ᓴᒧᐃᓕ ᓯᕗᓪᓖᑦ 9
9
ᓴᐅᓕᐅᑉ ᑲᑎᓯᓂᖓ ᓴᒧᐃᓕᒥᒃ
1ᐊᔪᕐᓴᖏᑦᑐᕐᑕᖃᓚᐅᕐᐳᖅ ᒪᓕᒃᑕᐅᔪᓐᓇᕐᓗᓂᓗ ᐊᖑᒻᒥᒃ ᐊᑎᓕᖕᒥᒃ ᑭᔅᒥᒃ, ᐃᓅᖃᑎᒌᓂᑦ ᐱᓐᔭᒥᓂᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ; ᑖᓐᓇ ᑭᔅ ᐊᐰᓕᐅᑉ ᐃᕐᓂᖓ, ᑖᓐᓇ ᐊᐰᓕ ᔨᕈᕆᐅᑉ ᐃᕐᓂᖓ, ᑖᓐᓇ ᔨᕈᕆ ᐱᑯᕋᑦ ᐃᕐᓂᖓ, ᑖᓐᓇ ᐱᑯᕋᑦ ᐊᐱᐊᑉ ᐃᕐᓂᖓ. 2ᑭᔅ ᐃᕐᓂᖃᓚᐅᕐᐳᖅ ᓴᐅᓕᒥᒃ ᐊᑎᓕᖕᒥᒃ, ᑕᑯᒥᓇᕐᑑᓪᓗᓂ ᐊᖑᒻᒥᒃ ᐃᓅᓱᒃᑐᒥᒃ. ᓴᐅᓕᐅᑉ ᑕᑯᒥᓇᕐᑑᓂᖓ ᐃᓴᕆᐊᓕᒥᐅᓕᒫᓂᑦ ᑕᑯᒥᓇᕐᓂᕐᓴᕐᑕᖃᓚᐅᓐᖏᓚᖅ; ᓴᐅᓕᓗ ᐃᓴᕆᐊᓕᒥᐅᖑᖃᑎᒥᓂᑦ ᐊᖏᓂᕐᓴᐅᓚᐅᕐᐳᖅ ᐃᑎᒐᓪᓗᐊᒥᒃ.
3ᑍᑦᓱᒪᓂ ᑮᔅ ᓯᐅᑎᖅᑯᕐᑐᔪᖁᑎᖏᑕ ᐃᓚᖏᑦ ᐊᓯᐅᓚᐅᕐᐳᑦ. ᑍᒤᒻᒪᑦ ᑭᔅ ᐃᕐᓂᒥᓄᑦ ᓴᐅᓕᒧᑦ ᐅᖃᕐᐳᖅ, “ᐱᔨᕕᑦ ᐃᓚᖓᓂᒃ ᐂᑉᐸᖃᕐᓗᑎᑦ ᕿᓂᕆᐊᓚᐅᕆᑦ ᓯᐅᑎᖅᑯᕐᑐᔪᖁᑎᑦᑎᓐᓂᒃ.” 4ᑕᕝᕙ ᖃᖅᑲᑎᒎᓚᐅᕐᐳᑦ ᐃᕗᕅᒥᐅᑉ ᓄᓇᖓᒍᑦ ᓵᓕᓴᐅᓪᓗ ᓄᓇᖓᒍᑦ, ᑭᓯᐊᓂᓕ ᓇᓂᓯᓚᐅᓐᖏᓚᑦ. ᑲᔪᓯᓚᐅᕐᐳᑦ ᓵᓕᒻ ᓄᓇᖓᒍᑦ, ᑭᓯᐊᓂᓕ ᑕᕝᕙᓃᓚᐅᓐᖏᓐᓂᕗᑦ. ᐱᓐᔭᒥᓂᐅᓪᓗ ᓄᓇᖓᒎᓚᐅᕆᕗᑦ, ᑭᓯᐊᓂᓕ ᓇᓂᓯᖕᒥᓇᑎᒃ. 5ᔪᐸᓗ ᓄᓇᖓᓄᐊᕋᒥᒃ, ᓴᐅᓕ ᐅᖃᕐᐳᖅ ᐱᔨᒥᓄᑦ, “ᐅᑎᓕᕐᑕ ᐊᖏᕐᕋᒧᑦ, ᐊᑖᑕᒐ ᓯᐅᑎᖁᕐᑐᔪᓂᒃ ᐃᓱᒪᔪᓐᓃᕐᓗᓂ ᐅᕙᑦᑎᓐᓂᒃ ᐱᖏᒐᓕᑐᐃᓐᓇᕆᐊᖃᕐᒪᑦ.”
