ᓴᒧᐃᓕ ᓯᕗᓪᓖᑦ 20
20
ᔫᓇᑕᓂᐅᑉ ᐃᑲᔪᕐᓂᖓ ᑍᕕᑎᒥᒃ
1ᑕᕝᕙ ᑍᕕᑎ ᕿᒫᕗᖅ ᓁᐅᑎᒥᑦ ᕌᒪᒦᑦᑐᒥᑦ, ᔫᓇᑕᓂᒧᓪᓗ ᐂᓪᓗᓂ ᐅᖃᐅᑎᕚ, “ᓱᓚᐅᕐᐳᖔ? ᐱᐅᖏᑦᑐᒥᒃ ᐸᓯᔭᒃᓴᐅᑦᔪᑎᖃᕐᐳᖔ? ᓱᓇᒥᒃ ᐊᔪᕐᑐᓕᓚᐅᕐᐳᖓ ᐊᑖᑕᖕᓄᑦ, ᐃᓅᓯᓐᓂᒃ ᑐᖁᑕᐅᓇᓱᐊᕈᑎᒃᓴᒥᒃ?”
2ᔫᓇᑕᓂ ᑭᐅᕗᖅ, “ᑕᒪᓐᓇ ᐃᓱᒪᒋᔭᕆᐊᖃᓐᖏᑍᑦ! ᑐᖁᓂᐊᓐᖏᓚᑎᑦ. ᑕᑯᒋᑦ, ᐊᑖᑕᒪ ᐅᖃᐅᑎᖃᑦᑕᕐᐹᖓ ᓱᓇᓕᒫᓂᒃ, ᐱᒻᒪᕆᐅᒃᐸᑦ ᐱᒻᒪᕆᐅᖏᑉᐸᓪᓘᓐᓃᑦ, ᖃᓄᐃᒻᒪᓪᓕ ᐊᑖᑕᒪ ᑕᒪᓐᓇ ᐃᔨᕐᓯᒪᒐᔭᕐᐹ ᐅᕙᓐᓂᑦ? ᑍᒤᑦᔮᓐᖏᓚᖅ.”
3ᑍᕕᑎᓕ ᑭᐅᕗᖅ, “ᐊᑖᑍᑦ ᖃᐅᔨᒪᑦᓯᐊᕐᐳᖅ ᖃᓄᖅ ᐱᑦᓯᐊᕐᑎᒋᖕᒪᖔᕐᐱᑦ ᐅᕙᓐᓂᒃ, ᐃᓱᒪᖃᕐᐳᕐᓕ, ‘ᔫᓇᑕᓂ ᑕᒪᑐᒥᖓ ᖃᐅᔨᑎᑕᐅᑦᑍᓕᓕ, ᕿᒃᓵᓕᖁᓇᒍ.’ ᓱᓕᑦᓯᐊᕐᐳᖓ, ᐊᑕᓂᐅᑉ ᐆᒪᓂᖓᒍᑦ ᐃᕝᕕᓪᓗ, ᑐᖂᑉ ᐊᓪᓗᕆᐊᕐᓂᖓᓃᓕᕋᒪ.”
4ᑕᕝᕙ ᔫᓇᑕᓂ ᐅᖃᓕᕐᐳᖅ ᑍᕕᑎᒧᑦ, “ᓱᓇᒥᒃ ᐱᓇᓱᐊᖁᔨᑐᐊᕈᕕᑦ, ᐱᓇᓱᐊᕈᓐᓇᕐᐳᖓ.”
