ᐊᑕᓃᑦ ᓯᕗᓪᓖᑦ 3
3
ᓲᓗᒨᓂ ᑐᒃᓯᐊᕐᐳᖅ ᓯᓚᑐᓂᕐᑖᕈᒪᓪᓗᓂ
ᑯᕉᓂᑲ ᐂᑉᐸᖏᑦ 1:3-12
1ᓲᓗᒨᓂ ᐂᑉᐸᕐᑖᕐᓂᒃᑯᑦ ᐃᑲᔪᕐᑎᑖᕐᐳᖅ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓂᒃ ᐰᕉᒥᒃ; ᐸᓂᖓᓂᒃ ᓄᓕᐊᕐᑖᕐᓗᓂ, ᐊᖏᕐᕋᐅᑎᓪᓗᓂᐅᒡᓗ ᑍᕕᑎᐅᑉ ᐃᒡᓗᒐᓴᖏᓐᓄᑦ, ᐱᔭᕇᓚᐅᖏᓐᓂᕐᒥᓂ ᓇᖕᒥᓂᖅ ᐃᒡᓗᒃᓴᒥᓂᒃ, ᐊᑕᓂᐅᓪᓗ ᐃᒡᓗᖓᓂᒃ, ᔨᕉᓴᓕᐅᓪᓗ ᐊᕙᓗᕐᔪᐊᖓᓂᒃ. 2ᐃᓄᐃᑦ ᓱᓕ ᑐᓂᕐᕈᓯᖃᑦᑕᓚᐅᕐᒪᑕ ᖃᖅᑲᓂ ᐳᕐᑐᔪᓂ, ᓱᓕ ᐅᓪᓗᓂ ᑖᒃᑯᓇᓂ ᐊᑕᓂᐅᑉ ᐃᒡᓗᖓ ᓴᓇᔭᐅᓯᒪᓚᐅᖏᒻᒪᑦ. 3ᓲᓗᒨᓂ ᐊᑕᓂᕐᒥᒃ ᐱᓐᓈᕈᓱᒻᒪᕆᒃᑲᒥ, ᒪᓕᑦᓯᐊᕐᓗᓂᓗ ᐊᑖᑕᒥ ᑍᕕᑎᐅᑉ ᒪᓕᒃᑕᐅᖁᔭᖏᓐᓂᒃ, ᐃᒻᒥᓂᒡᓕ ᐆᒪᔪᓂᒃ ᑐᓂᕐᕈᑎᒃᓴᓂᒃ ᑐᓂᕐᕈᓯᕐᐸᓚᐅᕆᕗᖅ ᑐᓂᕐᕈᓯᕐᕕᖕᓄᑦ ᖃᖅᑲᒦᑦᑐᓄᑦ.
4ᑕᕝᕙ ᐊᖓᔪᖅᑳᕐᔪᐊᖅ ᒋᐱᐅᓂᒧᐊᕐᐳᖅ ᑐᓂᕐᕈᓯᕆᐊᕐᑐᕐᓱᓂ ᑖᓐᓇ ᑐᓂᕐᕈᓯᕐᕕᒃ ᐅᓄᕐᑐᓄᑦ ᖃᐅᔨᒪᔭᐅᖕᒪᑦ, ᓲᓗᒨᓂ ᐅᓄᕐᑐᕐᔪᐊᓂᒃ 1000 ᐅᖓᑖᓂᑦᑐᓂᒃ ᑕᕝᕙᓂ ᑐᓂᕐᕈᑎᓂᒃ ᑐᓂᕐᕈᓯᖃᑦᑕᕐᓯᒪᒐᒥ ᑕᒪᑐᒪ ᓯᕗᓂᖓᒍᑦ. 5ᑕᕝᕙᓂ ᒋᐱᐅᓂᒥ ᐊᑕᓂᖅ ᓴᖅᑭᑉᐳᖅ ᓲᓗᒨᓂᒧᑦ ᓯᓐᓇᒃᑑᒪᒃᑯᑦ ᐅᓐᓄᐊᒥ ᐅᖃᕐᓗᓂᓗ, “ᑐᒃᓯᐊᓚᐅᕆᑦ ᓱᓇᒥᒃ ᑐᓂᓯᕕᐅᔪᒪᖕᒪᖔᕐᐱᑦ ᐅᕙᓐᓄᑦ.”
