ᓴᒧᐃᓕ ᓯᕗᓪᓖᑦ 30
30
ᐅᓇᑕᕐᓃᑦ ᐊᒪᓕᑬᑎᒥᐅᓂᒃ
1ᐅᓪᓗᐃᑦ ᐱᖓᓱᑦ ᐊᓂᒍᕐᑎᓪᓗᒋᑦ ᑍᕕᑎᒃᑯᑦ ᐃᓚᖏᓪᓗ ᑎᑭᑉᐳᑦ ᔨᒡᓛᒡᒧᑦ, ᑕᑯᓪᓗᑎᒡᓗ ᐊᒪᓕᑬᑎᒥᐅᑦ ᐅᓇᑕᕆᐊᕐᓯᒪᓂᕕᓂᖏᓐᓂᒃ ᔫᑕᐅᑉ ᓯᕿᓂᖓᓃᑦᑐᒧᑦ ᓂᒋᑉᒧᑦ ᔨᒡᓛᒡᒧᓪᓗ. ᓵᓚᒋᒐᒥᐅᒡᓗ ᓄᓇᓕᖓᑦ ᐃᑯᐊᓪᓚᒃᑕᐅᓐᓂᕐᓱᓂ, 2ᐊᕐᓇᓕᒫᓪᓗ ᑎᒍᔭᐅᓪᓗᑎᒃ; ᐃᓚᓕᒫᖏᓪᓗ ᑍᑲᓃᑦᑐᑦ ᑎᒍᔭᐅᓪᓗᑎᒃ, ᐊᖏᔪᑦ ᒥᑭᔪᓪᓗ; ᓇᓪᓕᐊᓐᓂᒃ ᑐᖁᑦᓯᓐᓂᖏᑦᑑᒐᓗᐊᑦ, ᑭᓯᐊᓂ ᐊᐅᓪᓚᐅᑦᔨᔪᕕᓂᐅᓪᓗᑎᒃ ᐊᐅᓪᓚᓕᕋᒥᒃ. 3ᑍᕕᑎᒃᑯᑦ ᐃᓚᖏᓪᓗ ᐃᒡᓗᒐᓴᖕᓄᑦ ᑎᑭᓐᓇᒥᒃ, ᑕᑯᕗᑦ ᓄᓇᓕᖓ ᐃᑯᐊᓪᓚᒃᑕᐅᔪᕕᓂᖅ ᓄᓕᐊᖏᓪᓗ ᐃᕐᓂᖏᓪᓗ ᐸᓂᖏᓪᓗ ᐊᐅᓪᓚᐅᑦᔭᕕᓂᐅᓪᓗᑎᒃ. 4ᑕᕝᕙ ᑍᕕᑎᒃᑯᑦ ᐃᓚᖏᓪᓗ ᓂᐱᖃᕐᓗᑎᒃ ᕿᐊᓕᕐᐳᑦ, ᑭᐊᖏᓐᓇᓚᐅᕐᐳᓪᓗ ᑕᖃᓂᕐᒧᑦ ᕿᐊᔪᓐᓁᓪᓕᒐᒥᒃ ᑭᓯᐊᓂ ᓄᖅᑲᕐᓗᑎᒃ. 5#ᓴᒧᐃᓕ ᓯᕗᓪᓖᑦ 25:42,43.ᑍᕕᑎᐅᓪᓗ ᓄᓕᐊᖏᒃ ᒪᕐᕉᒃ ᐊᐅᓪᓚᕈᑦᔭᐅᓐᓂᕐᓱᑎᒃ, ᐊᕼᐃᓄᐊᒻᓗ ᔨᔭᕆᐅᓪᒥᐅᑕᖅ, ᐊᐱᒊᓕᓗ ᓁᐳᓕᐅᑉ ᓄᓕᐊᕕᓂᖓ ᑳᕐᒥᐅᓪᒥᐅᑕᖅ.
