ᑯᕆᓐᑎᐊᒥᐅᓄᑦ ᐂᑉᐸᖏᑦ 8
8
᙭ᔅᑑᓯᒥᐅᑦ ᑐᓂᕐᕈᓯᕐᓂᖓᑦ
1 #
ᕉᒪᒥᐅᓄᑦ 15:26. ᖃᐅᔨᒪᖁᕙᑦᓯᓕ ᙭ᔅᑐᓯᒥᐅᑕᐅᖃᑎᒃᑲ, ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓂᒃ ᐅᒃᐱᕐᑑᖃᑎᒌᓄᑦ ᓴᖅᑭᑎᑕᐅᓯᒪᔪᒥᒃ ᒫᓯᑑᓂᐊᒦᑦᑐᓄᑦ. 2ᐅᖁᒤᑦᑐᓄᑦ ᐊᖏᔪᒥᒃ ᐆᒃᑐᕐᑕᐅᒐᓗᐊᕋᒥᒃ; ᖁᕕᐊᓱᖕᓂᕐᔪᐊᖃᕐᐳᑦ, ᐊᔪᕐᓴᕐᑐᒻᒪᕆᐅᒐᓗᐊᕐᓗᑎᒡᓗ ᐊᓐᓂᕈᓱᖏᑦᓯᐊᕐᓗᑎᒃ ᑐᓂᓯᑦᓯᐊᓚᐅᕐᐳᑦ. 3ᑐᓂᔪᓐᓇᕐᑕᒥᖕᓂᒃ ᑐᓂᓯᕗᑦ, ᓇᓗᓁᕐᓯᔪᓐᓇᕐᐳᖓᓗ, ᑐᓂᔪᓐᓇᕐᑕᒥᓘᓐᓃᑦ ᐅᖓᑖᓄᑦ ᑐᓂᓯᓚᐅᕐᐳᑦ, ᑎᓕᐅᕐᑕᐅᓇᑎᒃ ᐃᓱᒪᒥᖕᓂᒃ. 4ᐃᓗᖏᕐᑐᕐᓗᑎᒃ ᑐᓂᕐᕈᑎᒥᖕᓂᒃ ᐱᖁᓚᐅᕐᐹᑎᒍᑦ ᐃᑲᔪᖃᑕᐅᔪᒪᓪᓗᑎᒃ ᐃᑦᔪᕐᓁᑎᑕᐅᔪᓄᑦ. 5ᑕᒪᑐᒥᖓ ᓂᕆᐅᒋᓐᖏᑕᑦᑎᓐᓂᒃ ᐱᓚᐅᕐᐳᑦ, ᓯᕗᓪᓕᕐᒥᒡᓕ ᐊᑕᓂᕐᒧᑦ ᑐᓂᖅᑳᕐᐳᑦ ᑭᖑᓂᖓᒍᓪᓗ ᐅᕙᑦᑎᓐᓄᑦ ᑐᓂᕗᑦ ᒎᑎᐅᑉ ᐱᖁᔨᓂᖓ ᒪᓕᒡᓗᒍ. 6ᑍᒤᒻᒪᑦ ᑍᑑᓯ ᐃᓇᓚᐅᕐᐸᕗᑦ, ᑕᒪᑐᒥᖓ ᐱᒋᐊᕐᑎᑦᓯᓚᐅᕐᑐᖅ ᑲᔪᓯᑐᐃᓐᓇᖁᓪᓗᒍ, ᐃᓕᑦᓯᓐᓂᒃ ᐃᑲᔪᕐᓗᓂ ᐱᓇᓱᐊᑦᓯᐊᕐᓂᕐᒥᒃ ᐱᔭᕇᕐᓯᖁᓪᓗᒍ. 7ᑕᒤᓐᓂᒡᓕ ᐊᔪᕐᓴᓐᖏᓚᓯ, ᐅᒃᐱᕐᓂᒃᑯᑦ, ᐅᖃᓪᓚᖕᓂᕐᒥᒃ, ᖃᐅᔨᑎᑕᐅᓂᕐᒥᒃ, ᐃᑲᔪᕈᒪᑦᓯᐊᕐᓂᕐᒥᒃ, ᐅᕙᑦᑎᓐᓂᒡᓗ ᓇᒡᓕᒍᓱᖕᓂᕐᒥᒃ; ᑍᒫᒃᑕᐅᖅ ᑕᒪᓐᓇ ᐱᓇᓱᐊᑦᓯᐊᕐᓂᖅ ᐃᓕᑦᓯᓐᓄᑦ ᑲᔪᓯᑎᑕᐅᖁᕙᕋ.
