ᑎᓴᓗᓁᑲᒥᐅᓄᑦ ᓯᕗᓪᓖᑦ 2
2
ᐸᐅᓗᓯᐅᑉ ᐱᓇᓱᐊᕐᓯᒪᓂᖓ ᑎᓴᓗᓁᑲᒥ
1ᐅᒃᐱᕐᑑᖃᑎᕗᑦ, ᐃᓕᑦᓯ ᓇᖕᒥᓂᖅ ᖃᐅᔨᒪᒋᕗᓯ ᐃᓕᑦᓯᓐᓄᑦ ᑎᑭᓐᓂᕆᓚᐅᕐᑕᕗᑦ ᑕᒪᐅᖕᒊᓐᓈᕐᓯᒪᖏᒻᒪᑦ; 2#ᐋᐴᓯᑕᓖᑦ 16:19-24; ᐋᐴᓯᑕᓖᑦ 17:1-9.ᖃᐅᔨᒪᕗᓯ ᐃᓕᑦᓯᓐᓄᐊᓚᐅᕐᓇᑕ ᓱᓕ ᐱᑦᓯᐊᕐᑕᐅᖏᓐᓂᕆᓚᐅᕐᑕᑦᑎᓐᓂᒃ ᒥᑕᐅᑎᒋᔭᐅᓚᐅᕐᓂᑦᑎᓐᓂᒡᓗ ᐱᓕᐰᒥ, ᑍᒤᒃᑲᓗᐊᕐᑎᓪᓗᒍᓕ, ᐊᑭᕋᕐᑐᕐᑕᐅᒻᒪᕆᒃᑲᓗᐊᕐᓗᑕ ᒎᑎᐅᑉ ᐱᔪᓐᓇᕐᑎᓚᐅᕐᐹᑎᒍᑦ ᐃᓕᑦᓯᓐᓂᒃ ᑐᓴᕐᑎᑦᓯᖁᓪᓗᑕ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᑖᑦᓱᒪᖓᑦ ᐱᔪᓂᒃ. 3ᐊᒃᓱᕈᕐᓗᑕ ᐱᓇᓱᐊᕐᓂᕆᔭᕗᑦ ᑕᒪᕐᑎᑦᓯᓇᓱᐊᕐᓂᕐᒥᒃ ᑐᓐᖓᕕᖃᓚᐅᖏᒻᒪᑦ ᓇᒻᒪᖏᑦᑐᒥᒃᓘᓐᓃᑦ, ᓯᓔᕐᕆᒃᓯᓇᓱᐊᕐᓂᕐᒥᒡᓘᓐᓃᑦ ᐃᓚᖃᓚᐅᓐᖏᓚᑦ. 4ᒎᑎᐅᓪᓕ ᐅᖃᕐᑕᐅᖁᔭᖏᓐᓂᒃ ᐅᖃᐅᓯᖃᖃᑦᑕᓚᐅᕐᐳᒍᑦ ᑖᑦᓱᒪ ᖃᐅᔨᓴᖅᑳᓚᐅᕐᒫᑎᒍᑦ, ᐱᑦᓯᐊᕈᓐᓇᕐᓂᑦᑎᓐᓄᓪᓗ ᑭᓯᐊᓂ ᑎᓕᓚᐅᕐᒪᑎᒍᑦ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᓪᓚᖁᓪᓗᑕ, ᐃᓄᖕᓄᑦ ᖁᕕᐊᒋᔭᐅᓇᓱᐊᕐᓗᑕ ᐱᓚᐅᓐᖏᓚᒍᑦ, ᒎᑎᒧᓪᓕ ᖁᕕᐊᒋᔭᐅᓇᓱᐊᓚᐅᕐᐳᒍᑦ, ᑖᓐᓇ ᐱᓂᐊᕐᓂᑦᑎᓐᓂᒃ ᖃᐅᔨᓴᕐᒪᑦ. 