6ᓲᓗᒨᓂ ᑭᐅᕗᖅ “ᓇᒡᓕᒍᓱᖕᓂᕐᓂᒃ ᐊᖏᔪᒥᒃ ᓱᖁᓯᔪᐃᑦᑐᒥᒃ ᐱᔨᖕᓄᑦ ᐊᑖᑕᓐᓄᑦ ᑍᕕᑎᒧᑦ ᓴᖅᑭᑎᑦᓯᓯᒪᕗᑎᑦ, ᑖᓐᓇ ᐃᓅᓯᖃᓚᐅᕐᒪᑦ ᐃᓕᖕᓂᒃ ᒪᓕᑦᓯᐊᕐᓱᓂ, ᐃᓱᐊᕐᑐᓕᓂᕐᒥ, ᑲᔪᓯᑦᓯᐊᕐᓗᓂᓗ ᐆᒻᒪᑎᒥᒍᑦ ᐃᓕᖕᓄᑦ; ᓇᓗᓁᕐᓯᕕᒋᓯᒪᒐᕕᐅᒡᓗ ᐊᖏᔪᐊᓗᖕᒥᒃ ᓇᒡᓕᖕᓂᕐᓂᒃ ᓱᕐᕋᔪᐃᑦᑐᒥᒃ, ᐃᕐᓂᕐᑖᕐᑎᓪᓗᒍ ᐊᖓᔪᖅᑳᕐᔪᐊᖑᕕᖓᓂ ᐃᒃᓯᕙᓂᐊᕐᑐᒥᒃ ᐅᓪᓗᒥ ᐊᑐᓕᕐᑐᒥᒃ. 7ᒫᓐᓇᓕ, ᐊᑕᓃᖅ ᒎᑎᒐ, ᐱᔪᓐᓇᕐᑎᓯᒪᒐᕕᖓ ᐊᖓᔪᖅᑳᕐᔪᐊᖑᖁᓪᓗᖓ ᐊᑖᑕᒪ ᑍᕕᑎᐅᑉ ᐃᓂᖓᓂ, ᐃᓅᓱᒃᑑᓗᐊᕋᓗᐊᕐᑎᓪᓗᖓ; ᖃᐅᔨᒪᓇᖓᓗ ᐊᐅᓚᑦᓯᔭᕆᐊᒃᓴᖅ ᖃᓄᖅ ᐊᓂᒋᐊᒥᒃ ᖃᓄᕐᓗ ᐃᑎᕆᐊᒥᒃ. 8ᐱᔩᓪᓗ ᐃᓄᖁᑎᕕᑦ ᐊᑯᕐᖓᓐᓃᑉᐳᖅ ᓂᕈᐊᕆᓚᐅᕐᑕᕕᑦ, ᐃᓄᒋᐊᒃᑐᕐᔪᐊᑦ, ᐊᒡᓛᑦ ᐅᓄᓗᐊᕐᓂᖏᓐᓄᑦ ᓈᓴᕐᑕᐅᔪᓐᓇᖏᑦᑐᑦ. 9ᑍᒤᒻᒪᑦ ᐱᔩᑦ ᑐᓂᓯᕕᒋᓚᐅᕈᒃ ᐃᓱᒪᒃᑯᑦ ᑐᑭᓯᔪᓐᓇᕐᓂᕐᒥᒃ ᐊᐅᓚᑦᓯᔪᓐᓇᖁᓪᓗᖓ ᐃᓄᖁᑎᖕᓂᒃ, ᖃᐅᔨᒪᔪᓐᓇᖁᓪᓗᖓ ᐱᐅᔪᒥᒃ ᐱᐅᖏᑦᑐᒥᒡᓗ; ᑭᓇᓖ ᐊᐅᓚᑦᓯᔪᓐᓇᕐᐸ ᐃᓄᖁᑎᖕᓂᒃ ᑍᒫᒃ ᐅᓄᕐᑐᕐᔪᐊᖑᔪᓂᒃ?”
