ᐊᑕᓃᑦ ᓯᕗᓪᓖᑦ 1
1
ᐊᖓᔪᖅᑳᕐᔪᐊᑉ ᑍᕕᑎᐅᑉ ᐃᑐᐊᓘᓕᕐᖕᓂᖓ
1ᐊᖓᔪᖅᑳᕐᔪᐊᖅ ᑍᕕᑎ ᐃᑦᑐᒻᒪᕆᐅᓕᖅᑎᓪᓗᒍ ᐅᓄᖅᑐᓂᒃ ᐊᕐᕌᒍᖃᓕᖅᓱᓂ, ᐱᔨᖏᑕ ᕿᐲᖕᓄᑦ ᐅᖅᑰᓯᑎᓐᓇᓱᖃᑦᑕᕋᓗᕐᖕᐊᒪᑦᔪᑦ, ᐅᖅᑰᓯᔪᓐᓁᓪᓕᓚᐅᖅᐳᖅ. 2ᑍᒤᒻᒪᑦ ᐱᔨᖏᑦ ᑖᑦᓱᒧᖓ ᐅᖃᓕᖅᐳᑦ, “ᐊᖓᔪᖅᑳᕐᔪᐊᖅ ᐃᓅᓱᒃᑐᒥᒃ ᐊᕐᖕᓇᒥᒃ ᓇᓂᓯᑦᔪᑎᔪᒪᓕᕋᑦᑎᒋᑦ ᐱᔨᑦᓯᕋᖅᑎᒋᓂᐊᖅᑕᕐᖕᓂᒃ. ᐃᕝᕕᑦ ᓴᓂᐊᓂ ᓇᓚᓗᓂ ᑖᑦᓱᒧᖓ ᐅᖅᑰᑎᑕᐅᓂᐊᕋᕕᑦ.” 3ᑕᕝᕙ ᕿᓂᓕᓚᐅᖅᐳᑦ ᐃᓴᕆᐊᓕᒥᐅᓂ ᐃᓅᓱᒃᑐᒥᒃ ᐊᕐᖕᓇᒥᒃ ᐃᓂᖁᓇᖅᑐᒥᒃ, ᑕᕝᕙ ᓄᓇᒥᑦ ᓲᓇᒥᑦ ᓇᓂᓯᕗᑦ ᐃᓅᓱᒃᑐᒥᒃ ᐊᕐᖕᓇᒥᒃ ᐊᑎᖃᖅᑐᒥᒃ ᐊᐱᓵᒡᒥᒃ, ᐊᖓᔪᖅᑳᕐᔪᐊᒧᓪᓗ ᐋᑕᐅᕗᖅ. 4ᑖᓐᓇ ᐃᓂᖁᓇᓪᓚᕆᓚᐅᖅᐳᖅ; ᐊᖓᔪᖅᑳᕐᔪᐊᓪᓗ ᑲᒪᔨᒋᓕᖅᐹ ᐱᔨᑦᓯᕋᖅᑎᒋᓪᓗᒍ; ᐊᖓᔪᖅᑳᕐᔪᐊᓪᓕ ᐃᓐᓇᖓᖃᑎᒋᓚᐅᓐᖏᓛ.
ᐊᑐᓁᐊᐅᑉ ᐃᒃᓯᕙᐅᑕᕐᔪᐊᒧᐊᕈᒪᓂᖓ
5 #
ᓴᒧᐃᓕ ᐂᑉᐸᖏᑦ 3:4. ᑕᕝᕙ ᐊᑐᓁᔭ ᕼᐊᒋᑎᐅᑉ ᐃᕐᖕᓂᖓ ᐃᒻᒥᓂᒃ ᐊᖏᔪᕈᖅᑎᓐᓇᓱᐊᓚᐅᖅᐳᖅ, ᐅᖃᖅᓗᓂ, “ᐊᖓᔪᖅᑳᕐᔪᐊᓐᖑᕐᖕᓂᐊᖅᐳᖓ”; ᓇᖕᒥᓂᕐᓗ ᕿᒧᒃᓯᐅᑎᑖᓚᐅᖅᐳᖅ ᐊᒃᓴᓗᐊᓕᖕᒥᒃ ᕿᒻᒥᔪᐊᓂᓗ ᐃᑭᒪᔪᒃᓴᓂᒃ, 50ᓂᒡᓗ ᐊᖑᑎᓂᒃ ᓯᕗᓂᕐᖕᒥᓂ ᐅᓪᓚᒃᑐᒃᓴᓂᒃ ᐋᖅᑮᓚᐅᖅᐳᖅ. 6ᐊᑖᑕᖓᑕᓗ ᐃᓂᖅᑎᓚᐅᓐᖏᓛ ᐅᖃᐅᑎᓚᐅᕋᓂᐅᒡᓗ, “ᓱᖕᒪᑦ ᑍᒤᓕᐅᖅᐱᑦ?” ᑖᓐᓇᓗ ᐊᖑᑎᑦᓯᐊᕙᐅᓚᐅᖅᐳᖅ; ᐋᑉᓴᓚᐅᑉ ᓄᑲᖓ ᑐᖓᓕᕆᓪᓗᓂᐅᒃ. 7ᑕᕝᕙ ᐅᖃᖃᑎᖃᓕᖅᐳᖅ ᔪᐊᐱᒥᒃ ᔨᕈᐃᐊᐅᑉ ᐃᕐᖕᓂᖓᓂᒃ ᐊᐰᐊᑕᒥᒡᓗ ᑐᓂᕐᕈᓯᖅᑎᑦᓯᔨᒥᒃ; ᑖᒃᑯᐊᒃ ᒪᓕᓕᖅᐳᒃ ᐊᑐᓁᔭᒥᒃ ᐃᑲᔪᖅᓗᒍᓗ. 8ᔭᑑᒃᓕ ᑐᓂᕐᕈᓯᖅᑎᑦᓯᔨ, ᐱᓁᐊᓗ ᔨᕼᐅᐃᐊᑕᐅᑉ ᐃᕐᖕᓂᖓ, ᓁᑕᓂᓗ ᒎᑎᐅᑉ ᐱᔪᖃᓛᖅᑐᒥᒃ ᐅᖃᖅᑎᖓ, ᓯᒥᐂᓗ, ᕆᐂᓗ, ᑍᕕᑎᐅᓪᓗ ᓴᐳᓐᓂᐊᖅᑎᖏᑦ ᐊᔪᖏᑦᑐᕐᔪᐊᑦ ᐊᑐᓁᔭᒥᒃ ᐃᑲᔪᖅᑐᓚᐅᓐᖏᓚᑦ.
