ᐊᑕᓃᑦ ᓯᕗᓪᓖᑦ 10
10
ᑯᐃᓐ ᓰᐸᐅᑉ ᓂᐅᕐᕈᓂᖓ
ᑯᕉᓂᑲ ᐂᑉᐸᖏᑦ 9:1-12
1 #
ᒫᑎᐅᓯ 12:42; ᓘᑲᓯ 11:31. ᓰᐸᒥᐅᑦ ᑯᐃᓐᖓ ᑐᓴᐅᒪᓕᕋᒥ ᓲᓗᒨᓂᐅᑉ ᖃᐅᔨᒪᔭᐅᒻᒪᕆᓕᕐᓂᖓᓂᒃ, ᔨᕉᓴᓕᒧᑦ ᐊᐅᓪᓚᕐᐳᖅ ᐆᒃᑐᕈᒪᓪᓗᓂᐅᒃ ᐊᐱᖅᑯᓯᕐᓂᒃ ᐊᔪᕐᓇᕐᑐᓂᒃ. 2ᔨᕉᓴᓕᒧᐊᕐᐳᖅ ᐃᓚᖃᕐᓗᓂ ᐅᓄᕐᑐᓂᒃ, ᑳᒥᓖᓪᓗ ᓇᖕᒪᒃᑎᓪᓗᓂᒋᑦ ᓂᕿᒧᑦ ᒪᒪᕐᓴᐅᑎᓂᒃ ᑕᑯᒥᓇᕐᓴᐅᑎᓂᒡᓗ ᒎᓗᓂᒡᓗ ᐊᖏᔪᓂᒃ, ᐅᔭᕋᖕᓂᒡᓗ ᐊᑭᑐᔪᓂᒃ; ᓲᓗᒨᓂᒥᒃ ᑲᑎᓯᒐᒥ ᐅᖃᓪᓚᒡᕕᒋᕚ ᐃᓱᒪᒋᓯᒪᔭᓕᒫᒥᓂᒃ. 3ᓲᓗᒨᓂᐅᑉ ᑕᒪᕐᒥᒃ ᑭᐅᔪᓐᓇᕐᑍᓐᓇᕆᕔᑦ ᐊᐱᖅᑯᓯᕆᔭᓕᒫᖏᑦ; ᓇᓗᔭᖏᓐᓂᒃ ᐱᑕᖃᓚᐅᓐᖏᓚᖅ ᑭᐅᔪᓐᓇᓐᖏᑕᖏᓐᓂᒡᓘᓐᓃᑦ. 4ᓰᐸᒥᐅᑦ ᑯᐃᓐᖓᑦ ᖃᐅᔨᒐᒥ ᑐᓵᒐᒥᓗ ᓲᓗᒨᓂᐅᑉ ᓯᓚᑐᓂᒐᓂᒃ, ᑕᑯᓪᓗᓂᓗ ᐊᖓᔪᖅᑳᕐᔪᐊᒃᑯᕕᖓᓂᒃ ᓴᓇᓚᐅᕐᑕᖓᓂᒃ. 5ᑕᑯᓪᓗᓂᓗ ᓂᕿᓂᒃ ᓵᒧᑦ ᐊᑐᐃᓐᓇᕈᕐᑎᑕᐅᔪᓂᒃ, ᐊᖓᔪᖅᑳᖁᑎᖏᑕᓗ ᐃᓂᖏᓐᓂᒃ, ᐊᖏᕐᓯᒪᓂᖏᓐᓂᒡᓗ ᐊᖓᔪᖅᑳᕐᔪᐊᒃᑰᕕᖓᑕ ᐃᖅᑲᓁᔭᕐᑎᖏᓐᓂᒃ, ᐃᖅᑲᓁᔭᕐᑎᖏᑕᓗ ᐊᓐᓄᕌᖏᓐᓂᒃ, ᐱᔨᖏᑕᓗ ᓂᕆᕕᒡᔪᐊᓂᕐᒥ ᑐᓐᓂᕐᓮᔨᖏᓐᓂᒃ, ᑐᓂᕐᕈᑎᓂᒡᓗ ᐃᑯᐊᓚᑎᑦᓯᓂᒃᑯᑦ ᑐᓂᕐᕈᓯᕐᓂᖏᓐᓂᒃ ᑐᒃᓯᐊᕐᕕᒡᔪᐊᒥ, ᐊᖏᔪᒥᒃ ᑕᑕᒥᓐᓂᐊᓚᐅᕐᐳᖅ ᑕᒪᒃᑯᐊ ᐱᔪᑎᒋᓪᓗᒋᑦ. 