ᓴᒧᐃᓕ ᓯᕗᓪᓖᑦ 7
7
1 #
ᓴᒧᐃᓕ ᐂᑉᐸᖏᑦ 6:2-4; ᑯᕉᓂᑲ ᓯᕗᓪᓖᑦ 13:5-7. ᑍᒤᒻᒪᑦ ᑭᕆᐊᑦ-ᔨᕆᐅᑉ ᐃᓄᖏᑕ ᐂᓚᐅᕐᐹᑦ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖁᑎᖓ, ᑐᓂᕚᓪᓗ ᐊᖑᒻᒧᑦ ᐊᐱᓇᑕᑉᒥᒃ ᐊᑎᓕᖕᒧᑦ ᓄᓇᖃᕐᑐᒧᑦ ᐱᖑᐊᕐᔫᑉ ᖄᖓᓂ; ᐃᕐᓂᖓᓗ ᐃᓕᓯᕆ ᑲᒪᔨᐅᖁᔭᐅᓪᓗᓂ ᑐᒃᓯᐅᑦᔭᐅᓚᐅᕐᐳᖅ ᐃᑦᔪᕐᓁᓕᑎᑕᐅᓪᓗᓂ.
ᓴᒧᐃᓕᐅᑉ ᐊᐅᓚᑦᓯᓂᖓ ᐃᓴᕆᐊᓕᒥᐅᓂᒃ
2ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓ ᑭᕆᐊᑦ-ᔨᕆᒻᒦᓚᐅᕐᐳᖅ ᐊᑯᓂ, ᐊᕐᕌᒍᓂᒃ 20ᓂᒃ, ᑍᑦᓱᒪᓂᐅᑎᓪᓗᒍ ᐃᓴᕆᐊᓕᒥᐅᑦ ᐃᓄᖏᑦ ᐃᓗᖏᕐᓱᕐᓗᑎᒃ ᓂᓪᓕᐊᖃᑦᑕᓚᐅᕐᐳᑦ ᐊᑕᓂᕐᒧᑦ ᐃᑲᔪᕐᑕᐅᔪᒪᓪᓗᑎᒃ.
3ᓴᒧᐃᓕᓕ ᐅᖃᕐᐳᖅ ᐃᓴᕆᐊᓕᒥᐅᑦ ᐃᓄᓕᒫᖏᓐᓄᑦ, “ᐊᑕᓂᕐᒧᑦ ᐅᑎᕐᓂᐊᕈᑦᓯ ᐆᒻᒪᑎᑦᓯᓐᓄᑦ ᐊᑕᖏᕐᑐᒧᑦ, ᑕᕝᕙ ᒎᑎᓐᖑᐊᑦ ᐱᒃᓴᔭᕆᓐᖏᑕᓯ ᐃᒋᑕᒃᓴᕆᕙᓯ ᒎᑎᓐᖑᐊᓪᓗ ᐊᕐᓇᐅᑉ ᐋᔅᑕᕉᑎᐅᑉ ᐊᑦᔨᓐᖑᐊᖏᑦ, ᐆᒻᒪᑎᑦᓯᒍᑦ ᑐᓂᒃᑲᓐᓂᓕᕆᑦᓯ ᐊᑕᖏᕐᑐᒧᑦ ᐊᑕᓂᖅ ᐱᔨᑦᓯᕐᑕᑐᐊᕆᓕᕐᓗᒍ, ᑕᕝᕙ ᐱᐅᓕᓂᐊᕐᐹᓯ ᐱᓕᔅᑍᓂᒥᐅᑦ ᐱᔪᓐᓇᕐᓂᖏᓐᓂᑦ.” 4ᑕᕝᕙ ᐃᓴᕆᐊᓕᒥᐅᑦ ᒎᑎᓐᖑᐊᓂᒃ ᐰᓕᒥᒃ ᐋᔅᑕᕉᑎᒥᒡᓗ ᐃᒋᑦᓯᓚᐅᕐᐳᑦ, ᐊᑕᓂᕐᓗ ᐱᔨᑦᓯᕐᑕᑐᐊᕆᓕᕐᓗᒍ.
