ᑯᕆᓐᑎᐊᒥᐅᓄᑦ ᐂᑉᐸᖏᑦ 10
10
ᐸᐅᓗᓯᐅᑉ ᐱᓇᓱᐊᕐᓂᕐᒥᓂᒃ ᓴᐳᑦᔨᓇᓱᐊᕐᓂᖓ
1ᐅᕙᖓ ᐸᐅᓗᓯ, ᐃᓇᑉᐸᑦᓯ ᙭ᔅᑑᓯᐅᑉ ᐱᐅᔪᕆᖏᓐᓂᖓᒍᑦ ᐱᖃᓐᓂᕐᓂᖓᓄᓪᓗ ᑕᐅᑦᑐᑦᓯᓐᓂ ᓂᑲᓇᕐᑑᒐᓗᐊᕐᑐᖓ, ᓯᕘᕋᔪᐃᑦᑑᕗᖓᓕ ᑲᑎᒪᒃᓯᓇᖓ ᐃᓕᑦᓯᓐᓂᒃ! 2ᐃᓇᑉᐸᑦᓯ ᑎᑭᒃᑯᒪ ᐃᓕᕋᓇᕋᓱᐊᕐᓗᖓ ᐱᓇᓱᐊᕈᒪᓇᖓ ᐃᓚᑦᓯᓐᓄᑦ ᖁᓚᖏᓐᓇᒪ ᓯᕘᕋᖏᓪᓗᖓ ᓵᓐᖓᓯᔪᓐᓇᕋᒪ ᐅᕙᑦᑎᓐᓂᒃ ᓯᓚᕐᔪᐊᕐᒥᐅᑦ ᐃᓕᖅᑯᓯᖏᑎᑐᑦ ᐱᓇᓱᐊᕋᓱᒋᒃᓯᕐᑐᓄᑦ. 3ᓯᓚᕐᔪᐊᕐᒦᒃᑲᓗᐊᕐᓗᑕ, ᓯᓚᕐᔪᐊᕐᒥᐅᑦ ᐃᓕᖅᑯᓯᖏᑎᑐᑦ ᐅᓇᑕᖏᓐᓇᑦᑕ. 4ᐅᓇᑕᐅᑎᕗᑦ ᓯᓚᕐᔪᐊᕐᒥᐅᑦ ᐅᓇᑕᐅᑎᖏᑎᑐᑦ ᑍᒤᑦᑑᖏᒻᒪᑕ. ᐅᓇᑕᐅᑎᕗᓪᓕ ᒎᑎᒥᑦ ᐱᔪᓐᓇᕐᓂᖃᕐᑎᑕᐅᕗᑦ ᐊᔪᓕᕐᕕᐅᕙᒃᑐᑦ ᐊᓯᕈᕈᓐᓇᕐᓗᒋᑦ. 5ᐂᕙᑦᔪᑕᐅᔪᑦ ᓄᖅᑲᕐᑎᑉᐸᕗᑦ ᒎᑎᒥᒡᓗ ᖃᐅᔨᓂᐅᒐᔭᕐᑐᒧᑦ ᐊᖏᓂᕐᓴᐅᑎᑦᓯᔪᑦ ᐱᐅᔪᕆᓃᑦ ᐊᓯᕈᕐᐸᕗᑦ, ᐃᓱᒪᓕᐅᕈᑕᐅᔪᓪᓗ ᓵᓚᒋᓪᓗᒋᑦ ᙭ᔅᑑᓯᒥᒃ ᓈᓚᓕᕐᑎᑉᐸᕗᑦ. 6ᓈᓚᖏᑦᑐᓕᒫᑦ ᓱᒋᐊᕐᓂᐊᕐᓗᒋᑦ ᐅᐸᓗᖕᒊᕐᓯᒪᕗᒍᑦ, ᐅᕙᑦᑎᓐᓂᒃ ᓈᓚᒍᓐᓇᕐᓯᓂᓯ ᐱᔭᕇᓚᐅᖏᓐᓂᖓᓂ.
7ᑕᑯᒃᓴᐅᔪᑐᐃᓐᓇᕐᒥᒃ ᑕᐅᑐᒃᑲᑦᓯ. ᓇᓪᓕᐊᑦ ᖁᓚᖏᒃᑯᓂ ᙭ᔅᑑᓯᒧᑦ ᐱᒋᔭᐅᓂᕐᒥᓂᒃ, ᑖᓐᓇ ᐃᒻᒥᓂᒃ ᐃᖅᑬᑎᓕᕐᓕ ᙭ᔅᑑᓯᒧᑦ ᐱᒋᔭᐅᖕᒥᒐᑦᑕᑦᑕᐅᖅ ᑖᒃᑯᑎᑐᓇᖅ. 8ᑲᓐᖑᓱᓐᖏᓚᖓᓘᓐᓃᑦ ᐊᑕᓂᕐᒧᑦ ᐱᔪᓐᓇᕐᑎᑕᐅᓂᑦᑎᓐᓂᒃ ᓂᕐᑑᑎᑬᓐᓇᕋᓗᐊᕈᒪ, ᐊᑕᓂᐅᑉ ᐱᕈᕐᐸᓪᓕᐊᑎᒻᒪᓯ ᐊᓯᕈᕋᓱᐊᖏᒻᒪᓯ. 9ᐱᓂᐊᕐᓂᖃᕈᒪᖏᓐᓇᒪ ᐃᓕᑦᓯᓐᓂᒃ ᑲᑉᐱᐊᓱᒃᑎᑦᓯᓇᓱᐊᕐᑑᔮᕐᓗᖓ ᑎᑎᖅᑲᑎᒍᑦ. 10ᐃᓚᖏᑦ ᐅᖃᕐᐸᖕᒪᑕ, “ᐸᐅᓗᓯ ᑎᑎᕋᖃᑦᑕᕐᒪᑦ ᐊᑦᑕᕈᓱᓐᖏᓗᐊᕐᓗᓂ ᓲᖑᓗᐊᕐᓗᓂᓗ, ᑎᒥᒥᒍᓪᓕ ᓇᔫᑎᓕᕌᖓᒥ ᓴᓐᖐᑦᑑᕗᖅ, ᐅᖃᐅᓯᖏᓪᓗ ᓱᓇᐅᓇᑎᒃ.” 11ᐃᓄᒃ ᑍᒤᓕᐅᕐᑐᖅ ᖃᐅᔨᒪᓚᐅᕐᓕ, ᑎᑎᖅᑲᑎᒍᑦ ᐅᖃᐅᓯᕆᔭᕗᑦ ᐊᑦᓯᒪᓪᓗᑕ, ᓇᔫᑎᓗᑕ ᐊᑐᕈᓐᓇᕐᒥᒐᑦᑎᒍ.
