ᓴᒧᐃᓕ ᓯᕗᓪᓖᑦ 10
10
1ᓴᒧᐃᓕᐅᑉ ᐊᓕᒍᖅ ᐅᕐᓱᒥᒃ ᐃᒪᓕᒃ ᑎᒍᕚ ᑯᕕᓪᓗᒍᓗ ᓴᐅᓕᐅᑉ ᓂᐊᖁᐊᓄᑦ, ᑯᓂᒡᓗᒍᓗ ᐅᖃᐅᑎᕚ, “ᐊᑕᓂᐅᑉ ᐅᕐᓱᕐᑎᕐᐹᑎᑦ ᐊᖓᔪᖅᑳᕐᔪᐊᓐᖑᖁᓪᓗᑎᑦ ᐃᓄᖁᑎᖏᓐᓄᑦ. ᐊᑕᓂᐅᑉ ᐃᓄᖁᑎᖏᑦ ᐊᖓᔪᖅᑲᐅᕕᒋᓂᐊᕐᐸᑎᑦ ᓴᐳᑎᓗᒋᓪᓗ ᐊᑭᕋᕐᑐᕐᑎᖏᓐᓂᑦ ᖃᓂᒋᔭᖏᓐᓃᑦᑐᓂᑦ. ᑕᒪᓐᓇᓗ ᓇᓗᓁᒃᑯᑕᕆᓂᐊᕐᐸᑦ ᐊᑕᓂᐅᑉ ᐅᕐᓱᕐᑎᕐᒪᑎᑦ ᐊᖓᔪᖅᑳᕐᔪᐊᖑᖁᓪᓗᑎᑦ ᐃᓄᖁᑎᖏᓐᓄᑦ. 2ᐅᓪᓗᒥ ᕿᒪᒃᑯᕕᖓ, ᑲᑎᓯᓂᐊᕐᐳᑎᑦ ᐊᖑᑏᖕᓂᒃ ᒪᕐᕉᖕᓂᒃ ᕅᒋᓕᐅᑉ ᐃᓗᕕᐊᑕ ᓴᓂᐊᓂ ᔨᐅᓪᔭᒥ ᐱᓐᔭᒥᓂᐅᑉ ᓄᓇᖓᓂ, ᐅᖃᐅᑦᔭᐅᓂᐊᕐᐳᑎᓪᓗ, ‘ᑍᒃᑯᐊ ᓯᐅᑎᖅᑯᕐᑐᔪᑦ ᕿᓂᓚᐅᕐᑕᑎᑦ ᓇᓂᔭᐅᓯᒪᓂᖏᓐᓂᒃ, ᐊᑖᑕᕕᓪᓗ ᐃᓱᒫᓗᒋᔪᓐᓃᕋᒥᒋᑦ ᐃᓕᖕᓂᖔᖅ ᐃᓱᒫᓗᓕᕐᐳᖅ, ᐅᕾᓐᓇᓕᕐᓗᓂᓗ, “ᖃᓄᐃᓕᐅᕐᑐᒃᓴᐅᕗᖓᓕ ᐃᕐᓂᓐᓄᑦ?”’ 3ᑍᑲᓐᖓᓪᓗ ᐊᐅᓪᓚᕈᒫᕐᐳᑎᑦ ᑎᑭᓪᓗᑎᓪᓗ ᓇᐹᕐᑐᒧᑦ ᐆᒃᒧᑦ ᐃᑦᔪᕐᓁᑦᑐᒧᑦ ᑍᐳᐊᒦᑦᑐᒧᑦ; ᑍᑲᓂᓗ ᑲᑎᓯᔪᒫᕐᐳᑎᑦ ᐊᖑᑎᓂᒃ ᐱᖓᓱᓂᒃ ᐱᑎᓕᒥ ᑐᓂᕐᕈᓯᕆᐊᕐᑐᕐᑐᓂᒃ ᒎᑎᒧᑦ, ᐃᓚᖓᑦ ᐱᖓᓱᓂᒃ ᒎᑦᓰᑦ ᓄᕐᕋᖏᓐᓂᒃ ᑎᒍᒥᐊᕈᒫᕐᐳᖅ, ᐃᓚᖓᓪᓗ ᐊᒡᔭᕐᓯᔪᒫᕐᐳᖅ ᓂᐊᖂᔭᓂᒃ ᐱᖓᓱᓂᒃ, ᐃᓚᖓᓪᓗ ᐊᒡᔭᕐᓯᔪᒫᕐᐳᖅ ᕿᓯᖕᒥᒃ ᕔᓂᖃᐅᑎᒥᒃ. 