5ᑭᖑᓂᐊᒍᑦ ᓴᒧᐃᓕ ᐅᖃᕐᐳᖅ, “ᐃᓴᕆᐊᓕᒥᐅᓕᒫᑦ ᑲᑎᓚᐅᕆᑦᓯ ᒥᔅᐸᒥ, ᑐᒃᓯᐅᑎᓂᕐᐸᑦᓯᓗ ᐊᑕᓂᕐᒧᑦ ᑍᑲᓂ.” 6ᑍᒤᒻᒪᑦ ᑲᑎᓚᐅᕐᐳᑦ ᒥᔅᐸᒥ, ᐃᒪᕐᒥᒃ ᖃᓗᓯᓪᓗᑎᒃ ᑯᕕᓪᓗᒍᓗ ᐂᑦᑑᑎᒋᓚᐅᕐᐹᑦ ᐊᑕᓂᕐᒧᑦ, ᓂᕆᑦᑍᓕᓚᐅᕐᐳᓪᓗ ᐅᓪᓗᒥ ᑕᕝᕙᓂ, ᐅᖃᕐᓗᑎᒡᓗ, “ᐊᑕᓂᕐᒧᑦ ᐊᔪᕐᑐᓕᓚᐅᕐᐳᒍᑦ.” ᑕᕝᕙᓂᓗ ᒥᔅᐸᒥ ᓴᒧᐃᓕᐅᑉ ᐃᓴᕆᐊᓕᒥᐅᑦ ᐃᓗᐊᖏᑦᔪᑎᖏᓐᓂᑦ ᐃᓱᐊᕐᓯᑎᓚᐅᕐᐰᑦ.
7ᐱᓕᔅᑍᓂᒥᐅᓪᓕ ᑐᓴᕋᒥᒃ ᐃᓴᕆᐊᓕᒥᐅᑦ ᑲᑎᓐᓂᖏᓐᓂᒃ ᒥᔅᐸᒥ, ᐱᓕᔅᑍᓂᒥᐅᑦ ᐊᖓᔪᖅᑳᖏᑦ ᑕᓪᓕᒪᑦ ᐅᓇᑕᕆᐊᕐᓕᕐᐳᑦ ᐃᓴᕆᐊᓕᒥᓂᒃ. ᐃᓴᕆᐊᓕᒥᐅᓪᓕ ᑕᒪᑐᒥᖓ ᑐᓴᕋᒥᒃ ᑲᑉᐱᐊᓱᓕᕐᐳᑦ ᐱᓕᔅᑍᓂᒥᐅᓂᒃ. 8ᐅᖃᕐᓗᑎᒡᓗ ᓴᒧᐃᓕᒧᑦ, “ᑐᒃᓯᐊᖏᓐᓇᕆᑦ ᐊᑕᓂᕐᒧᑦ ᒎᑎᑦᑎᓐᓄᑦ, ᐱᐅᓕᔭᐅᖁᓪᓗᑕ ᐱᓕᔅᑍᓂᒥᐅᑦ ᐱᔪᓐᓇᕐᓂᖏᓐᓂᑦ.” 9ᑕᕝᕙ ᓴᒧᐃᓕ ᑐᖁᑦᓯᕗᖅ ᓰᐱᐅᑉ ᓄᕐᕋᖓᓂᒃ ᐊᑕᖏᕐᓗᒍᓗ ᐃᑯᐊᓪᓚᒡᓗᒍ ᑐᓂᕐᕈᑎᒋᕚ ᐊᑕᓂᕐᒧᑦ; ᑐᒃᓯᐊᕐᐳᕐᓗ ᐊᑕᓂᕐᒧᑦ ᐃᓴᕆᐊᓕᒥᐅᑦ ᐃᑲᔪᕐᑕᐅᖁᓪᓗᒋᑦ, ᐊᑕᓂᐅᓪᓗ ᑭᐅᕚ ᑐᒃᓯᐊᕈᑎᖓᓂᒃ. 10ᓴᒧᐃᓕᓕ ᐃᑯᐊᓚᑦᓯᓪᓗᓂ ᑐᓂᓯᑎᓪᓗᒍ ᑐᓂᕐᕈᑎᒥᓂᒃ, ᐱᓕᔅᑍᓂᒥᐅᑦ ᖃᒡᓕᕗᑦ ᐅᓇᑕᕆᐊᓕᕐᓗᑎᒃ ᐃᓴᕆᐊᓕᒥᐅᓄᑦ; ᐊᑕᓂᕐᓕ ᑲᓪᓕᓕᕐᑎᑦᓯᕗᖅ ᓂᐱᖅᑯᕐᑐᔪᕐᔪᐊᕐᒥᒃ ᐱᓕᔅᑍᓂᒥᐅᑦ ᐱᓪᓗᒋᑦ ᑖᒃᑯᐊᓗ ᐅᐃᒻᒪᑦᓯᐊᓚᐅᕐᐳ ᓇᓗᓕᕐᓗᑎᒡᓗ; ᕿᒪᒃᓯᓪᓗᑎᒡᓗ ᐃᓴᕆᐊᓕᒥᐅᓂᒃ. 11ᐃᓴᕆᐊᓕᒥᐅᓪᓕ ᒥᔅᐸᒥᑦ ᐊᐅᓪᓚᕋᒥᒃ ᒪᓕᒃᓴᕐᐳᑦ ᐱᓕᔅᑍᓂᒥᐅᓂᒃ, ᑐᖁᕅᓚᐅᕐᐳᑦ, ᐱᑦ-ᑳᕐᒧᑦ ᐊᒡᓛᑦ ᑎᑭᓗᑎᒃ.
