ᓴᒧᐃᓕ ᓯᕗᓪᓖᑦ 3
3
ᐊᑕᓂᐅᑉ ᓴᖅᑭᓐᓂᖓ ᓴᒧᐃᓕᒧᑦ
1ᓱᕈᓯᖅ ᓴᒧᐃᓕ ᐱᔨᑦᓯᓚᐅᕐᐳᖅ ᐊᑕᓂᕐᒥᒃ ᐃᓔᒧᑦ ᑲᒪᒋᔭᐅᓪᓗᓂ. ᐊᑕᓂᐅᑉ ᐅᖃᐅᓯᖏᑦ ᑐᓴᕐᑕᐅᔪᓐᓇᓚᐅᓐᖏᓚᑦ ᐅᓪᓗᓂ ᑖᒃᑯᓇᓂ, ᑕᑯᑎᑕᐅᔪᖃᓚᐅᕐᓯᒪᓇᓂᓗ ᖃᒻᒥᒃᑯᑦ. 2ᑍᑦᓱᒪᓂᐅᑎᓪᓗᒍ, ᐃᓔ ᑕᐅᑐᑦᓯᐊᕈᓐᓃᓚᐅᕐᐳᖅ, ᓇᓪᓚᖓᑎᓪᓗᒍ ᐃᒡᓗᕈᓯᕐᒥᓂ; 3ᒎᑎᐅᑉ ᓇᓂᕈᐊᖁᑎᖓ ᐃᑯᒪᑎᓪᓗᒍ ᓱᓕ, ᓴᒧᐃᓕ ᓇᓪᓚᖓᓪᓗᓂ ᓯᓂᒐᓱᓕᕐᑎᓪᓗᒍ ᐊᑕᓂᐅᑉ ᑐᐱᖓᓂ, ᑕᕝᕙᓂ ᒎᑎᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᑕ ᓇᔪᕐᑕᖓᓂ. 4ᐊᑕᓂᐅᑉ ᕾᖁᕚ, “ᓴᒧᐃᓖ! ᓴᒧᐃᓖ!” ᑭᐅᕗᕐᓗ, “ᒫᓃᑉᐳᖓ!” 5ᐅᓪᓚᒡᓗᓂᓗ ᐃᓔᒧᐊᕐᐳᖅ, ᐅᖃᐅᑎᓪᓗᒍᓗ, “ᕾᖁᒐᕕᓐᖓ, ᑕᕝᕙᓃᑉᐳᖓ.” ᐃᓔᑉ ᑭᐅᕚ, “ᕾᖁᓚᐅᓐᖏᓚᒋᑦ; ᓯᓂᒋᐊᕐᑐᒃᑲᓐᓂᓕᕆᑦ.” ᓴᒧᐃᓕᓗ ᐅᑎᕋᒥ ᓯᓂᒐᓱᓕᕆᕗᖅ.
6ᐊᑕᓂᐅᑉ ᕾᖁᒃᑲᓐᓂᕐᐹ, “ᓴᒧᐃᓖ!” ᓴᒧᐃᓕᓗ ᒪᑭᓐᓇᒥ ᐃᓔᒧᐊᕐᐳᖅ, ᐅᖃᐅᑎᓪᓗᒍᓗ, “ᕾᖁᒐᕕᓐᖓ, ᑕᕝᕙᓃᑉᐳᖓ.” ᐃᓔᑉ ᑭᐅᕚ, “ᐃᕐᓃᒃ ᕾᖁᓚᐅᓐᖏᓚᒋᑦ; ᓯᓂᒋᐊᕐᑐᒃᑲᓐᓂᓕᕆᑦ.” 7ᓴᒧᐃᓕᓕ ᓱᓕ ᖃᐅᔨᒪᓚᐅᓐᖏᓚᖅ ᐊᑕᓂᐅᖕᒪᖔᑦ, ᐊᑕᓂᖅ ᐅᖃᓪᓚᓚᐅᕐᓯᒪᖏᒻᒪᑦ ᓱᓕ ᑖᑦᓱᒧᖓ.