5ᐃᓕᑦᓯ ᖃᐅᔨᒪᑦᓯᐊᕐᐳᓯ ᓮᒻᒪᕐᓮᓐᖑᐊᑐᐃᓐᓇᕐᑐᓂᒃ ᐅᖃᐅᓯᖃᓚᐅᖏᓐᓇᑦᑕ, ᐱᖁᑎᓐᓂᐊᕈᒪᑐᐃᓐᓇᕐᓂᕐᒧᓪᓗ ᐅᖃᐅᓯᖃᓚᐅᖏᓐᓂᕗᒍᑦ, ᒎᑎᐅᑉ ᖃᐅᔨᒪᕚᑎᒍᑦ; 6ᓂᕐᑐᕐᑕᐅᓇᓱᐊᓚᐅᖏᓐᓂᕗᒍᑦ ᐃᓄᖕᓄᑦ, ᐃᓕᑦᓯᓐᓄᓪᓘᓐᓃᑦ, ᐊᓯᑦᓯᓐᓄᓪᓘᓐᓃᑦ, ᙭ᔅᑑᓯᒧᑦ ᐋᐴᓯᑕᓕᒋᔭᐅᒐᑦᑕ ᐃᓕᑦᓯᓐᓂᑦ ᕿᓄᔪᓐᓇᕋᔭᓚᐅᕋᓗᐊᕐᑐᒍᑦ, 7ᐃᓕᕋᓇᕐᓵᕋᑕᓕ ᐃᓕᑦᓯᓐᓃᓚᐅᕐᐳᒍᑦ, ᐊᓈᓇᐅᔪᑐᑦ ᕿᑐᕐᖓᓛᒥᓂᒃ ᐰᕆᒃᓯᔪᑎᑐᑦ. 8ᑍᒫᒃ ᐊᖏᑎᒋᔪᒥᒃ ᐃᓕᑦᓯᓐᓂᒃ ᓇᒡᓕᒍᓱᖕᓂᑦᑎᓐᓄᑦ, ᐱᓇᓱᐊᖃᑎᒋᔪᒪᓚᐅᕐᐸᑦᓯ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᑐᐃᓐᓇᐅᖏᑦᑐᖅ ᒎᑎᒥᓐᖔᕐᑐᓂᒃ, ᐃᓅᓯᑦᑎᓐᓂᒡᓕᑦᑕᐅᖅ ᐊᒡᓛᑦ, ᐊᒃᓱᒻᒪᕆᐊᓗᒃ ᐅᕙᑦᑎᓐᓄᑦ ᓇᒡᓕᖕᓇᕐᑑᒐᑦᓯ. 9ᐅᒃᐱᕐᑑᖃᑎᕗᑦ, ᐃᖅᑬᒐᓗᐊᕐᐳᓯ ᓇᓗᓇᓐᖏᓚᖅ ᐊᒃᓱᕈᕐᓗᑕ ᐱᓇᓱᐊᕐᓂᕆᓚᐅᕐᑕᑦᑎᓐᓂᒃ ᐅᖁᒤᒃᓴᕋᓗᐊᕐᓗᑕ, ᐱᓇᓱᐊᖃᑦᑕᓚᐅᕐᐳᒍᑦ ᐅᓪᓘᑎᓪᓗᒍ ᐅᓐᓄᐊᒥᓗ ᐃᓕᑦᓯᓐᓂᒃ ᐅᖁᒤᑎᑦᓯᔪᒪᓇᑕ, ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐱᓇᓱᐊᕐᑎᓪᓗᑕ ᒎᑎᒥᑦ ᐱᔪᓂᒃ.
