ᐊᑕᓃᑦ ᓯᕗᓪᓖᑦ 18
18
ᐃᓔᑦᔭᓗ ᐰᓕᐅᓪᓗ ᐅᖃᕐᑎᖏᑦ
1ᑕᒪᑐᒪ ᑭᖑᕐᖓᒍᑦ ᐅᓪᓗᐃᑦ ᐅᓄᕐᑐᑦ ᐊᓂᒍᕐᑎᓪᓗᒋᑦ ᐊᑕᓂᐅᑉ ᐅᖃᐅᓯᖓ ᑎᑭᑉᐳᖅ ᐃᓔᑦᔭᒧᑦ, ᐊᕐᕌᒍᐃᑦ ᐱᖓᔪᐊᓐᓂ, ᐅᖃᕐᓗᓂ, “ᐂᓕᕆᑦ, ᐂᕼᐊᑉᒧᑦ ᐅᐸᒍᑎᓗᑎᑦ; ᓯᓚᓗᒃᑎᑦᓯᓂᐊᓕᕋᒪ ᓄᓇᒧᑦ.” 2ᑕᕝᕙ ᐃᓔᑦᔭ ᐂᓕᕐᐳᖅ ᐅᐸᒍᑎᓪᓗᓂ ᐂᕼᐊᑉᒧᑦ.
ᑳᖕᓇᕐᑐᕐᔪᐊᖅ ᐱᕕᒡᔪᐊᓕᕐᑎᓪᓗᒍ ᓴᒥᐊᕆᐊᒥ. 3ᐂᕼᐊᐱᐅᑉ ᐅᐸᑍᐊ ᕾᖁᕚ, ᑲᒪᔨᐅᔪᖅ ᐃᒡᓗᖓᓂᒃ. (ᑖᓐᓇ ᐅᐸᑍᐊ ᑲᒪᑦᓯᐊᓪᓚᕆᒃᑑᕗᖅ ᐊᑕᓂᕐᒥᒃ; 4ᔨᔨᐱᐅᓪ ᑐᖁᕅᑎᓪᓗᒍ ᐊᑕᓂᐅᑉ ᐅᖃᕐᑎᖏᓐᓂᒃ, ᐅᐸᑍᐊ ᑎᒍᓯᓚᐅᕐᐳᖅ ᐅᖃᕐᑎᖏᓐᓂᒃ 100ᓂᒃ ᐃᔨᕐᑎᓪᓗᒋᓪᓗ 50ᐅᓈᕐᑎᕐᓗᒋᑦ ᕾᕈᓱᖕᒧᑦ, ᓂᕆᑎᖃᑦᑕᓚᐅᕐᐰᑦ ᓂᐅᖂᔭᒥ ᐃᒥᕐᑎᖃᑦᑕᕐᓗᒋᓪᓗ.) 5ᐂᕼᐊᑉᓗ ᐅᖃᕐᐳᖅ ᐅᐸᑍᐊᒧᑦ, “ᐂᓕᕆᑦ ᓄᓇᒧᑦ ᕿᓂᕆᐊᕐᓗᑎᑦ ᓄᓇᐅᑉ ᐃᓗᐊᓂᑦ ᐃᒥᕐᒥᒃ ᑰᓲᓕᒫᖕᓄᑦ ᓇᕐᓴᓕᒫᓄᓪᓗ, ᐃᒻᒪᖄ ᓇᓂᓯᖁᓪᓗᑕ ᐃᕕᒃᓱᒐᕐᓂᒃ ᐱᐅᓕᓗᑎᒍᓗ ᕿᒻᒥᕐᔪᐊᑦ ᓯᐅᑎᖅᑯᕐᑐᔪᓪᓗ ᕿᒻᒥᕐᔪᐊᑦ ᕿᑐᕐᖓᖏᑕ ᓂᕿᒃᓴᖏᓐᓂᒃ ᐃᓅᔪᓐᓇᖁᓪᓗᒋᑦ, ᑐᖁᔨᐊᖃᖁᓇᑕ ᐆᒪᔪᖁᑎᑦᑎᓐᓂᒃ.” 6ᐊᖏᖃᑎᒌᒃᓗᑎᒃ ᓄᓇᒥᒃ ᐊᕕᒃᐴᒃ ᕿᓂᕆᐊᕐᕕᒋᓂᐊᕐᑕᒥᖕᓂᒃ; ᐂᕼᐊᑉ ᐃᓄᑑᓪᓗᓂ ᐂᕗᖅ ᓄᓇᐅᑉ ᐊᓯᐊᓄᑦ, ᐅᐸᑍᐊᓗ ᓄᓇᐅᑉ ᐊᓯᐊᓄᑦ ᐃᓄᑑᓪᓗᓂ ᐂᖕᒥᑎᓪᓗᒍ.