12ᑕᕝᕙ ᓴᒧᐃᓕ ᐅᔭᕋᖕᒥᒃ ᑎᒍᓯᓪᓗᓂ ᐃᓕᕚ ᒥᔅᐸᐅᑉ ᔨᓴᓇᐅᓪᓗ ᐊᑯᓐᓂᖓᓄᑦ, ᐊᑦᓯᕐᐹᓗ ᐃᐱᓂᓯᕆᒥᒃ ᐅᖃᕐᓗᓂ, “ᑕᒪᐅᖓ ᑎᑭᓪᓗᒍ ᐊᑕᓂᐅᑉ ᐃᑲᔪᓚᐅᕐᐹᑎᒍᑦ.” 13ᐱᓕᔅᑍᓂᒥᐅᑦ ᓵᓚᐅᓚᐅᕐᐳᑦ ᐃᓴᕆᐊᓕᒥᐅᓪᓗ ᓄᓇᖓᓄᑦ ᐃᑎᒃᑲᓐᓂᓚᐅᕈᓐᓃᕐᓗᑎᒃ. ᐊᑕᓂᐅᓪᓗ ᐱᔪᓐᓇᕐᓂᖓᑕ ᐱᓕᔅᑏᓂᒥᐅᑦ ᓵᓐᖎᓐᓇᓚᐅᕐᐰᖅ ᓴᒧᐃᓕᐅᑉ ᐃᓅᓂᓕᒫᖓᓂ. 14ᐃᒡᓗᖓᓮᑦ ᐱᓕᔅᑍᓂᒥᐅᑦ ᑎᒍᓚᐅᕐᑕᖏᑦ ᐃᓴᕆᐊᓕᒥᐅᓂᑦ ᐅᑎᕐᑎᑕᐅᓚᐅᕐᐳᑦ, ᐃᑯᕋᓂᓗ ᒑᑎᓗ ᐊᑯᓐᓂᖓᓃᑦᑐᑦ; ᐃᓴᕆᐊᓕᒥᐅᑦ ᐅᑎᕐᑎᓚᐅᕐᐰᑦ ᐱᓕᔅᑍᓂᒥᐅᑦ ᐱᔪᓐᓇᕐᓂᖏᓐᓂᑦ. ᐅᓇᑕᕐᓂᖃᕈᓐᓃᓚᐅᕐᐳᓪᓗ ᐃᓴᕆᐊᓕᒥᐅᑦ ᐊᒧᕅᑎᒥᐅᓪᓗ.
15ᓴᒧᐃᓕ ᐊᐅᓚᑦᓯᓚᐅᕐᐳᖅ ᐃᓴᕆᐊᓕᒥᐅᓂᒃ ᐃᓅᓂᓕᒫᒥᓂ. 16ᐊᕐᕌᒍᑕᒫᑦ ᐂᖃᑦᑕᓚᐅᕐᐳᖅ ᓄᓇᓕᖕᓄᑦ ᐱᑎᓕᒧᑦ, ᒋᐅᓪᒐᐅᓪᒧᑦ, ᒥᔅᐸᒧᓪᓗ; ᑖᒃᑯᓇᓂᓗ ᐊᑲᐅᖏᑦᔪᑕᐅᔪᑦ ᐋᖅᑭᒃᓱᖃᑦᑕᓚᐅᕐᐰᑦ. 17ᐱᔭᕇᕌᖓᒥ ᐊᖏᕐᕋᖃᑦᑕᓚᐅᕆᕗᖅ ᕌᒪᒧᑦ, ᑕᕝᕙᓂ ᐊᖏᕐᕋᖃᕋᒥ, ᑕᕝᕙᓂᓗ ᐃᓴᕆᐊᓕᒥᐅᓄᑦ ᐃᓱᒪᓕᐅᕐᑎᒋᔭᐅᓚᐅᕐᐳᖅ, ᑕᕝᕙᓂᓗ ᑐᓂᕐᕈᓯᕐᕕᓕᐅᓚᐅᕐᐳᖅ ᐊᑕᓂᕐᒧᑦ.
Currently Selected:
ᓴᒧᐃᓕ ᓯᕗᓪᓖᑦ 7: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
