ᐊᑕᓃᑦ ᓯᕗᓪᓖᑦ 1
1
ᐊᖓᔪᖅᑳᕐᔪᐊᑉ ᑍᕕᑎᐅᑉ ᐃᑐᐊᓘᓕᕐᓂᖓ
1ᐊᖓᔪᖅᑳᕐᔪᐊᖅ ᑍᕕᑎ ᐃᑦᑐᒻᒪᕆᐅᓕᕐᑎᓪᓗᒍ ᐅᓄᕐᑐᓂᒃ ᐊᕐᕌᒍᖃᓕᕐᓱᓂ, ᐱᔨᖏᑕ ᕿᐲᖕᓄᑦ ᐅᖅᑰᓯᑎᓐᓇᓱᖃᑦᑕᕋᓗᕐᐊᒪᑦᔪᑦ, ᐅᖅᑰᓯᔪᓐᓁᓪᓕᓚᐅᕐᐳᖅ. 2ᑍᒤᒻᒪᑦ ᐱᔨᖏᑦ ᑖᑦᓱᒧᖓ ᐅᖃᓕᕐᐳᑦ, “ᐊᖓᔪᖅᑳᕐᔪᐊᖅ ᐃᓅᓱᒃᑐᒥᒃ ᐊᕐᓇᒥᒃ ᓇᓂᓯᑦᔪᑎᔪᒪᓕᕋᑦᑎᒋᑦ ᐱᔨᑦᓯᕋᕐᑎᒋᓂᐊᕐᑕᕐᓂᒃ. ᐃᕝᕕᑦ ᓴᓂᐊᓂ ᓇᓚᓗᓂ ᑖᑦᓱᒧᖓ ᐅᖅᑰᑎᑕᐅᓂᐊᕋᕕᑦ.” 3ᑕᕝᕙ ᕿᓂᓕᓚᐅᕐᐳᑦ ᐃᓴᕆᐊᓕᒥᐅᓂ ᐃᓅᓱᒃᑐᒥᒃ ᐊᕐᓇᒥᒃ ᐃᓂᖁᓇᕐᑐᒥᒃ, ᑕᕝᕙ ᓄᓇᒥᑦ ᓲᓇᒥᑦ ᓇᓂᓯᕗᑦ ᐃᓅᓱᒃᑐᒥᒃ ᐊᕐᓇᒥᒃ ᐊᑎᖃᕐᑐᒥᒃ ᐊᐱᓵᒡᒥᒃ, ᐊᖓᔪᖅᑳᕐᔪᐊᒧᓪᓗ ᐋᑕᐅᕗᖅ. 4ᑖᓐᓇ ᐃᓂᖁᓇᓪᓚᕆᓚᐅᕐᐳᖅ; ᐊᖓᔪᖅᑳᕐᔪᐊᓪᓗ ᑲᒪᔨᒋᓕᕐᐹ ᐱᔨᑦᓯᕋᕐᑎᒋᓪᓗᒍ; ᐊᖓᔪᖅᑳᕐᔪᐊᓪᓕ ᐃᓐᓇᖓᖃᑎᒋᓚᐅᓐᖏᓛ.
ᐊᑐᓁᐊᐅᑉ ᐃᒃᓯᕙᐅᑕᕐᔪᐊᒧᐊᕈᒪᓂᖓ
5 #
ᓴᒧᐃᓕ ᐂᑉᐸᖏᑦ 3:4. ᑕᕝᕙ ᐊᑐᓁᔭ ᕼᐊᒋᑎᐅᑉ ᐃᕐᓂᖓ ᐃᒻᒥᓂᒃ ᐊᖏᔪᕈᕐᑎᓐᓇᓱᐊᓚᐅᕐᐳᖅ, ᐅᖃᕐᓗᓂ, “ᐊᖓᔪᖅᑳᕐᔪᐊᓐᖑᕐᓂᐊᕐᐳᖓ”; ᓇᖕᒥᓂᕐᓗ ᕿᒧᒃᓯᐅᑎᑖᓚᐅᕐᐳᖅ ᐊᒃᓴᓗᐊᓕᖕᒥᒃ ᕿᒻᒥᔪᐊᓂᓗ ᐃᑭᒪᔪᒃᓴᓂᒃ, 50ᓂᒡᓗ ᐊᖑᑎᓂᒃ ᓯᕗᓂᕐᒥᓂ ᐅᓪᓚᒃᑐᒃᓴᓂᒃ ᐋᖅᑮᓚᐅᕐᐳᖅ. 6ᐊᑖᑕᖓᑕᓗ ᐃᓂᕐᑎᓚᐅᓐᖏᓛ ᐅᖃᐅᑎᓚᐅᕋᓂᐅᒡᓗ, “ᓱᖕᒪᑦ ᑍᒤᓕᐅᕐᐱᑦ?” ᑖᓐᓇᓗ ᐊᖑᑎᑦᓯᐊᕙᐅᓚᐅᕐᐳᖅ; ᐋᑉᓴᓚᐅᑉ ᓄᑲᖓ ᑐᖓᓕᕆᓪᓗᓂᐅᒃ. 7ᑕᕝᕙ ᐅᖃᖃᑎᖃᓕᕐᐳᖅ ᔪᐊᐱᒥᒃ ᔨᕈᐃᐊᐅᑉ ᐃᕐᓂᖓᓂᒃ ᐊᐰᐊᑕᒥᒡᓗ ᑐᓂᕐᕈᓯᕐᑎᑦᓯᔨᒥᒃ; ᑖᒃᑯᐊᒃ ᒪᓕᓕᕐᐳᒃ ᐊᑐᓁᔭᒥᒃ ᐃᑲᔪᕐᓗᒍᓗ. 8ᔭᑑᒃᓕ ᑐᓂᕐᕈᓯᕐᑎᑦᓯᔨ, ᐱᓁᐊᓗ ᔨᕼᐅᐃᐊᑕᐅᑉ ᐃᕐᓂᖓ, ᓁᑕᓂᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ, ᓯᒥᐂᓗ, ᕆᐂᓗ, ᑍᕕᑎᐅᓪᓗ ᓴᐳᓐᓂᐊᕐᑎᖏᑦ ᐊᔪᖏᑦᑐᕐᔪᐊᑦ ᐊᑐᓁᔭᒥᒃ ᐃᑲᔪᕐᑐᓚᐅᓐᖏᓚᑦ.
