ᐊᑕᓃᑦ ᓯᕗᓪᓖᑦ 22
22
ᒤᑬᐊᐅᑉ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐃᓂᕐᑎᕆᓂᖓ ᐂᕼᐊᑉᒥᒃ
ᑯᕉᓂᑲ ᐂᑉᐸᖏᑦ 18:2-27
1ᐊᕐᕌᒍᓂᒃ ᐱᖓᓱᓂᒃ ᐃᓴᕆᐊᓕᒥᐅᑦ ᓯᕆᐊᒥᐅᓪᓗ ᐅᓇᑕᓚᐅᓐᖏᓚᑦ. 2ᑕᒪᑐᒪ ᑭᖑᕐᖓᒍᑦ ᔨᕼᐆᓴᐸᑦ ᔫᑕᒥᐅᑉ ᐊᖓᔪᖅᑳᕐᔪᐊᖓ ᐊᕐᕌᒍᓂᒃ ᐱᖓᓱᓂᒃ ᐊᖓᔪᖅᑳᕐᔪᐊᖑᓕᕐᓗᓂ ᐳᓛᕆᐊᓚᐅᕐᐳᖅ ᑕᐅᓄᖓ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᓄᑦ.
3ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᐱᔨᒥᓄᑦ ᐅᖃᕐᐳᖅ, “ᖃᐅᔨᒪᕕᓰ ᕌᒪᑦ-ᒋᓖᑦ ᓄᓇᖁᑎᒋᒐᑦᑎᒍ, ᓱᖕᒪᓪᓕ ᑲᒪᒋᑦᑍᓕᓯᒪᕕᑎᒎ ᓂᐱᖃᐅᑎᒋᓯᒪᓇᑎᒍᓗ ᓯᕆᐊᒥᐅᑉ ᐊᖓᔪᖅᑳᕐᔪᐊᖓᑕ ᐱᓯᒪᑎᓪᓗᓂᐅᒃ?” 4ᔨᕼᐆᓴᐸᑦᒧᓪᓗ ᐅᖃᕐᐳᖅ, “ᐅᓇᑕᕆᐊᖃᑎᒋᔪᓐᓇᕐᐱᖔ ᕌᒪᑦ-ᒋᓖᑦᒦᑦᑐᒨᑦ?” ᔨᕼᐆᓴᐸᑦᓗ ᑭᐅᕗᖅ ᐅᖃᕐᓗᓂ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓄᑦ, “ᐃᓕᒃᑐᑦ ᑍᒤᑉᐳᖓ, ᐃᓄᖁᑎᒃᑲ ᐃᓄᖁᑎᒋᕙᑎᑦ, ᕿᒻᒥᕐᔪᐊᖁᑎᒃᑲᓗ ᕿᒻᒥᕐᔪᐊᖁᑎᒋᕙᑎᑦ.”
5ᔨᕼᐆᓴᐸᑦᓗ ᐅᖃᕆᐊᓪᓚᒃᐳᖅ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓄᑦ, “ᐊᑕᓂᖅ ᖃᓄᖅ ᐅᖃᐅᓯᒃᓴᖃᕐᒪᖔᑦ ᖃᐅᔨᒋᐊᖅᑳᓚᐅᕐᓗᒃ.”
6ᑕᕝᕙ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᑕ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑦ ᑲᑎᑎᑉᐰᑦ, 400 ᖃᓂᒋᔮᓃᑦᑐᑦ, ᐅᖃᐅᑎᕔᓪᓗ, “ᕌᒪᑦ-ᒋᓖᑦᒦᑦᑐᒧᑦ ᐅᓇᑕᕆᐊᕐᑐᒃᓴᐅᕗᖔ, ᐅᕝᕙᓗ ᐅᓇᑕᕆᐊᕆᐊᖃᓐᖏᓚᖓ?”
ᑖᒃᑯᐊ ᐅᖃᐅᑎᕚᑦ, “ᐅᓇᑕᕆᐊᓕᕆᑦ; ᐊᑕᓂᐅᑉ ᑐᓂᔪᒫᕐᐹ ᐊᖓᔪᖅᑳᕐᔪᐊᕐᒧᑦ.”
7ᔨᕼᐆᓴᐸᑦᓕ ᐅᖃᕐᐳᖅ, “ᐅᖃᕐᑎᑕᖃᕆᐊᓪᓚᓐᖏᓛᖅ ᑕᒫᓂ ᐊᑕᓂᐅᑉ ᐅᖃᕐᑎᖓᓂᒃ, ᐊᐱᕆᔪᓐᓇᕐᑕᑦᑎᓐᓂᒃ?”
