ᓴᒧᐃᓕ ᓯᕗᓪᓖᑦ 22
22
ᑐᓂᕐᕈᓯᕐᑎᑦᓯᔩᑦ ᑐᖁᕋᕐᑕᐅᓂᖏᑦ
1 #
ᐃᓐᖏᕈᑦ 57; 142. ᑍᕕᑎᓕ ᐊᐅᓪᓚᕋᒥ ᑕᕝᕙᓐᖓᑦ ᕿᒪᒃᓯᕗᖅ ᕾᕈᓱᖕᒧᑦ ᐊᑑᓚᒻᒧᑦ; ᖃᑕᓐᖑᑎᖏᓪᓗ ᐊᑖᑕᖓᑕᓗ ᐃᒡᓗᒥᐅᖃᑎᖏᑦ ᑕᒪᑐᒥᖓ ᑐᓴᕋᒥᒃ, ᑍᑯᖓ ᐂᕗᑦ ᐅᐸᒍᑎᓪᓗᑎᒃ. 2ᐃᓄᐃᓪᓗ ᕿᒃᓵᒃᑐᑦ ᐃᓱᒫᓘᑎᓖᓪᓗ, ᐊᑭᓕᒃᓴᓖᓪᓘᓐᓃᑦ, ᖁᕕᐊᓱᖏᑦᑐᓪᓗ ᐊᒃᓱᕈᕐᑐᓪᓗ ᑕᕝᕗᖓ ᐃᓚᓕᐅᑎᕗᑦ, ᐊᖓᔪᖅᑲᐅᓕᕐᓗᓂᓗ ᑖᒃᑯᓄᖓ. ᐊᖑᑏᓪᓗ 400ᖏᓐᓃᑦᑐᑦ ᐃᓚᓕᐅᑎᓚᐅᕐᐳᑦ ᑖᑦᓱᒧᖓ.
3ᑍᕕᑎᓗ ᑕᕝᕙᓐᖓᑦ ᐊᐅᓪᓚᕋᒥ ᒥᔅᐱᒧᐊᕐᐳᖅ ᒧᐊᐱᒦᑦᑐᒧᑦ; ᒧᐊᐱᐅᓪᓗ ᐊᖓᔪᖅᑳᔪᐊᖓᓄᑦ ᐅᖃᕐᐳᖅ, “ᐊᑖᑕᒐ ᐊᓈᓇᒐᓗ ᐃᓕᖕᓃᑬᓐᓇᓚᐅᕐᓕᑦ, ᖃᐅᔨᓚᐅᖏᓐᓂᓐᓂ ᒎᑎᐅᑉ ᐅᕙᓐᓄᑦ ᐱᖁᔭᖓᓂᒃ.” 4ᑍᕕᑎᐅᓪᓗ ᐊᖓᔪᖅᑳᓂ ᕿᒪᒃᐰᑦ ᒧᐊᐱᒥᐅᑦ ᐊᖓᔪᖅᑳᕐᔪᐊᖓᓄᑦ, ᑍᑲᓃᖏᓐᓇᓚᐅᕐᐳᓪᓗ ᑍᕕᑎ ᐃᔨᕐᓯᒪᖃᑦᑕᕐᑎᓪᓗᒍ ᕾᕈᓱᖕᒥ.
5ᑕᕝᕙ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᒑᑦ ᑍᕕᑎᒧᑦ ᐅᖃᕐᐳᖅ, “ᑕᒫᓂ ᕾᕈᓱᖕᒥ ᐃᓂᖃᕈᓐᓃᕆᑦ; ᐊᐅᓪᓚᓕᕆᑦ ᔫᑕᐅᑉ ᓄᓇᖓᓄᑦ.” ᑕᕝᕙ ᑍᕕᑎ ᑕᕝᕙᖓᑦ ᐊᐅᓪᓚᕐᐳᖅ, ᐂᓪᓗᓂᓗ ᓇᐹᕐᑐᓕᖕᒧᑦ ᕼᐃᕆᑎᒧᑦ.
