ᓴᒧᐃᓕ ᓯᕗᓪᓖᑦ 6
6
ᐊᖏᕈᑎᐅᑉ ᐃᒃᓯᕐᕕᖓᑕ ᐅᑎᕐᑎᑕᐅᓂᖓ
1ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓ ᐱᓕᔅᑍᓂᒦᓚᐅᕐᐳᖅ ᑕᖅᑭᓂᒃ 7ᓂᒃ. 2ᐱᓕᔅᑍᓂᒥᐅᓪᓗ ᕾᖁᔨᓚᐅᕐᐳᑦ ᑐᓂᕐᕈᓯᕐᑎᑦᓯᔨᓂᒃ ᖃᐅᔨᓇᓱᐊᕐᑎᓂᒡᓗ ᐊᐱᕆᓪᓗᒋᓪᓗ, “ᖃᓄᐃᓕᐅᕐᑐᒃᓴᐅᕕᑖ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᓂᒃ? ᐅᖃᐅᑎᓚᐅᕐᑎᒍᑦ ᐅᑎᕐᑎᓐᓂᐊᕈᑦᑎᒍ ᐃᓂᖓᓄᑦ ᓱᓇᒥᒃ ᐃᓚᖃᕐᓗᓂ ᐊᐅᓪᓚᕐᑎᑕᒃᓴᕆᕙᕗᑦ?”
3ᑖᒃᑯᐊ ᑭᐅᕗᑦ, “ᐃᓴᕆᐊᓕᒥᐅᑉ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᐊᐅᓪᓚᕐᑎᓐᓂᐊᕈᑦᓯᐅᒃ, ᐃᓚᖃᖏᓪᓗᒍ ᐊᐅᓪᓚᕐᑎᑕᒃᓴᕆᓐᖏᓚᓯ, ᐊᐅᓪᓚᕐᑎᑦᓯᖃᓯᐅᑦᔨᔪᒃᓴᐅᕗᓯᓕ ᐂᑦᑑᑎᓂᒃ ᐸᓯᔭᒃᓴᐅᓂᑦᓯ ᐊᑭᓕᐅᑎᒃᓴᖓᓂᒃ. ᑕᕝᕙ ᑍᒤᓕᐅᕈᑦᓯ ᐋᖅᑭᒃᑕᐅᓂᐊᕐᐳᓯ, ᖃᐅᔨᓂᐊᕐᐳᓯᓗ ᓱᖕᒪᑦ ᑖᑦᓱᒧᖓ ᓱᒋᐊᕐᑕᐅᓐᓂᕐᒪᒑᑦᓯ.”
4ᐃᓄᐃᓪᓗ ᐊᐱᕆᕗᑦ, “ᓱᓇᓃᒃ ᐂᑦᑑᑎᖃᕐᑐᒃᓴᐅᕕᑖ ᐸᓯᔭᒃᓴᐅᓂᑦᑎᓐᓄᑦ ᐊᑭᓕᐅᑎᒃᓴᓂᒃ?”
