ᐊᑕᓃᑦ ᐂᑉᐸᖏᑦ 1
1
ᐃᓔᑦᔭᐅᓪᓗ ᐊᕼᐊᔧᐊᐅᓪᓗ ᐊᖓᔪᖅᑳᕐᔪᐊᑉ ᐱᐅᓯᕆᔭᕕᓂᖏᒃ
1ᐂᕼᐊᑉ ᐃᓅᔪᓐᓃᕐᓯᒪᓕᕐᑎᓪᓗᒍ, ᒧᐊᐱᒥᐅᑦ ᐊᑭᕋᕐᑐᓕᓚᐅᕐᐳᑦ ᐃᓴᕆᐊᓕᒥᐅᓄᑦ. 2ᐊᕼᐊᔧᐊᓕ ᓴᒥᐊᕆᐊᒥ ᐊᓃᕋᔮᕐᕕᖕᒥᓂ ᖁᑦᓯᒃᑐᒥᑦ ᐃᔪᒃᑲᕐᓗᓂ ᐋᓐᓂᕐᐳᖅ, ᐋᓐᓂᕋᒥ ᓇᓪᓚᖓᓕᕐᐳᖅ ᐋᓐᓂᐊᓪᓗᓂ; ᐅᖃᕆᐊᕐᑐᕐᑎᑦᓯᔨᒥᓂᒃ ᑎᓕᓯᕗᖅ ᐅᖃᖁᓪᓗᒋᑦ ᐃᒫᒃ, “ᐃᑯᕋᓐᒧᐊᕐᓗᓯᒃ ᒎᑎᖓᑦ ᐱᐅᓪᓯᐹᐱ ᑐᑭᓯᓂᐊᕐᕕᒋᔭᕐᑐᒃᓯᐅᒃ, ᖃᐅᔨᕕᒋᓇᓱᐊᕐᓗᒍ ᐋᖅᑭᖕᓂᐊᕐᒪᖔᕐᒪ ᑕᒪᑐᒪᓐᖓᑦ ᐋᓐᓂᐊᓂᓐᓂᑦ.” 3ᐊᑕᓂᐅᓪᓕ ᐂᖏᓕᖓ ᐃᓔᑦᔭᒧᑦ ᐅᖃᕐᐳᖅ ᑎᔅᐰᑎᒥᐅᑕᕐᒧᑦ, “ᒪᑭᓪᓗᑎᑦ, ᓴᒥᐊᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᑎᓕᔭᖏᒃ ᐸᕐᕆᐊᕐᓗᒋᒃ ᐊᐱᕆᒃᑭᑦ, ‘ᐃᓴᕆᐊᓕᒥ ᒎᑎᑕᖃᕈᓐᓃᕐᒫᑦ ᐃᑯᕋᓐᒥᐅᑦ ᒎᑎᖓᓐᓂᒃ ᐱᐅᓪᓯᐹᐱᒥᒃ ᖃᐅᔨᓇᓱᐊᕆᐊᕐᑐᕐᐱᓰᒃ?’ 4ᒫᓐᓇ ᑍᒤᒻᒪᑦ ᐊᑕᓂᖅ ᐃᒫᒃ ᐅᖃᕐᐳᖅ, ‘ᐃᒡᓕᕐᒥᑦ ᓇᓚᕕᒋᔭᕐᓂᑦ ᒪᑭᒃᑲᓐᓂᕐᓂᐊᓐᖏᓚᑎᑦ, ᑐᖁᑐᐃᓐᓇᕐᓂᐊᓕᕐᐳᑎᑦ ᑕᕝᕙᓂ.’ ”
ᑕᕝᕙ ᐃᓔᑦᔭ ᐊᐅᓪᓚᕐᐳᖅ. 5ᐊᖓᔪᖅᑳᕐᔪᐊᑉ ᑎᓕᔭᖏᑦ ᐊᖓᔪᖅᑳᕐᔪᐊᕐᒧᑦ ᐅᑎᕇᕐᒪᑎᒃ ᐊᐱᕆᕚᒃ, “ᖃᓄᐃᒻᒪᑦ ᐅᑎᕇᕐᐱᓰᒃ?”