8ᑕᒪᑐᒥᖓ ᐃᓕᑦᓯᓐᓄᑦ ᐱᖁᔭᓕᐅᕋᓱᐊᓐᖏᓚᖓ, ᐊᓯᓯᓕ ᑲᔪᖏᑦᓯᐊᕐᓗᑎᒃ ᐱᓇᓱᐊᑦᓯᐊᕐᒪᑕ ᓇᒡᓕᖕᓂᓯ ᓱᓕᑦᓯᐊᕐᒪᖔᑦ ᐆᒃᑐᑐᐃᓐᓇᕐᐸᕋ. 9ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᖃᐅᔨᒪᒐᑦᓯᐅᒃ, ᐊᔪᕐᓴᖏᒃᑲᓗᐊᕐᓗᓂ, ᐊᔪᓴᑑᓕᓚᐅᕐᒪᑦ ᐱᑦᔪᑎᒋᓪᓗᓯ, ᐊᔪᕐᓴᓕᕐᓂᖓᓄᑦ ᐊᔪᕐᓴᕈᓃᕐᑎᑕᐅᖁᓪᓗᓯ.
10ᐃᓱᒪᒋᔭᕋᓕ ᓴᖅᑭᑉᐸᕋ ᑕᒪᑐᒧᖓ: ᐊᕐᕌᓂ ᐱᒋᐊᓚᐅᕐᑕᓯ ᒫᓐᓇ ᐱᔭᕇᕈᑦᓯᐅᒃ ᐊᑲᐅᓂᕐᓴᐅᕗᖅ ᐱᒋᐊᑐᐃᓐᓇᓚᐅᓐᖏᓚᓯ ᑐᓂᓯᔪᒪᓂᖃᖅᑳᓚᐅᕐᐳᓯᓕ. 11ᒫᓐᓇ ᐱᓇᓱᐊᕐᓂᓯ ᐱᔭᕇᑦᓯᐊᓕᕐᓯᐅᒃ ᑲᔪᖏᑦᓯᐊᕐᓂᓯ ᑐᓂᓯᓂᓯᓗ ᐊᑦᔨᒌᑦᓯᐊᖁᓪᓗᒋᒃ ᐱᔪᓐᓇᕐᑕᓯ ᒪᓕᒡᓗᒍ. 12ᑐᓂᓯᔪᒪᓂᕐᑕᖃᕐᐸᑦ, ᐃᓅᑉ ᑐᓂᕐᕈᑎᖓ ᐃᓚᓕᐅᕐᑕᐅᓂᐊᕐᐳᖅ ᑐᓂᓯᔪᒪᓂᖓ ᒪᓕᒡᓗᒍ, ᐱᖃᖏᓐᓂᖓ ᒪᓕᖕᓇᒍ.
13ᐅᖃᓐᖏᓚᖓ ᐊᓯᓯ ᐅᕿᒡᓕᑎᑕᐅᑎᓪᓗᒋᑦ ᐅᖁᒤᒃᓴᕐᑎᑕᐅᖔᖁᓪᓗᓯ, 14ᐊᑦᔨᒌᖁᓪᓗᓯᓕ ᒫᓐᓇ ᐊᔪᕐᓴᖏᓐᓇᑦᓯ ᐃᓕᑦᓯᓐᓂᑦ ᐱᖃᕐᑎᑕᐅᖁᓪᓗᒋᑦ ᐱᔭᕆᐊᖃᕐᑕᖏᓐᓂᒃ, ᑍᒫᒃᑕᐅᖅ ᐱᔭᕆᐊᖃᓕᕈᑦᓯ ᑖᒃᑯᓇᓐᖓᑦ ᐱᑎᑕᐅᒐᔭᕋᑦᓯ, ᑍᒫᒃ ᑕᕝᕙ ᐊᑦᔨᒌᒥᒃ ᐱᒐᔭᕐᐳᓯ. 15#ᒨᓯᓯ ᐂᑉᐸᖏᑦ 16:18.ᑎᑎᕋᕐᓯᒪᖕᒪᑦ, “ᐊᒥᓱᓂᒃ ᑲᑎᕐᓱᐃᓚᐅᕐᑐᖅ ᐊᒥᐊᒃᑯᖃᓐᖏᓚᖅ, ᒥᑭᔪᓂᒡᓗ ᑲᑎᕐᓱᐃᓚᐅᕐᑐᖅ ᐊᔪᕐᓴᓕᓐᖏᓚᖅ.”
