ᓴᒧᐃᓕ ᓯᕗᓪᓖᑦ 5
5
ᐊᖏᕈᑎᐅᑉ ᐃᒃᓯᕐᕕᖁᑎᖓᑕ ᐱᓕᔅᑏᓂᒧᐊᕐᑕᐅᓂᖓ
1ᐱᓕᔅᑍᓂᒥᐅᑦ ᑎᒍᓯᒐᒥᒃ ᒎᑎᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᓂᒃ, ᐊᒡᔭᕐᐹ ᐃᐱᓂᓯᕆᒥᑦ ᐃᒡᓗᒐᓴᖁᑎᒥᓄᑦ ᐋᔅᑖᑦᒧᑦ; 2ᑕᕝᕙ ᐱᓕᔅᑍᓂᒥᐅᑦ ᑐᒃᓯᐊᕐᕕᖕᒥᓅᕈᑎᓚᐅᕐᐹᑦ ᒎᑎᓐᖑᐊᒧᑦ ᑍᒐᓐᒧᑦ, ᓴᓇᓐᖑᐊᕐᓯᒪᔪᒧᑦ ᑖᑦᓱᒪᓗ ᓴᓂᐊᓄᐊᕐᐹᑦ. 3ᐅᓪᓛᒻᒪᕆᒃᑯᒃ ᖃᐅᑎᓪᓗᒍ ᐋᔅᑖᑦᒥᐅᑦ ᐃᓄᖏᑦ ᒪᑭᓐᓇᒥᒃ, ᑕᑯᕗᑦ ᒎᑎᓐᖑᐊᖓ ᑍᒐᓐ ᐅᕐᕈᖓᔪᖅ ᐹᒻᒪᖓᓪᓗᓂ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᑕ ᓯᕗᕌᓂ. ᑕᕝᕙ ᑎᒍᕚᑦ ᐅᑎᕐᑎᓪᓗᒍᓗ ᐃᓂᖓᓄᑦ. 4ᖃᐅᑎᓪᓗᒍ ᐅᓪᓛᒻᒪᕆᒃᑯᑦ ᒪᑭᒻᒥᒐᒥᒃ, ᑕᑯᒋᕗᑦ, ᑍᒐᓐ ᐅᕐᕈᖓᔪᖅ ᐹᒻᒪᖓᓪᓗᓂ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᑕ ᓯᕗᕌᓂ, ᓂᐊᖁᐊ ᑕᓕᖏᒡᓗ ᓇᑲᓯᒪᓪᓗᑎᒃ ᓇᑎᕐᒦᑦᑑᒃ; ᑎᒥᖓ ᑭᓯᐊᓂ ᐊᒥᐊᒃᑰᓕᕐᑐᖅ. 5ᑍᒤᒻᒪᑦ ᑍᒐᓐ ᑐᓂᕐᕈᓯᕐᑎᑦᓯᔨᖏᑦ ᑐᒃᓯᐊᕐᑎᖏᓪᓗ ᐃᑎᕐᑐᓕᒫᑦ ᐋᔅᑖᑦᒥ ᑐᒃᓯᐊᕐᕕᖕᒧᐊᕌᖓᒥᒃ ᐃᓂᒋᓚᐅᕐᑕᖓᒍᑦ ᐱᓱᒍᓐᓇᓐᖏᓚᑦ ᐅᓪᓗᒥᒧᑦ ᑎᑭᓪᓗᒍ.
