ᓴᒧᐃᓕ ᓯᕗᓪᓖᑦ 11
11
ᓴᐅᓕᐅᑉ ᓵᓚᖃᕐᓂᖓ ᐊᒧᓁᑎᓂᒃ
1ᓇᕼᐊᔅ ᐊᒧᓁᑎᒥᐅᑕᖅ ᐅᓇᑕᕆᐊᕐᐳᖅ ᔭᐲᓯ-ᒋᓖᑎᒧᑦ ᓵᓚᒋᓪᓗᒍᓗ; ᑕᕝᕙ ᔭᐲᓯᐅᑉ ᐃᓄᖏᑦ ᐅᖃᕐᐳᑦ ᓇᕼᐊᔅᒧᑦ, “ᐊᖏᖃᑎᒌᓚᐅᕐᑕ ᐃᓕᖕᓂᒃ ᐱᔨᑦᓯᕐᓂᐊᕐᐳᒍᑦ.”
2ᓇᕼᐊᓴᐅᓪᓕ ᐊᒧᓁᑎᒥᐅᑉ ᑭᐅᕔᑦ, “ᐊᖏᖃᑎᒋᓂᐊᕐᐸᑦᓯ ᐊᑕᐅᓯᕐᒥᒃ ᐱᑦᔪᑎᖃᕐᑐᒥᒃ: ᐃᔨᓕᒫᓯ ᑕᓕᕐᐱᓯ ᐃᑎᕐᓴᓕᐅᕈᒻᒧᑦ ᑲᐅᓗᒋᑦ ᐊᒨᕋᕐᓂᐊᕐᐸᒃᑲ, ᑕᒪᑐᒧᖓ ᐃᓴᕆᐊᓕᒥᐅᓕᒫᑦ ᑲᓐᖑᓇᕐᑐᒦᑎᑕᐅᖁᓪᓗᒋᑦ.”
3ᑕᕝᕙ ᔭᐲᓯᐅᑉ ᐊᖓᔪᖅᑳᖏᑦ ᐅᖃᕐᐳᑦ, “ᐅᓪᓗᓂᒃ 7ᓂᒃ ᐱᕕᒃᓴᖃᕐᑎᓚᐅᕐᑎᒍᑦ ᑎᓕᓯᓂᐊᕋᑦᑕ ᐃᓴᕆᐊᓕᒥᐅᑦ ᓄᓇᓕᓕᒫᖏᓐᓄᑦ. ᐃᑲᔪᕐᑕᐅᓂᐊᖏᒃᑯᑦᑕ, ᑕᕝᕙ ᐃᓕᖕᓄᑦ ᒪᓂᔪᒫᕐᐳᒍᑦ.”
4ᑕᕝᕙ ᐅᖃᕆᐊᕐᑐᕐᑐᑦ ᑎᑭᒻᒪᑕ ᒋᐱᐊᒧᑦ, ᓴᐅᓕᐅᑉ ᓇᔪᕐᑕᖓᓄᑦ, ᐅᖃᓚᐅᕐᐳᑦ ᐱᓂᐊᕐᓂᐅᔪᓂᒃ ᐃᓄᖕᓄᑦ; ᐃᓄᐃᓪᓗ ᑐᓴᕋᒥᒃ ᕿᒃᓵᖕᓂᕐᒧᑦ ᓂᐱᖃᕐᓗᑎᒃ ᕿᐊᓕᕐᐳᑦ. 5ᓴᐅᓕᓕ ᐱᕈᕐᓰᕕᖁᑎᒥᓂᓐᖔᕐᓗᓂ ᑎᑭᑉᐳᖅ ᐃᒻᒧᒃᓯᐅᒐᖁᑎᒥᒍᑦ; ᐅᖃᕐᓗᓂᓗ, “ᓱᕕᓰ? ᓱᖕᒪᑦ ᐃᓄᐃᑦ ᕿᐊᕙᑦ?” ᑕᕝᕙ ᐅᖃᐅᑦᔭᐅᕗᖅ ᔭᐲᓯᒥᑦ ᐅᖃᕆᐊᕐᑐᓚᐅᕐᑑᑉ ᐅᖃᐅᓯᖏᓐᓂᒃ.