9ᐊᑐᓁᔭ ᑐᓂᕐᕈᓯᖅᐳᖅ ᓰᐱᓂᒃ, ᐃᒻᒧᒃᓯᐅᒐᕐᖕᓂᒡᓗ, ᓄᕐᕋᕐᖕᓂᒡᓗ ᖁᐃᒃᑎᑦᓯᐊᕆᓯᒪᔪᓂᒃ, ᓄᓇᒥ ᖁᒡᓗᒋᐊᕐᔪᐊᑉ ᐅᔭᕋᖓᓂ ᐊᑎᓕᖕᒥ, ᐃᓐ-ᕈᒋᐅᑉ ᖃᓂᒋᔭᖓᓂ. ᕾᖁᔨᓪᓗᓂ ᖃᑕᓐᖑᑎᓕᒫᒥᓂᒃ ᐊᖓᔪᖅᑳᕐᔪᐊᑉ ᐃᕐᖕᓂᖏᓐᓂᒃ ᐊᖓᔪᖅᑳᕐᔪᐊᓪᓗ ᐊᖓᔪᖅᑳᖁᑎᖏᓐᓂᒃ ᔫᑕᒥᐅᑕᓂᒃ, 10ᕾᖁᔨᓚᐅᓐᖏᓚᕐᓕ ᓁᑕᓂᒥᒃ ᒎᑎᐅᑉ ᐱᔪᖃᓛᖅᑐᒥᒃ ᐅᖃᖅᑎᖓᓂᒃ ᐱᓁᐊᒥᒡᓘᓐᓃᑦ ᐊᔪᖏᑦᑐᕐᔪᐊᓂᒡᓘᓐᓃᑦ ᐅᓇᑕᖅᑐᒃᓴᓂᒃ ᓲᓗᒨᓂᒥᒡᓘᓐᓃᑦ ᖃᑕᓐᖑᑎᒥᓂᒃ.
ᓲᓗᒨᓂᐅᑉ ᐊᖓᔪᖅᑳᕐᔪᐊᓐᖑᖅᑎᑕᐅᓂᖓ
11 #
ᓴᒧᐃᓕ ᐂᑉᐸᖏᑦ 12:24. ᓁᑕᓂ ᐹᓯᐸᒧᑦ ᐅᖃᖅᐳᖅ ᓲᓗᒨᓂᐅᑉ ᐊᓈᓇᖓᓄᑦ, “ᑐᓴᓚᐅᓐᖏᓚᑏᑦ ᐊᑐᓁᔭᒥᒃ ᕼᐊᒋᑎᐅᑉ ᐃᕐᖕᓂᖓᓂᒃ ᑖᓐᓇ ᐊᖓᔪᖅᑳᕐᔪᐊᓐᖑᕐᖕᒪᑦ? ᐊᖓᔪᖅᑳᕐᔪᐊᕗᓪᓗ ᑍᕕᑎ ᑕᒪᑐᒥᖓ ᖃᐅᔨᒪᓐᖏᓛᖅ? 12ᑍᒤᒻᒪᓪᓕ ᒫᓐᓇ ᕾᒋᑦ ᐅᖃᐅᑎᓚᐅᖅᓚᒋᑦ, ᐃᓄᓰᑦ ᓇᖕᒥᓂᖅ ᓴᐳᑎᓂᐊᕋᕕᐅᒃ ᐃᕐᖕᓂᖅᐱᓪᓗ ᓲᓗᒨᓂᐅᑉ ᐃᓅᓯᖓ. 13ᒫᓐᓇᑲᐅᑎᒋ ᐂᓕᕆᑦ ᐊᖓᔪᖅᑳᕐᔪᐊᕐᖕᒧᑦ ᑍᕕᑎᒧᑦ, ᐅᖃᐅᑎᓗᒍ, ‘ᐅᖃᓚᐅᖅᓯᒪᓐᖏᓚᑏᑦ, ᐊᖓᔪᖅᑳᕐᔪᐊᕋ, ᐅᕙᓐᓄᑦ ᐅᖃᕕᒡᓗᑎᑦ ᐊᖏᓚᐅᖅᓯᒪᖓᕕᑦ ᐱᔨᖕᓄᑦ, ᐅᖃᖅᓗᑎᑦ “ᐃᕐᖕᓃᑦ ᓲᓗᒨᓂ ᐅᕙᓐᓂᒃ ᑭᖑᕝᕕᐅᑎᓛᖅᑐᖅ ᐃᓇᖐᖅᓗᖓ? ᐃᒃᓯᕙᐅᑕᕐᔪᐊᓐᓂᓗ ᐃᒃᓯᕙᓕᖅᓗᓂ”? ᓱᖕᒪᓪᓕ ᐊᑐᓁᔭ ᐊᖓᔪᖅᑳᕐᔪᐊᓐᖑᓕᖅᐸ?’ 14ᑕᕝᕙ ᐅᖃᓪᓚᒃᑎᓪᓗᑎᑦ ᓱᓕ ᐊᖓᔪᖅᑳᕐᔪᐊᕐᖕᒧᑦ, ᑕᕝᕗᖓ ᐃᑎᕐᖕᓂᐊᖅᐳᖓ ᐅᓂᒃᑲᐅᓯᕆᔭᑎᑦ ᓇᓗᓁᒃᑲᓐᓂᖅᓗᒋᑦ.”