10ᐊᑕᓂᖅ ᖁᕕᐊᓱᓚᐅᕐᐳᖅ ᓲᓗᒨᓂ ᑕᒪᑐᒥᖓ ᕿᓄᐊᕆᔭᑲᕐᒪᑦ, 11ᒎᑎᐅᓪᓗ ᐅᖃᐅᑎᕚ, “ᕿᓄᒐᕕᑦ ᓯᓚᑐᓂᕐᒥᒃ ᐱᔪᒪᓪᓗᑎᑦ ᓈᒻᒪᓈᕐᑐᒥᒃ ᐊᐅᓚᑦᓯᔪᒪᓪᓗᑎᑦ, ᓇᖕᒥᓂᖅ ᐃᓅᑯᑖᒍᒪᓂᑐᐃᓐᓇᕐᒥᐅᖏᑦᑐᖅ, ᐅᕝᕙᓗ ᐊᒃᓱᐃᓕᔪᒪᑐᐃᓐᓇᕐᓂᐅᖏᑦᑐᒥᒃ, ᐊᑭᕋᕕᓪᓘᓐᓃᑦ ᑐᖁᑕᐅᓂᒃᓴᖏᓐᓂᒃ ᐱᔪᒪᖏᓐᓇᕕᑦ, ᕿᓄᒐᕕᓪᓕ ᐱᔪᒪᓪᓗᑎᑦ ᑐᑭᓯᐅᒪᔪᒪᓪᓗᑎᑦ ᓱᓇ ᓈᒻᒪᖕᒪᖔᑦ. 12ᑕᑯᒋᑦ, ᐱᔪᒪᔭᕐᓂᒃ ᑐᓂᓂᐊᕐᐸᒋᑦ ᐅᖃᐅᓰᑦ ᒪᓕᒡᓗᒍ, ᑕᑯᒋᑦ, ᓯᓚᑐᓂᕐᒥᒃ ᖃᐅᔨᒪᔪᓐᓇᕐᓂᕐᒥᒡᓗ ᐃᓱᒪᒥᒃ ᑐᓂᓯᕕᒋᕙᒋᑦ, ᐃᓕᒃᑐᑦ ᑍᒤᑦᑐᒥᒃ ᓯᕗᓂᕐᓂ ᑍᒤᑦᑐᖃᓚᐅᕐᓯᒪᓐᖏᓚᖅ ᑭᖑᓂᕐᓂᓗ ᑍᒤᑦᑐᖃᓚᐅᕐᓯᒪᓂᐊᕋᓂ. 13ᑐᓂᓂᐊᕐᐸᒋᑦ ᕿᓄᐊᕆᓚᐅᓐᖏᑕᕐᓂᒃ, ᐃᓅᓯᓕᒫᕐᓂ ᐊᒃᓱᐃᑦᑑᓂᕐᒥᒃ, ᐅᐱᒋᔭᐅᓂᕐᒥᒡᓗ, ᐃᓕᒃᑐᑦ ᐊᖓᔪᖅᑳᕐᔪᐊᖑᔪᒥᒃ ᐊᑦᔨᖃᕐᓂᐊᓐᖏᓚᑎᑦ ᐃᓅᓂᓕᒪᕐᓂ. 14ᓈᓔᓐᓇᕈᕕᖓ ᐊᑐᕐᑕᐅᖁᔭᒃᑲᓗ ᐱᖁᔭᒃᑲᓗ ᒪᓕᒃᑯᕕᒋᑦ, ᐊᑖᑕᒃᑐᑦ ᑍᕕᑎᑐᑦ, ᑕᕝᕙ ᐅᓪᓗᑎᑦ ᐅᓄᕐᓯᒋᐊᕐᑎᓐᓂᐊᕐᐸᒃᑲ.”
15ᓲᓗᒨᓂ ᑐᐸᒃᑲᒥ, ᑕᑯᒋᓪᓗ, ᖃᐅᔨᓕᕐᐳᖅ, ᑕᒪᓐᓇ ᓯᓐᓇᒃᑑᒪᓂᐅᖕᒪᑦ. ᑕᕝᕙ ᔨᕉᓴᓕᒧᐊᕐᐳᖅ, ᐊᑕᓂᐅᑉ ᐃᒃᓯᕕᖓᑕ ᐊᖏᖃᑎᒌᒍᑎᓂᒃ ᐃᓗᓕᖃᕐᑑᑉ ᓵᖓᓂ ᓇᖏᕐᐳᖅ, ᑐᓂᕐᕈᓯᕐᓗᓂᓗ ᐆᑕᒃᓴᓂᒃ ᑐᓂᕐᕈᑎᓂᒃ ᐃᓚᖃᑦᓯᐊᕐᓂᕐᒧᓪᓗ ᑐᓂᕐᕈᑎᓂᒃ, ᑕᒪᑐᒪ ᑭᖑᓂᖓᒍᑦ ᓂᕆᕕᒡᔪᐊᕐᑎᑦᓯᕗᖅ ᐱᔨᓕᒫᒥᓂᒃ.
