ᑯᕆᓐᑎᐊᒥᐅᓄᑦ ᐂᑉᐸᖏᑦ 2
2
1ᑍᒤᒻᒪᑦ ᐃᓱᒪᑖᓚᐅᕐᐳᖓ ᑎᑭᑦᓱᒪᔪᓐᓃᕐᓗᖓ; ᐃᓕᑦᓯᓐᓂᒃ ᖁᕕᐊᓱᒍᓐᓃᕐᑎᑦᓯᔭᕐᑐᕈᒪᖏᓐᓇᒪ. 2ᐃᓕᑦᓯᓐᓂᒃ ᖁᕕᐊᓱᒍᓐᓃᕐᑎᑦᓯᒍᒪ, ᑭᐊᓕ ᑍᒪ ᓮᒻᒪᕐᓴᕋᔭᕐᐹᖔ? ᐃᓕᑦᓯᑐᐊᖅ ᖁᕕᐊᓱᒍᓐᓃᕐᑎᑕᒃᑲ ᓮᒻᒪᕐᓮᔪᒃᓴᑐᖔᔭᕐᐳᓯ. 3ᑍᒫᒃ ᑕᕝᕙ ᐅᑯᓂᖓ ᑎᑎᕋᕈᑎᖃᕐᐳᖓ, ᐃᓕᑦᓯᓐᓄᑦ ᑎᑭᒃᑯᒪ ᖁᕕᐊᓱᓐᖏᑎᑕᐅᔪᒪᓇᖓ ᐅᕙᓐᓂᒃ ᖁᕕᐊᓱᒃᑎᑦᓯᒐᔭᓚᐅᕐᑐᓄᑦ, ᐃᓕᑦᓯᓐᓂᒃ ᖃᐅᔨᒪᑦᓯᐊᕋᒪ, ᖁᕕᐊᓱᒃᑯᒪ ᖁᕕᐊᓱᑦᓯᐊᕐᑐᐃᓐᓇᐅᒐᔭᕋᑦᓯᑦᑕᐅᖅ. 4ᑎᑎᕋᕐᕕᒋᓚᐅᕋᑦᓯ ᐃᓗᒃᑯᑦ ᐊᖏᔪᒥᒃ ᕿᒃᓵᒡᓗᖓ ᐃᓱᒪᔮᕐᓗᖓᓗ ᖁᕝᕕᐅᖃᑦᑕᕐᓗᖓᓗ, ᖁᕕᐊᓱᒍᓐᓃᕐᑎᑦᓱᒪᓇᓯ ᖃᐅᔨᑎᑦᓱᒪᓪᓗᓯᓕ ᐃᓕᑦᓯᓐᓄᑦ ᐃᑎᔪᒥᒃ ᓇᒡᓕᖕᓂᖃᕐᓂᓐᓂᒃ.
ᐊᔪᕐᑐᓕᔫᑉ ᐃᓱᒪᒋᔪᓐᓃᕐᕕᐅᔪᓐᓇᕐᓂᖓ
5ᖁᕕᐊᓇᖏᑦᑐᒥᒃ ᐱᓯᒪᔪᖃᕐᐸᑦ ᐅᕙᓐᓂᒃ ᖁᕕᐊᓱᒍᓐᓃᕐᑎᑎᑐᐃᓐᓇᖏᓚᖅ ᐃᓕᑦᓯᓐᓂᓕᒫᕐᓕᑕᐅᖅ ᖁᕕᐊᓇᖏᑦᑐᒦᑎᑦᑎᕗᖅ. 6ᑍᒤᑎᑎᔪᖅ ᐊᒥᓲᓂᕐᓴᓄᑦ ᓱᒋᐊᕐᑕᐅᖁᔭᐅᓯᒪᓐᓂᕐᐸᑦ ᓱᒋᐊᕐᑕᐅᑲᓐᓂᖏᒃᑲᓗᐊᕈᓂ ᓈᒻᒪᒃᐳᖅ. 7ᒫᓐᓇᓕ ᐃᓱᒪᒋᔪᓐᓁᕐᕕᒋᔭᒃᓴᕆᓕᕐᐸᓯ ᓮᒻᒪᕐᓴᕐᓗᒍᓗ, ᕿᒃᓵᓗᐊᓕᕐᓗᓂ ᓴᐱᓕᑐᐃᓐᓇᖁᓇᒍ. 8ᑕᕝᕙ ᐃᓇᑉᐸᑦᓯ ᑖᑦᓱᒥᖓ ᖃᐅᔨᑎᑦᓯᖁᓪᓗᓯ ᓇᒡᓕᒍᓱᓪᓚᕆᖕᓂᑦᓯᓐᓂᒃ. 9ᑍᒤᒻᒪᑦ ᑎᑎᕋᕐᕕᒋᓚᐅᕐᐸᑦᓯ, ᖃᐅᔨᔪᒪᓪᓗᖓ ᑕᒤᓐᓂᒃ ᓈᓚᒍᓐᓇᕐᒪᖔᑦᓯ ᐃᓕᑦᓯᓐᓄᑦ ᐱᓇᓱᐊᕐᑕᐅᖁᔭᐅᔪᓂᒃ. 10ᓇᓪᓕᐊᓐᓂᒃ ᐃᓱᒪᒋᔪᓐᓁᕐᓯᒍᑦᓯ, ᐅᕙᖓᑦᑕᐅᖅ ᐃᓱᒪᒋᔪᓐᓁᕐᕕᒋᕙᕋ. ᐃᓱᒪᒋᔪᓐᓁᕐᓯᒍᒪ ᖃᓄᑐᐃᓐᓇᖅ, ᐃᓱᒪᒋᔪᓐᓁᕐᕕᒋᕙᕋ ᙭ᔅᑑᓯᐅᑉ ᓵᖓᓂ ᐱᑦᔪᑎᒋᓪᓗᓯ. 11ᓵᑖᓇᓯᒧᑦ ᓵᓚᒋᔭᐅᓕᖁᓇᑕ; ᑖᑦᓱᒪ ᖃᓄᐃᓕᐅᕋᓱᐊᕐᓂᖓ ᖃᐅᔨᒪᒐᑦᑎᒍᑦ.