9ᐊᑐᓁᔭ ᑐᓂᕐᕈᓯᕐᐳᖅ ᓰᐱᓂᒃ, ᐃᒻᒧᒃᓯᐅᒐᕐᓂᒡᓗ, ᓄᕐᕋᕐᓂᒡᓗ ᖁᐃᒃᑎᑦᓯᐊᕆᓯᒪᔪᓂᒃ, ᓄᓇᒥ ᖁᒡᓗᒋᐊᕐᔪᐊᑉ ᐅᔭᕋᖓᓂ ᐊᑎᓕᖕᒥ, ᐃᓐ-ᕈᒋᐅᑉ ᖃᓂᒋᔭᖓᓂ. ᕾᖁᔨᓪᓗᓂ ᖃᑕᓐᖑᑎᓕᒫᒥᓂᒃ ᐊᖓᔪᖅᑳᕐᔪᐊᑉ ᐃᕐᓂᖏᓐᓂᒃ ᐊᖓᔪᖅᑳᕐᔪᐊᓪᓗ ᐊᖓᔪᖅᑳᖁᑎᖏᓐᓂᒃ ᔫᑕᒥᐅᑕᓂᒃ, 10ᕾᖁᔨᓚᐅᓐᖏᓚᕐᓕ ᓁᑕᓂᒥᒃ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓂᒃ ᐱᓁᐊᒥᒡᓘᓐᓃᑦ ᐊᔪᖏᑦᑐᕐᔪᐊᓂᒡᓘᓐᓃᑦ ᐅᓇᑕᕐᑐᒃᓴᓂᒃ ᓲᓗᒨᓂᒥᒡᓘᓐᓃᑦ ᖃᑕᓐᖑᑎᒥᓂᒃ.
ᓲᓗᒨᓂᐅᑉ ᐊᖓᔪᖅᑳᕐᔪᐊᓐᖑᕐᑎᑕᐅᓂᖓ
11 #
ᓴᒧᐃᓕ ᐂᑉᐸᖏᑦ 12:24. ᓁᑕᓂ ᐹᓯᐸᒧᑦ ᐅᖃᕐᐳᖅ ᓲᓗᒨᓂᐅᑉ ᐊᓈᓇᖓᓄᑦ, “ᑐᓴᓚᐅᓐᖏᓚᑏᑦ ᐊᑐᓁᔭᒥᒃ ᕼᐊᒋᑎᐅᑉ ᐃᕐᓂᖓᓂᒃ ᑖᓐᓇ ᐊᖓᔪᖅᑳᕐᔪᐊᓐᖑᕐᒪᑦ? ᐊᖓᔪᖅᑳᕐᔪᐊᕗᓪᓗ ᑍᕕᑎ ᑕᒪᑐᒥᖓ ᖃᐅᔨᒪᓐᖏᓛᖅ? 12ᑍᒤᒻᒪᓪᓕ ᒫᓐᓇ ᕾᒋᑦ ᐅᖃᐅᑎᓚᐅᕐᓚᒋᑦ, ᐃᓄᓰᑦ ᓇᖕᒥᓂᖅ ᓴᐳᑎᓂᐊᕋᕕᐅᒃ ᐃᕐᓂᕐᐱᓪᓗ ᓲᓗᒨᓂᐅᑉ ᐃᓅᓯᖓ. 13ᒫᓐᓇᑲᐅᑎᒋ ᐂᓕᕆᑦ ᐊᖓᔪᖅᑳᕐᔪᐊᕐᒧᑦ ᑍᕕᑎᒧᑦ, ᐅᖃᐅᑎᓗᒍ, ‘ᐅᖃᓚᐅᕐᓯᒪᓐᖏᓚᑏᑦ, ᐊᖓᔪᖅᑳᕐᔪᐊᕋ, ᐅᕙᓐᓄᑦ ᐅᖃᕕᒡᓗᑎᑦ ᐊᖏᓚᐅᕐᓯᒪᖓᕕᑦ ᐱᔨᖕᓄᑦ, ᐅᖃᕐᓗᑎᑦ “ᐃᕐᓃᑦ ᓲᓗᒨᓂ ᐅᕙᓐᓂᒃ ᑭᖑᕝᕕᐅᑎᓛᕐᑐᖅ ᐃᓇᖐᕐᓗᖓ? ᐃᒃᓯᕙᐅᑕᕐᔪᐊᓐᓂᓗ ᐃᒃᓯᕙᓕᕐᓗᓂ”? ᓱᖕᒪᓪᓕ ᐊᑐᓁᔭ ᐊᖓᔪᖅᑳᕐᔪᐊᓐᖑᓕᕐᐸ?’ 14ᑕᕝᕙ ᐅᖃᓪᓚᒃᑎᓪᓗᑎᑦ ᓱᓕ ᐊᖓᔪᖅᑳᕐᔪᐊᕐᒧᑦ, ᑕᕝᕗᖓ ᐃᑎᕐᓂᐊᕐᐳᖓ ᐅᓂᒃᑲᐅᓯᕆᔭᑎᑦ ᓇᓗᓁᒃᑲᓐᓂᕐᓗᒋᑦ.”