6ᐊᖓᔪᖅᑳᕐᔪᐊᕐᒧᑦ ᓲᓗᒨᓂᒧᑦ ᐅᖃᕐᐳᖅ, “ᐅᖃᐅᓯᐅᕙᒃᑐᑦ ᓱᓕᕗᑦ ᑐᓴᓚᐅᕐᑕᒃᑲ ᓇᖕᒥᓂᖅ ᓄᓇᓐᓂ ᐱᓂᐊᕐᓂᑎᑦ ᓯᓚᑐᓃᓪᓗ, 7ᐅᖃᐅᓯᐅᕙᒃᑐᑦ ᐅᒃᐱᕆᓚᐅᓐᖏᓚᒃᑲ ᐅᕙᖓ ᓇᖕᒥᓂᖅ ᑕᑯᓚᐅᖅᑳᕐᓇᖓ ᐊᒡᓛᑦ ᕿᑎᖅᑲᓪᓗᐊᖏᓐᓂᒃ ᑐᓴᓚᐅᕐᓂᖏᓐᓇᒪ, ᓯᓚᑐᓃᑦ ᐊᒃᓱᐃᓐᓃᓪᓗ ᑐᓴᓚᐅᕐᑕᓐᓂᑦ ᐊᖏᓂᕐᓴᒻᒪᕆᐅᖕᒪᑕ. 8ᑐᓱᓐᓇᕐᑐᐊᓘᕗᑦ ᓄᓕᐊᑎᑦ! ᐱᔨᑎᓪᓗ ᑐᓱᓐᓇᕐᑑᓪᓗᑎᒃ, ᐃᓕᖕᓄᑦ ᓇᔫᑏᓐᓇᕐᓗᑎᒃ ᑐᓴᖃᑦᑕᕐᓗᑎᒡᓗ ᐅᖃᐅᓯᕐᓂᒃ ᓯᓚᑐᔪᓂᒃ! 9ᐊᑕᓂᖅ ᓂᕐᑐᕐᑕᐅᓕ ᒎᑎᒋᔧᑦ! ᐃᓕᖕᓂᒃ ᖁᕕᐊᓲᑎᖃᕐᓂᖓ ᐊᖓᔪᖅᑳᕐᔪᐊᓐᖑᕐᑎᓪᓗᓂᑎᒃ ᐃᓴᕆᐊᓕᒥᐅᓄᑦ. ᓇᒡᓕᖕᓂᖓ ᐃᓴᕆᐊᓕᒥᐅᓄᑦ ᐃᓱᖃᖏᑦᑑᖕᒪᑦ, ᐊᖓᔪᖅᑳᕐᔪᐊᓐᖑᕐᑎᒻᒪᑎᑦ ᑖᒃᑯᓄᖓ ᐊᐅᓚᑦᓯᑦᓯᐊᕈᓐᓇᕋᕕᑦ ᐱᖁᔭᓂᒃ ᐃᖅᑲᕐᑐᐃᑦᓯᐊᕐᓂᕐᓂᒡᓗ.” 10ᓰᐸᒥᐅᑦ ᑯᐃᓐᖓᑦ ᑐᓂᓯᕗᖅ ᐊᖓᔪᖅᑳᕐᔪᐊᒧᑦ 10,000ᐸᐅᓂᑦ ᐅᖁᒤᓐᓂᕐᓴᓂᒃ ᒎᓗᓂᒃ, ᓂᕿᓄᓪᓗ ᐃᓚᐅᕈᑎᒃᓴᓂᒃ ᐊᖏᔪᐊᓗᖕᓂᒃ, ᐅᔭᕋᖕᓂᒡᓗ ᐊᑭᑐᔪᓂᒃ; ᑍᒫᒃ ᐊᖏᑎᒋᔪᓂᒃ ᓂᕿᓄᑦ ᐃᓚᐅᕈᑎᒃᓴᓂᒃ ᑐᓂᓯᔪᖃᒃᑲᓐᓂᓚᐅᕐᓯᒪᓐᖏᓚᖅ ᓰᐸᒥᐅᑦ ᑯᐃᓐᖓᑕ ᑐᓂᓚᐅᕐᑕᖏᑎᑐᑦ ᐊᖓᔪᖅᑳᕐᔪᐊᕐᒧᑦ ᓲᓗᒨᓂᒧᑦ. 