8ᐃᓴᕆᐊᓕᒥᐅᓪᓕ ᐊᖓᔪᖅᑳᕐᔪᐊᖓ ᐅᖃᕐᐳᖅ ᔨᕼᐆᓴᐸᑦᒧᑦ, “ᐊᖑᑎᑕᖃᕐᐳᖅ ᓱᓕ, ᒤᑬᐊᒥᒃ ᐃᒻᓚᐅᑉ ᐃᕐᓂᖓᓂᒃ, ᐊᑕᓂᕐᒥᒃ ᖃᐅᔨᒋᐊᕐᕕᒋᔪᓐᓇᕐᒥᔭᕗᑦ, ᑭᓯᐊᓂᓕ ᑖᓐᓇ ᐆᒥᒋᕙᕋ, ᐱᐅᔪᓂᒃ ᐅᖃᐅᓯᒃᓴᖃᓚᐅᕐᓯᒪᖏᒻᒪᑦ ᐅᕙᓐᓄᑦ, ᐱᐅᖏᑦᑐᓂᒃ ᑭᓯᐊᓂ.”
ᔨᕼᐆᓴᐸᑦᓗ ᐅᖃᕐᐳᖅ, “ᐊᖓᔪᖅᑳᕐᔪᐊᖅ ᑍᒫᒃ ᐅᖃᕐᑐᒃᓴᐅᓐᖏᓚᖅ.”
9ᑕᕝᕙ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᕾᖁᔨᓕᕐᐳᖅ ᑲᒪᔨᒥᒃ ᐅᖃᐅᑎᓪᓗᒍᓗ, “ᑐᐊᕕᕐᓗᑎᑦ ᒤᑬᐊ ᐃᒻᓚᐅᑉ ᐃᕐᓂᖓ ᕾᖁᔭᐅᓚᐅᕐᓕ.”
10ᐃᓴᕆᐊᓕᒥᐅᓪᓕ ᐊᖓᔪᖅᑳᕐᔪᐊᖓ ᔨᕼᐆᓴᐸᑦᓗ ᔫᑕᒥᐅᑦ ᐊᖓᔪᖅᑳᕐᔪᐊᖓ, ᐊᖓᔪᖅᑳᕐᔪᐊᕐᓯᐅᑎᒥᖕᓂᒃ ᐅᓕᒃᔪᐊᒥᒃ ᐊᑐᕐᓗᑎᒃ, ᐃᒃᓯᕙᓚᐅᕐᐴᒃ ᐃᒃᓯᕙᐅᑕᕐᔪᐊᒥ, ᐃᕖᔧᕕᐅᑉ ᓇᑎᖓᓂ ᓴᒥᐊᕆᐊᑉ ᐃᑎᕐᑕᕐᕕᐊᑕ ᓴᓂᐊᓂ; ᐅᖃᕐᑏᑦ ᐅᖃᓪᓚᒃᑎᓪᓗᒋᑦ ᑖᒃᑯᐊᒃ ᓯᕗᕌᓂ. 11ᔨᑎᑬᐊᓕ ᓯᓈᓇᐅᑉ ᐃᕐᓂᖓ ᓴᕕᕋᔭᖕᓂᒃ ᓇᒡᔪᓐᖑᐊᖕᓂᒃ ᓇᖕᒥᓂᖅ ᓴᓇᕗᖅ, ᐅᖃᕐᓗᓂᓗ, “ᐊᑕᓂᖅ ᐃᒫᒃ ᐅᖃᕐᐳᖅ, ‘ᑖᒃᑯᖕᓄᖓ ᓯᕆᐊᒥᐅᑦ ᐊᔭᐅᕈᒫᕐᐸᑎᑦ ᓵᓚᒋᒻᒪᕆᒡᓗᒋᑦ.’” 12ᐅᖃᕐᑎᓕᒫᑦ ᐅᖃᓪᓚᒃᑭᕗᑦ ᑍᒫᒃᑕᐅᖅ, ᐅᖃᕐᓗᑎᒃ, “ᕌᒪᑦ-ᒋᓖᑦ ᓄᓇᖓᓄᑦ ᐂᓕᕆᑦ ᓵᓚᖃᕆᐊᕐᑐᕐᓗᑎᑦ; ᐊᑕᓂᐅᑉ ᐊᖓᔪᖅᑳᕐᔪᐊᕐᒧᑦ ᑐᓂᔪᒫᕐᐰᑦ.”
