ᐊᑕᓃᑦ ᓯᕗᓪᓖᑦ 21
21
ᓁᐸᑉ ᕔᓂᓕᐅᕐᕕᖓ
1ᑕᒪᑐᒪ ᑭᖑᕐᖓᒍᑦ ᓁᐹᑦ ᔨᔭᕆᐅᓪᒥᐅᑕᖅ ᕔᓂᓕᐅᕐᕕᖕᒥᒃ ᓇᖕᒥᓂᖃᓚᐅᕐᐳᖅ ᔨᓴᕆᐊᓕᒥ, ᓴᒥᐊᕆᐊᒥᐅᑦ ᐊᖓᔪᖅᑳᕐᔪᐊᖓᑕ ᐂᕼᐊᐱᐅᑉ ᐊᖓᔪᖅᑳᒃᑯᕕᖓᑕ ᐃᒡᓗᖓᑕ ᓴᓂᐊᓂ. 2ᐂᕼᐊᑉᓗ ᐅᖃᕆᐊᕐᑐᕐᐳᖅ ᓁᐹᑦᒧᑦ, ᐅᖃᕐᓗᓂ, “ᕔᓂᓕᐅᕐᕖᑦ ᐅᕙᓐᓄᑦ ᑐᓂᓚᐅᕈᒃ, ᐱᕈᕐᓰᕕᑖᕆᓂᐊᕋᒃᑯ ᐱᕈᕐᑐᓄᖅ ᓂᕆᔭᒃᓴᓄᑦ, ᐃᒡᓗᑦᑎᓐᓄᑦ ᖃᓂᑦᑑᖕᒪᑦ; ᑐᓂᒐᔭᕐᐸᒋᑦ ᕔᓂᓕᐅᕐᕕᖕᒥᒃ ᐱᐅᓂᕐᓴᒥᒃ ᑖᑦᓱᒪᓐᖓᑦ; ᐅᕝᕙᓗ ᐃᓕᖕᓄᑦ ᐱᐅᓂᕐᓴᐅᒃᐸᑦ ᑮᓇᐅᔭᓂᒃ ᓈᒻᒪᒋᔭᕐᓂᒃ ᐊᑭᓕᕋᔭᕐᐸᒋᑦ.”
3ᓁᐹᑦᓕ ᑭᐅᕗᖅ ᐂᕼᐊᑉᒧᑦ, “ᐊᑕᓂᖅ ᐅᕙᓐᓂᒃ ᓱᒋᐊᕐᓯᒐᔭᕐᐳᖅ ᑐᓂᒐᔭᕈᒃᑭᑦ ᓯᕗᓕᕕᓂᓐᓂᑦ ᐱᑖᕆᓯᒪᔭᓐᓂᒃ.”
4ᐂᕼᐊᑉᓗ ᐃᓱᒪᔮᕐᓗᓂ ᕿᒃᓵᒡᓗᓂᓗ ᐊᖏᕐᕋᕐᐳᖅ ᓁᐹᑦ ᔨᔭᕆᐅᓪᒥᐅᑕᐅᑉ ᐅᖃᐅᓯᖏᑦ ᐱᓪᓗᒋᑦ, ᐅᖃᓚᐅᕐᒪᑦ, “ᑐᓂᓂᐊᓐᖏᓚᒋᑦ ᓯᕗᓕᕕᓂᓐᓂᑦ ᐱᑖᕆᓚᐅᕐᑕᓐᓂᒃ.” ᐃᒡᓕᕐᒥᓄᑦ ᓇᓪᓚᕋᒥ ᑐᓄᑉᐳᖅ, ᓂᕆᔪᒪᔪᓐᓃᕐᓗᓂᓗ. 5ᓄᓕᐊᖓᑕᓕ ᔨᔨᐱᐅᓪ ᐅᐸᒃᐹ ᐅᖃᐅᑎᓪᓗᒍᓗ, “ᖃᓄᐃᒻᒪᑦ ᐊᓂᕐᓃᑦ ᕿᒃᓵᒃᐸ ᓂᕆᔪᒪᔪᓐᓃᕐᓗᑎᓪᓗ?”