5 #
ᒨᓯᓯ ᓯᑕᒪᖏᑦ 28:11. ᑍᕕᑎ ᐅᖃᕐᐳᖅ ᔫᓇᑕᓂᒧᑦ, “ᑕᑯᒋᑦ, ᖃᐅᒃᐸᒃ ᑕᖅᑭᓂᕋᑖᖅ ᓇᓪᓕᐅᓐᓂᕐᓯᐅᕐᑕᐅᔪᒫᕐᐳᖅ, ᐊᖓᔪᖅᑳᕐᔪᐊᕐᓗ ᓂᕆᖃᑎᒋᔭᕆᖃᓪᓚᕆᒃᐸᕋ; ᑍᑲᓃᖏᑦᓱᓐᓇᕐᑎᓚᐅᓐᖓ, ᐃᔨᕐᓯᒪᓂᐊᕐᐳᖓ ᐱᕈᕐᓰᕕᖕᒥ ᐅᓪᓘᑉ ᐱᖓᔪᐊᑕ ᐅᓐᓄᖓᓄᑦ ᑎᑭᓪᓗᒍ. 6ᐊᑖᑍᑦ ᑭᓐᖑᐃᒃᐸᑦ ᐅᕙᓐᓂᒃ, ᐅᖃᐅᑎᔪᒫᕐᐸᑦ, ‘ᑍᕕᑎ ᐊᔪᐃᓐᓇᓚᐅᕐᒪᑦ ᐊᖏᕐᕋᕈᓐᓇᕐᑎᑕᐅᔪᒪᓪᓗᓂ ᐱᑦᓕᐊᒻᒧᑦ ᐃᒡᓗᒐᓴᖁᑎᒥᓄᑦ; ᐃᓚᒌᓕᒫᑦ ᑐᓂᕐᕈᓯᕆᐊᖃᕐᓂᖏᑕ ᐊᕐᕌᒍᑕᒫᑦ ᓇᓪᓕᐅᑎᓂᖓᓄᑦ.’ 7ᐅᖃᕐᐸᑦ, ‘ᖃᓄᐃᖏᑦᑐᖅ!’ ᑕᕝᕙ ᐱᔩᑦ ᑲᑉᐱᐊᓇᖏᑦᑐᒦᓐᓂᐊᕐᐳᖅ; ᑭᓯᐊᓂᓕ ᓂᓐᖓᒃᐸᑦ, ᖃᐅᔨᒪᒐᔭᕐᐳᑎᑦ ᐱᐅᖏᑦᑐᒥᒃ ᐱᓇᓱᐊᕈᒪᓂᖓᓂᒃ. 8ᑍᒤᒻᒪᑦ ᑕᒪᓐᓇ ᐱᑦᓯᐊᕐᓗᑎᑦ ᐱᓇᓱᐊᕈᒃ ᐱᑦᔪᑎᒋᓗᖓ, ᐱᔩᑦ ᐊᖏᕈᑎᒋᓯᒪᒐᕕᐅᒃ ᐊᑕᓂᕐᒧᑦ. ᐸᓯᔭᒃᓴᐅᒍᒪᓕ, ᐃᕝᕕᑦ ᓇᖕᒥᓂᖅ ᑐᖁᑕᒃᓴᕆᕙᕐᒪ; ᓱᖕᒪᑦ ᐊᑖᑕᖕᓄᐊᕈᑎᔭᒃᓴᕆᕕᖓ ᑐᖁᑕᐅᔭᕐᑐᕐᑎᓪᓗᖓ?”
9ᔫᓇᑕᓂᓗ ᐅᖃᕐᐳᖅ, “ᑍᒫᒃ ᐃᓱᒪᑦᑍᓕᒋᑦ! ᖃᐅᔨᒪᑦᓯᐊᕆᑦ ᐊᑖᑕᒪ ᐱᐅᖏᑦᑐᒥᒃ ᐱᓇᓱᐊᕐᕕᒋᔪᒪᒃᐸᑎᑦ, ᐅᖃᐅᑎᑦᑍᓕᒐᔭᓚᐅᕐᐱᒌᑦ?”
10ᑕᕝᕙ ᑍᕕᑎ ᔫᓇᑕᓂᒧᑦ ᐅᖃᕐᐳᖅ, “ᑭᓇᒧᓪᓕ ᑍᒪ ᐅᖃᐅᑦᔭᐅᓂᐊᕐᐳᖓ ᐊᑖᑍᑦ ᓂᓐᖓᐅᒪᓗᓂ ᑭᐅᒃᐸᑎᑦ?”