ᓲᓗᒨᓂᐅᑉ ᐃᖅᑲᕐᑐᐃᓂᖓ ᐱᔭᕐᓂᖏᑦᑐᒥᒃ
16ᐊᕐᓈᒃ ᒪᕐᕉᒃ ᐊᖑᓐᓂᐊᕐᓂᕐᒧᑦ ᑮᓇᐅᔭᓕᐅᕐᑏᒃ ᐊᖓᔪᖅᑳᕐᔪᐊᒧᐊᕐᐴᒃ, ᓵᖓᓂᓗ ᓇᖏᕐᓗᑎᒃ. 17ᐂᑉᐸᖓ ᐅᖃᓕᕐᐳᑦ, “ᐊᑕᓂᕋ ᐅᓇᓗ ᐊᕐᓇᖅ ᐊᖏᕐᕋᖃᕋᓐᓄᒃ ᐊᑕᐅᓯᕐᒥ; ᕿᑐᕐᖓᕐᑖᓚᐅᕋᒪ ᒪᕐᕈᐃᓐᓇᐅᓪᓗᓄᒡᓗ ᑕᕝᕙᓂ ᐃᒡᓗᒥ. 18ᐅᓪᓗᐃᑦ ᐱᖓᔪᖓᓐᓂ ᕿᑐᕐᖓᕐᑖᓚᐅᕐᑎᓪᓗᖓ, ᑖᓐᓇ ᐊᕐᓇᖅ ᕿᑐᕐᖓᕐᑖᓚᐅᕆᕗᖅ; ᐃᓄᑑᓪᓗᓄᒡᓗ ᑕᕝᕙᓂ; ᐊᓯᑦᑎᓐᓂᒃ ᑕᕝᕙᓃᑦᑐᖃᕋᓂ ᐃᒡᓗᒥ, ᒪᕐᕈᐃᓐᓇᐅᓪᓗᓄᒃ ᑕᕝᕙᓂ. 19ᐅᓐᓄᐊᒃᑯᑦ ᑖᑦᓱᒪ ᐃᕐᓂᖓ ᑐᖁᓚᐅᕐᐳᖅ, ᐃᐱᑎᓚᐅᕐᒪᒍ ᖃᓪᓕᕐᓗᓂᐅᒃ. 20ᐅᓐᓄᐊᖑᑎᓪᓗᒍ ᒪᑭᓐᓇᒥ, ᐃᕐᓂᕋ ᓴᓂᓐᓃᑦᑐᖅ ᐱᓪᓗᓂᐅᒃ, ᓯᓂᒃᑎᓪᓗᖓ ᐃᒡᓕᕐᒥᓅᕈᑎᓚᐅᕐᐹ; ᑖᓐᓇ ᑐᖁᖓᓕᕐᑐᖅ ᐅᕙᓐᓅᕐᑎᖔᕐᓗᓂᐅᒃ. 21ᑐᐸᒃᑲᒪ ᐅᓪᓛᒃᑯᑦ ᕿᑐᕐᖓᕋ ᐊᒫᒪᒃᑎᑦᓱᒪᓪᓗᒍ, ᖃᐅᔨᓕᕐᐸᕋ, ᑐᖁᖓᔪᖅ; ᑕᑯᑦᓯᐊᕋᓱᓕᕋᒃᑯ ᐅᓪᓛᒃᑯᑦ, ᑕᑯᒋᑦ, ᖃᐅᔨᓕᓚᐅᕐᐸᕋ ᕿᑐᕐᖓᕆᓐᖏᑕᕋ.”
22ᐊᕐᓇᐅᑉ ᐂᑉᐸᖓ ᐅᖃᓕᕐᐳᖅ, “ᓄᑕᕋᖅ ᐆᒪᔪᖅ ᐱᒋᕙᕋ, ᓄᑕᕋᖅ ᑐᖁᖓᔪᖅ ᐱᒋᕙᑦ!”
ᐊᕐᓇᖅ ᓯᕗᓪᓕᐅᖅᑲᐅᔪᖅ ᐅᖃᕐᐳᖅ, “ᓱᓕᓐᖏᓚᑎᑦ ᑖᓐᓇ ᑐᖁᖓᔪᖅ ᐱᒋᒐᕕᐅᒃ, ᓄᑕᕋᖅ ᐆᒪᔪᖅ ᐱᒋᕙᕋ!”