15ᑍᒤᒻᒪᑦ ᐹᓯᐸ ᐊᖓᔪᖅᑳᕐᔪᐊᑉ ᐃᒡᓗᕈᓯᖓᓄᑦ ᐃᑎᖅᐳᖅ ᐊᖓᔪᖅᑳᕐᔪᐊᖅ ᐃᑐᐊᓘᓕᓚᐅᖅᐳᖅ, ᐊᕐᖕᓇᖅ ᐊᐱᓵᒡ ᓲᓇᒤᑎᒥᐅᑕᖅ ᐊᖓᔪᖅᑳᕐᔪᐊᕐᖕᒥᒃ ᐱᔨᑦᓯᖅᑎᓪᓗᒍ. 16ᐹᓯᐸ ᐅᑯᕗᖅ ᐊᖓᔪᖅᑳᕐᔪᐊᑉ ᓵᖓᓄᑦ, ᐊᖓᔪᖅᑳᕐᔪᐊᓪᓗ ᐊᐱᕆᕚ, “ᓱᓇᒥᒃ ᐱᔪᒪᕖᑦ?”
17ᑖᓐᓇ ᑭᐅᕗᖅ, “ᐊᖓᔪᖅᑳᕐᔪᐊᖅ ᐅᖃᕕᒃᑎᓚᐅᖅᓯᒪᒐᕕᓐᖓ ᐊᖏᒻᒪᕆᒃᓗᖓ ᐊᑕᓂᐅᑉ ᒎᑎᕕᑦ ᐊᑎᖓ ᑍᓪᓗᒍ, ‘ᐃᕐᖕᓃᑦ ᓲᓗᒨᓂ ᐊᖓᔪᖅᑳᕐᔪᐊᓐᖑᓛᖅᐳᖅ ᑭᖑᕝᕕᖅᓗᖓ, ᐃᒃᓯᕙᓕᖅᓗᓂᓗ ᐃᒃᓯᕙᐊᑕᕐᔪᐊᓐᓂ.’ 18ᒫᓐᓇᓕ ᑕᑯᒋᑦ, ᐊᑐᓁᔭ ᐊᖓᔪᖅᑳᕐᔪᐊᖑᓕᖅᐳᖅ, ᐊᒡᓛᑦ ᐊᑕᓂᕋ ᐊᖓᔪᖅᑳᕐᔪᐊᖅ ᖃᐅᔨᓚᐅᓐᖏᑎᓪᓗᑎᑦ. 19ᑐᓂᕐᕈᓯᖅᓯᒪᓕᕇᖅᐳᖅ ᐅᓄᖅᑐᓂᒃ ᐊᖑᓴᓪᓗᓂᒃ ᓰᐱᓂᒡᓗ ᓄᕐᕋᕐᖕᓂᒡᓗ ᖁᐃᒃᓯᑦᑎᐊᕆᔭᐅᓯᒪᔪᓂᒃ ᕾᖁᔨᓪᓗᓂᓗ ᐊᖓᔪᖅᑳᕐᔪᐊᑉ ᐃᕐᖕᓂᖏᓐᓂᒃ, ᐊᐰᐊᑕᓗ ᑐᓂᕐᕈᓯᖅᑎᑦᓯᔨ ᕾᖁᓪᓗᓂᐅᒃ, ᔪᐊᐱᓗ ᐅᓇᑕᖅᑐᒃᓴᖁᑎᕕᑦ ᐊᖓᔪᖅᑳᖓ; ᐃᕐᖕᓂᕐᖕᓂᒡᓕ ᓲᓗᒨᓂᒥᒃ ᕾᖁᔨᓯᒪᓐᖏᓚᖅ. 20ᒫᓐᓇᓕ, ᐊᑕᓂᕋ ᐊᖓᔪᖅᑳᕐᔪᐊᖅ, ᐃᓴᕆᐊᓕᒥᐅᑦ ᐃᓄᓕᒫᖏᑦ ᐅᑕᖅᑭᕗᑦ ᐃᓕᖕᓂᑦ, ᐅᖃᐅᑎᔭᐅᔪᒪᓪᓗᑎᑦ ᑭᓇ ᐃᒃᓯᕚᕐᖕᓂᐊᓕᕐᖕᒪᖔᑦ ᐊᖓᔪᖅᑳᕐᔪᐊᒪ ᐃᒃᓯᕙᐅᑕᕐᔪᐊᖓᓂ ᑭᖑᕝᕕᖅᑕᐅᓗᓂ. 21ᑍᒤᓐᓂᐊᖏᑉᐸᑦ ᐃᒤᑦᓱᒫᕐᖕᒪᑦ, ᐊᑕᓂᕋ ᐊᖓᔪᖅᑲᕐᔪᐊᕋ ᐃᓅᔪᓐᓃᖅᐸᑦ ᓯᕗᓕᕕᓂᓂ ᐃᓚᒋᓕᖅᓗᒋᑦ, ᐅᕙᖓ ᐃᕐᖕᓂᕋᓗ ᓲᓗᒨᓂ ᐱᐅᓯᖃᕐᕕᐅᓂᐊᖅᐳᒍᒃ ᐊᑭᕋᖅᑐᖅᑐᑎᑐᑦ.”