8ᐊᑕᓂᐅᑉ ᕾᖁᒋᕚ ᓴᒧᐃᓕ ᐱᖓᔪᐊᓐᓂ; ᒪᑭᓐᓇᒥᓗ, ᐃᓔᒧᐊᕐᐳᖅ, ᐅᖃᐅᑎᓪᓗᒍᓗ, “ᕾᖁᒐᕕᓐᖓ, ᑕᕝᕙᓃᑉᐳᖓ.” ᐃᓔᓕ ᒪᓗᒍᓱᓕᕐᐳᖅ ᐊᑕᓂᐅᑉ ᕾᖁᖕᒪᒍ ᓱᕈᓯᖅ. 9ᑍᒤᒻᒪᑦ ᐃᓔᑉ ᐅᖃᐅᑎᓕᕐᐹ ᓴᒧᐃᓕ, “ᐅᑎᓕᕆᑦ, ᓯᓂᒡᕕᖕᓄᑦ; ᕾᖁᔭᐅᓕᕐᒥᒍᕕᑦ ᐃᒤᓕᓂᐊᓕᕐᐳᑎᑦ, ‘ᐊᑕᓃᖅ ᐅᖃᓕᕆᑦ, ᐱᔩᑦ ᓈᓚᖕᒪᑦ.’” ᓴᒧᐃᓕ ᐅᑎᕋᒥ ᓇᓪᓚᖓᓕᕆᕗᖅ.
10ᐊᑕᓂᕐᓗ ᐅᑎᕐᐳᖅ ᓇᖏᓕᕐᓗᓂᓗ, ᓂᓪᓕᕆᕗᓪᓗ ᓲᕐᓗ ᑍᒤᓚᐅᕋᒥ, “ᓴᒧᐃᓖ! ᓴᒧᐃᓖ!” ᓴᒧᐃᓕ ᐅᖃᕐᐳᖅ, “ᐅᖃᓕᕆᑦ; ᐱᔩᑦ ᓈᓚᖕᒪᑦ.”
11ᑕᕝᕙ ᐊᑕᓂᐅᑉ ᓴᒧᐃᓕ ᐅᖃᐅᑎᕚ, “ᑕᑯᒋᑦ, ᐱᓇᓱᐊᕈᒪᓕᕐᐳᖓ ᐃᓴᕆᐊᓕᒥᐅᓄᑦ, ᓯᐅᑎᓖᓪᓗ ᓇᓪᓕᐊᑦ ᑐᓴᕐᑐᑦ ᖁᐊᕐᓵᕈᒫᕐᐳᑦ. 12ᐅᓪᓗᖅ ᓇᓪᓕᐅᑎᒃᐸᑦ ᐅᖃᐅᓯᕆᓚᐅᕐᑕᒃᑲ ᓇᓚᐅᑦᓯᑎᑦᓱᒫᕐᐸᒃᑲ ᐃᓔᑉ ᐃᓚᖏᓐᓄᑦ, ᐱᒋᐊᕐᓂᖓᓂᑦ ᐃᓱᐊᓄᑦ. 13ᐅᖃᐅᑎᓚᐅᕐᐸᕋ ᐃᓚᖏᑦ ᓱᒋᐊᕐᓂᐊᕐᓂᕋᓕᕐᓗᒋᑦ ᐃᓱᖃᖏᑦᑐᒧᑦ, ᐃᓔᑉ ᖃᐅᔨᒪᓚᐅᕐᐰᖅ ᐱᐅᖏᑦᑐᓕᓂᖏᑦ, ᐃᕐᓂᖏᑦ ᐅᖃᕐᓂᕐᓘᑦᔨᓚᐅᕐᒪᑕ ᒎᑎᒥᒃ, ᐃᓂᕐᑎᓚᐅᓐᖏᓔᓪᓕ. 14ᑍᒤᒻᒪᑦ ᐊᖏᒻᒪᕆᒃᐳᖓ ᓇᓗᓁᕐᓯᓪᓗᖓ ᐃᓔᑉ ᐃᓚᖏᓐᓄᑦ; ᐃᓔᑉ ᐃᓚᖏᑕ ᐱᐅᖏᑦᑐᓕᓂᖏᑦ ᐲᕐᑕᐅᓂᐊᓐᖏᓚᑦ ᑐᖁᑦᓯᓗᓂ ᑐᓂᕐᕈᓯᕐᓂᒃᑯᑦ ᑐᓂᕐᕈᓯᕐᓃᑦ ᐊᓯᖏᑎᒍᓪᓘᓐᓃᑦ ᐃᓱᖃᖏᑦᑐᒧᑦ.”