6ᑖᑦᓱᒪ ᑭᐅᕚ, “ᓁᐹᑦ ᔨᔭᕆᐅᓪᒥᐅᑕᖅ ᐅᖃᖃᑎᒋᓚᐅᕋᒃᑯ, ᐅᖃᐅᑎᓪᓗᒍ, ‘ᕔᓂᓕᐅᕐᕖᑦ ᓂᐅᕕᐊᕆᔪᒪᕙᕋ ᐊᑭᓕᕐᓗᑎᑦ, ᐅᕝᕙᓘᓐᓃᑦ ᓈᒻᒪᒋᒍᕕᐅᒃ ᐊᓯᐊᓂᒃ ᕔᓂᓕᐅᕐᕕᖕᒥᒃ ᑐᓂᔪᒪᕙᒋᑦ.’ ᑭᐅᓚᐅᕐᐹᖓ, ‘ᕔᓂᓕᐅᕐᕕᒐ ᐃᓕᖕᓄᑦ ᑐᓂᓂᐊᓐᖏᓚᕋ.’”
7ᓄᓕᐊᖓᑕ ᔨᔨᐱᐊᓕᐅᑉ ᐅᖃᐅᑎᕚ, “ᐃᓴᕆᐊᓕᒥᐅᓄᑦ ᐊᖓᔪᖅᑳᕐᔪᐊᖑᓐᖏᓚᑏᑦ? ᒪᑭᓕᕆᑦ, ᓂᕆᓗᑎᓪᓗ, ᐆᒻᒪᑏᓪᓗ ᖁᕕᐊᓱᓕᕐᓕ; ᓁᐹᑦ ᔨᔭᕆᐅᓪᒥᐅᑕᐅᑉ ᕔᓂᓕᐅᕐᕕᖓ ᑐᓂᓂᐊᕐᐸᕋ ᐃᓕᖕᓄᑦ.”
8ᑕᕝᕙ ᑎᑎᕋᓕᕐᐳᖅ, ᐂᕼᐊᑉ ᐊᑎᖓ ᐊᑐᕐᓗᒍ, ᓇᕿᑦᔪᓯᕐᐹᓗ ᓇᕿᑦᔪᑎᖓᓄᑦ, ᐊᐅᓪᓚᕐᑎᓪᓗᒍᓗ ᐊᖓᔪᖅᑳᓄᑦ ᐱᒻᒪᕆᐅᔪᓄᓪᓗ ᓄᓇᖃᕐᑐᓄᑦ ᓁᐹᑦ ᐃᒡᓗᒐᓴᖏᓐᓂ. 9ᐃᒫᒃ ᑎᑎᕋᕐᐳᖅ, ᐅᖃᕐᓗᓂ, “ᓂᕆᑦᑍᓕᖁᔨᒋᑦᓯ, ᓁᐹᑦᓗ ᐃᖏᑎᓪᓗᒍ ᐅᐱᒋᔭᐅᓇᕐᓂᕐᐹᒥ ᐃᓄᐃᑦ ᓵᖓᓂ; 10ᐊᖑᑏᖕᓂᒃ ᒪᕐᕉᖕᓂᒃ ᐊᕙᑖᓄᑦ ᐃᖏᑎᑦᓯᓗᓯ, ᐊᑭᕋᕐᑐᕐᓂᐊᕐᑑᖕᓂᒃ ᑖᑦᓱᒥᖓ ᓱᓕᖏᑦᑐᒥᒃ, ᐅᖃᕐᓂᕐᓘᑎᖃᕐᑐᒃᓵᖕᓂᒃ ᐅᖃᕐᓗᑎᒃ, ‘ᒎᑎᒥᒃ ᐊᖓᔪᖅᑳᕐᔪᐊᒥᒡᓗ ᐅᖃᕐᓂᕐᓘᑎᖃᓚᐅᕐᐳᑎᑦ.’ ᐊᓐᓂᓯᓗᒍ, ᐅᔭᖅᑲᓄᑦ ᒥᓪᓗᕆᐊᕐᑐᕐᓯᐅᒃ ᑐᖁᓪᓗᒍ.”