22ᓱᓕ ᐅᖃᓪᓚᒃᑎᓪᓗᒍ ᐊᖓᔪᖅᑳᕐᔪᐊᕐᖕᒧᑦ, ᓁᑕᓂ ᒎᑎᐅᑉ ᐱᔪᖃᓛᖅᑐᒥᒃ ᐅᖃᖅᑎᖓ ᐃᑎᖅᐳᖅ. 23ᑖᒃᑯᐊ ᐊᖓᔪᖅᑳᕐᔪᐊᖅ ᐅᖃᕐᕕᒋᕚᑦ, “ᑕᕝᕙ ᓁᑕᓂ ᒎᑎᐅᑉ ᐱᔪᖃᓛᖅᑐᒥᒃ ᐅᖃᖅᑎᖓ.” ᐊᖓᔪᖅᑳᕐᔪᐊᑉ ᓵᖓᓄᑦ ᐅᑯᕗᖅ ᑮᓇᓂ ᒪᓂᖅᑲᒧᑦ ᐊᒃᑐᖅᓱᒍ. 24ᐅᖃᖅᓗᓂᓗ, “ᐊᑕᓂᕋ ᐊᖓᔪᖅᑳᕐᔪᐊᕋ, ᐅᖃᖅᓯᒪᓕᖅᐲᑦ, ‘ᐊᑐᓁᔭ ᐅᕙᓐᓂᒃ ᐃᓇᖏᖅᓯᔪᒫᖅᐳᖅ, ᐃᒃᓯᕙᐅᑕᕐᔪᐊᓐᓂᓗ ᐃᒃᓯᕙᓕᖅᓗᓂ’? 25ᐅᓪᓗᒥ ᐊᐅᓪᓚᖅᐳᖅ, ᑐᓂᕐᕈᓯᕆᐊᖅᑐᖅᓗᓂ ᐅᓄᖅᑐᓂᒃ ᐊᖑᓴᓪᓗᕐᖕᓂᒃ ᓰᐱᓂᒡᓗ ᓄᕐᕋᓂᒡᓗ ᖁᐃᒃᑎᑦᓯᐊᖑᓯᒪᔪᓂᒃ, ᕾᖁᔨᓪᓗᓂ ᐊᖓᔪᖅᑳᕐᔪᐊᑉ ᐃᕐᖕᓂᓕᒫᖏᓐᓂᒃ, ᔪᐊᐱᒥᒡᓗ ᐅᓇᑕᖅᑐᒃᓮᑦ ᐊᖓᔪᖅᑳᖓᓐᓂᒃ, ᐊᐰᐊᑕᒥᒡᓗ ᑐᓂᕐᕈᓯᖅᑎᑦᓯᔨᒥᒃ, ᑕᑯᒋᓪᓗ, ᒫᓐᓇ ᓂᕆᕕᒡᔪᐊᖅᐳᑦ ᐃᒥᖅᓗᑎᒡᓗ ᑖᑦᓱᒪ ᓵᖓᓂ ᕾᒐᓛᖅᓗᑎᒃ ‘ᐊᑯᓂ ᐃᓅᓕ ᐊᖓᔪᖅᑳᕐᔪᐊᖅ ᐊᑐᓁᔭ!’ 26ᐅᕙᖓᓕ ᐱᔩᑦ, ᔭᑑᒃᓗ ᑐᓂᕐᕈᓯᖅᑎᑦᓯᔨ, ᐱᓁᐊᓘᓐᓃᑦ ᔨᕼᐅᐃᐊᑕᐅᑉ ᐃᕐᖕᓂᖓ, ᐱᔩᓪᓘᓐᓃᑦ ᓲᓗᒨᓂ ᕾᖁᔭᐅᓚᐅᓐᖏᓚᒍᑦ. 27ᑕᒪᓐᓇ ᐱᓂᐊᕐᖕᓂᐅᑎᑕᐅᕚ ᐊᑕᓂᓐᓄᑦ ᐊᖓᔪᖅᑳᕐᔪᐊᓐᓄᑦ, ᐱᔨᑎᓪᓗ ᐅᖃᐅᑎᓚᐅᕐᖕᓇᒋᑦ ᑭᓇ ᐊᖓᔪᖅᑳᕐᔪᐊᕐᖕᒪ ᐃᒃᓯᕙᐅᑕᕐᔪᐊᖓᓂ ᐃᒃᓯᕙᔪᒃᓴᐅᖕᒪᖔᑦ ᐃᓇᖏᖅᓗᒍ?”