15ᑍᒤᒻᒪᑦ ᐹᓯᐸ ᐊᖓᔪᖅᑳᕐᔪᐊᑉ ᐃᒡᓗᕈᓯᖓᓄᑦ ᐃᑎᕐᐳᖅ ᐊᖓᔪᖅᑳᕐᔪᐊᖅ ᐃᑐᐊᓘᓕᓚᐅᕐᐳᖅ, ᐊᕐᓇᖅ ᐊᐱᓵᒡ ᓲᓇᒤᑎᒥᐅᑕᖅ ᐊᖓᔪᖅᑳᕐᔪᐊᕐᒥᒃ ᐱᔨᑦᓯᕐᑎᓪᓗᒍ. 16ᐹᓯᐸ ᐅᑯᕗᖅ ᐊᖓᔪᖅᑳᕐᔪᐊᑉ ᓵᖓᓄᑦ, ᐊᖓᔪᖅᑳᕐᔪᐊᓪᓗ ᐊᐱᕆᕚ, “ᓱᓇᒥᒃ ᐱᔪᒪᕖᑦ?”
17ᑖᓐᓇ ᑭᐅᕗᖅ, “ᐊᖓᔪᖅᑳᕐᔪᐊᖅ ᐅᖃᕕᒃᑎᓚᐅᕐᓯᒪᒐᕕᓐᖓ ᐊᖏᒻᒪᕆᒃᓗᖓ ᐊᑕᓂᐅᑉ ᒎᑎᕕᑦ ᐊᑎᖓ ᑍᓪᓗᒍ, ‘ᐃᕐᓃᑦ ᓲᓗᒨᓂ ᐊᖓᔪᖅᑳᕐᔪᐊᓐᖑᓛᕐᐳᖅ ᑭᖑᕝᕕᕐᓗᖓ, ᐃᒃᓯᕙᓕᕐᓗᓂᓗ ᐃᒃᓯᕙᐊᑕᕐᔪᐊᓐᓂ.’ 18ᒫᓐᓇᓕ ᑕᑯᒋᑦ, ᐊᑐᓁᔭ ᐊᖓᔪᖅᑳᕐᔪᐊᖑᓕᕐᐳᖅ, ᐊᒡᓛᑦ ᐊᑕᓂᕋ ᐊᖓᔪᖅᑳᕐᔪᐊᖅ ᖃᐅᔨᓚᐅᓐᖏᑎᓪᓗᑎᑦ. 19ᑐᓂᕐᕈᓯᕐᓯᒪᓕᕇᕐᐳᖅ ᐅᓄᕐᑐᓂᒃ ᐊᖑᓴᓪᓗᓂᒃ ᓰᐱᓂᒡᓗ ᓄᕐᕋᕐᓂᒡᓗ ᖁᐃᒃᓯᑦᑎᐊᕆᔭᐅᓯᒪᔪᓂᒃ ᕾᖁᔨᓪᓗᓂᓗ ᐊᖓᔪᖅᑳᕐᔪᐊᑉ ᐃᕐᓂᖏᓐᓂᒃ, ᐊᐰᐊᑕᓗ ᑐᓂᕐᕈᓯᕐᑎᑦᓯᔨ ᕾᖁᓪᓗᓂᐅᒃ, ᔪᐊᐱᓗ ᐅᓇᑕᕐᑐᒃᓴᖁᑎᕕᑦ ᐊᖓᔪᖅᑳᖓ; ᐃᕐᓂᕐᓂᒡᓕ ᓲᓗᒨᓂᒥᒃ ᕾᖁᔨᓯᒪᓐᖏᓚᖅ. 20ᒫᓐᓇᓕ, ᐊᑕᓂᕋ ᐊᖓᔪᖅᑳᕐᔪᐊᖅ, ᐃᓴᕆᐊᓕᒥᐅᑦ ᐃᓄᓕᒫᖏᑦ ᐅᑕᖅᑭᕗᑦ ᐃᓕᖕᓂᑦ, ᐅᖃᐅᑎᔭᐅᔪᒪᓪᓗᑎᑦ ᑭᓇ ᐃᒃᓯᕚᕐᓂᐊᓕᕐᒪᖔᑦ ᐊᖓᔪᖅᑳᕐᔪᐊᒪ ᐃᒃᓯᕙᐅᑕᕐᔪᐊᖓᓂ ᑭᖑᕝᕕᕐᑕᐅᓗᓂ. 21ᑍᒤᓐᓂᐊᖏᑉᐸᑦ ᐃᒤᑦᓱᒫᕐᒪᑦ, ᐊᑕᓂᕋ ᐊᖓᔪᖅᑲᕐᔪᐊᕋ ᐃᓅᔪᓐᓃᕐᐸᑦ ᓯᕗᓕᕕᓂᓂ ᐃᓚᒋᓕᕐᓗᒋᑦ, ᐅᕙᖓ ᐃᕐᓂᕋᓗ ᓲᓗᒨᓂ ᐱᐅᓯᖃᕐᕕᐅᓂᐊᕐᐳᒍᒃ ᐊᑭᕋᕐᑐᕐᑐᑎᑐᑦ.”