7ᐅᐱᑍᐊᓗ ᐊᐅᓪᓚᓕᕐᑎᓪᓗᒍ, ᑕᑯᒋᑦ, ᐃᓔᑦᔭᐅᑉ ᑲᑎᕚ; ᐅᐸᑍᐊᐅᓪᓗ ᐃᓕᑕᕆᕚ, ᐹᒻᒪᒃᑎᕐᐳᕐᓗ ᒪᓂᖅᑲᒧᑦ, ᐅᖃᕐᓗᓂᓗ, “ᐃᓔᑦᔭᐅᕖᑦ ᐊᖓᔪᖅᑳᕋ?”
8ᐃᓔᑦᔭ ᑭᐅᕗᖅ, “ᑖᓐᓇᐅᕗᖓ, ᐂᓕᕆᑦ ᐊᖓᔪᖅᑳᑦ ᐅᖃᐅᑎᓗᒍ, ‘ᑕᑯᒋᑦ ᐃᓔᑦᔭ ᑕᒫᓃᑉᐳᖅ.’”
9ᐅᐱᑍᐊᐅᑉ ᐅᖃᐅᑎᕚ, “ᖃᓄᖅ ᐊᔪᕐᑐᓕᓚᐅᕋᒫ, ᐱᔩᑦ ᐂᑦᑑᑎᒋᓕᕐᐱᐅᒃ ᐂᕼᐊᑉᒧᑦ, ᐅᕙᓐᓂᒃ ᑐᖁᑦᓯᖁᓪᓗᒎ? 10ᐊᑕᓂᖅ ᒎᑏᑦ ᐃᓅᖕᒪᑦ, ᓱᓕᓪᓗᖓ ᐅᖃᕐᐳᖓ ᐊᖓᔪᖅᑳᕋ ᑎᓕᓯᖃᑦᑕᓚᐅᕐᐳᖅ ᐃᓅᖃᑎᒌᒡᔪᐊᓄᑦ ᐊᑕᓂᐅᕕᖕᓄᓪᓗ ᕿᓂᖁᔨᓪᓗᓂ ᐃᓕᖕᓂᒃ; ᐅᖃᕐᐸᑕ, ‘ᑕᒫᓃᖏᑦᑐᖅ.’ ᐊᑕᓂᐅᕖᑦ ᓄᓇᖅᑲᑎᒌᓪᓗ ᑕᕝᕙ ᐊᖏᒻᒪᕆᒃᑎᖃᑦᑕᓚᐅᕐᐰᑦ ᓱᓕᓪᓗᑎᒃ ᐃᓕᖕᓂᒃ ᓇᓂᓯᖏᓪᓚᕆᖕᓂᖏᓐᓂᒃ. 11ᒫᓐᓇᓕ ᐅᖃᕐᐳᑎᑦ, ‘ᐂᓕᕆᑦ, ᐊᖓᔪᖅᑳᑦ ᐅᖃᐅᑎᓗᒍ, “ᑕᑯᒋᑦ, ᐃᓔᑦᔭ ᑕᒫᓃᑉᐳᖅ.”’ 12ᐃᓕᖕᓂᓪᓗ ᕿᒪᕉᑎᑐᐊᕈᒪ, ᐊᑕᓂᐅᑉ ᐊᓂᕐᓂᖓᑕ ᐊᐅᓪᓚᕈᑎᓂᐊᕐᐹᑎᑦ ᓄᓇᒧᑦ ᖃᐅᔨᒪᓐᖏᑕᓐᓄᑦ; ᑕᕝᕙ, ᐅᖃᕆᐊᕐᑐᕈᒪ ᐂᕼᐊᑉᒧᑦ ᓇᓂᓐᖏᑐᐊᕈᓂᑎᑦ, ᑕᕝᕙ ᑐᖁᓐᓂᐊᕐᐹᖓ, ᑭᓯᐊᓂᓕ ᐅᕙᖓ ᐱᔩᑦ ᐊᑕᓂᕐᒥᒃ ᑲᒪᑦᓯᐊᒻᒪᕆᒃᐳᖓ ᐅᕕᒃᑲᐅᓂᓐᓂᑦ. 