ᓴᒧᐃᓕ ᓯᕗᓪᓖᑦ 4
4
ᐊᖏᕈᑎᐅᑉ ᐃᒃᓯᕐᕕᖁᑎᖓᑕ ᑎᒍᔭᐅᓂᖓ
1ᓴᒧᐃᓕᓗ ᐅᖃᓕᕐᐳᖅ ᐃᓴᕆᐊᓕᒥᐅᓕᒫᓄᑦ. ᐃᓴᕆᐊᓕᒥᐅᑉ ᐅᓇᑕᕆᐊᓕᓚᐅᕐᒪᑕ ᐱᓕᔅᑍᓂᒥᐅᓂᒃ; ᑕᖕᒫᕐᓯᒪᓚᐅᕐᐳᓪᓗ ᐃᐱᓂᓯᕆᒥ, ᐱᓕᔅᑏᓂᒥᐅᑦ ᑕᖕᒫᕐᓯᒪᑎᓪᓗᒋᑦ ᐊᐱᒃᒥ. 2ᑕᕝᕙ ᐱᓕᔅᑍᓂᒥᐅᑦ ᑲᑎᑉᐳᑦ ᐅᓇᑕᕆᐊᕐᓗᑎᒃ ᐃᓴᕆᐊᓕᒥᐅᓂᒃ, ᐅᓇᑕᕕᒃᔪᐊᓕᕋᒥᒡᓗ ᓵᓚᖃᕐᐳᑦ ᐃᓴᕆᐊᓕᒥᐅᓂᒃ, ᑐᖁᑦᓯᓚᐅᕐᐳᓪᓗ ᐊᖑᑎᓂᒃ 4,000ᓂᒃ ᐅᓇᑕᕐᕕᒋᔭᒥᖕᓂ. 3ᐅᓇᑕᕐᑏᓪᓗ ᐅᑎᕐᒪᑕ ᑕᖕᒫᕐᕕᒋᓯᒪᔭᒥᖕᓄᑦ, ᐃᓴᕆᐊᓕᒥᐅᑦ ᐊᖓᔪᖅᑳᖏᑦ ᐅᖃᕐᐳᑦ, “ᓱᖕᒪᑦ ᐊᑕᓂᐅᑉ ᐅᓪᓗᒥ ᐱᓕᔅᑍᓂᒥᐅᑦ ᓵᓚᖃᕐᑎᑉᐰᑦ ᐅᕙᑦᑎᓐᓂᒃ? ᐊᑕᓂᐅᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖓ ᐂᓚᐅᕐᓚᕗᑦ ᓮᓗᐊᒥᑦ, ᐃᓚᒋᓂᐊᕐᒪᑎᒍᑦ ᐱᐅᓕᓗᑕᓗ ᐊᑭᕋᑦᑕ ᐱᔪᓐᓇᕐᓂᖏᓐᓂᑦ.” 4#ᒨᓯᓯ ᐂᑉᐸᖏᑦ 25:22.ᑕᕝᕙ ᑎᓕᓯᕗᑦ ᐅᖃᕆᐊᕐᑐᕐᑐᓂᒃ ᓮᓗᐊᒧᑦ, ᐊᑕᓂᐅᓪᓗ ᐊᔪᒐᖃᖏᑦᑑᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖓ ᓇᒃᓴᕐᐹᑦ, ᐃᒃᓯᕙᐅᑕᕐᔪᐊᖃᕐᑑᑉ ᓯᕌᐲᑦ ᐃᓴᕈᓖᒃ ᖁᓛᓂ; ᐃᓔᓪᓗ ᐃᕐᓂᖏᒃ ᕼᐅᐱᓂᓗ ᐱᓂᕼᐋᔅᓗ, ᐃᓚᐅᕗᒃ ᐊᖏᖃᑎᒌᖕᓂᐅᑉ ᐃᒃᓯᕐᕕᖓ ᑕᕝᕗᓐᖓᕐᑕᐅᑎᓪᓗᒍ.
5ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓ ᑎᑭᐅᑦᔭᐅᖕᒪᑦ ᑕᖕᒫᕐᓯᒪᕕᖓᓐᓄᑦ, ᐃᓴᕆᐊᓕᒥᐅᓕᒫᑦ ᖁᕕᐊᓱᖕᓂᕐᒧᑦ ᕾᒐᓛᕐᒪᑕ, ᓄᓇ ᓴᔪᒃᐳᖅ. 6ᐱᓕᔅᑍᓂᒥᐅᑦ ᑐᓴᕋᒥᒃ ᕾᒐᓛᕐᑐᓂᒃ ᐅᖃᕐᐳᑦ, “ᕾᒐᓛᕐᑐᓂᒃᑯᐊ ᐄᑉᕈᐃᑦ ᑕᖕᒫᕐᓯᒪᕕᖓᓐᓂᑦ! ᖃᓄᐃᓕᐅᓕᕐᑐᑦ?” ᑐᓴᕋᒥᒡᓗ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓᑕ ᑎᑭᐅᑦᔭᐅᓂᖓᓂᒃ ᐄᑉᕈᐃᑦ ᑕᖕᒫᕐᓯᒪᕕᒋᔭᖓᓄᑦ, 7ᐱᓕᔅᑍᓂᒥᐅᑦ ᑲᑉᐱᐊᓱᓕᕐᐳᑦ; ᐅᖃᕐᓗᑎᒡᓗ, “ᒎᑎ ᑕᖕᒫᕐᓯᒪᕕᖓᓐᓄᐊᕐᑕᐅᕗᖅ! ᓵᓚᐅᓂᐊᓕᕐᐳᒍᑦ! ᑍᒫᒃ ᑕᒪᑐᒪ ᓯᕗᓂᖓᒍᑦ ᐱᓂᐊᕐᕕᐅᓚᐅᕐᓯᒪᓐᖏᓚᒍᑦ! 8ᓵᓚᐅᓂᐊᓕᕐᐳᒍᑦ! ᑭᓇᒨᓪᓕ ᐱᐅᓕᔭᐅᔪᓐᓇᕐᐱᑕ ᒎᑎᓂᑦ ᐱᔪᓐᓇᕐᑐᕐᔪᐊᓃᑦ? ᑍᒃᑯᐊᖑᖕᒪᑕ ᒎᑏᑦ ᐊᓯᕈᐃᓚᐅᕐᑐᑦ ᐄᑦᔨᑉᑎᒥᐅᓂᒃ ᖃᓄᐃᑦᑐᑐᐃᓐᓇᓄᑦ ᐃᓄᖃᖏᑦᑐᒥ! 9ᓯᕘᕋᑦᑍᓕᒋᑦᓯ ᐱᓕᔅᑍᓂᒥᐅᑦ! ᐅᓇᑕᕆᑦᓯ ᐊᖑᑎᑎᑐᑦ, ᑍᒤᓐᖏᑐᐊᕈᑦᑕ ᓯᐊᓛᖑᓕᕐᓂᐊᕐᐳᒍᑦ ᐄᑉᕈᐃᓄᑦ, ᓲᕐᓗ ᑍᒫᒃ ᓯᐊᓛᕆᓚᐅᕋᑦᑎᒍᑦ; ᑍᒤᒻᒪᑦ ᐅᓇᑕᕆᑦᓯ ᐊᖑᑎᑎᑐᑦ!”
10ᑕᕝᕙ ᐱᓕᔅᑍᓂᒥᐅᑦ ᐅᓇᑕᓚᐅᕐᐳᑦ ᐊᒃᓱᕈᕐᓗᑎᒃ, ᐃᓴᕆᐊᓕᒥᐅᓪᓗ ᓵᓚᒋᓚᐅᕐᐰᑦ, ᑖᒃᑯᐊᓗ ᕿᒫᕗᑦ, ᐅᓪᓚᒡᓗᑎᒃ ᐊᖏᕐᕋᒥᖕᓄᑦ; ᑐᖁᕋᕐᑕᐅᓂᕐᔪᐊᕐᑕᖃᓚᐅᕐᐳᕐᓗ: ᐃᓴᕆᐊᓕᒥᐅᑦ 30,000 ᐅᓇᑕᕐᑏᑦ ᑕᕝᕙᓂ ᑐᖁᑕᐅᓚᐅᕐᐳᑦ. 11ᒎᑎᐅᓪᓗ ᐊᖏᖃᑎᒌᖕᓂᖓᑕ ᐃᒃᓯᕐᕕᖓ ᑎᒍᔭᐅᓚᐅᕐᐳᖅ; ᐃᓔᓪᓗ ᐃᕐᓂᖏᒃ, ᕼᐅᐱᓂᓗ ᐱᓂᕼᐋᔅᓗ ᑕᕝᕙᓂ ᑐᖁᑕᐅᓚᐅᕐᐴᒃ.
