ᓴᒧᐃᓕ ᓯᕗᓪᓖᑦ 21
21
ᑍᕕᑎᐅᑉ ᕿᒫᓂᖓ ᓴᐅᓕᒥᑦ
1 #
ᒫᑎᐅᓯ 12:3,4; ᒫᑯᓯ 2:25,26; ᓘᑲᓯ 6:3. ᑕᕝᕙ ᑍᕕᑎ ᑎᑭᑉᐳᖅ ᓅᐱᒧᑦ ᑐᓂᕐᕈᓯᕐᑎᑦᓯᔨᒧᐊᕐᓗᓂᓗ ᐊᕼᐃᒥᓕᒃᒧᑦ; ᐊᕼᐃᒥᓕᒡᓗ ᑍᕕᑎᒥᒃ ᐸᕐᕆᐊᕐᐳᖅ ᑲᑉᐱᐊᓱᒧᑦ ᓴᔪᒃᓗᓂ, ᐅᖃᐅᑎᓪᓗᒍᓗ, “ᓱᖕᒪᑦ ᐃᓄᑑᓪᓗᑎ ᕾᕕᑦ, ᐃᓚᖃᕐᓇᑎᑦ?”
2ᑍᕕᑎᐅᓪᓗ ᑐᓂᕐᕈᓯᕐᑎᑦᓯᔨ ᐊᕼᐃᒥᓕᒃ ᐅᖃᐅᑎᕚ, “ᐊᖓᔪᖅᑳᕐᔪᐊᒥᒃ ᐱᔨᑦᓯᕐᓗᖓ ᑕᒪᐅᓐᖓᕐᐳᖓ, ᐅᖃᐅᑎᓚᐅᕐᒪᒐ, ‘ᖃᐅᔨᑎᑦᓯᑦᑍᓕᒋᑦ ᑭᓇᒥᒡᓘᓐᓃᑦ ᑎᓕᓯᑦᔪᑎᒋᔭᓐᓂᒃ.’ ᐅᕙᖓᓕ ᐃᓅᓱᒃᑐᓂᒃ ᑎᓕᓯᓯᒪᕗᖓ ᓄᓇᓂ ᑲᑎᓯᔪᒪᓪᓗᖓ ᐅᐸᒃᑕᐅᓯᒪᖁᔭᓐᓂ. 3ᒫᓐᓇᓕ, ᓱᓇᒥᒃ ᓇᔪᕐᑎᖃᕐᐲᑦ? ᓂᐊᖂᔭᓂᒃ ᕾᑦᓯᓕᕆᑦ ᑕᓪᓕᒪᓂᒃ, ᓱᓇᒥᒡᓘᓐᓃᑦ ᐊᓯᖏᓐᓂᒃ ᐱᓯᒪᔭᕐᓂᒃ.”
4ᑐᓂᕐᕈᓯᕐᑎᑦᓯᔨᐅᑉ ᑍᕕᑎ ᑭᐅᕚ, “ᓂᐊᖂᔭᑐᐃᓐᓇᒥᒃ ᒫᓐᓇ ᐱᓯᒪᓐᖏᓚᖓ, ᐃᑦᔪᕐᓁᑎᑕᐅᓯᒪᔪᓂᑦ ᑭᓯᐊᓂ ᓂᐊᖂᔭᓂᒃ ᓇᔪᕐᑎᖃᕐᐳᖓ; ᐱᔪᓐᓇᕐᑕᑎᑦ ᐊᖑᑏᑦ ᐃᓅᓱᒃᑐᑦ ᐊᕐᓇᒥᒃ ᐱᖃᑎᖃᓚᐅᓐᖏᑐᐊᕐᐸᑕ.”
5ᑍᕕᑎᐅᑉ ᑐᓂᕐᕈᓯᕐᑎᑦᓯᔨ ᑭᐅᕚ, “ᓱᓕᑦᓯᐊᕐᐳᖓ ᐊᕐᓇᓃᓚᐅᓐᖏᓚᒍᑦ ᐱᓇᓱᐊᕆᐊᕐᑐᑐᐃᓐᓇᕐᑎᓪᓗᑕ ᑕᒪᓐᓇ ᐱᐅᓯᕆᒐᑦᑎᒍ; ᑭᓯᐊᓂᓕ ᐱᓇᓱᐊᒻᒪᕆᒋᐊᕐᑐᕋᑦᑕ ᑲᒪᓂᐅᔭᖏᓐᓂᕐᓴᐅᕗᒍᑦ; ᐊᖑᑏᓪᓗ ᐱᖁᑎᖏᑦ ᐃᑦᔪᕐᓁᒃᑭᕗᑦ, ᐅᓪᓗᒥᓕ ᐃᑦᔪᕐᓁᒃᑲᓐᓂᕐᐳᑦ ᐊᑐᐃᓐᓇᓐᖏᑕᑦᑎᓐᓂᒃ ᐱᓇᓱᐊᕆᐊᕐᑐᕐᓯᒪᖓᑦᑕ.”