4ᑐᓐᖓᓱᒃᑎᑦᓱᒫᕐᐹᑎᑦ ᑐᓂᔭᐅᓗᑎᓪᓗ ᓂᐊᖂᔮᖕᓂᒃ ᒪᕐᕉᖕᓂᒃ, ᑐᓐᖓᓱᒃᑎᓪᓗᒋᑦ ᑎᒍᔪᒫᕐᐸᑎᑦ ᑖᒃᑯᓇᓐᖓᑦ. 5ᑕᒪᑐᒪ ᑭᖑᕐᖓᒍᑦ ᐂᔪᒃᓴᐅᕗᑎᑦ ᒋᐱᐊᑦ-ᐃᓗᕼᐃᒻᒧᑦ, ᒎᑎᐅᑉ ᖃᖅᑲᖓᓄᑦ, ᐱᓕᔅᑍᓂᒥᐅᑦ ᐅᓇᑕᕐᑐᒃᓴᖃᕐᕕᖓᓄᑦ; ᑕᕝᕙᓂ ᐃᒤᑦᓱᒫᕐᐳᖅ ᑍᑯᖓ ᐃᒡᓗᒐᓴᖕᓄᑦ ᑎᑭᒃᑯᕕᑦ ᑲᑎᓯᔪᒫᕐᐳᑎᑦ ᐅᖃᕐᑎᓂᒃ ᖁᑦᓯᖕᓂᕐᐹᒥᑦ ᐱᔪᓂᒃ ᑯᑭᑦᑕᐸᐅᑎᐅᔭᓄᑦ ᓂᑦᔭᐅᓯᔭᕐᑐᓂᒃ ᓯᕙᓂᐅᑎᓂᒡᓗ, ᓱᐴᒐᐅᔭᓂᒡᓗ ᕼᐊᕐᐱᓂᒡᓗ ᐊᑐᕐᓗᑎᒃ, ᓇᓚᐅᑦᑍᔪᒫᕐᐳᑦ. 6ᑕᕝᕙ ᐊᑕᓂᐅᑉ ᐊᓂᕐᓂᖓᑕ ᐱᔪᓐᓇᕐᓂᕐᔪᐊᖓᑕ ᑎᑭᑦᓱᒫᕐᐹᑎᑦ, ᓇᓚᐅᑦᑍᖃᑕᐅᓕᕐᓗᑎᓪᓗ ᑖᒃᑯᓄᖓ, ᐊᓯᑦᔨᕐᑕᐅᔪᒫᕐᐳᑎᓪᓗ. 7ᑕᒪᒃᑯᐊ ᓇᓗᓁᒃᑯᑍᑦ ᐃᓕᖕᓄᑦ ᑎᑭᑉᐸᑕ, ᐱᓇᓱᐊᕈᓐᓇᕐᑕᕐᓂᒃ ᐱᓇᓱᐊᕐᑐᒃᓴᐅᕗᑎᑦ, ᒎᑎᐅᑉ ᐃᓚᒋᓂᐊᕐᒪᑎᑦ. 8ᐅᕙᓐᓂᑦ ᓯᕗᓪᓕᐅᓗᑎᑦ ᒋᐅᓪᒐᐅᓪᒧᐊᕐᑐᒃᓴᐅᕗᑎᑦ; ᑕᑯᒋᓪᓗ ᐃᓕᖕᓄᑦ ᕾᔪᒫᕐᐳᖓ ᑐᓂᕐᕈᓯᕆᐊᕐᓗᖓ ᐃᑯᐊᓪᓚᒐᒃᓴᓂᒃ ᓮᒪᓂᕐᒧᓪᓗ ᑐᓂᕐᕈᑎᒃᓴᓂᒃ. ᐅᓪᓗᓂᒃ 7ᓂᒃ ᐅᑕᖅᑭᔪᒃᓴᐅᕗᑎᑦ ᑕᕝᕙᓂ, ᕾᓚᐅᖏᓐᓂᓐᓂ ᖃᐅᔨᑎᑦᓯᔭᕐᑐᕐᓗᖓ ᖃᓄᐃᓕᐅᕐᑐᒃᓴᐅᖕᒪᖔᕐᐱᑦ.”