6ᑍᕕᑎ ᐅᖁᒤᒃᓴᒻᒪᕆᓕᓚᐅᕐᐳᖅ; ᐃᓚᖏᑦ ᐊᒡᓛᑦ ᐅᖃᓕᓚᐅᕐᐳᑦ ᒥᓪᓗᐊᕆᔪᒪᓪᓗᒍ, ᐃᓄᓕᐊᒪᑦ ᓂᓐᖓᐅᒪᓂᖃᒻᒪᕆᓕᓚᐅᕐᒪᑕ ᐊᓯᐅᔨᓂᑎᒃ ᕿᑐᕐᖓᒥᖕᓂᒃ ᐱᑦᔪᑎᖃᕐᓗᑎᒃ. ᑍᕕᑎᓕ ᒎᑎᖓᑕ ᐊᑕᓂᐅᑉ ᓴᐱᖏᓐᓂᕐᒥᒃ ᑐᓂᓚᐅᕐᐹ. 7#ᓴᒧᐃᓕ ᓯᕗᓪᓖᑦ 22:20-23.ᑍᕕᑎᐅᓪᓗ ᐊᐰᐊᑕ ᐊᕼᐃᒥᓕᐅᑉ ᐃᕐᓂᖓ, ᑐᓂᕐᕈᓯᕐᑎᑦᓯᔨ ᐅᖃᐅᑎᕚ, “ᓴᒡᕕᖕᒥᐅᑕᖅ ᕾᓚᐅᕈᒃ,” ᐊᐰᐊᑕᐅᓪᓗ ᑐᓂᕚ ᑍᕕᑎᒧᑦ. 8ᑍᕕᑎᐅᓪᓗ ᐊᑕᓂᖅ ᐊᐱᕆᕚ, “ᒪᓕᒃᓴᕈᓐᓇᕐᐸᒃᑳ ᐅᓇᑕᕆᐊᓚᐅᕐᑐᑦ? ᐊᓐᖑᑎᔪᓐᓇᕐᐳᖔ?”
ᐊᑕᓂᐅᑉ ᑭᐅᕚ, “ᒪᓕᒃᓴᓕᕆᑦ; ᐊᓐᖑᑎᓂᐊᕐᐳᑎᑦ ᑎᒍᔭᐅᓚᐅᕐᑐᓪᓗ ᐅᑎᕐᑎᓐᓂᐊᕐᐸᑎᑦ.”
9ᑕᕝᕙ ᑍᕕᑎᒃᑯᑦ ᐊᐅᓪᓚᕐᐳᑦ, ᐃᓚᖃᕐᓗᓂ ᐊᖑᑎᓂᒃ 600ᓂᒃ, ᐱᓱᐊᕆᐅᓪᓗ ᑰᖓᓄᑦ ᑎᑭᐅᑎᒐᒥᒃ, ᐃᓚᖏᑦ ᑕᕝᕗᖓ ᕿᒪᒃᑕᐅᕗᑦ. 10ᑍᕕᑎᓕ ᑲᔪᓯᕗᖅ 400ᓂᒃ ᐃᓚᖃᕐᓗᓂ; ᑍᒃᑯᐊ ᐃᓚᖏᑦ 200 ᕿᒪᒃᑕᐅᓚᐅᕐᐳᑦ, ᑰᖕᒥᒃ ᐱᓱᐊᕆᒥᒃ ᐃᑳᕆᐊᒃᓴᖅ ᐊᔪᓕᓚᐅᕐᒪᑕ ᑕᖃᒪᓗᐊᒧᑦ. 11ᐊᖑᑏᑦ ᑍᕕᑎᒦᑦᑐᑦ ᑕᑯᕗᑦ ᓄᑲᑉᐱᐊᒥᒃ ᐄᑦᔨᑉᑎᒥᐅᑕᕐᒥᒃ ᓄᓇᑐᐃᓐᓇᒦᑎᓪᓗᒍ ᑍᕕᑎᒧᐊᕈᑎᕚᓪᓗ; ᓂᕆᑎᑉᐹᑦ ᐃᒥᕐᑎᓪᓗᒍᓗ, 12ᐸᐅᕐᖓᕕᓂᕐᓂᒡᓗ ᐸᓂᕐᑐᓂᒃ, ᒪᕐᕉᖕᓂᒡᓗ ᐸᐅᕐᖓᐅᔮᖕᓂᒃ. ᓂᕆᔭᕇᕋᒥᓗ, ᓄᑭᒃᑖᕐᐳᖅ; ᓂᕆᓚᐅᕐᓂᖏᑦᑐᖅ ᐃᒥᓚᐅᕐᓂᕋᓂᓗ ᐅᓪᓗᓂᒃ ᐱᖓᓱᓂᒃ. 13ᑕᕝᕙ ᑍᕕᑎᐅᑉ ᐊᐱᕆᕚ, “ᑭᓇᒦᒃ ᐊᖓᔪᖅᑳᖃᕐᐲᑦ, ᓇᓂᒥᐅᑕᐅᕕᓪᓘ?”