22ᓱᓕ ᐅᖃᓪᓚᒃᑎᓪᓗᒍ ᐊᖓᔪᖅᑳᕐᔪᐊᕐᒧᑦ, ᓁᑕᓂ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᐃᑎᕐᐳᖅ. 23ᑖᒃᑯᐊ ᐊᖓᔪᖅᑳᕐᔪᐊᖅ ᐅᖃᕐᕕᒋᕚᑦ, “ᑕᕝᕙ ᓁᑕᓂ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ.” ᐊᖓᔪᖅᑳᕐᔪᐊᑉ ᓵᖓᓄᑦ ᐅᑯᕗᖅ ᑮᓇᓂ ᒪᓂᖅᑲᒧᑦ ᐊᒃᑐᕐᓱᒍ. 24ᐅᖃᕐᓗᓂᓗ, “ᐊᑕᓂᕋ ᐊᖓᔪᖅᑳᕐᔪᐊᕋ, ᐅᖃᕐᓯᒪᓕᕐᐲᑦ, ‘ᐊᑐᓁᔭ ᐅᕙᓐᓂᒃ ᐃᓇᖏᕐᓯᔪᒫᕐᐳᖅ, ᐃᒃᓯᕙᐅᑕᕐᔪᐊᓐᓂᓗ ᐃᒃᓯᕙᓕᕐᓗᓂ’? 25ᐅᓪᓗᒥ ᐊᐅᓪᓚᕐᐳᖅ, ᑐᓂᕐᕈᓯᕆᐊᕐᑐᕐᓗᓂ ᐅᓄᕐᑐᓂᒃ ᐊᖑᓴᓪᓗᕐᓂᒃ ᓰᐱᓂᒡᓗ ᓄᕐᕋᓂᒡᓗ ᖁᐃᒃᑎᑦᓯᐊᖑᓯᒪᔪᓂᒃ, ᕾᖁᔨᓪᓗᓂ ᐊᖓᔪᖅᑳᕐᔪᐊᑉ ᐃᕐᓂᓕᒫᖏᓐᓂᒃ, ᔪᐊᐱᒥᒡᓗ ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓂᒃ, ᐊᐰᐊᑕᒥᒡᓗ ᑐᓂᕐᕈᓯᕐᑎᑦᓯᔨᒥᒃ, ᑕᑯᒋᓪᓗ, ᒫᓐᓇ ᓂᕆᕕᒡᔪᐊᕐᐳᑦ ᐃᒥᕐᓗᑎᒡᓗ ᑖᑦᓱᒪ ᓵᖓᓂ ᕾᒐᓛᕐᓗᑎᒃ ‘ᐊᑯᓂ ᐃᓅᓕ ᐊᖓᔪᖅᑳᕐᔪᐊᖅ ᐊᑐᓁᔭ!’ 26ᐅᕙᖓᓕ ᐱᔩᑦ, ᔭᑑᒃᓗ ᑐᓂᕐᕈᓯᕐᑎᑦᓯᔨ, ᐱᓁᐊᓘᓐᓃᑦ ᔨᕼᐅᐃᐊᑕᐅᑉ ᐃᕐᓂᖓ, ᐱᔩᓪᓘᓐᓃᑦ ᓲᓗᒨᓂ ᕾᖁᔭᐅᓚᐅᓐᖏᓚᒍᑦ. 27ᑕᒪᓐᓇ ᐱᓂᐊᕐᓂᐅᑎᑕᐅᕚ ᐊᑕᓂᓐᓄᑦ ᐊᖓᔪᖅᑳᕐᔪᐊᓐᓄᑦ, ᐱᔨᑎᓪᓗ ᐅᖃᐅᑎᓚᐅᕐᓇᒋᑦ ᑭᓇ ᐊᖓᔪᖅᑳᕐᔪᐊᕐᒪ ᐃᒃᓯᕙᐅᑕᕐᔪᐊᖓᓂ ᐃᒃᓯᕙᔪᒃᓴᐅᖕᒪᖔᑦ ᐃᓇᖏᕐᓗᒍ?”