ᑍᑑᓯᓗ ᐃᓚᒋᔭᖏᑕᓗ ᑎᓕᔭᐅᓂᖏᑦ
16ᒎᑎ ᖁᔭᒋᔭᐅᓕ ᑍᑑᓯ ᐅᕙᑦᑎᑐᑦ ᐃᓗᖏᕐᓱᕐᓗᓂ ᐃᑲᔪᕈᒪᓂᕐᑖᕐᑎᓚᐅᕐᒪᒍ ᐃᓕᑦᓯᓐᓂᒃ. 17ᑎᓕᓯᓂᕗᑦ ᐃᓚᓕᐅᑐᐃᓐᓇᖏᒻᒪᒍ, ᐃᓕᑦᓯᓐᓄᐊᕈᒪᕗᕐᓕ ᑲᑦᓱᖎᕐᓯᒪᒻᒪᕆᒡᓗᓂ ᐱᔪᒪᓂᕐᒥᒍᑦ. 18ᐅᒃᐱᖃᑎᑦᑎᓐᓂᒃ ᐃᓚᖃᕐᑎᑉᐸᕗᑦ ᐅᒃᐱᕐᑑᖃᑎᒌᓕᒫᓂᑦ ᐅᐱᒋᔭᐅᑦᓯᐊᕐᑐᒥᒃ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐊᔪᕆᕐᑐᐃᓂᖓᒍᑦ; 19ᑕᒪᑐᒧᖓᑑᓐᖏᓚᕐᓗ, ᐅᒃᐱᕐᑑᖃᑎᒌᓂᓪᓕ ᓂᕈᐊᕐᑕᐅᓯᒪᒋᕗᖅ ᐅᕙᑦᑎᓐᓄᑦ ᐃᖏᕐᕋᖃᑕᐅᖁᓪᓗᒍ ᑐᓂᕐᕈᑎᓂᒃ ᓇᒃᓴᕐᓗᑕ ᐊᑕᓂᐅᑉ ᓂᕐᑐᕐᑕᐅᑦᔪᑎᒃᓴᖓᓄᑦ, ᐃᑲᔪᕈᒪᓂᑦᑎᓐᓂᒡᓗ ᓴᖅᑭᑎᑦᓯᑦᔪᑎᒋᔭᑦᑎᓐᓄᑦ.
20ᐃᒃᐱᒍᓱᑦᓯᐊᕋᓱᐊᕐᐳᒍᑦ ᑖᒃᑯᐊ ᑐᓂᕐᕈᑏᑦ ᐊᒥᓱᑦ ᖃᓄᖅ ᐊᐅᓚᒻᒪᖔᑦᑎᒍᑦ; ᓇᓪᓕᐊᓐᓄᓪᓘᓐᓃᑦ ᐸᓯᔭᒃᓴᐅᓕᕈᒪᓇᑕ. 21#ᓲᓗᒨᓂ 3:4.ᐊᒃᓱᕈᒻᒪᕆᒃᑲᑦᑕ ᐅᐱᓐᓇᕐᑐᒥᒃ ᐱᓇᓱᐊᕈᒪᓪᓗᑕ ᐊᑕᓂᐅᑉ ᓵᖓᓂᑐᐃᓐᓇᐅᖏᑦᑐᖅ ᐃᓄᐃᓪᓗᑦᑕᐅᖅ ᓵᖏᓐᓂ.
22ᑍᒤᒻᒪᑦ ᐅᒃᐱᕐᑑᖃᑎᕗᑦ ᑎᓕᖃᓯᐅᑎᕙᕗᑦ ᖃᐅᔨᓴᖃᑦᑕᕐᓯᒪᒐᑦᑎᒍ ᓴᖅᑭᑎᑦᓯᖃᑦᑕᕐᓯᒪᖕᒪᑦ ᐅᓄᕐᑐᐃᕐᓱᕐᓗᓂ ᐃᑲᔪᕈᒪᑦᓯᐊᕐᓂᕐᒥᓂᒃ, ᒫᓐᓇᓗ ᐃᑲᔪᕈᒪᒋᐊᓪᓚᓕᕆᕗᖅ ᐃᓕᑦᓯᓐᓂᒃ ᖁᓚᕈᑎᖃᖏᑦᓯᐊᓕᕋᒥ. 23ᑍᑑᓯᓕ ᐱᓇᓱᐊᖃᑎᒐ, ᐃᑲᔪᕐᑎᒋᕙᒃᑕᕋᓗ ᐱᑦᔪᑎᒋᓪᓗᓯ; ᐅᒃᐱᕐᑑᖃᑎᕗᓪᓗ ᐃᓚᒋᔭᖏᑦ, ᑖᒃᑯᐊ ᐅᒃᐱᕐᑑᖃᑎᒌᓂᑦ ᑎᓕᔭᐅᓯᒪᕗᑦ, ᙭ᔅᑑᓯ ᓂᕐᑐᕐᑕᐅᖁᓪᓗᒍ. 24ᑍᒤᒻᒪᑦ, ᑖᒃᑯᐊ ᓇᒡᓕᖕᓂᑦᓯᓐᓂᒃ ᓴᖅᑭᑎᑦᓯᕕᒋᓯᐅᒃ, ᓇᒡᓕᖕᓂᓯ ᐅᒃᐱᕐᑑᖃᑎᒌᓄᑦ ᑕᒤᓐᓄᑦ ᖃᐅᔨᔭᐅᖁᓪᓗᒍ ᓱᓕᓪᓗᑕᓗ ᐃᓕᑦᓯᓐᓂᒃ ᐅᐱᒋᔭᖃᕐᓂᕗᑦ ᖃᐅᔨᔭᐅᖁᓪᓗᒍ.
Currently Selected:
ᑯᕆᓐᑎᐊᒥᐅᓄᑦ ᐂᑉᐸᖏᑦ 8: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
