ᓴᒧᐃᓕ ᓯᕗᓪᓖᑦ 16
16
ᑍᕕᑎᐅᑉ ᐅᕐᓱᕐᑎᕐᑕᐅᓂᖓ ᐊᖓᔪᖅᑳᕐᔪᐊᖑᓂᕐᒧᑦ
1ᐊᑕᓂᕐᓗ ᐅᖃᕐᐳᖅ ᓴᒧᐃᓕᒧᑦ, “ᖃᓄᖅ ᐊᑯᓂᐅᑎᒋᔪᖅ ᕿᒃᓵᖕᓂᐊᕐᐲᑦ ᓴᐅᓕ ᐱᑦᔪᑎᒋᓗᒍ? ᓇᕐᕈᒋᓕᕐᐸᕋ ᐊᖓᔪᖅᑳᕐᔪᐊᖑᓂᖓᓂᒃ ᐃᓴᕆᐊᓕᒥᐅᓄᑦ, ᓇᒡᔪᖁᑏᑦ ᐃᒻᒥᓕᕈᒃ ᐅᕐᓱᒥᒃ, ᐊᐅᓪᓚᕐᓗᑎᓪᓗ; ᑎᓕᕙᒋᑦ ᔨᓯᒧᑦ ᐱᑦᓕᐊᒥᐅᑕᕐᒧᑦ, ᐃᕐᓂᖓᑦᑕ ᐃᓚᖓᑦ ᓂᕈᐊᕐᓯᒪᒐᒃᑯ ᐊᖓᔪᖅᑳᕐᔪᐊᓐᖑᖁᓪᓗᒍ.”
2ᓴᒧᐃᓕᓗ ᐅᖃᕐᐳᖅ, “ᖃᓄᕐᓕ ᐊᐅᓪᓚᕈᓐᓇᕐᐳᖔ? ᓴᐅᓕ ᑐᓴᕈᓂ ᑐᖁᒃᑲᔭᕐᐹᖓ.”
ᐊᑕᓂᕐᓗ ᐅᖃᕐᐳᖅ, “ᑐᒃᑐᕙᐅᑉ ᓄᕐᕋᖓᓂᒃ ᓇᒃᓴᕐᓗᑎᑦ, ᐅᖃᕐᑐᒃᓴᐅᕗᑎᑦ, ‘ᑎᑭᑉᐳᖓ ᑐᓂᕐᕈᓯᕆᐊᕐᑐᕐᓗᖓ ᐊᑕᓂᕐᒧᑦ.’ 3ᔨᓯᓗ ᕾᖁᓗᒍ ᑐᓂᕐᕈᓯᕆᐊᕐᑐᖁᔭᒃᓴᕆᕙᑦ, ᖃᐅᔨᑎᑦᓱᒫᕐᐸᒋᑦ ᖃᓄᐃᓕᐅᕐᑐᒃᓴᐅᓂᕐᓂᒃ; ᐅᕐᓱᕐᑎᕐᑕᒃᓴᕆᕙᓪᓗ ᑍᓐᓇ ᐊᑎᖓ ᑍᔭᕋ.”
4ᓴᒧᐃᓕ ᑕᕝᕙ ᐱᓇᓱᐊᕐᐳᖅ ᐊᑕᓂᐅᑉ ᐱᖁᔨᑦᔪᑎᒋᔭᖓᓂᒃ, ᐱᑦᓕᐊᒧᓪᓗ ᐂᓪᓗᓂ. ᐃᒡᓗᒐᓮᓪᓗ ᐊᖓᔪᖅᑳᖏᑦ ᓴᔪᒃᐳᑦ ᑎᑭᓐᓂᖓᓂᒃ, ᐅᖃᕐᓗᑎᒡᓗ, “ᓮᒪᓂᒃᑯᑦ ᑎᑭᑉᐲᑦ?”
5ᑖᓐᓇ ᐅᖃᕐᐳᖅ, “ᓮᒪᓂᒃᑯᑦ ᑎᑭᑉᐳᖓ; ᑐᓂᕐᕈᓯᕆᐊᕐᑐᕐᐳᖓ ᐊᑕᓂᕐᒧᑦ; ᐃᑦᔪᕐᓁᑎᓕᕆᑦᓯ ᐃᓕᑦᓯᓐᓂᒃ, ᕾᓗᓯᓗ ᑐᓂᕐᕈᓯᖃᑎᒋᔭᕐᑐᕐᓗᖓ.” ᔨᓯᓗ ᐃᕐᓂᖏᓪᓗ ᐃᑦᔪᕐᓁᓕᑎᑉᐰᑦ, ᕾᖁᓪᓗᒋᓪᓗ ᑐᓂᕐᕈᓯᕆᐊᕐᑐᖁᓪᓗᒋᑦ.