6ᑖᒃᑯᐊ ᑭᐅᕚᑦ, “ᐊᖑᒻᒧᑦ ᐸᕐᕆᐊᕐᑕᐅᖅᑲᐅᒐᓐᓄᒃ, ‘ᐅᖃᕐᓗᓂᓗ, ᐊᖓᔪᖅᑳᕐᔪᐊᕐᒧᑦ ᑎᓕᓯᓚᐅᕐᑐᒧᑦ ᐅᑎᕐᓗᓯ ᐃᒫᒃ ᐅᖃᐅᑎᓯᐅᒃ, ᐊᑕᓂᖅ ᐃᒫᒃ ᐅᖃᕐᐳᖅ, ᐃᓴᕆᐊᓕᒥ ᒎᑎᑕᖃᕈᓐᓃᕐᒫᑦ ᐃᑯᕋᓐᒥᐅᑦ ᒎᑎᖓᓐᓂᒃ ᐱᐅᓪᓯᐹᐱᒥᒃ ᖃᐅᔨᓇᓱᐊᕐᕕᖃᕆᐊᕐᑐᕐᐱᓰ? ᑍᒤᒻᒪᑦ ᐃᒡᓕᖅ ᓇᓚᕕᒋᔧᑦ ᒪᑭᕝᕕᒋᒃᑲᓐᓂᑦᔮᔪᓐᓃᕐᐸᑦ, ᑐᖁᑐᐃᓐᓇᕐᓂᐊᓕᕋᕕᑦ ᑕᕝᕙᓂ.’ ”
7ᐊᖓᔪᖅᑳᕐᔪᐊᑉ ᐊᐱᕆᕔᑦ, “ᖃᓄᖅ ᑕᐅᑦᑐᖃᕐᐹ ᑍᓐᓇ ᐊᖑᑦ ᐃᓕᑦᓯᓐᓂᒃ ᐸᕐᕆᐊᕐᓗᓂᒃ ᑍᒪᓐᓇ ᐅᖃᕐᑐᕕᓂᖅ?”
8 #
ᒫᑎᐅᓯ 3:4; ᒫᑯᓯ 1:6. ᑖᒃᑯᐊ ᑭᐅᕚᑦ, “ᐊᖑᑦ ᑍᓐᓇ ᐊᓐᓄᕌᕐᓯᒪᔪᖅ ᒥᖅᑯᓕᖕᓂᒃ, ᑕᑦᓯᖃᕐᑐᖅ ᐊᒥᕕᓂᕐᒥᒃ.”
ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᐃᓔᑦᔭᐅᕗᖅ ᑎᔅᐰᑎᒥᐅᑕᖅ.”
9ᐊᖓᔪᖅᑳᕐᔪᐊᖅ ᑕᕝᕙ ᑎᓕᓯᕗᖅ ᐅᓇᑕᕐᑎᖁᑎᒥ ᐊᖓᔪᖅᑳᖓᓐᓂᒃ 50ᓂᒃ ᐅᓇᑕᕐᑐᒃᓴᓂᒃ ᐃᓚᖃᕐᑎᓪᓗᒍ, ᐅᓇᑕᕐᑐᒃᓴᑦ ᐊᖓᔪᖅᑳᖓᑦ ᐃᓔᑦᔭᒧᑦ ᑎᑭᓐᓇᒥᒃ, ᐃᒃᓯᕚᕐᑎᓪᓗᒍ ᐱᖑᐊᕐᔫᑉ ᖄᖓᓂ ᐅᖃᐅᑎᕚ, “ᒎᑎᐅᑉ ᐃᓄᖁᑎᖓ, ᐊᖓᔪᖅᑳᕐᔪᐊᑉ ᕾᖁᖕᒪᑎᑦ.”
