ᐊᑕᓃᑦ ᓯᕗᓪᓖᑦ 9
9
ᒎᑎᑉ ᓴᖅᑭᒃᑲᓐᓂᕐᓂᖓ ᓲᓗᒨᓂᒧᑦ
ᑯᕉᓂᑲ ᐂᑉᐸᖏᑦ 7:11-22
1ᐊᖓᔪᖅᑳᕐᔪᐊᑉ ᓲᓗᒨᓂ ᐱᔭᕇᕐᓯᒪᓕᕐᑎᓪᓗᒍ ᑐᒃᓯᐊᕐᕕᒡᔪᐊᒥᒃ, ᐊᖓᔪᖅᑳᕐᔪᐊᒃᑯᕕᖕᒥᓂᓗ ᐊᓯᓕᒫᖏᓐᓂᓗ ᓴᓇᔪᒪᔭᒥᓂᒃ. 2#ᐊᑕᓃᑦ ᓯᕗᓪᓖᑦ 3:5; ᑯᕉᓂᑲ ᐂᑉᐸᖏᑦ 1:7.ᐊᑕᓂᖅ ᓴᖅᑭᒃᑲᓐᓂᕆᕗᖅ ᓲᓗᒨᓂᒧᑦ, ᑍᒫᑦᓮᓐᓇᖅ ᓴᖅᑭᓚᐅᕐᓂᕐᒥᑐᑦ ᒋᐱᐅᓂᒥ. 3ᐊᑕᓂᐅᓪᓗ ᐅᖃᕐᕕᒋᕚ, “ᑐᒃᓯᐊᕐᓂᑎᑦ ᕿᓄᓂᑎᓪᓗ ᑐᓴᕐᐸᒃᑲ, ᑐᒃᓯᐊᕐᕕᒡᔪᐊᖅ ᑖᓐᓇ ᐃᑦᔪᕐᓁᓕᑎᑉᐸᕋ ᓴᓇᓚᐅᕐᑍᑦ; ᐃᓂᒋᓂᐊᕐᓕᕐᐸᕋᓗ ᑐᒃᓯᐊᕐᕕᐅᖁᓪᓗᖓ ᐃᓱᖃᖏᑦᑐᒧᑦ, ᒥᐊᓂᕆᓂᐊᕐᐸᕋ ᓴᐳᑎᕙᒡᓗᒍᓗ ᑍᒪᓐᖓᓕᒫᖅ. 4ᓱᓕᑦᓯᐊᕐᓗᑎᑦ ᒪᓕᑦᓯᐊᕐᓗᑎᓪᓗ ᐅᕙᓐᓂᒃ ᐱᔨᑦᓯᕐᓂᐊᕈᕕᑦ ᐊᑖᑕᒃᑐᑦ ᑍᕕᑎᑐᑦ, ᐱᖁᔭᒃᑲᓗ ᓈᓚᒃᑯᕕᒋᑦ ᒪᓕᒃᑕᐅᖁᔭᒃᑲᓗ ᐃᓕᖕᓄᑦ ᒪᓕᑦᓯᐊᕈᕕᒋᑦ, 5#ᐊᑕᓃᑦ ᓯᕗᓪᓖᑦ 2:4.ᐊᖏᕈᑎᒋᓯᒪᔭᒃᑲ ᑲᔪᓯᑎᓐᓂᐊᕐᐸᒃᑲ ᐊᑖᑕᖕᓄᑦ ᑍᕕᑎᒧᑦ, ᐅᖃᐅᑎᓯᒪᒐᒃᑯ ᐃᒫᒃ, ‘ᐃᓴᕆᐊᓕ ᐊᐅᓚᑕᐅᖏᓐᓇᕐᓂᐊᕐᐳᖅ ᑭᖑᕚᕐᓄᑦ.’ 