ᑖᒃᑯᐊ ᑭᐅᕗᑦ, “ᑕᓪᓕᒪᓂᒃ ᒎᓗᓂᒃ ᐋᓐᓂᐊᓇᕐᑐᓐᖑᐊᓂᒃ ᐋᖅᑭᒃᑕᐅᔪᓐᓇᖏᑦᑐᓂᒃ ᑕᓪᓕᒪᓂᒡᓗ ᒎᓗᓂᒃ ᐊᕕᓐᖓᓐᖑᐊᓂᒃ, ᐱᓕᔅᑍᓂᒥᐅᑦ ᐊᖓᔪᖅᑳᖏᑕ ᖃᑦᓯᐅᓂᖏᑦ ᒪᓕᒡᓗᒋᑦ; ᖃᓂᒻᒪᓯᖅ ᐃᓕᑦᓯᓐᓄᐊᓚᐅᕐᒪᑦ ᐊᖓᔪᖅᑳᓕᒫᑦᓯᓐᓄᓪᓗ. 5ᑖᒃᑯᐊ ᓴᓇᓐᖑᐊᕐᑕᒃᓴᕆᕙᓯ ᐋᓐᓂᐊᓇᕐᑐᓐᖑᐊᑦ ᐊᕕᓐᖓᓐᖑᐊᓪᓗ ᐃᓕᑦᓯᓐᓂᒃ ᓱᕅᓚᐅᕐᒪᑕ ᓄᓇᑦᓯᓐᓂᒡᓗ, ᓂᕐᑐᕐᓇᕐᓯᑎᑕᒃᓴᕆᕙᓯᓗ ᐃᓴᕆᐊᓕᒥᐅᑦ ᒎᑎᖓᑦ; ᐃᒻᒪᖄ ᐊᒃᓱᕈᕈᓐᓃᕋᔭᕐᐳᖅ ᓱᒋᐊᕐᓯᔭᕆᐊᒃᓴᖅ ᐃᓕᑦᓯᓐᓂᒃ, ᒎᑎᑦᓯᓂᒃ ᓄᓇᑦᓯᓐᓂᒡᓗ. 6ᓱᖕᒪᑦ ᐆᒻᒪᑎᓯ ᓯᑎᔫᒋᐊᖃᕐᐸᑦ, ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑎᑐᑦ ᐰᕉᑐᑦ ᐄᑦᔨᑉᑎᒥᐅᑎᑐᓪᓗ ᐆᒻᒪᑎᖏᑦ ᓯᑎᔫᓚᐅᕐᓂᖏᑎᑐᑦ? ᐱᓐᖑᐊᕆᑐᐃᓐᓇᓕᓚᐅᕐᒪᒋᑦ, ᐃᓄᖁᑎᖏᓐᓂᒃ ᐊᐅᓚᕐᑎᑦᓯᓚᐅᕐᑎᓐᓇᒋᑦ, ᑕᕝᕙ ᐊᐅᓪᓚᕈᓇᕐᓯᑎᑦᓯᓚᐅᕐᐳᑦ. 7ᑍᒤᒻᒪᑦ, ᓄᑖᒥᒃ ᑲᓕᒐᓕᐅᓕᕆᑦᓯ ᐊᒃᓴᓗᐊᓕᖕᒥᒃ ᒪᕐᕉᖕᓂᒡᓗ ᐃᒻᒧᒃᓯᐅᒑᖕᓂᒃ ᕿᒧᒋᐅᕐᓯᒪᖏᑦᑑᖕᓂᒃ; ᑖᒃᑯᐊᒃ ᑲᓕᒐᕐᒥᒃ ᐅᓂᐊᕐᑐᒃᓴᓕᐊᕆᓗᒋᒃ, ᓄᕐᕋᖏᒡᓕ ᐅᑎᕐᑎᓪᓗᒋᑦ ᐆᒪᔪᖃᐅᑎᒧᑦ. 8ᐊᑕᓂᐅᓪᓗ ᐊᖏᕈᑎᖓᑕ ᐃᒃᓯᕐᕕᖁᑎᖓ ᑲᓕᒐᕐᒧᐊᕐᓗᒍ, ᐃᒃᓯᕐᕖᓪᓗ ᐃᓗᓕᓖᑦ ᒎᓗᓂᒃ ᓴᓇᓐᖑᐊᕐᓯᒪᔪᓂᒃ ᐂᑦᑑᑎᒋᓂᐊᕐᑕᑦᓯᓐᓂᒃ ᐸᓯᔭᒃᓴᐅᓂᑦᓯᓐᓄᑦ ᐊᑭᓕᐅᑎᒃᓴᐅᓂᐊᕐᑐᓂᒃ ᑲᓕᒐᕐᒧᐊᖃᓯᐅᑎᓗᒋᑦ. ᑲᓕᒑᕐᓗ ᐊᐅᓪᓚᕐᑎᓪᓗᒍ, ᐃᒻᒥᓂᒃ ᐃᖏᕐᕋᓂᐊᕐᒪᑦ ᐃᓄᖃᖏᓪᓗᓂ. 9ᖃᐅᔨᓴᕐᑐᒃᓴᐅᕗᓯ ᓇᒧᓐᖓᐅᖕᒪᖔᑦ; ᑲᔪᓯᑐᐊᕐᐸᑦ ᓄᓇᓕᖕᓄᑦ ᐱᑦ-ᓯᒥᔅᒧᑦ, ᑐᑭᖃᕐᓂᐊᕐᐳᖅ ᐃᓴᕆᐊᓕᒥᐅᑦ ᒎᑎᖓᑕ ᑕᒪᓐᓇ ᐱᐅᖏᑦᑐᐊᓗᒃ ᐊᑑᑎᓚᐅᕐᑕᕗᑦ ᑎᑭᑎᓯᒪᖕᒪᒍ; ᑲᔪᓯᓐᖏᑐᐊᕐᐸᓪᓕ, ᖃᐅᔨᓂᐊᕐᐳᒍ ᑕᒪᓐᓇ ᖃᓂᒪᓇᕐᑐᖅ ᑖᑦᓱᒪ ᑎᑭᑎᓚᐅᖏᒻᒪᒍ; ᓇᓪᓕᐅᑎᔪᕕᓂᑐᐃᓐᓇᐅᒐᔭᕐᐳᕐᓕ.”