6ᐱᔨᖓ ᑭᐅᕗᖅ, “ᑕᑯᒋᑦ, ᑕᕝᕙᓂ ᐃᒡᓗᒐᓴᖕᓂ ᐊᖑᒻᒥᒃ ᒎᑎ ᐃᓄᖁᑎᖃᕐᐳᖅ, ᐃᒃᐱᒋᔭᐅᑦᓯᐊᕐᑐᒥᒃ; ᐅᖃᕐᑕᕕᓂᓕᒫᖏᓪᓗ ᓇᓪᓕᐅᑦᓯᕙᒃᓗᑎᒃ. ᑍᑯᓐᖓᓚᐅᕐᑕ; ᐃᒻᒪᖄ ᐅᖃᐅᑎᔪᓐᓇᕐᐹᑎᒍᑦ ᓇᒧᓐᖓᕐᑐᒃᓴᐅᓂᑦᑎᓐᓂᒃ.”
7ᓴᐅᓕᓕ ᑭᐅᕗᖅ, “ᑕᑯᒋᑦ ᑖᑦᓱᒧᖓᓕ ᐂᒍᑦᑕ ᓱᓇᒦᒃ ᐂᑦᑑᑎᒃᓴᖃᕐᐱᑖ? ᓂᕿᖃᕈᓐᓃᕋᑦᑕ, ᐱᖁᑎᖃᕐᓇᑕᓗ ᓱᓇᒥᒡᓕ ᒎᑎᐅᑉ ᐃᓄᖁᑎᖓᓄᑦ ᑐᓂᓯᔪᓐᓇᕋᔭᕐᐱᑖ?”
8ᐱᔨᖓ ᑭᐅᒃᑲᓐᓂᕐᐳᖅ ᓴᐅᓕᒧᑦ, “ᑕᑯᒋᑦ, ᐊᑕᐅᓯᕐᒥᒃ ᒥᑭᔪᒥᒃ ᓯᐅᓪᕕᕆᖃᕐᑐᖓ ᑐᓂᔪᓐᓇᕐᐸᕋ ᑖᑦᓱᒥᖓ ᒎᑎᐅᑉ ᐃᓄᖁᑎᖓ, ᐅᖃᐅᑎᔪᓐᓇᕐᐹᑎᒍᑦ ᓇᒧᑦ ᐂᔪᒃᓴᐅᖕᒪᖔᑦᑕ.”
9(ᑍᑦᓱᒪᓂ ᐃᓴᕆᐊᓕᒥ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑦ ᑍᔭᐅᕙᓚᐅᕐᐳᑦ ᓇᓚᐅᑦᑍᔨᒥᒃ, ᓇᓪᓕᐊᑐᐃᓐᓇᖅ ᒎᑎᒧᑦ ᐊᐱᖅᑯᑎᒃᓴᖃᕈᓂ, ᐅᖃᕐᐸᓚᐅᕐᐳᑦ, “ᓇᓚᐅᑦᑍᔨᒧᑦ ᐂᓚᐅᕐᑕ.”) 10ᓴᐅᓕᓗ ᑭᐅᕗᖅ, “ᐅᖃᑦᓯᐊᕐᐳᑎᑦ! ᐊᑏ ᐂᓕᕐᑕ.” ᑕᕝᕙ ᐃᒡᓗᒐᓴᖕᓄᐊᕐᐳᑦ ᒎᑎᐅᑉ ᐃᓄᖁᑎᖓᑕ ᓄᓇᖓᓄᑦ. 11ᒪᔪᕋᓕᕐᑎᓪᓗᒋᒃ ᐃᒡᓗᒐᓴᖕᓄᑦ, ᑲᑎᓯᕗᑦ ᐊᕐᓇᓂᒃ ᐃᒥᕐᑕᕐᑐᓂᒃ ᑖᒃᑯᐊᓗ ᐊᐱᕆᕔᑦ, “ᓇᓚᐅᑦᑍᔨ ᑕᒫᓃᑉᐹ?”