ᐸᐅᓗᓯᐅᑉ ᑐᕈᐊᓯᒥ ᐃᓱᒪᓗᑎᒃᓴᑖᕐᓂᕕᓂᖓ
12 #
ᐋᐴᓯᑕᓖᑦ 20:1. ᑐᕈᐊᓯᒧᑦ ᑎᑭᓐᓇᒪ ᐊᔪᕆᕐᑐᐃᔭᕐᑐᕐᓗᖓ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᙭ᔅᑑᓯᒥᒃ, ᐱᓇᓱᐊᕐᕕᒃᓴᖅ ᐅᕙᓐᓄᑦ ᒪᑐᐃᕐᑕᐅᓚᐅᕐᐳᖅ ᐊᑕᓂᕐᒥ; 13ᑕᕝᕙᓃᑎᓪᓗᖓᓕ ᐱᖏᒐᒻᒪᕆᓕᓚᐅᕐᐳᖓ ᖃᑕᓐᖑᑎᒐ ᑍᑑᓯ ᓇᓂᔪᓐᓇᓚᐅᖏᓐᓇᒃᑯ. ᑍᒤᒻᒪᑦ ᑕᕝᕙᓃᑦᑐᑦ ᕿᒪᒡᓗᒋᑦ ᒫᓯᑑᓂᐊᒧᑦ ᐊᐅᓪᓚᓚᐅᕐᐳᖓ.
᙭ᔅᑑᓯᒃᑯᑦ ᓵᓚᖃᕐᓂᖅ
14ᒎᑎᓕ ᖁᔭᒋᔭᐅᓕ, ᙭ᔅᑑᓯᒃᑯᑦ ᓵᓚᖃᕐᓂᕐᒧᑦ ᑕᓯᐅᕐᐸᖕᒪᑎᒍᑦ, ᐅᕙᑦᑎᒍᓪᓗ ᖃᐅᔨᔭᐅᕙᓪᓕᐊᑎᑦᓯᖕᒪᑦ ᙭ᔅᑑᓯᒥᒃ ᑎᐱᑦᓯᐊᕆᒃᑐᒧᑦ ᒪᒪᕐᓮᔪᑎᑐᑦ ᓇᒧᑐᐃᓐᓇᖅ. 15᙭ᔅᑑᓯᐅᑉ ᑎᐱᑦᓯᐊᕆᒃᓴᐅᑎᒋᕚᑎᒍᑦ ᒎᑎᒧᑦ ᐱᐅᓕᔭᐅᓯᒪᔪᓄᑦ ᐊᓯᐅᔪᒫᕐᑐᓄᓪᓗ. 16ᐊᓯᐅᔪᒫᕐᑐᓄᑦ ᒪᒪᖏᑦᑐᑎᑐᑦ ᑐᖁᓐᓇᕐᑐᑎᑐᑦ ᑍᒤᑉᐳᒍᑦ; ᐱᐅᓕᔭᐅᓯᒪᔪᓄᑦ ᑎᐱᑦᓯᐊᕆᒃᑐᑎᑐᑦ ᐃᓅᓯᕐᑖᕐᑎᑦᓯᔪᑎᑐᑦ ᑍᒤᑉᐳᒍᑦ. ᑭᓇᓕ ᑍᒪ ᑍᒤᑦᑐᒥᒃ ᐱᓇᓱᐊᕐᓂᕐᒥᒃ ᐱᔪᓐᓇᕐᐹ? 17ᐊᓯᕗᑦ ᐊᒥᓱᑦ ᐱᓇᓱᐊᕐᑐᑦ ᐊᑦᔨᒋᖏᓐᓇᑦᑎᒍ, ᒎᑎᐅᑉ ᐅᖃᐅᓯᖏᓐᓂᒃ ᑮᓇᐅᔭᓕᐅᕈᑎᖃᕋᓱᐊᕐᑐᑦ; ᓱᓕᑦᓯᐊᕐᑐᒥᒡᓕ ᐅᖃᐅᓯᖃᕐᐳᒍᑦ ᑖᑦᓱᒪ ᓵᖓᓂ, ᒎᑎᒧᓪᓗ ᑎᓕᔭᐅᓯᒪᓪᓗᑕ, ᙭ᔅᑑᓯᒥᒃ ᐅᖃᐅᓯᖃᕐᐳᒍᑦ.
Currently Selected:
ᑯᕆᓐᑎᐊᒥᐅᓄᑦ ᐂᑉᐸᖏᑦ 2: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
