ᑯᕆᓐᑎᐊᒥᐅᓄᑦ ᐂᑉᐸᖏᑦ 12

ᐸᐅᓗᓯᐅᑉ ᑕᑯᑎᑕᐅᓂᖓ ᖃᐅᔨᑎᑕᐅᓂᖓᓗ

1ᓱᓕ ᓂᕐᑑᑎᔭᕆᐊᖃᕋᒪ; ᑕᒪᓐᓇ ᐱᕙᓪᓕᕈᑎᒃᓴᐅᖏᒃᑲᓗᐊᕐᑎᓪᓗᒍ, ᐅᖃᐅᓯᖃᕈᒪᕗᖓᓕ ᐊᑕᓂᕐᒥᑦ ᑕᑯᑎᑕᐅᓂᕐᒥᒃ, ᖃᐅᔨᑎᑕᐅᓂᕐᒥᒡᓗ. 2ᖃᐅᔨᒪᔭᖃᕐᐳᖓ ᙭ᔅᑑᓯᒥᐅᑕᕐᒥᒃ ᐊᕐᕌᒍᑦ 14 ᓯᕗᓂᖓᓂ ᕿᓔᑦ ᐱᖓᔪᖓᓐᓄᑦ ᐱᑎᑕᐅᓚᐅᕐᑐᒥᒃ, ᑭᓯᐊᓂᓕ ᑎᒥᒥᓃᓚᐅᕐᒪᖔᑦ ᑎᒥᒥᓃᓚᐅᖏᒻᒪᖔᓪᓘᓐᓃᑦ ᖃᐅᔨᒪᓐᖏᓚᖓ, ᒎᑎᓕ ᑭᓯᒥ ᖃᐅᔨᒪᕗᖅ. 3ᐃᓄᒃ ᑖᓐᓇ ᖃᐅᔨᒪᕙᕋ ᐸᕋᑍᓯᒧᐊᕐᑎᑕᐅᓚᐅᕐᒪᑦ ᑭᓯᐊᓂᓕ ᑎᒥᒥᓃᓚᐅᕐᒪᖔᑦ ᑎᒥᒥᓃᓚᐅᖏᒻᒪᖔᓪᓘᓐᓃᑦ ᖃᐅᔨᒪᓐᖏᓚᖓ ᒎᑎ ᑭᓯᒥ ᖃᐅᔨᒪᕗᖅ. 4ᑖᓐᓇ ᑐᓵᓚᐅᕐᐳᖅ ᐃᓅᑉ ᐅᖃᐅᓯᕆᔪᓐᓇᓐᖏᑕᖏᓐᓂᒃ, ᐃᓄᖕᒧᓪᓗ ᐅᖃᐅᓯᐅᖁᔭᐅᖏᑦᑐᓂᒃ. 5ᐃᓄᖕᒥᒃ ᑍᒤᑦᑐᒥᒃ ᓂᕐᑑᑎᑦᔪᑎᖃᕈᒪᕗᖓ, ᐅᕙᓐᓂᒡᓕ ᓂᕐᑑᑎᑦᔪᑎᒋᔪᒪᓐᖏᓚᖓ, ᓴᓐᖐᓐᓂᕋ ᑭᓯᐊᓂ. 6ᓂᕐᑑᑎᔪᒪᒍᒪ ᐅᕙᓐᓂᒃ, ᓯᓔᑦᑑᒐᔭᓐᖏᓚᖓ, ᓱᓕᔪᒥᒃ ᐅᖃᕋᔭᕋᒪ. ᑍᒤᓕᐅᕈᒪᓐᖏᓚᖓᓕ, ᐊᖏᔪᐊᓗᒃᑎᑐᑦ ᐃᓱᒪᒋᔭᐅᓕᕈᒪᓇᖓ, ᐅᖃᐅᓯᕆᓯᒪᔭᒪ ᐱᓂᐊᕐᓂᕐᒪᓘᓐᓃᑦ ᐅᖓᑖᓄᑦ.