11ᔫᓇᑕᓂᓗ ᐅᖃᕐᐳᖅ ᑍᕕᑎᒧᑦ, “ᕾᒋᑦ ᐱᕈᕐᓰᕕᖕᒧᐊᓚᐅᕐᓗᒃ.” ᑕᕝᕙ ᐱᕈᕐᓰᕕᖕᒧᐊᓚᐅᕐᐴᒃ, 12ᔫᓇᑕᓂᓗ ᐅᖃᓕᕐᐳᖅ ᑍᕕᑎᒧᑦ, “ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓ, ᖃᐅᔨᒪᔨᑕᕆᓚᕗᒃ! ᑍᒤᓪᓗᐊᓕᕐᐸᑦ ᖃᐅᒃᐸᑦ ᐅᖓᓕᐊᒍᓘᓐᓃᑦ, ᑕᑯᒋᑦ, ᐱᓂᐊᕐᓂᖓ ᐃᓕᖕᓄᑦ ᐱᐅᔫᒃᐸᑦ, ᐅᖃᐅᑦᔭᐅᔭᕐᑐᕐᑎᑦᓱᒫᕐᐸᒋᑦ. 13ᐊᑕᓂᐅᓪᓕ ᔫᓇᑕᓂ ᐊᖏᓂᕐᓴᒥᒃ ᓱᒋᐊᕐᑕᒃᓴᕆᕚ, ᐊᑖᑕᒪ ᐱᐅᖏᑦᑐᒥᒃ ᐱᓂᐊᕐᕕᒋᔪᒪᑐᐊᕐᐸᑎᑦ, ᑕᕝᕙ ᐅᖃᐅᑎᔪᒫᕐᐸᒋᑦ ᐊᐅᓪᓚᕐᑎᓪᓗᒋᓪᓗ, ᐊᑦᑕᕐᓇᕐᑐᒦᖁᓇᑎᑦ. ᐊᑕᓂᐅᑉ ᐃᓚᒋᓕᑎᑦ, ᑍᒫᑦᓮᓐᓇᖅ ᐊᑖᑕᓐᓃᓚᐅᕐᒪᑦ. 14ᐃᓅᖏᓐᓇᕈᒪᓕ, ᑲᔪᓯᑎᑦᓯᔪᒫᕐᐳᑎᑦ ᐊᑕᓂᐅᑉ ᓇᒡᓕᖕᓂᖓᓂᒃ ᐊᖏᕈᑎᒋᓯᒪᔭᕐᓂᒃ, ᑐᖁᓐᓂᕈᒪᓕ; 15#ᓴᒧᐃᓕ ᐂᑉᐸᖏᑦ 9:1.ᐱᑦᓯᐊᕐᓃᑦ ᑲᔪᓯᑎᑦᓱᒫᕐᐸᑦ ᐃᒡᓗᒥᐅᖃᑎᓐᓄᑦ ᓯᖁᒥᑦᑍᓕᓗᒍ ᐃᓱᖃᖏᑦᑐᒧᑦ. ᐊᑕᓂᐅᑉ ᐊᑭᕋᕐᑐᕐᑎᓕᒫᑎᑦ ᑐᖁᑉᐸᒋᑦ ᓄᓇᕐᔪᐊᒥᑦ. 16ᐊᖏᕈᑎᒋᓯᒪᔭᕗᑦ ᔫᓇᑕᓂᐅᑉ ᐊᑎᖓ ᐊᓯᐅᑎᑦᑍᓕᒍᒃ ᑍᕕᑎᐅᑉ ᐃᓚᖏᓐᓂᑦ, ᑕᒪᓐᓇ ᑲᔪᓯᑎᑕᐅᓐᓂᖏᑉᐸᑦ ᐊᑕᓂᐅᑉ ᐊᑭᓂᐊᕈᒫᕐᐹᑎᑦ ᐃᓚᑎᓪᓗ.”