13ᐅᖃᕆᐊᕐᑐᕐᑎ ᕾᖁᔨᔭᕐᑐᓚᐅᕐᑐᖅ ᒤᑬᐊᒥᒃ ᐅᖃᕐᐳᖅ ᑖᑦᓱᒧᖓ, “ᓈᓚᓕᕆᑦ, ᐅᖃᕐᑏᑦ ᐅᖃᐅᓯᖏᓐᓂᒃ ᐊᑕᐅᓯᕐᒥᒃ ᐃᓱᒪᖃᕐᒪᑕ ᐊᖓᔪᖅᑳᕐᔪᐊᕐᒥᒃ ᑲᔪᖏᕐᓮᓪᓗᑎᒃ; ᐊᑏ, ᐃᕝᕕᑦᑕᐅᖅ ᐅᖃᐅᓯᖃᖃᑕᐅᓕᕆᑦ ᑖᒃᑯᑎᑐᓇᖅ, ᑲᔪᖏᕐᓮᓗᑎᓪᓗ.”
14ᒤᑬᐊᓕ ᐅᖃᕐᐳᖅ, “ᐊᑕᓂᖅ ᐃᓅᖕᒪᑦ, ᐊᑕᓂᐅᑉ ᐅᕙᓐᓄᑦ ᐅᖃᐅᓯᕆᔭᖏᓐᓂᒃ ᐅᖃᕐᓂᐊᕐᐳᖓ.”
15ᐊᖓᔪᖅᑳᕐᔪᐊᒧᑦ ᑎᑭᒻᒪᑦ, ᐊᖓᔪᖅᑳᕐᔪᐊᑉ ᐅᖃᐅᑎᕚ, “ᒤᑬᐊ, ᐅᓇᑕᕆᐊᕐᑐᒃᓴᐅᕕᑖ ᕌᒪᑦ-ᒋᓖᑦᒧᑦ, ᐅᕝᕙᓘᓐᓃᑦ ᐅᓇᑕᕆᐊᕆᐊᖃᓐᖏᓚᒍᑦ?”
ᑭᐅᕗᖅ, “ᐅᓇᑕᕆᐊᓕᕆᑦ ᓵᓚᖃᕆᐊᕐᑐᕐᓗᑎᑦ; ᐊᑕᓂᐅᑉ ᑐᓂᔪᒫᕐᐹ ᐊᖓᔪᖅᑳᕐᔪᐊᕐᒧᑦ.”
16ᐊᖓᔪᖅᑳᕐᔪᐊᕐᓕ ᐅᖃᕐᐳᖅ ᑖᑦᓱᒧᖓ, “ᖃᑦᓯᐊᕐᑎᕐᓗᖓ ᐊᖏᕐᑎᑕᒃᓴᕆᕙᒌᑦ ᐅᕙᓐᓄᑦ ᓱᓕᔪᒥᒃ ᐅᖃᖁᓗᑎᑦ ᐊᑕᓂᐅᑉ ᐊᑎᖓᓂ?”
17 #
ᒨᓯᓯ ᓯᑕᒪᖏᑦ 27:17; ᒫᑎᐅᓯ 9:36; ᒫᑯᓯ 6:34. ᐅᖃᐅᑎᕚ, “ᐃᓴᕆᐊᓕᒥᐅᓕᒫᑦ ᑕᑯᕙᒃᑲ ᐊᕕᒃᑐᕐᓯᒪᑎᓪᓗᒋᑦ ᖃᖅᑲᐅ ᖄᖏᓐᓂ, ᓰᐱᑎᑐᑦ ᐰᕐᓯᔨᖃᖏᑦᑐᑎᑐᑦ; ᐊᑕᓂᕐᓗ ᐅᖃᕐᐳᖅ, ‘ᐅᑯᐊ ᐊᖓᔪᖅᑳᖃᖏᑦᑐᑦ; ᐊᑐᓂᑦ ᐊᖏᕐᕋᒥᖕᓄᑦ ᐊᖏᕐᕋᐅᓕᕐᓕᑦ ᐅᓇᑕᕈᓐᓃᕐᓗᑎᒃ.’”
18ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᔨᕼᐆᓴᐸᑦᒧᑦ ᐅᖃᕐᐳᖅ, “ᐅᖃᐅᑎᓚᐅᓐᖏᓚᒌᑦ ᐱᐅᔪᓂᒃ ᐅᖃᓚᐅᕐᓯᒪᖏᓐᓂᕋᕐᓗᒍ ᐅᕙᓐᓄᑦ, ᐱᐅᖏᑦᑐᓂᒃ ᑭᓯᐊᓂ?”