7ᓂᕐᑑᑎᓗᐊᓕᖁᓇᖓ ᑕᒪᒃᑯᐊ ᑕᑯᑎᑕᐅᓃᑦ ᐊᖏᔪᑦ ᐱᓪᓗᒋᑦ, ᑎᒥᒃᑯᑦ ᐊᑲᐅᓐᖏᓗᑕᕐᑖᑎᑕᐅᓚᐅᕐᐳᖓ, ᓵᑖᓇᓯᐅᑉ ᑎᓕᔭᖓᓂᒃ ᐅᕙᓐᓄᑦ ᐋᓐᓂᐊᑎᑦᓯᔭᕐᑐᕐᑐᒥᒃ, ᐱᐅᔪᕆᓕᖁᓇᖓ ᐅᕙᓐᓂᒃ. 8ᐱᖓᓱᐃᕐᑐᕐᓗᖓ ᐊᑕᓂᖅ ᕿᓄᕕᒋᒻᒪᕆᓚᐅᕐᐸᕋ, ᑕᒪᑐᒥᖓ ᐲᕐᓯᖁᓪᓗᒍ ᐅᕙᓐᓂᑦ; 9ᐅᖃᐅᑎᓚᐅᕐᐹᖓᓕ, “ᐱᑦᓯᐊᕐᓂᕐᒪ ᐱᔪᓐᓇᕐᑎᑦᓯᓂᖓ ᐃᓕᖕᓄᑦ ᓈᒻᒪᒃᐳᖅ; ᐱᔪᓐᓇᕐᓂᕋ ᓈᒻᒪᒃᑎᑕᐅᕙᖕᒪᑦ ᓴᓐᖐᑦᑐᓂ.” ᑍᒤᒻᒪᑦ ᖁᕕᐊᓱᒡᓗᖓ ᓴᓐᖐᓐᓂᕋ ᓂᕐᑑᑎᒋᔪᒪᓂᕐᓴᕆᕙᕋ, ᙭ᔅᑑᓯᐅᑉ ᐱᔪᓐᓇᕐᓂᖓ ᐅᕙᓐᓂ ᐃᓂᖃᖁᓪᓗᒍ. 10ᑍᒤᒻᒪᑦ ᙭ᔅᑑᓯ ᐱᓪᓗᒍ, ᑕᕝᕙ ᓈᒻᒪᒃᓴᕐᐳᖓ ᓴᓐᖐᓐᓂᓐᓂᒃ, ᐅᖃᕐᓂᕐᓘᑎᒋᔭᐅᓂᕐᓂᒃ, ᐅᖁᒤᒃᓴᕐᑎᑕᐅᓂᕐᓂᒃ, ᐊᑭᕋᕐᑐᕐᑕᐅᓂᕐᓂᒃ, ᐊᒃᓱᕈᓐᓇᕐᑐᓂᒡᓗ; ᓴᓐᖐᑦᑑᓕᕌᖓᒪᓕ, ᐱᔪᓐᓇᕐᓂᖃᕐᓂᕐᓴᐅᓕᕐᐸᒃᐳᖓ.

ᐸᐅᓗᓯᐅᑉ ᑯᕆᓐᑎᒥᐅᓂᒃ ᐃᓱᒫᓘᑎᖃᕐᓂᖓ

11ᓯᓔᑦᑐᑐᑦ ᐱᐅᓯᖃᓕᕐᐳᖓ, ᐃᓕᑦᓯ ᑍᒤᑎᑦᓯᕗᓯ ᐅᕙᓐᓂᒃ, ᐃᓕᑦᓯ ᐱᐅᓂᕅᖔᕋᔭᕋᓗᐊᕐᑐᓯ ᐅᕙᓐᓂᒃ. ᐋᐴᓯᑕᓕᖁᑎᑦᓯᓐᓂᑦ ᐱᔪᓐᓇᕐᓂᖃᕐᑐᓂᑦ ᒥᑭᓐᓂᕐᓴᐅᖏᓐᓇᒪ, ᓱᓇᐅᖏᒃᑲᓗᐊᕐᑎᓪᓗᖓ. 12ᐋᐴᓯᑕᓕᐅᑉ ᓱᓕᓂᖏᑕ ᓇᓗᓁᒃᑯᑕᖏᑦ ᐃᓕᑦᓯᓐᓂ ᐱᓇᓱᐊᕐᑕᐅᓚᐅᕐᐳᑦ ᕿᓄᐃᓵᕐᓂᒃᑯᑦ, ᓇᓗᓁᕐᓯᕕᐅᓃᑦ ᑲᒪᓇᕐᑐᓕᓃᓪᓗ ᐱᔪᓐᓇᕐᓂᕐᔪᐊᓪᓗ. 13ᖃᓄᖅ ᐅᒃᐱᕐᑑᖃᑎᒌᓂᑦ ᐱᑦᓯᐊᕐᑕᐅᓯᒪᖏᓐᓂᕐᓴᐅᓇᓱᒋᕕᓰ? ᐃᓕᑦᓯᓐᓄᑦ ᐅᖁᒤᑦᑐᒥᒃ ᐱᐅᓯᖃᕐᑎᑦᓯᓚᐅᖏᓐᓂᓐᓅᑦ? ᑍᒤᓚᐅᕐᓂᕈᒪ ᐃᓱᒪᒋᔪᓐᓁᕐᕕᒋᓯᓐᖓ ᑕᒪᕐᓂᓐᓂᒃ!