6ᑭᓯᐊᓂ ᐅᕙᓐᓂᒃ ᒪᓕᒍᓐᓃᕈᕕᑦ ᑭᖑᕚᑎᓪᓘᓐᓃᑦ ᓈᓚᒍᓐᓃᕈᕕᓪᓗ ᐱᖁᔭᓐᓂᒃ ᐅᖃᐅᓯᕆᔭᓐᓂᒡᓗ ᐃᓕᖕᓄᑦ ᑐᓂᔭᓐᓂᒃ, ᑐᒃᓯᐊᖃᑦᑕᓕᕐᓗᑎᓪᓗ ᒎᑎᓐᖑᐊᓄᑦ, 7ᑍᒤᑐᐊᕈᕕᑦ ᐃᓄᖁᑎᒃᑲ ᐃᓴᕆᐊᓕᑎᑦ ᐲᕐᑎᓐᓂᐊᕐᐸᒃᑲ ᓄᓇᒥᑦ ᑖᒃᑯᓄᖓ ᑐᓂᑦᔪᑎᒋᓚᐅᕐᑕᓐᓂᑦ; ᑐᒃᓯᐊᕐᕕᒡᔪᐊᕐᓗ ᕿᒪᒡᓗᒍ ᐃᑦᔪᕐᓁᑎᓚᐅᕐᑕᕋ ᐃᓂᒋᓂᐊᕐᓂᕋᓚᐅᕐᑕᕋᓗ ᑕᑯᓐᓇᕈᒪᔪᓐᓃᕐᓗᒍᓗ; ᐃᓄᐃᓪᓗ ᐊᖅᑯᓵᕐᑐᑦ ᓇᑭᓕᒫᖅ ᐃᓴᕆᐊᓕᒃᑯᓐᓂᒃ ᓇᕐᕈᓇᕐᓂᕅᔪᒫᕐᐳᑦ, ᖁᔭᓈᕐᑕᐅᓯᒪᓂᕋᓕᕐᓗᒍᓗ. 8#ᐊᑕᓃᑦ ᐂᑉᐸᖏᑦ 25:9; ᑯᕉᓂᑲ ᐂᑉᐸᖏᑦ 36:19.ᐅᓇ ᑐᒃᓯᐊᕐᕕᒡᔪᐊᖅ ᓱᕋᒃᓯᒪᓕᕐᓗᓂ ᓯᖁᒥᓯᒪᓕᕈᒪᕐᐳᖅ, ᐃᓄᓕᒫᑦ ᑖᑦᓱᒥᖓ ᑕᑯᔪᕕᓃᑦ ᖁᐊᕐᓵᕐᓗᑎᒡᓗ ᑲᒪᓂᐊᕈᒫᕐᐳᑦ ᐅᖃᕐᓗᑎᒡᓗ, ‘ᖃᓄᐊᓗᒃ ᐊᑕᓂᖅ ᑍᒤᓕᐅᕐᐸ ᑕᕝᕗᖓ ᓄᓇᒧᑦ ᐅᕗᖓᓗ ᑐᒃᓯᐊᕐᕕᒡᔪᐊᒧᑦ?’ 9ᑕᕝᕙ ᐅᖃᓕᕈᒫᐳᑦ, ‘ᐃᓄᐃᑦ ᕿᒤᓚᐅᕐᒪᑕ ᐊᑕᓂᕐᒥᒃ ᒎᑎᒥᖕᓂᒃ ᓯᕗᓕᕕᓂᖏᓐᓂᒃ ᐄᑦᔨᑉᑎᒥᑦ ᐊᐅᓪᓚᕐᑎᑦᓯᓚᐅᕐᑐᒥᒃ, ᐃᑲᔪᕐᑎᑖᕋᓱᐊᕐᓯᒪᖕᒪᑕ ᒎᑎᓐᖑᐊᓄᑦ ᑐᒃᓯᐊᕐᕕᒋᓗᒋᓪᓗ, ᑍᒤᒻᒪᑦ ᐊᑕᓂᕐᒧᑦ ᐊᓱᕈᕐᓇᕐᑐᒧᐊᕐᑎᑕᐅᓯᒪᕗᑦ.’”