15ᓴᒧᐃᓕᓕ ᐃᓐᓇᖎᓐᓇᕐᐳᖅ ᐅᓪᓛᒧᑦ ᑎᑭᓪᓗᒍ; ᒪᑭᓐᓇᒥᓗ ᐊᑕᓂᐅᑉ ᐃᒡᓗᖓᑕ ᐅᒃᑯᐊᖏᑦ ᒪᑐᐃᕐᐰᑦ. ᓴᒧᐃᓕᓕ ᓯᕘᕋᓚᐅᕐᐳᖅ ᐅᖃᐅᑦᔨᒋᐊᒃᓴᖅ ᐃᓔᒥᒃ ᑕᑯᑎᑕᐅᑦᔪᑎᒥᓂᒃ. 16ᐃᓔᓪᓕ ᕾᖁᕚ ᐅᖃᐅᑎᓪᓗᒍᓗ, “ᓴᒧᐃᓖ, ᐃᕐᓃᒃ!” ᓴᒧᐃᓕ ᑭᐅᕗᖅ, “ᑕᒫᓃᑉᐳᖓ.”
17ᐃᓔᓪᓗ ᐊᐱᕆᕚ, “ᖃᓄᖅ ᐊᑕᓂᐅᑉ ᐅᖃᐅᑎᓚᐅᕐᐹᑎᑦ? ᐃᔨᕐᓯᒪᕕᒋᑦᑍᓕᓐᖓ. ᒎᑎᐅᑉ ᓱᒋᐊᕈᒫᕐᐹᑎᑦ ᐅᕙᓐᓄᑦ ᐅᖃᖏᒃᑯᕕᑦ ᐅᖃᐅᓯᕆᓚᐅᕐᑕᓕᒫᖏᓐᓂᒃ.” 18ᑍᒤᒻᒪᑦ ᓴᒧᐃᓕᐅᑉ ᐅᖃᐅᑎᓚᐅᕐᐹ ᐅᖃᐅᑎᔭᐅᑦᔪᑎᓕᒫᒥᓂᒃ ᓇᓪᓕᐊᓐᓂᒡᓘᓐᓃᑦ ᐅᖃᕐᑍᓕᒪᓇᓂ. ᐃᓔᓗ ᐅᖃᕐᐳᖅ, “ᐊᑕᓂᐅᕗᖅ; ᑖᑦᓱᒪ ᐱᐅᓂᕐᐹᖑᔪᕆᔭᓂ ᐊᑐᕐᓂᐊᕐᐹ.”
19ᓴᒧᐃᓕᓕ ᐱᕈᕐᐸᓪᓕᐊᓚᐅᕐᐳᖅ, ᐊᑕᓂᐅᓪᓗ ᐃᓚᒋᓚᐅᕐᐹ ᓱᓕᑎᖃᑦᑕᓚᐅᕐᐰᓪᓗ ᓴᒧᐃᓕᐅᑉ ᐅᖃᐅᓯᕆᔭᓕᒫᖏᑦ. 20ᐃᓴᕆᐊᓕᒥᐅᑦ ᐃᓄᓕᒫᖏᑦ ᑖᓐᒥᑦ ᐱᐊᕐᓯᐸᒧᑦ ᖃᐅᔨᒪᓕᓚᐅᕐᐳᑦ ᓴᒧᐃᓕ ᐊᑕᓂᐅᑉ ᐅᖃᕐᑎᒋᓕᕐᒪᒍ. 21ᐊᑕᓂᕐᓗ ᓴᖅᑭᒃᑲᓐᓂᓚᐅᕐᐳᖅ ᓮᓗᐊᒥ, ᑍᑲᓂ ᐊᑕᓂᖅ ᐃᒻᒥᓂᒃ ᓴᖅᑭᑎᓚᐅᕐᐳᖅ ᓴᒧᐃᓕᒧᑦ ᐅᖃᐅᓯᕐᒥᒍᑦ.
Currently Selected:
ᓴᒧᐃᓕ ᓯᕗᓪᓖᑦ 3: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