11ᑍᒤᒻᒪᑦ ᐊᖑᑏᑦ ᐃᒡᓗᒐᓴᖕᒥᐅᑍᑦ, ᐊᖓᔪᖅᑳᑦ ᐱᒻᒪᕆᐅᔪᓪᓗ ᐃᒡᓗᒐᓴᖕᓂ ᓄᓇᓖᑦ, ᐱᓇᓱᐊᕐᐳᑦ ᔨᔨᐱᐊᓕᐅᑉ ᑐᓂᓚᐅᕐᑕᖏᓐᓂᒃ, ᑎᑎᕋᖏᓐᓂᒃ ᒪᓕᒡᓗᑎᒃ. 12ᓂᕆᑦᑍᓕᖁᔨᕗᑦ, ᓁᐹᑦᓗ ᐃᖏᖁᕚᑦ ᐅᐱᓐᓇᕐᓂᕐᐹᒥ ᐃᓄᐃᑦ ᓵᖓᓂ. 13ᐊᖑᑏᒡᓗ ᒪᕐᕉᒃ, ᓴᒡᓗᔪᒃᓵᒃ, ᐃᑎᕋᒥᒃ ᐃᒃᓯᕚᕐᕕᖓᑕ ᐊᑭᐊᓄᑦ ᐃᖏᑉᐴᒃ, ᐅᖃᕐᓂᕐᓘᑎᖃᕐᐳᒡᓗ ᓁᐹᑦᒥᒃ ᐃᓄᐃ ᓵᖓᓂ, ᐅᖃᕐᓗᑎᒃ, “ᓁᐹᑦ ᐅᖃᕐᓂᕐᓘᑎᖃᓚᐅᕐᐳᖅ ᒎᑎᒥᒃ ᐊᖓᔪᖅᑳᕐᔪᐊᕐᒥᒡᓗ.” ᑕᕝᕙ ᐊᓐᓂᓯᕚᑦ ᐃᒡᓗᒐᓮᑦ ᓯᓚᑖᓄᑦ ᒥᓪᓗᕐᐹᓪᓗ ᐅᔭᖅᑲᓄᑦ ᑐᖁᓪᓗᒍ. 14ᑭᖑᓂᖓᒍᑦ ᐅᖃᕆᐊᕐᑐᕐᑎᑦᓯᕗᑦ ᔨᔨᐱᐊᓕᒧᑦ ᐅᖃᕐᓗᑎᒃ, “ᓁᐹᑦ ᐅᔭᖅᑲᓄᑦ ᒥᓪᓗᕐᑕᐅᓪᓗᓂ; ᑐᖁᕗᖅ.”
15ᑕᒪᑐᒪ ᑭᖑᕐᖓᒍᑦ, ᔨᔨᐱᐅᓪ ᑐᓴᕋᒥ ᓁᐹᑦ ᒥᓪᓗᕐᑕᐅᓪᓗᓂ ᑐᖁᓂᖓᓂᒃ, ᐂᕼᐊᑉ ᐅᖃᐅᑎᕚ, “ᒪᑭᓪᓗᑎᑦ, ᓁᐹᑦ ᔨᔭᕆᐅᓪᒥᐅᑕᐅᑉ ᕔᓂᓕᐅᕐᕕᖓ ᐱᑖᕆᓕᕈᒃ, ᐃᓕᖕᓄᑦ ᑐᓂᔪᒪᓚᐅᓐᖏᑕᖓ ᑮᓇᐅᔭᒧᑦ; ᓁᐹᑦ ᐃᓅᔪᓐᓃᕐᒪᑦ, ᑐᖁᕗᕐᓕ.” 16ᐂᕼᐊᑉᓗ ᑐᓴᑐᐊᕋᒥ ᓁᐹᑦ ᑐᖁᓂᖓᓂᒃ, ᒪᑭᑉᐳᖅ ᐂᓪᓗᓂᓗ ᓁᐹᑦ ᔨᔭᕆᐅᓪᒥᐅᑕᐅᑉ ᕔᓂᓕᐅᕐᕕᖓᓄᑦ ᐱᑖᕆᔭᕐᑐᕐᓗᒍ.