10ᑕᕝᕙ ᐊᖑᑎᑦ ᐱᓇᓱᐊᓚᐅᕐᐳᑦ ᐅᖃᐅᑦᔭᐅᑦᔪᑎᒥᖕᓂᒃ, ᐃᒻᒧᒃᓯᐅᒑᖕᓂᒃ ᒪᕐᕉᖕᓂᒃ ᑎᒍᓯᕗᑦ ᑲᓕᒐᕐᒧᐊᕐᓗᒋᒡᓗ, ᓄᕐᕋᖏᒡᓗ ᐊᖏᕐᕋᐅᑎᓪᓗᒋᒃ. 11ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖁᑎᖓ ᑲᓕᒐᕐᒧᐊᕐᐹᑦ, ᐃᒃᓯᕐᕕᖕᒥᒡᓗ ᐃᓗᓕᓕᖕᒥᒃ ᒎᓗᓂᒃ ᓴᓇᓐᖑᐊᕐᓯᒪᔪᓂᒃ ᐊᕕᓐᖓᓐᖑᐊᓂ ᖃᓂᒻᒪᓯᓐᖑᐊᓂᒡᓗ ᓴᓂᐊᓄᐊᕐᓯᓪᓗᑎᒃ. 12ᐃᒻᒧᒃᓯᐅᒊᓪᓗ ᐊᐅᓪᓚᕐᐳᑦ ᐊᖅᑯᑎᒃᑯᑦ ᐱᑦ-ᓯᒥᔅᒧᐊᕆᐊᒃᑯᑦ ᑐᕌᑦᓯᐊᕐᓗᑎᒡᓗ ᑲᔪᓯᕗᑦ, ᐊᖅᑯᑎᒥᑦ ᓴᖑᓐᖏᓚᑦ ᑕᓕᕐᐱᖕᒧᓪᓘᓐᓃᑦ ᓴᐅᒥᖕᒧᓪᓘᓐᓃᑦ, ᐱᓕᔅᑍᓂᒥᐅᓪᓗ ᐊᖓᔪᖅᑳᖏᑕ ᒪᓕᓚᐅᕐᐹᑦ ᐱᑦ-ᓯᒥᔅᓯᐅᑉ ᓄᓇᖓᑕ ᑭᒡᓕᖓᓄᑦ ᑎᑭᓪᓗᒍ.