9ᓴᐅᓕᓕ ᓴᒧᐃᓕᒥᑦ ᑐᓄᓪᓗᓂ ᐊᐅᓪᓚᕐᒪᑦ, ᒎᑎᐅᑉ ᐆᒻᒪᑎᒥᒃ ᐊᓯᐊᓂᒃ ᑐᓂᓯᕕᒋᕚ; ᑖᒃᑯᐊᓗ ᓇᓗᓁᒃᑯᑕᓕᒫᑦ ᐅᓪᓗᒥ ᑍᑦᓱᒪᓂ ᓇᓚᐅᑦᓯᓚᐅᕐᐳᑦ. 10ᖃᖅᑲᒧᓪᓗ ᑎᑭᓐᓇᒥᒃ ᒋᐱ-ᐊᒧᑦ, ᓇᓚᐅᑦᑍᔨᓂᑦ ᐅᐸᒃᑕᐅᕗᑦ; ᒎᑎᐅᓪᓗ ᐊᓂᕐᓂᖓᑕ ᐊᖏᔪᕐᔪᐊᒧᑦ ᑎᑭᑉᐹ, ᓇᓚᐅᑦᑍᖃᑕᐅᓕᕐᓗᓂᓗ ᑖᒃᑯᓇᓂ. 11ᑖᒃᑯᐊᓗ ᓯᕗᓂᖓᒍᑦ ᖃᐅᔨᒪᓚᐅᕐᑐᑦ ᓴᐅᓕᒥᒃ ᑕᑯᕗᑦ ᓇᓚᐅᑦᑍᖃᑕᐅᑎᓪᓗᒍ ᓇᓚᐅᑦᑍᔨᓂ, ᐃᒻᒥᖕᓄᑦ ᐅᖃᕐᐳᑦ, “ᓱᓇᒧᓄᓇ ᑭᓯᐅᑉ ᐃᕐᓂᖓ ᑎᑭᑕᐅᔪᖅ? ᓴᐅᓕᐅᓈ ᓇᓚᐅᕐᑍᔨᐅᖃᑕᐅᓕᕐᑐᖅ?” 12#ᓴᒧᐃᓕ ᓯᕗᓪᓖᑦ 19:23,24.ᐊᖑᑏᑦ ᐃᓚᖓ ᑕᕝᕙᓂᒥᐅᖅ ᑭᐅᕗᖅ ᐅᖃᕐᓗᓂ, “ᑭᓇᒦᒃ ᐊᑖᑕᖃᕐᐸ?” ᑍᒤᒻᒪᑦ ᐅᖃᐅᓯᕐᑕᖃᓕᓚᐅᕐᐳᖅ ᐃᒫᒃ, “ᓴᐅᓕ ᓇᓚᐅᑦᑍᔪᓄᑦ ᐃᓚᒋᔭᐅᕚ?” 13ᓇᓚᐅᑦᑍᔭᕇᕋᒥᓗ, ᖁᑦᓯᖕᓂᕐᐹᒧᑦ ᑐᓂᕐᕈᓯᕐᕕᖕᒧᑦ ᐂᕗᖅ.
14ᓴᐅᓕᐅᑉ ᐊᒃᑲᖓᑕ ᐅᖃᐅᑎᕚ ᐱᔨᖓᓗ, “ᓇᒧᓐᖓᓚᐅᕐᐱᓰ?”
ᓴᐅᓕᑉ ᑭᐅᕚ, “ᓯᐅᑎᖅᑯᕐᑐᔪᓂᒃ ᕿᓂᕆᐊᓚᐅᕐᐳᒍᑦ; ᓇᓂᔭᒃᓴᐅᖏᒻᒪᑕᓕ, ᓴᒧᐃᓕᒧᐊᓚᐅᕐᐳᒍᑦ.”
15ᓴᐅᓕᐅᓪᓗ ᐊᒃᑲᖓᑕ ᐅᖃᐅᑎᕚ, “ᐅᖃᐅᑎᓐᖓ, ᖃᓄᖅ ᓴᒧᐃᓕᐅᑉ ᐅᖃᐅᑎᓚᐅᕐᐹᑎᑦ?”
16ᓴᐅᓕᓗ ᐊᒃᑲᖕᒥᓄᑦ ᐅᖃᕐᐳᖅ, “ᐅᖃᐅᑎᑦᓯᐊᓚᐅᕐᐹᑎᒍᑦ ᓯᐅᑎᖅᑯᕐᑐᔪᑦ ᓇᓂᔭᐅᓯᒪᓕᕐᓂᖏᓐᓂᒃ.” ᑭᓯᐊᓂᓕ ᐊᖓᔪᖅᑲᐅᕕᒃ ᐱᓪᓗᒍ, ᓴᒧᐃᓕᐅᑉ ᐅᖃᐅᓯᕆᓚᐅᕐᑕᖏᓐᓂᒃ, ᐅᖃᐅᑎᓚᐅᓐᖏᓛ.