ᓲᓗᒨᓂᐅᑉ ᐊᖏᖃᑎᖃᕐᓂᖓ ᕼᐃᕋᒻᒥᒃ
ᑯᕉᓂᑲ ᐂᑉᐸᖏᑦ 8:1-2
10ᓲᓗᒨᓂ ᑐᒃᓯᐊᕐᕕᒡᔪᐊᒥᒃ ᓴᓇᓚᐅᕐᒪᑦ ᐊᕐᕌᒍᓂᒃ 20ᓂᒃ ᐊᖓᔪᖅᑳᕐᔪᐊᖃᕐᕕᖕᒥᓂᒡᓗ, 11ᐊᖓᔪᖅᑳᕐᔪᐊᖅ ᕼᐅᕋᒻ ᑍᕆᒥᐅᑕᖅ ᑐᓂᓯᓯᒪᖕᒪᑦ ᕿᔪᖕᓂᒃ ᓮᐸᕋᓯᓂᒃ ᓰᑕᕆᓂᒡᓗ ᓯᑕᒃᑕᓂᒃ ᒎᓗᓂᒡᓗ ᐱᔪᒪᔭᖏᓐᓂᒃ ᐊᑐᕐᓂᐊᕐᑕᖏᓐᓂᒃ ᓴᓇᓗᓂ. ᐱᔭᕇᕐᓂᖓᑕ ᑭᖑᓂᖓᒍᑦ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᕼᐅᕋᒻ ᑐᓂᕚ ᐃᒡᓗᒐᓴᖕᓂᒃ 20ᓂᒃ ᒐᓕᓕᐊᒦᑦᑐᓂᒃ. 12ᕼᐅᕋᒻ ᑕᑯᔭᕐᑐᕋᒥᒋᑦ ᑍᕆᒥᑦ ᐱᓪᓗᓂ ᓲᓗᒨᓂᐅᑉ ᑐᓂᓚᐅᕐᑕᖏᓐᓂᒃ, ᐱᐅᒋᓚᐅᓐᖏᓔᑦ. 13ᑍᒤᒻᒪᑦ ᓲᓗᒨᓂᒧᑦ ᐅᖃᕐᐳᖅ, “ᓱᓇᓂᒃ ᑐᓂᓯᓐᓂᕐᐲᑦ ᑖᒃᑯᐊ ᖃᑕᖑᑎᒋᕙᒃᑲ ᓄᓇᓖ ᐅᕙᓐᓄᑦ ᕾᓚᐅᕐᑕᑎᑦ.” ᑕᒪᓐᓇ ᐱᔪᑎᒋᓪᓗᒍ ᑕᒪᓐᓇ ᓄᓇ ᓱᓕ ᐅᓪᓗᒥ ᐊᑎᖃᕐᐳᖅ ᑲᐳᓪᒥᒃ. 14ᕼᐅᕋᒻ ᓲᓗᒨᓂᒧᑦ ᑐᔪᐃᓚᐅᕐᐳᖅ 10,000ᐸᐅᓐᓂᒃ ᐅᖁᒤᓂᖃᕐᑐᓂᒃ ᒎᓗᓂᒃ.