17ᑕᕝᕙ ᐊᑕᓂᐅᑉ ᐅᖃᐅᓯᖓ ᑎᑭᑉᐳᖅ ᐃᓔᑦᔭᒧᑦ ᑎᓯᐰᑎᒥᐅᑕᕐᒧᑦ, ᐅᖃᕐᓗᓂ, 18“ᒪᑭᓪᓗᑎᑦ, ᐂᕼᐊᑉ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓ ᐅᐸᓕᕈᒃ, ᓴᒥᐊᕆᐊᒦᑦᑐᖅ; ᑕᑯᒋᑦ, ᓁᐹᑦ ᕔᓂᓕᐅᕐᕕᖓᓃᑉᐳᖅ, ᑖᑦᓱᒥᖓ ᐱᑖᕆᐊᕐᑐᕐᓗᓂ. 19ᐅᖃᐅᑎᔪᒫᕐᐸᑦ, ᐅᖃᕐᓗᑎᑦ, ‘ᐊᑕᓂᖅ ᐃᒫᒃ ᐅᖃᕐᐳᖅ, “ᑐᖁᑦᓯᓚᐅᕐᐲᑦ, ᐱᖁᑎᖓᓂᒡᓗ ᐱᑖᕐᓗᑏᑦ?”’ ᐅᖃᐅᑎᔪᒫᕐᐸᑦ, ᐅᖃᕐᓗᑎᑦ, ‘ᐊᑕᓂᖅ ᐃᒫᒃ ᐅᖃᕐᐳᖅ: “ᓁᐹᑦ ᐊᐅᖓᓂᒃ ᕿᒻᒦᑦ ᐊᓗᒃᑐᓚᐅᕐᑐᑦ ᐃᕝᕕᑦ ᓇᖕᒥᓂᖅ ᐊᐅᖕᓂᒃ ᐊᓗᒃᑐᕈᒫᕐᐳᑦ.”’”
20ᑕᕝᕙ ᐂᕼᐊᑉ ᐃᓔᑦᔭᒧᑦ ᐅᖃᕐᐳᖅ, “ᓇᓂᕕᖔ, ᐊᑭᕋᕐᑐᕐᑎᒐ?”
ᑖᑦᓱᒪ ᑭᐅᕚ, “ᓇᓂᕙᒋᑦ, ᐃᓕᖕᓂᒃ ᑐᓂᕐᕈᑎᒋᓚᐅᕋᕕᑦ ᐱᐅᖏᑦᑐᓕᓂᕐᒧᑦ ᐊᑕᓂᐅᑉ ᑕᑯᓐᓇᕐᑕᖓᒍᑦ. 21‘ᑕᑯᒋᑦ, ᐃᓕᖕᓄᑦ ᐱᐅᖏᑦᑐᒥᒃ ᑎᑭᕝᕕᐅᑎᓐᓂᐊᕐᐸᒋᑦ; ᐊᕐᓵᕐᓂᐊᓕᕐᐸᒋᑦ ᓄᖑᑕᐅᑎᓪᓚᕆᒡᓗᑎᑦ, ᐂᕼᐊᐱᐅᓪᓗ ᐃᓚᓕᒫᖏᑦ ᐊᖑᑎᑦ ᓄᖑᑎᓐᓂᐊᕐᐸᒃᑲ, ᕿᓚᒃᓱᕐᓯᒪᔪᑦ ᕿᓚᒃᓱᕐᓯᒪᖏᑦᑐᓪᓗ, ᐃᓴᕆᐊᓕᒥᐅᓂ. 22ᐃᓚᑎᑦ ᔨᕈᐳᐊᑎᑐᑦ ᓂᐹᑦ ᐃᕐᓂᖓᑐᑦ ᑍᒤᑎᓐᓂᐊᕐᐸᒃᑲ, ᐹᓴᐅᓪᓗ ᐃᓚᖏᑎᑐᑦ ᐊᕼᐂᔭᐅᑉ ᐃᕐᓂᖓᑐᑦ, ᓂᓐᖓᒃᓮᓚᐅᕐᓃᑦ ᐅᕙᓐᓂᒃ ᐱᓪᓗᒍ, ᐃᓴᕆᐊᓕᒥᐅᑦ ᐊᔪᕐᑐᓕᑎᓚᐅᕋᕕᒋᑦ.’ 23#ᐊᑕᓃᑦ ᐂᑉᐸᖏᑦ 9:36.ᔨᔨᐱᐅᓪ ᐱᓪᓗᒍ ᐊᑕᓂᖅ ᐅᖃᕆᕗᖅ, ‘ᕿᒻᒦᑦ ᔨᔨᐱᐊᓪᒥᒃ ᓂᕆᔪᒫᕐᐳᑦ, ᔨᔭᕆᐅᓕᐅᑉ ᐊᕙᓗᖏᑕ ᐃᓗᐊᓂ.’ 24ᐂᕼᐊᐱᐅᑉ ᓇᖕᒥᓂᖏᑦ ᐃᒡᓗᒐᓴᖕᓂ ᑐᖁᔪᑦ ᕿᒻᒥᓄᑦ ᓂᕆᔭᐅᔪᒫᕐᐳᑦ, ᓇᖕᒥᓂᖏᓪᓗ ᓄᓇᑐᐃᓐᓇᒥ ᑐᖁᔪᑦ ᑎᖕᒥᐊᓂᑦ ᓂᕆᔭᐅᔪᒫᕐᐳᑦ.”