6ᓴᐅᓕᓕ ᑐᓴᕋᒥ ᑍᕕᑎᒃᑯᑦ ᓇᓂᔭᐅᓂᕋᕐᑕᐅᑎᓪᓗᒋᑦ, ᓴᐅᓕ ᒋᐱᐊᒦᓚᐅᕐᐳᖅ, ᐃᒃᓯᕙᓪᓗᓂ ᓇᐹᕐᑑᑉ ᑕᒪᕆᔅᑭᒥᒃ ᐊᑎᓕᐅᑉ ᐊᑖᓂ, ᖃᓗᒋᐊᓂ ᑎᒍᒥᐊᕐᓗᒍ, ᐱᔨᖏᓪᓗ ᐊᕙᑖᓂ ᓇᖏᕐᑎᓪᓗᒋᑦ. 7ᓴᐅᓕᐅᓪᓗ ᐱᔨᓂ ᐊᕙᑎᒥᓂ ᓇᖏᕐᑐᑦ ᐅᖃᐅᑎᕔᑦ, “ᓈᓚᒋᑦᓯ ᐱᓐᔭᒥᓂᐅᑉ ᑭᖑᕚᖏᑦ; ᔨᓯᐅᑉ ᐃᕐᓂᖓ ᐃᓘᓐᓇᑦᓯᓐᓂᒃ ᑐᓂᓯᓂᐊᕐᑐᒋᕕᓯᐅᒃ ᐱᕈᕐᓰᕕᖕᓂᒃ ᕔᓂᓕᐅᕐᕕᒃᓴᓂᒡᓘᓐᓃᑦ, ᐅᓇᑕᕐᑐᒃᓴᖁᑎᒥᓄᓪᓗ 1,000ᓄᑦ 100ᓄᓪᓗ ᐊᖓᔪᖅᑳᓐᖑᕐᑎᓪᓗᓂᓰ? 8ᐃᓘᓐᓇᓯ ᐅᕙᓐᓂᒃ ᐊᑭᕋᕐᑐᓕᕐᐱᓰ, ᓇᓗᓁᕐᓯᔪᖃᓚᐅᓐᖏᓚᕐᓗ ᐅᕙᓐᓄᑦ ᐃᕐᓂᕋ ᐊᖏᕈᑎᓕᐅᕐᓯᒪᑎᓪᓗᒍ ᔨᓯᐅᑉ ᐃᕐᓂᖓᓄᑦ; ᓇᓕᕐᓯᓘᓐᓃᑦ ᐅᒡᒍᐊᓚᐅᓐᖏᓚᓯ ᓇᓗᓁᕐᓯᓚᐅᓐᖏᓚᓯᓘᓐᓃᑦ ᐃᕐᓂᕋ ᐅᕙᓐᓂᒃ ᐊᑭᕋᕐᑐᓕᕐᑎᑦᓯᑎᓪᓗᒍ, ᑖᓐᓇᓗ ᐅᑕᖅᑭᕗᖅ ᐅᕙᓐᓂᒃ ᑐᖁᑦᓯᔪᒪᓪᓗᓂ, ᐅᓪᓗᒥᒧᑦ.”
9 #
ᓴᒧᐃᓕ ᓯᕗᓪᓖᑦ 21:7-9; ᐃᓐᖏᕈᑦ 52. ᑕᕝᕙ ᑐᐃᒋ ᑭᐅᕗᖅ ᐄᑐᒥᒥᐅᑕᖅ, ᓴᐅᓕᐅᑉ ᐱᔨᖏᓐᓄᑦ ᓂᑯᕕᖓᖃᑕᐅᔪᖅ, ᐅᖃᕐᓗᓂ, “ᔨᓯᐅᑉ ᐃᕐᓂᖓ ᑕᑯᓚᐅᕐᐸᕋ ᐂᑎᓪᓗᒍ ᓅᐱᒧᑦ, ᐊᕼᐃᒥᓕᒃᒧᑦ ᐊᕼᐃᑑᑉ ᐃᕐᓂᖓᓄᑦ, 10ᐊᐱᕆᓚᐅᕐᐳᕐᓗ ᐊᑕᓂᕐᒧᑦ ᑖᓐᓇ ᐱᑦᔪᑎᒋᓪᓗᒍ, ᑖᑦᓱᒪᓗ ᑐᓂᓚᐅᕐᐹ ᓂᕿᒃᓴᖏᓐᓂᒃ, ᒍᓔᐊᓪᓗ ᐱᓕᔅᑍᓂᒥᐅᑕᐅᑉ ᓴᕕᒡᔪᐊᖓᓂᒃ ᑐᓂᓪᓗᓂᐅᒃ.”
11ᑕᕝᕙ ᐊᖓᔪᖅᑳᕐᔪᐊᑉ ᓴᐅᓕᐅᑉ ᕾᖁᔭᐅᖁᕚ ᐊᕼᐃᒥᓕᒃ ᐊᕼᐃᑑᑉ ᐃᕐᓂᖓ ᐃᒡᓗᒥᐅᖃᑎᖏᓪᓗ, ᑐᓂᕐᕈᓯᕐᑎᑦᓯᔩᐅᔪᑦ ᓅᐱᒥ; ᑖᒃᑯᐊᓗ ᐊᖓᔪᖅᑳᕐᔪᐊᒧᑦ ᑎᑭᑉᐳᑦ. 12ᓴᐅᓕᓗ ᐅᖃᕐᐳᖅ, “ᓈᓚᓚᐅᕆᑦ ᐊᕼᐃᑑᑉ ᐃᕐᓂᖓ.” ᑖᓐᓇᓗ ᑭᐅᕗᖅ, “ᒫᓃᑉᐳᖓ ᐊᑕᓃᖅ.”