6ᑕᒪᐅᖓᓗ, ᕾᖕᒪᑕ, ᑕᑯᒐᒥᓗ ᐃᓔᐊᑉᒥᒃ ᐃᓱᒪᓕᕐᐳᖅ, “ᐃᓛᒃ ᑕᕝᕙ ᐊᑕᓂᐅᑉ ᐅᕐᓱᕐᑎᕐᓯᒪᔭᖓ ᑖᓐᓇᐅᕗᖅ.” 7ᐊᑕᓂᕐᓕ ᐅᖃᕐᐳᖅ ᓴᒧᐃᓕᒧᑦ, “ᑕᑯᔪᒃᓴᐅᓐᖏᓚᑎᑦ ᑕᐅᑦᑐᖓᓂᒃ, ᐊᖏᓂᖓᓂᒡᓘᓐᓃᑦ, ᑖᓐᓇ ᓇᕐᕈᒋᒐᒃᑯ; ᐊᑕᓂᖅ ᑕᑯᓐᓇᖏᒻᒪᑦ ᐃᓅᑉ ᑕᑯᓐᓇᕐᓂᖓᑐᑦ; ᐃᓄᒃ ᑕᑯᓐᓇᕐᒪᑦ ᑕᐅᑦᑐᖓᓂᒃ, ᐊᑕᓂᕐᓕ ᑕᑯᓐᓇᕐᐳᖅ ᐆᒻᒪᑎᒥᒃ.”
8ᔨᓯᐅᓪᓗ ᕾᖁᕚ ᐊᐱᓇᑕᑉ, ᓴᒧᐃᓕᐅᓪᓗ ᓵᖓᒎᕐᑎᑉᐹ. ᐅᖃᕐᐳᕐᓗ, “ᑖᓐᓇᑦᑕᐅᖅ ᐊᑕᓂᐅᑉ ᓂᕈᐊᕐᓯᒪᓐᖏᓛ.” 9ᑕᕝᕙ ᔨᓯᐅᑉ ᓴᒪ ᐊᖅᑯᓵᕐᑎᒃᑭᕚ. ᐅᖃᕐᐳᕐᓗ, “ᑖᓐᓇᑦᑕᐅᖅ ᐊᑕᓂᐅᑉ ᓂᕈᐊᕐᓯᒪᓐᖏᓛ.” 10ᔨᓯᐅᓪᓗ ᐃᕐᓂᓂ 7 ᑕᑯᔭᐅᑎᑉᐰᑦ ᓴᒧᐃᓕᒧᑦ. ᓴᒧᐃᓕᓗ ᐅᖃᕐᐳᖅ ᔨᓯᒧᑦ, “ᐊᑕᓂᐅᑉ ᑖᒃᑯᐊ ᓂᕈᐊᕐᓯᒪᓐᖏᓔᑦ.” 11ᓴᒧᐃᓕᓗ ᐅᖃᓕᕐᐳᖅ ᔨᓯᒧᑦ, “ᑖᒃᑯᐊ ᐃᕐᓂᓕᒫᑎᑦ ᑕᒫᓃᑉᐹᑦ?” ᐅᖃᐅᑎᕚᓗ, “ᑍᒪᑦᑕᐅᖅ ᓄᑲᕐᓯᕐᐹᖅ, ᓰᐱᓂᒃ ᒥᐊᓂᕐᓯᔪᖅ.” ᓴᒧᐃᓕᓗ ᔨᓯᒧᑦ ᐅᖃᕐᐳᖅ, “ᕾᖁᒍᒃ, ᐃᖏᓐᓂᐊᓐᖏᓚᒍᑦ ᑕᒪᐅᓐᖓᓚᐅᖅᑳᕐᑎᓐᓇᒍ.” 