6 #
ᒨᓯᓯ ᐱᖓᔪᖏᑦ 24:5-9. ᑕᕝᕙ ᑐᓂᕐᕈᓯᕐᑎᑦᓯᔨᐅᑉ ᑍᕕᑎ ᓂᐊᖂᔭᓂᒃ ᐃᑦᔪᕐᓁᑦᑐᓂᒃ ᑐᓂᕚ; ᑖᒃᑯᐊ ᓂᐊᖂᔧᑦ ᐱᓯᒪᔭᑐᐊᕆᒐᒥᒋᑦ ᒎᑎᒧᑦ ᑐᓂᕐᕈᑕᐅᓯᒪᔪᑦ, ᐅᐃᑦᔪᕐᓁᑦᑑᓪᓗ ᓵᖓᓂᑦ ᐊᒡᕔᕐᑎᑕᐅᓯᒪᕗᑦ ᓂᐊᖂᔭᓂᒃ ᓄᑖᓂᒃ ᐆᓇᕐᑐᓂᒃ ᑐᓂᕐᕈᑕᐅᔪᓂᒃ ᑭᖑᕝᕕᕐᑕᐅᔭᕆᐊᖃᕐᒪᑕ.
7ᑕᕝᕙᓂᓕ ᐊᖑᑎᑕᖃᓚᐅᕐᐳᖅ ᓴᐅᓕᐅᑉ ᐱᔨᖓᓂᒃ ᑍᑦᓱᒪᓂ ᐅᓪᓗᒥ, ᑍᑲᓃᑎᑕᐅᔪᒥᒃ ᐊᑕᓂᖅ ᐱᓪᓗᒍ; ᑐᐃᒋᒥᒃ ᐊᑎᓕᖕᒥᒃ ᐄᑐᒥᒥᐅᑕᕐᒥᒃ, ᓴᐅᓕᐅᑉ ᐆᒪᔪᓕᕆᔨᓄᑦ ᐊᖓᔪᖅᑳᖁᑎᖓᓂᒃ.
8ᑍᕕᑎᓗ ᐅᖃᕐᐳᖅ ᐊᕼᐃᒥᓕᒃᒧᑦ, “ᖃᓗᒋᐊᖃᕐᐲᑦ ᓴᕕᒡᔪᐊᒥᒡᓘᓐᓃᑦ ᕾᒍᓐᓇᕐᑕᕐᓂᒃ? ᐊᖓᔪᖅᑳᕐᔪᐊᑉ ᑎᓕᓯᓂᖓᓄᑦ ᐅᐃᒪᓪᓗᑕ ᐊᐅᓪᓚᓚᐅᕋᑦᑕ ᓴᕕᒡᔪᐊᕋᓘᓐᓃᑦ ᐊᓯᖏᓪᓘᓐᓃᑦ ᐅᓇᑕᐅᑎᒃᑲ ᐱᔪᓐᓇᕐᓯᓚᐅᖏᓐᓇᒃᑭᑦ.”
9 #
ᓴᒧᐃᓕ ᓯᕗᓪᓖᑦ 17:51. ᑐᓂᕐᕈᓯᕐᑎᑦᓯᔨᓗ ᐅᖃᕐᐳᖅ, “ᐱᓕᔅᑍᓂᒥᐅᑉ ᒍᓔᐊᑉ ᑐᖁᓚᐅᕐᑕᕕᑦ ᓇᕐᓴᒥ ᐃᓛᒥ ᓴᕕᒡᔪᐊᖓᓂᒃ ᐱᓯᒪᒐᓗᐊᕐᑐᖓ; ᓴᒡᕕᖕᒥᐅᑕᐅᑉ ᑐᓄᐊᓃᑦᑐᖅ, ᐃᒻᒧᓯᕐᓯᒪᓪᓗᓂ ᖃᓪᓗᓈᕐᑕᒧᑦ; ᐱᔪᒪᒍᕕᐅᒃ ᑖᓐᓇ ᐱᔪᓐᓇᕐᑍᑦ ᐊᓯᐊᓂᒃ ᐱᑕᖃᖏᒻᒪᑦ.” ᑍᕕᑎᓗ ᐅᖃᕐᐳᖅ, “ᕾᑦᔪᒃ ᓴᕕᒡᔪᐊᒥᒃ ᐱᐅᓂᕐᓴᒥᒃ ᐱᑕᖃᓐᖏᓚᖅ!”
