ᓴᒧᐃᓕ ᓯᕗᓪᓖᑦ 31
31
ᓴᐅᓕᐅᑉ ᐃᕐᓂᖏᑕᓗ ᑐᖁᓂᖏᑦ
ᑯᕉᓂᑲ ᓯᕗᓪᓖᑦ 10:1-12
1ᐱᓕᔅᑍᓂᒥᐅᑦ ᐅᓇᑕᓚᐅᕐᐳᑦ ᐃᓴᕆᐊᓕᒥᐅᓂᒃ ᖃᖅᑲᒥ ᒋᐅᓪᐳᐊᒥ, ᐃᓴᕆᐊᓕᒥᐅᑦ ᑐᖁᑕᐅᓚᐅᕐᐳᑦ ᐅᓄᕐᑐᐊᓗᐃᑦ, ᐊᖓᔪᖅᑳᕐᔪᐊᕐᓕ ᓴᐅᓕ, ᐃᕐᓂᖏᓪᓗ ᐊᓯᖏᓪᓗ ᕿᒫᓚᐅᕐᐳᑦ. 2ᐱᓕᔅᑍᓂᒥᐅᓪᓕ ᐊᖑᓯᕗᑦ ᓴᐅᓕᒥᒃ ᐃᕐᓂᖏᓐᓂᒡᓗ ᐱᖓᓱᓂᒃ ᔫᓇᑕᓂ, ᐊᐱᓇᑕᑉ ᒪᓪᑭᓱᐊᓗ ᑖᒃᑯᐊᓗ ᑐᖁᑕᐅᕗᑦ. 3ᐅᓇᑕᕐᓂᕐᓕ ᐊᒃᓱᕈᕐᓇᒻᒪᕆᓕᓚᐅᕐᐳᖅ ᓴᐅᓕᒧᑦ, ᐱᓯᒃᑖᕐᑎᒧᓪᓗ ᐱᓯᒃᑕᐅᓚᐅᕐᐳᖅ ᐊᑦᑕᕐᓇᕐᑐᒃᑯᑦ. 4ᐅᕕᒃᑲᒧᑦ ᐅᖃᕐᐳᖅ ᓱᒋᐅᑎᖏᓐᓂᒃ ᐊᒃᔭᕐᓯᔨᒧᑦ, “ᓴᕕᒡᔪᐊᑦ ᑎᒍᓗᒍ ᑐᖁᓚᐅᓐᖓ, ᒎᑎᖃᖏᑦᑐᑦ ᐱᓕᔅᑍᓂᒥᐅᑦ ᑐᖁᑦᓯᖁᓇᒋᑦ ᐅᕙᓐᓂᒃ ᐱᔪᕆᑦᔪᑕᐅᖁᓇᖓᓗ.” ᐅᕕᒃᑲᕐᓕ ᑍᒤᓕᐅᕈᒪᓚᐅᓐᖏᓚᖅ ᑲᑉᐱᐊᓱᓗᐊᓚᐅᕋᒥ. ᑍᒤᒻᒪᑦ ᓴᐅᓕᐅᑉ ᓴᕕᒡᔪᐊᓂ ᓇᑉᐸᕐᓗᓂᐅᒃ ᒪᓂᖅᑲᒧᑦ ᐃᒻᒥᓂᒃ ᐅᕐᕈᕕᒋᕚ ᑲᐱᓪᓗᓂ. 5ᐅᕕᒃᑲᐅᓪᓕ ᓴᐅᓕ ᑕᑯᒐᒥᐅᒃ ᑐᖁᔪᖅ, ᐃᒻᒥᓂᒃᑕᐅᖅ ᓴᕕᒡᔪᐊᒥᓂᒃ ᖃᓚᓯᓪᓗᓂ ᑐᖁᓚᐅᕆᕗᖅ, ᓴᐅᓕ ᑐᖁᖃᑎᒋᓪᓗᒍ. 6ᑍᒫᒃ ᑕᕝᕙ ᓴᐅᓕᒃᑯᑦ ᐃᕐᓂᖏᓪᓗ ᐱᖓᓱᑦ ᑐᖁᓚᐅᕐᐳᑦ; ᓴᐅᓕᐅᓪᓗ ᐱᖃᑎᒋᔭᓕᒫᖏᑦ ᑐᖁᓚᐅᕐᐳᑦ ᐅᓪᓗᒥ ᑕᕝᕙᓂᑦᓮᓐᓇᖅ. 7ᐃᓴᕆᐊᓕᒥᐅᓪᓕ ᔨᓴᕆᐊᑉ ᓇᕐᓴᖓᑕ ᐊᑭᐊᓃᑦᑐᑦ ᔪᐊᕐᑕᓂᐅᑉ ᑰᖓᑕ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᑦ ᑐᓴᕋᒥᒃ ᐃᓴᕆᐊᓕᒥᐅᑦ ᕿᒫᓂᖏᓐᓂᒃ ᓴᐅᓕᒃᑯᓪᓗ ᐃᕐᓂᕇᑦ ᑐᖁᑕᐅᓂᖏᓐᓂᒃ, ᓄᓇᓕᖕᒥᖕᓂᒃ ᕿᒤᓐᓁᓚᐅᕐᐳᑦ ᕿᒪᒃᓯᓪᓗᑎᒃ; ᐱᓕᔅᑍᓂᒥᐅᓪᓕ ᑕᕝᕗᓐᖓᕋᒥᒃ ᑕᕝᕙᓂ ᓄᓇᑖᓚᐅᕐᐳᑦ.