28ᐊᖓᔪᖅᑳᕐᔪᐊᖅ ᑍᕕᑎ ᑭᐅᕗᖅ ᐅᖃᕐᓗᓂ, “ᐹᓯᐸ ᕾᖁᒍᒃ ᐅᕙᓐᓄᑦ.” ᑖᓐᓇᓗ ᐃᑎᕐᐳᖅ ᐊᖓᔪᖅᑳᕐᔪᐊᑉ ᓇᔪᕐᑕᖓᓄᑦ, ᓇᖏᕐᓗᓂᓗ ᐊᖓᔪᖅᑳᕐᔪᐊᑉ ᓵᖓᓂ. 29ᐊᖓᔪᖅᑳᕐᔪᐊᕐᓗ ᐊᖏᕈᑎᓕᐅᕐᐳᖅ ᐅᖃᕕᒡᓗᓂ, ᐃᒫᒃ, “ᐊᑕᓂᖅ ᐃᓅᖕᒪᑦ, ᐅᕙᓐᓂᒃ ᐱᐅᓕᒃᓯᓚᐅᕐᑐᖅ ᐊᑭᕋᕐᑐᕐᑕᐅᓂᓐᓂᑦ ᑕᒤᓐᓂᑦ, 30ᐃᓕᖕᓄᑦ ᐅᖃᕕᓚᐅᕋᒪ ᐊᑕᓂᐅᑉ ᐃᓴᕆᐊᓕᒥᐅᑦ ᒎᑎᖓᒍᑦ, ᐅᖃᕐᓗᖓ, ‘ᐃᓛᒃ ᓲᓗᒨᓂ ᐃᕐᓃᑦ ᐊᖓᔪᖅᑳᕐᔪᐊᓐᖑᕐᑐᒃᓴᐅᕗᖅ ᑭᖑᕝᕕᕐᓗᖓ, ᑖᓐᓇᓗ ᐃᒃᓯᕙᔪᒃᓴᐅᕗᖅ ᐃᒃᓯᕙᐅᑕᕐᔪᐊᓐᓂ ᐃᓇᖏᕐᓗᖓ,’ ᐃᓛᒃ ᑍᒫᒡᓗ ᐱᓂᐊᕐᑐᒃᓴᐅᕗᖓ ᐅᓪᓗᒥ.”
31ᑕᕝᕙ ᐹᓯᐸ ᐅᑯᓪᓗᓂ ᑮᓇᓂ ᒪᓂᖅᑲᒧᑦ ᐊᒃᑐᕐᓱᒍ, ᐅᐱᒍᓱᖕᓂᕐᒧᑦ ᐊᖓᔪᖅᑳᕐᔪᐊᕐᒥᒃ, ᐅᖃᓕᕐᐳᖅ, “ᐊᑕᓂᕋ ᐊᖓᔪᖅᑳᕐᔪᐊᖅ ᑍᕕᑎ ᐃᓅᓕ ᐃᓱᖃᖏᑦᑐᒧᑦ!”
32ᑕᕝᕙ ᐊᖓᔪᖅᑳᕐᔪᐊᖅ ᑍᕕᑎ ᐅᖃᕐᐳᖅ, “ᔭᑑᒃ ᕾᖁᔭᐅᓕ ᑐᓂᕐᕈᓯᕐᑎᑦᓯᔨ, ᓁᑕᓂᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ, ᐱᓁᐊᓗ ᔨᕼᐅᐃᐊᑕᐅᑉ ᐃᕐᓂᖓ.” ᑖᒃᑯᐊᓗ ᕾᕗᑦ ᐊᖓᔪᖅᑳᕐᔪᐊᑉ ᓵᖓᓄᑦ. 33ᐊᖓᔪᖅᑳᕐᔪᐊᓪᓗ ᐅᖃᐅᑎᕔᑦ, “ᐊᖓᔪᖅᑳᕐᔪᐊᑉ ᐱᔨᖏᑦ ᐃᓚᒋᓗᒋᑦ, ᐃᕐᓂᕋ ᓲᓗᒨᓂ ᐃᑭᑎᓪᓗᒍ ᓇᖕᒥᓂᖅ ᓯᐅᑎᖅᑯᕐᑐᔪᖁᑎᓐᓄᑦ ᒋᕼᐅᓂᓕᐊᕈᑎᓯᐅᒃ; 34ᑕᕝᕙᓂ ᔭᑑᒃ ᑐᓂᕐᕈᓯᕐᑎᑦᓯᔨᐅᑉ ᓁᑕᓂᐅᓪᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐅᕐᓱᕐᑎᕐᓗᒍ, ᐊᖓᔪᖅᑳᕐᔪᐊᓐᖑᕐᑎᑕᒃᓴᕆᕚᒃ ᐃᓴᕆᐊᓕᒥᐅᓄᑦ; ᑎᑦᑐᓚᐅᑎᓗ ᓂᓪᓕᕐᑎᑕᐅᓗᓂ, ᐅᖃᕐᓗᓯ, ‘ᐊᑯᓂ ᐃᓅᓕ ᐊᖓᔪᖅᑳᕐᔪᐊᖅ ᓲᓗᒨᓂ!’ 35ᐅᑎᓕᕈᑦᓯ ᒪᓕᒡᓗᓯᐅᒃ ᐃᒃᓯᕙᐅᑕᕐᔪᐊᓐᓄᑦ ᐃᖏᑎᑕᒃᓴᕆᕙᓯ; ᑖᓐᓇ ᐊᖓᔪᖅᑳᕐᔪᐊᓐᖑᕐᓂᐊᕐᒪᑦ ᐃᓇᖏᕐᓗᖓ; ᓂᕈᐊᕐᓯᒪᒐᒃᑯ ᐊᖓᔪᖅᑳᕐᔪᐊᓐᖑᖁᓪᓗᒍ ᐃᓴᕆᐊᓕᒧᑦ ᔫᑕᒧᓪᓗ.” 36ᐱᓁᐊᓗ ᔨᕼᐅᐃᐊᑕᐅᑉ ᐃᕐᓂᖓ ᐊᖓᔪᖅᑳᕐᔪᐊᕐᒧᑦ ᑭᐅᕗᖅ, “ᐋᒦᓐ! ᐊᑕᓂᐅᑉ ᒎᑎᐅᑉ ᐊᖓᔪᖅᑳᕐᔪᐊᒪ ᐊᑕᓂᖓᑕ ᑍᒤᑎᓪᓕᐅᒃ. 37ᐊᑕᓂᐅᑉ ᐃᓚᒋᖃᑦᑕᓚᐅᕐᒪᒍ ᐊᖓᔪᖅᑳᕐᔪᐊᖅ, ᓲᓗᒨᓂᐅᓪᓗ ᐊᖓᔪᖅᑳᕐᔪᐊᖑᓂᖓ ᐱᔪᓐᓇᕐᓂᕐᓴᐅᓕ ᐊᖓᔪᖅᑳᒪ ᑍᕕᑎᐅᑉ ᐊᖓᔪᖅᑳᕐᔪᐊᖑᓂᖓᓂᑦ.”
38ᑖᒃᑯᐊ ᔭᑑᒃ ᑐᓂᕐᕈᓯᕐᑎᑦᓯᔨ, ᓁᑕᓂᓗ ᒎᑎᐅᑉ ᐱᔪᖃᓛᕐᑐᒥ ᐅᖃᕐᑎᖓ, ᐱᓁᐊᓗ ᔨᕼᐅᐃᐊᑕᐅᑉ ᐃᕐᓂᖓ, ᐊᖓᔪᖅᑳᕐᔪᐊᓪᓗ ᓴᐳᓐᓂᐊᕐᑎᖏᑦ ᓯᕆᑍᑏᑦ ᐱᓕᑍᑏᓪᓗ, ᓲᓗᒨᓂ ᐊᖓᔪᖅᑳᕐᔪᐊᑉ ᑍᕕᑎᐅᑉ ᓯᐅᑎᖅᑯᕐᑐᔪᖁᑎᖓᓄᑦ ᐃᑭᑎᑉᐹᑦ, ᒋᕼᐅᓂᒧᐊᕐᑎᓪᓗᒍ. 39ᑕᕝᕙᓂ ᔭᑑᒃ ᑐᓂᕐᕈᓯᕐᑎᑦᓯᔨ ᓇᒡᔪᕕᓂᖅ ᐸᐅᕐᖓᐅᑉ ᐅᕐᓱᖓᓂᒃ ᐃᒪᓕᒃ ᑐᐱᕐᔪᐊᒥᑦ ᑲᑎᒪᕕᖕᒥᑦ ᐱᓯᒪᔭᒥᓂᒃ ᑕᕝᕙᓐᖓᑦ ᓲᓗᒨᓂ ᑯᕝᕕᕆᕚ. ᑕᕝᕙ ᑎᑦᑐᓚᐅᑎᑦ ᓂᓪᓕᕐᑎᑕᐅᕗᑦ; ᐃᓄᓕᒫᓪᓗ ᕾᒐᓛᓕᕐᐳᑦ, “ᐊᑯᓂ ᐃᓅᓕ ᐊᖓᔪᖅᑳᕐᔪᐊᖅ ᓲᓗᒨᓂ!” 40ᑕᒪᕐᒥᒃ ᑕᕝᕙ ᒪᓕᓕᕐᐹᑦ ᐅᑎᓕᕐᓗᑎᒃ, ᕾᒐᓛᕐᐳᑦ ᖁᕕᐊᓱᒡᓗᑎᒃ ᓱᐴᒊᑦ ᓂᓪᓕᐊᑎᑕᐅᕗᑦ, ᖁᕕᐊᓱᒃᐳᑦ ᐊᖏᔪᕐᔪᐊᒥᒃ ᖁᕕᐊᓱᒡᓗᑎᒃ, ᓂᐱᖃᓕᕐᒪᑦ ᐊᒡᓛᑦ ᓄᓇ ᓴᔪᒃᑎᑕᐅᕗᖅ.