13ᑐᓴᓚᐅᓐᖏᓚᑏᑦ? ᐊᖓᔪᖅᑳᒃ ᖃᓄᐃᓕᐅᓚᐅᕐᒪᖔᕐᒪ ᔨᔨᐱᐅᓪ ᑐᖁᕅᑎᓪᓗᒍ ᐊᑕᓂᐅᑉ ᐅᖃᕐᑎᖏᓐᓂᒃ, ᐃᔨᕐᓯᓚᐅᕋᒪ ᐊᑕᓂᐅᑉ ᐅᖃᕐᑎᖏᓐᓂᒃ 100ᓂᒃ, ᕾᕈᓱᖕᒧᐊᕐᑎᓚᐅᕐᐸᒃᑲ 50ᐅᓈᕐᑎᕐᓗᒋᑦ, ᓂᕆᑎᓪᓗᒋᓪᓗ ᓂᐊᖂᔭᒥᒃ ᐃᒥᕐᑎᓪᓗᒋᓪᓗ. 14ᒫᓐᓇᓗ ᐅᖃᐅᑎᓕᕐᐸᕐᒪ, ᐂᓕᕆᑦ, ᐊᖓᔪᖅᑳᑦ ᐅᖃᐅᑎᓗᒍᒃ, ‘ᑕᑯᒋᑦ ᐃᓔᑦᔭ ᑕᒫᓃᑉᐳᖅ.’ ᑖᑦᓱᒪᓗ ᑐᖁᓐᓂᐊᕐᐹᖓ.”
15ᐃᓔᑦᔭᓗ ᐅᖃᕐᐳᖅ, “ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓅᖕᒪᑦ, ᑖᓐᓇ ᐱᔨᑦᓯᕐᑕᕋ, ᐅᓪᓗᒥ ᓇᖕᒥᓂᖅ ᐂᑦᑑᑎᒋᓪᓚᕆᖕᓂᐊᕐᐳᖓ ᐂᕼᐊᐱᒧᑦ.”
16ᑕᕝᕙ ᐅᐸᑍᐊ ᐂᕗᖅ ᐂᕼᐊᑉᒧᑦ ᐅᖃᐅᑎᓪᓗᒍᓗ, ᐂᕼᐊᐱᓗ ᑕᕝᕙ ᐂᕗᖅ ᐃᓔᑦᔭᒧᑦ. 17ᐂᕼᐊᐱᐅᑉ ᐃᓔᑦᔭ ᑕᑯᒐᒥᐅᒃ, ᐅᖃᐅᑎᕚ, “ᑖᓐᓇᐅᕖᑦ ᐃᓴᕆᐊᓕᒥᐅᓂᒃ ᓈᒻᒪᖏᓕᐅᕐᑎᑦᓯᔨ?”
18ᐃᓔᑦᔭ ᑭᐅᕗᖅ, “ᐃᓴᕆᐊᓕᒥᐅᑦ ᓈᒻᒪᖏᓕᐅᕐᑎᓐᖏᓚᒃᑲ; ᐃᕝᕕᖔᖅ, ᐊᑖᑍᓪᓗ ᓈᒻᒪᖏᓕᐅᕐᑎᑦᓯᕗᓯᒃ, ᐊᑕᓂᐅᑉ ᐱᖁᔭᖏᓐᓂᒃ ᕿᒤᓚᐅᕋᑦᓯᒃ ᒪᓕᓕᕐᓗᓯᒡᓗ ᐰᓕᓂᒃ. 19ᒫᓐᓇᓕ ᑍᒤᒻᒪᑦ ᐃᓴᕆᐊᓕᒥᐅᓕᒫᑦ ᑲᑎᓯᖁᓗᒋᑦ ᐅᕙᓐᓂᒃ ᑎᓕᓯᓕᕆᑦ ᖃᖅᑲᒧᑦ ᑳᕐᒥᐅᑉ ᖄᖓᓄᑦ, ᐰᓕᐅᓪᓗ ᐅᖃᕐᑎᖏᑦ 450, ᐊᓯᕋᐅᓪᓗ ᐅᖃᕐᑎᖏᑦ 400, ᓂᕆᕙᒃᑐᑦ ᔨᔨᐱᐊᓕᐅᑉ ᓂᕆᕕᖓᓂ ᕾᖃᑕᐅᓗᑎᒃ.”
