ᓴᒧᐃᓕ ᓯᕗᓪᓖᑦ 8
8
ᐃᓄᐃᑦ ᐊᖓᔪᖅᑳᕐᔪᐊᕐᑖᕈᒪᓂᖓᑦ
1ᓴᒧᐃᓕ ᐃᑦᑑᓕᕐᓗᓂ, ᐃᕐᓂᓂ ᑎᓕᕔᑦ ᐃᓱᒪᓕᐅᕐᑎᐅᖁᓪᓗᒋᑦ ᐃᓴᕆᐊᓕᒥᐅᓄᑦ. 2ᐃᕐᓂᖓ ᐊᖓᔪᒃᓯᕐᐹᖅ ᐊᑎᖃᕐᐳᖅ ᔪᐃᓕᒥᒃ, ᓄᑲᖓᓗ ᐊᐰᔭᒥᒃ; ᑖᒃᑯᐊᒃ ᐃᓱᒪᓕᐅᕐᑎᐅᓚᐅᕐᐴᒃ ᐱᐊᕐᓯᐸᒥ. 3ᐃᕐᓂᖏᒡᓕ ᐃᓅᓚᐅᓐᖏᓛᒃ ᑖᑦᓱᑐᓇᖅ; ᓴᖑᓚᐅᕐᐴᒡᓕ ᑮᓇᐅᔭᓕᐅᕈᒪᓂᕐᒧᑦ ᐱᓕᕆᓕᕐᓗᑎᒃ; ᓯᓔᕐᕆᒃᓯᓪᓗᑎᒃ ᐱᓇᓱᐊᖃᑦᑕᓚᐅᕐᒪᑎᒃ ᓱᓕᖏᑦᑐᒥᒃ ᐱᓂᐊᕐᓂᖃᓕᕐᓗᑎᒃ.
4ᑕᕝᕙ ᐃᓴᕆᐊᓕᒥᐅᑦ ᐊᖓᔪᖅᑳᓕᒫᖏᑦ ᑲᑎᓪᓗᑎᒃ ᓴᒧᐃᓕᒧᐊᕐᐳᑦ ᕌᒪᒦᑦᑐᒧᑦ, 5#ᒨᓯᓯ ᑕᓪᓕᒪᖏᑦ 17:14.ᐅᖃᐅᑎᓪᓗᒍᓗ, “ᑕᑯᓚᐅᕆᑦ, ᐃᑦᑑᓕᕐᑐᑎᑦ ᐃᕐᓃᒃᑭᒡᓕ ᐃᓕᖕᓂᒃ ᒪᓕᓐᖏᓛᒃ; ᑍᒤᒻᒪᑦ ᑎᓕᓯᓚᐅᕆᑦ ᐊᖓᔪᖅᑳᕐᔪᐊᕐᒥᒃ ᐊᐅᓚᑦᓯᓂᐊᕐᑐᒥᒃ ᐅᕙᑦᑎᓐᓂᒃ ᐃᓅᖃᑎᒌᒡᔪᐊᑎᑐᑦ ᑍᒤᓐᓂᐊᕋᑦᑕ.” 6ᓴᒧᐃᓕᓕ ᑕᒪᑐᒥᖓ ᖁᕕᐊᓲᑎᖃᓚᐅᓐᖏᓚᖅ ᐊᖓᔪᖅᑳᕐᔪᐊᕐᑖᕈᒪᑎᓪᓗᒋᑦ; ᑍᒤᒻᒪ ᓴᒧᐃᓕ ᐊᑕᓂᕐᒧᑦ ᑐᒃᓯᐊᓚᐅᕐᐳᖅ. 7ᐊᑕᓂᕐᓗ ᐅᖃᕐᐳᖅ ᓴᒧᐃᓕᒧᑦ, “ᒪᓕᒃᑭᑦ ᐃᓄᐃᑦ ᐅᖃᐅᓯᕆᔭᖏᑦ ᐃᓕᖕᓄᑦ; ᐃᓕᖕᓂᒃ ᓇᕐᕈᓕᖏᒻᒪᑕ; ᐅᕙᓐᓂᒡᓕ ᓇᕐᕈᓕᕐᐳᑦ ᐊᖓᔪᖅᑳᕐᔪᐊᒥᖕᓂᒃ. 8ᑍᒪᓐᖓᓂᑦ ᐄᑦᔨᑉᑎᒥᑦ ᐊᐅᓪᓚᕈᑎᓚᐅᕋᒃᑭᑦ, ᐅᓪᓗᒥᒧᑦ ᑎᑭᓪᓗᒍ, ᐅᕙᓐᓂᒃ ᕿᒤᓚᐅᕐᐳᑦ ᑐᒃᓯᐊᓕᕐᓗᑎᒡᓗ ᒎᑎᓐᖑᐊᓄᑦ, ᐃᓕᖕᓄᓪᓗ ᑍᒤᓕᐅᓕᕆᕗᑦ. 9ᒫᓐᓇᓕ, ᑍᒤᒻᒪᑦ ᐅᖃᐅᓯᕆᔭᖏᑦ ᒪᓕᓕᒃᑭᑦ; ᑭᓯᐊᓂ ᓯᕘᕋᒋᔭᒃᓴᖏᓐᓂᒃ ᐃᓂᕐᑎᒻᒪᕆᖕᓂᐊᕐᐸᑎᑦ, ᐅᖃᐅᑎᑦᓯᐊᕐᓗᒋᓪᓗ ᐊᖓᔪᖅᑳᕐᔪᐊᑉ ᐱᐅᓯᕆᔭᕆᐊᖃᓛᕐᑕᖓᓂᒃ ᐊᐅᓚᑦᓯᓕᕈᓂ ᑖᒃᑯᓂᖓ.”
10ᓴᒧᐃᓕᐅᑉ ᐃᓄᐃᑦ ᐊᖓᔪᖅᑳᕐᔪᐊᕐᑖᕈᒪᔪᑦ ᐅᖃᐅᑎᓚᐅᕐᐰᑦ ᐊᑕᓂᐅᑉ ᐅᖃᐅᓯᕆᔭᓕᒫᖏᓐᓂᒃ ᑖᒃᑯᓄᖓ. 11ᓴᒧᐃᓕᐅᑉ ᐅᖃᐅᑎᕔᑦ, “ᐊᖓᔪᖅᑳᕐᔪᐊᑦᓯ ᐊᐅᓚᑦᓯᓕᕈᓂ ᐃᒫᒃ ᐱᐅᓯᖃᕐᕕᒋᔪᒫᕐᐹᓯ: ᐃᕐᓂᓯ ᐅᓇᑕᕐᑐᒃᓴᓐᖑᕐᑎᑦᓱᒫᕐᐰᑦ ᐃᓚᖏᓪᓗ ᐅᓇᑕᕐᑎᒋᓗᓂᒋᑦ ᕿᒧᒃᓯᐅᑎᓄᑦ ᐊᒃᓴᓗᐊᓕᖕᓄᑦ, ᐃᓚᖏᓪᓗ ᕿᒻᒥᕐᔪᐊᒃᑯᑦ ᐅᓇᑕᕐᑎᒋᓗᓂᒋᑦ, ᐃᓚᖏᓪᓗ ᐅᓪᓚᒃᑎᐅᓗᑎᒃ ᕿᒧᒃᓯᐅᑏᑦ ᐊᒃᓴᓗᐊᓖᑦ ᓯᕗᕌᓂ; 12ᐃᓚᖏᓪᓗ ᐊᖓᔪᖅᑲᐅᑎᑦᓱᒫᕐᐰᑦ ᐊᐅᓚᑦᓯᔨᐅᓗᑎᒃ 1,000ᓄᑦ, ᐃᓚᖏᓪᓗ 50ᓄᑦ, ᐃᓚᖏᓪᓗ ᐱᕈᕐᓰᕕᓕᕆᔨᖁᑎᒋᔪᒫᕐᐰᑦ, ᐃᓚᖏᓪᓗ ᐱᕈᕐᑐᓂᒡᓗ ᓄᐊᑦᓯᔨᒋᓗᓂᒋᑦ, ᐃᓚᖏᓪᓗ ᓴᓇᔨᒋᔪᒫᕐᐰᑦ ᐅᓇᑕᐅᑎᓂᒃ ᐃᓚᖏᓪᓗ ᕿᒧᒃᓯᐅᑎᓄᑦ ᑲᓕᒐᓕᐅᕐᑎᒋᓗᓂᒋᑦ ᐊᒃᓴᓗᐊᓕᖕᓂᒃ. 13ᐸᓂᓯᓗ ᑎᐱᑦᓯᐊᕆᒃᓴᐅᑎᑎᑐᑦ ᐱᓇᓱᐊᕐᑎᒋᔪᒫᕐᐰᑦ ᓂᕿᓕᐅᕐᑎᒋᓗᓂᒋᑦ ᓂᐊᖂᔭᓕᐅᕐᑎᒋᓗᓂᒋᓪᓗ. 14ᐱᕈᕐᓰᕖᓪᓗ ᐱᐅᓂᕐᐹᖁᑎᓯ ᐱᔪᒫᕐᐰᑦ ᕔᓂᓕᐅᕐᕕᓯᓗ ᓇᐹᕐᑐᐃᓪᓗ ᐅᕐᓱᒃᓴᓖᑦ ᐱᔪᒫᕐᐰᑦ ᑐᓂᓗᒋᓪᓗ ᐱᔨᒥᓄᑦ. 15ᓂᐊᖂᔭᒃᓮᑦ ᕔᓂᒃᓮᓪᓗ ᑕᓪᓕᒪᐅᔪᖏᓐᓂᒃ ᑎᒍᓯᔪᒫᕐᐳᖅ ᑐᓂᓗᒋᓪᓗ ᐊᖓᔪᖅᑳᖁᑎᒥᓄᑦ ᐱᔨᒥᓄᓪᓗ. 