ᐃᓔᑉ ᑐᖁᓂᖓ
12ᐊᖑᑦ ᐱᓐᔭᒥᓂᐅᑉ ᑭᖑᕚᖏᓐᓂᑦ ᐱᔪᖅ ᐅᓪᓔᓐᓇᕐᓗᓂᖅ ᐅᓇᑕᕐᕕᐅᔪᒥᑦ ᓮᓗᐊᒧᑦ ᑎᑭᑉᐳᖅ, ᐊᓐᓄᕌᖏᑦ ᐊᓕᒃᑐᕐᓯᒪᓪᓗᑎᒃ ᓂᐊᖁᖓᓗ ᐳᔪᕋᒥᑎᕐᓯᒪᓪᓗᓂ. 13ᑕᕝᕗᖓᓗ ᑎᑭᒻᒪᑦ, ᐃᓔ ᐃᒃᓯᕙᓚᐅᕐᐳᖅ ᐊᖅᑯᑎᐅᑉ ᓴᓂᐊᓂ ᖃᐅᔨᓴᕐᓗᓂ, ᐆᒻᒪᑎᒥᒍᑦ ᐃᓱᒪᔮᕈᑎᖃᕐᓗᓂ ᒎᑎᐅᑉ ᐊᖏᖃᑎᒌᖕᓂᖓᑕ ᐃᒃᓯᕐᕕᖓᓂᒃ. ᐊᖑᑦ ᑖᓐᓇ ᑕᕝᕗᖓ ᑎᑭᓐᓇᒥ ᑐᓴᕐᑎᑦᓯᓚᐅᕐᐳᖅ ᐃᒡᓗᒐᓴᖕᓃᑦᑐᓂᒃ, ᐃᒡᓗᒐᓴᖕᓃᑦᑐᓕᒫᓪᓗ ᕿᐊᓕᕐᐳᑦ. 14ᐃᓔᓕ ᑐᓴᕋᒥ ᓂᐱᓂᒃ ᕿᐊᕙᓗᖕᓂᒃ ᐊᐱᕆᕗᖅ, “ᓱᖕᒪᑦ ᓂᐹᔪᐊᓘᕕᓯ?” ᑍᓐᓇ ᐊᖑᑦ ᑐᐊᕕᕐᓗᓂ ᐃᓔᒧᐊᕐᐳᖅ ᐅᖃᐅᑎᓪᓗᒍᓗ ᐱᓂᐊᕐᓂᐅᓯᒪᔪᓂᒃ. 15ᐃᓔᓕ ᐊᕐᕌᒍᖃᓕᓚᐅᕐᐳᖅ 98ᓂᒃ ᑕᐅᑐᒍᓐᓃᓕᕐᓗᓂᓗ. 16ᐊᖑᑎᐅᓪᓗ ᐃᓔ ᐅᖃᐅᑎᕚ, “ᕿᒪᒃᓯᓚᐅᕐᐳᖓ ᐅᓇᑕᕐᕕᐅᔪᒥᑦ; ᐅᓪᓔᓐᓇᕐᓗᖓᓗ ᑕᒪᐅᖓ.” ᐃᓔ ᐊᐱᕆᕗᖅ, “ᖃᓄᐃᑦᑐᖃᕐᒪᑦ ᐃᕐᓃᒃ?”
17ᐅᖃᕆᐊᕐᑐᕐᓯᒪᔪᖅ ᑭᐅᕗᖅ ᐅᖃᕐᓗᓂ, “ᐃᓴᕆᐊᓕᒥᐅᑦ ᕿᒫᓚᐅᕐᐳᑦ ᐱᓕᔅᑍᓂᒥᐅᓂᑦ; ᐅᓄᕐᑐᕐᔪᐊᓪᓗ ᑐᖁᑕᐅᓪᓗᑎᒃ; ᐃᕐᓃᒃᑭᒡᓗ ᕼᐅᐱᓂᓗ ᐱᓂᕼᐋᔅᓗ ᑐᖁᑕᐅᕘᒃ, ᒎᑎᐅᓪᓗ ᐊᖏᕈᑎᖓᑕ ᐃᒃᓯᕐᕕᖓ ᑎᒍᔭᐅᓪᓗᓂ.”