10 #
ᓘᑲᓯ 9:54. ᐃᓔᑦᔭᐅᓪᓕ ᐅᓇᑕᕐᑐᒃᓴᑦ ᐊᖓᔪᖅᑳᖓᑦ ᑭᐅᕚ, “ᒎᑎᒧᑦ ᐃᓄᖁᑎᒋᔭᐅᒍᒪ, ᐃᑯᒪᒥᒃ ᕿᓚᖕᒥᑦ ᑲᑕᒃᑐᖃᓕᕐᓕ ᐃᓕᖕᓂᒃ ᐅᓇᑕᕐᑐᒃᓴᖁᑎᖕᓂᒡᓗ 50ᓂᒃ ᐃᑯᐊᓪᓔᓂᐊᕐᑐᒥᒃ.”
ᑕᕝᕙ ᐃᑯᒪ ᕿᓚᖕᒥᑦ ᑲᑕᒃᐳᖅ ᐅᓇᑕᕐᑐᒃᓮᑦ 50 ᐊᖓᔪᖅᑳᖓᓪᓗ ᐃᑯᒪᒧᑦ ᑐᖁᑕᐅᕗᑦ.
11ᑕᕝᕙ ᐊᖓᔪᖅᑳᕐᔪᐊᖅ ᑎᓕᓯᒃᑲᓐᓂᕆᕗᖅ ᐃᓔᑦᔭᒧᑦ ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓂᒃ ᐅᓇᑕᕐᑐᒃᓴᖁᑎᖏᑦ 50 ᐃᓚᒋᓪᓗᒋᑦ, ᐅᓇᑕᕐᑐᒃᓮᓪᓗ ᐊᖓᔪᖅᑳᖓᑦ ᐅᖃᕐᐳᖅ, “ᒎᑎᐅᑉ ᐃᓄᖁᑎᖓ, ᐊᖓᔪᖅᑳᕐᔪᐊᖅ ᐱᖁᔨᖕᒪᑦ ᑐᐊᕕᕐᓗᑎᑦ ᕾᓚᐅᕆᑦ!”
12ᐃᓔᑦᔭᐅᓪᓕ ᑭᐅᕚ, “ᒎᑎᒧᑦ ᐃᓄᖁᑎᒋᔭᐅᒍᒪ, ᕿᓚᖕᒥᑦ ᐃᑯᒪᒥᒃ ᑲᑕᒃᑐᖃᓕᕐᓕ ᐃᓕᖕᓂᒃ ᐅᓇᑕᕐᑐᒃᓴᖁᑎᖕᓂᒡᓗ 50ᓂᒃ ᐃᑯᐊᓪᓔᓂᐊᕐᑐᒥᒃ.” ᑕᕝᕙ ᒎᑎᐅᑉ ᐃᑯᒪᖁᑎᖓ ᕿᓚᖕᒥᑦ ᑲᑕᒃᐳᖅ ᐅᓇᑕᕐᑐᒃᓮᑦ 50 ᐊᖓᔪᖅᑳᖓᓪᓗ ᐃᑯᒪᒧᑦ ᑐᖁᑕᐅᕗᑦ.
13ᓱᓕ ᐊᖓᔪᖅᑳᕐᔪᐊᖅ ᑎᓕᓯᒃᑲᓐᓂᕆᕗᖅ ᐱᖓᔪᒋᓕᕐᑕᖓᓐᓂᒃ ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓂᒃ ᐅᓇᑕᕐᑐᒃᓴᓂᒃ 50ᓂᒃ ᐃᓚᖃᕐᑎᓪᓗᒍ. ᑖᓐᓇᓕ ᐅᓇᑕᕐᑐᕐᓮᑦ ᐊᖓᔪᖅᑳᖓᑦ ᐃᓔᑦᔭᐅᑉ ᓵᖓᓄᑦ ᓰᖁᕐᓗᓂ ᐃᓚᓐᓂᕐᓴᕐᕕᒋᓪᓗᒍ ᐅᖃᕐᐳᖅ, “ᒎᑎᐅᑉ ᐃᓄᖁᑎᖓ, ᐃᓅᓯᕋ ᐅᑯᐊᓗ ᐅᓇᑕᕐᑐᒃᓮᑦ ᐱᔨᒋᔭᕕᑦ ᐃᓅᓯᖏᑦ ᐊᓐᓂᕆᒃᑭᑦ. 14ᑕᑯᒋᑦ, ᐅᓇᑕᕐᑐᒃᓮᑦ ᐊᖓᔪᖅᑳᖏᒃ ᒪᕐᕉᒃ ᐅᓇᑕᕐᑐᒃᓴᖁᑎᖏᓪᓗ ᐃᑭᑕᐅᓪᓗᑎᒃ ᕿᓚᖕᒥᑦ ᑐᖁᖕᒪᑕ, ᐃᓅᓯᕗᓪᓕ ᐊᓐᓂᕆᓚᐅᒃᑭᑦ.”