ᓲᓗᒨᓂᐅᑉ ᐊᒃᓱᐃᓕᒃᑲᓐᓂᕐᓂᖓ
ᑯᕉᓂᑲ ᐂᑉᐸᖏᑦ 8:3-18
15ᐊᖓᔪᖅᑳᕐᔪᐊᖅ ᓲᓗᒨᓂ ᓴᓇᑎᑦᓯᕗᖅ ᐊᑭᓕᕐᓱᕐᑕᐅᖏᑦᑐᓂᒃ ᑐᒃᓯᐊᕐᕕᒡᔪᐊᕐᒥᒃ ᐊᖓᔪᖅᑳᕐᔪᐊᒃᑯᕕᖕᒥᓂᒡᓗ, ᓄᓇᓗ ᐳᕐᑐᓯᒋᐊᕐᑕᐅᑎᓪᓗᓂᐅᒃ ᐃᒡᓗᒐᓴᖕᓃᑦᑐᖅ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ, ᐃᒡᓗᒐᓮᓪᓗ ᔨᕉᓴᓕᐅᑉ ᐊᕙᓗᕐᔪᐊᖓᓂᒃ ᓴᓇᔭᐅᑎᑦᓯᓪᓗᓂ. ᓴᓇᔭᐅᑎᑦᓯᒃᑲᓐᓂᕐᓗᓂᓗ ᑖᒃᑯᐊ ᐊᑐᕐᓗᓂᒋᑦ ᐃᒡᓗᒐᓴᖕᓂᒃ ᕼᐂᔭᒦᑦᑐᓂᒃ ᒥᒋᑐᒥᓗ ᒋᔨᕆᒥᓗ. 16(ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦ ᐅᓇᑕᓚᐅᕐᓯᒪᖕᒪᑦ ᒋᔨᕆᒥᒃ ᓵᓚᒋᓪᓗᓂᒋᓪᓗ ᐃᓄᓕᒫᖏᓪᓗ ᑐᖁᓪᓗᓂᒋᑦ ᐃᑯᐊᓪᓚᒃᑎᓪᓗᓂᒋᓪᓗ ᐃᒡᓗᒐᓮᑦ, ᐃᒡᓗᒐᓴᖕᓃᑦᑐᓪᓗ ᑬᓇᓂᒥᐅᑦ ᑐᖁᓪᓗᓂᒋᑦ, ᑭᖑᓂᖓᒍᑦ ᐸᓂᖕᒥᓄᑦ ᑐᓂᕐᕈᑎᒋᓚᐅᕐᐹ ᑲᑎᑎᑕᐅᖕᒪᑦ ᓲᓗᒨᓂᒧᑦ. 17ᓲᓗᒨᓂᐅᑉ ᑖᓐᓇ ᐃᒡᓗᒐᓴᒃ ᒋᔨᕆ ᓴᓇᒃᑲᓐᓂᓚᐅᕐᐹ) ᐊᑐᕐᓗᓂ ᐊᑭᓕᕐᓱᕐᑕᐅᖏᑦᑐᓂᒃ, ᓲᓗᒨᓂᓗ ᓴᓇᒃᑲᓐᓂᓚᐅᕆᕗᖅ ᐊᒃᐸᓯᖕᓂᓴᐅᔪᓂᒃ ᐱᑦ-ᕼᐅᕋᓐᒥᒃ, 18ᐹᓛᑦ, ᑕᒫᕆᓗ ᓱᓇᖃᔪᐃᑦᑐᒦᑦᑑᒃ ᔫᑎᐊᒥ, 19ᑖᒃᑯᐊ ᐃᒡᓗᒐᓮᑦ ᓲᓗᒨᓂᐅᑉ ᓱᓇᑐᐃᓐᓇᕐᑖᕐᕕᒋᕙᒡᓗᓂᒋᑦ ᐱᓯᒤᓐᓇᕐᓗᓂᒋᑦ, ᐃᒡᓗᒐᓮᓪᓗ ᐊᒃᓴᓗᐊᓕᖕᓂᒃ ᕿᒧᓯᐅᑎᖃᕐᕕᒋᓪᓗᓂᒋᑦ, ᕿᒻᒥᕐᔪᐊᒃᑯᓪᓗ ᐅᓇᑕᕐᑎᒃᑯᕕᒋᓚᐅᕐᐰᑦ, ᐊᓯᖏᓐᓂᒡᓗ ᓴᓇᔪᒪᒍᓂ ᔨᕉᓴᓕᒥ, ᓕᐸᓇᓂᒥᓘᓐᓃᑦ ᐅᕝᕙᓘᓐᓃᑦ ᓇᓂᓕᒫᖅ ᐊᖓᔪᖅᑳᕐᔪᐊᒃᑯᕕᒋᔭᒥᓂ. 20ᑖᒃᑯᐊ ᐊᒥᐊᒃᑯᓕᒫᑦ ᐊᒧᕅᑎᓂᑦ, ᕼᐃᑍᑎᓂᓪᓗ, ᐱᕆᔧᑎᓂᓪᓗ, ᕼᐃᕔᑎᓂᓪᓗ, ᔨᐳᓮᑎᓂᓪᓗ, ᐃᓴᕆᐊᓕᓄᑦ ᐃᓚᒋᔭᐅᖏᑦᑐᓂᒃ. 21ᓲᓗᒨᓂ ᐊᑐᓚᐅᕐᐳᖅ ᐊᑭᖃᖏᑦᑐᒥᒃ ᓴᓇᑎᖃᑦᑕᕐᑕᒥᓂᒃ ᑭᖑᕚᕆᔭᐅᔪᓂᒃ ᑭᓇᓁᒥᐅᓄᑦ, ᐃᓴᕆᐊᓕᑎᑦ ᐅᓇᑕᕐᓗᓂᒋᑦ ᑐᖁᕋᕐᑍᓐᓇᕆᓚᐅᓐᖏᑕᖏᓐᓂᒃ, ᑕᒪᒃᑯᐊᓕᒫᑦ ᑕᕝᕙ ᓯᐊᓛᕆᔭᐅᓯᒪᕗᑦ ᐅᓪᓗᒥᒧᑦ ᑎᑭᓪᓗᒋᑦ. 22ᓲᓗᒨᓂ ᓯᐊᓛᖃᓚᐅᓐᖏᓚᖅ ᐃᓴᕆᐊᓕᓂᑦ; ᑖᒃᑯᐊ ᑖᑦᓱᒥᖓ ᐱᔨᑦᓯᓚᐅᕐᐳᑦ ᐅᓇᑕᕐᑐᒃᓴᐅᓪᓗᑎᒃ, ᐊᖓᔪᖅᑳᖁᑎᒋᓪᓗᓂᒋᑦ, ᐊᖓᔪᖅᑳᖑᓪᓗᑎᒡᓗ ᐅᓇᑕᕐᑐᒃᓴᓄᑦ, ᐅᓇᑕᕐᑐᒃᓴᓄᓪᓗ ᐊᕕᒃᑐᕐᓯᒪᔪᓄᑦ ᐊᖓᔪᖅᑳᖑᓪᓗᑎᒃ, ᕿᒧᒃᓯᐅᑎᓄᓪᓗ ᐊᒃᓴᓗᐊᓕᖕᓄᑦ ᐊᖓᔪᖅᑳᖑᓪᓗᑎᒃ, ᕿᒻᒥᕐᔪᐊᒃᑰᕐᑎᐅᓪᓗᑎᒡᓗ.
23550ᐅᓚᐅᕐᐳᑦ ᐊᖓᔪᖅᑳᑦ ᐃᖅᑲᓁᔭᕐᑎᓄᑦ ᐊᑭᓕᕐᓱᑕᐅᖏᑦᑐᓄᑦ, ᓲᓗᒨᓂᐅᑉ ᐃᒡᓗᖁᑎᒃᓴᖏᓐᓂ ᐊᑦᔨᒌᖏᑦᑐᓂ.