ᓴᐅᓕᐅᑉ ᐊᖓᔪᖅᑳᕐᔪᐊᕈᕐᑎᑕᐅᓂᖓ
17ᑕᕝᕙ ᓴᒧᐃᓕᐅᑉ ᐃᓄᒐᓮᑦ ᑲᑎᖁᕔᑦ ᐊᑕᓂᕐᒥᒃ ᑲᑎᓯᖁᓪᓗᒋᑦ ᒥᔅᐸᒥ; 18ᐃᓴᕆᐊᓕᐅᓪᓗ ᐃᓄᖏᑦ ᐅᖃᐅᑎᕔᑦ, “ᐊᑕᓂᖅ ᐃᓴᕆᐊᓕᒥᐅᑉ ᒎᑎᖓ ᐃᒫᒃ ᐅᖃᕐᐳᖅ, ‘ᐃᓴᕆᐊᓕᒥᐅᑉ ᐄᑦᔨᑉᑎᒥᑦ ᐊᐅᓚᕐᑎᓚᐅᕐᐸᒃᑲ, ᓴᐳᑎᓪᓗᒋᓪᓗ ᐄᑦᔨᑉᑎᒥᐅᑦ ᐱᔪᓐᓇᕐᓂᖏᓐᓂᑦ ᐊᑕᓂᐅᕕᓕᒫᓪᓗ ᐱᔪᓐᓇᕐᓂᖏᑕ ᐅᖁᒤᒃᓴᕐᑎᑦᓯᓂᖏᓐᓂᑦ.’ 19ᑭᓯᐊᓂᓕ ᐅᓪᓗᒥ ᒎᑎᑦᓯᓐᓂᒃ ᓇᕐᕈᓕᕐᐳᓯ, ᐃᓕᑦᓯᓐᓂᒃ ᐱᐅᓕᒃᓯᓚᐅᕐᑐᒥᒃ ᐅᖁᒤᑦᑐᓂᑦ ᐊᒃᓱᕈᕐᓇᕐᑐᓂᒡᓗ; ᑖᑦᓱᒧᖓᓗ ᐅᖃᓚᐅᕐᐳᓯ, ‘ᐋᒃᑲ, ᐊᖓᔪᖅᑳᕐᔪᐊᕐᑖᕐᑎᓚᐅᕐᑎᒍᑦ.’ ᒫᓐᓇᓕ ᑍᒤᒻᒪᑦ, ᐊᑕᓂᐅᑉ ᓵᖓᓄᑦ ᑐᓂᓕᕆᑦᓯ ᑭᖑᕚᕇᑦ ᐃᓚᒌᓪᓗ ᑲᑎᓐᖓᓗᑎᒃ.”
20ᑕᕝᕙ ᓴᒧᐃᓕᐅᑉ ᐃᓴᕆᐊᓕᐅᑉ ᑭᖑᕚᖏᑦ ᕾᖁᔭᕇᕋᒥᒋᑦ, ᐱᓐᔭᒥᓂᐅᑉ ᑭᖑᕚᖏᑦ ᓇᓚᐅᑦᓵᕈᑎᒃᑯᑦ ᓇᓚᐅᑕᐅᕗᑦ. 21ᑕᕝᕙ ᐱᓐᔭᒥᓂᐅᑉ ᑭᖑᕚᖏᑦ ᕾᖁᓪᓗᒋᑦ ᐃᓚᒌᑦ ᒪᓕᒡᓗᒋᑦ, ᒪᑦᕅᑎᐅᑉ ᐃᓚᖏᑦ ᓇᓚᐅᑦᓵᕈᑎᒧᑦ ᓇᓚᐅᑕᐅᕗᑦ; ᑕᕝᕙ ᒫᑐᕆᑎᒥᐅᑦ ᐃᓚᖏᑦ ᐊᖑᑎᑦ ᕾᑎᒃᑭᕔᑦ, ᓴᐅᓕᓗ ᑭᔅ ᐃᕐᓂᖓ ᓇᓚᐅᑦᓵᕈᑎᒧᑦ ᓇᓚᐅᑕᐅᕗᖅ. ᓴᐅᓕᓕ ᕿᓂᕋᓗᐊᕐᒪᑦᔪᒃ, ᓇᓂᔭᐅᔪᓐᓇᓐᖏᓚᖅ. 22ᑍᒤᒻᒪᑦ ᐊᑕᓂᕐᒥᒃ ᖃᐅᔨᒋᐊᓕᕆᕗᑦ, “ᑖᓐᓇ ᐊᖑᑦ ᑕᒫᓃᑉᐹ?”