25(ᐂᕼᐊᑉᑐᑦ ᐱᔪᖃᓚᐅᓐᖏᓚᖅ ᐃᒻᒥᓂᒃ ᑐᓂᕐᕈᑎᒋᔪᑎᑐᑦ ᐊᔪᕐᑐᓕᓂᕐᒧᑦ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᓄᓕᐊᒥᓄᑦ ᔨᔨᐱᐅᓪᒧᑦ ᑎᓕᐅᕐᑕᐅᓚᐅᕐᒪᑦ. 26ᓇᕐᕈᓇᕐᑐᒻᒪᕆᐊᓗᖕᒥᒃ ᐱᓇᓱᐊᓚᐅᕐᒪᑦ ᒎᑎᓐᖑᐊᓂᒃ ᒪᓕᒃᓴᕐᓗᓂ, ᐊᒧᕅᑎᑦ ᐱᓂᐊᕐᓂᕆᓚᐅᕐᑕᖏᑎᑐᑦ, ᐊᑕᓂᐅᑉ ᐃᓇᖏᕐᑕᐅᑎᓚᐅᕐᑕᖏᓐᓄᑦ ᐃᓴᕆᐊᓕᒥᐅᓄᑦ.)
27ᐂᕼᐊᐱᐅᓪᓗ ᐅᖃᐅᓰᑦ ᑕᒪᒃᑯᐊ ᑐᓴᕋᒥᒋᑦ, ᐊᓐᓄᕌᓂ ᐊᓕᒃᐰᑦ, ᐊᓐᓄᕌᕐᓗᓂᓗ ᐳᑐᕐᓛᓂᒃ ᖃᕿᐊᓕᕐᑐᕐᓯᐅᑎᓂᒃ, ᓂᕆᑦᑍᓕᓚᐅᕐᐳᖅ ᓯᓂᖃᑦᑕᕐᓗᓂᓗ ᐳᑐᕐᓛᓂᒃ ᐊᑐᕐᓗᓂ, ᑕᑯᑦᓱᓇᕐᓗᓂ ᕿᒃᓵᒡᓗᓂᓗ.
28ᐊᑕᓂᐅᓪᓗ ᐅᖃᐅᓯᖓ ᐃᓔᑦᔭᒧᑦ ᑎᓯᐰᑎᒥᐅᑕᕐᒧᑦ ᑎᑭᑉᐳᖅ, ᐅᖃᕐᓗᓂ, 29“ᑕᑯᓚᐅᕐᐲᑦ, ᐂᕼᐊᑉ ᐃᒻᒥᓂᒃ ᒥᑭᒡᓕᑎᕐᓂᖓᓂᒃ ᓵᓐᓂ? ᑖᓐᓇ ᓵᓐᓂ ᒥᑭᒡᓕᑎᓚᐅᕐᒪᑦ, ᐱᐅᖏᑦᑐᑦ ᑎᑭᑎᑦᓱᒫᕈᓐᓃᕐᐸᒃᑲ ᐃᓅᑎᓪᓗᒍ; ᐃᕐᓂᖓᓕ ᐃᓅᑎᓪᓗᒍ ᐱᐅᖏᑦᑐᑦ ᑎᑭᑎᑦᓱᒫᕐᐸᒃᑲ ᓇᖕᒥᓂᖏᓐᓄᑦ.”
Currently Selected:
ᐊᑕᓃᑦ ᓯᕗᓪᓖᑦ 21: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