18ᐊᖑᓪᓗ ᐅᖃᓚᐅᕐᒪᑦ ᐊᖏᕈᑎᐅᑉ ᐃᒃᓯᕐᕕᖓᓂᑦ, ᐃᓔ ᓂᕕᕐᐳᖅ ᐃᒃᓯᕙᕕᖕᒥᓂᑦ ᐃᑎᕐᑕᕐᕕᐅᑉ ᓴᓂᐊᓂ; ᐅᕐᕈᒐᒥ ᖁᖓᓯᐊ ᓇᐱᕗᖅ ᑐᖁᓪᓗᓂᓗ, ᐃᓄᑐᖃᐅᓕᓚᐅᕐᒪᑦ, ᐅᖁᒤᑦᑑᓪᓗᓂᓗ. ᐃᓴᕆᐊᓕᒥᐅᓄᑦ ᐃᖅᑲᕐᑐᐃᔨᐅᓚᐅᕐᐳᖅ ᐊᕐᕌᒍᓂᒃ 40ᓂᒃ.
ᕕᓂᕼᐊᔅ ᓄᓕᐊᕕᓂᖓᑕ ᐃᕐᓂᕐᑖᕐᓂᖓ
19ᐃᓔᓪᓕ ᐅᑯᐊᖓ, ᐱᓂᕼᐋᓯᐅᑉ ᓄᓕᐊᖓ, ᓯᖎᓚᐅᕐᐳᖅ ᐃᕐᓂᕕᒃᓴᖓᓗ ᓇᓪᓕᐅᑎᓯᒪᓕᕐᓗᓂ. ᑐᓴᕋᒥᓗ ᒎᑎᐅᑉ ᐊᖏᕈᑎᖓᑕ ᐃᒃᓯᕐᕕᖓᑕ ᑎᒍᔭᐅᓂᖓᓂᒃ, ᓴᑭᖓᓗ ᐅᐃᖓᓗ ᑐᖁᓂᖏᓐᓂᒃ, ᐃᕐᓂᓱᐊᓚᕿᓚᐅᕐᐳᖅ; ᐃᕐᓂᒐᒥᓗ ᐋᓐᓂᐊᒻᒪᕆᓚᐅᕐᐳᖅ. 20ᑐᖁᓕᕐᑎᓪᓗᒍᓗ ᐊᕐᓁᑦ ᐃᑲᔪᓚᐅᕐᑐᑦ ᐅᖃᕐᐳᑦ ᑖᑦᓱᒧᖓ, “ᓯᕘᕋᑦᑍᓕᒋᑦ, ᐃᕐᓂᕐᑖᕐᐳᑎᑦ!” ᑭᓯᐊᓂᓕ ᑭᐅᓚᐅᓐᖏᓚᖅ ᐃᒃᐱᒍᓱᒐᓂᓘᓐᓃᑦ. 21ᑕᕝᕙ ᐃᕐᓂᕐᑖᓂ ᐊᑦᓯᕐᐹ ᐃᑲᐸᑦᒥᒃ, ᐅᖃᕐᓗᓂᓗ, “ᐊᑕᓂᐅᑉ ᐱᓐᓇᕐᓇᕐᓂᖓᑕ ᐃᓴᕆᐊᓕᒥᐅᑦ ᕿᒪᖕᒪᒋᑦ!” ᐱᑦᔪᑎᖃᕐᓗᓂ ᐊᖏᕈᑎᐅᑉ ᐃᒃᓯᕐᕕᖓᑕ ᑎᒍᔭᐅᓂᖓᓂᒃ ᓴᑭᖓᑕᓗ ᐅᐃᖓᑕᓗ ᑐᖁᓂᖏᓐᓂᒃ. 22ᐅᖃᕐᐳᕐᓗ, “ᐊᑕᓂᐅᑉ ᐱᓐᓇᕐᓇᕐᓂᖓᑕ ᐃᓴᕆᐊᓕᒥᐅᑦ ᕿᒪᒃᐰᑦ, ᒎᑎᐅᑉ ᐊᖏᕈᑎᖓᑕ ᐃᒃᓯᕐᕕᖓ ᑎᒍᔭᐅᖕᒪᑦ.”
Currently Selected:
ᓴᒧᐃᓕ ᓯᕗᓪᓖᑦ 4: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