ᐊᑕᓂᖅ ᑭᐅᕗᖅ, “ᑕᑯᒋᑦ, ᐱᖁᑏᑦ ᐊᑯᕐᖓᓐᓂ ᐃᔨᕐᓯᒪᕗᖅ.”
23ᑕᕝᕙ ᐅᓪᓚᒡᓗᑎᒃ ᑕᕝᕗᖓ ᐅᐸᒃᐹᑦ ᕾᑦᔪᑎᓪᓗᒍᓗ; ᐃᓄᐃᓪᓗ ᐊᑯᕐᖓᓐᓂ ᓂᑯᕕᓐᓇᒥ ᑖᒃᑯᓇᓐᖓᓕᒫᖅ ᑕᑭᓂᕐᓴᐅᕗᖅ ᑐᐃᖏᓐᓂᑦ ᐱᒋᐊᕐᓗᒋᑦ. 24ᓴᒧᐃᓕᐅᓪᓗ ᐃᓄᓕᒫᑦ ᐅᖃᐅᑎᕔᑦ, “ᑕᑯᕕᓯᐅᑉ ᑖᓐᓇ ᐊᑕᓂᐅᑉ ᓂᕈᐊᕐᑕᖓ, ᑖᓐᓇ ᐊᑦᔨᒋᔭᐅᓐᖏᓚᖅ ᐃᓄᓕᒫᓂᑦ.”
ᐃᓄᓕᒫᓪᓗ ᕾᒐᓛᓕᕐᐳᑦ ᐅᖃᕐᓗᑎᒃ, “ᐊᖓᔪᖅᑳᕐᔪᐊᖅ ᐊᑯᓂ ᐃᓅᓕ!”
25ᑕᕝᕙ ᓴᒧᐃᓕᐅᑉ ᐃᓄᐃᑦ ᓇᓗᓁᕐᓯᕕᒋᕔᑦ ᖃᓄᖅ ᐊᖓᔪᖅᑳᕐᔪᐊᑦ ᐱᔪᓐᓇᕐᓂᖃᕐᑐᒃᓴᐅᖕᒪᖔᑕ ᐱᐅᓯᖃᕐᑐᒃᓴᐅᖕᒪᖔᑕᓗ; ᑎᑎᕋᕐᓗᒋᓪᓗ ᐊᒡᓚᖕᓄᑦ ᐊᑕᓂᕐᒧᓪᓗ ᑐᓂᕔᑦ. ᑕᕝᕙ ᓴᒧᐃᓕᐅᑉ ᐃᓄᓕᒫᑦ ᐊᖏᕐᕋᖁᓕᕐᐰᑦ, ᐊᑐᓂᑦ ᐊᖏᕐᕋᒥᖕᓄᑦ. 26ᓴᐅᓕᓗ ᐊᖏᕐᕋᒥᓄᑦ ᐊᖏᕐᕋᕆᕗᖅ ᒋᐱ-ᐊᒧᑦ, ᐊᖑᑏᓪᓗ ᓯᕘᕋᖏᑦᑐᑦ ᐃᓚᒋᓪᓗᒋᑦ ᑖᒃᑯᐊ ᒎᑎᐅᑉ ᐆᒻᒪᑎᖏᑦ ᐊᒃᑐᓚᐅᕐᒪᒋᑦ. 27ᐃᓚᖏᓪᓕ ᐊᑭᕋᕐᑐᕐᑐᑦ ᐅᖃᕐᐳᑦ, “ᖃᓅᖅ ᑖᑦᓱᒧᖓ ᐱᐅᓕᔭᐅᔪᓐᓇᕋᑦᑕ?” ᑕᕝᕙ ᑖᑦᓱᒥᖓ ᓇᕐᕈᓕᕐᐳᑦ, ᐂᑦᑐᕐᓇᒍᓗ ᐱᑖᒃᓴᖏᓐᓂᒃ. ᓴᐅᓕᓕ ᓮᒪᓂᖃᑦᓯᐊᓚᕐᐳᖅ.
Currently Selected:
ᓴᒧᐃᓕ ᓯᕗᓪᓖᑦ 10: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