11ᕼᐅᕋᒻ ᐅᒥᐊᕐᔪᐊᖁᑎᖏᑦ, ᒎᓗᓂᒃ ᑎᑭᐅᑦᔨᖕᒪᑕ ᓄᓇᒥᑦ ᐅᐱᕆᒥᑦ, ᑎᑭᐅᑦᔨᓪᓗᑎᒡᓗ ᐊᖏᔪᐊᓗᖕᓂᒃ ᕿᔪᖕᓂᒃ ᓇᐹᕐᑐᕕᓂᕐᓂᒃ ᐋᓪᒪᒡᒥᒃ ᑍᔭᐅᔪᓂᒃ ᐅᔭᕋᖕᓂᒃ ᐊᑭᑐᔪᐊᓗᖕᓂᒃ. 12ᐊᖓᔪᖅᑳᕐᔪᐊᑉ ᕿᔪᐃᑦ ᐊᑐᕐᐰᑦ ᑐᒃᓯᐊᕐᕕᒡᔪᐊᑉ ᑎᒍᒥᐊᕐᕕᖏᓐᓄᑦ ᐊᖓᔪᖅᑳᕐᔪᐊᒃᑯᕕᖕᒥᓄᓪᓗ, ᐊᑐᕆᓪᓗᒋᑦ ᓔᕆᓄᑦ ᓄᖃᕐᑎᓕᖕᓄᑦ ᕼᐊᕐᐱᓄᓪᓗ ᑯᑭᑦᑕᐸᐅᑎᐅᔭᓄᑦ ᐃᓐᖏᕐᑏᑦ ᐊᑐᕐᐸᒃᑕᖏᓐᓄᑦ; ᑍᒤᑦᑐᑦ ᕿᔪᐃᑦ ᐋᓪᒪᒡᒥᒃ ᐊᑎᓖᑦ ᑎᑭᐅᑦᔭᐅᒃᑲᓐᓂᕐᓯᒪᓐᖏᓚᑦ ᑕᑯᔭᐅᒃᑲᓐᓂᕐᓯᒪᓇᑎᒡᓗ ᐅᓪᓗᒥᒧᑦ. 13ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᓰᐸᒥᐅᑦ ᑯᐃᓐᖓ ᑐᓂᕚ ᐱᔪᒪᔭᓕᒫᖏᓐᓂᒃ, ᐱᔪᒪᔭᖏᑕᓗ ᐊᓯᖏᓐᓂᒃ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᐊᔪᕐᓴᖏᓐᓂᖏᓐᓂᑦ ᐱᔪᓂᒃ. ᑕᒪᓐᓇ ᐱᔭᕇᕐᒪᑦ ᐊᐅᓪᓚᕐᐳᑦ ᐅᑎᕐᓗᓂ ᓇᖕᒥᓂᖅ ᓄᓇᒥᖕᓄᑦ, ᐱᔨᓕᒫᓂ ᐃᓚᒋᓪᓗᒋᑦ.
ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᐊᒃᓱᐃᑦᑑᓂᖓ
ᑯᕉᓂᑲ ᐂᑉᐸᖏᑦ 9:13-29
14ᐊᕐᕌᒍ ᑕᒫᑦ ᐊᖓᔪᖅᑳᕐᔪᐊᖅ ᓲᓗᒨᓂ ᑐᓂᔭᐅᕙᓚᐅᕐᐳᖅ 50,000ᐸᐅᓂᒃ ᒎᓗᓂᒃ, 15ᑕᒪᒃᑯᐊ ᐊᓯᖏᑎᒍᑦ ᐱᑎᑕᐅᕙᓚᐅᕆᕗᖅ ᑖᒃᓯᑎᒍᑦ ᐊᑭᓕᐅᑕᐅᔪᓂᒃ ᓂᐅᕕᐅᑎᑎᒍᑦ ᑕᐅᕐᓯᓃᓪᓗ ᕿᑐᕐᖏᐅᕐᓂᖏᑎᒍᑦ, ᐊᕅᐱᐊᒥᐅᓪᓗ ᐊᖓᔪᖅᑳᕐᔪᐊᖏᑕ ᑐᓂᔭᖏᑦ ᓄᓇᓕᖕᓄᓪᓗ ᓯᕗᓕᕐᑎᐅᔪᓂᑦ ᐃᓴᕆᐊᓕᑎᑦ ᓄᓇᖏᓐᓂᑦ.
16ᓲᓗᒨᓂ ᓴᓇᔭᐅᑎᑦᓯᒋᕗᖅ 200ᓂᒃ ᐊᒡᕖᕋᐅᑎᓂᒃ ᐊᖏᔪᓂᒃ, ᑖᒃᑯᐊᓕᒫᑦ ᖄᓕᕐᓯᒪᓪᓗᑎᒃ ᒎᓗᓂᒃ; ᐊᑐᓂᑦ 15ᐸᐅᑲᓴᖕᓂᒃ ᐅᖁᒤᓐᓂᖃᕐᑐᓂᒃ. 17ᒥᑭᓐᓂᕐᓴᓂᒡᓗ ᓴᓇᔭᐅᑎᑦᓯᒋᓪᓗᓂ ᐊᒡᕖᕋᐅᑎᓂᒃ 300ᓂ, ᑖᒃᑯᐊ ᐊᑐᓂᑦ ᖄᓕᕐᓯᒪᓪᓗᑎᒃ ᒎᓗᓂ 4ᐸᐅᑲᓴᖕᓂᒃ ᐅᖁᒤᓐᓂᓕᖕᓂᒃ. ᑖᒃᑯᐊ ᐊᒡᕖᕋᐅᑏᑦ ᐊᖓᔪᖅᑳᕐᔪᐊᑉ ᐃᓕᔭᐅᑎᑉᐰᑦ ᓕᐸᓇᓂᒥᒃ ᐊᑎᓕᖕᒧᑦ ᐃᒡᓗᒧᑦ ᓇᐹᕐᑐᓕᖕᒦᑦᑐᒧᑦ. 18ᐊᖓᔪᖅᑳᕐᔪᐊᖅ ᐊᖏᔪᒥᒃ ᐃᒃᓯᕙᐅᑕᕐᔪᐊᒥᒃ ᓴᓇᔭᐅᑎᑦᓯᕗᖅ ᐃᓚᖓ ᖄᓕᕐᓯᒪᓪᓗᓂ ᑑᒐᕐᓂᒃ ᐃᓚᖓᓗ ᖄᓕᕐᓯᒪᓪᓗᓂ ᒎᓗᒥᒃ ᐱᐅᓂᕐᐹᒥᒃ. 19ᑖᓐᓇ ᐃᒃᓯᕙᐅᑕᕐᔪᐊᖅ ᑐᖕᒥᕌᖃᕐᐳᖅ ᐱᖓᓲᔪᕐᑐᓂᒃ ᖁᒻᒧᑦ, ᐃᒃᓯᕙᐅᑕᕐᔪᐊᑦ ᑐᓄᐊᓂ ᓴᓇᓯᒪᔪᖃᕆᓪᓗᓂ ᐃᒻᒧᒃᓯᐅᒐᐅᑉ ᓄᕐᕋᖓᑕ ᓂᐊᖁᓐᖑᐊᖓᓂᒃ, ᐊᕙᑖᓂᓗ ᐃᑯᓯᖕᒥᒑᖏᑦ ᓛᔭᓐᖑᐊᖃᕐᓗᑎᒃ ᓂᑯᕕᖓᓐᖑᐊᕐᑑᖕᓂᒃ. 