15ᐊᑕᓂᐅᑉ ᐂᖏᓖᖓᑕ ᐃᓔᑦᔭ ᐅᖃᐅᑎᕚ, “ᓯᕘᕋᖏᓪᓗᑎᑦ, ᑖᒃᑯᐊ ᒪᓕᓕᒃᑭᑦ.” ᐃᓔᑦᔭᓗ ᒪᑭᓐᓇᒥ ᒪᓕᒡᓗᒋᑦ ᐅᑎᖃᑎᒋᕔᑦ ᐊᖓᔪᖅᑳᕐᔪᐊᕐᒧᑦ. 16ᐊᖓᔪᖅᑳᕐᔪᐊᕐᓗ ᐅᖃᐅᑎᕚ, “ᐊᑕᓂᖅ ᐃᒫᒃ ᐅᖃᕐᐳᖅ, ‘ᑎᓕᓯᓚᐅᕋᕕᑦ ᖃᐅᔨᓇᓱᐊᖁᓪᓗᒋᑦ ᐃᑯᕋᓐᒥᐅᑦ ᒎᑎᖓᓐᓄᑦ ᐱᐅᓪᓯᐹᐱᒧᑦ, ᒎᑎᑕᖃᕈᓐᓃᕐᒫᑦ ᐃᓴᕆᐊᓕᒥ ᖃᐅᔨᓇᓱᐊᕐᕕᒃᓴᒥᒃ? ᑍᒤᒻᒪᑦ ᐃᒡᓕᖅ ᓇᓚᕕᒋᔧᑦ ᓇᔪᐃᓐᓇᕐᓗᒍ ᑐᖁᔪᒫᓕᕐᐳᑎᑦ.’ ”
17ᐊᑕᓂᐅᓪᓗ ᐅᖃᕐᑕᖓ ᐃᓔᑦᔭᒃᑯᑦ ᒪᓕᒡᓗᒍ ᑐᖁᕗᖅ. ᐊᕼᐊᔧᐊ ᐃᕐᓂᖃᓚᐅᖏᒻᒪᑦ, ᓄᑲᖓ ᔪᕌᒻ#1:17 ᔪᕌᒻ ᐃᓚᖏᓐᓂ ᐅᖃᐅᓯᐅᔪᖅ ᔨᕼᐅᕋᒻ ᐊᖓᔪᖅᑳᕐᔪᐊᓐᖑᕐᐳᖅ ᑖᑦᓱᒪ ᐃᓂᖓᓂ, ᐊᕐᕌᒎᑉ ᐂᑉᐸᕆᓕᕐᑕᖓᓂ ᔨᕼᐅᕌᒻ ᔨᕼᐆᓴᐸᐅᑉ ᐃᕐᓂᖓ ᐊᖓᔪᖅᑳᕐᔪᐊᖑᑎᓪᓗᒍ ᔫᑕᒥᐅᓄᑦ.
18ᐊᕼᐊᔧᐊ ᐊᖓᔪᖅᑳᕐᔪᐊᖑᑎᓪᓗᒍ ᐱᓂᐊᕐᓂᐅᔪᕕᓃᑦ, ᖃᓄᐃᓕᐅᖃᑦᑕᕐᓯᒪᓂᖓᓗ ᐊᖓᔪᖅᑳᕐᔪᐊᖑᓪᓗᓂ ᑎᑎᕋᕐᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᓂᖏᓐᓂ ᐃᓴᕆᐊᓕᒥᐅᑦ ᑎᑎᖅᑲᖁᑎᖏᓐᓂ.
Currently Selected:
ᐊᑕᓃᑦ ᐂᑉᐸᖏᑦ 1: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