8ᖃᐅᑎᓪᓗᒍ ᐅᓇᑕᕇᕐᓯᒪᓕᕋᒥᒃ ᐱᓕᔅᑍᓂᒥᐅᑦ ᐱᑖᕆᐊᕐᑐᓚᐅᕐᐳᑦ ᑐᖁᖓᔪᓂᑦ ᓴᐅᓕᐅᓪᓗ ᐃᕐᓂᖏᑕᓗ ᑎᒥᖏᑦ ᑕᑯᒐᒥᑦᔪᒃ ᓇᓚᔪᑦ ᒪᓂᖅᑲᒥ ᖃᖅᑲᒥ ᒋᐅᓪᐳᐊᒥ. 9ᓴᐅᓕ ᓂᐊᖁᐃᓚᐅᕐᐹᑦ ᓴᐴᓗᑕᖏᓪᓗ ᐲᔭᕐᓗᒋᑦ, ᐅᖃᕆᐊᕐᑐᕐᑎᑦᓯᓚᐅᕐᐳᓪᓗ ᐱᓕᔅᑍᓂᒥᐅᓕᒫᓄᑦ ᐃᓄᖁᑎᒥᖕᓄᑦ ᒎᑎᓐᖑᐊᒥᖕᓄᓪᓗ. 10ᐅᓇᑕᐅᑎᖏᓪᓗ ᐃᓕᓚᐅᕐᐰᑦ ᑐᒃᓯᐊᕐᕕᖁᑎᒥᖕᓄᑦ ᒎᑎᓐᖑᐊᒧᑦ ᐋᔅᑕᕉᑎᒧᑦ, ᑎᒥᖓᓗ ᐊᑭᓐᓇᒧᑦ ᑭᑭᐊᒃᑕᐅᓚᐅᕐᐳᖅ ᐃᒡᓗᒐᓴᒧᑦ ᐱᑦ-ᓵᓂᒧᑦ.
11ᐃᓄᐃᓪᓕ ᔭᐲᓯ-ᒋᓖᑎᒥᐅᑦ ᑐᓴᕋᒥᒃ ᐱᓕᔅᑍᓂᒥᐅᑦ ᐱᓂᐊᕐᓂᖏᓐᓂᒃ ᓴᐅᓕᒧᑦ, 12ᓯᕘᕋᖏᓐᓂᕐᐹᑦ ᐊᖑᑏᑦ ᐅᓐᓄᐊᓕᒫᖅ ᐱᓱᓚᐅᕐᐳᑦ ᐱᑦ-ᓵᓂᒧᑦ, ᓴᐅᓕᐅᓪᓗ ᐃᕐᓂᖏᑕᓗ ᑎᒥᖏᑦ ᑎᒍᓚᐅᕐᐰᑦ, ᐅᑎᕐᑎᓪᓗᒋᓪᓗ ᔭᐲᓯᒧᑦ, ᑕᕝᕙᓂᓗ ᑎᒥᖏᑦ ᐃᑯᐊᓪᓚᓚᐅᕐᐰᑦ. 13ᓴᐅᓂᖏᓪᓗ ᐃᓗᕕᓚᐅᕐᐰᑦ ᑕᒪᕆᔅᑭ ᓇᐹᕐᑑᑉ ᐊᑖᓄᑦ ᓄᓇᓕᖕᓂ ᔭᐲᓯᒥ, ᓂᕆᑦᑍᓕᓕᓚᐅᕐᐳᓪᓗ ᐅᓪᓗᓂᒃ 7ᓂᒃ.
Currently Selected:
ᓴᒧᐃᓕ ᓯᕗᓪᓖᑦ 31: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