12ᑕᕝᕙ ᑎᓕᓯᕗᖅ ᐂᔭᐅᖁᓪᓗᒍ, ᕾᖕᒪᓪᓗ ᐃᑎᕐᑎᑉᐹ. ᑖᓐᓇ ᐊᐅᐸᔮᕐᑐᒥᒃ ᑕᐅᑦᑐᖃᕐᐳᖅ, ᐃᔨᑦᓯᐊᕆᒡᓗᓂ, ᑕᑯᒥᓇᕐᑑᓪᓗᓂᓗ, ᐊᑕᓂᕐᓗ ᐅᖃᕐᐳᖅ, “ᒪᑭᓪᓗᑎᑦ, ᑖᓐᓇ ᐅᕐᓱᕐᑎᓕᕈᒃ; ᑖᓐᓇᐅᕗᖅ.” 13ᑕᕝᕙ ᓴᒧᐃᓕᐅᑉ ᓇᒡᔪᒃ ᐅᕐᓱᒥᒃ ᐃᒪᓕᒃ ᑎᒍᕚ, ᐅᕐᓱᕐᑎᕐᓗᒍᓗ ᖃᑕᓐᖑᑎᖏᑦ ᑕᑯᓐᓇᕐᑎᓪᓗᒋᑦ; ᐊᑕᓂᐅᓪᓗ ᐊᓂᕐᓂᖓᑕ ᐱᔪᓐᓇᕐᓂᖓ ᑍᕕᑎᒧᐊᕐᐳᖅ ᐅᓪᓗᒥ ᑕᕝᕙᓂ ᓇᔪᐃᓐᓇᓕᕐᓗᒍᓗ. ᓴᒧᐃᓕᓗ ᒪᑭᓐᓇᒥ, ᕌᒪᒧᐊᕐᐳᖅ.
ᐊᓂᕐᓂᐅᑉ ᐅᖁᒤᒃᓴᕐᑎᑦᓯᔫᑉ ᓴᐅᓕᒧᐊᕐᓂᖓ
14ᐊᑕᓂᐅᓪᓕ ᐊᓂᕐᓂᖓ ᓴᐅᓕᒥᒃ ᕿᒤᕗᖅ, ᐊᓂᕐᓂᕐᓗᒡᓗ ᐊᑕᓂᐅᑉ ᑎᓕᕚ ᐅᖁᒤᒃᓴᕐᑎᑦᓯᓕᕐᓗᓂᓗ ᓴᐅᓕᒥᒃ. 15ᓴᐅᓕᐅᓪᓗ ᐱᔨᖏᑦ ᑖᑦᓱᒧᖓ ᐅᖃᕐᐳᑦ, “ᑕᑯᒋᑦ ᒫᓐᓇ, ᒎᑎᐅᑉ ᑎᓕᔭᖓᑕ ᐊᓂᕐᓂᕐᓘᑉ ᐅᖁᒤᒃᓴᕐᑎᓕᕐᐹᑎᑦ. 16ᐊᖓᔪᖅᑳᕗᑦ ᑎᓕᓯᓚᐅᕐᓕ ᐱᔨᒥᓂᒃ, ᓵᖕᓃᑦᑐᓂᒃ, ᐊᖑᒻᒥᒃ ᕿᓂᖁᓪᓗᖏᑦ ᓂᑦᔭᐅᓯᔭᕈᓐᓇᕐᑐᒥᒃ ᕼᐊᕐᐱᓄᑦ; ᓂᑦᔭᐅᓯᔭᖃᑦᑕᖁᓪᓗᒍ ᒎᑎᐅᑉ ᑎᓕᔭᖓᑕ ᐊᓂᕐᓂᕐᓘᑉ ᐃᓱᒪᔮᕐᑎᑦᓯᔪᖅ ᑎᑭᑦᓴᕌᖓᑎᑦ, ᓂᑦᔭᐅᓯᔭᖃᑦᑕᕐᓂᐊᕐᑐᒥᒃ, ᐃᓱᐊᕐᓯᑎᑕᐅᖁᓪᓗᑎᑦ.”
17ᑕᕝᕙ ᓴᐅᓕ ᐱᔨᒥᓄᑦ ᐅᖃᕐᐳᖅ, “ᕿᓂᕆᑦᓯ ᐊᖑᒻᒥᒃ ᓂᑦᔭᐅᓯᔭᑦᓯᐊᕈᓐᓇᕐᑐᒥᒃ, ᕾᑎᓪᓗᒍᓗ ᐅᕙᓐᓄᑦ.”