13ᓴᐅᓕᐅᓪᓗ ᐅᖃᐅᑎᕚ, “ᓱᖕᒪᑦ ᐅᕙᓐᓂᒃ ᐊᑭᕋᕐᑐᓕᕐᐲᑦ, ᐃᓕᑦᓯᒃ ᔨᓯᐅᓪᓗ ᐃᕐᓂᖓ, ᑖᓐᓇ ᑐᓂᓚᐅᕋᕕᐅᒃ ᓂᕿᒃᓴᒥᒃ ᓴᕕᒡᔪᐊᒥᒡᓗ, ᒎᑎᓗ ᓱᖕᒪᑦ ᐊᐱᕆᓚᐅᕐᐱᐅᒃ ᑖᓐᓇ ᐱᓪᓗᒍ, ᑖᓐᓇ ᒪᑭᖁᓪᓗᒍ ᐅᕙᓐᓂᒃ ᐊᑭᕋᕐᑐᓕᕐᓗᓂ, ᐅᑕᖅᑭᓕᕐᓗᓂᓗ ᑐᖁᑦᓯᖁᓪᓗᒍ ᐅᕙᓐᓂᒃ, ᐅᓪᓗᒥᒧᑦ ᑎᑭᓪᓗᒍ?”
14ᑕᕝᕙ ᐊᕼᐃᒥᓕᒃ ᑭᐅᕗᖅ ᐊᖓᔪᖅᑳᕐᔪᐊᒧᑦ, “ᑍᕕᑎ ᐅᐱᓐᓇᕐᑑᓪᓗᓂ ᐱᔨᒋᕙᑦ, ᐊᖓᔪᖅᑳᕐᔪᐊᕐᒧᓪᓗ ᓂᖓᐅᒋᔭᐅᓪᓗᓂ, ᐊᖓᔪᖅᑳᖑᓪᓗᓂᓗ ᓴᐳᓐᓂᐊᕐᑎᖁᑎᖏᓐᓄᑦ, ᑖᓐᓇ ᐃᓕᖕᓂᒃ ᓈᓚᒃᐳᖅ ᐅᐱᓐᓇᑦᓯᐊᕐᓗᓂᓗ ᐃᒡᓗᖁᑎᖕᓂ. 15ᐅᓪᓗᒥ ᐊᑕᓂᖅ ᐊᐱᕆᓕᑍᓐᓇᓐᖏᓚᕋ ᑖᓐᓇ ᐱᓪᓗᒍ, ᐊᖓᔪᖅᑳᕐᔪᐊᖅ ᓱᓇᑐᐃᓐᓇᒥᒃ ᐱᔨᒥᓄᑦ ᐊᑭᕋᕐᑐᓕᕐᑍᓕᓕ ᐊᑖᑕᒪᓘᓐᓃᑦ ᐃᒡᓗᒥᐅᖃᑎᖏᓐᓄᑦ; ᐱᔩᑦ ᖃᐅᔨᒪᓚᐅᖏᒻᒪ ᑕᒪᑐᒥᖓ, ᒥᑭᔪᒥᒃ ᐊᖏᔪᒥᒡᓘᓐᓃᑦ.”