20ᑕᕝᕙ ᐂᕼᐊᑉ ᑎᓕᓯᕗᖅ ᕾᖁᓪᓗᒋᑦ ᐃᓴᕆᐊᓕᒥᐅᓕᒫᑦ, ᐅᖃᕐᑏᓪᓗ ᑲᑎᖁᕔᑦ ᖃᖅᑲᒧᑦ ᑳᕐᒥᐅᓪᒧᑦ. 21ᐃᓔᑦᔭᐅᓪᓗ ᐃᓄᓕᒫᑦ ᖃᒡᓕᒋᐊᕐᓗᒋᑦ, ᐅᖃᐅᑎᕔᑦ, “ᖃᓄᖅ ᐊᑯᓂᐅᑎᒋᔪᖅ ᓇᓕᐊᖕᓄᕿᑕᖕᓂᐊᕐᐱᓰ ᒪᕐᕉᓕᖅᑭᖓᔪᒥᒃ ᐃᓱᒪᖃᕐᓗᓯ? ᐊᑕᓂᖅ ᒎᑎᐅᒃᐸᑦ, ᑖᓐᓇ ᒪᓕᒃᓯᐅᒃ; ᐰᓕᓕ ᒎᑎᐅᒃᐸᑦ ᑖᓐᓇ ᒪᓕᖕᓂᐊᕐᐸᓯ.” ᐃᓄᐃᓪᓗ ᑭᐅᔪᖃᓚᐅᓐᖏᓚᑦ ᐊᑕᐅᓯᕐᒥᒡᓘᓐᓃᑦ. 22ᑕᕝᕙ ᐃᓔᑦᔭᐅᑉ ᐃᓄᐃᑦ ᐅᖃᐅᑎᕔᑦ, “ᐅᕙᖓ, ᐅᕙᖓᑑᓪᓗᖓ ᐊᑕᓂᐅᑉ ᐅᖃᕐᑎᖏᓐᓂ ᐊᒥᐊᒃᑯᑑᕗᖓ; ᐰᓕᐅᓪᓕ ᐅᖃᕐᑎᖏᑦ 450ᐅᕗᑦ. 23ᑍᒤᒻᒪᑦ ᑐᓂᓯᔭᐅᓚᐅᕐᑕ ᐃᒻᒧᒃᓯᐅᒊᑦ ᐊᖑᓴᓪᓗᖏᖕᓂᒃ ᒪᕐᕉᖕᓂᒃ; ᐊᑐᓂᑦ ᓂᕈᐊᕐᓂᐊᕐᐳᓯ ᓇᓪᓕᐊᓐᓃᓐᓂᐊᕐᒪᖔᑦᓯ ᐃᒻᒧᒃᓯᐅᒐᐅᑉ ᐊᖑᓴᓪᓗᖓᓂᒃ, ᓱᕅᔭᕐᓗᒍ ᐃᓕᓗᒍᓗ ᕿᔪᐃᑦ ᖄᖓᓄᑦ, ᑭᓯᐊᓂ ᐃᑯᐊᓪᓚᖕᓂᐊᓐᖏᓚᓯ; ᐅᕙᖓᑦᑕᐅᖅ ᐃᒻᒧᒃᓯᐅᒐᐅᑉ ᐊᖑᓴᓪᓗᖓᑕ ᐂᑉᐸᖓᓂᒃ ᐊᑐᐃᓐᓇᕈᐃᓂᐊᕐᐳᖓ ᐃᓕᓗᒍᓗ ᕿᔪᐃᑦ ᖄᖓᓄᑦ, ᐃᑯᐊᓪᓚᖕᓂᐊᖏᓐᓂᕙᕋ. 24ᒎᑎᑦᓯᓗ ᐊᑎᖓᓄᑦ ᑐᒃᓯᐊᕐᓂᐊᕐᐳᓯ ᐅᕙᖓᓗ ᐊᑕᓂᐅᑉ ᐊᑎᖓᓄᑦ ᑐᒃᓯᐊᕐᓂᐊᕆᕗᖓ; ᑖᓐᓇ ᒎᑎ ᑭᐅᓗᓂ ᐃᑯᒪᒥᒃ ᐃᑭᑎᑦᓯᔪᖅ, ᑖᓐᓇ ᒎᑎᐅᓂᐊᕐᐳᖅ.”
ᐃᓄᓕᒫᓪᓗ ᑭᐅᕗᑦ, “ᐅᖃᑦᓯᐊᕐᐳᑎᑦ.”