ᑭᐅᕗᖅ, “ᐄᑦᔨᑉᑎᒥᐅᑕᐅᕗᖓ, ᐊᒪᓕᑬᑎᒥᐅᓄᑦ ᐱᔨᑲᑖᕆᔭᔪᑦ ᐃᓚᖓᑦ; ᐊᖓᔪᖅᑳᒪ ᕿᒪᓚᐅᕐᐹᖓ ᐅᓪᓗᐃᑦ ᐱᖓᔪᐊᓐᓂ ᖃᓂᒻᒪᓚᐅᕋᒪ. 14ᐅᓇᑕᕆᐊᓚᐅᕐᐳᒍᑦ ᓯᕆᑍᑎᓄᑦ ᔫᑕᐅᑉ ᓯᕿᓂᖓᓃᑦᑐᒧᑦ ᓂᒋᑉᒧᑦ ᑬᓚᐱᐅᓪᓗ ᓄᓇᖁᑎᖓᓄᑦ, ᔨᒡᓛᒡᒥᐅᓪᓗ ᐃᑯᐊᓪᓚᓚᐅᕐᐸᕗᑦ.”
15ᑍᕕᑎᐅᑉ ᐊᐱᕆᕚ, “ᑍᒃᑯᓄᓐᖓᐅᑎᔪᓐᓇᕐᐱᖔ ᐅᓇᑕᕆᐊᓚᐅᕐᑐᓄᑦ?”
ᑖᓐᓇ ᑭᐅᕗᖅ, “ᐱᔪᓐᓇᕐᐳᖓ ᐊᖏᕐᕕᒋᓂᐊᑐᐊᕈᕕᖓ ᒎᑎᐅᑉ ᐊᑎᖓᓂ, ᑐᖁᓐᓂᐊᓐᖏᓐᓂᕋᕐᓗᖓ ᐅᕝᕙᓗ ᐊᖓᔪᖅᑳᓐᓄᑦ ᐂᑦᑑᑎᒋᓂᐊᓐᖏᑐᐊᕈᕕᖓ.” 16ᑕᕝᕙ ᑕᓯᐅᓚᐅᕐᐰᑦ ᑍᕕᑎᒃᑯᑦ ᑍᒃᑯᓄᖓ.
ᐅᓇᑕᕆᐊᕐᓯᒪᓚᐅᕐᑐᑦ ᓯᐊᒻᒪᖓᓚᐅᕐᐳᑦ ᓇᒧᑐᐃᓐᓇᖅ, ᓂᕆᓪᓗᑎᒃ ᐃᒥᕐᓗᑎᒡᓗ, ᖁᕕᐊᓱᒍᑎᖃᑦᓱᑎᒃ ᑎᒍᔭᕕᓂᕐᒥᖕᓂᒃ ᐱᓕᔅᑍᓂᐅᒥᐅᓂᑦ ᔫᑕᒥᐅᓂᓪᓗ. 17ᖃᐅᑎᓪᓗᒍ ᖃᐅᒻᒪᓕᕐᑎᓪᓗᒍ ᑍᕕᑎᐅᑉ ᐅᓇᑕᕆᐊᓚᐅᕐᐰᑦ ᐅᓇᑕᓚᐅᕐᐰᓪᓗ ᐅᓐᓄᒧᑦ ᑎᑭᓪᓗᒍ; ᐅᕕᒃᑬᓪᓕ 400 ᕿᒪᒃᓯᓚᐅᕐᐳᑦ ᑳᒥᓕᒃᑎᒍᑦ, ᐊᓯᓕᒫᖏᓪᓕ ᐊᖑᑎᑦ ᑐᖁᑕᐅᓚᐅᕐᐳᑦ. 