12ᑭᐅᕚᑦ, “ᐄ, ᑕᑯᒋᑦ ᐊᒡᓛᑦ ᓯᕗᓂᑦᑎᐊᑦᓯᓐᓃᑉᐳᖅ, ᑐᐊᕕᕈᑦᓯᒃ ᐊᖑᔪᓐᓇᕐᐸᓯᒃ; ᐃᒡᓗᒐᓴᖕᓄᐊᓕᓵᕐᒪᑦ ᐅᓪᓗᒥ ᑎᑭᖅᑲᐅᖕᒪᑦ, ᐃᓄᐃᑦ ᑐᓂᕐᕈᓯᖅᑲᐅᖕᒪᑕ ᐱᓪᓚᕆᐅᓂᕐᐹᒥ ᑐᓂᕐᕈᓯᕐᕕᖕᒥ. 13ᐃᒡᓗᒐᓴᖕᓄᐊᑐᐊᕈᑦᓯ, ᑕᑯᓂᐊᕐᐸᓯ ᖃᖅᑲᒧᐊᓚᐅᕐᑎᓐᓇᒍ ᐱᓪᓚᕆᐅᓂᕐᐹᒧᑦ ᓂᕆᔭᕐᑐᕐᓗᓂ; ᐃᓄᐃᑦ ᕾᖁᔭᐅᓯᒪᔪᑦ ᓂᕆᑦᔮᖏᑦᑐᑦ ᑖᓐᓇ ᕾᓚᐅᖏᓐᓂᖓᓂ, ᑖᑦᓱᒪ ᓮᒻᒪᕐᑎᑦᓴᕆᐊᖃᕐᒪᒋᑦ ᑐᓂᕐᕈᑏᑦ; ᑭᖑᓂᖓᒍᑦ ᕾᖁᔭᐅᓯᒪᔪᑦ ᓂᕆᓕᕐᓂᐊᕐᐳᑦ. ᒫᓐᓇ ᐂᒍᑦᓯᒃ, ᐊᖑᓂᐊᕐᐸᓯᒃ ᑕᑉᐸᐅᓐᖓᑐᐊᕈᑦᓯᒃ.” 14ᑍᒤᒻᒪᑦ ᑲᔪᓯᓚᐅᕐᐳᑦ ᐃᒡᓗᒐᓴᖕᓄᑦ, ᐃᑎᓕᕐᑎᓪᓗᒋᓪᓗ ᐃᒡᓗᒐᓴᖕᓄᑦ, ᑕᑯᕗᑦ ᓴᒧᐃᓕᒥᒃ ᐊᓂᓕᕐᑐᒥᒃ ᐂᓕᕐᓗᓂ ᒥᒃᓯᒧᑦ ᑐᒃᓯᐊᕆᐊᕐᑐᕐᕕᒋᓂᐊᕐᑕᒥᓄᑦ ᖁᑦᓯᖕᓂᕐᐹᒨᕐᐸᓪᓕᐊᓕᕐᑐᖅ.
15ᐃᑉᐸᒃᓴᖓᓂᐅᑎᓪᓗᒍ ᓴᐅᓕ ᓱᓕ ᑎᑭᓚᐅᕐᑎᓐᓇᒍ, ᐊᑕᓂᐅᑉ ᓴᒧᐃᓕ ᖃᐅᔨᑎᓚᐅᕐᐹ ᐃᒫᒃ: 16“ᖃᐅᒃᐸᑦ ᑍᒤᓪᓗᐊᓕᕐᑎᓪᓗᒍ ᑎᓕᓯᕕᒋᔪᒫᕐᐸᒋᑦ ᐊᖑᒻᒥᒃ ᐱᓐᔭᒥᓂᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ; ᑖᓐᓇ ᐅᕐᓱᕐᑎᕈᒫᕐᐸᑦ ᐊᖓᔪᖅᑳᕐᔪᐊᓐᖑᖁᓪᓗᒍ ᐃᓄᖁᑎᓐᓄᑦ ᐃᓴᕆᐊᓕᒥᐅᓄᑦ. ᑖᑦᓱᒪ ᐃᓄᖁᑎᒃᑲ ᐱᐅᓕᔪᒫᕐᐰᑦ ᐱᓕᔅᑍᓂᒥᐅᓂᑦ; ᐃᓄᖁᑎᒪ ᐅᖁᒤᑦᑐᒦᓐᓂᖏᑦ ᑕᑯᓯᒪᓕᕋᒃᑭᑦ, ᓂᓪᓕᐊᓂᖏᑦ ᐅᕙᓐᓄᑦ ᑎᑭᓯᒪᓕᕐᒪᑕ.” 17ᓴᒧᐃᓕᐅᑉ ᓴᐅᓕ ᑕᑯᖕᒪᒍ, ᐊᑕᓂᐅᑉ ᐅᖃᐅᑎᕚ, “ᑖᓐᓇ ᑕᕝᕙ ᐊᖑᑦ ᐅᖃᐅᑎᒋᓚᐅᕐᑕᕋ ᐃᓕᖕᓄᑦ! ᑖᓐᓇ ᐊᐅᓚᑦᓯᔪᒫᕐᐳᖅ ᐃᓄᖁᑎᓐᓂᒃ.” 18ᓴᐅᓕᓗ ᐂᓕᕐᐳᖅ ᓴᒧᐃᓕᒧᑦ ᐃᑎᕐᑕᕐᕕᖕᒥ, ᐅᖃᐅᑎᓪᓗᒍᓗ, “ᐅᖃᐅᑎᓚᐅᓐᖓ ᓇᓚᐅᑦᑍᔨᐅᑉ ᐃᒡᓗᖓ ᓇᓃᑉᐹ?”