12ᐅᕙᑦᑎᓐᓂᒃ ᐱᐅᔪᕆᓐᖏᓐᓇᑦᑕ ᐊᑦᔨᐅᑎᑦᑐᒪᓐᖏᓚᒍᓪᓘᓐᓃᑦ ᐃᒻᒥᖕᓂᒃ ᐱᐅᔪᕆᔪᓄᑦ. ᑍᒃᑯᐊ ᐆᒃᑑᑎᒋᖃᑦᑕᐅᑎᕙᖕᒪᑕ ᐃᒻᒥᖕᓄᑦ, ᐊᑦᔨᐅᑎᖃᑦᑕᐅᑎᕙᒃᓗᑎᒡᓗ ᐃᒻᒥᖕᓄᑦ, ᑍᒤᓕᐅᕐᓗᑎᒃ ᑖᒃᑯᐊ ᓯᓔᑦᑑᕗᑦ. 13ᐅᕙᑦᑎᓐᓂᒡᓕ ᐱᓗᐊᕐᑎᓪᓗᑕ ᓂᕐᑑᑎᔪᒪᓐᖏᓚᒍᑦ, ᓂᕐᑑᑎᓂᕗᓪᓕ ᒎᑎᐅᑉ ᑭᒡᓕᒋᔭᐅᖁᔭᖓᓄᑦ ᑭᓯᐊᓂ ᑎᑭᐅᑎᓯᒪᑎᓐᓂᐊᕐᐸᕗᑦ, ᐃᓕᑦᓯᓐᓄᑦ ᐊᒡᓛᑦ ᑍᒤᓕᐅᕐᓂᐊᕐᐳᒍᑦ. 14ᐊᕗᖓᓗᐊᖅ ᐅᕙᑦᑎᓐᓂᒃ ᓂᕐᑑᑎᓐᖏᓚᒍᑦ, ᓈᒻᒪᓈᕐᓗᑕ ᐃᓕᑦᓯᓐᓄᑦ ᑎᑭᐅᑦᔨᓚᐅᕋᑦᑕ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᙭ᔅᑑᓯᒥᒃ ᐅᖃᐅᓯᖃᕐᓗᑕ. 15ᐅᕙᑦᑎᓐᓂᒡᓗ ᓂᕐᑑᑎᓐᖏᓚᒍ ᐱᓗᐊᕐᑎᓪᓗᑕ, ᐊᓯᑦᑕ ᐱᓇᓱᐊᕐᕕᒋᓯᒪᔭᖏᑦ ᑎᑭᓪᓗᒋᑦ; ᐃᒫᒡᓕ ᓂᕆᐅᒋᔭᖃᕐᐳᒍᑦ ᐅᒃᐱᕐᓂᓯ ᐱᕈᕐᐸᓪᓕᐊᓂᖓᓄᑦ, ᐱᓇᓱᐊᕐᓂᕐᓴᐅᔪᓐᓇᖁᓪᓗᑕ ᐃᓕᑦᓯᓐᓂ. 16ᐊᔪᕆᕐᑐᐃᔪᓐᓇᖁᓪᓗᑕ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᓄᓇᑦᓯ ᐅᖓᑖᓃᑦᑐᓄᑦ, ᓂᕐᑑᑎᑦᔪᑎᖃᕈᒪᖏᓐᓇᑦᑕ ᐊᓯᑦᑕ ᐱᓇᓱᐊᕐᕕᒋᔭᕇᕐᓯᒪᔭᖓᓂᒃ.
17 #
ᔨᕆᒤᐊ 9:24. “ᐃᒻᒥᓂᒃ ᓂᕐᑑᑎᔪᒪᔪᖅ, ᐊᑕᓂᕐᒥᒃ ᓂᕐᑑᑎᑦᔪᑎᖃᓕᕐᓕ.” 18ᐃᒻᒥᓂᒃ ᓈᒻᒪᒐᓱᒋᔪᖅ ᓈᒻᒪᒋᔭᐅᓕᕈᑎᒋᓗᓂᐅᒃ ᐱᖏᒻᒪᑦ, ᐊᑕᓂᐅᓪᓕ ᓈᒻᒪᖕᓂᕋᕐᑕᖓ ᑖᓐᓇ ᓈᒻᒪᒃᑐᑑᕗᖅ.
Currently Selected:
ᑯᕆᓐᑎᐊᒥᐅᓄᑦ ᐂᑉᐸᖏᑦ 10: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