19 #
ᔫᐱ 1:6; ᐂᓮᐊᓯ 6:1. ᒤᑬᐊ ᐅᖃᕐᐳᖅ, “ᑍᒤᒻᒪᑦ ᐊᑕᓂᐅᑉ ᐅᖃᐅᓯᖏᓐᓂᑦ ᑐᓴᕆᑦᓯ: ᐊᑕᓂᖅ ᑕᑯᕙᕋ ᐃᒃᓯᕙᐅᑕᕐᔪᐊᕐᒥᓂ ᐃᒃᓯᕙᔪᖅ, ᕿᓚᖕᒥᐅᒐᓴᒡᔪᐃᓪᓗ ᓇᖏᕐᐳᑦ ᑖᑦᓱᒪ ᐊᕙᑖᓂ, ᑕᓕᕐᐱᐊᓂ, ᓴᐅᒥᐊᓂᓗ; 20ᐊᑕᓂᕐᓗ ᐅᖃᕐᐳᖅ, ‘ᑭᓈ ᑎᓕᐅᕆᓂᐊᕐᐹ ᐂᕼᐊᑉᒥᒃ, ᐅᓇᑕᕆᐊᖁᓪᓗᒍ ᑐᖁᑕᐅᖁᓪᓗᒍ ᕌᒪᑦ-ᒋᓖᑦᒥ?’ ᐃᓚᖓ ᐃᒫᒃ ᐅᖃᕐᐳᖅ, ᐊᓯᐊᓗ ᐊᓯᐊᓂᒃ ᐅᖃᕆᓪᓗᓂ. 21ᑕᕝᕙ ᐊᓂᕐᓂᖅ ᓯᕗᒧᐊᒡᓗᓂ ᓂᑯᕕᑉᐳᖅ ᐊᑕᓂᐅᑉ ᓵᖓᓂ, ᐅᖃᕐᓗᓂᓗ, ‘ᐅᕙᖓ ᑎᓕᐅᕆᐊᕐᑐᕈᒪᕙᕋ,’ 22ᐊᑕᓂᐅᓪᓗ ᐅᖃᐅᑎᕚ, ‘ᖃᓄᐃᓕᐅᕐᓗᑏᑦ?’ ᐅᖃᐅᑎᕚ, ‘ᐂᔪᒪᕗᖓ ᐊᓂᕐᓂᐅᓗᖓ ᓴᒡᓗᕿᑦᓯᓗᖓ ᐂᕼᐊᐱᐅᑉ ᐅᖃᕐᑎᓕᒫᖏᑕ ᖃᓂᖏᓐᓂ ᐊᑐᕐᓂᐊᕐᐳᖓ.’ ᐊᑕᓂᕐᓗ ᐅᖃᕐᐳᖅ, ‘ᐊᑏ ᓴᒡᓗᕿᑦᓯᔭᕐᑐᓕᕆᑦ, ᓵᓚᖃᕐᓂᐊᕐᐳᑎᑦ; ᐂᓗᑎᑦ ᑍᒤᓕᐅᕆᐊᕐᑐᓕᕆᑦ.’
23“ᑍᒤᒻᒪᑦ ᒫᓐᓇ ᑕᑯᓕᕆᑦ, ᐊᑕᓂᖅ ᐊᓂᕐᓂᕐᓂᒃ ᓴᒡᓗᔪᓂᒃ ᐅᑯᓄᖓᓕᒫᖅ ᐅᖃᕐᑎᖁᑎᕕᑦ ᖃᓂᖏᓐᓄᑦ ᐃᓕᓯᓯᒪᕗᖅ; ᐊᑕᓂᖅ ᐱᐅᖏᑦᑐᒥᒃ ᐅᖃᓪᓚᒃᓯᒪᕗᖅ ᐃᓕᖕᓄᑦ.”
24ᔨᑎᑬᐊᓕ ᓯᓈᓇᐅᑉ ᐃᕐᓂᖓ ᒤᑬᐊᒧᑦ ᐂᕗᖅ ᐸᑎᒃᓗᓂᐅᒡᓗ ᐅᓗᐊᖓᒍᑦ, ᐅᖃᕐᐳᖅ, “ᖃᓄᖅ ᐊᑕᓂᐅᑉ ᐊᓂᕐᓂᖓ ᐅᕙᓐᓂᑦ ᐊᓂᓪᓗᓂ ᐃᓕᖕᓂᒃ ᐅᖃᕐᑎᑦᓯᖔᓕᕐᐹ?”
25ᒤᑬᐊᐅᑉ ᐅᖃᐅᑎᕚ, “ᑕᑯᒋᑦ, ᖃᐅᔨᔪᒫᕐᐳᑎᑦ ᐃᒡᓗᕈᓯᕐᒧᑦ ᖃᒪᓃᓐᓂᕐᐹᒧᑦ ᐃᔨᕆᐊᕐᑐᕈᕕᑦ!”
26ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖓ ᐅᖃᕐᐳᖅ, “ᒤᑬᐊ ᑎᒍᔭᐅᓕ, ᐅᑎᕐᑎᑕᐅᓪᓗᓂᓗ ᐋᒪᓐᒧᑦ ᐃᒡᓗᒐᓴᖕᓂ ᐊᐅᓚᑦᓯᔨᐅᔪᒧᑦ ᔪᐊᓯᒧᑦ ᐊᖓᔪᖅᑳᕐᔪᐊᑉ ᐃᕐᓂᖓᓄᑦ; 27ᐅᖃᐅᑎᓗᒍᓗ, ‘ᐊᖓᔪᖅᑳᕐᔪᐊᖅ ᐃᒫᒃ ᐅᖃᕐᐳᖅ: “ᐅᓇ ᐊᖑᑦ ᑎᒍᔭᐅᒪᕕᖕᒧᐊᕐᑕᐅᓕ, ᓂᕆᔪᒪᑎᖃᑦᑕᕐᓗᒍᓗ ᓁᒪᓗᓂ ᓂᐊᖂᔭᒥᒃ ᐃᒥᕐᒥᒡᓗ, ᐅᑎᓚᐅᖅᑳᕐᑎᓐᓇᖓ, ᖃᓄᐃᖏᑦᓯᐊᕐᓗᖓ.”’”
28ᒤᑬᐊᓕ ᐅᖃᕐᐳᖅ, “ᐅᑎᕋᔭᕈᕕᑦ ᖃᓄᐃᖏᑦᓯᐊᕐᓗᑎᑦ, ᐊᑕᓂᖅ ᑕᕝᕙ ᐅᕙᒃᑯᑦ ᐅᖃᓪᓚᒃᑐᕕᓂᐅᒐᔭᓐᖏᓚᖅ.” ᐅᖃᕐᐳᕐᓗ, “ᑐᓴᑦᓯᐊᕆᑦᓯ, ᑕᒪᑦᓯ ᐅᖃᐅᓯᓐᓂᒃ.”
ᐂᕼᐊᐱᐅᑉ ᑐᖁᑕᐅᓂᖓ
ᑯᕉᓂᑲ ᐂᑉᐸᖏᑦ 18:28-34
29ᑕᕝᕙ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓ ᔨᕼᐆᓴᐸᑦᓗ ᔫᑕᐅᑉ ᐊᖓᔪᖅᑳᕐᔪᐊᖓ ᐅᓇᑕᕆᐊᕐᐴᒃ ᕌᒪᑦ-ᒋᓖᑦᒧᑦ. 30ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖓ ᔨᕼᐆᓴᐸᑦᒧᑦ ᐅᖃᕐᐳᖅ, “ᐅᕙᓐᓂᒃ ᐃᓕᑕᕐᓇᕈᓐᓃᕐᑎᓐᓂᐊᕐᐳᖓ ᐅᓇᑕᕆᐊᕐᓗᖓ; ᐃᕝᕕᓪᓕ ᐊᖓᔪᖅᑳᕐᔪᐊᕐᓯᐅᑎᒥᒃ ᐅᓕᒡᔪᐊᒥᒃ ᐊᑐᓕᕆᑦ.” ᑍᒤᒻᒪᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᐃᒻᒥᓂᒃ ᐃᓕᑕᕐᓇᕈᓐᓃᕐᑎᑉᐳᖅ ᐅᓇᑕᕆᐊᕐᓗᓂᓗ.
31ᓯᕆᐊᒥᐅᓪᓕ ᐊᖓᔪᖅᑳᕐᔪᐊᖓ ᐱᖁᔨᓚᐅᕐᐳᖅ ᐊᖓᔪᖅᑲᐅᔪᓂᒃ 32ᓂᒃ ᐅᓇᑕᐅᑎᓕᖕᓂᒃ ᐊᒃᓴᓗᐊᓕᖕᓂᒃ, ᐅᖃᐅᑎᓪᓗᒋᑦ, “ᑐᖁᑦᓯᓇᓱᒃᑍᓕᒋᑦᓯ ᒥᑭᔪᓂᒃ ᐊᖏᔪᓂᒡᓗ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓂᒃ ᑭᓯᐊᓂ ᐱᓇᓱᖕᓂᐊᕐᐳᓯ.” 32ᐊᖓᔪᖅᑲᐅᔪᓪᓕ ᐅᓇᑕᐅᑎᓖᑦ ᐊᒃᓴᓗᐊᓕᖕᓂᒃ ᔨᕼᐆᓴᐸᑦᒥᒃ ᑕᑯᒐᒥᒃ ᐅᖃᕐᐳᖅ, “ᑖᓐᓇ ᑕᕝᕙ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ!” ᑕᕝᕙ ᓵᓪᓗᒍ ᐅᓇᑕᕋᓱᐊᓕᕐᐹᑦ; ᔨᕼᐆᓴᐸᑦᓕ ᓂᓪᓕᐊᓕᕐᐳᖅ. 33ᐊᖓᔪᖅᑲᐅᔪᑦ ᑲᓕᒐᕐᓃᑦᑐᑦ ᐊᒃᓴᓗᐊᓕᖕᓂᒃ ᖃᐅᔨᒐᒥᒃ ᐃᓴᕆᐊᓕᒧᑦ ᐊᖓᔪᖅᑳᕐᔪᐊᖑᖏᓐᓂᖓᓂᒃ, ᒪᓕᓚᐅᕋᓗᐊᕐᓗᑎᒃ ᐅᑎᕆᐊᕐᐳᖅ. 34ᐊᖑᑏᑦ ᐃᓚᖓᑦ ᐱᓯᒋᐊᕐᐳᖅ ᑐᕌᕐᑎᓐᓇᓂ, ᐱᓯᒃᓯᕗᕐᓗ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓂ ᐊᓐᓄᕌᖏᑕ ᓴᒡᕕᐊᓃᑦᑑᓪᓗ ᐊᑯᓐᓂᖓᒍᑦ; ᑍᒤᒻᒪᑦ ᐊᒃᓴᓗᐊᓕᑯᑎᒥᓄᑦ ᐊᖁᑎᓂ ᐅᖃᐅᑎᕚ, “ᓴᖑᓕᕆᑦ ᐅᓇᑕᕐᑐᓂᑦ ᕿᒪᕉᑎᑎᓪᓗᖓ, ᐃᑭᓕᕐᑕᐅᒐᒪ.”