10ᐃᓕᑦᓯ ᑕᕝᕙ ᖃᐅᔨᓯᒪᔪᖁᑎᒋᕙᑦᓯ ᐅᕙᑦᑎᓐᓂᒃ, ᒎᑎᓗᑦᑕᐅᖅ, ᐱᓇᓱᐊᕐᓂᕆᓚᐅᕐᑕᕗᑦ ᐅᒃᐱᕐᑐᓄᑦ ᐃᑦᔪᕐᓁᑦᑑᓚᐅᕐᐳᖅ, ᓈᒻᒪᑦᑎᐊᕐᓗᓂ ᐸᓯᔭᒃᓴᐅᓂᖃᕋᓂᓗ; 11ᖃᐅᔨᒪᕗᓯ ᐃᓕᑦᓯᓐᓄᑦ ᐊᑐᓂᑦ ᐱᓇᓱᐊᕐᓂᖃᓚᐅᕋᑦᑕ ᐊᑖᑕᐅᑉ ᕿᑐᕐᖓᒥᓂᒃ ᐱᓂᐊᕐᓂᕆᒐᔭᕐᑕᖓᑐᑦ, ᑲᔪᖏᕐᓮᓪᓗᑕ ᓮᒻᒪᕐᑎᑦᓯᓪᓗᑕᓗ ᐃᓕᑦᓯᓐᓂᒃ. 12ᐃᓅᓯᖃᖁᓪᓗᓯ ᒎᑎᐅᑉ ᓈᒻᒪᒋᔭᖓᓂᒃ, ᑖᑦᓱᒪ ᕾᖁᓚᐅᕐᒪᓯ ᐊᑕᓂᐅᕕᖕᒥᓄᑦ ᐱᓐᓇᕐᓇᕐᓂᕐᔪᐊᒥᓄᓪᓗ.
13ᒎᑎᒧᑦᑕᐅᖅ ᖁᔭᓕᖃᑦᑕᕐᐳᒍᑦ ᑕᒪᒃᑯᐊ ᐱᑦᔪᑎᒋᓪᓗᒋᑦ, ᒎᑎᐅᑉ ᐅᖃᐅᓯᖏᓐᓂᒃ ᐅᖃᐅᓯᖃᕐᑎᓪᓗᑕ, ᑐᓵᑦᓯᐊᕐᓗᓯ ᐃᓚᓕᐅᕐᓗᓯᐅᒡᓗ ᐱᓚᐅᕋᑦᓯ, ᐃᓄᖕᒥᑦ ᐱᓯᒪᔪᑎᑑᖏᑦᑐᖅ ᒎᑎᒥᓪᓕ ᐱᓯᒪᔪᑎᑐᑦ, ᐃᓛᒃ ᑕᒪᒃᑯᐊ ᒎᑎᒥᑦ ᐱᖕᒪᑕ, ᒎᑎᐅᑉ ᐅᖃᐅᓯᖓ ᐱᓇᓱᐊᕐᒪᑦ ᐃᓗᑦᓯᓐᓂ ᐅᒃᐱᕐᑐᓯ. 14#ᐋᐴᓯᑕᓖᑦ 17:5.ᐅᒃᐱᕐᑑᖃᑎᕗᑦ, ᑍᒫᓪᓗᐊᖅ ᐱᓂᐊᕐᓂᖃᓚᐅᕋᑦᓯ ᐱᓂᐊᕐᓂᕆᔭᐅᓚᐅᕐᑐᑎᑐᑦ ᒎᑎᐅᑉ ᐃᓚᒌᒃᑐᖁᑎᖏᓐᓂ ᔫᑎᐊᒥ ᔩᓱᓯ ᙭ᔅᑑᓯᒦᑦᑐᓂ; ᐃᓕᑦᓯᑦᑕᐅᖅ ᑍᒫᓪᓗᐊᖅ ᐅᖁᒤᒃᓴᕐᑎᑕᐅᒐᑦᓯ ᐊᑭᕋᕐᑐᕐᑕᐅᓂᕐᒧᑦ ᐃᓅᖃᑎᑦᓯᓐᓄᑦ ᐅᖁᒤᒃᓴᕐᑎᑕᐅᓂᕆᓚᐅᕐᑕᖏᑎᑐᑦ ᔫᑎᐅᖃᑎᒥᖕᓂᑦ, 15#ᐋᐴᓯᑕᓖᑦ 9:23,29; 13:45,50; 14:2,5,19; 17:5,13; 18:12.