17ᔫᓇᑕᓂᐅᓪᓗ ᑍᕕᑎ ᐊᖏᕐᑎᒃᑲᓐᓂᕐᐹ ᓇᒡᓕᒋᒐᒥᐅᒃ; ᔫᓇᑕᓂᐅᑉ ᓇᒡᓕᒋᓚᐅᕐᐹ ᑕᕐᓂᕐᒥᓂᒃ ᓇᒡᓕᒋᓂᕐᒥᑐᑦ. 18ᑕᕝᕙ ᔫᓇᑕᓂ ᐅᖃᕐᐳᖅ ᑍᕕᑎᒧᑦ, “ᖃᐅᒃᐸᑦ ᑕᖅᑭᓂᕋᑖᕐᓂᒥᒃ ᓇᓪᓕᐅᓐᓂᕐᓯᐅᕐᓂᐅᓛᕐᐳᖅ; ᑭᓐᖒᒪᔭᐅᔪᒫᕐᐳᑎᑦ, ᐃᒃᓯᕙᐅᑍᑦ ᐃᓄᖃᕈᒫᖏᒻᒪᑦ. 19ᐅᓪᓗᐃᑦ ᐱᖓᓱᑦ ᐊᓂᒍᕐᐸᑕ ᑭᓐᖒᒪᔭᐅᓕᕆᐊᓪᓚᒍᒫᕐᐳᑎᑦ; ᑕᕝᕙ ᑐᐊᕕᕐᓗᑎᑦ ᐂᔪᒫᕐᐳᑎᑦ ᐃᔨᕐᓯᒪᕕᒋᓚᐅᕐᑕᕐᓄᑦ, ᑕᕝᕙᓂ ᐃᔨᕐᓯᒪᓛᕐᐳᑎᑦ ᐅᔭᕋᓱᒡᔪᐃᑦ ᖃᓕᕇᒃᑐᑦ ᐅᖓᑖᓂ. 20ᐱᖓᓱᓂᒃ ᖃᕐᔪᓐᓂᒃ ᐱᓯᒋᐊᕈᒫᕐᐳᖓ ᓴᓂᐊᓄᑦ, ᐱᓯᒃᑖᕐᕕᖕᒧᑦ ᐆᒃᑐᕋᕐᓗᓂ ᐱᓯᒋᐊᖃᕐᑕᕐᑐᑎᑐᑦ; 21ᑕᑯᒋᑦ, ᑍᑲᓂ ᑎᓕᓯᔪᒫᕐᐳᖓ ᓄᑲᑉᐱᐊᒥᒃ ᐅᖃᐅᑎᓗᒍ, ‘ᐂᓗᑎᑦ ᖃᕐᔪᐃᑦ ᕿᓂᕆᐊᒃᑭᑦ.’ ᓄᑲᑉᐱᐊᕐᓗ ᐅᖃᐅᑎᒍᒃᑯ, ‘ᑕᑯᒋᑦ ᖃᕐᔪᐃᑦ ᓴᓂᖕᓃᑉᐳᑦ; ᐂᓕᒃᑭᑦ ᕾᓗᑎᓪᓗ,’ ᑍᒤᓕᒍᒪ ᑕᕝᕙ ᕾᔪᓐᓇᓛᕐᐳᑎᑦ, ᐊᑕᓂᖅ ᐃᓅᖕᒪᑦ, ᑕᕝᕙ ᑲᑉᐱᐊᓇᕐᑐᖃᕋᔭᓐᖏᓚᖅ ᐃᓕᖕᓄᑦ. 22ᓄᑲᑉᐱᐊᕐᓕ ᐅᖃᐅᑎᒍᒃᑯ, ‘ᑕᑯᒋᑦ, ᖃᕐᔪᐃᑦ ᐅᖓᑎᖕᓃᑉᐳᑦ,’ ᑕᕝᕙ ᐊᐅᓪᓚᕆᐊᖃᕋᔭᕐᐳᑎᑦ; ᐊᑕᓂᐅᑉ ᑎᓕᒐᔭᕐᐹᑎᑦ ᐊᐅᓪᓚᖁᓗᑎᑦ. 23ᐅᖃᐅᓯᕆᓚᐅᕐᑕᕗᒡᓕ ᐱᑦᔪᑎᒋᓗᒋᑦ, ᑕᑯᒋᑦ, ᐊᑕᓂᖅ ᐊᑯᓐᓇᑦᑎᓐᓃᓐᓂᐊᕐᐳᖅ ᐃᓱᖃᖏᑦᑐᒧᑦ.”