24ᓲᓗᒨᓂᐅᑉ ᓄᓇᑦ ᐳᕐᑐᓯᒋᐊᕐᑕᐅᑎᓚᐅᕐᐰᑦ ᐃᒡᓗᒐᓮᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᑦ, ᐄᑦᔨᑉᑎᒥᐅᑉ ᐊᖓᔪᖅᑳᕐᔪᐊᖓᑕ ᐸᓂᐊᑕ ᓄᒃᑎᕐᕕᒋᓚᐅᕐᐹ ᑍᕕᑎᐅᑉ ᐃᒡᓗᒐᓴᖏᓐᓂᑦ ᐱᓪᓗᓂ ᓲᓗᒨᓂᐅᑉ ᑖᑦᓱᒧᖓ ᓴᓇᔭᐅᑎᒻᒪᒍ ᓇᔪᒐᕆᓂᐊᓕᕐᓗᓂᐅᒃ.
25 #
ᒨᓯᓯ ᐂᑉᐸᖏᑦ 23:17; 34:23; ᒨᓯᓯ ᑕᓪᓕᒪᖏᑦ 16:16. ᐊᕐᕌᒍ ᐱᖓᓱᐊᕐᑎᕐᓗᓂ ᓲᓗᒨᓂ ᑐᓂᕐᕈᓯᕐᐸᓚᐅᕐᐳᖅ ᐃᑯᐊᓚᑎᑕᒃᓴᓂᒃ ᑐᒃᓯᐊᕈᑎᓂᒡᓗ ᓮᒻᒪᕐᑎᑕᐅᔪᒪᑦᔪᑎᓂᒃ ᑐᓂᕐᕈᓯᕐᕕᖕᒥ ᓴᓇᓚᐅᕐᑕᒥᓂ ᐊᑕᓂᕐᒧᑦ, ᑎᐱᑦᓯᐊᕆᒃᓴᐅᑎᓂᒡᓗ ᐃᑯᐊᓚᑎᑦᓯᕙᒡᓗᓂ ᐊᑕᓂᕐᒧᑦ. ᑕᕝᕙ ᐱᔭᕇᓕᓚᐅᕐᐳᖅ ᑐᒃᓯᐊᕐᕕᒡᔪᐊᒥᒃ ᓴᓇᓪᓗᓂ.
26ᓱᓕ ᐊᖓᔪᖅᑳᕐᔪᐊᖅ ᓲᓗᒨᓂ ᐅᒥᐊᕐᔪᐊᓂᒃ ᓴᓇᔭᐅᑎᑦᓯᓪᓗᓂ ᐃᔨᐅᓂ-ᒋᐱᕆᒥ ᐃᓗᑎᐅᑉ ᖃᓂᒋᔮᓂ, ᐊᒡᒐᐸᐅᑉ ᑲᖏᕐᓱᐊᑕ ᓯᒡᔭᖓᓂ ᐃᒪᕐᒧᑦ ᐊᐅᐸᓗᒃᑕᒧᑦ, ᐄᑐᒥᐅᑉ ᓄᓇᖓᓂ. 27ᐊᖓᔪᖅᑳᕐᔪᐊᖅ ᕼᐅᕋᒻ ᑎᓕᓯᓚᐅᕐᐳᖅ ᐅᒥᐊᓕᒃᑕᓂᒃ ᐱᔪᓐᓇᑦᓯᐊᕐᑐᓂᒃ, ᐱᔨᑦᓯᕐᓂᐊᕐᑐᓂᒃ ᓲᓗᒨᓂᐅᑉ ᐅᒥᐊᕐᑐᑎᖁᑎᖏᓐᓂᒃ. 28ᑖᒃᑯᐊ ᐅᐱᕼᐃᕆᒧᐊᕋᒥᒃ, ᒎᓗᖁᑎᒥᖕᓂᒃ ᑎᑭᐅᑦᔨᓚᐅᕐᐳᑦ ᓲᓗᒨᓂᒧᑦ 32,000ᐸᐅᓐᓂᒃ ᐅᖁᒤᓐᓂᓕᖕᓂᒃ.
Currently Selected:
ᐊᑕᓃᑦ ᓯᕗᓪᓖᑦ 9: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