35ᐅᓇᑕᕆᐊᓪᓚᓚᐅᕐᐳᑦ ᑍᑦᓱᒪᓂ ᐅᓪᓗᒥ; ᐊᖓᔪᖅᑳᕐᔪᐊᕐᓗ ᒪᑭᑕᕗᖅ ᑲᓕᒐᕐᒥ ᐊᒃᓴᓗᐊᓕᖕᒦᓪᓗᓂ ᓯᕆᐊᒥᐅᓄᑦ ᓵᓐᖓᓪᓗᓂ, ᐅᓐᓄᒃᑎᓪᓗᒍ ᑐᖁᕗᖅ; ᐃᑭᒥᒍᓪᓗ ᐊᐅᓈᕐᐳᖅ ᑲᓕᒐᐅᑉ ᐊᒃᓴᓗᐊᓕᐅᑉ ᓇᑎᖓ ᐃᒻᒪᒃᓗᓂᐅᒃ. 36ᓯᕿᓂᖅ ᓂᐱᓕᕐᑎᓪᓗᒍ, ᕾᒐᓛᕐᑐᖃᕐᐳᖅ ᐅᓇᑕᕐᑐᒃᓴᓂᑦ, ᐅᖃᕐᓗᓂ, “ᐊᑕᖏᕐᓗᓯ ᐃᒡᓗᒐᓴᑦᓯᓐᓄᐊᓕᕆᑦᓯ, ᓄᓇᓕᑦᓯᓐᓄᐊᕐᓗᓯᓗ!”
37ᐊᖓᔪᖅᑳᕐᔪᐊᖅ ᑐᖁᖕᒪᑦ, ᓴᒥᐊᕆᐊᒧᐊᕈᑦᔭᐅᕗᖅ; ᐊᖓᔪᖅᑳᕐᔪᐊᕐᓗ ᐃᓗᕕᕐᑕᐅᕗᖅ ᓴᒥᐊᕆᐊᒥ. 38ᑲᓕᒐᕐᓗ ᐊᒃᓴᓗᐊᓕᒃ ᑕᓯᕐᒥ ᐅᐊᓴᕐᑕᐅᕗᖅ ᓴᒥᐊᕆᐊᒥ, ᕿᒻᒦᓪᓗ ᐊᐅᖓ ᐊᓗᒃᑐᕐᐹᑦ, ᐊᕐᓁᑦ ᐊᑐᒊᑦ ᑕᕝᕙᓂ ᐅᕕᓂᖕᓂᐊᕐᑎᓪᓗᒋᑦ, ᐊᑕᓂᐅᑉ ᐅᖃᐅᓯᕆᓚᐅᕐᑕᖏᑦ ᒪᓕᒡᓗᒋᑦ.
39ᐂᕼᐊᐱᐅᑉ ᐱᓂᐊᓚᐅᕐᑕᖏᑕ ᐊᓯᖏᑦ ᐱᓇᓱᐊᓚᐅᕐᑕᓕᒫᖏᓪᓗ, ᐃᒡᓗᓕᐅᕐᓂᕆᓚᐅᕐᑕᖓᓗ ᑑᒑᓂᑦ, ᐃᒡᓗᒐᓮᓪᓗ ᐃᒡᓗᓕᐅᓚᐅᕐᑕᖏᑦ, ᑎᑎᕋᕐᓯᒪᕗᑦ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᑕ ᐅᓂᒃᑲᐅᓯᐅᓂᖏᓐᓂ. 40ᐂᕼᐊᑉ ᓯᓂᖃᑕᐅᓕᕐᐳᖅ ᓯᕗᓕᕐᒥᓄᑦ; ᐃᕐᓂᖓᓗ ᐊᕼᐊᔧᐊ ᐊᖓᔪᖅᑳᕐᔪᐊᕈᕐᐳᖅ ᑭᖑᕝᕕᐅᑎᓪᓗᓂ.