24ᑕᕝᕙ ᑍᕕᑎ ᐃᔨᕐᓯᒪᓚᐅᕐᐳᖅ ᐱᕈᕐᓰᕕᖕᒥ; ᑕᖅᑭᓂᕋᑖᖅ ᓇᓪᓕᐅᓐᓂᕐᓯᐅᕐᑕᐅᓕᕐᑎᓪᓗᒍ, ᑕᕝᕙ ᐊᖓᔪᖅᑳᕐᔪᐊᖅ ᐃᖏᑉᐳᖅ ᓂᕆᔭᕐᑐᕐᓱᓂ. 25ᑕᕝᕙ ᐊᖓᔪᖅᑳᕐᔪᐊᖅ ᐃᖏᑉᐳᖅ ᐃᓂᒥᓄᑦ, ᐊᑭᓐᓇᐅᑉ ᓴᓂᐊᓂ. ᔫᓇᑕᓂᓗ ᐃᖏᑉᐳᖅ ᐊᑭᐊᓄᑦ, ᐋᑉᓄᓗ ᓴᐅᓕᐅᑉ ᓴᓂᐊᓂ ᐃᒃᓯᕙᑎᓪᓗᒍ, ᑍᕕᑎᐅᓪᓕ ᐃᒃᓯᕙᐅᑕᖓ ᐃᓄᖃᓚᐅᓐᖏᓚᖅ. 26ᓴᐅᓕᓕ ᖃᓄᑐᐃᓐᓇᖅ ᓂᓪᓕᓚᐅᓐᖏᓚᖅ ᐅᓪᓗᒥ ᑕᕝᕙᓂ; ᐃᓱᒪᓚᐅᕋᒥ, “ᓱᓇᒥᑭᐊᖅ ᐱᑦᔪᑎᖃᕋᒥ, ᓴᓗᒤᑦᑑᔪᒃᓴᐅᒐᒥ, ᐃᓛᒃ ᓴᓗᒤᑦᑑᒐᒥ ᑭᓯᐊᓂ.” 27ᖃᐅᑎᓪᓗᒍᓕ, ᐅᓪᓘᑉ ᐂᑉᐸᖓᓂ ᑕᖅᑭᓂᕋᑖᑉ ᓇᓪᓕᐅᓐᓂᕐᓯᐅᕐᑕᐅᓂᖓᓂ, ᑍᕕᑎᐅᑉ ᐃᓂᖓ ᓱᓕ ᐃᓄᖃᖏᒻᒪᑦ, ᓴᐅᓕ ᐊᐱᕆᓕᕐᐳᖅ ᔫᓇᑕᓂᒧᑦ, “ᓱᖕᒪᓂᓐᓇ ᔨᓯᐅᑉ ᐃᕐᓂᖓ ᓂᕆᔭᕐᑐᓚᐅᓐᖏᓚᖅ ᐃᑉᐸᒃᓴᖅ ᐅᓪᓗᒥᓗ?”
28ᔫᓇᑕᓂᐅᑉ ᓴᐅᓕ ᑭᐅᕚ, “ᑍᕕᑎ ᐊᔪᐃᓐᓇᓚᐅᕐᒪᑦ ᐱᑦᓕᐊᒧᑦ ᐂᔪᓐᓇᕐᑎᑕᐅᔪᒪᓪᓗᓂ; 29ᐅᖃᓚᐅᕐᒪᑦ, ‘ᐊᐅᓪᓚᕈᓐᓇᕐᑎᓚᐅᓐᖓ; ᐃᓚᒃᑲ ᓇᓪᓕᐅᓐᓂᕐᓯᐅᕐᓂᐊᕐᒪᑕ ᑐᓂᕐᕈᓯᕐᓗᑎᒃ ᓂᕆᖃᑎᒌᓪᓗᑎᒡᓗ ᑍᑲᓂ, ᐊᖓᔪᒪᓗ ᕾᖁᓚᐅᕐᒪᖓ ᑍᑲᓃᖁᓪᓗᖓ. ᖁᕕᐊᒋᒍᕕᖓ, ᐱᔪᓐᓇᕐᑎᓚᐅᓐᖓ ᐃᓚᓐᓂᒃ ᑕᑯᔪᓐᓇᖁᓪᓗᖓ.’ ᑍᒤᒻᒪᑦ ᑕᕝᕙ ᐃᓂᒥᓃᓐᖏᓚᖅ ᐊᖓᔪᖅᑳᕐᔪᐊᑉ ᓵᖓᓂ.”