18ᑍᕕᑎᐅᓪᓗ ᐅᑎᕐᑎᓚᐅᕐᐰᑦ ᐊᒪᓕᑬᑎᑦ ᑎᒍᔭᕕᓂᓕᒫᖏᑦ; ᓄᓕᐊᖕᓂᓗ ᒪᕐᕉᒃ ᓴᐳᑎᓚᐅᕆᕔᒃ. 19ᓱᓇᒥᒡᓘᓐᓃᑦ ᐊᓯᐅᔨᓚᐅᓐᖏᓚᑦ, ᐊᖏᔪᓂᒃ ᒥᑭᔪᓂᒡᓗ, ᑍᕕᑎᐅᑉ ᐅᑎᕐᑎᓚᐅᕐᐰᑦ ᐃᓄᖁᑎᖏᑕ ᐃᕐᓂᖏᑦ ᐸᓂᖏᓪᓗ, ᐊᓯᓕᒫᖏᓪᓗ ᐱᖁᑏᑦ ᐊᒫᓕᑬᒥᐅᑦ ᑎᒍᔭᕕᓂᓕᒫᖏᑦ. 20ᑍᕕᑎᐅᑦᑕᐅᖅ ᐅᑎᕐᑎᓚᐅᕆᕔᑦ ᐆᒪᔪᓕᒫᑦ; ᐃᓄᖁᑎᖏᑕᓗ ᐃᒻᒧᒃᓯᐅᒊᑦ ᓯᕗᓕᕆᓪᓗᒋᑦ ᐱᓱᒃᑎᓚᐅᕐᐰᑦ ᐅᖃᓪᓗᑎᒡᓗ, “ᐅᑯᐊ ᑍᕕᑎᐅᑉ ᓵᓚᖃᐅᓯᐊᖏᑦ.”
21ᑕᕝᕙ ᑍᕕᑎ ᐅᑎᕐᐳᖅ ᑍᒃᑯᓄᖓ ᐊᖑᑎᓄᑦ 200ᓄᑦ, ᓴᓐᖐᓗᐊᓕᕐᓂᕐᒧᑦ ᐃᓚᐅᔪᓐᓁᓪᓕᓚᐅᕐᑐᓄᑦ ᑰᒃᑯᑦ ᐱᓱᐊᕆᒥᒃ ᐃᑳᕆᐊᒃᓴᖅ; ᑖᒃᑯᐊ ᐸᕐᕆᐊᓚᐅᕐᐳᑦ ᑍᕕᑎᒥᒃ ᐃᓚᖏᓐᓂᒡᓗ; ᑍᕕᑎᐅᓪᓗ ᐅᐸᒃᑲᒥᒋᑦ ᑐᓐᖓᓱᒃᑎᑉᐰᑦ. 22ᐃᓱᒪᑦᓯᐊᖏᑦᑐᓪᓕ ᑐᑭᖃᑦᓯᐊᖏᑦᑐᓪᓗ ᐊᖑᑏᑦ ᐃᓚᖏᑦ ᑍᕕᑎᒧᑦ ᐃᓚᐅᓚᐅᕐᑐᒃ ᐅᖃᕐᐳᑦ, “ᐅᕙᑦᑎᓐᓂᖑᑯᐊ ᐃᓚᐅᓚᐅᖏᑦᑐᑦ, ᐱᑖᑦᑎᓐᓂᒃ ᐱᑖᕐᑐᒃᓴᐅᖏᑦᑐᑦ, ᓄᓕᐊᑎᒃ ᕿᑐᕐᖓᑎᒡᓗ ᐱᑐᐃᓐᓇᕐᓗᒋᑦ, ᐊᐅᓪᓚᕐᑐᒃᓴᐅᕗᑦ.”