14ᑕᕝᕙ ᐱᖓᔪᐊᓐᓂᒃ ᐃᓕᑦᓯᓐᓄᑦ ᑎᑭᑐᐃᓐᓇᕆᐊᖃᓕᕐᐳᖓ. ᐃᓕᑦᓯᓐᓂᓪᓗ ᓱᓇᒥᒃ ᐱᔪᒪᔭᖃᕐᓂᐊᓐᖏᓚᖓ, ᐃᓕᑦᓯᓐᓂᒃ ᑭᓯᐊᓂ ᐱᔪᒪᕗᖓ ᑮᓇᐅᔭᑦᓯᓐᓂᐅᖏᑦᑐᖅ; ᓱᕈᓰᑦ ᐊᖓᔪᖅᑳᒥᖕᓂᒃ ᐱᒃᓴᖃᕐᑎᑦᓯᔭᕆᐊᖃᖏᒻᒪᑕ, ᐊᖓᔪᖅᑳᖑᔪᓪᓕ ᐱᒃᓴᖃᕐᑎᑦᓯᔪᒃᓴᐅᕗᑦ ᕿᑐᕐᖓᒥᖕᓂᒃ. 15ᖁᕕᐊᓱᒃᑲᔭᕐᐳᖓ ᓇᖕᒥᓂᖅ ᑐᓂᑦᔪᑎᒋᒍᒪ ᓱᓇᓕᒫᓐᓂᒡᓗ ᑕᕐᓂᓯ ᐱᑦᔪᑎᒋᓗᒋᑦ. ᓇᒡᓕᒋᖏᓐᓂᕐᓴᕆᒐᔭᕐᐱᓯᓐᖔ? ᓇᒡᓕᒋᓂᕐᓴᕆᒍᑦᓯ.

16ᐊᖏᖃᑎᒌᒃᑲᓗᐊᕐᐳᒍᑦ ᐅᖁᒤᓗᐊᕐᑐᒥᒃ ᐱᐅᓯᖃᕐᑎᑦᓯᓚᐅᖏᓐᓂᓐᓂᒃ ᐃᓕᑦᓯᓐᓄᑦ, ᑭᓯᐊᓂᓕ ᐃᓚᓯ ᐅᖃᕐᐳᑦ, ᓯᓔᕐᕆᒃᓯᓚᐅᕐᓂᕋᕐᓗᖓ ᐃᓕᑦᓯᓐᓂᒃ ᓴᒡᓗᓂᒃᑯᒡᒎᖅ ᐱᓚᐅᕐᓂᕋᑕᐅᓪᓗᖓ. 17ᐱᕕᒃᓴᖃᕐᓂᓐᓂ ᐃᓕᑦᓯᓐᓄᑦ ᓯᓔᕐᕆᒃᓯᕋᓱᒋᕕᓯᓐᖔ? ᐃᓄᐃᑦ ᑎᓕᓚᐅᕐᑕᒃᑲ ᐊᖅᑯᑎᒋᓪᓗᒋᑦ? 18ᑍᑑᓯ ᑎᓕᓚᐅᕐᐸᕋ ᐃᓕᑦᓯᓅᖁᓪᓗᒍ, ᐅᒃᐱᕐᑑᖃᑎᕗᓪᓗᑦᑕᐅᖅ ᐃᓚᐅᖁᓚᐅᕐᐸᕋ ᑖᑦᓱᒧᖓ. ᑕᕝᕙ ᑍᑑᓯ ᐃᓕᑦᓯᓐᓂᒃ ᓯᓔᕐᕆᒃᓯᓚᐅᕐᐹ? ᑍᑑᓯᓗ ᐊᑦᔨᒌᒥᒃ ᐊᓂᕐᓂᒃᑯᑦ ᐱᓇᓱᐊᕐᓂᖃᓚᐅᓐᖏᓚᒎᒃ? ᐊᑦᔨᒌᒥᒡᓗ ᐱᕙᓪᓕᐊᓂᖃᓚᐅᓐᖏᓚᒎᒃ?