30ᑕᕝᕙ ᓴᐅᓕ ᓂᓐᖓᒻᒪᕆᒃᐳᖅ ᔫᓇᑕᓂᒧᑦ, ᐅᖃᐅᑎᓪᓗᒍᓗ, “ᐱᐅᖏᑦᑐᐊᓗᖕᒧᑦ ᐊᑭᕋᕐᑐᕐᑎᐊᓗᖕᒧᓪᓗ ᐊᕐᓇᒧᑦ ᐃᕐᓂᕆᔭᐅᕗᑎᑦ! ᒫᓐᓇ ᖃᐅᔨᕗᖓ ᔨᓯᐅᑉ ᐃᕐᓂᖓ ᐃᓚᓕᐅᕇᕋᕕᐅᒃ ᐃᓕᖕᓂᒃ ᐊᓈᓇᖕᓂᒡᓗ ᓇᕐᕈᓇᕐᑎᓕᕐᐳᑎᑦ! 31ᖃᐅᔨᒪᓐᖏᓚᑏᑦ ᔨᓯᐅᑉ ᐃᕐᓂᖓ ᐃᓅᑎᓪᓗᒍ ᓄᓇᕐᔪᐊᕐᒥ, ᐊᖓᔪᖅᑳᕐᔪᐊᓐᖑᕈᓐᓇᑦᔮᖏᓐᓇᕕᑦ, ᐊᖓᔪᖅᑲᐅᕕᖃᑦᔮᓇᒡᓘᓐᓃᑦ? ᑍᒤᒻᒪᑦ ᒫᓐᓇ ᕾᑎᓚᐅᕈᒃ ᐅᕙᓐᓄᑦ, ᑖᓐᓇ ᑐᖁᔪᒃᓴᐅᖕᒪᑦ.”
32ᑕᕝᕙ ᔫᓇᑕᓂ ᑭᐅᕗᖅ ᐊᑖᑕᒥᓄᑦ ᓴᐅᓕᒧᑦ ᐅᖃᕐᓗᓂ, “ᖃᓄᐃᒻᒪᑦ ᑐᖁᔪᒃᓴᐅᕚ? ᓱᓇᒥᒃ ᐱᓇᓱᐊᕐᓯᒪᖕᒪᑦ?”
33ᑍᒤᓕᖕᒪᑦ, ᓴᐅᓕᐅᑉ ᔫᓇᑕᓂ ᑲᐱᒋᐊᕐᐹ ᖃᓗᒋᐊᒥᓄᑦ ᑐᖁᒋᐊᕐᓗᒍ; ᔫᓇᑕᓂ ᑕᕝᕙ ᖃᐅᔨᓚᐅᕐᐳᖅ ᐊᑖᑕᖓ ᑐᖁᑦᓯᔪᒪᓪᓚᕆᖕᓂᖓᓂᒃ ᑍᕕᑎᒥᒃ. 34ᔫᓇᑕᓂᓗ ᓂᑯᕕᑉᐳᖅ ᐃᓂᒥᓂᑦ ᓂᓐᖓᒻᒪᕆᒃᓗᓂ ᓂᕆᓚᐅᓐᖏᓚᕐᓗ ᐅᓪᓗᓕᒫᖅ ᑕᖅᑭᓂᕋᑖᑉ ᓇᓪᓕᐅᓐᓂᕐᓯᐅᕐᑕᐅᓂᖓᑕ ᐂᑉᐸᖓᓂ, ᐃᓱᒫᓗᑎᖃᒻᒪᕆᓕᕐᓗᓂ ᑍᕕᑎᒥᒃ, ᐊᑖᑕᖓᑕ ᐅᖃᕐᓂᕐᓘᑎᒋᓚᐅᕐᒪᒍ ᓇᕐᕈᓇᕐᓯᑎᓪᓗᓂᐅᒃ. 35ᐅᓪᓛᒃᑯᑦ ᔫᓇᑕᓂ ᐱᕈᕐᓰᕕᖕᒧᐊᕐᐳᖅ ᑍᕕᑎᒃᑯᒃ ᑕᒪᑐᒥᖓ ᐊᖏᖃᑎᒌᓚᐅᕋᒥᒃ, ᓄᑲᑉᐱᐊᒥᒃ ᐱᖃᑎᖃᕐᓗᓂ. 36ᓄᑲᑉᐱᐊᒧᓪᓗ ᐅᖃᕐᐳᖅ, “ᐅᓪᓚᒡᓗᑎᑦ ᕿᓂᕆᐊᒃᑭᑦ ᖃᕐᔪᐃᑦ ᐱᓯᒋᐊᕈᑎᒋᔭᒃᑲ.” ᓄᑲᑉᐱᐊᖅ ᐅᓪᓚᒃᓯᖕᒪᑦ, ᔫᓇᑕᓂ ᐱᓯᒋᐊᕐᐳᖅ ᐅᖓᑖᓄᑦ. 