18ᐱᔨᖓᑕ ᐃᓚᖓ ᐃᓅᓱᒃᑐᖅ ᑭᐅᕗᖅ, “ᑕᑯᒋᑦ, ᑕᑯᓯᒪᕗᖓ ᔨᓯᐅᑉ ᐱᑦᓕᐊᒥᐅᑕᐅᑉ ᐃᕐᓂᖓᓂᒃ, ᓂᑦᔭᐅᓯᔭᑦᓯᐊᕈᓐᓇᕐᑐᒥᒃ, ᓯᕘᕋᖏᑦᑐᖅ ᐅᓇᑕᕈᓐᓇᕐᓗᓂᓗ, ᓯᓚᑐᔪᒥᒃ ᐅᖃᐅᓯᖃᕈᓐᓇᕐᑐᖅ, ᑕᑯᒥᓇᕐᑐᖅ; ᐊᑕᓂᐅᓪᓗ ᑖᓐᓇ ᓇᔪᕐᐹ.”
19ᑍᒤᒻᒪ ᓴᐅᓕ ᑎᓕᓯᕗᖅ ᔨᓯᒧᑦ ᐅᖃᕆᐊᕐᑐᕐᑐᓂᒃ, ᐅᖃᖁᓪᓗᒋᑦ, “ᐃᕐᓃᑦ ᑍᕕᑎ ᕾᑎᓚᐅᕈᒃ, ᓰᐱᓕᕆᔨᖁᑏᑦ.” 20ᔨᓯᓗ ᓯᐅᑎᖅᑯᕐᑐᔪᒥᒃ ᐅᓯᓕᕐᓱᐃᕗᖅ ᓂᐊᖂᔭᓂᒃ, ᕿᓯᖕᒥᒡᓗ ᕔᓂᖃᐅᑎᒥᒃ, ᑐᒃᑑᔭᐅᓪᓗ ᓄᕐᕋᖓᓂᒃ, ᑖᒃᑯᐊᓗ ᓇᒃᓴᕐᑕᐅᑎᑉᐰᑦ ᐃᕐᓂᕐᒥᒍᑦ ᑍᕕᑎᒃᑯᑦ ᓴᐅᓕᒧᐊᖁᓪᓗᒋᑦ. 21ᑍᕕᑎᓗ ᑎᑭᑉᐳᖅ ᓴᐅᓕᒧᑦ, ᐱᓇᓱᐊᓕᕐᓗᓂᓗ. ᓴᐅᓕᐅᓪᓗ ᓇᒡᓕᒋᒻᒪᕆᒃᐹ, ᐊᒡᔭᕐᓯᔨᓐᖑᕐᑎᑉᐹᓗ ᐅᓇᑕᐅᑎᒥᓂᒃ. 22ᓴᐅᓕᓗ ᑎᓕᓯᕗᖅ ᔨᓯᒧᑦ ᐅᖃᐅᑦᔭᐅᖁᓪᓗᒍ, “ᑍᕕᑎ ᐅᕙᓐᓂ ᓇᔫᑎᔪᓐᓇᕐᑎᓕᕈᒃ, ᑖᓐᓇ ᓈᒻᒪᒋᒐᒃᑯ ᖁᕕᐊᒋᓪᓗᒍᓗ.” 23ᒎᑎᐅᓪᓗ ᑎᓕᔭᖓ ᐊᓂᕐᓂᕐᓗᒃ ᑎᑭᑐᐊᕌᖓᑦ ᓴᐅᓕᒧᑦ, ᑍᕕᑎ ᓂᑦᔭᐅᓯᔭᓕᖃᑦᑕᓚᐅᕐᐳᖅ; ᓴᐅᓕᓗ ᐃᓱᐊᕐᓯᑎᑕᐅᖃᑦᑕᕐᐳᖅ, ᖃᓄᐃᑦᓱᓐᓃᕐᓗᓂᓗ, ᐊᓂᕐᓂᕐᓗᒡᓗ ᕿᒪᕉᑎᖃᑦᑕᓚᐅᕐᐳᖅ ᑖᑦᓱᒪᓐᖓᑦ.
Currently Selected:
ᓴᒧᐃᓕ ᓯᕗᓪᓖᑦ 16: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