16ᐱᔨᓯᓗ ᐊᖑᑎᑦ ᐊᕐᓁᓪᓗ ᑎᒍᔪᒫᕐᐰᑦ, ᐆᒪᔪᓪᓗ ᓂᕿᑦᓯᐊᕙᐅᓂᕐᐹᑦ ᓯᐅᑎᖅᑯᕐᑐᔪᖁᑎᓯᓗ ᐱᔪᒫᕐᐰᑦ, ᐱᓇᓱᐊᕐᑎᓕᕐᓗᒋᓪᓗ ᐃᒻᒥᓄᑦ. 17ᓰᐱᖁᑎᓯᓗ ᑕᓪᓕᒪᐅᔪᖏᑦ ᑎᒍᔪᒫᕐᐰᑦ, ᓯᐊᓛᕐᑖᕆᔪᒫᕐᐹᓯᓗ. 18ᐅᓪᓗᖅ ᑍᓐᓇ ᓇᓪᓕᐅᑎᒃᐸᑦ ᓈᒻᒪᒃᓴᖏᓐᓂᕐᒧᑦ ᓂᓪᓕᐊᔪᒫᕐᐳᓯ ᐊᖓᔪᖅᑳᕐᔪᐊᑦᓯᓐᓂᒃ, ᐃᓕᑦᓯ ᓇᖕᒥᓂᖅ ᓂᕈᐊᓚᐅᕐᑕᑦᓯᓐᓂᒃ; ᐊᑕᓂᐅᓪᓕ ᑭᐅᔪᒫᓐᖏᓛᓯ ᐅᓪᓗᒥ ᑍᑲᓂ.”
19ᐃᓄᐃᓪᓕ ᓈᓚᒍᒪᓚᐅᓐᖏᓚᑦ ᓴᒧᐃᓕᐅᑉ ᐅᖃᐅᓯᖏᓐᓂᒃ; ᐅᖃᕐᐳᓪᓕ, “ᐋᒃᑲ! ᐅᕙᒍᓪᓕ ᐊᖓᔪᖅᑳᕐᔪᐊᕐᑖᕈᒪᕗᒍᑦ, 20ᐃᓅᖃᑎᒌᒡᔪᐊᓕᒫᓂᒃ ᐊᑦᔨᖃᕐᓂᐊᕋᑦᑕ, ᓇᖕᒥᓂᖅ ᐊᖓᔪᖅᑳᕐᔪᐊᖃᕐᓗᑕ ᐊᐅᓚᑦᓯᔨᒋᓂᐊᕐᑕᑦᑎᓐᓂᒃ ᓯᕗᓕᕐᑎᒃᓴᑦᑎᓐᓂᒡᓗ ᐅᓇᑕᕐᓂᕐᒧᑦ ᐅᓇᑕᕐᑎᒋᓗᑎᒍᓗ.” 21ᓴᒧᐃᓕᐅᓪᓕ ᐅᖃᐅᓯᐅᔪᓕᒫᑦ ᓈᓚᑦᓯᐊᕇᕋᒥᒋᑦ, ᐅᖃᐅᑎᒋᓚᐅᕐᐰᑦ ᐊᑕᓂᕐᒧᑦ. 22ᐊᑕᓂᕐᓗ ᐅᖃᕐᐳᖅ ᓴᒧᐃᓕᒧᑦ, “ᐅᖃᐅᓯᖏᑦ ᒪᓕᓕᒃᑭᑦ, ᐊᖓᔪᖅᑳᕐᔪᐊᕐᑖᕐᑎᓪᓗᒋᓪᓗ.” ᓴᒧᐃᓕᐅᓪᓗ ᐃᓴᕆᐊᓕᒥᐅᓕᒫᑦ ᐅᖃᐅᑎᕔᑦ, “ᐃᒡᓗᒐᓴᑦᓯᓐᓄᑦ ᐊᑐᓂᑦ ᐊᖏᕐᕋᓕᕆᑦᓯ.”
Currently Selected:
ᓴᒧᐃᓕ ᓯᕗᓪᓖᑦ 8: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