13ᐱᑦ-ᓯᒥᔅᒥᐅᓪᓕ ᐃᓄᖏᑦ ᓂᐊᖂᔭᒃᓴᓕᕆᓚᐅᕐᐳᑦ ᓄᕗᖏᓐᓂᒃ ᐱᔧᓪᓗᑎ ᓇᕐᓴᒥ; ᑕᑯᓴᕋᒥᒡᓗ ᑕᑯᕗᑦ ᐊᖏᕈᑎᐅᑉ ᐃᒃᓯᕐᕕᖁᑎᖓᓂᒃ, ᖁᕕᐊᓱᒻᒪᕆᓚᐅᕐᐳᓪᓗ ᑕᑯᒐᒥᑦᔪᒃ. 14ᑕᕝᕙ ᑲᓕᒐᖅ ᑎᑭᐅᑎᕗᖅ ᐱᕈᕐᓰᕕᖕᒧᑦ ᐱᒋᔭᐅᔪᒧᑦ ᔮᓱᐊᒧᑦ ᐱᑦ-ᓯᒥᔅᒦᑦᑐᒧᑦ, ᑕᕝᕗᓐᖓᕋᒥᓗ ᓄᖅᑲᕐᐳᖅ. ᐅᔭᕋᒡᔪᐊᑉ ᓴᓂᐊᓄᑦ; ᐃᓄᐃᓪᓗ ᑲᓕᒐᖅ ᓱᕋᒃᑎᕐᓗᒍ ᑭᔪᒃᓴᓕᐊᕆᕚᑦ ᐃᒻᒧᒃᓯᐅᒑᒡᓗ ᑐᖁᓪᓗᒋᒃ ᐃᑯᐊᓪᓚᒃᐰᑦ ᑐᓂᕐᕈᑎᒋᓪᓗᒋᒃ ᐊᑕᓂᕐᒧᑦ. 15ᓕᕔᑏᓪᓗ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓ ᐲᓚᐅᕐᐹᑦ ᐃᒃᓯᕐᕕᒡᓗ ᒎᓗᓂᒃ ᓴᓇᓐᖑᐊᕐᓯᒪᔪᓂᒃ ᐃᓗᓕᓕᒃ ᐱᖃᓯᐅᑎᓪᓗᒍ, ᐅᔭᕋᒡᔪᐊᓪᓗ ᖄᖓᓄᑦ ᐃᓕᕔᑦ; ᑕᕝᕙ ᐱᑦ-ᓯᒥᔅᓯᐅᑉ ᐃᓄᖏᑦ ᐃᑯᐊᓚᑦᓯᓪᓗᑎᒃ ᑐᓂᕐᕈᓯᓚᐅᕐᐳᑦ ᑐᖁᑦᓯᓪᓗᑎᒡᓗ ᑐᓂᕐᕈᓯᕐᓗᑎᒃ ᐅᓪᓗᒥ ᑕᕝᕙᓂ ᐊᑕᓂᕐᒧᑦ. 16ᐱᓕᔅᑍᓂᒥᐅᓪᓗ ᐊᖓᔪᖅᑳᖏᑦ ᑕᓪᓕᒪᑦ ᑕᑯᓐᓇᓚᐅᕐᐳᑦ ᐱᓂᐊᕐᓂᐅᔪᓂᒃ, ᑭᖑᓂᐊᒍᓪᓗ ᐅᑎᕐᐳᑦ ᐅᓪᓗᒥ ᑕᕝᕙᓂᑦᓮᓐᓇᖅ ᐃᑯᕋᓂᒧᑦ.