19ᐃᓱᒪᖃᕐᐱᓰ ᑍᒪᓐᖓᑦ ᐅᕙᑦᑎᓐᓂᒃ ᐸᓯᔭᒃᓴᐅᔪᓐᓃᕐᑎᓐᓇᓱᐊᕐᑐᑐᑦ ᐱᓇᓱᒋᓪᓗᑕ ᐃᓕᑦᓯᓐᓄᑦ? ᓇᒡᓕᒋᔭᒃᑳ, ᐅᖃᓪᓚᓚᐅᕐᐳᒍᓪᓕ ᒎᑎᐅᑉ ᓵᖓᓂ ᙭ᔅᑑᓯᒥ, ᖃᓄᐃᓕᐅᕐᓂᕗᓪᓗ ᑕᒪᕐᒥᒃ ᐱᓇᓱᐊᕐᐸᕗᑦ ᐱᕙᓪᓕᐊᑎᑕᐅᖁᓪᓗᓯ. 20ᓯᕘᕋᒐᒪ ᐃᓱᒪᒋᔭᑦᑐᑦ ᑕᑯᓂᐊᕋᓱᒋᖏᓪᓗᓯ, ᐃᓱᒪᒋᔭᑦᓯᑐᓪᓗ ᑕᑯᔭᐅᓂᐊᕋᓱᒋᓇᖓ ᐃᓕᑦᓯᓐᓄ; ᓯᕘᕋᕗᖓ ᐂᕙᓂᖃᕐᓂᐊᕋᓱᒋᓪᓗᒍ ᐱᓂᕐᓴᐅᔪᒪᔪᖃᕐᓂᐊᕋᓱᒋᓪᓗᒍᓗ, ᓂᓐᖓᐅᒪᓂᕐᑕᖃᕐᓂᐊᕋᓱᒋᕙᕋ, ᓇᖕᒥᓂᕐᓯᐅᕐᓂᕐᑕᖃᕐᓂᐊᕋᓱᒋᓪᓗᒍ, ᐅᖃᕐᓂᕐᓘᑎᓂᖃᕐᓂᐊᕋᓱᒋᕙᕋ ᑎᕐᓕᐊᖃᑦᑕᐅᑎᓂᕐᑕᖃᕐᓂᐊᕋᓱᒋᓪᓗᒍᓗ,#12:20 ᒪᖓᑦᓯᓂᕐᑕᖃᓂᐊᕐᑐᕆᔭᕋ ᐃᒻᒥᓂᒃ ᓂᕐᑑᑎᓂᕐᑕᖃᕐᓂᐊᕋᓱᒋᕙᕋ, ᐋᖅᑭᒃᓯᒪᑦᓯᐊᖏᓐᓂᕐᑕᖃᕐᓂᐊᕋᓱᒋᓪᓗᒍᓗ. 21ᓯᕘᕋᕗᖓ ᐃᓕᑦᓯᓐᓄᑦ ᑎᑭᒍᒪ ᒎᑎᒧᑦ ᒥᑭᒡᓕᑎᕐᑕᐅᓂᐊᕋᓱᒋᓪᓗᖓ ᐃᓕᑦᓯ ᓵᖓᓐᓂ, ᕿᒃᓵᒍᑎᖃᕐᓂᐊᕋᓱᒋᓪᓗᖓᓗ ᐅᓄᕐᑐᓄᑦ ᐊᔪᕐᑐᓕᓚᐅᕐᑐᓄᑦ ᖃᕿᐊᓕᓚᐅᖏᑦᑐᓄᑦ ᐱᐅᖏᑦᑐᓕᐊᕆᓚᐅᕐᑕᒥᖕᓂᑦ, ᓄᓕᐊᕐᓂᒃᑯᑦ, ᐱᔪᒪᓂᕐᔪᐊᒃᑯᓪᓗ ᐱᓕᕆᓂᕆᓚᐅᕐᑕᒥᖕᓄᑦ.

Currently Selected:

ᑯᕆᓐᑎᐊᒥᐅᓄᑦ ᐂᑉᐸᖏᑦ 12: EAIB

Highlight

Compare

Copy