25ᐃᓔᑦᔭᐅᑉ ᐰᓕᐅᑉ ᐅᖃᕐᑎᖏᑦ ᐅᖃᐅᑎᕔᑦ, “ᓂᕈᐊᕆᑦᓯ ᐃᒻᒧᒃᓯᐅᒐᐅᑉ ᐊᖑᓴᓪᓗᖓᓂᒃ ᐊᑕᐅᓯᕐᒥᒃ ᓯᕗᓪᓕᐅᓪᓗᓯᓗ ᐅᐸᓗᖎᔭᓕᕆᑦᓯ, ᐅᓄᕋᑦᓯ; ᒎᑎᓯᓗ ᐊᑎᖓ ᑐᒃᓯᐊᕐᕕᒋᓗᒍ, ᑭᓯᐊᓂᓕ ᐃᑯᐊᓪᓚᖏᓪᓗᒍ.”
26ᑕᕝᕙ ᐃᒻᒧᒃᓯᐅᒐᐅᑉ ᐊᖑᓴᓪᓗᖓ ᐱᕚᑦ ᑐᓂᔭᐅᓯᒪᔪᖅ, ᐊᑐᐃᓐᓇᕈᕐᓗᒍᓗ, ᒎᑎᒥᖕᓄᓪᓗ ᐰᓕᒧᑦ ᑐᒃᓯᐊᓚᐅᕐᐳᑦ ᐊᑎᖓ ᑍᓪᓗᒍ ᐅᓪᓛᒥᑦ ᐅᓪᓘᑉ ᕿᑎᕋᓕᕐᓂᖓᓄᑦ, ᐅᖃᕐᓗᑎᒃ, “ᐰᓖ, ᑐᓴᓚᐅᕐᑎᒍᑦ!” ᑭᓯᐊᓂᓕ ᓂᐱᖃᕐᑐᖃᓚᐅᓐᖏᓚᖅ, ᑭᐅᔪᖃᓚᐅᕋᓂᓗ. ᑖᓂᓯᕐᓗᑎᒃ ᑐᓂᕐᕈᓯᕐᕕᒃ ᓴᓇᓚᐅᕐᑕᑎᒃ ᑬᕙᓪᓚᖃᑦᑕᓚᐅᕐᐹᑦ.
27ᑍᒤᓕᐅᕐᑎᓪᓗᒋᑦ, ᐅᓪᓗᖅ ᕿᑎᕋᓕᕐᒪᑦ, ᐃᓔᑦᔭᐅᑉ ᒥᑕᐅᑎᒋᓕᕐᐰᑦ ᐅᖃᐅᑎᓪᓗᒋᑦ, “ᕾᒐᓛᕐᓗᓯ ᓂᐱᖅᑯᕐᑐᒋᐊᓚᐅᕆᑦᓯ, ᒎᑎᐅᒃᐸᑦ; ᐃᒻᒪᖄ ᐊᓕᐊᓁᒍᓱᑐᐃᓐᓇᕐᐳᖅ, ᐊᓯᐊᓂᒡᓘᓐᓃᑦ ᐱᔭᒃᓴᖃᕐᒪᑦ, ᐅᕝᕙᓗ ᐊᐅᓪᓚᕐᓯᒪᕗᖅ, ᐅᕝᕙᓘᓐᓃᑦ ᓯᓂᖕᒪᑦ ᑐᐹᕐᓴᕐᑕᐅᔭᕆᐊᖃᕐᒪᑦ.” 28ᓂᐱᖅᑯᕐᑐᓯᒋᐊᕐᐳᓪᓗ, ᐃᒻᒥᖕᓂᒡᓗ ᑭᓪᓕᐊᓪᓗᑎᒃ ᑍᒫᒃ ᐱᐅᓯᖃᕋᒥᒃ ᓴᕕᒡᔪᐊᓄᑦ ᓴᕕᑐᐃᓐᓇᓄᓪᓗ, ᐊᐅᓈᓕᓚᐅᖏᓐᓂᕐᒥᖕᓂ. 29ᐅᓪᓘᑉ ᕿᑎᕋᓕᕐᓂᖓ ᐊᓂᒍᕐᒪᑦ, ᓇᓚᐅᑦᑍᓇᓱᓚᐊᕐᐳᓪᓗ ᐅᓐᓄᖕᒧᑦ ᑐᓂᕐᕈᓯᕐᕕᒃᓴᒧᑦ ᑎᑭᓪᓗᑎᒃ, ᑭᓯᐊᓂᓕ ᓂᓪᓕᕐᑐᖃᓚᐅᓐᖏᓚᖅ; ᓇᓪᓕᐊᓐᓂᒡᓘᓐᓃᑦ ᑭᐅᔪᖃᓚᐅᕋᓂ, ᓂᐱᒥᒡᓘᓐᓃᑦ ᑐᓴᕐᓴᕈᕐᑐᖃᓚᐅᓐᖏᓚᖅ.