41ᐊᑐᓁᔭᒃᑯᑦ ᕾᖁᓯᒪᔭᖏᓪᓗ ᐱᔭᕇᕐᐸᓪᓕᐊᓕᕐᑎᓪᓗᒋᑦ ᓂᕆᕕᒡᔪᐊᕐᕕᖕᒥᓂ, ᑐᓵᓕᕐᐳᑉ ᓂᐱᖏᓐᓂᒃ. ᔪᐊᐱ ᑎᑦᑐᓚᐅᑎᓂᒃ ᑐᓴᕋᒥ ᐅᖃᕐᐳᖅ, “ᓱᔪᖃᓕᕐᒪᑦ ᐃᒡᓗᒐᓴᖕᓂ ᐅᐃᒻᒪᖓᕙᓗᒃᑐᐊᓘᕙᑦ?” 42ᓱᓕ ᓂᓪᓕᐊᑎᓪᓗᒍ, ᔫᓇᑕᓂ ᑐᓂᕐᕈᓯᕐᑎᑦᓯᔨᐅᑉ ᐊᐰᐊᑕᐅᑉ ᐃᕐᓂᖓ ᑎᑭᑉᐳᖅ; ᐊᑐᓁᔭᐅᑉ ᐅᖃᐅᑎᕚ, “ᐃᑎᕆᑦ, ᐱᓪᓚᕆᐅᕗᑎᑦ ᑐᓴᕈᒥᓇᕐᑐᒥᒃ ᐅᖃᕆᐊᕐᑐᕋᕕᑦ.”
43ᔫᓇᑕᓂᐅᑉ ᐊᑐᓁᔭ ᑭᐅᕚ, “ᑍᒤᑦᑐᒥᒃ ᐅᖃᕆᐊᕐᑐᕈᑎᖃᓐᖏᓚᖓ, ᐊᑕᓂᑦᑕ ᐊᖓᔪᖅᑳᕐᔪᐊᑉ ᑍᕕᑎᐅᑉ, ᐊᖓᔪᖅᑳᕐᔪᐊᕈᕐᑎᒻᒪᒍ ᓲᓗᒨᓂ; 44ᑎᓕᓯᖕᒪᑦ ᔭᑑᒡᒥᒃ ᑐᓂᕐᕈᓯᕐᑎᑦᓯᔨᒥᒃ, ᓁᑕᓂᒥᒡᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓂᒃ, ᐱᓁᐊᒥᒡᓗ ᔨᕼᐅᐃᐊᑕᐅᑉ ᐃᕐᓂᖓᓂᒃ, ᓯᕆᐅᓪᓗ ᑭᖑᕚᖏᑦ ᐱᓕᐅᓪᓗ ᑭᖑᕚᖏᑦ ᐊᖓᔪᖅᑳᕐᔪᐊᓪᓗ ᓴᐳᓐᓂᐊᕐᑎᖏᓐᓂᒃ ᓯᕆᑍᑎᓂᒃ ᐱᓕᑍᑎᓂᒡᓗ; ᐃᑭᒪᑎᑦᓱᒍᓗ ᐊᖓᔪᖅᑳᕐᔪᐊᑉ ᓯᐅᑎᖅᑯᕐᑐᔪᖁᑎᖓᓂ, 45ᔭᑑᑭᐅᓪᓗ ᑐᓂᕐᕈᓯᕐᑎᑦᓯᔨᐅᑉ ᓁᑕᓂᐅᓪᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐅᕐᓱᕐᑎᕐᐹ ᐊᖓᔪᖅᑳᕐᔪᐊᓐᖑᕐᑎᓪᓗᒍ ᒋᕼᐅᓂᒥ; ᑕᕝᕙᓐᖓᑦ ᐃᒡᓗᒐᓴᖕᓄᑦ ᒪᔪᕋᓕᕐᐳᑦ ᖁᕕᐊᓱᒻᒪᕆᒡᓗᑎᒃ, ᐃᒡᓗᒐᓴᒡᔪᐊᕐᒥᐅᑦ ᐅᐃᒻᒪᒃᓯᒪᓕᕐᐳᑦ. ᑕᒪᓐᓇ ᑕᕝᕙ ᓂᐱᕐᔪᐊᖅ ᑐᓵᔭᓯ. 46ᓲᓗᒨᓂ ᒫᓐᓇ ᐃᒃᓯᕙᐅᑕᕐᔪᐊᕐᒥ ᐃᒃᓯᕚᓕᕐᐳᖅ. 47ᓱᓕᓗ, ᐊᖓᔪᖅᑳᕐᔪᐊᑉ ᐱᔨᖏᑦ ᐅᐱᒍᓱᒋᐊᕐᑐᕐᓯᒪᕗᑦ ᐊᑕᓂᕐᒥᒃ ᐊᖓᔪᖅᑳᕐᔪᐊᑦᑎᓐᓂᒃ ᑍᕕᑎᒥᒃ, ᐅᖃᕐᓗᑎᒃ, ‘ᒎᑎᕕᑦ ᓲᓗᒨᓂᐅᑉ ᐊᑎᖓ ᐃᓕᖕᓂᑦ ᖃᐅᔨᒪᔭᐅᓂᕐᓴᐅᑎᓪᓕᐅᒃ, ᐊᐅᓚᑦᓯᓂᖓᓗ ᐊᔪᖏᓐᓂᕐᓴᐅᑎᓪᓕᐅᒃ ᐊᐅᓚᑦᓯᓂᕆᓚᐅᕐᑕᕐᓂᑦ.’ ᐊᖓᔪᖅᑳᕐᔪᐊᕐᓗ ᐅᑯᕗᖅ ᐅᐱᒍᓱᒡᓗᓂ ᐃᒡᓕᕐᒥᓃᓪᓗᓂ. 48ᐊᖓᔪᖅᑲᕐᔪᐊᕐᓗ ᐅᖃᕐᕆᓪᓗᓂ, ‘ᐊᑕᓂᖅ ᓂᕐᑐᕐᑕᐅᓕ, ᐃᓴᕆᐊᓕᑎᑦ ᒎᑎᖓᑦ, ᐅᓪᓗᒥ ᕿᑐᕐᖓᒪ ᐃᓚᖓᓐᓂᒃ ᐃᖏᑎᑦᓯᖕᒪᑦ ᐃᒃᓯᕙᐅᑕᕐᔪᐊᓐᓂ, ᓇᖕᒥᓂᕐᓗ ᑕᑯᓪᓗᒍ.’”
49ᑕᕝᕙ ᐊᑐᓁᔭᐅᑉ ᕾᖁᓯᒪᔭᓕᒫᖏᑦ ᓴᔪᓕᕐᐳᑦ, ᒪᑭᓐᓇᒥᒃ ᐊᐅᓪᓚᕐᐳᑦ ᓇᒧᑐᐃᓐᓇᖅ ᐅᐸᒍᒪᔭᒥᖕᓄᑦ. 50ᐊᑐᓁᔭ, ᓯᕘᕋᔪᐊᓘᓕᕐᐳᖅ ᓲᓗᒨᓂᒥᒃ, ᑐᐱᕐᔪᐊᒧᐊᕐᓗᓂᓗ ᑐᓂᕐᕈᓯᕐᕕᐅᑉ ᑎᕆᖅᑯᖏᓐᓂᒃ ᑎᒍᒥᐊᓕᕐᐳᖅ. 51ᐊᖓᔪᖅᑳᕐᔪᐊᖅ ᓲᓗᒨᓂ ᐅᖃᐅᑎᔭᐅᕗᖅ, “ᑕᑯᒋᑦ, ᐊᑐᓁᔭ ᓯᕘᕋᕗᖅ ᓲᓗᒨᓂᒥᒃ; ᐂᓪᓗᓂᓗ ᑐᓂᕐᕈᓯᕐᕕᐅᑉ ᑎᕆᖅᑯᖏᓐᓂᒃ ᑎᒍᒥᐊᓕᕐᐳᖅ, ᐅᖃᕐᓗᓂᓗ, ‘ᐊᖓᔪᖅᑳᕐᔪᐊᖅ ᓲᓗᒨᓂ ᐊᖏᒻᒪᕆᖁᕙᕋ ᓴᕕᒡᔪᐊᕐᒧᑦ ᑐᖁᑕᐅᖁᓇᖓ.’”
52ᓲᓗᒨᓂ ᐅᖃᕐᐳᖅ, “ᐅᕙᓐᓂᒃ ᐅᐱᒍᓱᑦᓯᐊᕐᐸᑦ, ᐊᒡᓛᑦ ᓂᐊᖁᐊᓃᑦᑐᖅ ᓄᔭᖅ ᐊᑕᐅᓯᖅ ᐊᒃᑐᕐᑕᐅᓂᐊᓐᖏᓚᖅ; ᑭᓯᐊᓂ ᑍᒤᓐᖏᑐᐊᕐᐸᑦ ᑐᖁᑕᐅᓂᐊᕐᐳᖅ.” 53ᐊᖓᔪᖅᑳᕐᔪᐊᖅ ᓲᓗᒨᓂ ᑎᓕᓯᕗᖅ, ᐊᑐᓁᐊ ᑐᓂᕐᕈᓯᕐᕕᖕᒥᑦ ᕾᖁᔭᐅᖁᓪᓗᒍ. ᐊᑐᓁᐊᓗ ᑕᕝᕗᓐᖓᕋᒥ ᐅᑯᕗᖅ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᓵᖓᓄᑦ; ᐊᖓᔪᖅᑳᕐᔪᐊᓪᓗ ᐅᖃᐅᑎᕚ, “ᐊᖏᕐᕋᓕᕆᑦ.”
Currently Selected:
ᐊᑕᓃᑦ ᓯᕗᓪᓖᑦ 1: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