16ᐊᖓᔪᖅᑳᕐᔪᐊᕐᓗ ᐅᖃᕐᐳᖅ, “ᑐᖁᔪᒃᓴᐅᕗᑎᑦ, ᐊᕼᐃᒥᓕᒃ, ᐊᑖᑕᕕᓪᓗ ᐃᒡᓗᒥᐅᖃᑎᓕᒫᖏᑦ.” 17ᐊᖓᔪᖅᑳᕐᔪᐊᕐᓗ ᓴᐳᓐᓂᐊᕐᑎᖁᑎᒥᓄᑦ ᖃᓂᒋᔭᒥᓂ ᓇᖏᕐᑐᓄᑦ ᐅᖃᕐᐳᖅ, “ᐊᑕᓂᐅᑉ ᑐᓂᕐᕈᓯᕐᑎᑦᓯᔨᖏᑦ ᑐᖁᓚᐅᕐᓯᐅᒃ, ᐊᒡᒐᖏᑦ ᑍᕕᑎᒥᒃ ᐃᓚᓕᐅᕆᓯᒪᖕᒪᑕ, ᖃᐅᔨᒪᓪᓗᑎᒃ ᕿᒫᓂᖓᓂᒃ ᐅᖃᓚᐅᖏᒻᒪᑕ ᐅᕙᓐᓄᑦ.” ᐊᖓᔪᖅᑲᕐᔪᐊᓪᓕ ᓴᐳᓐᓂᐊᕐᑎᖏᑦ ᑐᖁᑦᓯᔪᒪᓚᐅᓐᖏᓚᑦ ᐊᑕᓂᐅᑉ ᑐᓂᕐᕈᓯᕐᑎᑦᓯᔨᖏᓐᓂᒃ. 18ᑕᕝᕙ ᓴᐅᓕ ᐅᖃᓕᕐᐳᖅ ᑐᐃᒋᒧᑦ, “ᐃᕝᕕᑦ ᑐᖁᓚᐅᒃᑭᑦ ᑐᓂᕐᕈᓯᕐᑎᑦᓯᔩᑦ.” ᑕᕝᕙ ᑐᐃᒋᐅᑉ ᐄᑐᒥᒥᐅᑕᐅᑉ ᑐᓂᕐᕈᓯᕐᑎᑦᓯᔨᓕᒫᑦ ᑐᖁᑉᐰᑦ, ᑍᑦᓱᒪᓂ ᐅᓪᓗᒥ ᑐᓂᕐᕈᓯᕐᑎᑦᓯᔩᑦ 85 ᑐᖁᑕᐅᕗᑦ ᖃᓪᓗᓈᕐᑕᒥᒃ ᓴᒡᕕᖕᒥᐅᑕᒥᒃ ᐊᑐᕐᑐᓕᒫᑦ. 19ᓅᐱᒥᓗ, ᐃᒡᓗᒐᓮᑦ ᑐᓂᕐᕈᓯᕐᑎᑦᓯᔨᖏᑦ, ᓴᕕᒡᔪᐊᒧᑦ ᑐᖁᑉᐰᑦ; ᐊᖑᑏᑦ, ᐊᕐᓁᓪᓗ, ᓄᑕᖅᑲᑦ, ᐃᒻᒧᒃᓯᐅᒊᑦ, ᓯᐅᑎᖅᑯᕐᑐᔪᑦ, ᓰᐲᓪᓗ ᑕᒪᕐᒥᒃ ᑐᖁᑕᐅᑎᑉᐰᑦ ᓴᕕᒡᔪᐊᒧᑦ.
20ᐊᕼᐃᒥᓕᐅᓪᓕ ᐃᕐᓂᖏᑕ ᐃᓚᖓᑦ ᐊᕼᐃᑑᑉ ᐃᕐᓂᖓᑕ, ᐊᐰᐊᑕᒥᒃ ᐊᑎᓕᒃ ᕿᒪᒃᓯᕗᖅ, ᑍᕕᑎᒧᐊᕐᓗᓂᓗ ᐃᓚᓕᐅᑎᕗᖅ. 21ᐊᐰᐊᑕᐅᓪᓗ ᑍᕕᑎ ᐅᓂᒃᑲᐅᑎᕚ ᓴᐅᓕᐅᑉ ᑐᖁᕅᓂᖓᓂᒃ ᐊᑕᓂᐅᑉ ᑐᓂᕐᕈᓯᕐᑎᑦᓯᔨᖁᑎᖏᓐᓂᒃ. 22ᑍᕕᑎᓗ ᐅᖃᕐᐳᖅ ᐊᐰᐊᑕᒧᑦ, “ᑍᓐᓇ ᑐᐃᒋ ᐄᑐᒥᒥᐅᑕᖅ ᑕᑯᒐᒃᑯ, ᑍᑦᓱᒪᓂ ᖃᐅᔨᒪᓚᐅᕐᐳᖓ ᓴᐅᓕᒥᒃ ᐅᖃᐅᑦᔨᓛᕐᓂᖓᓂᒃ, ᑍᒤᒻᒪᑦ ᐅᕙᖓ ᐸᓯᔭᒃᓴᐅᕗᖓ ᐊᑖᑕᕕᑦ ᐃᒡᓗᒥᐅᖃᑎᖏᑕ ᑐᖁᕋᕐᑕᐅᓂᖏᓐᓄᑦ. 23ᐅᕙᓐᓃᓕᕆᑦ, ᑲᑉᐱᐊᓱᖏᓪᓗᑎᑦ; ᐅᕙᓐᓂᒃ ᑐᖁᑦᓯᓇᓱᒃᑐᑦ ᐃᓕᖕᓂᒃᑕᐅᖅ ᑐᖁᑦᓯᓇᓱᒃᑭᕗᑦ; ᐅᕙᓐᓃᒃᑯᕕᑦ ᑐᖁᑕᐅᓂᐊᓐᖏᓚᑎᑦ.”
Currently Selected:
ᓴᒧᐃᓕ ᓯᕗᓪᓖᑦ 22: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