19ᓴᒧᐃᓕᐅᑉ ᓴᐅᓕ ᑭᐅᕚ, “ᐅᕙᖓ ᓇᓚᐅᑦᑍᔨᐅᕗᖓ; ᐅᕙᓐᓂᑦ ᓯᕗᓪᓕᐅᓗᑎᑦ ᐂᓚᐅᕆᑦ ᖁᑦᓯᖕᓂᕐᐹᒧᑦ ᐅᓪᓗᒥ ᓂᕆᖃᑎᒋᔭᕆᐊᖃᕐᐸᒋᑦ, ᖃᐅᒃᐸᑦ ᐅᓪᓛᒃᑯᑦ ᐊᐅᓪᓚᕐᑎᑦᓱᒫᕐᐸᒋᑦ ᐅᖃᐅᑎᓗᑎᓪᓗ ᐃᓱᒪᒥᐅᑕᓕᒫᕐᓂᒃ. 20ᑍᒃᑯᐊᓗ ᓯᐅᑎᖅᑯᕐᑐᔪᖁᑎᑎᑦ ᐊᓯᐅᓚᐅᕐᑐᑦ ᐅᓪᓗᐃᑦ ᐱᖓᓱᑦ ᓯᕗᓂᖓᒍᑦ, ᐃᓱᒫᓘᑎᒋᑦᑍᓕᒃᑭᑦ, ᓇᓂᔭᐅᓯᒪᓕᕐᒪᑕ. ᑭᓇᒥᒡᓕ ᐃᓴᕆᐊᓕᒥᐅᑦ ᐃᓄᖏᑦ ᐱᔪᒪᕙ? ᐃᓕᖕᓂᒃ ᐊᑖᑕᕕᓪᓗ ᐃᓚᖏᓐᓃᒃ ᐱᔪᒪᓐᖏᓛᑦ?”
21ᓴᐅᓕᐅᑉ ᑭᐅᕚ, “ᐱᓐᔭᒥᓂᐅᑉ ᑭᖑᕚᖏᓐᓄᑦ ᐃᓚᒋᔭᐅᓐᖏᓚᖔ, ᐃᓴᕆᐊᓕᒥᐅᑦ ᑭᖑᕚᖏᓐᓂᑦ ᒥᑭᓐᓂᕐᐸᐅᕗᑦ ᐃᓚᒃᑲᓗ ᒥᑭᓐᓂᕐᐸᐅᖏᓛᑦ ᐱᓐᔭᒥᓂᐅᑉ ᑭᖑᕚᕇᖏᓐᓂᑦ? ᖃᓄᐃᒻᒪᑦ ᑍᒫᒃ ᐅᕙᓐᓄᑦ ᐅᖃᕐᐲᑦ?”