30ᑕᕝᕙ ᐃᓔᑦᔭᐅᑉ ᐃᓄᓕᒫᑦ ᐅᖃᐅᑎᕔᑦ, “ᕾᓗᓯ ᐅᕙᓐᓄᑦ ᖃᒡᓕᒋᐊᕆᑦᓯ.” ᑕᕝᕙ ᐃᓄᓕᒫᑦ ᑖᑦᓱᒧᖓ ᖃᒡᓕᒋᐊᕐᐳᑦ. ᐊᑕᓂᐅᓪᓗ ᑐᓂᕐᕈᓯᕐᕕᖓ ᐋᖅᑭᒃᓱᕐᐹ ᓱᕋᒃᑕᐅᓯᒪᖕᒪᑦ. 31#ᒨᓯᓯ ᓯᕗᓪᓖᑦ 32:28; 35:10.ᐃᓔᑦᔭ ᐅᔭᕋᖕᓂᒃ 12ᓂᒃ ᑲᑎᕐᓱᐃᕗᖅ, ᔧᑰᑉ ᐃᕐᓂᖏᑕ ᑭᖑᕚᖏᑕ ᐅᓄᕐᓂᖏᑦ ᒪᓕᒡᓗᒋᑦ, ᐊᑕᓂᐅᑉ ᐅᖃᐅᓯᖏᑦ ᑖᑦᓱᒧᖓ ᑎᑭᓚᐅᕐᑐᑦ ᒪᓕᒡᓗᒋᑦ, ᐅᖃᕐᓗᓂ, “ᐃᓴᕆᐊᓕᒥᒃ ᐊᑎᖃᕐᑐᒃᓴᐅᕗᑎᑦ.” 32ᑖᒃᑯᓄᖓ ᐅᔭᕋᖕᓄᑦ ᑐᓂᕐᕈᓯᕐᕕᓕᐅᕐᐳᖅ ᐊᑕᓂᐅᑉ ᐊᑎᖓᓂ. ᑭᒡᓕᓕᒫᖓᓗ ᐃᑎᕐᓴᓕᐅᕐᐹ ᐃᒪᖃᕐᕕᒃᓴᒥᒃ, ᖃᓪᓗᑎᓄᑦ ᓯᑕᒪᓄᑦ ᓈᒻᒪᒃᑐᒥᒃ. 33ᕿᔪᐃᓪᓗᑦ ᑐᓂᕐᕈᓯᕐᕕᐅᑉ ᖄᖓᓄᐊᕐᐰᑦ, ᐃᒻᒧᒃᓯᐅᒐᐅᑉ ᐊᖑᓴᓪᓗᖓ ᓱᕅᔭᕐᓗᒍ ᕿᔪᐃᑦ ᖄᖓᓄᐊᕐᐹ. ᐅᖃᕐᓗᓂᓗ, “ᐃᒥᕐᑕᐅᑏᑦ ᓯᑕᒪᑦ ᐃᒻᒥᕐᓗᒋᑦ, ᑐᓂᕐᕈᑎᒃᓮᑦ ᐃᑯᐊᓪᓚᒐᒃᓴᑦ ᑖᒃᑯᓄᖓ ᑯᕝᕕᕆᓯᐅᒃ, ᕿᔪᐃᓪᓗ.” 34ᐅᖃᒃᑲᓐᓂᕐᐳᕐᓗ, “ᐊᑏᓗ ᑯᕝᕕᕆᓯᐅᒃ ᐂᑉᐸᖓᓂ,” ᑕᕝᕙ ᑯᕝᕕᕆᕔᑦ ᐂᑉᐸᖓᓂ. ᐅᖃᐅᑎᒃᑲᓐᓂᕐᐰᓪᓗ, “ᐊᑏᓗ ᑯᕝᕕᕆᓯᐅᒃ ᐱᖓᔪᐊᖓᓐᓂᒃ,” ᑯᕝᕕᕆᕔᓪᓗ ᐱᖓᔪᐊᖓᓐᓂᒃ. 35ᐃᒥᕐᓗ ᑐᓂᕐᕈᓯᕐᕕᐅᑉ ᐊᕙᑖᓄᑦ ᑰᒃᐳᖅ, ᐃᑎᕐᓴᓕᐅᕐᓯᒪᔪᕐᓗ ᑕᑕᑕᐅᕗᖅ ᐃᒥᕐᒧᑦ.