6ᓴᐅᓕᓕ ᑕᒪᑐᒥᖓ ᑐᓴᕋᒥ, ᒎᑎᐅᑉ ᐊᓂᕐᓂᖓᑕ ᓴᓐᖏᔪᕐᔪᐊᒥᒃ ᑎᑭᕝᕕᒋᕚ, ᓂᓐᖓᐅᒪᓂᕐᔪᐊᒧᓪᓗ ᑎᑭᑕᐅᕗᖅ. 7ᑕᕝᕙ ᐃᒻᒧᒃᓯᐅᒑᒃ ᒪᕐᕉᒃ ᑎᒍᓪᓗᒋᒃ, ᐊᒡᒍᕐᐹᒃ ᒥᑭᓈᕐᑎᕐᓗᒋᑦ ᐊᐅᓪᓚᕐᑎᓪᓗᒋᓪᓗ ᐃᓴᕆᐊᓕᒥᐅᓕᒫᓄᑦ ᐅᖃᕆᐊᕐᑐᕐᑐᓂᒃ ᒪᓕᒃᑕᐅᑎᓪᓗᒋᑦ, ᐃᒫᒃ ᐅᖃᖁᓪᓗᒋᑦ: “ᓇᓪᓕᐊᑦ ᒪᓕᖏᑦᑐᖅ ᓴᐅᓕᒥᒃ ᓴᒧᐃᓕᒥᒡᓗ ᐅᓇᑕᕆᐊᕐᑐᕐᑎᓪᓗᒋᑦ ᐃᒻᒧᒃᓯᐅᒐᑎᑐᑦ ᑍᒫᒃ ᐊᕕᒃᑐᕐᑕᐅᔪᒫᕐᐳᑦ!” ᑕᕝᕙ ᐃᓴᕆᐊᓕᒥᐅᑦ ᐃᓄᖏᑦ ᐊᖏᔪᒥᒃ ᓯᕘᕋᓕᕐᐳᑦ ᐊᑕᓂᕐᒥᒃ, ᕾᓚᐅᕐᐳᓪᓗ ᐊᑕᐅᑦᓯᐅᓕᖓᑦᓯᐊᕐᓗᑎᒃ ᐃᓄᒃᑐᑦ ᐊᑕᐅᓯᕐᑐᑦ. 8ᓴᐅᓕᐅᑉ ᑲᑎᑎᓐᓇᒥᒋᑦ ᓄᓇᒥ ᐲᔨᒃᒥ, ᐊᖑᑎᑦ ᐃᓴᕆᐊᓕᒥᐅᑦ 300,000ᐅᕗᑦ, ᔫᑕᒥᐅᓪᓗ ᐊᖑᑎᑦ 30,000ᓗᑎᒃ.
9ᐅᖃᕐᐳᓪᓗ ᐅᖃᕆᐊᕐᑐᕐᓯᒪᔪᓄᑦ ᔭᐲᓯ-ᒋᓖᑎᒥᑦ, “ᐃᓅᖃᑎᓯ ᐅᖃᐅᑎᓯᒋᒃ ᖃᐅᒃᐸᑦ ᑍᒤᓪᓗᐊᓕᕐᐸᑦ ᐃᑲᔪᕆᐊᕐᑕᐅᔪᒫᕐᐳᑦ.” ᔭᐲᓯᒥᐅᓪᓕ ᑕᒪᑐᒥᖓ ᑐᓴᕋᒥᒃ ᖁᕕᐊᓱᒻᒪᕆᓕᕐᐳᑦ. 10ᑍᒤᒻᒪᑦ ᔭᐲᓯᒥᐅᑦ ᐃᓄᖏᑦ ᓇᕼᐋᓴᒧᑦ ᐅᖃᕐᐳᑦ, “ᑲᐅᒃᐸᑦ ᐃᓕᖕᓄᑦ ᕾᓛᕐᐳᒍᑦ, ᓱᓇᑐᐃᓐᓇᕐᒥᒡᓗ ᐱᓂᐊᕐᕕᒋᔪᒪᒍᑦᑎᒍᑦ ᐱᓂᐊᕐᕕᒋᓛᕐᐸᑦᑎᒍᑦ ᐃᓱᒪᕐᓱᕐᓗᑎᑦ.”