28ᐊᖓᔪᖅᑳᕐᔪᐊᖅ ᑍᕕᑎ ᑭᐅᕗᖅ ᐅᖃᖅᓗᓂ, “ᐹᓯᐸ ᕾᖁᒍᒃ ᐅᕙᓐᓄᑦ.” ᑖᓐᓇᓗ ᐃᑎᖅᐳᖅ ᐊᖓᔪᖅᑳᕐᔪᐊᑉ ᓇᔪᖅᑕᖓᓄᑦ, ᓇᖏᖅᓗᓂᓗ ᐊᖓᔪᖅᑳᕐᔪᐊᑉ ᓵᖓᓂ. 29ᐊᖓᔪᖅᑳᕐᔪᐊᕐᓗ ᐊᖏᕈᑎᓕᐅᖅᐳᖅ ᐅᖃᕕᒡᓗᓂ, ᐃᒫᒃ, “ᐊᑕᓂᖅ ᐃᓅᖕᒪᑦ, ᐅᕙᓐᓂᒃ ᐱᐅᓕᒃᓯᓚᐅᖅᑐᖅ ᐊᑭᕋᖅᑐᖅᑕᐅᓂᓐᓂᑦ ᑕᒤᓐᓂᑦ, 30ᐃᓕᖕᓄᑦ ᐅᖃᕕᓚᐅᕋᒪ ᐊᑕᓂᐅᑉ ᐃᓴᕆᐊᓕᒥᐅᑦ ᒎᑎᖓᒍᑦ, ᐅᖃᖅᓗᖓ, ‘ᐃᓛᒃ ᓲᓗᒨᓂ ᐃᕐᖕᓃᑦ ᐊᖓᔪᖅᑳᕐᔪᐊᓐᖑᖅᑐᒃᓴᐅᕗᖅ ᑭᖑᕝᕕᖅᓗᖓ, ᑖᓐᓇᓗ ᐃᒃᓯᕙᔪᒃᓴᐅᕗᖅ ᐃᒃᓯᕙᐅᑕᕐᔪᐊᓐᓂ ᐃᓇᖏᖅᓗᖓ,’ ᐃᓛᒃ ᑍᒫᒡᓗ ᐱᓂᐊᖅᑐᒃᓴᐅᕗᖓ ᐅᓪᓗᒥ.”
31ᑕᕝᕙ ᐹᓯᐸ ᐅᑯᓪᓗᓂ ᑮᓇᓂ ᒪᓂᖅᑲᒧᑦ ᐊᒃᑐᖅᓱᒍ, ᐅᐱᒍᓱᖕᓂᕐᖕᒧᑦ ᐊᖓᔪᖅᑳᕐᔪᐊᕐᖕᒥᒃ, ᐅᖃᓕᖅᐳᖅ, “ᐊᑕᓂᕋ ᐊᖓᔪᖅᑳᕐᔪᐊᖅ ᑍᕕᑎ ᐃᓅᓕ ᐃᓱᖃᖏᑦᑐᒧᑦ!”
32ᑕᕝᕙ ᐊᖓᔪᖅᑳᕐᔪᐊᖅ ᑍᕕᑎ ᐅᖃᖅᐳᖅ, “ᔭᑑᒃ ᕾᖁᔭᐅᓕ ᑐᓂᕐᕈᓯᖅᑎᑦᓯᔨ, ᓁᑕᓂᓗ ᒎᑎᐅᑉ ᐱᔪᖃᓛᖅᑐᒥᒃ ᐅᖃᖅᑎᖓ, ᐱᓁᐊᓗ ᔨᕼᐅᐃᐊᑕᐅᑉ ᐃᕐᖕᓂᖓ.” ᑖᒃᑯᐊᓗ ᕾᕗᑦ ᐊᖓᔪᖅᑳᕐᔪᐊᑉ ᓵᖓᓄᑦ. 33ᐊᖓᔪᖅᑳᕐᔪᐊᓪᓗ ᐅᖃᐅᑎᕔᑦ, “ᐊᖓᔪᖅᑳᕐᔪᐊᑉ ᐱᔨᖏᑦ ᐃᓚᒋᓗᒋᑦ, ᐃᕐᖕᓂᕋ ᓲᓗᒨᓂ ᐃᑭᑎᓪᓗᒍ ᓇᖕᒥᓂᖅ ᓯᐅᑎᖅᑯᖅᑐᔪᖁᑎᓐᓄᑦ ᒋᕼᐅᓂᓕᐊᕈᑎᓯᐅᒃ; 34ᑕᕝᕙᓂ ᔭᑑᒃ ᑐᓂᕐᕈᓯᖅᑎᑦᓯᔨᐅᑉ ᓁᑕᓂᐅᓪᓗ ᒎᑎᐅᑉ ᐱᔪᖃᓛᖅᑐᒥᒃ ᐅᖃᖅᑎᖓᑕ ᐅᖅᓱᖅᑎᖅᓗᒍ, ᐊᖓᔪᖅᑳᕐᔪᐊᓐᖑᖅᑎᑕᒃᓴᕆᕚᒃ ᐃᓴᕆᐊᓕᒥᐅᓄᑦ; ᑎᑦᑐᓚᐅᑎᓗ ᓂᓪᓕᖅᑎᑕᐅᓗᓂ, ᐅᖃᖅᓗᓯ, ‘ᐊᑯᓂ ᐃᓅᓕ ᐊᖓᔪᖅᑳᕐᔪᐊᖅ ᓲᓗᒨᓂ!’ 35ᐅᑎᓕᕈᑦᓯ ᒪᓕᒡᓗᓯᐅᒃ ᐃᒃᓯᕙᐅᑕᕐᔪᐊᓐᓄᑦ ᐃᖏᑎᑕᒃᓴᕆᕙᓯ; ᑖᓐᓇ ᐊᖓᔪᖅᑳᕐᔪᐊᓐᖑᕐᖕᓂᐊᕐᖕᒪᑦ ᐃᓇᖏᖅᓗᖓ; ᓂᕈᐊᖅᓯᒪᒐᒃᑯ ᐊᖓᔪᖅᑳᕐᔪᐊᓐᖑᖁᓪᓗᒍ ᐃᓴᕆᐊᓕᒧᑦ ᔫᑕᒧᓪᓗ.” 36ᐱᓁᐊᓗ ᔨᕼᐅᐃᐊᑕᐅᑉ ᐃᕐᖕᓂᖓ ᐊᖓᔪᖅᑳᕐᔪᐊᕐᖕᒧᑦ ᑭᐅᕗᖅ, “ᐋᒦᓐ! ᐊᑕᓂᐅᑉ ᒎᑎᐅᑉ ᐊᖓᔪᖅᑳᕐᔪᐊᒪ ᐊᑕᓂᖓᑕ ᑍᒤᑎᓪᓕᐅᒃ. 37ᐊᑕᓂᐅᑉ ᐃᓚᒋᖃᑦᑕᓚᐅᕐᖕᒪᒍ ᐊᖓᔪᖅᑳᕐᔪᐊᖅ, ᓲᓗᒨᓂᐅᓪᓗ ᐊᖓᔪᖅᑳᕐᔪᐊᖑᓂᖓ ᐱᔪᓐᓇᕐᖕᓂᖅᓴᐅᓕ ᐊᖓᔪᖅᑳᒪ ᑍᕕᑎᐅᑉ ᐊᖓᔪᖅᑳᕐᔪᐊᖑᓂᖓᓂᑦ.”
38ᑖᒃᑯᐊ ᔭᑑᒃ ᑐᓂᕐᕈᓯᖅᑎᑦᓯᔨ, ᓁᑕᓂᓗ ᒎᑎᐅᑉ ᐱᔪᖃᓛᖅᑐᒥ ᐅᖃᖅᑎᖓ, ᐱᓁᐊᓗ ᔨᕼᐅᐃᐊᑕᐅᑉ ᐃᕐᖕᓂᖓ, ᐊᖓᔪᖅᑳᕐᔪᐊᓪᓗ ᓴᐳᓐᓂᐊᖅᑎᖏᑦ ᓯᕆᑍᑏᑦ ᐱᓕᑍᑏᓪᓗ, ᓲᓗᒨᓂ ᐊᖓᔪᖅᑳᕐᔪᐊᑉ ᑍᕕᑎᐅᑉ ᓯᐅᑎᖅᑯᖅᑐᔪᖁᑎᖓᓄᑦ ᐃᑭᑎᑉᐹᑦ, ᒋᕼᐅᓂᒧᐊᖅᑎᓪᓗᒍ. 39ᑕᕝᕙᓂ ᔭᑑᒃ ᑐᓂᕐᕈᓯᖅᑎᑦᓯᔨ ᓇᒡᔪᕕᓂᖅ ᐸᐅᕐᖓᐅᑉ ᐅᖅᓱᖓᓂᒃ ᐃᒪᓕᒃ ᑐᐱᕐᔪᐊᒥᑦ ᑲᑎᒪᕕᖕᒥᑦ ᐱᓯᒪᔭᒥᓂᒃ ᑕᕝᕙᓐᖓᑦ ᓲᓗᒨᓂ ᑯᕝᕕᕆᕚ. ᑕᕝᕙ ᑎᑦᑐᓚᐅᑎᑦ ᓂᓪᓕᖅᑎᑕᐅᕗᑦ; ᐃᓄᓕᒫᓪᓗ ᕾᒐᓛᓕᖅᐳᑦ, “ᐊᑯᓂ ᐃᓅᓕ ᐊᖓᔪᖅᑳᕐᔪᐊᖅ ᓲᓗᒨᓂ!” 40ᑕᒪᕐᖕᒥᒃ ᑕᕝᕙ ᒪᓕᓕᖅᐹᑦ ᐅᑎᓕᖅᓗᑎᒃ, ᕾᒐᓛᖅᐳᑦ ᖁᕕᐊᓱᒡᓗᑎᒃ ᓱᐴᒊᑦ ᓂᓪᓕᐊᑎᑕᐅᕗᑦ, ᖁᕕᐊᓱᒃᐳᑦ ᐊᖏᔪᕐᔪᐊᒥᒃ ᖁᕕᐊᓱᒡᓗᑎᒃ, ᓂᐱᖃᓕᕐᖕᒪᑦ ᐊᒡᓛᑦ ᓄᓇ ᓴᔪᒃᑎᑕᐅᕗᖅ.