20ᓛᔭᓐᖑᐊᕐᑕᖃᕐᐳᖅ 12ᓂᒃ ᓇᖏᕐᑐᓂᒃ ᑐᖕᒥᕌᖏᑕ ᐃᓱᖏᓐᓃᑦᑐᓂᒃ ᐱᖓᓲᔪᕐᑐᓂᒃ. ᑍᒤᑦᑐᒥᒃ ᐃᒃᓯᕙᐅᑕᕐᔪᐊᒥᒃ ᓴᓇᔪᖃᓚᐅᕐᓯᒪᓐᖏᓚᖅ ᐊᖓᔪᖅᑳᕐᔪᐊᒃᑯᕕᖕᒥ ᓇᓂᑐᐃᓐᓇᖅ. 21ᓲᓗᒨᓂᐅᑉ ᐃᒥᕈᑎᓕᒫᖏᑦ ᒎᓘᓚᐅᕐᐳᑦ, ᓂᕆᑦᔪᑎᓕᒫᓪᓗ ᓂᕆᕕᒡᔪᐊᕐᕕᐅᑉ ᓕᐸᓇᓂᐅᑉ ᓇᐹᕐᑐᖏᓐᓂᒃ ᐊᑎᓕᖕᒥ ᒎᓘᓚᐅᕆᕗᑦ ᐱᐅᓂᕐᐹᑦ; ᑕᕝᕙᓂ ᐊᑐᕐᑕᐅᔪᖃᓐᖏᓚᖅ ᓯᐅᓪᕕᕆᒥᒃ, ᑍᒤᑦᑐᑦ ᓲᓗᒨᓂ ᐃᓅᑎᓪᓗᒍ ᐊᑭᑐᓇᓱᒋᔭᐅᓚᐅᖏᒻᒪᑕ. 22ᐅᒥᐊᕐᔪᐊᖁᑎᖃᕐᓗᓂᓗ ᐅᓄᕐᑐᓂᒃ ᐃᒪᕐᕕᖕᒥ ᐃᓚᖃᕐᓗᑎᒃ ᕼᐅᕋᒻ ᐅᒥᐊᕐᔪᐊᖁᑎᖏᓐᓂᒃ. ᐊᕐᕌᒍᑦ ᐱᖓᓱ ᑕᒫᑦ ᐅᒥᐊᕐᔪᐊᖁᑎᖏᑦ ᑖᕐᓯᓯᒥᐅᑦ ᐅᑎᕐᐸᓚᐅᕐᐳᑦ ᓇᒃᓴᕐᓗᑎᒃ ᒎᓗᓂᒃ, ᓯᐅᓪᕕᕆᓂᒃ, ᑑᒑᓂᒡᓗ, ᐂᑉᓂᒡᓗ ᒪᖕᑭᓂᒃ, ᒪᖕᑭᑐᐃᓐᓇᕐᓂᒡᓗ. 23ᐊᖓᔪᖅᑳᕐᔪᐊᖅ ᓲᓗᒨᓂ ᐊᒃᓗᐃᓐᓂᕐᐹᖑᓚᐅᕐᐳᖅ ᓯᓚᑐᓂᕐᐹᖑᓪᓗᓂᓗ ᐊᖓᔪᖅᑳᕐᔪᐊᓕᒫᓂᑦ. 24ᓯᓚᕐᔪᐊᕐᒥᐅᓕᒫᓂᑦ ᑕᑯᔭᕐᑐᕈᒪᔭᐅᓚᐅᕐᐳᑦ ᓲᓗᒨᓂᐅᑉ ᓯᓚᑐᓂᖓᓂᒃ ᑐᓴᕈᒪᓪᓗᑎᒃ, ᒎᑎᐅᑉ ᑐᓂᔭᖏᓐᓂᒃ ᑖᑦᓱᒪ ᐃᓱᒪᖓᓄᑦ. 25ᑎᑭᑎᒋᔭᓕᒫᖏᑦ ᓇᒃᓴᕐᐸᓚᐅᕐᐳᑦ ᑐᓂᕐᕈᑎᒥᖕᓂᒃ ᑖᑦᓱᒧᖓ ᓯᐅᓪᕕᕆᓂᒃ ᒎᓗᓂᒃ ᐊᓐᓄᕌᓂᒃ, ᐅᓇᑕᐅᑎᓂᒃ, ᑎᐱᑎᕈᑎᓂᒡᓗ ᕿᒻᒥᕐᔪᐊᓂᒃ ᓯᐅᑎᖅᑯᕐᑐᔪᓂᒡᓗ, ᑕᒪᓐᓇᓗ ᑍᒤᖏᓐᓇᖃᑦᑕᓚᐅᕐᐳᖅ ᐊᕐᕌᒍᑕᒫᑦ. 