22ᓴᒧᐃᓕᐅᑉ ᓴᐅᓕ ᐱᔨᖓᓗ ᐂᑎᑉᐰᑦ ᐃᒡᓗᕈᓯᕐᒧᑦ ᓂᕈᑐᔪᒧᑦ ᐃᓂᑖᕐᑎᓪᓗᒋᒡᓗ ᐅᐱᓐᓇᕐᑐᒧᑦ ᓂᕐᕆᕕᖕᒥ ᕾᖁᔭᐅᓯᒪᔪᑦ ᐃᓂᖏᓐᓂ, ᕾᖁᔭᐅᓯᒪᔪᑦ 30ᒦᒐᓚᒃᑎᓪᓗᒋᑦ. 23ᓴᒧᐃᓕᐅᑉ ᓂᕿᓕᐅᕐᑎ ᐅᖃᐅᑎᕚ, “ᕾᓚᐅᕈᒃ ᓂᕿᐅᑉ ᐃᓚᖓ ᐃᓕᖕᓄᐊᓚᐅᕐᑕᕋ, ᐅᖃᐅᑎᒋᓚᐅᕐᑕᕋ, ‘ᐅᓇ ᓴᓂᕐᕙᒃᓯᒪᒍᒃ.’” 24ᑕᕝᕙ ᓂᕿᓕᐅᕐᑎᐅᑉ ᑎᒍᓪᓗᒍ ᓂᐅ ᒥᒥᖓᓗ ᐃᓕᕚ ᓴᐅᓕᐅᑉ ᓵᖓᓄᑦ; ᓴᒧᐃᓕᓗ ᐅᖃᕐᐳᖅ, “ᑕᑯᒋᑦ, ᐅᓇ ᐃᓕᖕᓄᑦ ᖁᒥᐅᑎᒋᓚᐅᕐᑕᕗᑦ. ᓂᕆᓕᕈᒃ; ᐅᓇ ᐃᓕᖕᓄᑦ ᖁᒥᐅᑎᒋᓚᐅᕐᐸᕋ ᓂᕆᔭᐅᖁᓪᓗᒍ ᑕᒪᑐᒪᓂ ᓇᓪᓕᐅᑦᑐᒥ, ᐃᓄᐃᑦ ᕾᖁᓚᐅᕐᑕᒃᑲ ᐃᓚᒋᓗᒋᑦ.”
ᑕᕝᕙ ᓴᐅᓕᐅᑉ ᓴᒧᐃᓕ ᓂᕆᖃᑎᒋᓚᐅᕐᐹ ᐅᓪᓗᒥ ᑕᕝᕙᓂ. 25ᐊᑎᕋᒥᒡᓗ ᑐᒃᓯᐊᕐᕕᒋᔭᒥᖕᓂᑦ ᐃᒡᓗᒐᓴᖕᓄᑦ ᐂᕗᑦ, ᐃᒡᓕᕐᓗ ᐃᓂᓪᓚᒃᓴᕐᓯᒪᓚᐅᕐᐳᖅ ᓴᐅᓕᐅᑉ ᐃᓂᒋᓂᐊᕐᑕᖓ ᐃᒡᓘᑉ ᖁᓛᖓᓂ, ᑕᕝᕙᓂᓗ ᓴᐅᓕ ᓇᓪᓚᓚᐅᕐᐳᖅ ᓯᓂᒐᓱᓕᕐᓗᓂ. 26ᐅᓪᓛᒻᒪᕆᒃᑯᑦ ᖃᐅᒻᒪᓕᕐᑎᓪᓗᒍ ᓴᒧᐃᓕᐅᑉ ᓴᐅᓕ ᐅᐸᒃᐹ ᐃᒡᓘᑉ ᖄᖓᓄᑦ, ᐅᖃᐅᑎᓪᓗᒍᓗ, “ᒪᑭᓕᕆᑦ, ᐊᐅᓪᓚᕐᑎᓐᓂᐊᓕᕋᒃᑭᑦ.” ᑕᕝᕙ ᓴᐅᓕ ᒪᑭᑉᐳᖅ, ᓴᒧᐃᓕᒃᑯᒡᓗ ᐊᓂᕘᒃ ᐊᑕᐅᑦᓯᒃᑯᑦ ᐊᖅᑯᑎᒧᐊᕐᓗᑎᒃ. 27ᐃᒡᓗᒐᓮᓪᓗ ᑭᒡᓕᖓᓄᑦ ᑎᑭᓐᓇᒥᒃ, ᓴᒧᐃᓕᐅᑉ ᓴᐅᓕ ᐅᖃᐅᑎᕚ, “ᐱᔩᑦ ᐅᖃᐅᑎᓚᐅᕈᒃ ᑲᔪᓯᖁᓗᒍ ᐅᕙᑦᑎᓐᓂᒃ ᓯᕗᓪᓕᐅᓂᐊᕐᒪᑦ.” ᑕᕝᕙ ᐱᔨᖓ ᐊᓂᒎᑎᓕᕐᒪᑦ ᓴᐅᓕ ᐅᖃᐅᑎᕚ “ᑕᒫᓂ ᓄᖅᑲᖓᑬᓐᓇᕆᑦ, ᐅᖃᐅᑎᓂᐊᕋᒃᑭᑦ ᒎᑎᐅᑉ ᐅᖃᐅᓯᐅᖁᔭᖓᓂᒃ.”
Currently Selected:
ᓴᒧᐃᓕ ᓯᕗᓪᓖᑦ 9: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