ᑍᒫᒃ ᐊᕐᓈᒃ ᐃᒻᒥᖕᓄᑦ ᓂᓪᓕᐊᕗᒃ ᐊᖓᔪᖅᑳᕐᔪᐊᑉ ᓵᖓᓂ.
23ᑕᕝᕙ ᐊᖓᔪᖅᑳᕐᔪᐊᖅ ᐅᖃᓕᕐᐳᖅ, “ᐂᑉᐸᖓ ᐅᖃᕐᒪᑦ, ‘ᑖᓐᓇ ᐃᓅᔪᖅ ᐃᕐᓂᕆᕙᕋ, ᐃᕐᓃᓪᓗ ᑐᖁᖓᕗᖅ’; ᐂᑉᐸᖓᓗ ᐅᖃᕆᓪᓗᓂ, ‘ᓱᓕᓐᖏᓚᑎᑦ; ᐃᕐᓃᑦ ᑐᖁᕗᖅ, ᐃᕐᓂᕋ ᑕᕝᕙ ᐆᒪᔪᖅ.’” 24ᑕᕝᕙ ᐊᖓᔪᖅᑳᕐᔪᐊᖅ ᐅᖃᓕᕐᐳᖅ, “ᓴᕕᒡᔪᐊᒥᒃ ᕾᑦᑎᔪᖃᓚᐅᕐᓕ.” ᑕᕝᕙ ᓴᒡᕕᔪᐊᖅ ᐊᖓᔪᖅᑳᕐᔪᐊᕐᒧᐊᕐᑕᐅᖕᒪᑦ, 25ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᑖᓐᓇ ᐆᒪᔪᖅ ᓄᑕᕋᖅ ᖁᐱᔭᐅᓕᕐᓕ ᑐᓂᓗᒍᓗ ᑖᒃᑯᖕᓄᖓ ᐊᕐᓈᖕᓄᑦ ᐊᑐᓂᑦ ᖁᑉᐸᕇᖕᓂᒃ ᐱᑎᑕᐅᓗᑎᒃ.”
26ᑕᕝᕙ ᐊᕐᓇᖅ ᐆᒪᔪᒥᒃ ᐃᕐᓂᖃᕐᑐᖅ ᐅᖃᓕᕐᐳᖅ ᐊᖓᔪᖅᑳᕐᔪᐊᕐᒧᑦ, ᓇᒡᓕᒍᓱᓕᕋᒥ ᐃᕐᓂᕐᒥᓂᒃ, “ᐊᑕᓂᕋ, ᓄᑕᕋᖅ ᑐᖁᑕᐅᖏᓪᓗᓂ ᑕᕝᕗᖓ ᐊᕐᓇᒧᑦ ᑐᓂᔭᐅᓕᕐᓕ.”
ᐂᑉᐸᖓᓕ ᐅᖃᕐᐳᖅ, “ᐅᕙᑦᑎᓐᓄᑦ ᐱᒋᔭᐅᔪᓐᓁᕐᓗᓂ, ᐊᑏ ᖁᐱᔭᐅᑐᐃᓐᓇᓕᕐᓕ.”
27ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᓄᑕᕋᖅ ᑐᖁᑕᐅᖏᓪᓗᓂ ᑕᕝᕗᖓ ᐊᕐᓇᒧᑦ ᓯᕗᓪᓕᕐᒧᑦ ᑐᓂᔭᐅᓕᕐᓕ, ᑖᓐᓇ ᑖᑦᓱᒪ ᐊᓈᓇᓪᓚᕆᒋᖕᒪᒍ.”
28ᐃᓴᕆᐊᓕᐅᑉ ᐃᓄᓕᒫᖏᑦ ᑕᒪᑐᒥᖓ ᑐᓴᕋᒥᒃ ᐊᖓᔪᖅᑳᕐᔪᐊᑉ ᑐᑭᑖᕈᑎᖓᓂᒃ, ᐊᖏᔪᐊᓗᖕᒥᑉ ᑲᒪᓕᕐᐳᑦ ᐊᖓᔪᖅᑳᕐᔪᐊᒥᒃ, ᖃᐅᔨᒐᒥᒃ ᒎᑎᐅᑉ ᓯᓚᑐᓂᖓ ᑖᑦᓱᒪᓃᒻᒪᑦ, ᓱᓕᔪᒥᒃ ᐱᓇᓱᐊᖁᓪᓗᒍ.
Currently Selected:
ᐊᑕᓃᑦ ᓯᕗᓪᓖᑦ 3: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