ᐊᖓᔪᖅᑳᕐᔪᐊᖅ ᔨᕼᐆᓴᐸᑦ ᔫᑕᒥ
ᑯᕉᓂᑲ ᐂᑉᐸᖏᑦ 20:31—21:1
41ᔨᕼᐆᓴᐸᑦ ᐂᓴᐅᑉ ᐃᕐᓂᖓ ᐊᖓᔪᖅᑳᕐᔪᐊᕈᓚᐅᕐᐳᑦ ᔫᑕᒥ ᐂᕼᐊᑉ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐃᓴᕆᐊᓕᒥᐅᓂ ᐊᕐᕌᒍᓂᒃ ᓯᑕᒪᓂᒃ. 42ᔨᕼᐆᓴᐸᑦ ᐊᖓᔪᖅᑳᕐᔪᐊᕈᕐᑎᓪᓗᒍ ᐊᕐᕌᒍᖃᓚᐅᕐᐳᖅ 35ᓂᒃ, ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒍᓂᒃ 25ᓂᒃ ᔨᕉᓴᓕᒥ. ᐊᓈᓇᖓ ᐊᑎᖃᕐᐳᖅ ᐊᔪᐸᒥᒃ ᓮᕼᐂᑉ ᐸᓂᖓᓂᒃ. 43ᐊᑖᑕᒥᓂᒃ ᐂᓴᐅᑉ ᐱᓂᐊᕐᓂᖏᓐᓂᒃ ᒪᓕᓚᐅᕐᐳᖅ; ᓴᖑᓚᐅᕋᓂ ᓇᓪᓕᐊᓐᓄᓪᓘᓐᓃᑦ, ᐱᓂᐊᕐᓂᖃᓚᐅᕐᐳᖅ ᓈᒻᒪᒃᑐᒥᒃ ᐊᑕᓂᐅᑉ ᑕᑯᓐᓇᕐᑕᖓᒍᑦ; ᑭᓯᐊᓂᓕ ᖁᑦᓯᒃᑐᒥ ᑐᒃᓯᐊᕐᕕᐅᕙᒃᑐᑦ ᐲᔭᓚᐅᓐᖏᓔᑦ, ᐃᓄᐃᑦ ᓱᓕ ᑐᓂᕐᕈᓯᖃᑦᑕᓚᐅᕐᐳᑦ ᑎᐱᑦᓯᐊᕆᒃᑐᓂᒡᓗ ᐃᑯᐊᓪᓔᕙᒃᓗᑎᒃ ᖁᑦᓯᒃᑐᒥ ᑐᒃᓯᐊᕐᕕᐅᕙᒃᑐᓂ. 44ᔨᕼᐆᓴᐸᑦᓗ ᐃᓚᓕᐅᕆᓚᐅᕐᐳᖅ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᓂᒃ.
45ᔨᕼᐆᓴᐸᐅᓪᓕ ᐱᓂᐊᕐᓂᕆᓚᐅᕐᑕᖏᑕ ᐃᓚᖏᑦ ᐱᓯᑎᐅᓂᕆᓚᐅᕐᑕᖓᓗ, ᐅᓇᑕᕐᓂᕆᓚᐅᕐᑕᖏᑦ, ᑎᑎᕋᕐᓯᒪᕗᑦ ᔫᑕᐅᑉ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᓂᖏᓐᓂ. 46ᐃᓄᐃᓪᓗ ᐊᒥᐊᒃᑰᓯᒪᔪᑦ ᐊᖑᑎᑦ ᐊᕐᓁᓪᓗ ᓄᓕᐊᕐᓂᕐᒧᑦ ᐊᑐᕐᑐᐊᒐᐅᓚᐅᕐᑐᑦ ᐊᑖᑕᖓ ᐋᓴ ᐃᓅᑎᓪᓗᒍ, ᓄᖑᓚᐅᕐᐰᑦ ᓄᓇᒥᑦ.
47ᓄᓇ ᐄᑐᒥ ᐊᖓᔪᖅᑳᕐᔪᐊᖃᓚᐅᓐᖏᓚᖅ; ᐊᖓᔪᖅᑳᕐᔪᐊᓪᓕ ᐃᑲᔪᕐᑎᖓᓂᒃ ᑕᕝᕙᓂ ᐊᐅᓚᑦᓯᓂᐊᕐᑐᒥᒃ ᔫᑕᐅᑉ ᐊᖓᔪᖅᑳᕐᔪᐊᖓ ᑎᓕᓯᓚᐅᕐᐳᖅ.
