪᖅᑳᕐᔪᐊᕐᒧᑦ ᐊᑕᓂᕐᒧᓪᓗ ᐃᓄᖁᑕᐅᖏᓐᓇᖁᓪᓗᒋᑦ. ᐊᖏᖃᑎᓕᐅᕈᑎᓕᐅᕆᓪᓗᓂᓗ ᐊᖓᔪᖅᑳᕐᔪᐊᑉ ᐃᓄᖁᑎᖏᑕᓗ ᐊᖏᓯᒪᖃᑎᒌᒍᑎᒋᓂᐊᕐᑕᖓᓐᓂᒃ. 18ᐃᓄᓕᒫᑦ ᓇᑭᑐᐃᓐᓇᖅ ᐱᓯᒪᔫᑦ ᐰᓕᐅᑉ ᑐᒃᓯᐊᕐᕕᒡᔪᐊᖓᓄᑦ ᐂᓪᓗᑎᒃ ᒎᑎᓐᖑᐊᖅ ᐅᕐᕈᑎᑉᐹᑉ, ᑐᓂᕐᕈᓯᕐᕕᒃᑕᖏᓪᓗ ᓴᓇᓐᖑᐊᕐᓯᒪᔪᓪᓗ ᓯᖁᑦᑎᕐᑕᐅᕗᑦ. ᒫᑖᓂ ᑐᓂᕐᕈᓯᕐᑎᑦᓯᔨᐅᔪᖅ ᑕᕝᕙᓂ ᑐᓂᕐᕈᓯᕐᕕᐅᑉ ᓴᓂᐊᓂ ᑐᖁᑕᐅᕗᖅ. ᔨᕼᐅᐃᐊᑕ ᑐᓂᕐᕈᓯᕐᑎᑦᓯᔨ ᐅᓇᑕᕐᑎᓂᒃ ᖃᐅᔨᓴᕐᑎᐅᓂᐊᕐᑐᓂᒃ ᑎᓕᓯᕗᖅ ᐊᑕᓂᐅᑉ ᑐᒃᓯᐊᕐᕕᒃᔪᐊᖓᓂ. 19ᑖᒃᑯᐊ ᕾᖁᕔᑦ ᐊᖓᔪᖅᑳᖑᔪᑦ ᐅᓇᑕᕐᑎᓄᑦ ᑳᕆᑎᔅᓄᑦ 100ᐅᓈᕐᑎᕐᑐᓄᑦ, ᖃᐅᔨᓴᕐᑎᐅᓂᐊᕐᑐᓪᓗ ᐊᖓᔪᖅᑳᕐᔪᐊᕐᒧᑦ ᐃᓄᓕᒫᓄᓪᓗ. ᔪᐊᓯ ᐊᖓᔪᖅᑳᕐᔪᐊᖑᓕᕐᑐᖅ ᑐᒃᓯᐊᕐᕕᒡᔪᐊᒥᑦ ᐊᓂᖃᑎᒋᕚᑦ, ᖃᐅᔨᓴᕐᕕᐅᑉ ᐃᑎᕐᕕᖓᒍᑦ ᐊᖓᔪᖅᑳᕐᔪᐊᑉ ᐃᒡᓗᖃᕐᕕᖓᓄᐊᕈᑎᕚᑦ. ᑕᕝᕙᓂᓗ ᐃᒃᓯᕙᐅᑕᕐᔪᐊᒥᓄᑦ ᐃᖏᑉᐳᖅ. 20ᐃᓄᓕᒫᓪᓗ ᓇᑭᑐᐃᓐᓇᖅ ᑎᑭᓯᒪᔪᑦ ᖁᕕᐊᓱᒃᐳᒃ; ᐃᒡᓗᒐᓮᓪᓗ ᐃᓱᒫᓗᒍᓐᓃᕐᐳᑦ, ᐊᑕᓔᐊᐅᑉ ᑐᖁᑕᐅᓚᐅᕐᓂᖓᓄᑦ ᐊᖓᔪᖅᑳᖃᕐᕕᐅᑉ ᐃᓗᐊᓂ. 21ᔨᕼᐅᐊᓯ ᐊᖓᔪᖅᑳᕐᔪᐊᓐᖑᕐᐳᖅ ᐊᕐᕌᒍᖃᕐᓗᓂ 7ᓂᒃ.
Currently Selected:
ᐊᑕᓃᑦ ᐂᑉᐸᖏᑦ 11: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