6ᐊᑕᓂᐅᑉ ᐱᔪᓐᓇᕐᓂᖓᑕ ᐋᔅᑖᑦᒥᐅᑦ ᑲᑉᐱᐊᓱᒃᑎᓚᐅᕐᐰᑦ ᓱᒋᐊᕐᓗᒋᓪᓗ, ᐋᔅᑖᑦᒥᐅᑦ ᖃᓂᒋᔭᖓᓃᑦᑐᓪᓗ ᐋᓐᓂᐊᓇᕐᑐᓄᑦ ᐋᖅᑭᒃᑕᐅᔪᓐᓇᖏᑦᑐᓄᑦ. 7ᐋᔅᑖᑦᒥᐅᓪᓗ ᖃᐅᔨᒐᒥᒃ ᖃᓄᐃᓕᐅᕐᕕᐅᓂᕐᒥᖕᓂᒃ ᐅᖃᕐᐳᑦ, “ᐃᓴᕆᐊᓕᒥᐅᑦ ᒎᑎᖓᑦᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᐅᕙᑦᑎᓐᓃᖏᓐᓇᕆᐊᖃᓐᖏᓚᖅ, ᑖᑦᓱᒪ ᐱᔪᓐᓇᕐᓂᖓᓄᑦ ᐊᐅᓚᑕᐅᒻᒪᕆᓕᕋᑦᑕ ᒎᑎᕗᓪᓗ ᑍᒐᓐ ᐱᖃᓯᐅᑎᓪᓗᒍ.” 8ᑍᒤᒻᒪᑦ ᐅᖃᕆᐊᕐᑐᕐᑎᑦᓯᕗᑦ ᑲᑎᖃᑎᖃᕐᓗᑎᒡᓗ ᐱᓕᔅᑍᓂᒥᐅᑦ ᐊᖓᔪᖅᑳᖏᓐᓂᒃ ᐊᐱᕆᓪᓗᒋᓪᓗ, “ᖃᓄᐃᓕᐅᕐᑐᒃᓴᐅᕕᑖ ᐃᓴᕆᐊᓕᒥᐅᑦ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓᓅ?” ᑖᒃᑯᐊ ᑭᐅᕗᑦ, “ᐃᓴᕆᐊᓕᒥᐅᑦ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᒑᑎᒧᐊᕈᑎᓚᐅᕐᓯᐅᒃ,” ᑍᒤᒻᒪᑦ ᐃᓴᕆᐊᓕᒥᐅᑦ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᒑᑎᒧᐊᕈᑎᕚᑦ. 9ᑭᓯᐊᓂᓕ ᑕᕝᕗᓐᖓᕐᑕᐅᓯᒪᓕᕐᒪᑦ, ᐊᑕᓂᐅᑉ ᐱᔪᓐᓇᕐᓂᖓᑕ ᓱᒋᐊᕆᕔᑦ ᑕᕝᕙᓂ ᐃᒡᓗᒐᓴᖕᓃᑦᑐᑦ, ᐅᐃᒪᔮᕐᑎᓪᓗᒋᓪᓗ, ᐋᓐᓂᐊᓇᕐᑐᕐᑖᕐᐳᓪᓗ ᐃᒡᓗᒐᓴᖕᓃᑦᑐᓕᒫᑦ, ᐃᓅᓱᒃᑐᑦ ᐃᓄᑐᕾᓪᓗ ᐊᑦᔨᒌᓂᒃ, ᖃᓂᒪᓇᕐᑐᓄᑦ ᑎᑭᑕᐅᔪᐃᓐᓇᐅᓚᐅᕐᐳᑦ. 10ᑕᕝᕙ ᒎᑎᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓ ᐃᑯᕋᓂᒧᐊᕈᑎᕚᑦ. ᑍᑯᖓᓗ ᑎᑭᐅᑦᔭᐅᖕᒪᑦ, ᐃᑯᕋᓂᒥᐅᑦ ᐃᓄᖏᑦ ᐅᖃᓕᕐᐳᑦ, “ᐃᓴᕆᐊᓕᒥᐅᑦ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᑕᒪᐅᓐᖓᕐᑕᐅᕗᖅ ᐅᕙᑦᑎᓐᓂᒃ ᑐᖁᑦᓯᖁᔭᐅᓪᓗᓂ ᐃᓄᖁᑎᑦᑎᓐᓂᒡᓗ!” 11ᑍᒤᒻᒪᑦ ᐱᓕᔅᑍᓂᒥᐅᑦ ᐊᖓᔪᖅᑳᓕᒫᖏᓐᓂᒃ ᕾᖁᔨᓚᐅᕐᐳᑦ ᑲᑎᖕᒪᑕᓗ ᐅᖃᐅᑎᕔᑦ, “ᐃᓴᕆᐊᓕᒥᐅᑉ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᑕᒫᓐᖓᑦ ᐊᐅᓪᓚᕐᑎᑕᐅᓚᐅᕐᓕ ᐃᓂᖓᓄᓪᓗ ᐅᑎᕐᑎᑕᐅᓗᓂ, ᑐᖁᑕᐅᓂᐊᖏᓐᓇᑦᑕ ᐃᓚᕗᓪᓗ.” ᐃᒡᓗᒐᓴᓕᒫᓂᓗ ᑕᕝᕙᓂ ᐅᐃᒪᔮᕐᓂᖃᕐᐳᖅ ᑐᖁᑕᐅᓂᐊᕋᓱᒋᓪᓗᑎᒃ. 12ᑍᒃᑯᐊᓗ ᑐᖁᖏᑦᑑᒐᓗᐊᑦ ᐋᓐᓂᐊᓇᕐᑐᕐᑖᓚᐅᕐᐳᑦ ᐋᖅᑭᒃᑕᐅᔪᓐᓇᖏᑦᑐᓂᒃ, ᐃᓄᐃᓪᓗ ᐃᒡᓗᒐᓴᓃᑦᑐᑦ ᐃᓗᖏᕐᓱᕐᓗᑎᒃ ᓂᓪᓕᐊᓂᖏᑦ ᕿᓚᖕᒧᑦ ᑎᑭᐅᒪᓕᓚᐅᕐᐳᑦ.
Currently Selected:
ᓴᒧᐃᓕ ᓯᕗᓪᓖᑦ 5: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