10ᑍᕕᑎᓗ ᐅᓪᓗᒥ ᑕᕝᕙᓂ ᐊᐅᓪᓚᕐᐳᖅ ᕿᒫᓪᓗᓂ ᓴᐅᓕᒥᑦ, ᐊᖓᔪᖅᑳᕐᔪᐊᕐᒧᐊᕐᓗᓂᓗ ᐊᑭᔅᒧᑦ ᒑᑎᒥᐅᑕᕐᒧᑦ. 11#ᓴᒧᐃᓕ ᓯᕗᓪᓖᑦ 18:7; 29:5.ᐊᖓᔪᖅᑳᕐᔪᐊᓪᓗ ᐱᔨᖏᑦ ᐊᐱᕆᕗᑦ ᐊᑭᔅᒧᑦ, “ᑍᕕᑎᐅᓈ, ᓄᓇᒥᓂ ᐊᖓᔪᖅᑳᕐᔪᐊᖑᔪᖅ? ᑖᓐᓇᐅᓈ ᐊᖑᑦ ᐃᓐᖏᕈᑕᐅᓯᒪᔪᖅ ᐊᕐᓇᓄᑦ ᑖᓂᓯᕐᓗᑎᒃ, ‘ᓴᐅᓕ ᑐᖁᑦᓯᓯᒪᕗᖅ 1,000ᓂᒃ, ᑍᕕᑎᓕ 10,000ᓂᒃ’?”
12 #
ᐃᓐᖏᕈᑦ 56. ᐅᖃᐅᓯᕐᓄᑦ ᑕᒪᒃᑯᓄᖓ ᑍᕕᑎ ᐆᒻᒪᑎᕈᕐᑕᐅᕗᖅ, ᑲᑉᐱᐊᓱᓕᕐᓗᓂᓗ ᐊᖓᔪᖅᑳᕐᔪᐊᒥᒃ ᐊᑭᔅᒥᒃ ᒑᑎᒥᐅᑕᕐᒥᒃ. 13#ᐃᓐᖏᕈᑦ 34.ᐱᓂᐊᕐᓂᓂᓗ ᐊᓯᑦᔨᕐᐹ ᑖᒃᑯᓄᖓ, ᐃᓱᒪᖃᑦᓯᐊᖏᑦᑐᑐᑦ ᐱᐅᓯᖃᓐᖑᐊᖃᑦᑕᓕᕐᓗᓂ, ᐃᓯᕐᑕᕐᕕᐅᓪᓗ ᐅᒃᑯᐊᖏᑦ ᕿᑦᑐᖃᑦᑕᕐᐰᑦ; ᓄᕚᕿᓂᖓᓗ ᐅᒥᖏᓐᓄᑦ ᑎᑭᐅᒪᓕᕐᓗᓂ. 14ᑕᕝᕙ ᐊᖓᔪᖅᑳᕐᔪᐊᖅ ᐊᑭᔅ ᐅᖃᓕᕐᐳᖅ ᐱᔨᒥᓄᑦ, “ᑕᑯᒋᑦ, ᑖᓐᓇ ᐊᖑᑦ ᐃᓱᒪᖃᑦᓯᐊᓐᖏᓚᖅ; ᓱᖕᒪᓄᓇ ᐅᕙᓐᓅᕐᑎᓯᒪᕕᓯᐅᒃ? 15ᐃᓱᒪᖃᑦᓯᐊᖏᑦᑐᒥᒃ ᐅᕙᓐᓄᐊᕐᑐᖃᕆᐊᖃᕐᐹ, ᑖᓐᓇ ᕾᑉᐱᓯᐅᖅ ᐃᓱᒪᖃᑦᓯᐊᖏᑦᑐᒥᒃ ᑕᑯᕋᓐᓈᒐᒃᓴᖃᖁᓪᓗᖓ? ᐃᒡᓗᓐᓃᑦᑐᒃᓴᐅᕚ?”
Currently Selected:
ᓴᒧᐃᓕ ᓯᕗᓪᓖᑦ 21: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