17ᐱᓕᔅᑍᓂᒥᐅᑦ ᑐᓂᓯᓚᐅᕐᐳᑦ ᒎᓗᓂᒃ ᑕᓪᓕᒪᓂᒃ ᖃᓂᒪᓯᕐᓂᒃ ᐋᖅᑭᒃᑕᐅᔪᓐᓇᖏᑦᑐᓂᒃ ᓴᓇᓐᖑᐊᕐᓯᒪᔪᓂᒃ ᑖᒃᑯᐊ ᑐᓂᕐᕈᑕᐅᓪᓗᑎᒃ ᐊᑕᓂᕐᒧᑦ ᐊᑭᓕᐅᑎᒃᓴᐅᖁᓪᓗᒋᑦ ᐸᓯᔭᒃᓴᐅᓂᕐᒥᖕᓄᑦ: ᐃᒡᓗᒐᓴᖕᓂᑦ ᐅᑯᓇᓐᖓᑦ ᐱᑎᓪᓗᒋᑦ ᐋᔅᑖᑦ, ᒑᓴ, ᐊᓯᑭᓗᓂ, ᒑᑎ, ᐃᑯᕋᓂᒥᓪᓗ. 18ᑐᓂᓯᓚᐅᕆᕗᓪᓗ ᒎᓗᓂᒃ ᐊᕕᓐᖓᓐᖑᐊᓂᒃ, ᐱᓕᔅᑍᓂᒥᐅᑦ ᐊᖓᔪᖅᑳᖏᑕ ᐊᐅᓚᑕᖏᓐᓂᑦ, ᐃᒡᓗᒐᓴᖕᓂᑦ ᓴᐴᓗᑕᓕᖕᓂᑦ ᓴᐴᓗᑕᖃᖏᑦᑐᓂᓪᓗ ᓄᓇᓕᖕᓂᒃ ᑐᑭᖃᕐᑎᓪᓗᒋᑦ. ᐅᔭᕋᒡᔪᐊᖅ ᔮᓱᐊᑉ ᐱᕈᕐᓰᕕᖁᑎᖓᓃᓚᐅᕐᑐᖅ ᐱᑦ-ᓯᒥᔅᒥ, ᖄᖓᓄᓪᓗ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓ ᐃᓕᓚᐅᕐᐹᑦ, ᑖᓐᓇ ᐅᔭᕋᒃᔪᐊᖅ ᑍᑲᓃᖏᓐᓇᕐᐳᖅ ᓱᓕ ᐅᓪᓗᒥᒧᑦ ᐱᓂᐊᕐᓂᐅᓚᐅᕐᑐᖅ ᓇᓗᓁᕐᑕᐅᓯᒪᖁᓪᓗᒍ.
19ᐊᑕᓂᐅᑉ ᐊᖑᑎᑦ ᐃᓚᖏᑦ ᑐᖁᓚᐅᕐᐰᑦ ᐱᑦ-ᓯᒥᔅᒥᐅᑍᑦ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖓᑕ ᐃᓗᐊᓄᑦ ᑕᑯᒋᐊᓚᐅᕐᓂᖏᑦ ᐱᓪᓗᒋᑦ; ᐃᓄᐃᓪᓗ ᕿᒃᓵᓚᐅᕐᐳᑦ ᐊᑕᓂᐅᑉ ᑐᖁᑦᓯᓂᕆᓚᐅᕐᑕᖓ 70ᓂᒃ ᐱᓂᐊᕐᓂᕆᓚᐅᕐᑕᖓᓗ ᐱᑦᔪᑎᒋᓪᓗᒍ.
ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᑕ ᑭᕆᐊᑦ-ᔨᕆᒧᐊᕐᑕᐅᓂᖓ
20ᐱᑦ-ᓯᒥᔅᓯᐅᑉ ᐃᓄᖏᑦ ᐅᖃᓚᐅᕐᐳᑦ, “ᑭᓇ ᓇᖏᕈᓐᓇᕐᐹ ᐊᑕᓂᐅᑉ ᐃᑦᔪᕐᓁᑦᑑᑉ ᒎᑎᐅᑉ ᓵᖓᓂ? ᓇᒧᑦ ᐊᐅᓪᓚᕐᑎᑦᓱᓐᓇᕐᐸᕘᑦ ᐅᕙᑦᑎᓐᓂᒃ ᕿᒪᕉᑎᖁᓪᓗᒍ?” 21ᑕᕝᕙ ᐅᖃᕆᐊᕐᑐᕐᑐᓂᒃ ᑎᓕᓯᕗᑦ ᑭᕆᐊᑦ-ᔨᕆᐅᑉ ᐃᓄᖏᓐᓄᑦ ᐅᖃᖁᓪᓗᒋᑦ ᐃᒫᒃ, “ᐱᓕᔅᑍᓂᒥᐅᓂᑦ ᐅᑎᕐᑎᑕᐅᖕᒪᑦ ᐊᑕᓂᐅᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖁᑎᖓ. ᕾᓗᓯ ᐂᓚᐅᕐᓯᐅᒃ ᐊᖏᕐᕋᐅᑎᓂᐊᕋᑦᓯᐅᒃ.”
Currently Selected:
ᓴᒧᐃᓕ ᓯᕗᓪᓖᑦ 6: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