36ᑕᕝᕙᓂᓗ ᐅᓐᓄᒃᑯᑦ ᑐᓂᕐᕈᓯᓐᓂᖅ ᓇᓪᓕᐅᑎᖕᒪᑦ, ᐃᓔᑦᔭ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᖃᒡᓕᒋᐊᕐᓗᓂ ᐅᖃᕐᐳᖅ, “ᐊᑕᓃᖅ, ᐂᑉᕋᕼᐋᒻ, ᐂᓴᑭᐅᓪᓗ, ᐃᓴᕆᐊᓕᐅᓪᓗ ᒎᑎᖓ, ᐅᓪᓗᒥ ᖃᐅᔨᔭᐅᓕᕆᑦ ᐊᑕᓂᐅᒐᕕᑦ ᐃᓴᕆᐊᓕᐅᑉ ᒎᑎᖓ, ᐅᕙᖓᓗ ᐱᔨᒋᒐᕕᖓ, ᑕᒪᒃᑯᐊᓗ ᐱᓇᓱᐊᕐᑕᒃᑲ ᐅᖃᐅᓯᕆᓯᒪᔭᒃᑯᑦ ᐱᓇᓱᐊᖃᑦᑕᕋᒃᑭᑦ. 37ᑐᓴᓚᐅᓐᖓ, ᐊᑕᓃᖅ, ᑐᓴᓚᐅᓐᖓ, ᐅᑯᐊ ᐃᓄᐃᑦ ᖃᐅᔨᖁᓪᓗᒋᑦ ᐃᕝᕕᑦ ᐊᑕᓂᐅᒐᕕᑦ ᒎᑎ, ᐆᒻᒪᑎᖏᓪᓗ ᐅᑎᕐᑎᓪᓗᒋᑦ ᐃᓕᖕᓄᑦ.”
38ᑕᕝᕙ ᐊᑕᓂᐅᑉ ᐃᑯᒪᖁᑎᖓ ᐊᖅᑲᕐᐳᖅ, ᑐᓂᕐᕈᑏᓪᓗ ᐃᑯᐊᓚᑎᑕᒃᓴᖅ ᓄᖑᑉᐹ, ᕿᔪᐃᓪᓗ, ᐅᔭᕅᓪᓗ, ᐳᔪᕅᓪᓗ, ᐃᒥᕐᓗ ᓄᖑᑉᐹ ᐃᑎᕐᓴᒦᑦᑐᖅ. 39ᐃᓄᓕᒫᓪᓗ ᑕᒪᑐᒥᖓ ᑕᑯᒐᒥᒃ, ᒪᓂᖅᑲᒧᑦ ᐹᒻᒪᒃᐳᑦ; ᐅᖃᕐᓗᑎᒡᓗ, “ᐊᑕᓂᖅ ᒎᑎᐅᕗᖅ! ᐊᑕᓂᖅ ᒎᑎᐅᕗ!”
40ᐃᓔᑦᔭᐅᓪᓗ ᐅᖃᐅᑎᕔᑦ, “ᐰᓕᐅᑉ ᐅᖃᕐᑎᖏᑦ ᑎᒍᓯᐅᒃ! ᐊᑕᐅᓯᕐᒥᒡᓘᓐᓃᑦ ᕿᒫᓯᔪᖃᖁᓇᒍ!” ᑕᕝᕙ ᑎᒍᕔᑦ, ᐃᓔᑦᔭᐅᓪᓗ ᑭᓲᓂ ᑰᒐᓛᖓᓄᐊᕈᑎᕔᑦ, ᑕᕝᕙᓂᓗ ᑐᖁᓪᓗᒋᑦ.