11ᖃᐅᑎᓪᓗᒍ ᐅᓪᓛᒃᑯᑦ ᓴᐅᓕᐅᑉ ᐃᓄᖁᑎᓂ ᐊᕕᒃᑐᕐᐰᑦ ᐱᖓᓱᐃᓕᓪᓗᒋᑦ; ᖃᐅᒻᒪᓕᕐᑎᓪᓗᒍ ᐊᑭᕋᖏᑕ ᑕᖕᒫᕐᓯᒪᕕᒋᔭᖓᓄᐊᕐᐳᑦ ᐅᓇᑕᕆᐊᕐᓗᑎᒃ, ᐊᒧᓁᑎᒥᐅᓪᓗ ᑐᖁᕋᕐᐰᑦ ᐅᓪᓘᑉ ᕿᑎᕋᕐᓂᖓᓄᑦ ᑎᑭᓪᓗᒍ; ᐊᒥᐊᒃᑰᔪᓪᓗ ᓯᐊᒻᒪᓚᐅᕐᐳᑦ, ᐂᑉᐸᖃᐅᕋᑎᒃ ᐃᓄᑑᓈᕐᑎᕐᓗᑎᒃ.
12ᑕᕝᕙ ᐃᓴᕆᐊᓕᒥᐅᑦ ᐃᓄᖏᑦ ᐅᖃᓕᕐᐳᑦ ᓴᒧᐃᓕᒧᑦ, “ᓇᐅᒡᓕ ᑍᒃᑯᐊ ᐃᓄᐃᑦ ᐅᖃᓚᐅᕐᑐᑦ, ‘ᓴᐅᓕ ᐊᐅᓚᑦᓯᔨᐅᔪᒃᓴᐅᕚ ᐅᕙᑦᑎᓐᓅᑦ? ᕾᑎᑕᐅᓚᐅᕐᓕᑦ ᑐᖁᓐᓂᐊᕋᑦᑎᒍᑦ!’”
13ᓴᐅᓕᓕ ᐅᖃᕐᐳᖅ, “ᐅᓪᓗᒥ ᑐᖁᑕᐅᔪᖃᕐᓂᐊᓐᖏᓚᖅ, ᐅᓪᓗᒥ ᐊᑕᓂᐅᑉ ᐃᓴᕆᐊᓕᒥᐅᑦ ᐱᐅᓕᖕᒪᒋᑦ.” 14ᑕᕝᕙ ᓴᒧᐃᓕᐅᑉ ᐃᓄᐃᑦ ᐅᖃᐅᑎᕔᑦ, “ᒋᐅᓪᒐᐅᓪᒧᐊᓚᐅᕐᑕ ᐊᖓᔪᖅᑲᐅᕕᖓ ᓄᑕᐅᓯᓕᕐᓂᐊᕋᑦᑎᒍ.” 15ᑕᕝᕙ ᐃᓄᓕᒫᑦ ᒋᐅᓪᒐᐅᓪᒧᐊᐳᑦ, ᑕᕝᕙᓂᓗ ᒋᐅᓪᒐᐅᓪᒥ ᓴᐅᓕ ᐊᖓᔪᖅᑳᕐᔪᐊᖑᕐᑎᑉᐹ ᐊᑕᓂᐅᑉ ᓵᖓᓂ. ᑕᕝᕙᓂᓗ ᑐᓂᕐᕈᓯᕐᐳᑦ ᑐᓂᕐᕈᑎᒥ ᓮᒻᒪᕐᑎᑕᐅᓂᕐᒧᑦ ᐊᑕᓂᐅᑉ ᓵᖓᓂ, ᑕᕝᕙᓂᓗ ᓴᐅᓕ ᐃᓴᕆᐊᓕᒥᐅᓪᓗ ᐃᓄᖏᑦ ᐊᖏᔪᒥᒃ ᖁᕕᐊᓱᖃᑎᒌᓚᐅᕐᐳᑦ.
Currently Selected:
ᓴᒧᐃᓕ ᓯᕗᓪᓖᑦ 11: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