26#ᐊᑕᓃᑦ ᓯᕗᓪᓖᑦ 4:26.ᓲᓗᒨᓂ ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓂᒃ 1,400ᓂ ᑲᑎᑦᓯᓚᐅᕐᐳᖅ, 12,000ᓂᒡᓗ ᕿᒻᒥᕐᔪᐊᕐᑎᓂᒃ; ᐃᓚᖏᑦ ᔨᕉᓴᓕᒦᑎᓪᓗᓂᒋᑦ, ᐃᓚᖏᓪᓗ ᐃᒡᓗᒐᓴᖕᓂ ᓇᓂᑐᐃᓐᓈᕐᑐᓂ ᐃᓂᖃᕐᑎᓪᓗᓂᒋᑦ. 27#ᒨᓯᓯ ᑕᓪᓕᒪᖏᑦ 17:17.ᐊᖓᔪᖅᑳᕐᔪᐊᖑᑎᓪᓗᒍ ᓯᐅᓪᕕᕆᑦ ᐅᔭᕋᑐᐃᓐᓇᑎᑐᑦ ᐱᓚᐅᕐᐰᑦ ᔨᕉᓴᓕᒥ, ᕿᔪᐃᓪᓗ ᓰᑕᕇᑦ ᓯᑕᒃᑍᑦ ᓇᐹᕐᑐᑐᐃᓐᓇᕐᑎᑐᑦ ᓯᑲᒧᐊᑎᑐᑦ ᑍᒤᑦᑑᓪᓗᑎᒃ ᔫᑕᐅᑉ ᓇᑎᕐᓇᖓᓃᑦᑐᑎᑐᑦ. 28#ᒨᓯᓯ ᑕᓪᓕᒪᖏᑦ 17:16.ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᐊᐅᓚᑦᔪᑎᖏᑦ ᕿᒻᒥᕐᔪᐊᑦ ᐱᓯᒪᓚᐅᕐᐳᑦ ᐄᑦᔨᑉᑎᒥᑦ ᓯᓕᓯᐊᒧᑦ ᑎᑭᓪᓗᒍ. 29ᐊᐅᓚᑦᔪᑎᒋᖃᑦᑕᕐᑕᖏᓪᓗ ᕿᒧᒃᓯᐅᑏᑦ ᐊᒃᓴᓗᐊᓖᑦ ᐄᑦᔨᑉᑎᒥᑦ ᐱᓯᒪᓚᐅᕐᐳᑦ ᓂᐅᕕᕐᑕᐅᓯᒪᓪᓗᑎᒃ ᐊᑭᖃᕐᑎᓪᓗᒋᑦ 600ᓂᒃ ᓯᐅᓪᕕᕆᓂᒃ ᕿᒻᒥᕐᔪᐊᓪᓗ 150ᓂᒃ; ᐊᖓᔪᖅᑳᕐᔪᐊᓄᓪᓗ ᓂᐅᕐᕈᑎᖃᕐᐸᓚᐅᕐᐳᖅ ᕼᐃᑍᑎᓄᑦ ᓯᕆᐊᓪᓗ ᐊᖓᔪᖅᑳᕐᔪᐊᖏᓐᓄᑦ ᕿᒻᒥᕐᔪᐊᓂᒃ ᕿᒧᒃᓯᐅᑎᓂᒡᓗ ᐊᒃᓴᓗᐊᓕᖕᓂᒃ.
Currently Selected:
ᐊᑕᓃᑦ ᓯᕗᓪᓖᑦ 10: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