48ᔨᕼᐆᓴᐸᑦ ᑖᕐᓯᓯᒥ ᐅᒥᐊᕐᔪᐊᓂᒃ ᓴᓇᓚᐅᕐᐳᖅ ᓄᓇᒧᑦ ᐅᐱᕼᐃᒧᑦ ᒎᓗᓯᐅᕆᐊᕐᑐᒃᓴᓂᒃ; ᑭᓯᐊᓂᓕ ᐊᐅᓪᓚᓚᐅᓐᖏᓚᑦ, ᐅᒦᔭᓚᐅᕐᒪᑕ ᐃᔨᐅᓂ-ᒋᐱᕆᒥ. 49ᐊᕼᐊᔧᐊ ᐂᕼᐊᐱᐅᑉ ᐃᕐᓂᖓ ᔨᕼᐆᓴᐸᑦᒧᑦ ᐅᖃᓚᐅᕐᐳᖅ, “ᐅᒥᐊᕐᔪᐊᒃᑯᑦ ᐃᓄᖁᑎᒃᑲ ᐃᓄᖁᑎᖕᓄᑦ ᐊᐅᓪᓚᖃᑕᐅᓚᐅᕐᓕᑦ.” ᔨᕼᐆᓴᐸᑦᓕ ᐱᖁᔨᓚᐅᓐᖏᓚᖅ.
50ᔨᕼᐆᓴᐸᑦᓕ ᑐᖁᖕᒪᑦ ᐃᓗᕕᕐᑕᐅᓚᐅᕐᐳᖅ ᓯᕗᓕᕐᒥᓂ ᑍᕕᑎᐅᑉ ᐃᒡᓗᒐᓴᖏᓐᓂ; ᐃᕐᓂᖓᓗ ᔨᕼᐅᕌᒻ ᐊᖓᔪᖅᑳᕐᔪᐊᕈᕐᐳᖅ ᐃᓂᖓᓂ.
ᐊᕼᐊᔧᐊᐅᑉ ᐊᖓᔪᖅᑳᕐᔪᐊᖑᕐᓂᖓ ᐃᓴᕆᐊᓕᒥ
51ᐊᕼᐊᔧᐊ ᐂᕼᐊᐱᐅᑉ ᐃᕐᓂᖓ ᐊᖓᔪᖅᑳᕐᔪᐊᕈᓚᐅᕐᐳᖅ ᐃᓴᕆᐊᓕᒥᐅᓄᑦ ᓴᒥᐊᕆᐊᒥ, ᔨᕼᐆᓴᐸᑦ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᔫᑕᒥ ᐊᕐᕌᒍᓂᒃ 17ᓂᒃ, ᐊᕼᐊᔧᐊᓗ ᐊᖓᔪᖅᑳᕐᔪᐊᖑᓚᐅᕐᐳᖅ ᐃᓴᕆᐊᓕᒥ ᐊᕐᕌᒎᖕᓂᒃ ᒪᕐᕉᖕᓂᒃ. 52ᐊᔪᕐᑐᓕᓚᐅᕐᐳᖅ ᐊᑕᓂᐅᑉ ᑕᑯᓐᓇᕐᑕᖓᓂ, ᐊᑖᑕᖓᑕ ᐱᓂᐊᕐᓂᕆᓚᐅᕐᑕᖏᑦ ᒪᓕᓚᐅᕐᒪᒋᑦ, ᐊᓈᓇᖓᑕᓗ ᐱᓂᐊᕐᓂᕆᓚᐅᕐᑕᖏᓐᓂᒃ, ᔨᕈᐳᐊᒻᓗ ᓂᐹᑦ ᐃᕐᓂᖓᑕ ᐱᓂᐊᕐᓂᕆᓚᐅᕐᑕᖏᓐᓂᒃ, ᐊᔪᕐᑐᓕᑎᑦᓯᓚᐅᕐᐳᖅ ᐃᓴᕆᐊᓕᒥᐅᓂᒃ. 53ᐰᓕᒥᒃ ᐱᔨᑦᓯᓚᐅᕐᒪᑦ ᑐᒃᓯᐊᕐᕕᒋᓪᓗᒍᓗ, ᐊᑕᓂᕐᒥᒃ ᐃᓴᕆᐊᓕᒥᐅᑦ ᒎᑎᖓᓂᒃ ᓂᓐᖓᒃᓮᓚᐅᕐᐳᖅ, ᐊᑖᑕᖓᑕ ᐱᓂᐊᕐᓂᕆᓚᐅᕐᑕᓕᒫᖏᓐᓂᒃ ᒪᓕᒡᓗᓂ.
Currently Selected:
ᐊᑕᓃᑦ ᓯᕗᓪᓖᑦ 22: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