ᑍᒃᑯᐊ ᐊᑕᓂᖅ ᔩᓱᓯ ᑐᖁᓚᐅᕐᐹᑦ, ᓇᓚᐅᑦᑍᔪᓪᓗ, ᐅᕙᒍᓪᓗ ᐊᑭᕋᕐᑐᕐᓗᑕ ᐊᓂᑎᓚᐅᕐᐹᑎᒍᑦ, ᐊᖏᔪᒥᒃ ᑖᒃᑯᐊ ᒎᑎᐅᑉ ᖁᕕᐊᒋᓐᖏᑕᖓᓂᒃ ᐱᓇᓱᐊᓚᐅᕐᐳᑦ ᐃᓄᖕᓄᓪᓗ ᑕᒤᓐᓄᑦ ᐊᑭᕋᕐᑐᕐᓗᑎᒃ 16ᐊᒡᓛᑦ ᔫᑎᐅᖏᑦᑐᓄᑦ ᐅᖃᓪᓚᖃᑦᑕᖁᔨᓇᑎᒃ ᓄᖅᑲᕐᑎᑦᓯᓇᓱᐊᓚᐅᕐᐳᑦ ᐅᕙᑦᑎᓐᓂᒃ, ᐅᖃᐅᓯᕐᓂᒃ ᐱᐅᓕᔭᐅᑦᔪᑎᒃᓴᖏᓐᓂᒃ; ᑍᒤᓕᐅᕐᓗᑎᒃ ᐊᔪᕐᑐᓕᒃᑲᓐᓂᓚᐅᕐᐳᑦ ᐊᖏᓂᕐᓴᒋᐊᓪᓚᖕᒥᒃ. ᒫᓐᓇᓗ ᒎᑎᐅᑉ ᓂᓐᖓᐅᓯᖓᑕ ᑎᑭᕝᕕᒋᓯᒪᓕᕐᐰᑦ!
ᐸᐅᓗᓯᐅᑉ ᓂᐅᕐᕈᒃᑲᓐᓂᕈᒪᓂᖓ ᑎᓴᓗᓁᑲᒧᑦ
17ᐅᕙᒍᓪᓕ ᐅᒃᐱᕐᑑᖃᑎᕗᑦ, ᐊᑯᓂᐅᖏᑦᑐᖅ ᐃᓕᑦᓯᓐᓂᑦ ᐊᕕᓚᐅᕐᐳᒍᑦ ᑎᒥᑦᑎᒍᑐᐃᓐᓇᖅ ᐆᒻᒪᑎᑦᑎᒎᖏᑦᑐᕐᓕ, ᐊᖏᔪᒥᒃ ᐃᓕᑦᓯᓐᓂᒃ ᑕᑯᔪᒪᓕᕋᑦᑕ, ᑲᑦᓱᖎᓪᓗᑕ ᐃᓕᑦᓯᓐᓂᒃ ᑕᑯᒃᑲᓐᓂᕈᒪᓚᐅᕐᐳᒍᑦ; 18ᐃᓕᑦᓯᓐᓄᑦ ᐅᑎᒃᑲᓐᓂᕈᒪᒐᑦᑕ, ᐅᕙᖓᓕ ᐸᐅᓗᓯ ᓇᖕᒥᓂᖅ ᐊᑕᐅᓯᐊᕐᓇᖓ ᐆᒃᑐᕆᐊᖃᑦᑕᓚᐅᕐᐳᖓ, ᓵᑖᓇᓯᐅᓪᓕ ᐊᒡᕕᐊᖃᑦᑕᓚᐅᕐᐹᑎᒍᑦ. 19ᐃᓛᒃ ᐃᓕᑦᓯᐅᒐᑦᓯ ᐊᓯᑦᓯᓐᓂᒃ ᓂᕆᐅᒡᕕᒃᓴᖃᓐᖏᓚᒍᑦ ᐃᓗᑦᑎᒍᓪᓗ ᖁᕕᐊᓲᑎᒋᕙᑦᓯ ᐃᓕᑦᓯᓗ ᓂᕐᑐᕐᓇᐅᑎᒃᓴᒥᒃ ᐱᒃᓴᖃᐅᑎᒋᕙᑦᓯ, ᓵᓚᖃᕐᓂᑦᑎᓐᓂᒡᓗ ᐊᑕᓂᑦᑕ ᔩᓱᓯᐅᑉ ᑎᑭᕝᕕᒃᓴᖓᓂ. 20ᐃᓕᑦᓯᓐᓂ ᐅᐱᒍᓲᑎᖃᒻᒪᕆᒃᐳᒍᑦ ᖁᕕᐊᒋᔭᖃᕐᓗᑕᓗ.
Currently Selected:
ᑎᓴᓗᓁᑲᒥᐅᓄᑦ ᓯᕗᓪᓖᑦ 2: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