41ᐊᑐᓁᔭᒃᑯᑦ ᕾᖁᓯᒪᔭᖏᓪᓗ ᐱᔭᕇᖅᐸᓪᓕᐊᓕᖅᑎᓪᓗᒋᑦ ᓂᕆᕕᒡᔪᐊᕐᕕᖕᒥᓂ, ᑐᓵᓕᖅᐳᑉ ᓂᐱᖏᓐᓂᒃ. ᔪᐊᐱ ᑎᑦᑐᓚᐅᑎᓂᒃ ᑐᓴᕋᒥ ᐅᖃᖅᐳᖅ, “ᓱᔪᖃᓕᕐᖕᒪᑦ ᐃᒡᓗᒐᓴᖕᓂ ᐅᐃᒻᒪᖓᕙᓗᒃᑐᐊᓘᕙᑦ?” 42ᓱᓕ ᓂᓪᓕᐊᑎᓪᓗᒍ, ᔫᓇᑕᓂ ᑐᓂᕐᕈᓯᖅᑎᑦᓯᔨᐅᑉ ᐊᐰᐊᑕᐅᑉ ᐃᕐᖕᓂᖓ ᑎᑭᑉᐳᖅ; ᐊᑐᓁᔭᐅᑉ ᐅᖃᐅᑎᕚ, “ᐃᑎᕆᑦ, ᐱᓪᓚᕆᐅᕗᑎᑦ ᑐᓴᕈᒥᓇᖅᑐᒥᒃ ᐅᖃᕆᐊᖅᑐᕋᕕᑦ.”
43ᔫᓇᑕᓂᐅᑉ ᐊᑐᓁᔭ ᑭᐅᕚ, “ᑍᒤᑦᑐᒥᒃ ᐅᖃᕆᐊᖅᑐᕈᑎᖃᓐᖏᓚᖓ, ᐊᑕᓂᑦᑕ ᐊᖓᔪᖅᑳᕐᔪᐊᑉ ᑍᕕᑎᐅᑉ, ᐊᖓᔪᖅᑳᕐᔪᐊᕈᖅᑎᒻᒪᒍ ᓲᓗᒨᓂ; 44ᑎᓕᓯᖕᒪᑦ ᔭᑑᒡᒥᒃ ᑐᓂᕐᕈᓯᖅᑎᑦᓯᔨᒥᒃ, ᓁᑕᓂᒥᒡᓗ ᒎᑎᐅᑉ ᐱᔪᖃᓛᖅᑐᒥᒃ ᐅᖃᖅᑎᖓᓂᒃ, ᐱᓁᐊᒥᒡᓗ ᔨᕼᐅᐃᐊᑕᐅᑉ ᐃᕐᖕᓂᖓᓂᒃ, ᓯᕆᐅᓪᓗ ᑭᖑᕚᖏᑦ ᐱᓕᐅᓪᓗ ᑭᖑᕚᖏᑦ ᐊᖓᔪᖅᑳᕐᔪᐊᓪᓗ ᓴᐳᓐᓂᐊᖅᑎᖏᓐᓂᒃ ᓯᕆᑍᑎᓂᒃ ᐱᓕᑍᑎᓂᒡᓗ; ᐃᑭᒪᑎᑦᓱᒍᓗ ᐊᖓᔪᖅᑳᕐᔪᐊᑉ ᓯᐅᑎᖅᑯᖅᑐᔪᖁᑎᖓᓂ, 45ᔭᑑᑭᐅᓪᓗ ᑐᓂᕐᕈᓯᖅᑎᑦᓯᔨᐅᑉ ᓁᑕᓂᐅᓪᓗ ᒎᑎᐅᑉ ᐱᔪᖃᓛᖅᑐᒥᒃ ᐅᖃᖅᑎᖓᑕ ᐅᖅᓱᖅᑎᖅᐹ ᐊᖓᔪᖅᑳᕐᔪᐊᓐᖑᖅᑎᓪᓗᒍ ᒋᕼᐅᓂᒥ; ᑕᕝᕙᓐᖓᑦ ᐃᒡᓗᒐᓴᖕᓄᑦ ᒪᔪᕋᓕᖅᐳᑦ ᖁᕕᐊᓱᒻᒪᕆᒡᓗᑎᒃ, ᐃᒡᓗᒐᓴᒡᔪᐊᕐᖕᒥᐅᑦ ᐅᐃᒻᒪᒃᓯᒪᓕᖅᐳᑦ. ᑕᒪᓐᓇ ᑕᕝᕙ ᓂᐱᕐᔪᐊᖅ ᑐᓵᔭᓯ. 46ᓲᓗᒨᓂ ᒫᓐᓇ ᐃᒃᓯᕙᐅᑕᕐᔪᐊᕐᖕᒥ ᐃᒃᓯᕚᓕᖅᐳᖅ. 47ᓱᓕᓗ, ᐊᖓᔪᖅᑳᕐᔪᐊᑉ ᐱᔨᖏᑦ ᐅᐱᒍᓱᒋᐊᖅᑐᖅᓯᒪᕗᑦ ᐊᑕᓂᕐᖕᒥᒃ ᐊᖓᔪᖅᑳᕐᔪᐊᑦᑎᓐᓂᒃ ᑍᕕᑎᒥᒃ, ᐅᖃᖅᓗᑎᒃ, ‘ᒎᑎᕕᑦ ᓲᓗᒨᓂᐅᑉ ᐊᑎᖓ ᐃᓕᖕᓂᑦ ᖃᐅᔨᒪᔭᐅᓂᖅᓴᐅᑎᓪᓕᐅᒃ, ᐊᐅᓚᑦᓯᓂᖓᓗ ᐊᔪᖏᓐᓂᖅᓴᐅᑎᓪᓕᐅᒃ ᐊᐅᓚᑦᓯᓂᕆᓚᐅᖅᑕᕐᖕᓂᑦ.’ ᐊᖓᔪᖅᑳᕐᔪᐊᕐᓗ ᐅᑯᕗᖅ ᐅᐱᒍᓱᒡᓗᓂ ᐃᒡᓕᕐᖕᒥᓃᓪᓗᓂ. 48ᐊᖓᔪᖅᑲᕐᔪᐊᕐᓗ ᐅᖃᕐᕆᓪᓗᓂ, ‘ᐊᑕᓂᖅ ᓂᖅᑐᖅᑕᐅᓕ, ᐃᓴᕆᐊᓕᑎᑦ ᒎᑎᖓᑦ, ᐅᓪᓗᒥ ᕿᑐᕐᖓᒪ ᐃᓚᖓᓐᓂᒃ ᐃᖏᑎᑦᓯᖕᒪᑦ ᐃᒃᓯᕙᐅᑕᕐᔪᐊᓐᓂ, ᓇᖕᒥᓂᕐᓗ ᑕᑯᓪᓗᒍ.’”
49ᑕᕝᕙ ᐊᑐᓁᔭᐅᑉ ᕾᖁᓯᒪᔭᓕᒫᖏᑦ ᓴᔪᓕᖅᐳᑦ, ᒪᑭᓐᓇᒥᒃ ᐊᐅᓪᓚᖅᐳᑦ ᓇᒧᑐᐃᓐᓇᖅ ᐅᐸᒍᒪᔭᒥᖕᓄᑦ. 50ᐊᑐᓁᔭ, ᓯᕘᕋᔪᐊᓘᓕᖅᐳᖅ ᓲᓗᒨᓂᒥᒃ, ᑐᐱᕐᔪᐊᒧᐊᖅᓗᓂᓗ ᑐᓂᕐᕈᓯᕐᕕᐅᑉ ᑎᕆᖅᑯᖏᓐᓂᒃ ᑎᒍᒥᐊᓕᖅᐳᖅ. 51ᐊᖓᔪᖅᑳᕐᔪᐊᖅ ᓲᓗᒨᓂ ᐅᖃᐅᑎᔭᐅᕗᖅ, “ᑕᑯᒋᑦ, ᐊᑐᓁᔭ ᓯᕘᕋᕗᖅ ᓲᓗᒨᓂᒥᒃ; ᐂᓪᓗᓂᓗ ᑐᓂᕐᕈᓯᕐᕕᐅᑉ ᑎᕆᖅᑯᖏᓐᓂᒃ ᑎᒍᒥᐊᓕᖅᐳᖅ, ᐅᖃᖅᓗᓂᓗ, ‘ᐊᖓᔪᖅᑳᕐᔪᐊᖅ ᓲᓗᒨᓂ ᐊᖏᒻᒪᕆᖁᕙᕋ ᓴᕕᒡᔪᐊᕐᖕᒧᑦ ᑐᖁᑕᐅᖁᓇᖓ.’”
52ᓲᓗᒨᓂ ᐅᖃᖅᐳᖅ, “ᐅᕙᓐᓂᒃ ᐅᐱᒍᓱᑦᓯᐊᖅᐸᑦ, ᐊᒡᓛᑦ ᓂᐊᖁᐊᓃᑦᑐᖅ ᓄᔭᖅ ᐊᑕᐅᓯᖅ ᐊᒃᑐᖅᑕᐅᓂᐊᓐᖏᓚᖅ; ᑭᓯᐊᓂ ᑍᒤᓐᖏᑐᐊᖅᐸᑦ ᑐᖁᑕᐅᓂᐊᖅᐳᖅ.” 53ᐊᖓᔪᖅᑳᕐᔪᐊᖅ ᓲᓗᒨᓂ ᑎᓕᓯᕗᖅ, ᐊᑐᓁᐊ ᑐᓂᕐᕈᓯᕐᕕᖕᒥᑦ ᕾᖁᔭᐅᖁᓪᓗᒍ. ᐊᑐᓁᐊᓗ ᑕᕝᕗᓐᖓᕋᒥ ᐅᑯᕗᖅ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᓵᖓᓄᑦ; ᐊᖓᔪᖅᑳᕐᔪᐊᓪᓗ ᐅᖃᐅᑎᕚ, “ᐊᖏᕐᕋᓕᕆᑦ.”
Currently Selected:
ᐊᑕᓃᑦ ᓯᕗᓪᓖᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.