ᓯᓚᓗᔪᐃᑦᑑᑉ ᐃᓱᓕᓐᓂᖓ
41ᐃᓔᑦᔭᐅᓪᓗ ᐂᕼᐊᑉ ᐅᖃᐅᑎᕚ, “ᑕᑉᐸᐅᖓ ᐂᓕᕆᑦ, ᓂᕆᓗᑎᑦ ᐃᒥᓕᕆᑦ; ᓯᓚᓗᒡᔪᐊᖅ ᑐᓴᕐᓴᐅᓕᕐᒪᑦ.” 42#ᔧᒥᓯ 5:18.ᑕᕝᕙ ᐂᕼᐊᑉ ᑕᑉᐸᐅᖓ ᐂᕗᖅ ᓂᕆᓪᓗᓂᓗ ᐃᒥᕐᐳᖅ. ᐃᓔᑦᔭᓗ ᑳᕐᒥᐅᑉ ᖄᖓᓄᐊᕐᐳᖅ; ᐸᒻᒪᒃᑎᕐᓗᓂᓗ ᒪᓂᖅᑲᒧᑦ, ᓂᐊᖁᓂ ᓰᖅᑯᒥᑕ ᐊᑯᓐᓂᖓᓄᐊᕐᓗᒍ. 43ᐱᔨᓂᓗ ᐅᖃᐅᑎᕚ, “ᒫᓐᓇ ᑕᑉᐸᐅᖓ ᑕᑯᔭᕐᑐᕆᑦ, ᐃᒪᐅᑉ ᓇᓛᓄᑦ.”
ᑕᕝᕙ ᑕᑉᐸᐅᓐᖓᕐᐳᖅ ᑕᑯᓂᐊᕐᓗᓂ, ᐅᖃᕐᓗᓂᓗ, “ᓱᓇᑕᖃᓐᖏᓚᖅ.” ᐅᖃᐅᑎᒃᑲᓐᓂᕐᐹ, “ᑕᑉᐸᐅᓐᖓᓚᐅᕐᒥᒋᑦ.” 7ᐃᕐᓱᓗᓂ ᐅᖃᐅᑎᖃᑦᑕᓚᐅᕐᐹ, “ᑕᑯᔭᕐᑐᒃᑲᓐᓂᕆᑦ.”
44ᑭᖑᕐᖓᒍᓪᓗ, 7ᖓᓐᓂ ᑕᑯᓂᐊᕐᒥᒐᒥ, ᐅᖃᕐᐳᖅ, “ᑕᑯᒋᑦ, ᓄᕗᔭᑕᖃᓕᕐᐳᖅ ᐊᖑᑎᐅᑉ ᐊᒡᒐᖓᑎᑐᑦ ᐊᖏᑎᒋᔪᒥᒃ, ᐃᒫᓂᑦ ᓴᖅᑭᑦᑐᒥᑦ!” ᐃᓔᑦᔭᐅᑉ ᐅᖃᐅᑎᕚ, “ᑕᑉᐸᐅᖓ ᐂᓕᕆᑦ ᐂᕼᐊᑉ ᐅᖃᐅᑎᓗᒍ, ‘ᐅᓇᑕᐅᑏᑦ ᐊᒃᓴᓗᐊᓕᒃ ᐊᑐᐃᓐᓇᕈᕐᓗᒍ ᑕᐅᓄᖓ ᐂᓕᕆᑦ, ᓯᓚᓗᖕᒧᑦ ᓄᖅᑲᕐᑎᑕᐅᖁᓇᒃ.’”
45ᐊᑯᓂᐅᑎᓐᓇᒍᑦ ᓯᓚ ᑖᕐᓯᕗᖅ ᓄᕗᔭᓄᑦ ᐊᓄᕆᒧᓪᓗ, ᓯᓚᓗᒡᔪᐊᓕᕐᓗᓂᓗ. ᐂᕼᐊᑉᓗ ᐃᖏᕐᕋᓯᕗᖅ ᐂᓪᓗᓂᓗ ᔨᔭᕆᐅᓪᒧᑦ. 46ᑕᕝᕙ ᐊᑕᓂᐅᑉ ᐊᔪᒐᖃᖏᓐᓂᖓ ᐃᓔᑦᔭᒧᐊᕐᐳᖅ; ᐊᓐᓄᕌᓂᓗ ᕿᑎᕉᑎᒥᓄᑦ ᕿᓚᒃᓗᒋᑦ ᐅᓪᓚᒃᓯᕗᖅ ᐂᕼᐊᑉ ᓯᕗᓂᖓᓂ ᔨᔭᕆᐅᓪᒧᓪᓗ ᑎᑭᖅᑳᕐᐳᖅ.
Currently Selected:
ᐊᑕᓃᑦ ᓯᕗᓪᓖᑦ 18: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