23ᑍᕕᑎᓕ ᑭᐅᕗᖅ, “ᖃᑕᓐᖑᑎᒃᑳ ᑍᒤᓕᐅᕈᑎᖃᕐᑐᒃᓴᐅᓐᖏᓚᓯ ᐊᑕᓂᐅᑉ ᑐᓂᕐᕈᑎᒋᔭᖏᓐᓂᒃ ᐅᕙᑦᑎᓐᓄᑦ; ᐊᑕᓂᐅᑉ ᓴᐳᑎᓚᐅᕐᐹᑎᒍᑦ ᓵᓚᖃᕐᑎᓪᓗᑕᓗ ᐋᑎᕆᔨᓂᒃ. 24ᐊᖏᖃᑎᒋᔭᐅᔪᓐᓇᓐᖏᓚᓰ ᑭᓇᒧᓪᓘᓐᓃᑦ? ᐃᓘᓐᓇᑎᒃ ᐊᕕᖃᑎᒌᒃᑐᒃᓴᐅᕗᑦ, ᓇᓪᓕᐊᑦ ᕿᒪᒃᑕᐅᓯᒪᓚᐅᕐᑐᖅ ᑍᒫᓪᓗᐊᖅ ᐱᖃᑕᐅᔪᒃᓴᐅᕗᖅ ᐅᓇᑕᕆᐊᓚᐅᕐᑐᑎᑐᑦ.” 25ᑍᕕᑎᐅᑉ ᑕᒪᓐᓇ ᑕᕝᕙᓐᖓᑦ ᐱᒋᐊᕐᓗᒍ ᐱᖁᔭᓕᐊᕆᓚᐅᕐᐹ, ᐃᓴᕆᐊᓕᒥᐅᓂᓪᓗ ᑍᒪᓐᖓ ᑕᒪᓐᓇ ᒪᓕᒃᑕᐅᓕᓚᐅᕐᐳᖅ.
26ᑍᕕᑎᓗ ᐅᑎᕋᒥ ᔨᒡᓛᒡᒧᑦ, ᐱᑖᕆᓚᐅᕐᑕᒥ ᐃᓚᖏᓐᓂᒃ ᑐᓂᓯᓚᐅᕐᐳᖅ ᐱᖃᓐᓇᕆᔭᒥᓄᑦ, ᔫᑕᐅᓪᓗ ᐊᖓᔪᖅᑳᖏᓐᓄᑦ, ᐃᒫᒃ ᐅᖃᐅᓯᕐᑕᖃᕐᑐᒥᒃ, “ᐅᓇ ᐃᓕᖕᓄᑦ ᐂᑦᑑᑎᕗᑦ ᐊᑕᓂᕐᒧᑦ ᐊᑭᕋᕐᑐᕐᑐᓂᑦ ᐱᓚᐅᕐᑕᑦᑎᓐᓂᑦ.” 27ᐅᑯᓄᖓ ᑐᓂᓯᓚᐅᕐᐳᖅ ᐱᑎᓕᒥᐅᓄᑦ, ᕌᒪᑦᒧᑦ ᓂᒡᒋᒦᑦᑐᒧᑦ, ᓄᓇᓕᖕᓄᓪᓗ ᔮᑎᐊᕐᒥᐅᓄᑦ, 28ᐂᕈᕆᒥᐅᓄᑦ, ᓯᑉᒫᑎᒥᐅᓄᑦ, ᐃᔅᑎᒧᐊᒥᐅᓄᑦ, 29ᕋᑲᐅᓕᒥᐅᓄᑦ, ᑭᖑᕚᕇᓄᓪᓗ ᔨᕋᒥᐅᓕᒃᑯᓐᓄᑦ, ᑭᓁᑎᒥᐅᓄᓪᓗ, 30ᕼᐅᕐᒪᒥᐅᓄᑦ, ᐳᐅᐊᕐᐊᓵᓐᒥᐅᓄᑦ, ᐊᑕᒃᒥᐅᓄᓪᓗ, 31ᕼᐃᐸᕋᓐᒥᐅᓄᑦ, ᓄᓇᓕᓕᒫᓄᑦ ᑐᓂᓯᓚᐅᕐᐳᑦ ᑍᕕᑎᐅᑉ ᐃᓚᖏᑕᓗ ᐅᐸᖃᑦᑕᓚᐅᕐᑕᓕᒫᖏᓐᓄᑦ.
Currently Selected:
ᓴᒧᐃᓕ ᓯᕗᓪᓖᑦ 30: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