37ᓄᑲᑉᐱᐊᕐᓗ ᑎᑭᒻᒪᑦ ᖃᕐᔪᐃᑦ ᑐᕝᕕᒋᓚᐅᕐᑕᖏᓐᓄᑦ, ᔫᓇᑕᓂᐅᑉ ᕾᒐᓛᕐᕕᒋᕚ, “ᖃᕐᔪᐃᑦ ᐅᖓᑎᖕᓃᓐᖏᓛᑦ?” 38ᔫᓇᑕᓂᐅᓪᓗ ᓄᑲᑉᐱᐊᖅ ᕾᒐᓛᕐᕕᒋᕚ, “ᑐᐊᕕᕆᑦ ᓄᖅᑲᕐᑍᓕᓗᑎᑦ.” ᓄᑲᑉᐱᐊᓪᓗ ᖃᕐᔪᐃᑦ ᓄᐊᓐᓇᒥᒋᑦ, ᐅᑎᕐᐳᖅ ᐊᖓᔪᖅᑳᒥᓄᑦ. 39ᓄᑲᑉᐱᐊᕐᓗ ᖃᐅᔨᓚᐅᓐᖏᓚᖅ ᖃᓄᖅ ᑕᒪᓐᓇ ᑐᑭᖃᕐᒪᖔᑦ; ᔫᓇᑕᓂᒃᑯᒡᓕ ᑍᕕᑎᒃᑯᒃ ᑕᒪᑐᒥᖓ ᖃᐅᔨᒪᔪᑑᓚᐅᕐᐴᒃ. 40ᔫᓇᑕᓂᐅᓪᓗ ᓄᑲᑉᐱᐊᖅ ᑐᓂᕚ ᖃᕐᔪᓂᒃ ᐅᖃᐅᑎᓪᓗᒍᓗ, “ᐊᒡᔭᕐᓗᒋᑦ ᐃᒡᓗᒐᓴᖕᓄᐊᕈᑎᓕᒃᑭᑦ.”
41ᓄᑲᑉᐱᐊᕐᓗ ᕿᒪᕉᑎᑐᐊᕐᒪᑦ, ᑍᕕᑎ ᓂᑯᕕᑉᐳᖅ ᐃᔨᕐᓯᒪᕕᒋᔭᒥᓂᑦ ᐅᔭᕋᓱᒡᔪᐃᑦ ᖃᓕᕇᑦ ᐊᑯᓐᓂᖓᓂᑦ, ᒪᓂᖅᑲᒧᓪᓗ ᐅᑯᕗᖅ, ᐱᖓᓱᐃᕐᑐᕐᓗᓂᓗ ᐅᑯᖃᑦᑕᓚᐅᕐᐳᖅ; ᐃᕿᓪᓗᑎᒡᓗ ᑯᓂᖃᑦᑕᐅᑎᕘᒃ; ᕿᐊᖃᑎᒌᒃᓗᑎᒡᓗ, ᑍᕕᑎ ᐱᓂᕐᓴᐅᓪᓗᓂ ᔫᓇᑕᓂᒥᑦ. 42ᑕᕝᕙ ᔫᓇᑕᓂ ᐅᖃᕐᐳᖅ ᑍᕕᑎᒧᑦ, “ᐃᓱᒫᓗᖏᓪᓗᑎᑦ ᐊᐅᓪᓚᓕᕆᑦ, ᐊᖏᖃᑎᒌᓚᐅᕋᓐᓄᒃ ᐊᑕᓂᐅᑉ ᐊᑎᖓ ᑍᓪᓗᒍ, ᐅᖃᕐᓗᓄᒃ, ‘ᐊᑕᓂᖅ ᐊᑯᓐᓇᑦᑎᓐᓃᓪᓕ ᑭᖑᕚᓐᓂ ᑭᖑᕚᕐᓂᓗ ᐃᓱᖃᖏᑦᑐᒧᑦ.’” ᑍᕕᑎᓗ ᒪᑭᓐᓇᒥ ᕿᒪᕉᑎᓕᕐᐳᖅ; ᔫᓇᑕᓂᓗ ᐃᒡᓗᒐᓴᖕᓄᐊᕐᑎᓪᓗᒍ.
Currently Selected:
ᓴᒧᐃᓕ ᓯᕗᓪᓖᑦ 20: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
